1. Kweseka naSamu 18:46 Ndavichi afwanyishile Yehova kuchuma muka?

 TULI nakuyoyela mukaye kaze ukalu wakwiza mukukasumuna unahase kwalumuna chiyoyelo chetu. Tweji kwivwanga kumuchima hwo hakutachikiza ngwetu tunahase kupendamina hali Yehova Kalunga atukafwe. Muchihande chinafumuho twashimutwilanga ngwetu Yehova apwa Kalunga ou ayoya, kaha alizanga kutukafwa lwola lwosena. Nge natukafwe, kaha tweji kumonanga ngwetu chikupu vene “Yehova ayoya.” (Tangenu Samu 18:46.) Chipwe ngocho, omu Ndavichi ahanjikile ngwenyi “Yehova ayoya,” avulukile nawa Kalunga ngwenyi, “Lilolwa lyami.” Mwomwo ika afwanyishile Yehova, Kalunga ou ayoya kulilolwa chuma chize kachayoyako?

2. Vyuma muka natulinangula kuli Ndavichi kutalisa kumazu ahanjikile ngwenyi Yehova “Lilolwa lyami”?

² Muchihande chino natushimutwila ovyo Yehova vamufwanyishila kulilolwa, navyuma chatunangula chifwanyisa kana hali ikiye. Natulinangula nawa omwo tunahase kumumona kupwa Lilolwa lyetu. Kaha natushimutwila nawa hajijila tunahase kulondezezelamo vilinga vyaYehova vize vyapwa nge lilolwa.

OVYO YEHOVA VAMUVULUKILA NGWAVO LILOLWA

3. Uno kakavulu Mbimbiliya yazachisa ngachilihi lizu “lilolwa”? (Talenu lyahelu.)

³ Mbimbiliya yazachisa lizu “lilolwa” kupwa hichifwanyisa, mangana yitukafwa twivwishise vilinga atwama navyo Yehova. Kakavulu nge vangamba jaYehova vali nakwalisa Kalunga havilinga vyenyi vyakukomwesa, veji kumufwanyisanga “[ku]Lilolwa.” Mukanda waLushimbi lwamuchivali 32:​4, himukanda watete kuvuluka Yehova kupwa “Lilolwa.” Hana ahanjikile mukulomba chenyi ngwenyi: “Kakweshi lilolwa lyakukola nge Kalunga ketuko.” (Samwe. 1, 2:2) Hambakuke avulukile Yehova ngwenyi “Lilolwa lyami.” (Hamba. 1:12) Mutu uze asonekele Samu 73, asonekele ngwenyi Kalunga “ikiye lilolwa lyamuchima wami.” (Samu 73:​26, kwinyikila chamwishi) Kaha  naYehova ivene alifwanyisa kulilolwa. (Isa. 44:8) Tushimutwilenu havilinga vitatu vize vyapwa nge lilolwa vize Yehova eji kusololanga, nomwo tunahase kulingisa Yehova kupwa “Lilolwa lyetu.”—Lushi. 32:31.

4. Uno Yehova apwa ngachilihi chihela chakuswamamo? (Samu 94:22)

⁴ Yehova apwa chihela chakuswamamo. Yehova eji kutukinganga nge tuli muukalu uze nautwivwisa woma, ngana mwamutu uze mwaswama kulilolwa lyalinene nge kuli peho yanyamanganda. (Tangenu Samu 94:22.) Eji kutukafwanga tukinge usepa wetu naikiye, nakutufwelelesa nawa ngwenyi ukalu uze tuli nakumona oholyapwa, kaweshi kutuhaka muponde haya myakako. Kaha nawa ashika kukatulingila vyuma vyavivulu, mwakafumisako vyuma vyosena vize vyeji kutulingisanga tuhone kutwama mukuunda nakupwa vakukingiwa.—Ezeke. 34:​25, 26.

5. Uno Yehova nahase kupwa ngachilihi chihela chetu chakuswamamo?

⁵ Jila yimwe tunahase kulingishilamo Yehova kupwa nge lilolwa lyetu Lyakuswamamo shina, kulombanga kuli ikiye. “Nge tunalombo, Yehova eji kutuhananga kuunda chaKalunga” chize cheji kukinganga michima yetu navishinganyeka vyetu. (Phil. 4:​6, 7) Talenu chakutalilaho chandumbwetu walunga Artem, uze vakashile mukamenga mwomwo yavyuma afwelela. Vamwihojwelenga mapapa kakavulu kuli muka-kuhehwojola mijimbu, uze amwivwishilenga kupihya kumuchima nakumwivwisa woma. Artem ambile ngwenyi:“Ngwahombelenga chikuma kala lwola ou muka-kuhehwojola mijimbu angwihojwelenga. . . . Kaha ngwalombelenga kuli Yehova mangana anguhane kuunda chize nachikinga muchima wami nakunguhana nawa mangana.” Ambile nawa ngwenyi: “Muka-kuhehwojola mijimbu ahonene. . . . mwomwo Yehova angukafwile, kaha echi chapwile kwijiva nge ngunemana kulilolwa.”

6. Mwomwo ika twatela kupendaminanga lika hali Yehova lwola lwosena? (Isaya 26:​3, 4)

⁶ Yehova keshi kutusezako. Ngana muze lilolwa kalyanyikikako, mukiko naYehova nawa eji kupwilanga lika nayetu. Tunahase kumufwelela mwomwo apwa “Lilolwa lyahaya myaka yosena.” (Tangenu Isaya 26:​3, 4.) Lwola lwosena mwatwalangaho lika kutesamo jishiko jenyi, nakwivwilila kukulomba chetu, nakutukafwa muvyuma twasakiwa. Tunahase nawa kupendamina hali Yehova mwomwo apwa wakushishika kuli vaze veji kumuzachilanga. (Samwe. 2, 22:26) Keshi kukavulyama milimo tweji kumuzachilangako, kaha nawa mwatufwetanga lika.—Hepe. 6:10; 11:6.

7. Vyuma muka natunganyala kachi nge natupendamina hali Yehova? (Talenu nawa muvwimbimbi.)

⁷ Tweji kulingisanga Yehova kupwa lilolwa lyetu, hakupendamina chikuma hali ikiye. Tunafwelela nawa ngwetu tunahase kunganyala kachi nge natumwononoka namulwola lwalukalu. (Isa. 48:​17, 18) Tweji kufwelelanga chikuma Yehova hakumonomu ali nakutukafwa. Kaha echi cheji kutukafwanga tukunyuke ngwetu Yehova kaha ikiye nahase kutukafwa tumike muukalu tuli nakuhitamo. Kakavulu nge kakweshi mutu uze mwatukafwa nge tuli muukaluko, kaha tweji kupendaminanga chikuma hali Yehova. Ndumbwetu Vladimir ambile ngwenyi: “Lwola luze ngwapwile mukamenga, lwapwile hilwola lwamwaza lwakutunga usoko wamwaza naKalunga.” Ambile nawa ngwenyi: “Ngwalinangwile kufwelela chikuma Yehova mwomwo  ngwapwilenga ukawami, kaha nawa kangwapwile nangolo haukalu wamiko.”

8. (a) Mwomwo ika natwambila ngwetu Yehova kalumukako? (b) Tunahase kunganyala ngachilihi hakupwa naKalunga uze apwa Lilolwa lyetu? (Samu 62:​6, 7)

⁸ Yehova kalumukako. Ngana mwalilolwa lyalinene, Yehova apwa wakuzama kaha nawa kalumukako. Vilinga vyenyi navyuma ajina kavyalumukako. (Mala. 3:6) Omu Alama naEve valikangile kuli Yehova, ikiye kalumwine vyuma ajinako. Ngana muze kaposetolo Paulu asonekele kutalisa kuli Yehova ngwenyi, Yehova “keshi kuhasa kulikana iveneko.” (Chimo. 2, 2:13) Echi chalumbununa nge, kala vyuma navisoloka chipwe kala vyuma navalinga vatu, Yehova keshi kwalumuna vilinga vyenyi navyuma ajina chipwe jishimbi jenyiko. Shikaho, nge natufwelela chikuma Kalunga ketu uze kalumukako, kaha natutala kuli ikiye mangana akatulwile nakutukafwa tupwenga vakumika mulwola lwaukalu.—Tangenu Samu 62:​6, 7.

9. Vyuma muka natulinangula kuli Tatyana?

⁹ Tweji kulingisanga Yehova kupwa Lilolwa lyetu, hakushinganyeka havilinga vyenyi nakutwalaho lika kushinganyeka havyuma ajina kulingila vatu hamavu. Kulinga ngocho nachitukafwa tutwaleho lika kupwa vakuunda nakupwa vakushishika omu tuli nakumona vyeseko. (Samu 16:8) Omu mukiko chapwile kuli ndumbwetu Tatyana uze vakashile mukamenga mwomwo yavyuma afwelela. Tatyana ambile ngwenyi: “Ngwashinganyekelenga kaha havyuma ngwasakile ami.” Kaha nawa ngwenyi: “Hakavanga changukaluhwililenga chikuma. Lwola lwosena ngwahombelenga chikuma.” Chipwe ngocho, Tatyana amwene omwo vyeseko ahichilemo vyakwachile hali Yehova nahavyuma ajina. Kaha echi chamukafwile, omike nakukwata cheka ngolo. Ambile nawa ngwenyi: “Kutachikiza ovyo vyuma kana vinasolokela changukafwile ngwanuke ngwami, nguli muno mukamenga mwomwo yaYehova. Echi changukafwile ngulitwamine kushinganyeka havyuma ngwasaka.”

10. Uno Yehova apwa ngachilihi Lilolwa lyetu oholyapwa?

¹⁰ Mumakumbi anakwiza kulutwe, natukahita muukalu uze naukasakiwa etu kupendamina hali Yehova kuhambakana omu chili oholyapwa. Shikaho, oholyapwa twatela kuzamisa lufwelelo lwetu, nakukunyuka ngwetu Yehova mwakatukafwa tukomike mukala vyeseko vize natukahitamo. Tunahase kulinga ngachilihi ngocho? Hakutanganga mijimbu yamuMbimbiliya navyuma vanahichingamo Vinjiho vamakumbi ano. Kaha nawa shinganyekenunga omwo Kalunga nasololanga vilinga vyenyi vize vyapwa nge lilolwa mangana akafwe vangamba jenyi. Shinganyekenunga chikuma hamijimbu kana. Nge namulinga ngocho, kaha nachimikafwa mulingise Yehova kupwa Lilolwa lyenu.

PWENUNGA NAVILINGA VIZE ATWAMA NAVYO YEHOVA

11. Mwomwo ika twatela kupwila navilinga vyaYehova vize vyapwa nge lilolwa? (Talenu nawa lipwata lyakwamba ngwavo “ Vyuma Vatela Kulitomena Vandumbwetu vaMalunga vaVakweze.”)

¹¹ Tunashimutwila omwo Yehova apwa nge lilolwa. Jino tushimutwilenu omwo tunahase kupwa navilinga vyenyi. Nge natulinga ngocho, kaha natulingisa chikungulwilo chizame. Chakutalilaho, Yesu alukile Shimona ngwenyi Kefwase (lize valumuna ngwavo “Petulu”), kulumbununa “Lilolwa.” (Yowa. 1:42) Echi chasolola nge Petulu apwile  muka-kuvendejeka, kaha nawa muka-kuzamisa chikungulwilo. Vakulwane muchikungulwilo vavavuluka kupwa nge “muvule walilolwa lyalinene.” Echi chalumbununa nge veji kukinganga vatu muchikungulwilo. (Isa. 32:2) Chipwe ngocho, chikungulwilo chosena chinahase kunganyala, nge vandumbwetu vosena navapwa navilinga vyaYehova vize vyapwa nge lilolwa.—Efwe. 5:1.

12. Lumbununenu jijila tunahase kupwilamo chihela chakuswamamo vakwetu.

¹² Pwenunga chihela chakuswamamo. Shimbu jimwe tunahase kupwa chihela chakuswamamo vandumbwetu halwola vali nakuhita muukalu wakulijila, chipwe vikokwojola chipwe jijita. Omu vyuma vili nakupihilako “[mu]makumbi akukuminyina” tulimo, natupwanga najijila jajivulu jakulikafwilamo navakwetu. (Chimo. 2, 3:1) Tunahase nawa kukafwa vandumbwetu muvishinganyeka nakushipilitu. Jila yimwe tunahase kulingilamo ngocho shina, kuhanjikanga navo nge vaneza kuZuvo yaWangana nakuvavendejeka. Tweji kufwilanga kukafwa vatu vosena muchikungulwilo vamone ngwavo vapwa vakukingiwa. Ijivenu ngwenu tuli nakuyoyela mukaye muze vatu veji kwivwisanga vakwavo woma, nakuhona kuvasolwela zangi nakuvalinga mwamupi. Shikaho nge tunamono vandumbwetu vaneza kukukunguluka, tweji kufwilanga kuzata nangolo mangana tuvasolwele zangi nakuvahizumuna nakuvakafwa vamone ngwavo vakukingiwa.

13. Uno vakulwane vanahase kupwa ngachilihi chihela chakuswamamo vakwavo? (Talenu nawa muvwimbimbi.)

¹³ Vakulwane vanahase kupwa chihela chakuswamamo vandumbwavo vaze vali nakuhita muukalu wapeho yanyamanganda yivene chipwe yachifwanyisa. Nge kuneza ukalu wakulijila chipwe misongo yakukasumuna, vakulwane veji kulongesanga vyuma mangana vakafwe vandumbwavo. Veji kuvakafwanga nawa kushipilitu. Vandumbwetu veji kufwilanga kuya kuli mukulwane uze apwa wamuvwovu, wakeke, kaha nawa uze mwavevwilila omu vali nakuhanjika. Muchima kana nauvakafwa vamone ngwavo mukulwane kana avazakama. Kaha echi nachivashiwila vakavangize jindongi  jamuMbimbiliya jize mukulwane kana mwavahana.—Teso. 1, 2:​7, 8, 11.

14. Vyuma muka twatela kulinga mangana vakwetu vatufwelele?

¹⁴ Pwenunga muvatu vaze navafwelela. Twasaka vakwetu vatufwelele chikumanyi mulwola lwalukalu. (Vishi. 17:17) Vyuma muka twatela kulinga mangana vakwetu vatufwelele? Tweji kukilikita mangana tusolole vilinga vyaukalunga vyakufwanga nge kutesamo jishiko jetu, nakulinga vyuma mulwola. (Mateu 5:37) Tunahase nawa kukafwa vakwetu nge tunamono ngwetu vali nakusakiwa kuvakafwa. Nge vanatuhana milimo, twatela kuyikumisa kweseka najindongi vanatuhane.

15. Uno vakulwane vaze vafwelela kuli vandumbwavo veji kunganyalisanga ngachilihi chikungulwilo?

¹⁵ Vakulwane vaze vafwelela kuli vandumbwavo veji kunganyalisanga chikungulwilo. Mujila muka? Vaka-kwambulula kavalizakaminako nge vanejiva ngwavo vanahase kutumina shinga vakulwane javo kala lwola, chikumanyi vatulama twavo vamazavu. Vaka-kwambulula nawa veji kumonanga ngwavo vavazakama nge vanatachikiza ngwavo, vakulwane valizanga kuvakafwa. Vakulwane veji kuhuhumunanga vandumbwavo kupendamina haMbimbiliya  namikanda yakufuma kuli ndungo wakushishika, keshi havishinganyeka vyavoko. Echi cheji kulingisanga vandumbwavo vavafwelele. Vandumbwetu vakwechi vyuma vyavivulu vize vyatela kuvalingisa vafwelele mukulwane uze eji kuswekanga vihande vyavo vyakusweka, uze nawa eji kutesangamo vyuma nahanjika.

16. Uno kulinga vyuma vyakwoloka nachitunganyalisa ngachilihi etu vavene nakunganyalisa vakwetu?

¹⁶ Lingenunga vyuma vyakwoloka. Tunahase kukafwa vakwetu nge natulinganga vyuma vyakwoloka, nakupendaminanga hajindongi jamuMbimbiliya kachi nge tuli nakusakula vyakulinga. Natupwa nawa vakuzama mumuchano, kachi nge lufwelelo lwetu naluzama nakupwa nachinyingi chakwoloka. Katweshi kupwa namichima yivali chipwe kuzeneka kuzama, chipwe kutuhungumuna nakunangula chamakuli navishinganyeka vyakayeko. (Efwe. 4:14; Yako. 1:​6-8) Kufwelela Yehova najishiko jenyi, nachitukafwa tuunde muchima kachi nge tunatambula mijimbu yayipi. (Samu 112:​7, 8) Natukafwa nawa vakwetu vaze vali nakuhita muukalu.—Teso. 1, 3:​2, 3.

17. Vyuma muka navikafwa vakulwane vakolezeze vandumbwavo?

¹⁷ Vakulwane vapwa vaka-kulinga vyuma mukwesekela, nakushinganyeka mwamangana, nakulinga vyuma mukulonga, nakwashiwisa muchima. Ava vakulwane, veji kukafwanga vandumbwavo vaunde muchima nakupwa nausoko wakukola naYehova, “[hakulinjilila] kumazu aze anatela kwitavila.” (Chitu. 1:9; Chimo. 1, 3:​1-3) Vakulwane veji kukafwanga vaka-kwambulula vayenganga kukukunguluka lwola lwosena, namumulimo wakwambulula, nakulinga chilongesa chauka, hakuvahana vyakutalilaho vyamwaza nakuvafunganga. Nge vandumbwetu vanakuhita muukalu, kaha vakulwane vanahase kuvakolezeza vashinganyekenga hali Yehova nahavyuma ajina.

18. Mwomwo ika tweji kufwilanga kwalisa Yehova nakupandama chikuma kuli ikiye? (Talenu nawa lipwata lyakwamba ngwavo, “ Jila Yakupandaminamo Chikuma Kuli Yehova.”)

¹⁸ Hanyima yakushimutwila vilinga vyaYehova vyakukomwesa. Tunahase kuhanjika ngana muze ahanjikile Mwangana Ndavichi ngwenyi: “Vamwalisenga Yehova Lilolwa lyami.” (Samu 144:1) Natutwalangaho lika kupendamina hali Yehova Kalunga ketu. Kaha kuli vyuma vyavivulu vyatela kulingisa mutu himutu mukuyoya chenyi ahanjike ngwenyi, Yehova “Ikiye Lilolwa lyami,” hakutachikiza ngwetu, mwatukafwanga lwola lwosena tuzovoloke kushipilitu.—Samu 92:​14, 15.