1. Wetin Devid kɔmpia Jiova to na Sam 18:46?

 SƆNTƐNDE, wi kin gɛt prɔblɛm dɛn we wi nɔ de ɛkspɛkt we kin mek layf nɔ izi fɔ wi ɔ we kin chenj wi layf kɔmplit wan. Bɔt wi gladi fɔ no se wi kin tɔn to Jiova Gɔd fɔ ɛp wi. Insay di atikul bifo dis wan, wi bin lan se Jiova na Gɔd we de alayv ɛn i rɛdi fɔ ɛp wi ɔltɛm. We i de sɔpɔt wi, dat de mek wi gɛt kɔnfidɛns se “Jiova de alayv!” (Rid Sam 18:46.) Bɔt jɔs afta Devid tɔk dɛn wɔd dɛn de, i tɔk se Gɔd na “mi Rɔk.” Wetin mek i kɔmpia Jiova we na Gɔd we de alayv to rɔk we nɔ gɛt layf?

2. Wetin mek wi want fɔ no di rizin we mek Devid kɔl Jiova “mi Rɔk”?

² Insay dis atikul, wi go tɔk bɔt wetin mek dɛn kɔl Jiova rɔk ɛn wetin dat de tich wi bɔt am. Wi go lan bak bɔt aw wi go si am as wi Rɔk. Faynali, wi go tɔk bɔt we dɛn we wi go falamakata Jiova in kwaliti dɛn we tan lɛk rɔk.

WETIN MEK DI BAYBUL KƆL JIOVA RƆK?

3. Aw di Baybul kin yuz di wɔd “rɔk” bɔku tɛm? (Luk di na di frɔnt pej.)

³ Di Baybul kin yuz di wɔd “rɔk” fɔ ɛp wi fɔ ɔndastand sɔm pan di kwaliti dɛn we Jiova gɛt. Bɔku tɛm, we Jiova in savant dɛn kin yuz di wɔd rɔk, na fɔ prez am fɔ di fayn kwaliti dɛn we i gɛt. Na insay Dyutɔrɔnɔmi 32:4 di Baybul kɔl Jiova “di Rɔk” fɔ di fɔs tɛm. We Ana de pre, i bin tɔk se, “No rɔk nɔ de we tan lɛk wi Gɔd.” (1 Sam. 2:2) Abakɔk kɔl Jiova “Mi Rɔk.” (Aba. 1:12) Di man we rayt Sam 73 tɔk se na “Gɔd go mek a strɔng” (dis min se Gɔd na in rɔk.) (Sam 73:26) Jiova ivin kɔl insɛf rɔk. (Ayz. 44:8) Lɛ wi tɔk bɔt tri kwaliti dɛn we Jiova de sho we mek i tan lɛk rɔk ɛn lan aw wisɛf go mek i bi “wi Rɔk.”​—Dyu. 32:31.

4. Aw Jiova tan lɛk ples fɔ ayd? (Sam 94:22)

 ⁴ Jiova tan lɛk ples fɔ ayd. Jɔs lɛk aw big rɔk de protɛkt pɔsin we big big briz de blo, na so Jiova de protɛkt wi di tɛm dɛn we wi gɛt prɔblɛm. (Rid Sam 94:22.) I de protɛkt wi ɛn mek bad tin nɔ apin to wi we go mek wi sɔfa sote go. Bɔt nɔto dat nɔmɔ. I dɔn prɔmis wi bak se tumara bambay i go pul ɛnitin we de mek wi wɔri ɔ sɔfa.​—Izi. 34:25, 26.

5. Aw Jiova go bi wi Ples fɔ Ayd we tan lɛk rɔk?

⁵ Wan tin we wi go du fɔ mek Jiova bi wi Ples fɔ Ayd na we wi de pre to am. We wi pre to Jiova, i de gi wi “di pis we Gɔd de gi” we de gayd wi at ɛn wi maynd. (Fil. 4:6, 7) Lɛ wi tɔk bɔt wan brɔda in ɛkspiriɛns we nem Atɛm, we dɛn put na prizin bikɔs ɔf wetin i biliv. We i bin de na prizin, di ɔfisa bin de aks am bɔku kwɛstyɔn dɛn, trit am bad, ɛn tray fɔ mek i fred. I bin se, “A kin strɛs ɛnitɛm di ɔfisa kɔl mi fɔ aks mi kwɛstyɔn dɛn. . . . A bin de pre to Jiova ɔltɛm. A bin aks am fɔ ɛp mi fɔ gɛt kolat ɛn sɛns. Di ɔfisa in taktiks dɛn nɔ wok pan mi. . . . Bikɔs Jiova bin de ɛp mi, i bin tan lɛk se a tinap biɛn wan wɔl we dɛn mek wit ston.”

6. Wetin mek wi fɔ abop pan Jiova ɔltɛm? (Ayzaya 26:3, 4)

⁶ Wi kin abop pan Jiova ɔltɛm. Jɔs lɛk big rɔk we nɔ de muv, na so Jiova go de wit wi ɔltɛm. Wi kin abop am bikɔs in na “di Rɔk we go de sote go.” (Rid Ayzaya 26:​3, 4.) I go de alayv ɔltɛm fɔ du di tin dɛn we i dɔn prɔmis, yɛri wi prea dɛn, ɛn gi wi di sɔpɔt we wi nid. Wi kin abop pan Jiova bak bikɔs i nɔ de kɔmɔt biɛn di wan dɛn we de sav am. (2 Sam. 22:26) I nɔ go ɛva fɔgɛt wetin wi de du ɛn i go pe wi ɔltɛm.​—Ibru. 6:10; 11:6.

7. Wetin go apin to wi we wi abop pan Jiova? (Luk bak di pikchɔ.)

⁷ Wi go sho se Jiova na wi Rɔk we wi abop pan am wit ɔl wi at. Wi biliv se wi go bɛnifit we wi obe am ivin di tɛm dɛn we tin nɔ izi. (Ayz. 48:17, 18) As wi de si aw Jiova de sɔpɔt wi, wi go gɛt mɔ kɔnfidɛns pan am. Wi go biliv tranga wan se na Jiova nɔmɔ go ebul ɛp wi fɔ bia wi prɔblɛm dɛn ilɛk aw i tranga. Bɔku tɛm we wi gɛt prɔblɛm dɛn ɛn nɔbɔdi nɔ de fɔ ɛp wi, na da tɛm de wi go no se wi kin abop pan Jiova ɔltɛm fɔ ɛp wi. Wan brɔda we nem Vladimia tɔk se, “Na di tɛm we a bin de na prizin mi padi biznɛs wit Gɔd bin tayt mɔ ɛn mɔ. A bin lan fɔ abop pan Jiova mɔ bikɔs na mi wan bin de ɛn a nɔ bin ebul fɔ du ɛnitin bɔt mi prɔblɛm.”

8. (a) Wetin mek wi go se Jiova nɔ de chenj? (b) Aw wi de bɛnifit we we si Gɔd as wi Rɔk? (Sam 62:6, 7)

⁸ Jiova nɔ de chenj. Jɔs lɛk aw big rɔk strɔng ɛn i nɔ de muv, na so Jiova insɛf tan. In kwaliti dɛn ɛn di tin dɛn we i want fɔ du nɔ de chenj. (Mal. 3:6) We Adam  ɛn Iv tɔn dɛn bak pan Jiova na di gadin na Idɛn, dat nɔ mek Jiova chenj wetin i bin want fɔ du fɔ mɔtalman. Jɔs lɛk aw apɔsul Pɔl bin rayt, Jiova “nɔ go lay pan insɛf.” (2 Tim. 2:13) Dis min se ilɛk wetin apin ɔ ilɛk wetin ɔda pipul dɛn du, dat nɔ go ɛva chenj udat Jiova bi, wetin i want, ɛn in lɔ dɛn bɔt wetin rayt ɛn rɔng. Di kɔnfidɛns we wi gɛt pan wi Gɔd we nɔ de chenj go mek wi luk to am fɔ sev wi ɛn ɛp wi fɔ bia di tɛm dɛn we wi gɛt prɔblɛm.​—Rid Sam 62:​6, 7.

9. Wetin yu lan frɔm Tatiyana in ɛkspiriɛns?

⁹ Wi go mek Jiova wi Rɔk we wi pe atɛnshɔn to di kayn Pɔsin we i bi ɛn kɔntinyu fɔ tink bɔt wetin i want fɔ du fɔ di wɔl ɛn mɔtalman. Dat go ɛp wi fɔ gɛt kolat ɛn kɔntinyu fɔ de biɛn am we wi de bia prɔblɛm dɛn. (Sam 16:8) Na dat bin ɛp wan sista we nem Tatiyana we polis dɛn tɛl am se i nɔ fɔ kɔmɔt na in os bikɔs ɔf wetin i biliv. I bin tɔk se “A bin de fil se na mi wangren de. Fɔs, i nɔ bin izi fɔ mi. Mi at bin rili pwɛl.” Bɔt, we i si se di prɔblɛm dɛn we de mit am gɛt sɔntin fɔ du wit Jiova ɛn wetin i want fɔ di wɔl ɛn mɔtalman, dat bin ɛp am fɔ bia ɛn nɔ wɔri. I bin tɔk se: “We a ɔndastand wetin mek dis bin de apin to mi, dat bin ɛp mi fɔ mɛmba se na bikɔs a lɛk Jiova ɛn a want fɔ du wetin i want na dat mek dis bin de apin to mi. So dat bin ɛp mi fɔ stɔp fɔ tink bɔt misɛf.”

10. Aw wi go mek Jiova bi wi Rɔk naw?

¹⁰ I nɔ go te igen, wi go gɛt prɔblɛm dɛn we go mek wi nid fɔ abop pan Jiova pas ɛni ɔda tɛm. Naw na tɛm fɔ mekɔp wi maynd ɛn biliv tranga wan se ilɛk wetin apin, Jiova go ɛp wi fɔ kɔntinyu fɔ sav am fetful wan. Aw wi go du dat? Rid Baybul akwant dɛn ɛn ɛkspiriɛns dɛn bɔt Jiova in savant dɛn insay wi yon tɛm. Notis aw Jiova dɔn sho kwaliti dɛn we mek i tan lɛk rɔk fɔ sɔpɔt in savant dɛn. Tink gud wan bɔt dɛn akwant dɛn de. We yu du dat, i go ɛp yu fɔ mek Jiova yu Rɔk.

FALAMAKATA JIOVA IN KWALITI DƐN WE MEK I TAN LƐK RƆK

11. Wetin mek wi want fɔ falamakata Jiova in kwaliti dɛn we mek i tan lɛk rɔk? (Luk bak di bɔks we gɛt di taytul “ Gol fɔ Yɔŋ Brɔda Dɛn.”)

¹¹ Wi dɔn tɔk bɔt Jiova in kwaliti dɛn we mek i tan lɛk rɔk. Mek wi tɔk naw bɔt aw wi go falamakata Jiova in kwaliti dɛn we mek i tan lɛk rɔk. If wi tray tranga wan fɔ falamakata Jiova in kwaliti dɛn, wi go ebul ɛp wi brɔda ɛn sista dɛn fɔ tinap tranga wan. Fɔ ɛgzampul, Jizɔs bin kɔl Saymɔn, Sifas (“Pita”) we min “Rɔk.” (Jɔn 1:42) Dis sho se Pita go ɛnkɔrej in brɔda ɛn sista dɛn na di kɔngrigeshɔn ɛn ɛp dɛn fɔ tinap tranga wan. Dɛn tɔk bɔt ɛlda dɛn as pipul dɛn we tan lɛk “big rɔk in shado.” Dis de sho aw dɛn  go protɛkt di wan dɛn we de na di kɔngrigeshɔn. (Ayz. 32:2) Fɔ tru, ɔlman na di kɔngrigeshɔn go bɛnifit we di brɔda ɛn sista dɛn de falamakata Jiova in kwaliti dɛn we mek i tan lɛk rɔk.​—Ɛfi. 5:1.

12. Aw wi go ɛp ɔda pipul dɛn we dɛn gɛt prɔblɛm dɛn?

¹² Bi ples fɔ ayd. Sɔntɛnde, wi go ebul du sɔntin fɔ ɛp wi brɔda ɛn sista dɛn we nachɔral dizasta ɔ wɔ dɔn afɛkt. As tin dɛn de bad-ɔf insay “di las dez,” wan dawt nɔ de se wi go gɛt mɔ chans fɔ ɛp wi kɔmpin Kristian dɛn. (2 Tim. 3:1) Wi kin ɛnkɔrej wi kɔmpin Kristian dɛn bak ɛn sho se wi lɛk dɛn. Wan we aw wi kin du dat na we wi de tɔk to dɛn fayn we dɛn kam na Kiŋdɔm Ɔl, ɛnkɔrej dɛn, ɛn mek dɛn no se wi lɛk dɛn. Wi want fɔ mek di kɔngrigeshɔn bi ples we dɛn go gɛt ɛnkɔrejmɛnt ɛn lɔv. Bɔku pipul dɛn tide nɔ de trit dɛn kɔmpin dɛn fayn. Dis kin mek wi brɔda ɛn sista dɛn rili strɛs ɛn ivin fil se nɔbɔdi nɔ lɛk dɛn. So we dɛn kam na mitin, wi want fɔ du ɔl wetin wi ebul fɔ mek dɛn no se wi lɛk dɛn, mek dɛn fil fayn, ɛn mek dɛn fil sef.

13. Aw ɛlda dɛn go bi ples fɔ ayd fɔ ɔda pipul dɛn? (Luk bak di pikchɔ.)

¹³ Ɛlda dɛn go bi ples fɔ ayd fɔ di brɔda ɛn sista dɛn na di kɔngrigeshɔn we gɛt difrɛn prɔblɛm dɛn. We dizasta ɛn wɛlbɔdi prɔblɛm we na imajɛnsi apin, ɛlda dɛn kin du sɔntin fɔ ɛp. Dɛn kin yuz di Baybul bak fɔ gayd ɛn ɛnkɔrej di brɔda ɛn sista dɛn. Brɔda ɛn sista dɛn go fil fri fɔ tɔk to ɛlda if dɛn no se i go tɔk fayn to dɛn, i gɛt sɔri-at, ɛn i go lisin to dɛn. Dɛn kwaliti dɛn de go mek pipul dɛn si se di ɛlda lɛk dɛn, ɛn dat go mek i izi fɔ mek dɛn aplay ɛni advays we i go gi dɛn.​—1 Tɛs. 2:7, 8, 11.

14. Aw wi go sho se wi na pɔsin we dɛn kin abop pan ɔltɛm?

 ¹⁴ Bi pɔsin we dɛn kin abop pan ɔltɛm. Wi want fɔ bi pɔsin we dɛn kin abop pan mɔ di tɛm we ɔda pipul dɛn gɛt prɔblɛm. (Prɔv. 17:17) Wetin wi go du fɔ mek ɔda pipul dɛn no se dɛn kin abop pan wi? Wi kin tray tranga wan fɔ gɛt di kwaliti dɛn we Gɔd gɛt, lɛk fɔ du wetin wi dɔn prɔmis ɛn tray nɔ fɔ de let. (Mat. 5:37) Wi kin du sɔntin bak fɔ pipul dɛn we nid ɛp. Pantap dat, wi fɔ tray tranga wan fɔ du ɛni asaynmɛnt we dɛn gi wi di we aw dɛn se wi fɔ du am.

15. Aw ɔlman na di kɔngrigeshɔn go bɛnifit we dɛn gɛt ɛlda dɛn we dɛn kin abop pan?

¹⁵ Aw di kɔngrigeshɔn go bɛnifit we dɛn gɛt ɛlda dɛn we dɛn kin abop pan? We di pɔblisha dɛn no se dɛn kin kɔl di ɛlda dɛn fɔ ɛp dɛn ɛnitɛm we dɛn nid ɛp, dat kin mek dɛn nɔ wɔri tumɔs. Pɔblisha dɛn go si se di ɛlda dɛn lɛk dɛn we dɛn no se dɛn rɛdi fɔ ɛp dɛn. Ɛn we di ɛlda dɛn de yuz di Baybul ɛn di pɔblikeshɔn dɛn we di slev we fetful ɛn gɛt sɛns de mek ɛn nɔ yuz dɛn yon sɛns, di brɔda ɛn sista dɛn go abop pan dɛn mɔ. Di brɔda ɛn sista dɛn go gɛt mɔ rizin fɔ gɛt kɔnfidɛns  pan ɛlda we dɛn no se i nɔ go tɛl ɔda pipul dɛn wetin dɛn tɛl am ɛn i go du wetin i dɔn prɔmis fɔ du.

16. Aw wi ɛn ɔda pipul dɛn go bɛnifit we wi bi pɔsin we de du wetin Jiova se rayt ɔltɛm?

¹⁶ Bi pɔsin we de du wetin Jiova se rayt ɔltɛm. If wi tinap tranga wan fɔ wetin rayt ɛn fala di Baybul in advays we wi de disayd fɔ du tin dɛn, wi go sɛt fayn ɛgzampul fɔ ɔda pipul dɛn. As wi de stɔdi Gɔd in Wɔd ɛn gɛt mɔ fet pan Jiova, dat go mek wi kɔntinyu fɔ de biɛn am ɛn obe in lɔ dɛn. Wi nɔ go bi pɔsin we nɔ de mekɔp in maynd fɔ du sɔntin, we de chenj in maynd ɔltɛm, ɔ pɔsin we dɛn kin ful wit lay lay tichin dɛn ɛn di we aw di wɔl de tink. (Ɛfi. 4:14; Jems 1:6-8) Di fet we wi gɛt pan Jiova ɛn in prɔmis dɛn de mek wi gɛt kolat we wi yɛri bad nyuz. (Sam 112:7, 8) Wi go ebul ɛp ɔda pipul dɛn bak we gɛt prɔblɛm dɛn.​—1 Tɛs. 3:2, 3.

17. Wetin go ɛp ɛlda dɛn fɔ bi fayn ɛgzampul we go ɛp di brɔda ɛn sista dɛn fɔ tinap tranga wan?

¹⁷ Ɛlda dɛn fɔ bi pipul dɛn we nɔ de du tin pasmak, we de du tin wit sɛns, we ɔganayz, ɛn we nɔ de pin. Dɛn man dɛn ya kin ɛp di brɔda ɛn sista dɛn nɔ fɔ wɔri ɛn gɛt strɔng fet pan Jiova bay we dɛn de “rili fala Gɔd in wɔd we na tru.” (Taytɔs 1:9; 1 Tim. 3:1-3) Di ɛgzampul we di ɛlda dɛn de sɛt ɛn di we aw dɛn de kia fɔ di pɔblisha dɛn go ɛp dɛn fɔ go mitin ɔltɛm, fil savis, ɛn du dɛn pasɔnal stɔdi. We di brɔda ɛn sista dɛn de gɛt prɔblɛm dɛn we de mek dɛn wɔri, di ɛlda dɛn kin ɛnkɔrej dɛn fɔ kɔntinyu fɔ pe atɛnshɔn pan Jiova ɛn di tin dɛn we i dɔn prɔmis.

18. Wetin mek wi want fɔ prez Jiova ɛn kam nia am mɔ ɛn mɔ? (Luk bak di bɔks we gɛt di taytul “ Aw fɔ Kam Nia Jiova Mɔ ɛn Mɔ.”)

¹⁸ Afta wi dɔn tɔk bɔt Jiova in wɔndaful kwaliti dɛn, wisɛf go tɔk di sem tin we Kiŋ Devid bin tɔk we i se: “Lɛ Jiova, we na mi Rɔk, gɛt prez.” (Sam 144:1) Jiova na Gɔd we wi kin abop pan ɔltɛm. Ivin we wi de ol, wi gɛt rizin fɔ tɔk se: “In na mi Rɔk,” ɛn gɛt kɔnfidɛns se i go ɛp wi fɔ kɔntinyu fɔ de nia am ɔltɛm.​—Sam 92:14, 15.