1. N’nga va lemba la Salimo 18:46, Davide am’fwanafwani-idhe Yohova nan’ni?

 MWIILAMBWILA nyarwa dho-odedi-edhela dhinooda dodomi-a venango chinja ingumi yi-u. Mbwenye rimi-u unooda kala malonimwee voidhiwa ira nili na Yohova Nlungu wenuo unanikami-e. Muyofunjedha ivirile, nitothuuchiwa ira Yohova ngu Nlungu waingumi thitho ngokozeya nikami-a. Liye anikami-a vinonisikimizeli-a ira “Yohova ngwaingumi.” (Muleri Salimo 18:46.) Mbwenye angaongile ira Yohova ngwaingumi, Davide atoom’monga Nlungu ira “lipandhe langa.” Mwasiwa ngwan’ni Davide atoom’fwanafwani-edha Yohova Nlungu waingumi, na lipandhe lo-okaana ingumi?

2. N’nga ninofunjedhavon’ni va vyongo vyaongile Davide ira Yohova ndi “lipandhe langa”?

² Muyofunjedha yei, ninoonani mwasee Yohova unofwanafwani-edhiwa na lipandhe na mwemo ifwanafwani-edhoi munanifunji-edhele aliwa vyokuza liye. Ninofunjedhani thitho vyongo vinaire i-yo ira nim’nyindelenga ninga lipandhe li-u. Vomari-a, ninoonani mwemo munasazi-edhele i-yo makalelo a Yohova.

MWASIWA NGWAN’NI YOHOVA UNOITANIWA LIPANDHE?

3. N’nga madhu oi “lipandhe” ano-indi-edheliwa a-vi basa Bibilyani? (Muone iruthiruthi yavakapani.)

³ Bibilya linom’fwanafwani-edhela Yohova na “lipandhe” vofuna nikami-a vwechecha makalelo ana liye. Hora dhinjinji madhwala anofwanyeya mumyasa yom’titimi-a Yohova yothonyi-edha ira kavali olandana na liye. Limburo loroma vevo Yohova vaongiwile liye ira “lipandhe,” ndi va Dotornomio 32:4. Mbwenye volobela, Ana atoonga ira “kavali lipandhe lofwanafwana na Nlungwi-u.” (1 Sa. 2:2) Thitho Abakuku atoom’monga Yohova ira “lipandhe langa.” (Aba. 1:12) Mulimbo lemba Salimo 73 atoom’monga Yohova ira “lipandhe la rimanga.” (Sal. 73:26)  Thitho Yohova mwinyaa atoodhionga ira ngulipandhe. (Esa. 44:8) Dhoweni nitapanyeni makalelo mararu enao anom’mwiri-a Yohova kala ninga lipandhe na mwemo munairele i-yo ira nim’monenga “ninga lipandhe li-u.”—Dot. 32:31.

4. N’nga Yohova unokala a-vi limburo lotawelao? (Salimo 94:22)

⁴ Yohova ndi limburo lotawelao. Molandana na lipandhe linavitalemo mutu vahora ya lipevo nlukulu, Yohova unonibarela vahora inogumanana i-yo nyarwa. (Muleri Salimo 94:22.) Liye unonibarela ira nyarwadho dha-anonge uxamwali-u na liye. Unonilanyedha thitho ira unodha mali-a yongo iliyothene inonisukwali-a thitho nyarwa dhothene.—Zak. 34:25, 26.

5. N’nga Yohova unakale a-vi limburo li-u lotawelao ninga lipandhe?

⁵ Ndhila imbo-i inadhowena i-yo wa Yohova ninga lipandhe li-u, ndi lobela wa liye. Nalobela, Yohova unoniva-a rendelee wenuo unobarela mathuulelo na rimi-u. (Afl. 4:6, 7) Ifwanafwani-o vamwasula nja bali Artem, wenuo amangiwile namwasa wa vyongo vyaroromela liye. Liye anoofukiwa vyofuka wiliwili naatu auwalanga enao tam’tucha thitho m’va-a manyadho. Artem aongile ira: “Hora dhothene tandiitana ndanoovikumbanyedha. . . . Ndanoolobela wa Yohova. Nom’vepha ira andiva-e rendele wa rimani thitho zelu.” “Angalive ira mutuo anooirana vyongo vyothene vyevi, rimanga wali limburonimwee, namwasa oi Yohova anoondikami-a, vyakala ninga ndiimenle e-la wachi-i lamabwe.”

6. Mwasiwa ngwan’ni hora dhothene ninofwanela m’nyindelanga Yohova? (Esaya 26:3, 4)

⁶ Yohova ngonyindeleya. Molandana na lipandhe loi kalinosusa, Yohova hora dhothene unokala okozeya nikami-a. Ninofwanela m’nyindelanga namwasa oi liye “ndi lipandhe lokalao dhowa nodhowa.” (Muleri Esaya 26:3, 4.) Liye unodha kalavo hora dhothene ira akwakwaneli-edhe yolanyedhayee, wakula malobelwi-u thitho nikami-a. Ninooda m’nyindela Yohova namwasa oi liye unokala ororomeleya waatu ale anom’labela. (2 Sa. 22:26) Liye kanodha diwala vinoira i-yo thitho unodha niva-a yotuva.—Aeb. 6:10; 11:6.

7. N’nga chini inaireye nam’roromelanga maningi Yohova? (Muone thitho iruthiruthi.)

⁷ Yohova unokala lipandhe li-u nam’nyindelanga na rimi-u othene. Ninororomela ira vyongo vinodha niwendela pama nam’vwelanga masiki vahora yorucha. (Esa. 48:17, 18) Naona anikami-anga paevo vanom’roromela i-yo maningi. Ninororomela ira Yohova ekene ngwenuo unanikami-e vilela nyarwa masiki dhikale dhilukulu maningi. Masiki va-akale mutu onikami-a, ninozindiyela ira Yohova ngonyindeleya. Vladimir aongile ira: “Vahora yafungeliwile miyo perezoni, paevo vaona miyo ira uxamwalanga na Yohova ngolimba maningi. Ndatoofunjedha m’roromela Yohova namwasa oi ndali ndekene perezoni voi kavali mutu uliwethene andikami-e.”

8. (a) Mwasiwa ngwan’ni ninooda onga ira Yohova kanochinja? (b) N’nga ona ira Yohova ngu lipandhe li-u unanikami-e a-vi? (Salimo 62:6, 7)

⁸ Yohova kanochinja. Molandana na lipandhe  nlukulu, Yohova unokala saasawa hora dhothene. Yohova kanochinja makalelwee na ifunelwee. (Mak. 3:6) Adamu na Eva tangakondile m’vwela mundani mwa Edeni, Yohova kaachinjile ifunelwee. Movwelana na vyalembile rumiwi Paulo, Yohova “kanadhikonde ekene.” (2 Ti. 2:13) Vyevi vinothapulela ira masiki vaireye vyongo vyoi a-vi, venango atu enango taire vyongo vyoi a-vi, Yohova kanodha chinja makalelwee, ifunelwee na makundwee. Voi Yohova kanochinja, ninoidhiwa ira liye unodha nikami-a vahora yorucha, thitho unodha kwakwaneli-edha vyolanyedhavyee sogolou.—Muleri Salimo 62:6, 7.

9. N’nga ninofunjedhavon’ni va vyam’mwireele Tatyana?

⁹ Ninoona ira Yohova ngu lipandhe li-u naathuulelanga makalelwee na ifunelwee. Irana vyongo vyevi, unooda nikami-a ira na-adodomeye mathuulelo nagumanana vyowesedha. (Sal. 16:8) Vyevi ndi vyam’mwireele rongola mwinango dhinalee Tatyana wenuo ali perezo yo-okuma vandhe namwasa wa vyongo vyaroromela liye. Liye aongile ira: “Ndakalecha ndekene. Voromavene vyali vyorucha. Thitho hora dhinjinji ndanoosukwalecha.” Mbwenye angathuulele vwelano ulivo vari va vyowesedhavyee na ifunelo ya Yohova atooda vilela thitho mathuulelwee tatookala malonimwee. Liye aongile ira: “Vwechecha mwasee waireela vyongo vyevi, watoondikami-a thuulela ira ndinongo gumanana nyarwa namwasa om’labela Yohova. Vyevi vyatoondikami-a ira nda-athuulelenga maningi vya miyo ndekene.”

10. N’nga ninaire a-vi ira Yohova akale lipandhe li-u va-eeni?

¹⁰ Sogolou unodha ireya vyowesedha vinairi-e ira nim’nyindelenga Yohova kwaranya walelene. Yen’na ndi hora yoi nithuulelenga maningi ira Yohova, unodha niva-a yongo iliyothene inafuneele i-yo ira nidhowenave m’labela mororomeleya. N’nga ninairena a-vi vyongo vyevi? Nileringa myasa ya Bibilyani thitho yokuza arumiwi a Yohova amalamboano. Nionenga mwemo Nlungu mwathonyi-edhele liye ira ali lipandhe vokami-a arumiwee. Nithuulelenga modi-a myasa dhedhi. Naira e-no nionenga ira Yohova ndi lipandhe li-u.

NISAZI-EDHENGA MAKALELO A YOHOVA

11. Mwasiwa ngwan’ni ninofwanela sazi-edhanga makalelo a Yohova? (Muone kwadru loi “ Vifunelo vinakaena azombwe.”)

¹¹ Nitapanyileni mwemo Yohova munothonyi-edha liye ira uli ninga lipandhe. Va-eeni dhoweni nitapanyeni mwemo munasazi-edhele i-yo makalelwee. Nadhilimbi-edhanga sazi-edha makalelwee, ninodha limbi-a maningi abali naarongoli-u. Mofwanafwani-a, Yesu atom’va-a Simoni dhina loi Kefa (loi thapuleliwawee ndi “Pedru”), thitho linothapulela ira “libwe.” (Ju. 1:42) Vyevi vinothonyi-edha ira unodha limbi-a atu enango pingoni thitho akami-a ira takaena iroromelo yolimba. Andimuwa avapingoni anofwanafwani-edhiwa na “ruthi wa lipandhe nlukulu.” Madhu enala anothonyi-edha mwemo munobarelela aliwa  atu pingoni. (Esa. 32:2) I-yo othene akala nili abali venango arongola, ninooda limbi-a atu pingoni nasazi-edhanga makalelo a Yohova.—Aef. 5:1.

12. N’nga ninaire a-vi ira nikale mamburo otawelao abali naarongoli-u?

¹² Nikalenga limburo lotawelao. Hora dhinango, ninodha funeela velela mamburo otawelao abali-u akala vatoireya masoka avilengo, gereve venango kondo. Vevo vyongo vinodhowanave aliwa thakala “malambo omari-ala,” mo-okaikela ninodha funeela kami-angana na abali naarongoli-u. (2 Ti. 3:1) Ninooda funeela limbi-a abali-u enao anovikumbanyedha noakami-a ira uxamwaliwa na Yohova ukale olimba. Ndhila imbo-i inairelena i-yo vyevi, ndi awachela pama va Nyumbani ya Umwene thitho vyevi vinodha kami-a ira atu pingoni tadhivelanenga. Muilamboi atu anoirelana vyongo vyauwalanga thitho vyevi vinoiri-a ira atu enango tavikumbanyedhenga nodhivwanga ira katinodhiveliwiwa. Ee-no abali naarongoli-u tafiya vamigumanoni, ninofwanela irana yongo iliyothene mwemo munaodele i-yo ira naakami-e ira tadhivwenga ira anodhiveliwiwa thitho mbobareleya.

13. N’nga andimuwa avapingoni anaire a-vi ira takale limburo lotawelao vahora ya nyarwa? (Muone thitho iruthiruthi.)

¹³ Andimuwa avapingoni anooda kala limburo lotawelao abali naarongola enao anogumanana nyarwa dho-iyana i-yana. Vaireya masoka avilengo, venango vafuneelanga kami-o la ximitari mombaranya, andimuwa avapingo anodhilimbi-edha ira takami-e abali naarongola. Aliwa anowalimbi-a na makundo a Bibilyani. Abali naarongola anokala othathuwa dhowa wa ndimuwa wavapingoni akala atoidhiwa ira ngopwaseya, othuulela atu enango thitho ovuruwana. Makalelo ninga enala anokami-a atu enango dhivwanga ira anodhiveliwiwa thitho vinokala vyo-orucha ira ta-arele malangi-o  okumela Bibilyani enao anavelele ndimuwa wavapingoni.—1 At. 2:7, 8, 11.

14. N’nga ninaire a-vi ira nikale atu onyindeleya?

¹⁴ Nikalenga onyindeleya. Ninofuna ira atu enango taninyindelenga simbwasimbwa vahora yorucha. (San. 17:17) N’nga ninaire a-vi ira nikale atu onyindeleya? Ninofwanela dhilimbi-edhanga thonyi-edha makalelo apama hora dhothene. Mofwanafwani-a, nidhilimbi-edhenga kwakwaneli-edha vilanyedhile i-yo thitho nidhilimbi-edhenga lokota hora. (Mat. 5:37) Mutu mwinango arucheya, nidhilimbi-edhenga m’kami-a. Wenjedhela vevo, nikwakwaneli-edhenga basa liva-iwile i-yo thitho ni-arelenga malangi-o.

15. N’nga andimuwa onyindeleya anokami-a a-vi pingo?

¹⁵ Andimuwa avapingoni onyindeleya anokami-a maningi pingo. N’nga anoirana a-vi vyevi? Namalaleya kanodhikumbanyedha aidhiwa ira unooda ongi-ana na ndimuwa wavapingoni hora iliyothene, simbwasimbwa namalaleya wa gurupuni mwiwa. Anamalaleya anovivwa ira anodhiveliwiwa taidhiwa ira andimuwa avapingoni mbokozeya akami-a. Thitho andimuwa  avapingonao tavelela malangi-o okumela Bibilyani na mumabhukwi-u a-kala mathuuleloni mwiwa, abali naarongola anowaroromela. Abali naarongola anowaroromela andimuwa avapingoni enao ta-anoonga myasa yasengeredho naandimuwa avapingoni enao anoira vyongo vilanyedhile aliwa.

16. N’nga i-yo thitho atu enango ninonganyali a-vi nakala o-ochinja voira vyongo vyofwanelela?

¹⁶ Nikalenga o-ochinja. Ninooda kala ifwanafwani-o yapama waatu enango akala kaninochinja voirana vyongo vyofwanelela thitho a-rela makundo a Bibilyani vosakula vyoira mwazelu. Nadhilimbi-edhanga limbi-a iroromelwi-u thitho idhiwa vyongo vinjinji, ninokaatheya imbarimbarini. Kaninorucheya sakula vyoira thitho kaninakopeye mo-orucha na vifunji-edho vyonama namathuulelo ailamboi. (Aef. 4:14; Yak. 1:6-8) M’roromela Yohova thitho vyolanyedhavyee, unonikami-a ira na-atekenyeye navwa milanyu yothakala. (Sal. 112:7, 8) Ninooda thitho kami-a atu enao anogumanana vyowesedha.—1 At. 3:2, 3.

17. N’nga andimuwa avapingoni anokami-a a-vi atu ira takale okurudheya?

¹⁷ Andimuwa avapingoni anofwanela kala oira vyongo mo-okwaranyi-a madile, othuulela pama, oira vyongo mwamasaka-edho thitho ololela. Alombwana enala anokami-a atu pingoni kala opwaseya, thitho m’roromela maningi Yohova “vo-inda mwakopolo madhu ororomeleya.” (Tit. 1:9; 1 Ti. 3:1-3) Ifwanafwani-o yaandimuwa avapingoni thitho maulendwiwa aubusa, anokami-a anamalaleya ira tafwanyeyenga vamigumanoni, tadhowenga muurumiwini thitho tafunjedhenga vaokene. Abali naarongola tagumanana nyarwa dhinowakumbanyi-a, andimuwa avapingoni anowalimbi-a ira tathuulelenga maningi vya Yohova na vifunelovyee.

18. Mwasiwa ngwan’ni ninofwanela m’titimi-anga Yohova thitho dhilimbi-edha ira nikale vauxamwali na liye modhowa nodhowa? (Muone kwadru loi “ Vinaire i-yo ira nikale vauxamwali na Yohova.”)

¹⁸ Vasogolo votapanya makalelo a Yohova, ninooda onga ninga mwaongele Mwene Davide ira: “Atitimi-iwe Yohova, lipandhe langa.” (Sal. 144:1) Yohova unodha dhowanave kala Nlungu ororomeleya. Vaingumii-u yothene fiyedha ulula, niroromelenga ira Yohova unodha dhowanave nikami-a ira nikale vauxamwali na liye. Thitho ninooda onga ira “liye ndi lipandhe langa.”—Sal. 92:14, 15.