1. Sigun iti Salmo 18:​46, ania ti nangyarigan ni David ken Jehova?

 NO DADDUMA, mabalin a bigla a maipasangotayo kadagiti problema a mabalin a mangparigat iti biagtayo wenno interamente a mangbalbaliw iti biagtayo. Ngem imbag laengen ta mabalintayo ti agpatulong ken Jehova a Dios! Iti napalabas nga artikulo, napalagipantayo a ni Jehova ti sibibiag a Dios ken kanayon a nakasagana a tumulong kadatayo. Kada makitatayo a tultulongannatayo, maipasigurado kadatayo a “sibibiag ni Jehova!” (Basaen ti Salmo 18:46.) Ngem kalpasan a dinakamat dayta ni David, inawaganna ti Dios, kas ‘ti Dakkel a Bato a pagkamanganna.’ Apay nga inyarigna ti sibibiag a Dios a ni Jehova iti maysa a dakkel a bato nga awan biagna?

2. Ania ti adalentayo iti daytoy nga artikulo?

² Iti daytoy nga artikulo, pagsasaritaantayo no apay a naawagan ni Jehova kas dakkel a bato ken no ania ti isuro kadatayo dayta a deskripsion maipapan kenkuana. Adalentayo met no kasanotayo a maibilang isuna kas ti Dakkel a Bato a pagkamangantayo. Kamaudiananna, pagsasaritaantayo dagiti pamay-an a matuladtayo dagiti arig dakkel a bato a kualidad ni Jehova.

NO APAY A NI JEHOVA KET DAKKEL A BATO A PAGKAMANGAN

3. Iti Biblia, ania ti masansan a nakausaran ti sasao a “ti dakkel a bato a pagkamangan”? (Kitaen ti ladawan.)

³ Ti Biblia inyarigna ni Jehova iti “Dakkel a Bato” tapno maawatantayo ti dadduma a kualidadna. Masansan a nagparang dayta kadagiti salaysay a nangidaydayaw ken Jehova kas Dios nga awan kapadana. Ti immuna a nakadakamatan ni Jehova kas ti “Dakkel a Bato” ket iti Deuteronomio 32:4. Imbaga ni Hanna iti kararagna nga “awan ti dakkel a bato a kas iti Diostayo.” (1 Sam. 2:2) Inawagan ni Habakuk ni Jehova iti, “Dakkel a Batok.” (Hab. 1:12) Ti nagsurat iti Salmo 73 inawaganna met ti Dios kas ‘ti mangpapigsa iti pusona ken ti dakkel a bato a pagkamanganna.’ (Sal. 73:26) Ken uray ni Jehova  a mismo inawaganna ti bagina kas ti dakkel a bato. (Isa. 44:8) Pagsasaritaantayo ti tallo a kualidad ni Jehova a nayarig iti dakkel a bato, ken no kasanotayo a mapagbalin isuna kas “ti Dakkel a Bato” iti biagtayo.—Deut. 32:31.

4. Apay a ni Jehova ket maysa a pagkamangan? (Salmo 94:22)

⁴ Ni Jehova ket maysa a pagkamangan. Bayat ti maysa a napigsa a bagyo, mabalin nga agkamang ti maysa iti dakkel a bato wenno kueba tapno maprotektaran. Iti umasping a pamay-an, protprotektarannatayo ni Jehova kadagiti arig bagyo a tiempo ti biagtayo. (Basaen ti Salmo 94:22.) Tultulongannatayo a mangprotektar iti nadekket a relasiontayo kenkuana ken ipaspasiguradona a saan nga agnanayon ti aniaman a rigat a mapaspasarantayo. Ken adda pay ikarkarina: Iti masanguanan, ikkatennanto ti aniaman a pakaigapuan ti panagdanag ken panagrigrigattayo.—Ezek. 34:​25, 26.

5. Ania ti aramidentayo tapno mapagbalintayo ni Jehova kas ti dakkel a bato a Pagkamangantayo?

⁵ Ti maysa pay a pamay-an tapno mapagbalintayo ni Jehova kas ti dakkel a bato a Pagkamangantayo ket ti panagkararagtayo kenkuana. No agkararagtayo ken Jehova, ikkannatayo iti “talna ti Dios” a mangsalaknib iti puso ken isiptayo. (Fil. 4:​6, 7) Usigentayo ti kapadasan ni Artem, a maysa a brother a naibalud gapu iti pammatina. Bayat ti kaaddana iti pagbaludan, namin-adu a pinagsaludsodan, minaltrato, ken binutbuteng ti maysa nga imbestigador. “Agkebbayo ti barukongko kada paayabannak ti imbestigador. . . . Kanayon a nagkararagak ken Jehova. Kiniddawko a pagkalmaenna ti pusok ken ikkannak iti sirib,” kinuna ni Artem. “Saan a nagballigi ti imbestigador a mangbutbuteng kaniak. . . . Iti tulong ni Jehova, kaslaak la nakasadag iti bato a pader.”

6. Apay a kanayon a mapangnamnamaantayo ni Jehova? (Isaias 26:​3, 4)

⁶ Mapangnamnamaan ni Jehova. Kas iti dakkel a bato wenno bantay nga agtalinaed iti puestona, ammotayo met a kanayon a nakasagana a tumulong kadatayo ni Jehova. Makapagtalektayo kenkuana ta isu “ti agnanayon a Dakkel a Bato.” (Basaen ti Isaias 26:​3, 4.) Gapu ta kanayon a sibibiag ni Jehova, kanayon met a tungpalenna dagiti karina, denggenna dagiti kararagtayo, ken ipaayna dagiti kasapulantayo. Makapagpannuraytayo met ken Jehova gapu ta isu ket napudno kadagiti agserserbi kenkuana. (2 Sam. 22:26) Dina pulos lipaten dagiti maar-aramidantayo ken kanayon a gunggonaannatayo.—Heb. 6:10; 11:6.

7. Ania ti resultana no agpannuraytayo ken Jehova? (Kitaen met ti ladawan.)

⁷ Mapagbalintayo ni Jehova kas ti Dakkel a Bato a Pagkamangantayo no naan-anay nga agpannuraytayo kenkuana. Agtalektayo a magunggonaantayo no agtulnogtayo kenkuana uray kadagiti narigat a tiempo. (Isa. 48:​17, 18) Bayat a makitkitatayo a tultulongannatayo, dumakkel a dumakkel ti panagtalektayo kenkuana. Ad-adda a makombinsirtayo a ni laeng Jehova ti makatulong kadatayo nga agibtur iti aniaman a pakasuotan, kasanoman karigat dayta. Kadagiti situasion a kasla awanen ti sabali a pagtarayantayo, masansan a maamiristayo a talaga a mapangnamnamaan ni Jehova. “Ad-adda a simmingedak ken Jehova idi naibaludak,” kuna ni Vladimir. “Nasursurok ti ad-adda pay nga agtalek ken Jehova ta agmaymaysaak ken awanen ti maaramidak iti situasionko.”

8. (a) Apay a maibagatayo a natibker ni Jehova? (b) Ania ti manamnamatayo gapu ta ti Diostayo ket maysa a Dakkel a Bato? (Salmo 62:​6, 7)

 ⁸ Natibker ni Jehova. Kas iti dakkel a bato wenno bantay, ni Jehova ket saan a magaraw. Saan nga agbalbaliw ti personalidad ken ti panggepna. (Mal. 3:6) Idi nagrebelde da Adan ken Eva, saan a binalbaliwan ni Jehova ti panggepna para kadagiti tattao. Agpayso ti insurat ni apostol Pablo a ni Jehova “saanna a mabalin nga ilibak ti bagina.” (2 Tim. 2:13) Kayatna a sawen nga aniaman ti mapasamak wenno aramiden ti dadduma, pulos a saan a balbaliwan ni Jehova dagiti kualidadna, ti panggepna, ken dagiti pagalagadanna. Gapu ta saan nga agbalbaliw ti Diostayo, makapagtalektayo ngarud a tulongannatayo kadagiti narigat a tiempo ken tungpalenna dagiti karina para iti masanguanan.—Basaen ti Salmo 62:​6, 7.

9. Ania ti masursurom iti kapadasan ni Tatyana?

⁹ Mapagbalintayo ni Jehova kas ti Dakkel a Bato a pagkamangantayo no agpokustayo iti kinasiasinona kas maysa a Persona ken no kanayon a pampanunotentayo ti panggepna. No aramidentayo dayta, agtalinaedtayo a kalmado ken matalek kenkuana uray adda dagiti pakarigatan. (Sal. 16:8) Napaneknekan dayta ti maysa a sister a ni Tatyana nga imbalud dagiti autoridad iti mismo a balayna gapu iti pammatina. “Kalpasan dayta a pasamak, nariknak nga agmaymaysaakon,” imbagana. “Nagrigat idi damo. Kanayonak a maup-upay.” Ngem idi inut-utobna ti maipapan ken Jehova ken ti panggepna para kadagiti tattao, nabigbigna a masapul nga agibtur isuna. Nakatulong dayta tapno agkalma ti riknana ken agtalinaed a matalek. Imbagana: “Nakatulong dayta kaniak tapno maawatak nga addaak iti kastoy a situasion gapu ta ay-ayatek ni Jehova ken kayatko a maparagsak isuna. Nakatulong dayta kaniak tapno saanak nga agpokus iti bagik.”

10. Kasanotayo a mapagbalin ni Jehova ita kas ti Dakkel a Bato a pagkamangantayo?

¹⁰ Asidegen a mapasarantayo dagiti nagrigat a tiempo, isu a lallalonto pay a masapul nga agpannuraytayo ken Jehova. Ita pay laeng ngarud, patibkerentayon ti kombiksiontayo nga ipaaynanto ti aniaman a kasapulantayo tapno makapagibturtayo a simamatalek. Kasanotayo a maaramid dayta? Agbasatayo kadagiti salaysay ti Biblia ken kapadasan dagiti kapammatiantayo iti kaaldawantayo. Siputantayo no kasano nga ipakpakita ti Dios dagiti arig dakkel a bato a kualidadna a tumulong kadagiti agserserbi kenkuana. Panunotentayo a naimbag dagiti kasta a salaysay. No aramidentayo dayta, mapagbalintayo ni Jehova kas ti Dakkel a Bato a pagkamangantayo.

TULADENTAYO DAGITI ARIG DAKKEL A BATO A KUALIDAD NI JEHOVA

11. Apay a kayattayo a tuladen dagiti arig dakkel a bato a kualidad ni Jehova? (Kitaen met ti kahon a “ Kalat Para Kadagiti Agtutubo a Brother.”)

¹¹ Naammuantayon no kasano a pampaneknekan ni Jehova ti bagina kas maysa a dakkel a bato. Ita, pagsasaritaantayo no kasanotayo a matulad dagiti arig dakkel a bato a kualidadna. No aramidentayo ti amin a kabaelantayo a mangtulad kadagiti kualidad ni Jehova, mapabilegtayo dagiti kakabsat. Kas pagarigan, pinanaganan ni Jesus ni Simon iti Cefas (naipatarus kas “Pedro”), kayatna  a sawen, “Maysa a Bato.” (Juan 1:42) Ipakita dayta nga agbalin isuna a gubuayan iti liwliwa ken pammabileg kadagiti kakabsat. Dagiti panglakayen iti kongregasion ket nadeskribir kas “anniniwan ti dakkel a bato.” Iladawan dayta no kasanoda a protektaran ti kongregasion. (Isa. 32:2) Siempre, magunggonaan ti intero a kongregasion—ti amin a kakabsat—no tuladenda dagiti arig dakkel a bato a kualidad ni Jehova.—Efe. 5:1.

12. Kasanotayo nga agbalin a pagkamangan dagiti kakabsat?

¹² Agbalin a pagkamangan. No dadduma, mabalin a literal a pagkamangan ti ipaaytayo kadagiti kakabsat gapu iti natural a didigra, gerra sibil, wenno gubat. Bayat ti “maudi nga al-aldaw,” kumaro pay a kumaro ti kasasaad, isu nga ad-adu ti gundawaytayo nga agtitinnulong. (2 Tim. 3:1) Mabalin met a pagkamangandatayo dagiti kakabsat no liwliwaen ken ipakitatayo ti ayat a kasapulanda. Ti maysa a pamay-an a maaramidtayo dayta ket no kasarita ken komustaentayo ida no umayda makigimong. Kayattayo a mariknada a makaliwliwa dagiti gimongtayo. Adu a tattao ti saan a nasayaat ti panangtratoda iti maysa ken maysa. Makapa-stress unay dayta kadagiti kakabsat ken mabalin a mariknada a saanda a maay-ayat. Kayattayo ngarud a siguraduen a no makigimongda, mariknada a natalgedda, maliwliwada, ken maay-ayatda.

13. Kasano a dagiti panglakayen ket agbalin a pagkamangan? (Kitaen met ti ladawan.)

¹³ Dagiti panglakayen ket pagkamangan dagiti kakabsat nga agib-ibtur kadagiti literal a bagyo wenno arig bagyo a problema. Bayat dagiti didigra ken medikal nga emerhensia, dagus a mangaramid dagiti panglakayen iti urnos a tumulong kadagiti kakabsat. Mangipapaayda iti naespirituan a tulong. Nalaklaka nga asitgan dagiti kakabsat ti maysa a panglakayen no naalumamay, mannakipagrikna, ken nakasagana a dumngeg. Makatulong dagita a kualidad tapno marikna dagiti kakabsat a maipatpategda. Iti kasta, nalaklakada nga iyaplikar ti aniaman a balakad a naibatay iti Biblia a  mabalin nga ipaay ti maysa a panglakayen.—1 Tes. 2:​7, 8, 11.

14. Kasanotayo a maipakita a mapangnamnamaantayo?

¹⁴ Agbalinka a mapangnamnamaan. Kayattayo a marikna dagiti kakabsat a mapangnamnamaandatayo lalo kadagiti narigat a tiempo. (Prov. 17:17) Kasanotayo nga agbalin a mapangnamnamaan? Inaldaw nga ikagumaantayo a tuladen ni Jehova. Kas pagarigan, kanayontayo a tungpalen dagiti karitayo, ken ikagumaantayo ti agbalin a managsapsapa. (Mat. 5:37) Nakasaganatayo met koma a tumulong kadagiti agkasapulan. Kanayonanna, sigsiguraduentayo nga ileppas dagiti asaynmenttayo sigun kadagiti naawattayo nga instruksion.

15. Kasano a pagsayaatan dagiti kakabsat no dagiti panglakayen ket mapangnamnamaan?

¹⁵ Pagsayaatan dagiti kakabsat no dagiti panglakayen ket mapangnamnamaan. Kasano? No ammo dagiti kakabsat nga iti aniaman nga oras ket mabalinda a tawagan dagiti panglakayen, kas ti manangaywan iti grupoda, maksayan ti danagda. Mariknada met a maipatpategda no ammoda a nakasagana dagiti panglakayen a tumulong kadakuada. Pagtalkanda met dagiti panglakayen no ibatayda dagiti balakadda iti Biblia ken kadagiti publikasion manipud iti matalek nga adipen, imbes nga iti bukodda nga opinion. Ad-adda met nga agtalekda iti maysa a panglakayen no dina ibagbaga  iti sabsabali dagiti kompidensial a bambanag maipapan kadakuada ken no kanayon a tungpalenna dagiti karina.

16. Kasano a pagsayaatantayo ken ti dadduma no natibkertayo?

¹⁶ Agbalinka a natibker. No natibker ken determinadotayo a mangaramid iti umiso ken no agdesisiontayo a naibatay kadagiti prinsipio ti Biblia, agbalintayo a nasayaat nga ulidan iti dadduma. No adalentayo ti Sao ti Dios ken patibkerentayo ti pammatitayo ken Jehova, agbalintayo a matalek kenkuana ken kadagiti pagalagadanna. Mailasintayo dagiti ulbod a pannursuro ken opinion a maikontra iti pampanunot ni Jehova. Saantayo a maimpluensiaan kadagita. (Efe. 4:14; Sant. 1:​6-8) Makatulong ti pammatitayo ken Jehova ken kadagiti karina tapno agtalinaedtayo a kalmado uray no makangngegtayo kadagiti dakes a damag. (Sal. 112:​7, 8) Matulongantayo met uray dagidiay mabalin a maipaspasango kadagiti pakasuotan.—1 Tes. 3:​2, 3.

17. Ania ti makatulong kadagiti panglakayen tapno mapatibkerda dagiti kakabsat?

¹⁷ Dagiti panglakayen ket natimbeng ti ugalida, nasimbeng ti panunotda, naurnos, ken nainkalinteganda. “Sursuroten[da] a naimbag ti mapagtalkan a sao” isu a mapatibkerda ti dadduma ken mapabilegda ti kongregasion. (Tito 1:9; 1 Tim. 3:​1-3) Maparparegtada dagiti kakabsat tapno agbalinda a regular kadagiti gimong, panangasaba, ken personal a panagadal. No problemado dagiti kakabsat, dakkel ti maitulong dagiti panglakayen tapno maparegtada ida nga agtultuloy nga agpannuray ken Jehova ken agpokus kadagiti panggepna.

18. Apay a kayattayo nga idaydayaw ni Jehova ken agbalin a nasingsinged kenkuana? (Kitaen met ti kahon a “ Maysa a Pamay-an Tapno Agbalintayo a Nasingsinged ken Jehova.”)

¹⁸ Kalpasan a napagsasaritaantayo dagiti nakaskasdaaw a kualidad ni Jehova, maibagatayo met ti kas iti naibaga ni Ari David: “Maidaydayaw koma ni Jehova a Dakkel a Bato a pagkamangak.” (Sal. 144:1) Kanayontayo a mapangnamnamaan ti Diostayo a ni Jehova. Iti intero a panagbiagtayo, uray inton lumakay wenno bumakettayo, maibagatayto latta: “Isu ti Dakkel a Bato a pagkamangak,” ta kombinsidotayo a tulongannatayo nga agtalinaed a nasinged kenkuana.—Sal. 92:​14, 15.