1. Mowiwanana ni Salmo 18:46, mwene Davidi amuliganihe Yehova ninddi?

 IYO nnakala mwilaboni mwinapadduwa dhithu dhohiyana-hiyana dhabure, mwaha wa yeyo, egumihu podi osadduwa mwamakalelo nahajhehedhihu. Mbwenye iyo nnotamalela vanlubale mwaha Yehova onikavihera. Ohudhera ovirile, nihubusedhiwa wi Yehova Mulugu ookalawo ni anofuna onikavihera. Teto anikaviheraga, nnowanda wonelamo wi ‘Yehova Mulugu ookalawo!’ (Omwileri Salmo 18:46.) Mbwenye Davidi nuumala owooga wi Yehova Mulugu ookalawo, oliye omuliganiha Yehova ni ethu yahinna egumi, wodhela omwithana ‘Nibwe naaga.’ Mwahaya bwaddi Davidi adhe amuliganihege Yehova ni ethu yahinna egumi?

2. Ohudhere wula nnoone ddi?

² Ohudhera wula, nnere woona mwahaya bwaddi Yehova agithaniwa Nibwe, ki yoliganiha ela enanihudhiha ddi wodhela Yehova? Teto nnere woona mwahaya bwaddi nnohowela omuroromela Yehova ni omoona ninga Nibwe nehu. Namala nnere woona makalelo nnafunihu otajhiha dhikalelo dha Yehova.

MWAHAYA BWADDI YEHOVA AGALIGANIHIWA NNIBWE?

3. Baani aalabihendhe madhu owi ‘Nibwe’ mBibiliyani amwagagana Yehova? (Osugwe fotu yavakapani.)

³ Bibiliya anomuliganiha Yehova Nnibwe wihina anikavihere wonelamo dhikalelo dha Yehova. Teto malabo owinjhivene adhaari a Yehova yanvuwihaga oliye mwaha dhikalelo dhaye dhotikiniha, yomwithana Nibwe. Yolebela yobajha ya mBibiliyani enamwithana Yehova ninga Nibwe di Deuteronômio 32:4. Teto mudhidhi Ana alobelaga oliye owoga egi: ‘Kawo Nibwe nnaligana ni Mulugu ehu.’ (1 Sam. 2:2) Abakuki ahimwithana Yehova ninga ‘Nibwe naaga.’ (Hab. 1:12) Namaleba Salmo 73 ahimwithana Yehova ninga ‘Nibwe na murima waaga.’ (Sal. 73:26) Teto mwinnyene Yehova anowiliganiha Nnibwe. (Isa. 44:8) Vano nnere woona dhikalelo tharu dhinoniha wi Yehova analigana Nnibwe. Teto nnere ohudhera makalelo oomoona Yehova ninga ‘Nibwe nehu.’ — Deut. 32:31.

4. Nimakalelo baani Yehova aliye ninga nikungu nothawelawo (Salmo 94:22)

 ⁴ Yehova nikungu nehu nothawelawo. Iyo podi othawela onikuguni wa nibwe, nafwanyiwaga nipevo ninlubale. Ni makalelo mamodhave, Yehova podi onibarela naafwanyiwaga makathamiho oorusa mwigumini mwehu. (Omwileri Salmo 94:22.) Oliye anonibarela wi nidhowegeve nandanaga nuliye. Teto anonipaganya wi kaawo makathamiho enanifwanya peeno, ehinadha emala. Ohiya eyo, anopaganya wi osogolo anere wamariha makathamiho maatene enanithuwathuwiha. — Eze. 34:25, 26.

5. Makalelo oomusayela Yehova ninga nikungu nehu nothawelawo baavi?

⁵ Makalelo oomusayela Yehova ninga nikungu nehu nothawelawo, fuudhela olobela. Iyo nalobelaga, Yehova anonivaha ‘murenddele [waaye]’ onaakurumusa murima ni mubuwelo wehu. (Fil. 4:6, 7) Kasugwa yopadduwa ya ddibila Artem, aafugeliwe mukambura mwaha nroromelo naye. Pulisiya dhaala, oomukoha dila dhowinjhivadhene, omooniha goyi ni oomuthusa. Artem anawoga egi: “Dila dhowinjhivadhene pulisiya ole aagikohaga, gakala oothuwathuwene. . . . Miyo goolobelesa wa Yehova gimulobaga wi gikale ookurumuwene ni agivahe thotho. Dhithu dhatedhene pulisiya ole eriyena wihina gihiye okala oororomeleya kadhalabenle ethu. . . . Nnikavihero na Yehova yakala ninga gaali oobareleyene nnibwe.”

6. Mwahaya bwaddi nigaroromela wi Yehova kanadha anisukuma? (Isaías 26:3, 4)

⁶ Yehova dororomeleya ni kanadha anisukuma. Ndala ninga mwango obe nibwe ninlubale nahinavenyavo vamburoni vewa, nihikanna ebaribari wi Yehova kanadha ahiya onikavihera. Teto iyo podi omuroromela, mwaha oliye ‘Nibwe namukalakala.’ (Omwileri Isaías 26:3, 4.) Yehova anerege okalawo ni mukalakala, teto anere wakwanihedha mpaganyo dhaye, wavuruwana malobelo ehu ni onikavihera. Ohiya eyo, iyo podi omuroromela Yehova, mwaha oliye dororomeleya ni ale enamulabela. (2 Sam. 22:26) Oliye kanadha addiwala ndhe nimwerelihu ni anere onreeliha mwaha mabasa maatene nnamparelihu. — Ebe. 6:10; 11:6.

7. Naamuroromelaga Yehova ni murima wehu wamutene nnooniha ddi? (Osugwe fotu.)

⁷ Naamuroromelaga Yehova ni murima wehu wamutene nnowooniha wi oliye di Nibwe nehu. Iyo nihikanna ebaribari wi naamwiwelelaga Yehova naarive nifwanyiwaga makathamiho, dhehu dhinerege oneeddela pama. (Isa. 48:17, 18) Vano nubuwelaga makalelo Yehova anikaviheriye, nroromelo nehu nuliye nnooliba teto nnokanna ebaribari wi Yehova baahi dinna ewedhelo yoonikavihera wawanana makathamiho bi makathamiho enanifwanya, naarive ekale oorusa. Malabo owinjhiva nafwanyiwa makathamiho oorusa finathabwihu wonelamo wi nnohowela omuroromela Yehova. Siyeyo yampadduwenle ddibila Vladimir, oliye anawoga egi: “Mudhidhi ngaali mukambura, waali mudhidhi wandanana waaga ni Yehova wathambwiwa oliba, miyo gahihudhera omuroromela vanlubale Yehova mwaha gaali meeka, teto gahithabwa osegedheya.”

8. (a) Mwahaya bwaddi nigawogaga wi Yehova kanasadduwa? (b) Mwahaya bwaddi iyo podi omuroromela Yehova ali Mulugu ahinasadduwa? (Salmo 62:6, 7)

⁸ Yehova kanasadduwa. Ndala ninga nibwe  ninlubale, nihinasadduwiwa, ekalelo ya Yehova vamodha ni efunelo yaye kinasadduwa. (Mal. 3:6) Naarive Adawu ni Eva egamurugunuwele Yehova, Oliye kasaddunle efunelo yaye ni athu. Murumiwi Pawulo ohuwoga wihina Mulugu ‘kananda wikoodda mwinya.’ (2 Tim. 2:13) Eyo enatapulela wi naarive epadduwe ethu-sithu obe athu yeragana dhithu dhohiyana-hiyana, Yehova kanadha asaddula efunelo yaye newene malamulo aye. Iyo podi omuroromela Yehova ali Mulugu ahinasadduwa ni okanna ebaribari wi Oliye anerege onikavihera mudhidhi worusa ni anere wakwanihedha mpaganyo dhaye osogolo. — Salmo 62:6, 7.

9. Ohudhere ddi ni yopadduwa ya murogola Tatyana?

⁹ Naapenddaga dhikalelo dha Yehova ni efunelo anniyena ni elabo ela yavati vamodha naathu, nnere wanda okala oopwaseyene ni okala oororomeleya wa Yehova nafwanyiwaga dhoweha. (Sal. 16:8) Siyeyo yapaddunwe ni murogola dhaala anithaniwa Tatyana, aamagiwe ni apulisiya mwaha wa nroromelo naye, mbwenye aathomeliwe okala vadevaye. Oliye anawoga egi: “Miyo gakala meeka suthukumwee, omambelelowene kayali ethu yokweya okala meeka.” Mbwenye oliye obajha opendda wodhela Yehova ni efunelo yaye anniyena ni athu. Mwaha wa yeyo oliye wonelamo wihina ohoowela ovilelana yoweha ele. Wubuwela ni makalelo yaale yahimukavihera okala oopwaseyene ni yahinvaha kopolo wi ande ovilela. Oliye anowogave egi: “Wonelamo mwahaya bwaddi gafwanyiwimi makathamiho ale, yahigikavihera ohidduwala wi gafwanyiwa makathamiho ale mwaha wa ndina na Yehova. Teto eyo yahigikavihera ohuthabwa wawubuwela makathamiho yagifwanya mudhidhi yole.”

10. Mwahaya bwaddi sathima obajha ovanene olibiha nroromelo nehu wihina nimonege Yehova ninga Nibwe nehu?

¹⁰ Mohulegela nnere ofwanyiwa makathamiho oorusa vanlubale ni nnerege ohowela omuroromela vanlubale Yehova. Bumwahaya, sathima obajha ovanene olibiha nroromelo nehu ni Yehova, teto ohanganyedhege wi oliye anere onivaha ele nnahowelihu ni anere onikavihera okalave oororomeleya naarive nifwanyiwaga makathamiho bi makathamiho. Nnande aavi olibiha nroromelo nehu? Wodhela wileri dhopadduwa dha adhaari a Yehova a kale ni dhopadduwa dha mwigumini dha addibila ni arogola a malabo yala, yandile ovilela nnikavihero na Yehova. Wilerigi dhopadduwa ndha, wubuwelege makalelo Yehova aakaviheriye aliwa. Teto osayelege mudhidhi wihina opendde dhopadduwadha. Werana eyo, onerege omoona Yehova ninga Nibwe nawo.

OTAJHIHE DHIKALELO DHA YEHOVA

11. Mwahaya bwaddi nigilibihedha otajhiha dhikalelo dha Yehova? (Osugwe kwaduru enna musolo “ Dholuba addibila eli Azombwe enahoweliwa okanna.”)

¹¹ Ofiyedha vala, nihoona dhikalelo dha Yehova dhinanikavihera wonelamo, mwahaya bwaddi Yehova agaliganihiwa Nnibwe. Vano nnere woona makalelo ootajhiha dhikalelo ndha dha Yehova, mwaha niilibihedha otajhiha dhikalelo ndha, nnere wanda walibiha addibilihu. Motajhiha Yesu ahinvaha Simawu ndina na Sefaji enatapulela Peduru). Ndina nna nnatapulela  “Ndongolomwa na nibwe.” (Juwa. 1:42) Yesu afuna amukavihere murumiwi Peduru wonelamo wi eere watodola addibila mmulogoni ni olibiha nroromelo newa. Anamaholela mulogo, eli ‘ninga murunti wa nibwe ninlubale.’ Eyo enatapulela wi anamaholela mulogo enowaabarela addibila ammulogoni. (Isa. 32:2) Eyo kinatapulela wi baanamaholela mulogo baahi, enahowela otajhiha dhikalelo dha Yehova ni walibiha addibila ni arogola, mbwenye iyo aatene nnohowela werana eyo. — Efe. 5:1.

12. Nnande aavi okala nikungu nothawelawo addibilihu yafwanyiwaga makathamiho?

¹² Wakaviherege addibila mudhidhi worusa. Addibilihu yafwanyiwa ngovi obe yaathawaga koddo, podi wera nnere ohowela okala ninga nikungu nothawelawo wodhela wawakela vaadevihu. ‘Malabo ala ookuthula’ nnakalihu, dhithudha dhinerege othabwa orusa. Bumwahaya nnere ohowela wakavihera addibilihu. (2 Tim. 3:1) Mbwenye ohiya wakavihera ni dhithu dhomwilini baahi, nnohowela walibiha ni wooniha wi nnowadhivela. Makalelo apama owalibiha fuudhela othapanya ni aliwa nakala mmutugumanoni ni watodola yahowelaga. Iyo nnafuna wi mmulogoni wikale mburo wa murenddele ni wohagalasa, addibilihu enakaliwa obareleyene ni oopwaseyene. Iyo nnakala mwilaboni mwihili odhivela. Bumwahaya, iyo nnafuna nilibihedhe wihina addibila yakala mmutugumanoni, ekalege oobareleyene, oopwaseyene ni yonege wi nnowadhivela.

13. Anamaholela mulogo enande aavi okala nikungu nothawelawo wa addibila? (Osugwe fotu.)

¹³ Anamaholela mulogo podi okala ninga nikungu nothawelawo, addibila yafwanyiwaga dhoweha dhohiyana-hiyana. Yapadduwa ngovi obe wakumelela oredda morurumusa, anamaholela mulogo enowiwegeredha mowaguva wihina yakavihere addibila. Teto aliwa enomulabihedha Bibiliya wihina yalibihe addibila. Addibila enere okala ootapuwene wi yaalobe nikavihero  anamaholela mulogo enoniwe mwaha dhikalelo dhewa dhapama ni enaavuruwanesa addibila. Namaholela mulogo anoniha dhikalelo ndha, anere wakavihera addibila wonelamo wi boofuneya mmulogoni. Teto enere okala yokweya addibila ohara dhoholela dhinadhela mBibiliyani enakeliwa ni anamaholela mulogo. — 1 Tes. 2:7, 8, 11.

14. Ddiniyani nnahowelihu werana wihina addibila enroromelege?

¹⁴ Okale oororomeleya. Iyo nnafuna wi akwihu enone wi podi oniroromela yafwanyiwaga makathamiho. (Pro. 17:17) Mbwenye ddiniyani nnahowelihu werana wihina addibila enroromelege? Ethu nnahowelihu werana fuwilibihedha wi nimutajhihe Yehova malabo aamateene. Motajhiha, wodhela wakwanihedha ele nipaganyilihu ni wilibihedha ofiya mambeseene, akala nihipangana ogumana ni muthu mmodha. (Mat. 5:37) Teto iyo podi wilibihedha omukavihera muthu anahowela nikavihero. Ohiya eyo, nnohowela wakwanihedha mutholo nnakelihu mmulogoni niharaga dhoholela dhatedhene nivahiwihu wi nakwanihedhe mutholoya.

15. Anamaholela mulogo yakala oororomeleya, enaakavihera aavi addibila ammulogoni?

¹⁵ Anamaholela mulogo eli oororomeleya eli ninga nvaho onadhela wa Yehova. Ni makalelo baani? Anamaholela mulogo yakala oororomeleya, addibila ammulogoni podi okala ootapuwene wi ethapanye naliwa mudhidhi bu mudhidhi yahowelaga nikavihero. Teto addibila enowanda woona wi anamaholela mulogo enowadhivela, yanona wi aliwa enofuna wakavihera. Ohiya eyo, addibila enerege othabwa waroromela anamaholela mulogo, yonelamo wi ohiya olabihedha  mubuwelo wewa aliwa enomulabihedha Bibiliya ni malivuru ehu yaafunaga ovaha yolaga. Teto addibila enowaroromela anamaholela mulogo ehinavuwiha muselu enawadeliwa ni enakwanihedha ele enapaganyiwa.

16. Mwahaya bwaddi sapama wahara malagano a Yehova?

¹⁶ Oharege dhoholela dha Yehova. Akala iyo nnomwiwelela Yehova nafunaga werana ethu-sithu, ni nnowerana dhothoma dhiniwanana ni malagano a mBibiliyani, nnere okala yotajhiha yapama. Naamuhudheraga Bibiliya ni nadidela olibiha nroromelo nehu ni Yehova, nnere okala oororomeleya wa Yehova ni nnerege wahara malagano aye mudhidhi waatene. Teto kannavoloweliwe ni dhohudhiha dhowoota ni makalelo owubuwela ehiniwanana ni ndhe Yehova anahudhihiye mBibiliyani. (Efe. 4:14; Tiya. 1:6-8) Teto niiwa muselu wowukuliha, iyo nnakala oopwaseyene mwaha nnororomela mpaganyo dha Yehova. (Sal. 112:7, 8) Ohiya eyo, nakanna nroromelo nooliba nnere wanda wakavihera ale enafwanyiwa makathamiho ni dhoweha. — 1 Tes. 3:2, 3.

17. Anamaholela mulogo enande aavi wakavihera addibila olibiha nroromelo newa?

¹⁷ Anamaholela mulogo, enohowela okala athotho, owegeredheya, ookweya ni owipimelela yeragana ethu-sithu. Teto anamaholela mulogo, enowakavihera addibila okala oopwaseya ni olibiha nroromelo enniwana ni Yehova. Ohiya eyo, aliwa enolibiha mulogo wodhela ‘wahiddelela pamadhene madhu oororomeleya.’ (Titu 1:9; 1 Tim. 3:1-3) Teto anamaholela mulogo podi walibiha addibila wodhela yotajhiha yewa ni wodhela waapada wihina yalibihe. Anamaholela mulogo enowakavihera addibila ohijhomba mmutugumanoni, odhowa mmabasani oolaleya ni werana ohudhera wewa wa vayeka. Teto addibila yafwanyiwaga makathamiho enathuwathuwiha, anamaholela mulogo enowawubusedha aliwa wihina enohowela odidela omuroromela Yehova ni wubuwelaga mpaganyo dhaye dhosogolo.

18. Mwahaya bwaddi nnafuna nidhowegeve ninvuwihaga Yehova ni olibiha wandana ninnihuna nuliye? (Osugwe kwaduru enna musolo “ Makalelo oolibiha wandana ninnihuna ni Yehova.”)

¹⁸ Numala ohudhera dhikalelo ndha dhoriya dha Yehova, iyo podi owoga ndala ninga mwene Davidi negi: ‘Oothithimihiwa di Yehova nibwe naaga.’ (Sal. 144:1) Iyo podi omuroromela Yehova egumihu yaatene. Naarive nuuluvale, iyo nnororomela wi Yehova anerege onikavihera olibiha wandana ninnihuna nuliye. Teto iyo nnere wanda owoga negi: Yehova ‘thi Nibwe naaga.’ — Sal. 92:14, 15.