1. Dapre Psom 18:46, ar ki kitsoz David ti konpar Zeova?

 SAN ki nou atann, nou kapav gagn bann difikilte ki sanz nou lavi net. Dan sa bann moman-la, nou bien kontan ki nou kapav kont lor Zeova, pa vre! Dan lartik avan, nou ti aprann ki Zeova Li enn Bondie vivan ek ki Li touletan pre pou ed nou. Kan nou trouv so lame dan nou lavi, sa vremem rasir nou ki “Zeova li vivan!” (Lir Psom 18:46.) Me apre ki David ti dir ki “Zeova li vivan,” li ti konpar Zeova ar enn kitsoz ki pena lavi. Li ti dir ki Zeova Li ‘so Gran Ros.’ Ki li ti pe rod dir?

2. Ki nou pou examine dan sa lartik-la?

² Dan sa lartik-la, nou pou gete kifer kapav konpar Zeova ar enn ros, ek nou pou gete seki sa ansegn nou lor Zeova. Nou pou gete osi kouma nou kapav fer Zeova vinn nou Ros. Apre sa, nou pou gete kouma nou kapav imit bann kalite Zeova.

KIFER KAPAV KONPAR ZEOVA AR ENN ROS?

3. Donn bann lexanp pou montre kouma Labib servi mo “ros”? (Get zimaz lor kouvertir.)

³ Labib konpar Zeova ar enn “ros” pou fer nou konpran sertin kalite ki Li ena. Kan bann serviter Zeova ti donn Li laglwar pou so bann zoli kalite, plizir fwa zot ti dekrir Li kouma enn ros. Premie fwa ki Labib dir ki Zeova Li enn “Ros” se dan Deteronom 32:4. Dan enn lapriyer ki Ann ti fer, li ti dir ki “Bondie kouma enn gran ros ek pena personn kouma Li.” (1 Sam. 2:2) Abakouk ti dir ki Zeova enn “Gran Ros.” (Abak. 1:12) Ekrivin Psom 73 ti dir ki Bondie “Li enn ros ki soutenir [so] leker.” (Ps. 73:26) Zeova osi ti konpar Limem ar enn ros. (Iza. 44:8) Anou get trwa kalite ki pou montre nou kifer nou kapav konpar Zeova ar enn ros, ek anou gete kouma nou kapav fer Li vinn “nou Ros.”—Det. 32:31.

4. Dan ki sans Zeova Li enn fortres? (Psom 94:22)

 ⁴ Zeova Li enn fortres; Li protez nou. Kan ena enn gro tornad, enn kikenn kapav kasiet kot enn gran ros; sa ros-la pou protez li. Dan mem fason, Zeova protez nou kan nou gagn bann gro difikilte. (Lir Psom 94:22.) Li protez nou kont ninport ki kitsoz ki kapav gat nou lamitie avek Li, ek Li rasir nou ki mem si nou pe soufer azordi, sa pa pou dire pou touletan. Li promet nou ki dan lavenir, Li pou tir tou bann kitsoz ki fer nou trakase ek ki fer nou soufer.—Eze. 34:25, 26.

5. Kouma nou kapav fer Zeova vinn nou Fortres?

⁵ Kouma nou kapav fer Zeova vinn nou Fortres? Enn fason nou fer sa se kan nou priye Li. Kan nou priye Li, Li donn nou “lape Bondie” ki kapav protez nou leker ek nou lespri. (Fil. 4:6, 7) Anou get lexanp Artem, enn frer ki ti al dan prizon akoz so lafwa. Laba, plizir fwa bann-la ti interoz li, zot ti maltret li, ek zot ti mem esey fer li gagn per. Artem ti dir: “Mo ti bien strese sak fwa ki bann-la ti interoz mwa. . . . Mo ti touletan priye Zeova. Mo ti dir Li ed mwa pou res kalm ek donn mwa sazes.” Artem ti dir: “Malgre sa persekision-la, mo ti reisi res kalm. . . . Zeova ti avek mwa; se koumadir mo ti pe kasiet deryer enn gran miray ros.”

6. Kifer nou kapav touletan kont lor Zeova? (Izai 26:3, 4)

⁶ Zeova Li fidel; nou kapav touletan kont lor Li. Parey kouma enn montagn ki touletan dan so plas, Zeova pou touletan la pou ed nou. Nou kapav fer Li konfians parski “Zeova Limem sa gran Ros pou touletan la.” (Lir Izai 26:3, 4.) Li pou touletan tini so bann promes, ekout nou bann lapriyer, ek soutenir nou kan nou bizin. Nou kapav osi kont lor Li parski Li fidel anver so bann serviter. (2 Sam. 22:26) Zame Li pa pou bliye seki nou fer, ek Li pou touletan rekonpans nou.—Ebre 6:10; 11:6.

7. Ki arive kan nou kont lor Zeova? (Get zimaz osi.)

⁷ Nou fer Zeova vinn nou Ros kan nou ena foul konfians an Li ek kan nou kont lor Li. Nou kone ki kan nou obeir Li, mem dan bann moman bien difisil, nou pou gagn bann bienfe. (Iza. 48:17, 18) Ek sak fwa ki nou trouve kouma Zeova ed nou, sa fer nou ena plis konfians an Li. Lerla, ninport ki difikilte nou gagne, nou sir ki se zis Zeova ki kapav ed nou pou andire. Bien souvan, kan nou gagn bann gro leprev ek nou panse ki nou pena okenn sime sorti, nou konpran ki se zis lor Zeova ki nou kapav konte. Vladimir dir: “Kan mo ti dan prizon, samem moman kot mo’nn santi mwa pli pros ar Zeova. . . . Mo’nn aprann pou fer Zeova plis konfians parski mo ti tousel ek mo pa ti ena okenn kontrol lor mo sitiasion.”

8. (a) Kifer nou kapav dir ki Zeova Li stab? (b) Ki bienfe nou gagne kan nou konsider Zeova kouma nou Ros? (Psom 62:6, 7)

⁸ Zeova Li stab; Li pa sanze. Parey kouma enn montagn ki pa sanze, Zeova so personalite ek so proze zame pa sanze.  (Mal. 3:6) Kan Adan ek Ev ti rebel kont Zeova, Li pa ti sanz so proze pou bann dimounn. Lapot Pol ti dir ki Zeova “pa kapav renie limem.” (2 Tim. 2:13) Sa vedir ki ninport ki kitsoz ki arive, ouswa ninport ki kitsoz lezot fer, Zeova zame pa sanz so bann kalite, so proze, ek so bann prinsip. Ek parski Zeova zame pa sanze, nou kone ki Li pou ed nou kan nou gagn bann difikilte ek Li pou tini so bann promes konsernan lavenir.—Lir Psom 62:6, 7.

9. Ki leson nou kapav aprann ar lexanp Tatyana?

⁹ Nou fer Zeova vinn nou Ros kan nou reflesi lor bann zoli kalite ki Li ena ek lor proze ki Li ena pou nou. Kan nou fer sa, sa ed nou pou res kalm, pou fer Li konfians, ek pou res fidel anver Li kan nou gagn bann leprev. (Ps. 16:8) Se seki Tatyana ti fer kan gouvernman ti konfinn li kot li akoz so lafwa. Tatyana dir: “Mo ti santi mwa extra tousel. . . . O-koumansman, sa ti bien difisil ek souvan mo ti bien dekouraze.” Selman, kan li ti reflesi lor proze ek lor bann kalite ki Zeova ena, Tatyana ti konpran kifer sa bien inportan ki li andir sa leprev-la. Lerla, sa ti ed li pou res kalm ek sa ti donn li lafors pou res fidel ar Zeova. Tatyana dir: “Mo ti rapel ki se pou Zeova ki mo ti pe gagn sa leprev-la, ek sa ti ed mwa pou mo aret mazinn zis mo tousel.”

10. Kouma nou kapav fer Zeova vinn nou Ros depi aster-la mem?

¹⁰ Biento nou pou gagn bann leprev ek nou pou bizin kont lor Zeova plis ki avan. Alor, li bien inportan ki depi aster-lamem nou fer Zeova foul konfians, ek nou bizin sir ki Li pou ed nou pou res fidel anver Li dan ninport ki sitiasion. Kouma nou kapav fer sa? Nou bizin lir bann zistwar ki ena dan Labib ek biografi nou bann frer ek ser, pou trouve kouma Zeova inn soutenir zot ek inn vinn enn Ros pou zot. Pran letan pou reflesi bien lor zot lexanp. Kan to fer sa, sa pou ed twa pou fer Zeova vinn to Ros.

IMIT ZEOVA SO BANN KALITE

11. Kifer nou bizin imit bann kalite Zeova? (Get lankadre “ Enn Lobzektif pou Bann Zenn Frer.”)

¹¹ Ziska ler, nou’nn examinn twa kalite ki’nn montre nou kifer nou kapav konpar Zeova ar enn ros. Aster-la, anou gete kouma nou kapav imit so bann kalite. Plis nou fer zefor pou imit bann kalite Zeova, plis nou pou kapav ankouraz nou bann frer ek ser. Zezi ti donn Simon enn lot nom; li ti apel li Sefas (Pier) ki vedir “Enn Bout Ros.” (Zan 1:42) Zezi ti fer sa pou montre ki Pier ti pou rekonfort so bann frer ek ser ek fortifie zot lafwa. Li vre ki Labib dekrir bann ansien kouma “lonbraz enn gro ros” pou montre kouma zot protez lasanble. (Iza. 32:2) Selman, kan nou tou nou fer zefor pou imit bann kalite Zeova, nou tou nou pou kapav ankouraz nou kamarad.—Efe. 5:1.

12. Kouma nou kapav vinn enn fortres pou lezot?

 ¹² Vinn enn fortres pou lezot. Parfwa, nou kapav gagn lokazion pou protez nou bann frer ek ser ki pe fer fas ar bann katastrof natirel ouswa bann lager. Me parski bann sitiasion pe vinn pli kritik dan “bann dernie zour,” kitfwa nou pou gagn plis lokazion pou ed nou bann frer ek ser. (2 Tim. 3:1) Nou kapav osi ed nou bann frer ek ser lor plan spiritiel ek emosionel, kan nou rekonfort zot ek nou montre lamour anver zot. Par exanp, nou kapav akeyir zot bien kan zot vinn Lasal ek nou kapav ede pou ki ena enn bon lanbians dan lasanble. Dan lemond azordi, pli ale bann dimounn pe plis strese ek zot nepli ena santiman pou zot kamarad. Akoz sa, kan nou bann frer ek ser vinn Lasal, nou bizin fer tou seki nou kapav pou ankouraz zot ek pou montre zot ki nou kontan zot.

13. Kouma bann ansien kapav vinn enn fortres pou lezot? (Get zimaz osi.)

¹³ Bann ansien kapav vinn enn fortres kan zot rekonfort bann frer ek ser dan bann moman difisil. Kan ena bann katastrof natirel ouswa bann irzans medikal, bann ansien pa tarde pou ed zot bann frer ek ser. Zot osi ed zot bann frer ek ser lor plan spiritiel kan zot servi Labib pou ankouraz zot. Kan enn ansien koz avek zantiyes, li konn ekout lezot, ek li esey konpran zot santiman, li pli fasil pou bann frer ek ser vinn rod led ar li. Kan enn ansien ena sa bann kalite-la, lezot pou santi ki li kontan zot. Lerla, li pou pli fasil pou zot swiv bann konsey ki li done.—1 Tes. 2:7, 8, 11.

14. Kouma nou kapav vinn enn kikenn lor ki lezot kapav konte?

¹⁴ Vinn enn kikenn lor ki lezot kapav konte. Nou anvi ki lezot trouv nou kouma enn kikenn lor ki zot kapav konte, sirtou dan bann moman difisil. (Prov. 17:17) Kouma  nou kapav vinn sa kalite dimounn-la? Nou bizin fer zefor pou imit Zeova so bann kalite toulezour. Par exanp nou fer sa, kan nou tini nou bann promes ek kan nou fer tou seki nou kapav pou nou aler. (Mat. 5:37) Nou kapav osi ed lezot kan zot bizin led. Ek kan nou gagn bann responsabilite, nou bizin asim zot bien ek swiv bann instriksion ki nou gagne.

15. Kan bann ansien montre ki kapav kont lor zot, kouma lasanble gagn bann bienfe?

¹⁵ Kan bann ansien montre ki kapav kont lor zot, lasanble gagn bann bienfe. Par exanp, kan bann frer ek ser kone ki bann ansien pre pou ed zot ek ki zot kapav telefonn bann-la ninport kan zot bizin led, sa vremem rasir zot. Zot santi ki bann ansien vremem kontan zot. Kan bann ansien servi Labib ek bann piblikasion pou donn bann konsey, olie ki zot donn zot prop lopinion, bann frer ek ser ena plis konfians an zot. Ek kan enn ansien konn gard bann kitsoz konfidansiel ek ki li tini so bann promes, bann frer ek ser pou fer li plis konfians.

16. Kan nou enn kikenn ki stab, ki bienfe nou-mem ek lezot osi gagne?

 ¹⁶ Vinn enn kikenn ki stab. Nou pou ena enn bon linflians lor lezot, si nou obeir Zeova dan tou kitsoz ek si nou swiv bann prinsip Labib kan nou pran bann desizion. Kan nou etidie Labib ek nou fer nou lafwa vinn for, nou pou res fidel ar Zeova ek nou pou swiv so bann prinsip. Lerla, nou pou konn fer diferans ant laverite ek bann fos lansegnman, ek nou pa pou les nou inflianse par sa bann fos lansegnman la. (Efe. 4:14; Zak 1:6-8) Kan nou ena enn lafwa for dan Zeova ek dan so bann promes, sa ed nou pou res kalm kan nou gagn bann move nouvel. (Ps. 112:7, 8) Ek kan enn kikenn li stab, li enn vre led pou bann ki pe gagn bann difikilte.—1 Tes. 3:2, 3.

17. Kouma bann ansien kapav vinn bann zom ki stab, ek ki bienfe lezot gagne gras-a sa?

¹⁷ Bann ansien se bann zom ki ‘ekilibre dan zot bann labitid, ki ena bon zizman, ki an-ord, ek ki rezonab.’ Kan bann ansien res “bien atase ar parol ki fidel,” zot kapav ed bann frer ek ser pou res kalm ek pou ena enn lafwa for dan Zeova. (Tit 1:9; 1 Tim. 3:1-3) Gras-a zot bon lexanp ek bann vizit pastoral ki zot fer, bann ansien ed bann proklamater pou ki zot regilie dan zot bann labitid, kouma par exanp asiste bann renion, sorti predikasion, ek fer zot letid personel. Ek kan bann frer ek ser trakase akoz zot bann problem, bann ansien ankouraz zot ek rapel zot ki zot bizin kont lor Zeova ek res konsantre lor so bann promes.

18. Kifer nou anvi donn Zeova laglwar ek vinn pli pros ar Li? (Get lankadre “ Enn Fason pou Vinn Pli Pros ar Zeova.”)

¹⁸ Apre ki nou’nn examinn sa bann zoli kalite ki Zeova ena la, parey kouma Lerwa David nou kapav dir: “Ki Zeova, mo Gran Ros, gagn laglwar!” (Ps. 144:1) Zeova zame pa pou abandonn nou ek nou kapav touletan kont lor Li. Mem si nou vinn vie, nou kapav sir ki Li pou ed nou pou nou res pros ar Li. Wi, ar tou nou leker nou kapav dir: “Zeova . . . Li mo Ros!”—Ps. 92:14, 15.