1. Ịyẹ iDevidi à tị́ chụ iJihova kaka me ụ-ụpwụ nya 2 Sa 22:47?

 AHỊ jam hịhị ẹ-ẹpwụ nya odehe ọlẹ ká akama ọ-ya ahị me ka kaa chịhị ọgụ, du ká ọhịhị kaa lujwo hahị lee ọ-dọmwụ yẹ ọhịhị nyahị da gbang-gbang. Ahị tị chị ọkẹkẹnị yẹẹyẹẹ nyori ahị ka jẹ́-ẹ ka ẹga nya iJihova nyọka dahị ụbwọ! Ẹ-ẹpwụ nya ang ọjẹ́jẹ ọlẹ kọ jene nya ọlẹ, ị kpụhị ịtịya nyori iJihova ri Ohe ọlẹ kọ juwa hịhị bala o-ri, ọ kaa nwụlanọ ụka wuu nyọka dahị ụbwọ. Ụka kahị ye ụbwọ ọdada nyamwụ, ọọwa kaa du kahị ka jẹ́ nyori iJihova “juwa hịhị.” (Wa 2 Sa 22:47.) Ma, nyọlẹ ká iDevidi ya ịnyị kpá bwaa, ọ wụrụ iJihova nyị “ọngọ ma uya yẹm dada” lee Ẹjwọ nyam. Ịyẹ tị́ du kọ ka chụ iJihova, kọ ri Ohe ọhịhị, kaka pwoku ẹjwọ, kọ ri ang ọhịhị ka?

2. Ẹlịyẹ ahị tị́ ka jẹ́ bwu omyi ẹla ọlẹ ká iDevidi ya nyori iJihova nyị lala Ẹjwọ ẹ-ẹga nyamwụ?

² Ẹ-ẹpwụ nya ang ọjẹ́jẹ ọlẹ, ahị ka kụ ẹhị ya ang odudu kị chụ iJihova kaka pwoku ẹjwọ bala ang ọlẹ ká abwọ ọchịchị ọọwa mẹjẹẹhị u-uhye nyamwụ. Ahị ka jẹ́ jaabwọ kahị ka bwu kpụnịrọọ lala Ẹjwọ nyahị ịnyịnyị. Ọhyẹẹkpẹ-ẹkpẹ, ahị ka ya ẹla u-uhye nya agbẹyị ịlẹ kahị ka bwu gbịla abwẹla nya iJihova ịịwa.

ANG ODUDU KỊ WỤRỤ IJIHOVA ẸJWỌ

3. Agbẹyị iyina ịBayịbụụ à tị́ kaa kpa omyi ẹla ọlẹ kọ ri “ẹjwọ” ya ẹla? (Yẹ ifoto ọla )

³ ỊBayịbụụ kaa chabwọ nya iJihova lala “ẹjwọ” nyọka dahị ụbwọ wo etu nya abwẹla nyamwụ ịhyẹ. Omyi ẹla ọwẹ kaa hyeehe gụ́ ụka ká anchẹ nyamwụ á ja gwogbo họọ lala Ohe ọlẹ kọ la ọ-chụ me ka. Ẹga ọhọhẹ ọlẹ kị wụrụ iJihova nyị “ẹjwọ” ri ụpwụ nya Ehile Ọmada 32:4. ỊHana ya ẹ-ẹpwụ nya abwọ ọrịrị nyori “Ohe ọlịgọgọ [lee ẹjwọ] ọhẹ-lọhẹ-ẹ́ ji lala [iJihova] ka.” (1 Sam. 2:2) IHabakuku wụrụ iJihova nyị “Ọngọgbem gbe” lee ẹjwọ nyam. (Hab. 1:12) Ọngọ da Eje Ọnyịịla 73 ya nyori Ohe nyị à ri  “ọngịrị [lee ẹjwọ] nyam lẹ.” (Eje. 73:26) IJihova tị dọmwụ wụrụ ịlọmwụ nyị ẹjwọ ịnyịnyị. (Ayị. 44:8) Ahị ya ẹla u-uhye nya abwẹla ịta nya iJihova ịlẹ kọ dudu kọ lala ẹjwọ bala ọ-yẹ jaabwọ kahị ka bwu hwoo nya “Ohe Oluhye” lee Ẹjwọ nyahị wẹẹ.—Ehile. 32:31.

4. Ụgbẹyị ọlanyị iJihova à tị́ lala ẹjwọ Ọkpịbaa? (Eje Ọnyịịla 94:22)

⁴ IJihova ri ẹga ọkpịbaa. Jaabwọ ká ọngịnyị ka jẹ́-ẹ rụ ka kpịbaa apewa nya ẹjwọ ọtụka ụka nya igbachịwụ ọla uhi-uhi, iJihova kaa chewu keehi ụka kahị juka ẹpwụ nya iwe-ahụrụ ọla uhi-uhi ẹ-ẹpwụ nya ọhịhị. (Wa Eje Ọnyịịla 94:22.) Ọ kaa chewu ke igu oriri nyahị balọọ bala ọ-wu ịngịngịhyẹ ọlẹ kọ ka họhị ang gboyi myị́ oyi kpa hiihi. Ọ tị dọmwụ chehe gbe ijuju nyori ọ ka hu ang myị́ ang ọlẹ kọ kaa chị uhi juhi du kahị kaa la okpunyi ka kpa rụ.—Isi. 34:25, 26.

5. Ányị iJihova à tị́ ka bwu ri Ẹga Ọkpịbaa?

⁵ Ụgbẹyị ọhẹ ọlẹ kahị ka jẹ́-ẹ hu iJihova nya ẹjwọ Ọkpịbaa nyahị ri ọ-ka raabwọ họọ. Ụka kahị raabwọ ha iJihova, ọ kaa ya “okpunyi nya Ohe Oluhye” ọlẹ kọ ka gbe ọkịlẹtụ bala irya nyahị hahị. (Filip. 4:6, 7) Kụ ẹhị yẹ oja nya ọọnahị Artem, kị wu ju agba ọọlajị nya ọmyịmyị nyamwụ wẹẹ. Ụka kọ juwa u-ube nya agba, ọngọ dịrẹ ẹla nyamwụ kaa tọọ ịtọ ẹla la ọngịrị-ọngịrị, kpọọ nwaa-nwaa, bala ọ-chị uhi-uhi jwoo. Artem yẹkẹẹ: “Ọ kaa chịm aga ụka myị́ ụka ká ọngọọwa á wụrụm nyọka tọm ẹla wo. . . . M̀ kaa raabwọ ha iJihova ụka myị́ ụka. M̀ kaa bịlẹ kọ ka ya okpunyi nya ọkịlẹtụ bala ẹla ọjẹ́jẹ ham. Ijẹẹhị nya ọngọ dịrẹ ẹla ọọwa á tị họ ụkụrwọ u-uhye nyam ka. . . . Ụbwọ ọdada nya iJihova du kọ lam lala o-ri am nyị dayị ẹ-ẹkpẹ nya ẹjwọ ọlala ugulọ.”

6. Ịyẹ tị́ du kahị ka jẹ́-ẹ kpụnịrọ iJihova ụka myị́ ụka? (Ayịsaya 26:3, 4)

⁶ IJihova ju ọdahịhile. Lala ẹjwọ ọtụka ọlẹ kọ jẹ́-ẹ pyị giri kaka, iJihova juwa nyọka dahị ụbwọ ụka myị́ ụka. Ahị ka jẹ́-ẹ dahịhilọọ chajị ọwa-à ri “Ẹjwọ ọ-chewu keehi” lẹ. (Wa Ayịsaya 26:3, 4.) Ọ ka hịhị pyịyọọ du kọ ka jẹ́-ẹ họ ọnụ ọmyịmyị nyamwụ jịra, wo abwọ ọrịrị nyahị, bala ọ-dahị ụbwọ ụka kahị baba nya ọọwa. Ahị ka jẹ́-ẹ kpụnịrọ iJihova ịnyịnyị chajị ọ́ kaa nyẹẹkpẹ da angịlẹ kị kaa gbịgba họọ ka. (2 Sam. 22:26) Ọ́ ka deeri nya ang ọlẹ kahị họ ẹnẹnẹhẹ ka, ọ tị ka nwụhị uri ụka wuu.—Hib. 6:10; 11:6.

7. Ịyẹ à tị́ ka họ tahị kori kahị kpụnịrọ iJihova? (Yẹ ifoto ịnyịnyị.)

⁷ Ahị kaa hu iJihova nya Ẹjwọ nyahị ụka kahị kpụnịrọọ la ọkịlẹtụ nyahị wuu. Ahị dahịhile nyori kori kahị jwoo ihi tụ ụka ká ang á lujwo wẹwẹ, ahị kaa yé apyobwuna. (Ayị. 48:17, 18) Ụka myị́ ụka kahị yẹ ụbwọ ọdada nyamwụ, ahị jẹ́-ẹ dahịhilọọ gụ́ olene. Ọọwa ahị ka jẹ́-ẹ jahị da ịmayẹ ịnyịịngịrị ịlẹ ká iJihova kem à ka jẹ́-ẹ dahị ụbwọ nyọka bọhụ ẹ-ẹpwụ nyaa myị́ lẹlẹ. Ụka lụmẹ-lụmẹ, kori kahị juwa ẹ-ẹpwụ iwe-ahụrụ ọlẹ kahị yé ọngọngọhẹ ka dahị ụbwọ kaka, ahị kaa jẹ́ jaabwọ ká iJihova ju ọ-dahịhile kaka ba lẹ. Vladimir yẹkẹẹ: “Ụka ọlẹ kị wum tụ jube à ri ụka ọlẹ kam jẹ́ tụ ju iJihova chwẹẹ gụ́ wuu ẹẹ. M̀ jẹ́ ọbaba nyọka dahịhile iJihova gụ́ ọọwa chajị m̀ la ụbwọọm, ọwa kem à tị ka jẹ́-ẹ dam ụbwọ ẹẹ.”

8. (a) Ịyẹ tị́ du kahị ka jẹ́-ẹ ya nyori iJihova á kaa yẹda ka? (b) Apyobwuna oyina ahị tị́ kaa ye nyọlẹ ká Ohe ri ọngọ chewu keehi lee Ẹjwọ nyahị? (Eje 62:6, 7)

 ⁸ IJihova á kaa yẹda ka. Jaabwọ kọ la ẹ-ẹga nya ẹjwọ lee ọgbọdọ ọtụka, iJihova á kaa yẹda ka. Abwẹla nyamwụ bala irya ọlẹ kọ la á kaa yẹda ka. (Mal. 3:6) Ụka ká Adam bala Iivu la egbeju ọngịrị ta iJihova, ọ́ yẹ irya ọlẹ kọ la jahị da angịnyị ehe da ka. Jaabwọ ká ọlẹrụ ịPọlụ da ụ-ụpwụ, iJihova á ka jẹ́-ẹ “pwa ịlọmwụ ọwa ayịdang rwarụ” kaka. (2 Tim. 2:13) Etu nya ọọwa ri abwọ myị́ abwọ ká ẹla á la lee ẹla myị́ ẹla ká angịkịla á họ, iJihova á ka yẹ abwẹla nyamwụ, irya ọlẹ kọ la, lee agbẹyị nyamwụ da kaka. Ahị ka jẹ́-ẹ ya ẹhị rịrị ka ẹga nya Ohe nyahị ọlẹ kọ kaa yẹda ka, la ahị ọdahile ẹ-ẹga nyamwụ nyọka chịhị da bala ọ-ka dahị ụbwọ bọhụ lụka olujwo.—Wa Eje Ọnyịịla 62:6, 7.

9. Ẹlịyẹ a tị́ jẹ́ bwụ oja nya Tatyana?

⁹ Ahị ka jẹ́-ẹ hu iJihova nya Ẹjwọ nyahị bwula ọ-ya ẹhị rịrị u-uhye nya ụma nya Ọngọlẹ kọ ri bala ọ-kpịtịya nya irya ọlẹ kọ la ẹ-ẹga nyahị ụka myị́ ụka. Ọ-họ ịnyị ka dahị ụbwọ nyọka jẹ́-ẹ dọhụ pịlẹ bala ọ-kụ giri-giri ụka kahị ji ẹpwụ nya ịmayẹ. (Eje. 16:8) Ọ lịnyị ẹ-ẹga nya ọọnahị Tatyana ọhẹ kị wu tụ jube nya ịlọmwụ ọọlajị nya ọmyịmyị nyamwụ. Ọọnahị ọnyang ọọwa yẹkẹẹ: “M̀ kaa ji ụbwọọm kem. Ọ kaa lujwo kpoye lụka nya ọgbanyẹ. Ọkịlẹtụ dọmwụ kaa kpụm enyi.” Ma, ụka kọ yẹ jaabwọ ká ịmayẹ nyamwụ gu iJihova bala irya nyamwụ, ọọwa dọọ ụbwọ nyọka kụ kpọọ bala ọ-ya ọngịrị họọ nyọka bọhụ. Ọ yẹkẹẹ: “Ọ-jẹ́ ang odudu ká ẹlẹwẹ wẹẹ họ tam dam ụbwọ nyọka kpịtịya nyori ajị nya iJihova à du kam yẹ ịlọm ẹ-ẹpwụ nya iwe-ahụrụ ịwẹ lẹ. Ọọwa dam ụbwọ nyọka hwabọ la ọ-kụ irya u-uhye nya ịlọm.”

10. Ányị iJihova à tị́ ka bwu ri Ẹjwọ nyahị lẹẹlẹẹ?

¹⁰ Ẹ-ẹpwụ nya ahyẹẹnụ ị-ka ịlahị, ahị ka gbachị ịmayẹ ịlẹ kị ka baba nyahị ọ-ka kpụnịrọ iJihova gụ́ olene. Ọlẹẹlẹẹ à ri ụka kahị ka ju ahị ọdahile nyahị ẹ-ẹga nya iJihova ọngịrị nyori ọ ka dahị ụbwọ nyọka bọhụ la ọmyịmyị lẹlẹ. Ányị ahị tị́ ka bwu họ ịnyị? Wa ịBayịbụụ bala oja nya anchẹ nya iJihova ịlụka nyahị. Maga ká yẹ jaabwọ ká iJihova chị abwẹla ọ-lala ẹjwọ ehe nyọka daa ụbwọ. Kụ irya kpori-kpori ju oja ịlịnyị. Ọ-họ ịnyị ka dang ụbwọ nyọka hu iJihova nya Ẹjwọ nyang.

GBỊLA ABWẸLA NYA ẸJWỌ ỊLẸ KÁ IJIHOVA LA

11. Ịyẹ tị́ du kahị tịtọ nyọka gbịla abwẹla nya ẹjwọ ịlẹ ká iJihova la? (Yẹ akpa ọlẹ kọ ri “ Ang Ọlẹ ká Aanahị Ikolobya ka Jẹ́-ẹ Chị Nọ Ha Ịlaa.”)

¹¹ Ahị yẹ abwọlẹ ká abwẹla ịlẹ ká iJihova la dudu kọ lala ẹjwọ ẹ-ẹga nyahị lẹ. Ahị yẹ agbẹyị ịlẹ kahị ka bwu gbịla abwẹla nyamwụ ịịwa wẹẹ. Jaabwọ kahị wẹẹ họ ịnyị, ahị ka jẹ́-ẹ nwụlanọ nyọka ju aanahị ịla ọjịra-jịra ọngịrị gụ́ ọọwa. Ọ-chụ pwokwita, iJisọsị ju ịSayịmọn ẹnyị nyị ịSẹfasị (ọyẹda nyamwụ ri “iPita”), ká etu nyamwụ ri “Ẹjwọ.” (Jọn. 1:42) Ọọwa mẹjẹ nyori ọ ka ri ọngọ kpụ́ angịkịla ịla ọjịra-jịra ẹjẹ bala ọ-ju ọmyịmyị nyaa ọngịri. ỊBayịbụụ chabwọ nya angịgbahị nya ọjịra-jịra lala “ụrụrụ ọ kpụ dọọ  ọla ekpeleji nya ẹjwọ ọtụka.” Ọọwa mẹjẹ nyori ị kaa chewu ke ala ọjịra-jịra. (Ayị. 32:2) Ẹlịlẹhị tị ri, ala ọjịra-jịra wuu kaa ye apyobwuna ụka ká ọng myị́ ọng wuu—tụ alẹng bala anyang—á gbịla abwẹla ọlala ẹjwọ nya iJihova.—Efe. 5:1.

12. Chabwọ nya agbẹyị ịhyẹ ịlẹ kahị ka jẹ́-ẹ lala ẹga ọkpịbaa ha angịkịla wẹẹ.

¹² Ri ẹga ọkpịbaa. Ụka ká ẹpwa nya aanahị á ta ayịreji, lee kori kị rụnyẹ hyi ụwa ọọlajị nya ayịreji o-bwu agaga, ẹla ọbába, lee ẹwụ ọdada, ahị ka jẹ́-ẹ ya ẹpwa nyahị haa kụ myị́. Jaabwọ ká iwe-ahụrụ nya ‘ụka ohyẹẹkpẹ nya odehe ọlẹ’ wẹẹ tịpyọ gụ́ ọọwa, iwe ka wụrụ hahị gụ́ olene nyọka da awụlẹ ụbwọ. (2 Tim. 3:1) Ahị ka jẹ́-ẹ mẹ ọháha jẹ ẹ-ẹga nya aanahị bala ọ-họ kị ka la ịlaa ịnyịnyị. Ụgbẹyị ọhẹ ọlẹ kahị ka jẹ́-ẹ họ ịnyị ri ọ-ka ya ẹla balaa ụka kị wẹ ọjịra-jịa bala ọ-kpáa ẹjẹ. Ahị tịtọ ká ọjịra-jịra nyahị ka ri ẹpwa nya ọháha ọlẹ ká angịkịla ka yé ọhụ ojuju. Ala odehe ọlẹ kahị ji alẹ kaa kpa angịnyị nwaa-nwaa. Ọọwa dudu kọ kaa yẹ myị aanahị bala ọ-laa lala o-ri ịwa nyị́ há angịkịla ka. Lẹ ụka ká aanahị á wẹ ọjịra-jịra, ahị tịtọ kahị ka maga nyọka jwaa ọhụ bala ọ-mẹjaa nyori ahị la ọháha ẹ-ẹga nyaa.

13. Ányị angịgbahị nya ọjịra-jịra kpangga à tị́ ka jẹ́-ẹ lala ẹga ọkpịbaa ha angịkịla? (Yẹ ifoto ịnyịnyị.)

¹³ Angịgbahị nya ọjịra-jịra kaa kpụ́ aanaa ẹjẹ ụka kị la akama ụma ọhẹ bala ọkịla. Ụka ká ayịreji o-bwu agaga lee ẹla nya utoji ọ-kpịraka á họ, angịgbahị nya ọjịra-jịra kaa mwahị nya agbẹyị ịlẹ kị ka jẹ́-ẹ da aanaa ụbwọ i-ijata. Ị tị kaa mẹ ụgbẹyị jaa bala o-jwaa ọhụ bwu ụpwụ ịgọgọ ịnyịnyị. Ọ ka chị aanahi alẹng bala anyang kpẹẹ la ọ-ka ẹga nya ọngọgbahị nya ọjịra-jịra, kori kị yẹ nyori ọ la dụmwọ, ọ jẹ́ ahyẹẹrwẹrwa nya angịkịla, bala ọ-nwụlanọ nyọka ke ụrụ wo laa. Abwẹla ịlịịwẹ du ká angịkịla kaa jẹ́ nyori nyị kpahị ju ịwa; lẹ, ọ kaa chaa kpẹẹ la ọ-ka myị ju ẹla ọnyị kị mẹjaa bwu ịBayịbụụ.—1 Tẹs. 2:7, 8, 11.

14. Ányị ahị tị́ ka bwu mẹjẹ nyori ahị ju ọdahịhile?

 ¹⁴ Ju ọdahịhile. Ahị tịtọ ká angịkịla ka jẹ́-ẹ dahịhileehi, ọgụgụ ri ụka kị juwa ẹ-ẹpwụ nya akama. (Etu 17:17) Ányị ahị tị́ ka họ ká angịkịla ka jẹ́-ẹ dahịhileehi? Ahị ka maga kahị ka gbịla iJihova ẹnụ myị́ ẹnụ. Ọ-chụ pwokwita rị ọ-ka họ ọnụ ọmyịmyị nyahị jịra bala ọ-ka họ ẹla ba ụka jẹ. (Mat. 5:37) Ahị tị ka jẹ́-ẹ da angịkịla ụbwọ ụka kahị yẹ ọbaba nya ọọwa ịnyịnyị. Da ọọwa u-uhye, ahị ka maga nyọka họ ụkụrwọ ọnyị kahị la ọọjịra-jịra kpá jaabwọ kị byihi nyị họọ.

15. Ányị ala ọjịra-jịra à tị́ kaa yé apyobwuna kori ká angịgbahị á ju ọdahịhile?

¹⁵ Angịgbahị nya ọjịra-jịra ịlẹ kị ju ọdahịhile kaa ju apyobwuna ha angịkịla. Ụ-ụgbẹyị oyina tị́? Ụka ká aanahị á jẹ́ nyori ịwa nyị ka jẹ́-ẹ wụrụ ọngọgbahị nya ọjịra-jịra ụka kị baba nya ụbwọ ọdada, ọọwa kaa daa ụbwọ nyọka la uko ọchịchị gbuu ka. Aanahị kaa jẹ́ ịnyịnyị nyori angịgbahị nyị kpahị ju ịwa kori kị yẹ nyori ị nwụlanọ nyọka daa ụbwọ. Ụka ká angịgbahị á tị kpa ẹla ọla ịBayịbụụ lee apwụ ị-da ịBayịbụụ wụlẹ nyahị nwụ aanahị rịrị, ọkọkọ nya ọ-kpa ẹla  ọla irya nya ịlaa, aanahị kaa dahịhilaa. Aanahị tị kaa dahịhile ọngọgbahị nya ọjịra-jịra ọlẹ kị jẹ́ nyori nyị́ ka ya ẹla ịbaaa nyaa je angịkịla ka bala ọ-kaa họ ẹla ba ọnụ ọmyịmyị nyamwụ jẹ ịnyịnyị.

16. Ányị ahị bala angịkịla à tị́ kaa yé apyobwuna kori kahị kaa họ ẹla ọlẹ kọ chịla?

¹⁶ A yẹda ka. Kori kahị kaa ju ihi nya iJihova ẹ-ẹpwụ nya ang myị́ ang bala ọ-kaa cheje kpụnịrọ ẹla ọla ịBayịbụụ, ahị ka ri ọgụ ẹpẹtẹ ọnyịịla ha angịkịla. Jaabwọ kahị wẹẹ jẹ́ Omyi Ẹla nya Ohe bala o-ju ọmyịmyị nyahị ọngịrị gụ́ ọọwa, ịnyịnyị ahị jẹ́-ẹ ya ụbwọ chị ẹlịlẹhị gogo gụ́ ọọwa lẹ. Ahị ka jẹ́ ịnịịkịla bala ang ịmẹjẹ ịlẹ kị pwoku irya nya iJihova ka, áhị tị ka myị ị ka chị wuhị ka ịnyịnyị. (Efe. 4:14; Jem. 1:6-8) Ọmyịmyị ọlẹ kahị la ẹ-ẹga nya iJihova bala ọnụ ọmyịmyị nyamwụ kaa wụhị kpa kpọọ ụka kahị wo oja ọtịpyọ. (Eje. 112:7, 8) Ahị dọmwụ ka jẹ́-ẹ da angịlẹ kị ji ẹpwụ nya ịmayẹ ụbwọ myị́.—1 Tẹs. 3:2, 3.

17. Ịyẹ à tị́ kaa da angịgbahị nya ọjịra-jịra ụbwọ nyọka họ ká angịkịla ka godayị giri-giri?

¹⁷ Angịgbahị nya ọjịra-jịra chịla kị ka kpẹhị chịng nya ẹla, kpa ẹla ọjẹ́jẹ họ ẹla, họ abwẹla ọnyịịla, bala ọ-ka jẹ́-ẹ yẹ ẹla ẹkpẹ imiiye. Aanahị ịwẹ kaa da angịkịla ụbwọ nyọka jẹ́-ẹ godayị giri-giri bala ọ-la ọmyịmyị ẹ-ẹga nya iJihova chajị nyọlẹ kị kaa ‘wu ẹlịlẹhị nya ẹrụ ọnyịịla ọ-chịla o-hu ọkịlẹtụ ha kpa gogo.’ (Tay. 1:9; 1 Tim. 3:1-3) Bwula ọgụ-ẹpẹtẹ bala ẹhị ọ-kpa rịrị nyaa, angịgbahị nya ọjịra-jịra kaa da aanahị ụbwọ wẹ ọjịra-jịra, kpa ẹrụ ọnyịịla pyẹ, bala ọ-jẹ́ ang la ịlaa, ụka myị́ ụka. Ụka ká aanahị á la akama ịlẹ kị ja kpa uko ọchịchị waa, angịgbahị kaa kpaa ịtịya nyọka kpụnịrọ iJihova bala ọ-ya ẹhị rịrị ka ẹga nya ọnụ ọmyịmyị nyamwụ.

18. Ịyẹ tị́ du kahị tịtọ nyọka gwogbo ha iJihova bala ọ-tụ jwoo chwẹẹ gụ́ ọwọwa? (Yẹ akpa ọlẹ kọ ri “ Ụgbẹyị Ọlẹ ká Ọngịnyị ka Jẹ́-ẹ Bwu Tụ Ju IJihova Chwẹẹ.”)

¹⁸ Nyọlẹ kahị kụ ẹhị yẹ abwẹla ịnyịịla-ịnyịịla nya iJihova wẹ kpá, ahị ka jẹ́-ẹ ya lala Adịrahụ iDevidi kọ yẹkẹẹ: “M̀ gwogbo ha [Ẹjwọ] ọngọ chewu kem.” (Eje. 144:1) Ahị ka jẹ́-ẹ dahịhile iJihova ụka myị́ ụka. Ẹ-ẹpwụ nya ọhịhị nyahị wuu, dọmwụ gbee kahị ka chị okwirichi, ahị ka jẹ́-ẹ ya nyori: “Ọwa-à ri ọngọ chewu kem” lee Ẹjwọ nyam lẹ, la ọ-jẹ́ myị̀myị̀ nyori ọ ka dahị ụbwọ nyọka ri igu balọọ ụka wuu.—Eje. 92:14, 15.