CHIBAABA CHAKUDIZA 26
KAMINA 8 Yehova hiChiswamu Chetu
Mwilishenu Yehova Ekali Ilola Denu
“Kwosi ilola didi neyi Nzambi yetuku.”—1 SAM. 2:2.
TUKUDIZA
Muloña waweni Yehova chamutenenañawu nawu ilola nichitunateli kwimbujola yilwilu yindi yidi neyi ilola.
1. Neyi chashimunawu haIsamu 18:46, Davidi wamufwanishili Yehova nachumanyi?
TUNAKUSHAKAMA mukaayi munakumwekana kukala kwakukasumwisha kunateli kuluwañesha hela kushikena kuhimpa chikupu chihandilu chetu. Twasakililaña nankashi muloña tunateli kulomba wukwashu kudi Yehova Nzambi. Muchibaaba chinafumihu, atwanukishili nawu Yehova hiNzambi wamumi nawa watukwashaña mpinji yejima. Neyi atukwasha, chumichi chatuleteshaña kukuhwelela netu “Yehova wamumi!” (Tañenu Isamu 18:46.) Hela chochu, hanyima yakuhosha hohu awa mazu, Davidi wamuteneni Nzambi nindi “Ilola dami.” Muloñadi chamufwanishililiyi Yehova, Nzambi wamumi, nachuma chabulaña kwoona, ilola?
2. Yumanyi yitukudizila kumazu aDavidi akumutena Yehova nindi hiIlola?
2 Muchinu chibaaba, tukuhanjeka muloña waweni Yehova chamutenenañawu nawu ilola niyuma yitunateli kudizila kuniyi nhoshelu yankinji kutalisha hadi yena. Tukudiza cheñi chitunateli kutachika kumumona netu nindi hiIlola detu. Nkumininaku, tukudiza njila mutunateli kwimbujolela yilwilu yaYehova yidi neyi ilola.
YEHOVA CHAMUTENENAÑAWU NAWU ILOLA
3. Kakavulu Bayibolu yazatishaña ñahi izu dakwila nawu “ilola”? (Talenu mwevulu wudi hakava.)
3 Bayibolu yazatishaña izu dakwila nawu “ilola” kulonda yitukwashi kutiyishisha yilwilu yekala naYehova. Kakavulu, neyi ambuña aYehova anakumushimeka Nzambi muloña wayilwilu yindi yabadika, amutenaña muBayibolu nawu hiilola. HaKuhituluka 32:4, dihamutenawu Yehova katachi nawu “hiIlola.” Mukulomba kwindi, Hana wahosheli nindi “kwosi ilola didi neyi Nzambi yetuku.” (1 Sam. 2:2) Habakuki wamuteneni Yehova nindi “Ilola dami.” (Hab. 1:12) Nsoneki Wesamu 73 wamuteneni Nzambi nindi “ilola damuchima wami.” (Mas. 73:26) Nawa Yehova waditeneni yomweni nindi hiilola. (Isa. 44:8) Tuhanjekenu hayilwilu yisatu yidi neyi ilola yamwekeshañayi Yehova, nawa tukudiza chitunateli kumwilisha kwikala ‘Ilola detu.’—Kuhit. 32:31.
Antu jaNzambi amumonaña Yehova nawu wudi neyi Ilola dashimata (Talenu maparafilafu 3)
4. Yehova wekala ñahi chiswamu? (Isamu 94:22)
4 Yehova hichiswamu. Neyi ilola deneni chidinateli kwikala iluña dakuswamamu muntu hampinji yikudi nvula yeneni yampepela, Yehova watukiñaña hampinji yitunakumona kukala muchihandilu chetu. (Tañenu Isamu 94:22.) Watukwashaña kukiña wubwambu wetu nayena nawa watulejaña nindi kwosi makabi itunakumona akatwalekahu kutukabisha haya nyaakaku. Nawa watukana kutwilila chuma chabadika: Wakafumishahu yuma yejima yaluwañeshaña kuwunda nikukiñewa.—Ezek. 34:25, 26.
5. Yehova nateli kwikala ñahi Chiswamu chetu chidi neyi ilola?
5 Njila yimu mutwamwilishilaña Yehova kwikala Chiswamu chetu chidi neyi ilola hikulomba kudi yena. Neyi tulomba, Yehova watwinkaña “kuwunda kwaNzambi” kwahembaña nyichima yetu niyitoñojoka. (Fwili. 4:6, 7) Talenu chuma chamumwekeneni manakwetu Artem, akasiliwu mukaleya muloña wayuma yakuhwelelayi. Amwihujoleleña kakavulu kudi mukakwihujola wakalisha, nawa wamukabishileña nikumusawula. Manakwetu Artem, wahosheli nindi, “Natiyileña woma neyi mukakwihujola nakuñihujola. . . . Nalombeleña kudi Yehova mpinji yejima. Nalombeleña nami niikali nakuwunda kwamumuchima nimaana. Tufuta twazatishileñayi mukakwihujola hitwazatikili hadi amiku. . . . Nawukwashu waYehova, chadiña tuhu neyi hakachi hadiña mbañu yelola.”
6. Muloñadi wutwatela kumushindamena Yehova mpinji yejima? (Isaya 26:3, 4)
6 Yehova washindamenewa. Kufwana ilola dabulaña kuswijewa, Yehova watukwashaña mpinji yejima. Twatela kumukuhwelela muloña yena “hiIlola dahaya nyaaka.” (Tañenu Isaya 26:3, 4.) Mpinji yejima wukwikalaña kwoku nakushikija yikaninu yindi, kutiya kulomba kwetu nikutukwasha kwesekeja nakukala kutukweti. Twatela cheñi kumushindamena Yehova muloña wekala washinshika kudi antu amukalakelaña. (2 Sam. 22:26) Hakavulamena nyidimu yitwakalakalañaku, nawa wakatufwetaña mpinji yejima.—Heb. 6:10; 11:6.
7. Yumanyi yayiwahi yikufumamu neyi tumushindamena Yehova? (Talenu cheñi mwevulu.)
7 Twamwilishaña Yehova kwikala Ilola detu neyi tumushindamena chikupu. Twakuhwelela netu neyi tumwovwahilaña nimumpinji yitunakumona kukala, mwafumaña yuma yayiwahi. (Isa. 48:17, 18) Chitukumonaña chinakutukwashayi, tukuswejelañaku kumukuhwelela. Tukwiluka chikupu netu Yehova hohu diyi wunateli kutukwasha kuumika kukala kwejima kutunateli kumona hela chakwila kweneni chamuchidinyi. Kakavulu neyi tunakumona kukala kwakwila kwosi muntu hela wumu wunateli kutukwasha, dihu dinu hitwamonaña netu Yehova washindamenewa chikupu. Manakwetu Vladimir wahosheli nindi: “Mpinji yinadiña mukaleya, diyi mpinji yinamweni nami naswini kwakwihi naYehova chikupu. Natachikili kumukuhwelela nankashi Yehova muloña nadiña nkawami, nawa diyi hohu wateleleli kunkwasha kuumika iku kukala.”
Twamwilishaña Yehova kwikala Ilola detu neyi tumushindamenaña chikupu (Talenu maparafilafu 8-9)
8. (a) Muloñadi wutunateli kuhoshela netu Yehova wahimpaña wanyi? (b) Yumanyi yayiwahi yafumañamu neyi tumwilisha Nzambi kwikala Ilola detu? (Isamu 62:6, 7)
8 Yehova wahimpaña wanyi. Kufwana ilola deneni, Yehova waswijewaña wanyi nawa wahimpaña wanyi. Yilwilu yindi ninkeñelu yindi hijahimpañaku. (Mal. 3:6) Chadikañiliwu aAdama naEva mwitempa daEdeni, Yehova hahimpili nkeñelu yindi kutalisha hadi antuku. Neyi chasonekeliyi kapostolu Pawulu, Yehova “kwila yadikaana yomweni nehi.” (2 Tim. 2:13) Ichi chinatalishi mukwila nawu hichikweti muloña nachuma chinateli kumwekana hela chikwilawu antuku, Yehova hahimpaña yilwilu yindi, nkeñelu yindi hela nshimbi jindiku. Muloña wakumukuhwelela Nzambi yetu wabulaña kuhimpa, tunateli kumushindamena netu wakatwamwina nawa wakatukwasha kuumika hampinji yitwakamonaña kukala kwamaneni.—Tañenu Isamu 62:6, 7.
9. Yumanyi yimunadizili kuchuma chamumwekeneni muhela Tatyana?
9 Twamwilishaña Yehova kwikala Ilola detu kuhitila mukusha muchima hachekalayi nikutwalekahu kutoñojoka chikupu hankeñelu yindi. Chumichi chikutukwasha kutwalekahu kwikala adiwunjika nawa ashinshika kudi yena hampinji yitunakumona kukala. (Mas. 16:8) Ichi dichuma chamumwekeneni muhela wejina daTatyana, akasililiwu mwitala muloña wayuma yakuhwelelayi. Wahosheli nindi, “Nadiña hohu kankawami. Chankalilileña nankashi hakusambila. Kakavulu naneñeleña.” Hela chochu, chatachikiliyi kutoñojoka hakukala kwamweneñayi nichikwamukundamini Yehova ninkeñelu Yindi, watwesheli kuumika nawa wekalili cheñi nañovu yakutwalekahu kwikala washinshika. Wahosheli nindi: “Kwiluka muloña waweni iku kukala chikwamwekeneneña, kwankwashili kwanuka nami namweneña kukala kwejimiku muloña wakwikala washinshika kudi Yehova. Chumichi chankwashili kuleka kutoñojoka hadi ami aweni.”
10. Yehova nateli kwikala ñahi Ilola detu chayinu mpinji?
10 Mumafuku ahambidi, twakamonaña kukala kwakakeñekaña etu kumushindamena Yehova nankashi. Ayinu diyi mpinji yitwatela kukuhwelela chikupu netu wakatwinka yuma yejima yakakeñekaña hakwila twakomiki nakashinshi. Yumanyi yinateli kutukwasha kwila mwenimu? Tañenu nsañu yawantu ashimunawu muBayibolu niyuma yayimwekenaña ambuña aYehova makonu. Talenu Nzambi chinamwekeshiyi yilwilu yindi yidi neyi ilola hakukwasha ambuñindi. Toñojokenu chikupu hansañu yamuchidiwu. Kwila mwenimu kukuyikwasha kumwilisha Yehova kwikala Ilola denu.
IMBUJOLENUÑA YILWILU YAYEHOVA YIDI NEYI ILOLA
11. Muloñadi chitukukeña kwimbujolela yilwilu yaYehova yidi neyi ilola? (Talenu cheñi chikasha chinakwila nawu “ Chikonkwanyi Chatela Kudimikilawu Amanakwetu Atwansi.”)
11 Tunamoni Yehova chamwekeshañayi hatooka nindi wudi neyi ilola. Ichi dinu talenu chitunateli kwimbujola yilwilu yindi yidi neyi ilola. Neyi tuzataña nañovu kwila mwenimu, tukukwashaña chipompelu kwikala chakola. Chakutalilahu, Yesu wamutuumbili Shimona ijina daKefasi (dabalumunawu nawu “Petulu”), daya mukwila nawu “Ilola.” (Yow. 1:42) Chumichi chamwekesheli nawu wakundejeleña nikukolesha chipompelu. Akulumpi muchipompelu ayilumbulula nawu ekala neyi “wulelu welola deneni.” Chumichi chinakumwekesha hatooka chakiñañawu antu muchipompelu. (Isa. 32:2) Hela chochu, chipompelu chahetelañamu neyi amanakwetu niahela ejima embujolaña yilwilu yaYehova yidi neyi ilola.—Efwe. 5:1.
12. Shimunenu njila jitunateli kwikalilamu neyi chiswamu kudi akwetu.
12 Ikalenu chiswamu. Neyi amanakwetu ajimbesha hela ashiya matala awu muloña wawubanji wadimwekenaña indi kwiji njita, tunateli kuyitambwila kumatala etu. Yuma chiyinakusweja kutaminaku munanu “[mafuku] akukuminina,” chakadi nikujina kukwikalaña njila jajivulu jikukeñekaña kudikwashilamu wumu namukwawu. (2 Tim. 3:1) Tunateli cheñi kuyikwasha amanakwetu muyitoñojoka nikuspiritu. Njila yimu mutwatela kwilila mwenimu hikuyitambwila chiwahi Hetala daWanta, nawa chumichi chikuletesha muchipompelu mukwikala kukeña nikuwunda. Twashakamaña mukaayi mudi antu akalisha, abulaña kumwekesha kukeña nawa akabishaña akwawu. Dichi neyi amanakwetu niahela enza nakupompa, twatela kuzata hakumina ñovu jetu kuyikolesha nikumwekesha kudi wena netu twayikeña.
13. Akulumpi anateli kwikala ñahi neyi chiswamu kudi amanakwawu niahela? (Talenu cheñi mwevulu.)
13 Akulumpi ekalaña neyi chiswamu kudi amanakwawu niahela muchipompelu hampinji yinakumonawu kukala kwashiyashana. Neyi kunamwekani wubanji wadimwekenaña hela nsañu jakuchipatela jinakukeñeka kuzatilahu mukunyakashana, akulumpi anyakalaña kuwana njila yakukwashilamu amanakwawu niahela. Ayikwashaña cheñi nikuspiritu. Amanakwetu niahela akwikala akasunuka kuhanjeka namukulumpi neyi amwiluka nawu wekala wamwovu, watoñojokelañaku nawa watiyililaña nakanañachima. Yilwilu yamuchidiwu yakwashaña antu kumona nawu wayakamenaña; dichi, chayileteshaña chiikali chaswayi kwovwahila wunlomboli wamuBayibolu wunayilejiwu kudi mukulumpi.—1 Tes. 2:7, 8, 11.
Neyi amanakwawu niahela anakumona kukala, akulumpi ekalaña neyi chiswamu Talenu maparafilafu 13) a
14. Tunateli kumwekesha ñahi netu twashindamenewa?
14 Ikalenu ashindamenewa. Tunakukeña akwetu akuhweleleña nawu tukuyikwashaña, sweje-e mumpinji yinakumonawu kukala. (Yish. 17:17) Yumanyi yitwatela kwila hakwila akwetu atushindameni? Tufwileña kutwalekahu kumwekesha yilwilu neyi yamwekeshañayi Nzambi, chidi neyi kwila mutunakani nikuzata nañovu kuhemba mpinji. (Mat. 5:37) Tunateli cheñi kukwasha mukwetu kumujimba neyi kudi chuma chinakaankiliyi. Kubombelahu, twatela kuzata nañovu kuhana mpanji jinatwinkiwu kwesekeja nanshimbi jitwatambwilaña.
15. Chipompelu chahetelañamu ñahi neyi akulumpi ekala ashindamenewa?
15 Akulumpi ashindamenewa akwashaña nankashi chipompelu. Munjilanyi? Akakushimwina akamaña nankashi wanyi neyi eluka nawu anateli kuhanjeka nawakulumpi mpinji yidi yejima yinakukeñawu wukwashu, chidi neyi kuhanjeka namukulumpi wezanvu dawu dakushimwina. Akakushimwina cheñi atiyaña nawu anakuyakamena chiwahi neyi eluka nawu akulumpi adi namuchima wakufwila kuyikwasha. Nawa neyi akulumpi azatishaña Bayibolu ninyikanda yanduñu wakashinshi hampinji yinakufumbanawu chatela azatisheña yitoñojoka yawu aweni, akuyikuhwelela kudi akwawu akakudifukula. Amanakwetu niahela akuhwelelaña chikupu mukulumpi wahembaña nsañu yakujinda nakajindilu nawa washikijaña munakaniyi nindi wukwilamu.
16. Twahetelañamu ñahi etu aweni niakwetu neyi twilaña yuma yaloña mpinji yejima?
16 Ilenuña yuma yaloña mpinji yejima. Neyi tumwovwahilaña Yehova muyuma yejima nikufuukula kushindamena hachahosha Bayibolu, tukwikala akutalilahu amawahi kudi akwetu. Neyi tudizaña Izu daNzambi nikumukuhwelela Yehova chikupu, tukumwovwahilaña yena ninshimbi jindi. Tukwilukaña ntañishilu yakutwamba niyitoñojoka yabula kwesekana nayitoñojoka yaYehova nawa hitukuluwankana nayumiyiku. (Efwe. 4:14; Yak. 1:6-8) Kumukuhwelela kutwamukuhwelela Yehova niyikaninu yindi, kwatukwashaña kwikala adiwunjika neyi tunatambwili nsañu yatama. (Mas. 112:7, 8) Twakwashaña cheñi antu anakumona kukala.—1 Tes. 3:2, 3.
17. Akulumpi anateli kukwasha ñahi amanakwetu niahela kwikala adiwunjika nikumukuhwelela Yehova chikupu?
17 Akulumpi atela kwikala adiyuulaña muyilwilu, atoñojokaña mwamaana, aloñeshaña yuma chiwahi nawa amwovu muchima. Awa amayala akwashaña antu kwikala adiwunjika nikumukuhwelela Yehova chikupu nawa akwashaña chipompelu kuhitila ‘mukukwatisha kwizu dalala.’ (Tit. 1:9; 1 Tim. 3:1-3) Muloña wayuma yayiwahi yelañawu nikuzata mudimu wakubiña, akulumpi akwashaña akakushimwina kuya nakupompa mpinji yejima, kushimwina nikudiza nkawawu. Neyi amanakwetu niahela anakuhita mukukala kunakuyakamisha, akulumpi azataña nañovu ayanukishaña nawu amushindameni Yehova nikusha muchima hankeñelu yindi.
18. Muloñadi wutwakeñelaña kumushimeka Yehova nikuswina kwakwihi nayena? (Talenu cheñi chikasha chinakwila nawu “ Njila Yinateli Kuyikwasha Kuswina Kwakwihi naYehova.”)
18 Hanyima yakuhanjeka hayilwilu yayiwahi yaYehova, tunateli kuhosha neyi chahosheliyi Mwanta Davidi nindi: “Yehova, Ilola dami, ashimekewi.” (Mas. 144:1) Yehova hiNzambi itwatela kukuhwelela mpinji yejima. Muchihandilu chetu chejima nihampinji yakela tunashinakaji dehi, twakatwalekahu kuhosha netu “Diyi Ilola dami,” nakukuhwelela netu wakatukwashaña mpinji yejima kwikala nawubwambu wakola nayena.—Mas. 92:14, 15.
KAMINA 150 Mukeñenu Nzambi Kulonda Mwakahandi
a KULUMBULULA MWEVULUwudi haKava: Antu jaNzambi amumonaña Yehova nawu wudi neyi ilola dashimata. Ifu 28: Hampinji yidiwu Hetala daWanta, muhela nakasunuki kuhanjika nawakulumpi ayedi.
