1. F’​Salm 18:​46, David maʼ xiex qabblu lil Ġeħova?

 IL-ĦAJJA llum saret diffiċli għax id-dinja hi mimlija problemi. Però fl-artiklu taʼ qabel dan aħna tgħallimna li Ġeħova hu l-Alla l-ħaj u napprezzaw ħafna li hu dejjem lest biex jgħinna. Meta naraw kif jgħinna, aħna niftakru f’dak li qal David, li “Ġeħova hu ħaj.” (Aqra Salm 18:46.) Imma wara, David qabbel lil Ġeħova maʼ blata, xi ħaġa li m’għandhiex ħajja. Għala?

2. X’se nitgħallmu f’dan l-artiklu?

² F’dan l-artiklu ħa naraw għala Ġeħova hu mqabbel maʼ blata u dan x’jgħallimna dwaru. Se naraw ukoll kif aħna nistgħu nafdawh iżjed. U fl-aħħar, se niddiskutu kif nistgħu nimitaw il-kwalitajiet li għandu.

ĠEĦOVA GĦALA HU MQABBEL MAʼ BLATA?

3. Il-Bibbja għala tuża l-kelma “blata”? (Ara l-istampa.)

³ Biex nifhmu l-kwalitajiet li għandu Ġeħova, ħafna drabi l-Bibbja tqabblu maʼ blata. Fil-passat kien hemm ħafna qaddejja taʼ Ġeħova li użaw din il-kelma biex ifaħħruh. L-ewwel darba li Ġeħova kien imqabbel maʼ blata kien f’​Dewteronomju 32:4. Ħanna qalet li “m’hemm ebda blata bħall-Alla tagħna.” (1 Sam. 2:2) Ħabakkuk ukoll qal li Ġeħova hu blata. (Ħab. 1:12) U l-kittieb taʼ Salm 73 qal li Ġeħova “hu l-blata li nistaʼ niddependi minnu b’qalbi kollha.” (Salm 73:26) Fl-aħħar, Ġeħova  stess qal li hu l-blata. (Is. 44:8) Issa se naraw tliet kwalitajiet li jagħmlu lil Ġeħova bħal blata u kif aħna nistgħu nafdaw iktar fih.—Dt. 32:31.

4. Ġeħova kif jipproteġina? (Salm 94:22)

⁴ Ġeħova jipproteġina. Immaġina li tkun qiegħed barra u tinqabad f’maltempata kbira. Però fil-bogħod tara għar u tidħol tistkenn fih. Ġeħova qisu dak l-għar kbir li jipproteġik meta tgħaddi minn żmien diffiċli. (Aqra Salm 94:22.) Hu jgħinna biex nibqgħu leali lejh u jwegħedna li ebda diffikultà li jkollna mhi se tibqaʼ għal dejjem. Hu jwegħedna wkoll li fil-futur l-affarijiet li jagħmlulna l-istress u t-tbatija ħa jispiċċaw għal dejjem.—Eżek. 34:​25, 26.

5. Xi rridu nagħmlu biex Ġeħova jipproteġina?

⁵ Mod wieħed kif Ġeħova jipproteġina hu meta nitolbu. Meta nagħmlu hekk, Ġeħova jtina “l-paċi t’Alla” li tipproteġilna qalbna u l-ħsibijiet tagħna. (Flp. 4:​6, 7) Aħseb dwar l-esperjenza taʼ Artem, ħu li kien fil-ħabs minħabba li hu Xhud taʼ Ġeħova. Waqt li kienu jinterrogawh kienu jittrattawh ħażin u jipprovaw ibeżżgħuh. Minħabba f’hekk, kull darba li Artem kien jiġi interrogat kien jaqbdu stress kbir. Imma hu dejjem kien jitlob lil Ġeħova għall-għajnuna. Hu kien jitlob biex jibqaʼ kalm u jkun jaf kif għandu jwieġeb. Artem jgħid: “Ġeħova għenni ħafna u minkejja l-persekuzzjoni jien bqajt kalm. Hu kien qisu ħajt taʼ protezzjoni għalija.”

6. Għala nistgħu dejjem nafdaw lil Ġeħova? (Isaija 26:​3, 4)

⁶ Ġeħova hu leali u qatt mhu se jitlaqna. Lil Ġeħova nistgħu nqabbluh maʼ muntanja li qatt mhu se tiċċaqlaq. Aħna nistgħu nafdawh għax hu “l-Blata taʼ dejjem.” (Aqra Isaija 26:​3, 4.) Hu dejjem ħa jżomm il-wegħdi tiegħu, jismaʼ t-talb tagħna, u jkun dejjem lest biex jissapportjana. Ġeħova hu Alla leali maʼ dawk li jaqduh u qatt mhu ħa jinsa dak li nagħmlu għalih. Hu żgur se jipproteġina.—2 Sam. 22:26; Ebr. 6:10; 11:6.

7. X’se jiġri meta nafdaw f’Ġeħova? (Ara l-istampa.)

⁷ Meta nafdaw lil Ġeħova, aħna nkunu qed nagħmluh il-Blata tagħna. Aħna ċerti li meta nobdu, ħa mmorru tajjeb avolja jistaʼ jkun ngħaddu minn żmien diffiċli. (Is. 48:​17, 18) Kull meta naraw kif Ġeħova għenna, nafdawh iżjed u nsiru ċerti li hu biss jistaʼ jgħinna. Aħna naraw kemm Ġeħova hu Alla leali meta nkunu f’sitwazzjoni li ħadd ma jistaʼ jgħinna ħlief hu. Aħseb dwar l-esperjenza taʼ Vladimir. Hu kien fil-ħabs, però qal: “L-iżjed żmien meta kelli ħbiberija b’saħħitha maʼ Ġeħova kien meta kont il-ħabs. Jien tgħallimt nafdah iktar għax kont inkun waħdi u hu biss setaʼ jgħinni.”

8. (a) Ġeħova f’liema sens ma jinbidilx? (b) Aħna kif immorru tajjeb peress li Ġeħova hu l-Blata tagħna? (Salm 62:​6, 7)

 ⁸ Ġeħova ma jinbidilx. Bħalma diġà rajna, Ġeħova hu bħal muntanja u allura m’hemmx ċans li jiċċaqlaq u jinbidel. L-iskop u l-karattru tiegħu ma jinbidlu qatt. (Mal. 3:6) Dan nistgħu narawh minn dak li għamel meta Adam u Eva rribellaw kontrih. Fil-fatt Pawlu kiteb li hu “ma jistax jiċħad lilu nnifsu.” (2 Tim. 2:13) Dan juri li jiġri x’jiġri, hu qatt mhu se jbiddel il-karattru, l-iskop jew il-livelli tiegħu. Allura meta jkollna l-problemi, dejjem nistgħu nfittxu l-għajnuna tiegħu u nkunu ċerti li hu se jżomm il-wegħdi tiegħu.—Aqra Salm 62:​6, 7.

9. X’titgħallem mill-esperjenza taʼ Tatyana?

⁹ Meta naħsbu dwar l-iskop li Ġeħova għandu għalina u l-kwalitajiet tiegħu, inkunu nistgħu narawh bħala blata. Allura meta jkollna l-problemi, inkunu nistgħu nibqgħu kalmi. (Salm 16:8) Tatyana, li għamlet żmien arrestata d-dar minħabba li hi Xhud taʼ Ġeħova, tgħid: “Kont inħossni vera mdejqa peress li kont dejjem waħdi. Kienet sitwazzjoni vera diffiċli.” Imma meta bdiet taħseb dwar Ġeħova u l-iskop tiegħu, bdiet tara għala hu importanti li tibqaʼ leali. Dan għenha biex tibqaʼ kalma. Hi tkompli tgħid: “Li fhimt għala kont qed inbati għenni niftakar li dak li kont qed nagħmel kien għal Ġeħova.”

10. Ġeħova kif jistaʼ jsir il-Blata tiegħek?

¹⁰ Dalwaqt se ngħaddu minn żmien diffiċli ħafna u se jkollna bżonn nafdaw f’Ġeħova. Allura hu importanti li minn issa nsaħħu l-fidi tagħna fih u nkunu konvinti li se jgħinna. Kif jistaʼ jkollna din il-fidi b’saħħitha? Aqra rakkonti mill-Bibbja u esperjenzi tal-aħwa, u aħseb sew dwar kif Ġeħova għenhom. Jekk tagħmel hekk, meta jasal dak iż-żmien, se tkun konvint li Ġeħova hu l-blata tiegħek.

IMITA L-KWALITAJIET TAʼ ĠEĦOVA

11. Għala hemm bżonn nimitaw il-kwalitajiet taʼ Ġeħova? (Ara l-kaxxa “ Mira li Jistgħu Jagħmlu ż-Żgħażagħ.”)

¹¹ S’issa tgħallimna dwar xi kwalitajiet li jagħmlu lil Ġeħova bħal blata għalina. Imma aħna kif nistgħu nimitawh? Jekk nagħmlu l-aħjar tagħna biex nimitawh, ħa nkunu nistgħu ngħinu lill-aħwa. Aħseb dwar l-eżempju taʼ Pietru. Ġesù tah l-isem Kefa (Pietru), li jfisser “Biċċa Blata.” (Ġw. 1:42) Dan l-isem juri li hu kellu jinkuraġġixxi lill-aħwa u jgħinhom jibnu fidi b’saħħitha. Fil-Bibbja, l-anzjani wkoll huma mqabblin maʼ “dell taʼ blata kbira.” Dan juri li l-anzjani jistgħu jkunu taʼ protezzjoni għall-aħwa. (Is. 32:2) Imma ovvjament,  kollha kemm aħna nistgħu ninkuraġġixxu lill-aħwa jekk nimitaw il-kwalitajiet taʼ Ġeħova.—Efes. 5:1.

12. Kif nistgħu ngħinu lill-aħwa meta jkunu għaddejjin minn żmien diffiċli?

¹² Ipproteġi lill-aħwa. Minħabba li l-affarijiet koroh fid-dinja, bħad-diżastri u l-gwerer, dejjem qed jiżdiedu, jistaʼ jkun li l-aħwa jkollhom jaħarbu mid-dar tagħhom jew jitilfuha. Din tkun opportunità tajba kif aħna nistgħu nkunu post taʼ protezzjoni għalihom, billi jekk ikun hemm bżonn forsi nżommuhom magħna d-dar. Barra minn hekk, peress li qed ngħixu fl-aħħar jiem se jkollna iżjed opportunitajiet biex nuruhom kemm inħobbuhom u ninkuraġġuhom. (2 Tim. 3:1) Mod wieħed kif tistaʼ tagħmel dan huwa billi tgħin lill-aħwa jħossuhom komdi meta jattendu l-laqgħat. Dan nistgħu nagħmluh billi nitkellmu magħhom. Meta nagħmlu hekk il-kongregazzjoni se ssir post taʼ protezzjoni għalihom. Id-dinja llum qed issir iktar u iktar diffiċli. Allura ħutna jaf iħossuhom stressati jew li ħadd ma jħobbhom. Mela importanti li aħna nħobbuhom u ninkuraġġuhom meta jiġu l-laqgħat.

13. L-anzjani kif jistgħu jgħinu lill-aħwa li għaddejjin minn żminijiet diffiċli? (Ara l-istampa.)

¹³ L-anzjani jgħinu lill-aħwa meta jkunu għaddejjin minn żminijiet diffiċli. Pereżempju, meta jkun hemm xi diżastru naturali jew emerġenza medika, huma malajr jorganizzaw biex jgħinu lill-aħwa. Huma jgħinu lill-aħwa wkoll billi jinkuraġġuhom mill-Bibbja. Jekk l-anzjani juru lill-aħwa li huma jipprovaw jifhmuhom, jisimgħuhom u jkunu qalbhom tajba, l-aħwa se jkunu iżjed komdi  biex jitkellmu magħhom. U meta jkollhom dawn il-kwalitajiet, juru lill-aħwa li jħobbuhom u għalhekk se jkun iżjed faċli biex l-aħwa japplikaw il-pariri li jtuhom mill-Bibbja.—1 Tess. 2:​7, 8, 11.

14. Kif tistaʼ turi li inti taʼ min jafdak?

¹⁴ Kun taʼ min jafdak. Aħna rridu li oħrajn ikunu ċerti li meta jkollhom bżonn, se ngħinuhom, speċjalment fi żminijiet diffiċli. (Prov. 17:17) Allura x’tistaʼ tagħmel minn issa? Ipprova imita lil Ġeħova kemm tistaʼ billi żżomm il-wegħdi tiegħek, u meta tiftiehem iżżomm il-ħin. (Mt. 5:37) Tistaʼ tgħin ukoll lill-aħwa li taf li jkollhom bżonn. U fil-kongregazzjoni, tistaʼ tieħu ħsieb ir-responsabbiltajiet li jkollok billi tobdi d-direzzjoni.

15. Il-kongregazzjoni kif se tmur sew meta l-anzjani jkunu taʼ min jafdahom?

¹⁵ Il-kongregazzjoni kif se tmur sew meta l-anzjani jkunu taʼ min jafdahom? L-aħwa se jħossuhom inqas stressjati meta jkunu jafu li jistgħu jċemplu lill-anzjani kull meta jkollhom bżonn.  Huma se jħossu li l-anzjani jħobbuhom u meta l-anzjani jagħtu pariri mill-Bibbja u l-pubblikazzjonijiet tagħna, l-aħwa se jkunu jistgħu jafdawhom. Barra minn hekk, meta l-anzjani jżommu kelmithom u ma jitkellmux fuq affarijiet kunfidenzjali, l-aħwa wkoll se jkunu jistgħu jafdawhom iktar.

16. Meta nobdu lil Ġeħova kif se jgħin lilna u lil oħrajn?

¹⁶ Dejjem obdi lil Ġeħova. Aħna se nkunu taʼ eżempju tajjeb jekk dejjem nobdu lil Ġeħova u nieħdu deċiżjonijiet mill-Bibbja. Iktar ma jkollna fidi b’saħħitha u nitgħallmu dwar Ġeħova, iktar ħa nkunu leali lejh u nżommu mal-livelli tiegħu. Mhux se niġu mħajrin nemmnu jew naċċettaw tagħlim falz. (Efes. 4:14; Ġak. 1:​6-8) Il-fidi tagħna f’Ġeħova u fil-wegħdi tiegħu ħa tgħinna nibqgħu kalmi meta nirċievu xi aħbar kerha. (Salm 112:​7, 8) Barra minn hekk, se nkunu nistgħu ngħinu lil dawk li jkollhom il-problemi.—1 Tess. 3:​2, 3.

17. X’se jgħin lill-anzjani jkunu t’eżempju tajjeb għall-aħwa?

¹⁷ Anzjan għandu jkun moderat fi drawwietu, b’moħħu f’loku, jimxi bl-ordni, u raġonevoli. Dawn l-anzjani jgħinu lil oħrajn biex jibqgħu kalmi u jżommu fidi soda f’Ġeħova. (Titu 1:9; 1 Tim. 3:​1-3) Bl-eżempju tagħhom u meta jinkuraġġixxu lill-aħwa, huma jgħinuhom jattendu l-laqgħat, jagħmlu l-istudju personali, u joħorġu fuq is-service. U meta l-aħwa jkunu stressjati minħabba xi problemi, l-anzjani jfakkruhom biex ifittxu lil Ġeħova għall-għajnuna u jiftakru fil-wegħdi tiegħu.

18. Aħna għala rridu nfaħħru lil Ġeħova u nibqgħu l-ħbieb tiegħu? (Ara l-kaxxa “ Mod Kif Insiru Ħbieb taʼ Ġeħova.”)

¹⁸ Wara li rajna xi kwalitajiet li għandu Ġeħova, żgur li nħossuna bħal David. Hu qal: “Jalla jiġi mfaħħar Ġeħova, il-Blata tiegħi.” (Salm 144:1) Aħna dejjem se nsibu lil Ġeħova lest biex jgħinna. Anki meta nikbru fl-età, aħna nistgħu nkunu ċerti li hu dejjem se jgħinna biex nibqgħu leali u nkunu nistgħu ngħidu: “Hu l-Blata tiegħi.”—Salm 92:​14, 15.