អត្ថបទសិក្សា ២៦
ចម្រៀងលេខ៨ ព្រះយេហូវ៉ាជាទីពឹងពំនាក់របស់យើង
ចូរយកព្រះយេហូវ៉ាធ្វើជាថ្មដារបស់អ្នក
«ព្រះរបស់យើងរឹងមាំដូចថ្មដា គ្មានព្រះណាដូចលោកទេ»។—១សាំ. ២:២
ចំណុចផ្ដោត
សូមរៀនអំពីមូលហេតុដែលព្រះយេហូវ៉ាបានត្រូវហៅថាជាថ្មដា និងរបៀបដែលយើងអាចមានគុណសម្បត្តិដូចលោកដែលប្រៀបដូចជាថ្មដា។
១. ដូចបានកត់ទុកនៅចម្រៀងសរសើរព្រះ ១៨:៤៦ តើដាវីឌបានប្រដូចព្រះយេហូវ៉ាទៅនឹងអ្វី?
ជួនកាលយើងស្រាប់តែជួបបញ្ហាដែលប៉ះពាល់ជីវិតយើង ឬផ្លាស់ប្ដូរជីវិតយើងទាំងស្រុង។ ប៉ុន្តែ យើងពិតជាសប្បាយចិត្តដែលយើងអាចពឹងផ្អែកព្រះយេហូវ៉ាឲ្យជួយយើង! នៅអត្ថបទមុន យើងបានទទួលការរំលឹកថាព្រះយេហូវ៉ាជាព្រះដែលមានជីវិតរស់នៅ ហើយថាលោកតែងតែប្រុងប្រៀបជួយយើង។ ពេលយើងទទួលការគាំទ្រពីលោក នោះពង្រឹងទំនុកចិត្តយើងថា«ព្រះយេហូវ៉ាជាព្រះដែលមានជីវិតរស់នៅ!»។ (សូមអាន ចម្រៀងសរសើរព្រះ ១៨:៤៦) ប៉ុន្តែ ក្រោយពីដាវីឌនិយាយពាក្យទាំងនេះ គាត់បានហៅព្រះយេហូវ៉ាថាជា«ថ្មដារបស់ខ្ញុំ»។ ហេតុអ្វីគាត់ប្រដូចព្រះយេហូវ៉ាជាព្រះដែលមានជីវិតរស់នៅទៅនឹងវត្ថុដែលគ្មានជីវិតដូចជាថ្ម?
២. តើយើងនឹងពិចារណាអ្វីក្នុងអត្ថបទនេះ?
២ នៅក្នុងអត្ថបទនេះ យើងនឹងពិចារណាអំពីមូលហេតុដែលព្រះយេហូវ៉ាបានត្រូវហៅថាជាថ្មដា និងអ្វីដែលការរៀបរាប់នោះបង្រៀនយើងអំពីលោក។ យើងក៏នឹងរៀនអំពីរបៀបដែលយើងអាចចាត់ទុកព្រះយេហូវ៉ាថាជាថ្មដារបស់យើងដែរ។ ចុងក្រោយ យើងនឹងពិចារណារបៀបដែលយើងអាចមានគុណសម្បត្តិដូចព្រះយេហូវ៉ាដែលប្រៀបដូចជាថ្មដា។
មូលហេតុដែលព្រះយេហូវ៉ាជាថ្មដា
៣. តើគម្ពីរច្រើនតែប្រើពាក្យ«ថ្មដា»យ៉ាងដូចម្ដេច? (សូមមើលរូបភាព)
៣ គម្ពីរប្រដូចព្រះយេហូវ៉ាទៅនឹង«ថ្មដា»ដើម្បីជួយយើងឲ្យយល់អំពីគុណសម្បត្តិមួយចំនួនរបស់លោក។ ពាក្យ«ថ្មដា»ច្រើនតែលើកឡើងក្នុងឃ្លាដែលសរសើរតម្កើងព្រះយេហូវ៉ាជាព្រះដែលគ្មានអ្នកណាប្រៀបស្មើ។ បទគម្ពីរដំបូងដែលសំដៅព្រះយេហូវ៉ាថា«ជាថ្មដា»គឺនៅការបំភ្លឺច្បាប់ ៣២:៤។ នៅក្នុងសេចក្ដីអធិដ្ឋានរបស់ហាណា គាត់បាននិយាយថា៖ «ព្រះរបស់យើងរឹងមាំដូចថ្មដា គ្មានព្រះណាដូចលោកទេ»។ (១សាំ. ២:២) ហាបាគុកបានហៅព្រះយេហូវ៉ាថា៖ «ថ្មដារបស់ខ្ញុំ»។ (ហាប. ១:១២) អ្នកតែងបទចម្រៀងសរសើរព្រះ ៧៣បានហៅព្រះថា៖ «ថ្មដាដែលការពារចិត្តខ្ញុំ»។ (ចសព. ៧៣:២៦) ម្យ៉ាងទៀត សូម្បីតែព្រះយេហូវ៉ាក៏រៀបរាប់អំពីខ្លួនលោកថាជាថ្មដា។ (អេ. ៤៤:៨) សូមយើងពិចារណាអំពីគុណសម្បត្តិបីដែលធ្វើឲ្យព្រះយេហូវ៉ាប្រៀបដូចជាថ្មដា ហើយរៀនអំពីរបៀបដែលយើងអាចយកលោកធ្វើជា«ថ្មដារបស់យើង»។—បច. ៣២:៣១
រាស្ត្ររបស់ព្រះចាត់ទុកព្រះយេហូវ៉ាថាប្រៀបដូចជាថ្មដាដ៏រឹងមាំ (សូមមើលវគ្គ៣)
៤. តើព្រះយេហូវ៉ាជាទីពឹងជ្រកក្នុងន័យយ៉ាងណា? (ចម្រៀងសរសើរព្រះ ៩៤:២២)
៤ ព្រះយេហូវ៉ាជាទីពឹងជ្រក។ ដូចថ្មដ៏ធំមួយអាចជាកន្លែងលាក់ខ្លួនពីខ្យល់ព្យុះ ព្រះយេហូវ៉ាការពារយើងក្នុងអំឡុងពេលដែលយើងមានការពិបាកក្នុងជីវិត។ (សូមអាន ចម្រៀងសរសើរព្រះ ៩៤:២២) លោកជួយយើងឲ្យការពារចំណងមិត្តភាពរបស់យើងជាមួយនឹងលោក ហើយពង្រឹងទំនុកចិត្តយើងថាគ្មានទុក្ខវេទនាណាដែលយើងជួបនៅឥឡូវនេះ អាចធ្វើឲ្យយើងរងទុក្ខជារៀងរហូតទេ។ លោកក៏បានសន្យាថា នៅថ្ងៃអនាគតលោកនឹងបំបាត់ចោលអ្វីណាក៏ដោយដែលនាំឲ្យយើងខ្វល់ខ្វាយឬរងទុក្ខ។—អេគ. ៣៤:២៥, ២៦
៥. តើព្រះយេហូវ៉ាអាចទៅជាទីពឹងជ្រកដែលប្រៀបដូចជាថ្មដារបស់យើងតាមរបៀបណា?
៥ របៀបមួយដែលយើងអាចយកព្រះយេហូវ៉ាជាទីពឹងជ្រកដូចជាថ្មដារបស់យើងគឺ ដោយអធិដ្ឋានទៅលោក។ ពេលយើងអធិដ្ឋាន ព្រះយេហូវ៉ាផ្ដល់ឲ្យយើងនូវ«សេចក្ដីសុខសាន្តរបស់ព្រះ»ដែលការពារចិត្តនិងគំនិតរបស់យើង។ (ភី. ៤:៦, ៧) សូមគិតពិចារណាអំពីបទពិសោធន៍របស់បងប្រុសម្នាក់ឈ្មោះអរថម ដែលបានជាប់គុកដោយសារជំនឿរបស់គាត់។ កាលដែលនៅក្នុងគុក អ្នកស៊ើបអង្កេតម្នាក់បានសួរចម្លើយគាត់ជាច្រើនដង ធ្វើបាបគាត់ ហើយព្យាយាមបំភ័យគាត់។ បងអរថមបាននិយាយថា៖ «ខ្ញុំតានតឹងចិត្តពេលណាដែលអ្នកស៊ើបអង្កេតនោះមកសួរចម្លើយខ្ញុំ។ . . . .ខ្ញុំតែងតែអធិដ្ឋានទៅព្រះយេហូវ៉ា។ ខ្ញុំបានសុំឲ្យមានសេចក្ដីសុខសាន្តក្នុងចិត្តនិងសុំប្រាជ្ញា។ វិធីសាស្ត្ររបស់អ្នកស៊ើបអង្កេតនោះគ្មានប្រសិទ្ធិភាពមកលើខ្ញុំទេ។ . . . ដោយមានជំនួយពីព្រះយេហូវ៉ា គឺហាក់ដូចជាខ្ញុំកំពុងឈរនៅពីក្រោយជញ្ជាំងថ្មមួយ»។
៦. ហេតុអ្វីយើងអាចពឹងពាក់ព្រះយេហូវ៉ាជានិច្ច? (អេសាយ ២៦:៣, ៤)
៦ ព្រះយេហូវ៉ាជាព្រះដែលអាចពឹងពាក់បាន។ ដោយសារលោកជា«ថ្មដាដ៏ស្ថិតស្ថេរ» ព្រះយេហូវ៉ាតែងតែនៅក្បែរយើងដើម្បីផ្ដល់ជំនួយ គឺលោកប្រៀបដូចជាថ្មដានៅរឹងមាំមួយកន្លែងមិនរង្គោះរង្គើ។ យើងអាចទុកចិត្តលោកបាន។ (សូមអាន អេសាយ ២៦:៣, ៤) លោកមានជីវិតរស់នៅជានិច្ច ដូច្នេះលោកតែងតែធ្វើតាមពាក្យសន្យារបស់លោក ស្ដាប់សេចក្ដីអធិដ្ឋានរបស់យើង ហើយផ្ដល់ការគាំទ្រដែលយើងត្រូវការ។ យើងក៏អាចពឹងផ្អែកលើព្រះយេហូវ៉ា ដោយសារលោកមានភក្ដីភាពចំពោះពួកអ្នកបម្រើលោក។ (២សាំ. ២២:២៦) លោកនឹងមិនភ្លេចអ្វីដែលយើងធ្វើ ហើយលោកនឹងតែងតែឲ្យរង្វាន់យើង។—ហេ. ៦:១០; ១១:៦
៧. តើអ្វីនឹងកើតឡើងពេលយើងពឹងផ្អែកលើព្រះយេហូវ៉ា? (សូមមើលរូបភាពផងដែរ)
៧ យើងយកព្រះយេហូវ៉ាជាថ្មដារបស់យើងពេលយើងពឹងផ្អែកលោកទាំងស្រុង។ យើងទុកចិត្តថាដោយស្ដាប់បង្គាប់លោក សូម្បីតែនៅក្នុងគ្រាពិបាកក្ដី យើងនឹងទទួលប្រយោជន៍។ (អេ. ៤៨:១៧, ១៨) រាល់ដងដែលយើងឃើញថាព្រះយេហូវ៉ាបានជួយយើង យើងកាន់តែទុកចិត្តលោក។ យ៉ាងនេះ យើងជឿជាក់ថាមានតែព្រះយេហូវ៉ាប៉ុណ្ណោះអាចជួយយើងឲ្យស៊ូទ្រាំនឹងទុក្ខលំបាកណាក៏ដោយ មិនថាទុក្ខលំបាកនោះពិបាកយ៉ាងណាក្ដី។ ពេលស្ថិតក្នុងស្ថានភាពដែលគ្មានអ្នកណាយើងអាចសុំជំនួយបាន នោះយើងទទួលស្គាល់ថាយើងអាចពឹងពាក់ព្រះយេហូវ៉ាបានជានិច្ច។ បងប្រុសប្លាដេមើនិយាយថា៖ «ខ្ញុំមានអារម្មណ៍ជិតស្និទ្ធបំផុតជាមួយព្រះយេហូវ៉ាពេលដែលខ្ញុំបានត្រូវគេឃុំខ្លួន។ ខ្ញុំបានរៀនឲ្យចេះទុកចិត្តព្រះយេហូវ៉ាខ្លាំងជាងដោយសារខ្ញុំនៅម្នាក់ឯង ហើយលោកគឺជាបុគ្គលតែម្នាក់គត់ដែលអាចជួយខ្ញុំឲ្យស៊ូទ្រាំនឹងស្ថានភាពនោះ»។
យើងយកព្រះយេហូវ៉ាជាថ្មដារបស់យើងពេលយើងពឹងផ្អែកលើលោកទាំងស្រុង (សូមមើលវគ្គ៧)
៨. (ក) ហេតុអ្វីយើងអាចនិយាយថាព្រះយេហូវ៉ានឹងនរ? (ខ) តើយើងទទួលប្រយោជន៍យ៉ាងណាពីការយកព្រះជាថ្មដារបស់យើង? (ចម្រៀងសរសើរព្រះ ៦២:៦, ៧)
៨ ព្រះយេហូវ៉ានឹងនរ។ ស្រដៀងនឹងថ្មដាយ៉ាងធំ ព្រះយេហូវ៉ាមាំមួននិងមិនរង្គោះរង្គើ។ គុណសម្បត្តិនិងគោលបំណងរបស់លោកមិនប្រែប្រួលឡើយ។ (ម៉ាឡ. ៣:៦) ពេលមានការបះបោរនៅសួនអេដែន ព្រះយេហូវ៉ាមិនបានផ្លាស់ប្ដូរគោលបំណងរបស់លោកចំពោះមនុស្សជាតិទេ។ ដូចសាវ័កប៉ូលបានសរសេរ ព្រះយេហូវ៉ា«មិនអាចបដិសេធខ្លួនលោកបានឡើយ»។ (២ធី. ២:១៣) នេះមានន័យថា មិនថាមានអ្វីកើតឡើង ឬអ្នកឯទៀតធ្វើអ្វីក៏ដោយ ព្រះយេហូវ៉ានឹងមិនផ្លាស់ប្ដូរបុគ្គលិកលក្ខណៈ គោលបំណង ឬខ្នាតតម្រារបស់លោកទេ។ ដោយសារព្រះយេហូវ៉ាមិនផ្លាស់ប្ដូរ យើងដឹងថាលោកនឹងជួយយើងក្នុងគ្រាលំបាក ហើយធ្វើតាមសេចក្ដីសន្យារបស់លោកសម្រាប់ថ្ងៃអនាគត។—សូមអាន ចម្រៀងសរសើរព្រះ ៦២:៦, ៧
៩. តើអ្នករៀនអ្វីពីបទពិសោធន៍របស់បងថាត់យ៉ាណា?
៩ យើងយកព្រះយេហូវ៉ាជាថ្មដារបស់យើងដោយផ្ដោតលើគុណសម្បត្តិរបស់លោក និងដោយចាំជានិច្ចអំពីគោលបំណងរបស់លោក។ ការធ្វើដូច្នេះអាចជួយយើងរក្សាចិត្តឲ្យនឹងនរពេលដែលស៊ូទ្រាំនឹងទុក្ខលំបាក។ (ចសព. ១៦:៨) នេះបានកើតឡើងចំពោះបងស្រីម្នាក់ឈ្មោះថាត់យ៉ាណា។ គាត់បានត្រូវគេឃុំខ្លួននៅផ្ទះដោយសារជំនឿរបស់គាត់។ គាត់បាននិយាយថា៖ «ខ្ញុំនៅតែឯង។ ដំបូងគឺពិបាកណាស់ ហើយខ្ញុំធ្លាក់ទឹកចិត្តជាញឹកញយ»។ ប៉ុន្តែ ពេលដែលគាត់យល់ឃើញថាទុក្ខលំបាករបស់គាត់ជាប់ទាក់ទងយ៉ាងណានឹងព្រះយេហូវ៉ានិងគោលបំណងរបស់លោក គាត់អាចស៊ូទ្រាំបាន និងមានកម្លាំងចិត្តឡើងវិញ។ គាត់និយាយថា៖ «ការដឹងអំពីមូលហេតុដែលនោះកើតឡើងជួយឲ្យខ្ញុំចាំថាខ្ញុំស្ថិតក្នុងស្ថានភាពនោះដើម្បីព្រះយេហូវ៉ា ហើយនោះបានជួយខ្ញុំឲ្យឈប់គិតអំពីខ្លួនឯង»។
១០. តើព្រះយេហូវ៉ាអាចធ្វើជាថ្មដារបស់យើងនៅឥឡូវនេះយ៉ាងដូចម្ដេច?
១០ នៅបន្តិចទៀត យើងនឹងជួបការពិបាកយ៉ាងខ្លាំង ហើយយើងនឹងត្រូវពឹងព្រះយេហូវ៉ាខ្លាំងជាងពេលមុនៗទៅទៀត។ ឥឡូវជាពេលដែលយើងត្រូវពង្រឹងទំនុកចិត្តថា លោកនឹងផ្ដល់អ្វីណាក៏ដោយដែលយើងត្រូវការដើម្បីស៊ូទ្រាំយ៉ាងស្មោះត្រង់។ តើយើងអាចធ្វើដូច្នេះយ៉ាងដូចម្ដេច? សូមអានកំណត់ហេតុគម្ពីរនិងបទពិសោធន៍របស់បងប្អូនសាក្សីនៅសព្វថ្ងៃនេះ។ សូមកត់សម្គាល់អំពីរបៀបដែលព្រះបង្ហាញគុណសម្បត្តិដែលប្រៀបដូចជាថ្មដាដើម្បីគាំទ្រអ្នកបម្រើរបស់លោក។ សូមគិតយ៉ាងជ្រាលជ្រៅអំពីកំណត់ហេតុទាំងនេះ។ ការធ្វើដូច្នេះអាចជួយអ្នកឲ្យយកព្រះយេហូវ៉ាជាថ្មដារបស់អ្នក។
ចូរមានគុណសម្បត្តិដូចព្រះយេហូវ៉ា
១១. ហេតុអ្វីយើងចង់មានគុណសម្បត្តិដូចព្រះយេហូវ៉ា? (សូមមើលផងដែរនូវប្រអប់ដែលមានចំណងជើងថា « គោលដៅសម្រាប់ប្អូនប្រុសវ័យក្មេង»)
១១ យើងបានកត់សម្គាល់អំពីរបៀបដែលព្រះយេហូវ៉ាបង្ហាញថាលោកប្រៀបដូចជាថ្មដា។ ឥឡូវ សូមពិចារណាអំពីរបៀបដែលយើងអាចមានគុណសម្បត្តិទាំងនេះដូចលោក។ បើយើងព្យាយាមអស់ពីសមត្ថភាពដើម្បីមានគុណសម្បត្តិដូចព្រះយេហូវ៉ា យើងអាចពង្រឹងកម្លាំងបងប្អូនរបស់យើង។ ជាឧទាហរណ៍ លោកយេស៊ូបានដាក់ឈ្មោះស៊ីម៉ូនថា កេផាស(ដែលភាសាក្រិចហៅថា«ពេត្រុស») ដែលមានន័យថា«ថ្ម»។ (យ៉ូន. ១:៤២) នេះបង្ហាញថាពេត្រុសនឹងសម្រាលទុក្ខអ្នកឯទៀតក្នុងក្រុមជំនុំ ហើយពង្រឹងជំនឿរបស់ពួកគេ។ អ្នកចាស់ទុំក្នុងក្រុមជំនុំបានត្រូវរៀបរាប់ថា«ជាម្លប់នៃថ្មដាយ៉ាងធំ» នេះមានន័យថាពួកគេការពារពួកអ្នកនៅក្នុងក្រុមជំនុំ។ (អេ. ៣២:២) ប៉ុន្តែ យើងទាំងអស់គ្នាអាចលើកទឹកចិត្តគ្នាទៅវិញទៅមក បើយើងមានគុណសម្បត្តិដូចព្រះយេហូវ៉ា។—អេភ. ៥:១
១២. សូមរៀបរាប់អំពីរបៀបផ្សេងៗដែលយើងអាចធ្វើជាទីពឹងជ្រកសម្រាប់អ្នកឯទៀត។
១២ ចូរធ្វើជាទីពឹងជ្រក។ ពេលខ្លះយើងអាចស្នើផ្ដល់កន្លែងជ្រកកោនសម្រាប់បងប្អូនពេលដែលមានគ្រោះមហន្តរាយធម្មជាតិ ភាពចលាចល ឬសង្គ្រាម។ កាលដែលស្ថានភាពនៅ«គ្រាចុងក្រោយបង្អស់»កាន់តែអាក្រក់ទៅៗ យើងទំនងជានឹងមានឱកាសច្រើនជាងដើម្បីជួយគ្នាទៅវិញទៅមក។ (២ធី. ៣:១) យើងក៏អាចផ្ដល់ការសម្រាលទុក្ខនិងសេចក្ដីស្រឡាញ់ដែលបងប្អូនត្រូវការ។ វិធីមួយដែលយើងអាចធ្វើដូច្នេះ គឺដោយទទួលស្វាគមន៍បងប្អូនយ៉ាងរាក់ទាក់ពេលដែលពួកគេចូលរួមកិច្ចប្រជុំក្រុមជំនុំ។ ការធ្វើដូច្នេះនឹងជួយឲ្យមានបរិយាកាសកក់ក្ដៅក្នុងក្រុមជំនុំ។ យើងរស់នៅក្នុងពិភពលោកដែលគ្មានមេត្តា គ្មានភាពកក់ក្ដៅ ហើយដែលធ្វើឲ្យតានតឹងចិត្ត។ ដូច្នេះ ពេលបងប្អូនរបស់យើងចូលរួមកិច្ចប្រជុំ យើងចង់ខំអស់ពីសមត្ថភាពដើម្បីធ្វើឲ្យពួកគេមានអារម្មណ៍ថាពួកគេបានទទួលសេចក្ដីស្រឡាញ់ កម្លាំងចិត្តឡើងវិញ និងមានសុវត្ថិភាព។
១៣. តើតាមរបៀបណាអ្នកចាស់ទុំអាចសម្រាលទុក្ខអ្នកឯទៀតក្នុងគ្រាលំបាក? (សូមមើលរូបភាពផងដែរ)
១៣ ពួកអ្នកចាស់ទុំអាចទៅជាទីពឹងជ្រកសម្រាប់បងប្អូនក្នុងក្រុមជំនុំដែលស៊ូទ្រាំនឹងទុក្ខលំបាកផ្សេងៗ។ ពេលមានគ្រោះមហន្តរាយ ឬមានសេចក្ដីត្រូវការការព្យាបាលជាបន្ទាន់ អ្នកចាស់ទុំចាត់វិធានការជួយបងប្អូនភ្លាមៗ។ ពួកគេក៏ផ្ដល់ការណែនាំនិងការលើកទឹកចិត្តពីគម្ពីរដែរ។ បងប្អូននឹងស្រួលសុំជំនួយពីអ្នកចាស់ទុំ បើគាត់បានត្រូវគេស្គាល់ថាជាបុគ្គលដែលមានចិត្តស្លូតបូត យល់អារម្មណ៍ និងសុខចិត្តស្ដាប់។ គុណសម្បត្តិទាំងនេះជួយអ្នកឯទៀតឲ្យមានអារម្មណ៍ថាពួកគេទទួលសេចក្ដីស្រឡាញ់។ យ៉ាងនេះ ពេលអ្នកចាស់ទុំផ្ដល់ការណែនាំដែលមានមូលដ្ឋានពីគម្ពីរ នោះពួកគេស្រួលទទួលយកជាង។—១ថែ. ២:៧, ៨, ១១
ពួកអ្នកចាស់ទុំសម្រាលទុក្ខបងប្អូនក្នុងអំឡុងគ្រាលំបាក (សូមមើលវគ្គ១៣) a
១៤. តើយើងអាចបង្ហាញយ៉ាងណាថាយើងជាមនុស្សដែលអាចពឹងពាក់បាន?
១៤ ចូរធ្វើជាមនុស្សដែលពឹងពាក់បាន។ យើងចង់ឲ្យអ្នកឯទៀតរាប់យើងថាជាមនុស្សដែលអាចពឹងពាក់បាន ជាពិសេសនៅគ្រាលំបាក។ (សុភ. ១៧:១៧) តើយើងអាចមានកេរ្តិ៍ឈ្មោះជាមនុស្សដែលអាចពឹងពាក់បានតាមរបៀបណា? ជារៀងរាល់ថ្ងៃ យើងអាចខំព្យាយាមមានគុណសម្បត្តិដូចព្រះដោយរក្សាពាក្យសន្យារបស់យើង ហើយដោយព្យាយាមទៀងពេលជាដើម។ (ម៉ាថ. ៥:៣៧) យើងក៏អាចជួយបងប្អូនពេលដែលពួកគេត្រូវការជំនួយដែរ។ បន្ថែមទៅទៀត យើងធ្វើឲ្យប្រាកដថាយើងបំពេញភារកិច្ចតាមការណែនាំដែលយើងបានទទួល។
១៥. ពេលអ្នកចាស់ទុំជាមនុស្សដែលអាចពឹងពាក់បាន តើក្រុមជំនុំទទួលប្រយោជន៍យ៉ាងណា?
១៥ អ្នកចាស់ទុំដ៏គួរឲ្យទុកចិត្តផ្ដល់ប្រយោជន៍ដល់ក្រុមជំនុំ។ តើតាមរបៀបណា? អ្នកផ្សាយមានអារម្មណ៍ធូរចិត្តពេលពួកគេដឹងថា ពួកគេស្រួលទាក់ទងអ្នកត្រួតពិនិត្យក្រុមផ្សព្វផ្សាយនិងពួកអ្នកចាស់ទុំឯទៀត។ អ្នកផ្សាយមានអារម្មណ៍ថាទទួលសេចក្ដីស្រឡាញ់ ពេលពួកគេដឹងថាអ្នកចាស់ទុំសុខចិត្តជួយពួកគេ។ ពេលអ្នកចាស់ទុំប្រើគម្ពីរនិងសៀវភៅផ្សេងៗរបស់យើងដើម្បីឲ្យយោបល់ជាជាងប្រាប់គំនិតរបស់ខ្លួន នោះអ្នកផ្សាយនឹងកាន់តែទុកចិត្ត។ បងប្អូនក៏ទុកចិត្តអ្នកចាស់ទុំដែលមិននិយាយរឿងផ្ទាល់ខ្លួនរបស់ពួកគេ និងរក្សាពាក្យសន្យារបស់ខ្លួន។
១៦. តើយើងផ្ទាល់និងអ្នកឯទៀតទទួលប្រយោជន៍យ៉ាងណាពេលយើងធ្វើជាមនុស្សនឹងនរ?
១៦ ចូរធ្វើជាមនុស្សនឹងនរ។ យើងអាចជះឥទ្ធិពលល្អទៅលើអ្នកឯទៀតបើយើងតាំងជំហរចំពោះអ្វីដែលត្រឹមត្រូវ និងធ្វើការសម្រេចចិត្តដែលមានមូលដ្ឋានយ៉ាងរឹងមាំលើគោលការណ៍គម្ពីរ។ កាលដែលយើងកាន់តែមានជំនឿនិងចំណេះត្រឹមត្រូវ យើងនឹងកាន់តែមាំមួនក្នុងសេចក្ដីពិត។ យើងនឹងកត់សម្គាល់សេចក្ដីបង្រៀននិងគំនិតមិនពិតដែលមិនស្របតាមរបៀបគិតគូររបស់ព្រះយេហូវ៉ា ហើយយើងនឹងមិនទទួលឥទ្ធិពលពីអ្វីទាំងនោះទេ។ (អេភ. ៤:១៤; យ៉ា. ១:៦-៨) ជំនឿរបស់យើងទៅលើព្រះយេហូវ៉ា ព្រមទាំងទៅលើសេចក្ដីសន្យារបស់លោក ជួយយើងរក្សាចិត្តស្ងប់ពេលយើងឮព័ត៌មានមិនល្អ។ (ចសព. ១១២:៧, ៨) យើងក៏អាចជួយពួកអ្នកដែលប្រហែលជាកំពុងប្រឈមមុខនឹងទុក្ខលំបាក។—១ថែ. ៣:២, ៣
១៧. តើពួកអ្នកចាស់ទុំអាចជួយបងប្អូនយ៉ាងណាឲ្យរក្សាចិត្តស្ងប់និងមានជំនឿរឹងមាំ?
១៧ អ្នកចាស់ទុំគួរតែប្រព្រឹត្តដោយមានតុល្យភាព ដឹងខុសត្រូវ មានសណ្ដាប់ធ្នាប់ និងជាមនុស្សសមហេតុផល។ បុរសទាំងនេះជួយអ្នកឯទៀតឲ្យមានចិត្តស្ងប់ និងជំនឿរឹងមាំលើព្រះយេហូវ៉ា ហើយពង្រឹងក្រុមជំនុំដោយ«កាន់ខ្ជាប់តាមបណ្ដាំដ៏គួរឲ្យទុកចិត្ត»។ (ទីត. ១:៩; ១ធី. ៣:១-៣) តាមរយៈគំរូរបស់ពួកគេ និងដោយការឃ្វាលក្រុមជំនុំ អ្នកចាស់ទុំជួយបងប្អូនឲ្យចូលរួមកិច្ចប្រជុំ ផ្សព្វផ្សាយ និងសិក្សាផ្ទាល់ខ្លួនជាទៀងទាត់។ ពេលបងប្អូនមានបញ្ហាដែលនាំឲ្យខ្វល់ចិត្ត អ្នកចាស់ទុំរំលឹកពួកគេឲ្យពឹងផ្អែកលើព្រះយេហូវ៉ានិងផ្ដោតអារម្មណ៍លើសេចក្ដីសន្យារបស់លោក។
១៨. ហេតុអ្វីយើងចង់សរសើរតម្កើងព្រះយេហូវ៉ា ហើយចូលកាន់តែជិតលោក? (សូមមើលផងដែរនូវប្រអប់ដែលមានចំណងជើងថា « របៀបចូលកាន់តែជិតព្រះយេហូវ៉ា»)
១៨ ក្រោយពីពិចារណាអំពីគុណសម្បត្តិដ៏អស្ចារ្យរបស់ព្រះយេហូវ៉ា យើងអាចនិយាយដូចស្ដេចដាវីឌថា៖ «សូមឲ្យព្រះយេហូវ៉ាជាថ្មដារបស់ខ្ញុំទទួលបានការសរសើរតម្កើង»។ (ចសព. ១៤៤:១) យើងតែងតែអាចពឹងផ្អែកលើព្រះយេហូវ៉ា។ ពេញមួយជីវិតរបស់យើង សូម្បីតែពេលយើងចាស់ទៅក៏យើងទុកចិត្តថាលោកនឹងបន្តជួយយើងឲ្យនៅជិតស្និទ្ធនឹងលោក។ យ៉ាងនេះ យើងអាចនិយាយថា៖ «លោកជាថ្មដាដ៏រឹងមាំរបស់ខ្ញុំ»។—ចសព. ៩២:១៤, ១៥
ចម្រៀងលេខ១៥០ ចូរស្វែងរកសេចក្ដីសង្គ្រោះពីព្រះ
a ការពណ៌នាអំពីរូបភាព៖ ពេលនៅសាលប្រជុំ បងស្រីម្នាក់ទៅជួបអ្នកចាស់ពីរនាក់។
