1. Yus Kanta 18:46 David Jehovan warijiai apatak aujmattsamia?

 Aya neachma urutainsha itiurchat nankaamasminiaitji. Tumaitkiusha iikia Jehová yainkiata tu seamniaitji. Nuik atsakamutin Jehová iwiaku Yuus asa tuke yainkratniuana nu unuimiatramji. David Yus Kanta 18:46 (aujsata) nui “Uunt Yus iwiaakui” tu timiayi. Iisha Jehová tuke yainma asakrin ainis enentaimiaji. Tura aintsan David Jehovanu aujmatuk chichaak: “Winia kátsuram Kayar asa shiir atí” tu timiayi. Urukamtai David ainis timia?

2. Ju unuimiatmanumsha wari nekaattaj?

² Jehová kaya aniuiti Yuus papiinium urukamtai ainis ta nu nekaattaji. Tura aintsan iisha wari unuimiatramniaitiaj nusha nekaattaji. Jehová uunt kaya ainis enentaimtustai tusar wari itiurkatniuitiaj nuyasha wari turakria Jehová urukuit ainis aminiaitiaj nusha nekaattaji.

JEHOVASHA URUKAMTAI UUNT KAYA ANIUIT

3. Yuus papiiniumsha Jehovan uunt kayajai urukamtai apatak aujmatniuit? (nakumkamu iista).

³ Jehová urukuit nuna aujmatuk Yuus papiikia Jehovanka uunt kayajai apatak aujmatniuiti. Jehovan shiir awajainiak nin umirin armiania nuka Jehovaka uunt kaya aniuiti tu tiarmiayi. Jehová uunt kaya aniuiti tusa Yuus papiinium emka aarmaka Muisais Ujakma 32:4 nui aarmaiti. “Ii Yuusrijiai nankaamas chikich uunt kayaka atsawai” Ana tu timiayi (1 Sam. 2:2 TNM). Habacucsha Jehovan katsuram kayaru tu timiayi (Awa. 1:12). Aintsan Yus Kanta 73 nuna aaruka Jehovaka winia uunt kayarua nunisaiti timiayi (YKan. 73:26). Tura aintsan wijiai iismaka chikich uunt kayaka atsawai Jehová tu timiayi (Is. 44:8 TNM). Jehová uruku asamtai uunt kaya aniuiti timiniaitiaj nuyasha iisha Jehová tu enentaimtustai tusar wari itiurkatniuitiaj nusha nekaattaji (Muis. 32:31).

4. Jehovaka itiurchat nankaamakrin yainmaji urukamtai taji? (Yus Kanta 94:22).

 ⁴ Itiurchat nankaamakrin Jehová yainmaji. Ti nasentak yumi yutakui kaya waanam wayar ejamkamniaitji. Aintsan itiurchat nankaamakrin Jehová penker waitmaji (Yus Kanta 94:22 aujsata). Itiurchat nankaamakrin katsuntrarat tusa Jehová yainmaji. Nuyasha uruma nuisha ii itiurchatrin Jehová amuktatui (Isk. 34:​25, 26).

5. Itiurchat nankaamakur Jehová yainkratkat takurkia wari itiurkatniuitiaj?

⁵ Itiurchat nankaamakur Jehová yainkratkat takurkia ni seatniuitji. Ni seakur Jehovaka shiir enentaimsatniun yainmaji (Jir. 4:​6, 7). Ii yachi Artiom naartin nankaamasmiania nu nekaatai. Ninkia Yuusan enentaimtin asamtai sepunam enkeawarmiayi. Tura nui testigos de Jehovanu etserkata tusa aents kajekmajai anin wemiayi. Ii yachi junis timiayi: Nu aents kajekmajai anintru wemiania nujai aujmatkun ti asham wemiajai. […] Tumaitkiusha wikia Jehovan tuke sea wemiajai. Shiir enentaimsatniun nuyasha esetran penker chichaktasan yainkiata tu sea wemiajai. Nu aents wijiai aujmatuk warinkish turaksha wikia Yuusan tuke umirkamiajai […]. Itiurchat amajtusarain tusa Jehová penkramunam apujtusua ainis nekapmiajai tu timiayi.

6. Jehová penke ikiukratchaiti urukamtai taji? (Isayas 26:​1-6).

⁶ Jehová penke ikiukratchaiti. Ninkia uunt kaya umuchkachminia aniuiti tuma asamtai iin yainkratkattsa tuke pujuttawai (Isayas 26:​1-6 aujsata). Jehovaka iwiaku Yuusaiti tuma asamtai ni chichakmarinkia tuke uminkiattawai. Ii seajnia nunasha tuke anturtamkattaji tura tuke yainmaktatji. Ninkia nin umirainiana nuna penke ikiukratchaiti (2 Sa. 22:26). Ii najaneajnia nunasha penke kajinmatkishtatui nuya akirmaktatji (Isr. 6:10; 11:6).

7. Jehová nekas yainkratniuiti urukamtai tu enentaimsatniuitiaj? (Nakumkamusha iista).

⁷ Jehová nekas yainmaktatji tu enentaimsatniuitji. Itiurchat akuisha Jehová umireakrikia penker pujuttaji (Is. 48:​17, 18 TNM). Nuyasha Jehová itiur yainmaj nu nekaamakur Jehová nekas yainkratniuiti tu enentaimsattaji. Tura ti itiurchat nankaamakrisha katsuntrattaji. Itiurchat pujajnia nui yaksha yainkrateaka atsumniaiti tumaitkiusha Jehovaka tuke yainmaktatji. Ii yachi Vladímir naartin junis timiayi: Sepunam pujumiajna nui Jehovai ti weamkamiajai. Nui wichik pujumiajai nuyasha nunia jinkittsan warinkish najanachminiauyajai. Tumaitkiusha nui pujusan Jehová nekas yainkratniuiti tu enentaimsamiajai timiayi.

8. a) Jehová penke yapajiachminiaiti urukamtai ainis timiniaitiaj? b) Itiurchat nankaamakrisha waritminiaitiaj? (Yus Kanta 62:​6, 7).

⁸ Jehová penke yapajiachminiaiti. Uunt kaya umuchkachminia aintsaiti Jehovaka. Ninkia ni urukuit nuna nuya ni chichakuana nunaka penke yapajiashtatui (Mks. 3:6). Adán Evajai Yuusan umikcharmiania nui Jehovaka ni enentaimmianka yapajiashmiayi. “Yuska ni enentáimmiaja̱i̱ṉ yapajniátsuk tuke umiktiniaiti” Pablo ainis timiayi (2 Ti. 2:13). Warinkish nankaamakuisha  Jehovaka ni urukuit nuna penke yapajiashtatui. Ni chichakuana nunasha umiktatui tura jintintramaitiajnia nunasha yapajiashtatui. Nu neka asar itiurchat nankaamakrisha Jehová tuke yainmaktatji nuya ni chichakuana nunasha tuke umiktatui tu timiniaitji (Yus Kanta 62:​6, 7 aujsata).

9. Ii umai Tatiana nankaamasmiania nuna wari unuimiatram?

⁹ Jehová urukuit nui enentaimsatniuitji nuya uruma nui aents penker pujuarat tusa ju nunkan iwiarattana nuisha enentaimsatniuitji. Nui enentaimiakrikia Jehová nekas yainkratniuiti tu titiatji. Ainis enentaimiu asar itiurchat enentaimiakrisha waurtutsuk esetrar enentaimsattaji (YKan. 16:8). Ii umai Tatiana nankaamasmiania nu nekaatai. Ninkia testigo de Jehová asamtai ni jeenia jinkin tusar policía iiniak pujur wearmiayi. Ninkia junis timiayi: Jearuinkia wiki pujumiajai. [...] Nuya yama nankamtaikkia ti kuntuts enentaim wemiajai tu timiayi. Tumaitkiusha Jehová umireakun ainis pujajai tusa ii umai ataksha shiir enentaimsatniun juarkimiayi. Ii umai junis timiayi: Jehová anea asan ni umireakun junis pujajai tu enentaimmiajai. Ainis enentaimiakun aya winiarnak enentaimiatsjai tu timiayi.

10. Yamainian warintia enentaimsatniuitiaj?

¹⁰ Jukerusan ti waitsatin tsawan jeattawai. Tuma asamtai katsuntratai tusar yamainian Jehová nekas yainkratniuiti tu enentaimsatniuitji. Tu enentaimsatai tusar wari itiurkatniuitiaj? Yaunchuk Yuusan umiriarmiania nu aentsna Yuus papiinium unuimiatrata tura aintsan yamaisha Jehovan umirkaruana nu aentsnasha unuimiatrata. Ni nankaamasarmiania nui enentaimsam Jehová ni aentsrinkia tuke yainiana nuisha enentaimsata. Nu turakmeka amesha Jehová nekas tuke yainkratniuiti ainis titiatme.

JEHOVÁ URUKUIT AINIS ARTAI

11. Jehová urukuit ainis atincha urukamtai penkerait? ( Ii yachi natsamaru ainiana nuna tana nuisha iista).

¹¹ Ju unuimiatmanumka Jehová uruku asa uunt kaya aniuiti timiniaitiaj nu unuimiatraitji. Antsu yamaikia Jehová urukuit aintsan atai tusar wari itiurkatniuitiaj nu nekaattaji. Jehová urukuit aintsan ajasrikia ii yachi ii umaisha yainkiarminiaitji. Jesús Simonnaka naarin yapajtiua Cefas tu anaikiamiayi (Pedron taku ainis timiayi. Pedro tamaka kaya pukma tamaiti) (Juaṉ 1:42). Jesús Pedron ainis anaikiamtai ninkia ni yachi ni umaincha ti ikiakarartatui nuyasha nukap yainkiartatui tusa ainis anaikiamiayi. Yuus papiiniumka uuntri anairamu ainiana nusha uunt muchin iin ejamkamniana ainis ainiawai tawai (Isa. 32:2). Mashiniu Jehová urukuit aintsan aminiaitji nuya kaya aintsar ii yachi ii umaisha penker pujuarat tusar yainkiarminiaitji (Ipi. 5:1).

12. Yamaiya jui ii yachi ii umai yaintai tusar wari itiurkamniaitiaj?

¹² Chikich yainkiartai. Ii yachi ii umai itiurchat nankaamasarmatai turutskesha meset akui itiurchat nankaamainiakui nuyanchuka  aents wajarar nankamas ajainiakui ii jeen ikiantrarminiaitji. Amuukatin nuntumsamunam puja asar ti itiurchat ajaki wetatui tuma asamtai mai yainiai ajatniuitji (2 Ti. 3:1). Ii yachi ii umai kuntuts pujuiniakui turutskesha Yuusnum kakararat tusarsha ikiakararminiaitji. Ii yachi ii umain iruntramunam tainiakui shiir amajsartiniaitji. Ainis turakur mashiniu shiir amajnaisar matsamsattaji. Aentska anenkratcha ainiamunam irutraji tuma asamtai ii yachi ii umai iruntramunam tainiaksha mai anenai amajnaiyakrin shiir enentaimsarat tusar wakeraji.

13. Uuntri anairamu ainiana nusha ii yachi ii umai itiurchat nankaamainiakui yainkiartasa warinia turawartiniait? (Nakumkamusha iista).

¹³ Uuntri ainiana nuka ii yachi ii umainsha itiurchat nankaamainiana nuna yainkiartiniaiti. Ii yachi ii umainsha itiurchat nankaamasarmatai turutskesha sunkurmak itiurchat nankaamainiakui yaintai tusar warinkisha turin ainiawai. Nuyasha Yuusnumsha ikiakain ainiawai. Uuntri anaikiamu shiir ajawitkiuinkia tura warinkisha ujamsha amamkes antiniaitkiuinkia ii yachi ii umai itiurchat nankaamainiaksha warik ujakartatui. Ainis turuiniakiuinkia ii yachi ii umaisha uuntri anairamu anenmainiaji tu enentaimiainia asar warinkisha Yuusa chichamejai chichareamsha yupichuch umikiartatui (1 Tis. 2:​7, 8, 11).

14. Wari turakria umin atataj?

¹⁴ Umin atiniaitji. Ii yachi ii umainkia itiurchat nankaamainiaksha ni yainkiamniaiti tu enentaimtursarat tusar wakeraji (Neka. 17:17). Ninkia nekas yainkiamniaiti tu enentaimtursarat tusar itiurkatniuitiaj? Jehová urukuit ainis atai tusar tuke kakartiniaitji, warinkisha turattajai takurkia umiktiniaitji tura warinmansha kintiamprar jeashtiniaitji (Mat. 5:​34-37). Nuyasha yaksha utsumakuinkia yaintiniaitji. Tura  aintsan warinkish najanata tusar amasakrinkia juni najanata turameajnia aitkiasrik najanatniuitji.

15. Uuntri ainiana nu ni chichakmarin umin ainiakuinkia ii yachi ii umaisha itiur enentaimsartata?

¹⁵ Uuntri ainiana nu ni chichakmarin umin asarmatai ii yachi ii umaisha itiur enentaimin ainia? Ii yachi ii umainkia uuntri ainiana nuna urutainsha untsuamsha yainmaktatji tu enentaimiainiakka penker pujuartatui. Uuntri ainiana nu ii yachi ii umain tuke yayainiakuinkia ii yachi ii umaisha uuntri ainiana nuka anenmainiaji tu enentaimsartatui. Ni enentaimian tutsuk Yuusa chichamejai turutskesha papii Yuusna aujmatainiana nujai chicharkartuiniakui ii yachi ii umaisha ti penker enentaimtiartatui. Nuyasha warinkisha etserkini wekainiachu asarmatai tura nuni turattaji tuiniaksha timiatrusan najanin asarmatai ii yachi ii umainkia shiir enentaimtiartatui.

16. a) Penkera nu tuke najankurkia urukattaj? b) Penkera nu tuke turiniaitkiurninkia chikitcha urukawartata?

¹⁶ Penkera nu tuke turata. Penkera nu tuke najanatin wakeriniaitkiurninkia tura  warinkisha najankursha Yuusa chichame wari ta nui enentaimsar najankurninkia chikitcha aitkiasan turatniun wakeriartatui. Yuusna nu nekaki weakur ni nekas yainmaktatji tu enentaimiu asar Yuus tuke umirkattaji. Nuyasha antar tuiniamusha paant nekaattaji turakur anankamu achattaji (Ipi. 4:14; San. 1:​6-8). Nuyasha Yuus yainmaktatji tu enentaimkiur tura uruma nui turattana nunaka nekas turattawai tu enentaimiakrikia warinkish nankaamakuisha katsuntrattaji (YKan. 112:​7, 8). Tura aintsan chikich aents itiurchat nankaamainiaksha yainkiartatji (1 Tis. 3:​1-3).

17. Uuntri ainiana nusha warinia najanainiak ni yachi ni umaincha ikiakainia?

¹⁷ Uuntri ainiana nuka warinkish ni najanainiamunmasha nankamas ni wakeramun najancha artiniaiti, wi tajana ainis atiniaiti tu enentaimcha artiniaiti tura aintsan ashi warinkish najanmanum iinkia penker najanin artiniaiti. Yuusa chichame tana imiatrusan najanainiak ni yachi ni umaincha ikiakainiawai (Tit. 1:9; 1 Ti. 3:​1-3). Uuntri ainiana nuka penker iniakmamainiak tura ni yachi ni umaincha ikiakainiak iruntramunam tuke pachinkiarat tusar tura Yuusa chichamencha tuke etserkarat tusar tura aintsan Yuusa chichame ninkisha unuimiatrarat tusar ikiakain ainiawai. Tura ii yachi ii umai itiurchat nankaamainiaksha Jehovan kajinmatkiarain tusar nuya Jehová turattana nui enentaimsarat tusar yayainiawai.

18. Jehová uruku asa yainmaktataj? ( Jehovai weamkatai tusar jusha najanatniuitji tana nuisha iista).

¹⁸ Jehová urukuit nu unuimiatra asar David timiania ainis enentaimiaji. Ninkia junis timiayi: “¡Jiuwá winia uunt muchiṉkrua núnis asa shiir awajsamu atí!” tu timiayi (YKan. 144:1). Jehovaka ni urukuit nuna penkesha yapajchaiti tura chichakua nunaka umin asamtai Jehovaka tuke iin yainmaktatji. Weamprar pujakrincha tuke yainmaktatji. Tuma asamtai Jehovaka uunt kayarua aintsaiti tu timiniaitji (YKan. 92:​14, 15).