26-زەرتتەۋ ماقالاسى
8-ٵن ەحوبا — ٴبىزدىڭ قورعانىمىز
ەحوبا ٴسىزدىڭ دە جارتاسىڭىز بولسىن
«قۇدايىمىزداي جارتاس جوق» (سام. 1-ج. 2:2)
نەگىزگى وي
ەحوبا نەگە جارتاس دەپ اتالعانىن جانە ٴبىز ونىڭ جارتاسقا ٴتان قاسيەتتەرىنە قالاي ەلىكتەي الاتىنىمىزدى بىلەمىز.
1. ٴزابۇر 18:46 دا ٴداۋىت ەحوبانى نەگە تەڭەگەن؟
ٴبىز تۇراقسىز دۇنيەدە ٶمىر ٴسۇرىپ جاتقاندىقتان، كۇتپەگەن قيىندىقتاردىڭ كەسىرىنەن ٵپ-ساتتە ٶمىرىمىزدىڭ استان-كەستەنى شىعۋى مۇمكىن. سونداي كەزدە ەحوبا قۇدايىمىزعا جۇگىنىپ، كومەك سۇراي الاتىنىمىز نەتكەن عانيبەت! وتكەن ماقالادا تالقىلاعانىمىزداي، ەحوبا — ٴتىرى قۇداي جانە ول بىزگە كومەكتەسۋگە ٵردايىم اسىق. ومىرىمىزدە ەحوبانىڭ كومەگىن كورگەندە، ونىڭ «ٴتىرى قۇداي» ەكەنىنە كوزىمىز جەتە تۇسەدى (ٴزابۇر 18:46 وقىڭىز). ٴبىر قىزىعى، ٴداۋىت ەحوبانى «ٴتىرى قۇداي» دەگەننەن كەيىن، ونى «جارتاسىم» دەپ اتاعان. ٴداۋىتتىڭ ٴتىرى قۇدايدى جانسىز تاسقا تەڭەگەنى قالاي؟
2. بۇل ماقالادا ٴبىز نە جايلى بىلەمىز؟
2 بۇل ماقالادا ٴبىز ەحوبا نەگە جارتاسقا تەڭەلگەنىن جانە وسى تەڭەۋدەن ول جايلى نە بىلەتىنىمىزدى قاراستىرامىز. سونداي-اق ەحوبا ٴبىزدىڭ دە جارتاسىمىز بولۋ ٷشىن نە ىستەۋىمىز كەرەكتىگىن بىلەمىز. ال سودان كەيىن ەحوبانىڭ جارتاسقا ٴتان قاسيەتتەرىنە قالاي ەلىكتەي الاتىنىمىزدى تالقىلايمىز.
ەحوبا جارتاس ىسپەتتى
3. كيەلى كىتاپتا «جارتاس» دەگەن ٴسوز ٴجيى قاي كەزدە قولدانىلادى؟ (مۇقاباداعى سۋرەتتى قاراڭىز.)
3 كيەلى كىتاپتا «جارتاس» دەگەن ٴسوز ەحوبانىڭ كەيبىر قاسيەتتەرىن سيپاتتاۋ ٷشىن قولدانىلادى. بۇل ٴسوز ٴجيى ەحوبا تەڭدەسسىز تۇلعا رەتىندە ماداقتالاتىن ۇزىندىلەردە كەزدەسەدى. مۇسانىڭ 5-جازباسى 32:4 تە ەحوبا العاش رەت «جارتاسقا» تەڭەلگەن. كەيىن حاننا ٶز دۇعاسىندا: «قۇدايىمىزداي جارتاس جوق»،— دەگەن (سام. 1-ج. 2:2). ال اباقۇق ەحوبانى «جارتاسىم مەنىڭ» دەپ اتاعان (ابق. 1:12). ٴزابۇر جىرشىسى بولسا قۇدايدى «كوڭىلىمە مەدەت بولار جارتاسىم» دەگەن (ٴزاب. 73:26). ەحوبا دا كيەلى كىتاپتا ٶزىن جارتاسقا تەڭەيدى (يشايا 44:8). قازىر ەحوبانى جارتاستاي بەرىك ەتىپ تۇرعان ٷش قاسيەتىنە توقتالايىق. سونان سوڭ ەحوبا ٴبىزدىڭ دە جارتاسىمىز بولۋ ٷشىن نە ىستەۋىمىز كەرەكتىگىن كورەمىز (مۇس. 5-ج. 32:31).
قۇداي حالقى ەحوبانى قاۋىپسىز جارتاس دەپ بىلەدى (3-ابزاستى قاراڭىز)
4. ەحوبا قاي ماعىنادا ٴبىزدىڭ پانامىز؟ (ٴزابۇر 94:22)
4 ەحوبا — پانامىز. ۇيىتقىعان بوراندا ادام ۇلكەن جارتاسقا جاسىرىنىپ پانا تابادى. تۋرا سولاي ەحوبا دا ٶمىردىڭ الاي-دۇلەي كەزەڭىندە ٴبىز ٷشىن قاۋىپسىز پانا بولادى (ٴزابۇر 94:22 وقىڭىز). ول ٴبىزدى قورعايدى جانە وڭالماستاي زالال كورۋىمىزگە جول بەرمەيدى. بۇدان دا كەرەمەتى — ول بەيقام، الاڭسىز ٶمىر سۇرۋىمىزگە كەدەرگى بولعان جايتتاردىڭ ٴبارىن كەلەشەكتە ٴبىرجولا جويادى (ەزەك. 34:25، 26).
5. ەحوبا جارتاستاي پانامىز بولۋ ٷشىن نە ىستەۋىمىز كەرەك؟
5 ەحوبا جارتاستاي پانامىز بولسىن دەسەك، وعان دۇعا ەتۋىمىز كەرەك. دۇعا ەتكەندە، ول بىزگە ٶزىنىڭ تىنىشتىعىن بەرىپ، «جۇرەگىمىز بەن وي-سانامىزدى» ساقتايدى (ٴفىلىپ. 4:6، 7). مىسالى، ارتيوم باۋىرلاسىمىز سەنىمى ٷشىن تۇرمەگە قامالعان. ونى تەرگەۋشىلەر قايتا-قايتا سۇراقتىڭ استىنا الىپ، قىسىم كورسەتىپ، قورلاعان. ول بىلاي دەيدى: «تەرگەۋشىنىڭ الدىنا اپارىلعان سايىن، قورىققاننان جۇرەگىم مۇزداپ كەتەتىن. ٴبىراق سونداي كەزدەرى ەحوباعا ۇنەمى دۇعا ەتىپ، جۇرەگىمە تىنىشتىق سيلاشى، دانالىق بەرشى دەپ سۇرايتىنمىن. سونىڭ ارقاسىندا تەرگەۋشى قانداي ايلا-امال قولدانباسىن، مەن ٴمىز باقپادىم. ەحوبامەن بىرگە مەن ٶزىمدى تۋرا ٴبىر تاس قابىرعانىڭ ارتىندا تۇرعانداي سەزىندىم».
6. نەگە ٴبىز ەحوباعا ٵردايىم سەنىم ارتا الامىز؟ (يشايا 26:3، 4)
6 ەحوبا — سەنىمدى قۇداي. جارتاس ەشقاشان ورنىنان قوزعالمايتىنىنداي، ەحوبا دا ٵردايىم قاسىمىزدا. ٴبىز وعان تولىقتاي سەنىم ارتا الامىز، سەبەبى ول — «ماڭگىلىك جارتاس» (يشايا 26:3، 4 وقىڭىز). ەحوبا ماڭگى بار بولاتىندىقتان، ول ٵردايىم ۋادەلەرىن ورىندايدى، دۇعالارىمىزدى تىڭدايدى، قاجەت كەزدە قاسىمىزدان تابىلادى. سونداي-اق ەحوبا — ٶز قىزمەتشىلەرىنە ادال قۇداي، سول سەبەپتى ٴبىز وعان تولىق ارقا سۇيەي الامىز (سام. 2-ج. 22:26). ول ٴبىزدىڭ ەڭبەگىمىزدى ەشقاشان ۇمىتپايدى جانە مىندەتتى تۇردە سيىن بەرەدى (ەۆر. 6:10؛ 11:6).
7. ەحوباعا ارقا سۇيەگەنىمىزدىڭ قانداي پايداسى بار؟ (سۋرەتتى دە قاراڭىز.)
7 ەحوباعا تولىقتاي ارقا سۇيەگەن كەزدە، ول ٴبىزدىڭ جارتاسىمىز بولادى. ٴبىز ٴتىپتى قيىن شاقتا دا ەحوباعا مويىنسۇنساق، وعان ارقا سۇيەيتىنىمىزدى كورسەتەمىز جانە مۇنىڭ پايداسىن كورەمىز (يشايا 48:17، 18). قيىن ساتتەرى ەحوبانىڭ قولداۋىن سەزىنگەندە، وعان دەگەن سەنىمدىلىگىمىز ارتا تۇسەدى. سوندا ەحوبانىڭ كومەگىمەن عانا جەڭۋگە بولاتىن سىناقتارعا دايىن بولامىز. ادەتتە ٴبىز ەشبىر ادام كومەكتەسە المايتىن جاعدايلارعا كەزىككەندە، ەحوبانىڭ قانشالىقتى سەنىمدى قۇداي ەكەنىن ٴتۇسىنىپ جاتامىز. ۆلاديمير دەگەن باۋىرلاسىمىز بىلاي دەيدى: «تەرگەۋ يزولياتورىندا وتىرعان كەزىمدى ويلاسام، ەحوباعا سول كەزدەگىدەي ەشقاشان جاقىن بولماعان شىعارمىن. تۇرمەدە جالعىز بولعاندىقتان ٵرى قولىڭنان ەشتەڭە كەلمەگەندىكتەن، ەحوباعا بارىنشا سەنىم ارتۋدى ۇيرەنەسىڭ».
ەحوباعا تولىقتاي ارقا سۇيەگەن كەزدە، ول ٴبىزدىڭ جارتاسىمىز بولادى (7-ابزاستى قاراڭىز)
8. ا) نەگە ەحوبانى تۇراقتى قۇداي دەۋگە بولادى؟ ٵ) ەحوبا جارتاسىمىز بولعانىنىڭ قانداي يگىلىگىن كورەمىز؟ (ٴزابۇر 62:6، 7)
8 ەحوبا — تۇراقتى قۇداي. الىپ جارتاس ىسپەتتى، ەحوبا دا بەرىك ٵرى تۇراقتى. ەحوبانىڭ مىنەزى بىردە كول، بىردە ٴشول ەمەس. ونىڭ بولمىسى ٵردايىم بىرقالىپتى، نيەتى دە قۇبىلىپ تۇرمايدى (مالح. 3:6). مىسالى، ەدەم باعىندا بۇلىك شىققاندا، ەحوبا ٶزىنىڭ نيەتىنەن اينىپ قالعان جوق. ەلشى پاۋىل ەحوبا «ٶز بولمىسىنا قايشى ارەكەت ەتە المايتىنىن» ايتقان (ٴتىم. 2-ح. 2:13). بۇل دەگەنىمىز — قانداي جاعداي بولماسىن، كىم نە ىستەمەسىن، ەحوبا قاسيەتتەرىن دە، نيەتىن دە، نورمالارىن دا ەشقاشان وزگەرتپەيدى. ەحوبا تۇراقتى قۇداي بولعاندىقتان، ٴبىز ونىڭ دۇربەلەڭ كەزەڭدەردە كومەككە كەلەتىنىنە دە، بولاشاقتا ٴبىزدى قۇتقاراتىنىنا دا سەنىمدى بولا الامىز (ٴزابۇر 62:6، 7 وقىڭىز).
9. تاتيانانىڭ وقيعاسىنان نە ٴتۇيدىڭىز؟
9 ەحوبا جارتاسىمىز بولۋ ٷشىن، ونىڭ قانداي تۇلعا ەكەنىن جانە ونىڭ نيەتىن سانامىزدا مىقتاپ ۇستاۋىمىز كەرەك. بۇل بىزگە سىناق كەزىندە ەموسيالىق جاعىنان شايقالماۋعا كومەكتەسەدى (ٴزاب. 16:8). سەنىمى ٷشىن ٴبىر كەزدەرى ۇيقاماقتا وتىرعان تاتيانا باۋىرلاسىمىزدىڭ بۇعان كوزى جەتكەن. ول بىلاي دەيدى: «مەن تۋرا ماعىنادا جالعىز قالدىم. باسىندا قينالىپ، ٴجيى كوڭىلىم تۇسەتىن». تاتياناعا نە كومەكتەستى؟ ول باسىنا تۇسكەن سىناقتاردىڭ ەحوبامەن جانە ونىڭ نيەتىمەن بايلانىستى ەكەنىن تۇسىنگەندە، ەموسيالىق كۇيى تۇراقتالىپ، كۇرەسۋگە كۇشى پايدا بولعان. تاتيانا تاعى بىلاي دەيدى: «باسىما بۇل سىناقتار نە ٷشىن تۇسكەنى جايلى ويلانعاندا، قيىندىقتارعا ەحوبا ٷشىن ٴتوزىپ جاتقانىمدى ٴتۇسىندىم. بۇل ماعان ٶزىم تۋرالى كوپ ويلاي بەرمەۋگە كومەكتەستى».
10. ەحوبا قازىردەن ٴبىزدىڭ جارتاسىمىز بولۋ ٷشىن نە ىستەۋىمىز كەرەك؟
10 الداعى ۋاقىتتا ٴبىزدى اۋىر قيىندىقتار كۇتىپ تۇر. سول كەزدە ٴبىز ەحوباعا بۇرىنعىدان دا بەتەر ارقا سۇيەۋىمىز كەرەك بولادى. سوندىقتان ٴبىز قازىردەن ەحوباعا دەگەن سەنىمدىلىگىمىزدى ارتتىرىپ، ول كەز كەلگەن جاعدايدا بىزگە ادال بولۋعا كومەكتەسەتىنىنە ەش كۇماندانبايتىنداي بولۋىمىز كەرەك. بويىمىزدا سونداي سەنىمدىلىك بولۋ ٷشىن نە ىستەگەنىمىز ماڭىزدى؟ بۇل ٷشىن ەحوبانىڭ ەجەلدەگى قىزمەتشىلەرىنىڭ جانە بۇگىندەگى كۋاگەرلەرىنىڭ وقيعالارى جايلى وقىڭىز. ەحوبا ٶز قىزمەتشىلەرىن قولداۋ ٷشىن جارتاسقا ٴتان قاسيەتتەرىن قالاي تانىتقانىن بايقاپ كورىڭىز. وقىعان وقيعالارىڭىز جايلى ٴجىتى ويلانىڭىز. سوندا ەحوبا ٴسىزدىڭ دە جارتاسىڭىز بولادى.
ەحوبانىڭ جارتاسقا ٴتان قاسيەتتەرىنە ەلىكتەڭىز
11. ەحوبانىڭ جارتاسقا ٴتان قاسيەتتەرىنە ەلىكتەگەنىمىز نەگە ماڭىزدى؟ (« جاس ەر باۋىرلاستار ۇمتىلارلىق ماقسات» دەگەن قورشاۋدى دا قاراڭىز.)
11 ٴبىز ەحوبانى جارتاستاي ەتىپ تۇرعان قاسيەتتەرى جايلى بىلدىك. ال ەندى ونىڭ سول قاسيەتتەرىنە ٴبىز قالاي ەلىكتەي الاتىنىمىزدى كورەيىك. ەحوبانىڭ وسى قاسيەتتەرىنە بارىنشا ەلىكتەسەك، قاۋىمدى كوبىرەك نىعايتا الامىز. مىسالى، يسا شيمونعا «تاس» دەگەندى بىلدىرەتىن كەفا (گرەكشە «پەتىر») دەگەن ەسىم بەرگەن (جوح. 1:42). بۇل پەتىردىڭ باۋىرلاستار ٷشىن جۇبانىش بولىپ، قاۋىمنىڭ مىزعىماستاي بەرىك بولۋىنا ۇلەس قوساتىنىن بىلدىرگەن. بۇگىندە قاۋىمداعى اقساقالدار «الىپ جارتاستىڭ ساياسىنا» تەڭەلەدى. بۇل ولاردىڭ قاۋىمداعىلار ٷشىن قورعانىش، پانا ەكەنىن جاقسى سيپاتتايدى (يشايا 32:2). ارينە، قاۋىمنىڭ يگىلىگى ٷشىن ٴبارىمىز دە ەحوبانىڭ جارتاسقا ٴتان قاسيەتتەرىنە ەلىكتەي الامىز (ەفەس. 5:1).
12. ٴبىز باۋىرلاستارىمىزعا قالاي پانا بولا الامىز؟
12 پانا بولىڭىز. تابيعي اپات، ازاماتتىق تولقۋلار مەن سوعىس بولعان جاعدايلاردا ٴبىز باۋىرلاستارىمىزعا باسپانا بەرىپ، تۋرا ماعىنادا پانا بولامىز. «سوڭعى كۇندەرى» الەمدەگى احۋال ۋشىعا بەرەتىندىكتەن، باۋىرلاستارعا كومەكتەسۋىمىز قاجەت جاعدايلار دا كوبەيە تۇسەدى (ٴتىم. 2-ح. 3:1). سونداي-اق ٴبىز باۋىرلاستارىمىزعا ەموسيالىق جاعىنان، رۋحاني جاعىنان سايا بولا ٴبىلۋىمىز كەرەك. بۇل ٷشىن قاۋىمعا كەلگەن باۋىرلاستاردى جىلى قارسى الىڭىز. قاۋىمنىڭ ىستىق ۇياداي جايلى بولۋىنا جاعداي جاساڭىز. مىنا دۇنيە قاتىگەز، سۋىق جانە سترەسكە تولى. سوندىقتان باۋىرلاستارىمىز قاۋىمعا كەلگەندە سۇيىسپەنشىلىگىمىزدى سەزىپ، وزدەرىن ەركىن، جايلى سەزىنۋ ٷشىن ٴبارىن جاسايىق.
13. اقساقالدار باۋىرلاستار ٷشىن قالاي پانا بولا الادى؟ (سۋرەتتى دە قاراڭىز.)
13 قاۋىمداعى باۋىرلاستار تۋرا نە بەينەلى ماعىناداعى داۋىلدارعا كەزىككەندە، اقساقالدار ولار ٷشىن پانا بولادى. تابيعي اپات بولعان جاعدايدا نە باۋىرلاستارىمىزعا مەديسينالىق شۇعىل كومەك قاجەت بولعاندا، اقساقالدار بىردەن كومەككە كەلەدى. ولار باۋىرلاستارعا رۋحاني جاعىنان دا كومەك كورسەتەدى. ەگەر اقساقال جۇمساق، جاناشىر، تىڭداۋعا اسىق بولسا، باۋىرلاستار وعان ەش قىسىلماي، ەركىن جاقىنداي الادى. بۇنداي اقساقالدان قامقورلىق سەزىلىپ تۇراتىندىقتان، ونىڭ كيەلى كىتاپقا نەگىزدەپ بەرگەن كەڭەسىن دە قابىلداۋ جەڭىل بولادى (سال. 1-ح. 2:7، 8، 11).
قاۋىمداعى باۋىرلاستار تۋرا نە بەينەلى ماعىناداعى داۋىلدارعا كەزىككەندە، اقساقالدار ولار ٷشىن پانا بولادى (13-ابزاستى قاراڭىز) a
14. سەنىمدى ادام ەكەنىمىزدى قالاي كورسەتە الامىز؟
14 سەنىمدى ادام بولىڭىز. ٴبارىمىز دە، اسىرەسە قيىن شاقتارى، وزگەلەر بىزگە ارقا سۇيەي السا ەكەن دەيمىز (ناق. س. 17:17). سەنىمدى ادام دەگەن اتقا يە بولۋ ٷشىن نە ىستەۋىمىز كەرەك؟ قۇدايعا ۇنامدى قاسيەتتەردى بىردە تانىتىپ، بىردە تانىتپاي ەمەس، ۇنەمى تانىتۋىمىز كەرەك. مىسالى، بەرگەن ۋادەمىزدە تۇرۋعا، كەشىكپەي جۇرۋگە جانە تاپسىرىلعان ىستەردى ۋاقتىلى اتقارۋعا بارىنشا تىرىسۋىمىز قاجەت (مات. 5:37). كومەككە مۇقتاج كەزدەرىندە باۋىرلاستارعا ٸس جۇزىندە كومەكتەسۋ ارقىلى دا سەنىمدى ادام ەكەنىمىزدى كورسەتەمىز. سەنىمدى ادام بولۋدىڭ تاعى ٴبىر جولى — قاۋىمدا بەرىلگەن تاپسىرمالاردى نۇسقاۋلارعا ساي تياناقتى ورىنداۋ.
15. اقساقالدار سەنىمدى ادامدار بولسا، قاۋىم بۇنىڭ قانداي يگىلىگىن كورەدى؟
15 سەنىم ارتۋعا تۇرارلىق اقساقالداردىڭ قاۋىمعا تيگىزەر پايداسى كوپ. مىسالى، اقساقالدارعا نە توپ باقىلاۋشىلارىنا قاجەت كەزدە ەمىن-ەركىن حابارلاسا الاتىندارىن بىلگەنى جاريالاۋشىلاردىڭ كوڭىلىن كادىمگىدەي جايلاندىرادى. ال اقساقالدار كومەككە كەلۋگە دايىن بولسا، باۋىرلاستار ولاردىڭ قامقورلىقتارى مەن سۇيىسپەنشىلىكتەرىن سەزەدى. سونداي-اق اقساقالدار بەرەتىن كەڭەستەرىن ٶز ويىنا ەمەس، كيەلى كىتاپ پەن ادال دا اقىلدى قۇل بەرگەن ادەبيەتتەرگە نەگىزدەسە، جاريالاۋشىلار ولارعا سەنەتىن بولادى. اقساقالداردىڭ جەكە ماسەلەلەردى قۇپيا ساقتاعانى جانە ايتقان سوزدەرىندە تۇرعاندارى دا باۋىرلاستاردىڭ ولارعا دەگەن سەنىمىن ارتتىرادى.
16. تۇراقتى ادام بولعانىمىزدىڭ ٶزىمىز ٷشىن جانە وزگەلەر ٷشىن پايداسى قانداي؟
16 تۇراقتى ادام بولىڭىز. ەگەر ٴبىز بارلىق ىستە ەحوباعا مويىنسۇنساق جانە شەشىمدەرىمىزدى ٵردايىم كيەلى كىتاپ پرينسيپتەرىنە نەگىزدەسەك، وزگەلەرگە ۇلگى بولامىز. سەنىمىمىز نىعايىپ، تۋرا ٴبىلىمىمىز ارتقان سايىن شىندىقتا قاققان قازىقتاي نىق تۇرامىز. سونىڭ ارقاسىندا ٴبىز تۇراقسىز، ەكىويلى بولمايمىز، ٵرى جالعان ىلىمدەر مەن وسى دۇنيەنىڭ وي قالپىنا وڭاي ەرىپ كەتپەيمىز (ەفەس. 4:14؛ جاق. 1:6—8). ەحوبا مەن ونىڭ ۋادەلەرىنە سەنگەندىكتەن، جامان حابارلار ەستىگەندە دە ەش شايقالمايمىز (ٴزاب. 112:7، 8). سەنىمدە بەرىك تۇرساق، سىناققا كەزىگىپ جۇرگەن باۋىرلاستارعا كومەكتەسۋگە دە قاۋقارلى بولامىز (سال. 1-ح. 3:2، 3).
17. اقساقالدار باۋىرلاستارعا سەنىمدەرىندە نىق تۇرىپ، شايقالماۋعا قالاي كومەكتەسە الادى؟
17 اقساقالدار بارلىق جاعىنان بايسالدى، ەستى، ٸس-ارەكەتىنە ۇقىپتى، يلىككىش بولۋى كەرەك. بۇل ەر ادامدار باۋىرلاستارعا سەنىمدەرىندە نىق تۇرىپ، شايقالماۋعا كومەكتەسەدى. سونداي-اق ولار «شىنايى سوزدەردەن اۋىتقىماي»، قاۋىمدى نىعايتىپ وتىرادى (تيت. 1:9؛ ٴتىم. 1-ح. 3:1—3). اقساقالدار وزدەرى ۇلگى كورسەتىپ، باقتاشىلىق ساپار جاساپ، جاريالاۋشىلارعا جۇيەلى تۇردە قاۋىمعا كەلۋگە، ۋاعىزعا شىعۋعا، جەكە زەرتتەۋ جاساۋعا كومەكتەسەدى. ال باۋىرلاستار قيىن جاعدايلارعا كەزىككەندە، اقساقالدار ولاردى ەحوبا مەن ونىڭ ۋادەلەرىنەن نازارلارىن تايدىرماۋعا تالپىندىرادى.
18. نەگە ٴبىز ەحوبانى ماداقتاپ، وعان ودان سايىن جاقىن بولعىمىز كەلەدى؟ (« ەحوباعا جاقىنداي ٴتۇسۋدىڭ جولى» دەگەن قورشاۋدى دا قاراڭىز.)
18 ەحوبانىڭ تاماشا قاسيەتتەرىن قاراستىرعان سوڭ، ٴبىز دە ٴداۋىت پاتشا ىسپەتتى: «جارتاسىم ەحوبا ماداقتالسىن!»— دەگىمىز كەلەدى (ٴزاب. 144:1). ٴبىز ەحوباعا ٵردايىم ارقا سۇيەي الامىز. ول ەشقاشان كوڭىلىمىزدى قالدىرمايدى. ٶمىر بويى، ٴتىپتى قارتايعان شاعىمىزدا دا ەحوبا رۋحاني بەرىك تۇرۋىمىزعا ٵردايىم كومەكتەسەتىنىنە سەنىمدى بولساق بولادى. سوندىقتان ٴبىز: «ول — مەنىڭ جارتاسىم»،— دەپ اۋىز تولتىرىپ ايتا الامىز! (ٴزاب. 92:14، 15).
150-ٵن قۇتقارىلۋ ٷشىن قۇدايدى ىزدەيىك
a سۋرەت: پاتشالىق سارايىندا ايەل باۋىرلاس ەكى اقساقالعا ەمىن-ەركىن جاقىنداپ، سويلەسىپ تۇر.
