1. Nda̱a̱ táki̱ʼva káchi Salmo 18:​46, ¿ndáaña ni̱ka̱ʼa̱n ta̱ David xa̱ʼa̱ Jehová?

 NÁSA̱MANÍ tiempo ña̱ ndóoyó vitin ta iin kama kivi kundoʼoyó iin tu̱ndóʼo, soo kúsi̱íní-iniyó chi kúnda̱a̱-iniyó ña̱ íyo Jehová ña̱ chindeétáʼanra xíʼinyó. Nu̱ú artículo ña̱ ni̱ya̱ʼa sa̱kúaʼayó ña̱ ndásakáʼnuyó iin Ndióxi̱ ta̱ táku ta ndiʼi tiempo íyora ña̱ chindeétáʼanra xíʼinyó tá yáʼayó nu̱ú tu̱ndóʼo. Tá chíndeétáʼanra xíʼinyó saá kúú ña̱ kándíxaníkayó ña̱ iin Ndióxi̱ ta̱ táku kúúra. Nda̱a̱ táki̱ʼva ni̱ka̱ʼa̱n ta̱ David nu̱ú Salmo 18:46 (kaʼviña). a Ta̱ David ni̱ka̱ʼa̱nra xa̱ʼa̱ Jehová ña̱ nda̱a̱ táki̱ʼva íyo iin yu̱u̱ káʼnu saá íyora. ¿Nda̱chun ni̱ka̱ʼa̱n ta̱ David ña̱ nda̱a̱ táki̱ʼva íyo iin yu̱u̱ káʼnu saá íyo Jehová?

2. ¿Ndáaña sakúaʼayó nu̱ú artículo yóʼo?

² Nu̱ú artículo yóʼo sakúaʼayó nda̱chun káʼa̱n Biblia xa̱ʼa̱ Jehová ña̱ íyora nda̱a̱ táki̱ʼva íyo iin yu̱u̱ káʼnu tasaá kotoyó ndáaña sakúaʼayó xíʼin ña̱yóʼo. Saátu kotoyó ndáaña kivi keʼéyó ña̱ va̱ʼa kundaa-iniyó Jehová ta ndáa ki̱ʼva kundiku̱nyó yichi̱ra.

¿NDA̱A̱ TÁKI̱ʼVA ÍYO IIN YU̱U̱ KÁʼNU SAÁ ÍYO JEHOVÁ?

3. ¿Ndáaña káʼa̱n Biblia xa̱ʼa̱ Jehová? (Koto na̱ʼná ña̱ va̱xi nu̱ú kíxáʼa tutu yóʼo).

³ Biblia chítáʼanña Jehová xíʼin iin yu̱u̱ káʼnu ta ña̱yóʼo chíndeétáʼanña xíʼinyó kunda̱a̱-iniyó xa̱ʼa̱ sava ña̱ va̱ʼa ña̱ kúúmiíra. Saátu káʼa̱nña xa̱ʼa̱ na̱ nda̱sakáʼnu Jehová tiempo xi̱naʼá ta ni̱ka̱ʼa̱nna xa̱ʼa̱ra ña̱ íyora nda̱a̱ táki̱ʼva íyo iin yu̱u̱ káʼnu. Ña̱ nu̱ú yichi̱ ña̱ káʼa̱n Biblia xa̱ʼa̱ Jehová ña̱ íyora nda̱a̱ táki̱ʼva íyo iin yu̱u̱ káʼnu va̱xiña nu̱ú Deuteronomio 32:4. Tá ke̱ʼé ñá Ana oración ni̱ka̱ʼa̱nñá xíʼin Jehová: “Ndióxi̱ miíndi̱ ndakúníún nda̱a̱ táki̱ʼva íyo iin yu̱u̱ káʼnu” (1 Sam. 2:2). Ta̱ Habacuc ni̱ka̱ʼa̱nra xa̱ʼa̱ Jehová ña̱ íyora nda̱a̱ táki̱ʼva íyo iin yu̱u̱ káʼnu ña̱ chíndeétáʼan xíʼinra (Hab. 1:12). Ta̱ ka̱ʼyí ña̱ Salmo 73 ni̱ka̱ʼa̱nra xa̱ʼa̱ Jehová ña̱ íyora nda̱a̱  táki̱ʼva íyo iin yu̱u̱ chi va̱ʼaní chi̱ndeétáʼanra xíʼinra (Sal. 73:26). Ta saátu mií Jehová ni̱ka̱ʼa̱nra ña̱ íyora nda̱a̱ táki̱ʼva íyo iin yu̱u̱ káʼnu (Is. 44:8). ¿Nda̱chun káʼa̱n Jehová ña̱ íyora nda̱a̱ táki̱ʼva íyo iin yu̱u̱ káʼnu? Ná ka̱ʼa̱nyó xa̱ʼa̱ u̱ni̱ ña̱ va̱ʼa ña̱ kúúmiíra ta xíʼin ña̱yóʼo sakúaʼayó ña̱ va̱ʼaní ndáara miíyó (Deut. 32:31).

4. ¿Nda̱chun káʼa̱nyó ña̱ va̱ʼaní ndáa Jehová miíyó? (Salmo 94:22).

⁴ Jehová ndáara miíyó. Tá kíxáʼa ndeéní kúun sa̱vi̱ iin na̱ yiví kivi ki̱ʼvina ini iin kava̱ á ti̱xin iin yu̱u̱ káʼnu tasaá kǒo ña̱ kundoʼona. Ta saátu miíyó tá yáʼayó nu̱ú tu̱ndóʼo kivi kuyatinyó nu̱ú Jehová ta ka̱ʼa̱nyó xíʼinra ña̱ chindeétáʼanra xíʼinyó (kaʼvi Salmo 94:22). b Va̱’aní ndáara miíyó ta kǒo táxira ña̱ kundoʼoyó ña̱ʼa ña̱ kivi saxóʼvi̱ miíyó. Ta saátu chí nu̱únínu sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta si̱íní kooyó (Ezeq. 34:​25, 26).

5. ¿Ndáaña xíniñúʼu keʼéyó ña̱ va̱ʼa kundaa Jehová miíyó?

⁵ Tá ndáa-iniyó Jehová, saá kúú ña̱ káʼa̱nyó xíʼinra ña̱ chindeétáʼanra xíʼinyó. Tá ná keʼéyó ña̱yóʼo Ndióxi̱ va̱ʼaní sandíkora-iniyó ta kǒo ña̱ kundi̱ʼi̱-iniyó xa̱ʼa̱ (Filip. 4:​6, 7). Ná ka̱ʼa̱nyó xa̱ʼa̱ ña̱ ndo̱ʼo ta̱ Artiom chi̱kaa̱nara veʼeka̱a xa̱ʼa̱ ña̱ ndásakáʼnura Ndióxi̱. Ta ni̱xi̱yo iin ta̱ investigador ta̱ xi̱ ixandi̱va̱ʼaní xíʼinra, saáchi xi̱kuni̱ra ná ka̱ʼa̱n ta̱ hermano yóʼo xa̱ʼa̱ ña̱ kúni̱ra kunda̱a̱-inira xa̱ʼa̱. Ta̱ hermano yóʼo káchira: “Tá xi̱ndaka̱tu̱ʼunra yi̱ʼi̱ xi̱ndi̱ʼi̱ní-inii̱. Ña̱kán xi̱kaʼi̱n xíʼin Jehová ña̱ chindeétáʼanra xíʼi̱n ña̱ kǒo ndi̱ʼi̱ní-inii̱ ta saátu ná taxira ña̱ ndíchi koi̱. Ni xi̱ ixandi̱va̱ʼaníra xíʼi̱n, soo ndiʼi tiempo nda̱kú ni̱xi̱yo-inii̱ xíʼin Jehová. Nda̱a̱ táki̱ʼva íyo iin nama̱ súkun saá ni̱xi̱yo Jehová nu̱úi̱ chi va̱ʼaní xi̱ndaara yi̱ʼi̱”.

6. ¿Nda̱chun kivi kundaa-iniyó Jehová ndiʼi tiempo? (Isaías 26:​3, 4).

⁶ Kiviva kundaa-iniyó Jehová. Nda̱a̱ táki̱ʼva íyo iin yu̱u̱ káʼnu á iin xi̱kí káʼnu saá íyo Jehová chi ndiʼi tiempo íyora ña̱ chindeétáʼanra xíʼinyó. (kaʼvi Isaías 26:​3, 4). c Sáxi̱nura ña̱ káʼa̱nra xíʼinyó chi ndiʼi tiempo íyora saátu xíniso̱ʼora oración ña̱ káʼa̱nyó xíʼinra ta chíndeétáʼanra xíʼinyó. Ta kándíxayóra chi nda̱kúní íyo inira xíʼin na̱ ndásakáʼnu miíra (2 Sam. 22:26). Kǒo nándosó-ini Jehová xa̱ʼa̱ ña̱ kéʼéyó ta ndiʼi tiempo taxira ku̱a̱ʼání bendición ndaʼa̱yó (Heb. 6:10; 11:6).

7. ¿Ndáaña va̱ʼa ndákiʼinyó tá ndáa-iniyó Jehová? (Koto na̱ʼná).

⁷ Inka ki̱ʼva ña̱ na̱ʼa̱yó ña̱ ndáa-iniyó Jehová kúú ña̱ kandíxaníyóra ndiʼi tiempo. Sava yichi̱ íxayo̱ʼvi̱níña xíʼinyó kuniso̱ʼoyó ña̱ káʼa̱n Jehová, soo tá kándíxayóra ña̱ va̱ʼa miívayó kúúña (Is. 48:​17, 18). Tá xítoyó ña̱ chíndeétáʼanra xíʼinyó, saá kúú ña̱ ndáaníka-iniyóra, ta ña̱yóʼo chindeétáʼan xíʼinyó ña̱ kundeé-iniyó ya̱ʼayó nu̱ú tu̱ndóʼo ña̱ kǒo níndakanixi̱níyó kixi nu̱úyó. Sava yichi̱ iinlá mií Jehová kúú ta̱ kivi chindeétáʼan xíʼinyó, ña̱kán va̱ʼaní kúniyó chi kúnda̱a̱-iniyó ña̱ kǒo sándakoo ndaʼa̱ra miíyó. Iin ta̱  hermano ta̱ naní Vladímir káchira: “Tá xi̱ndikaa̱i̱ veʼeka̱a saá kúú ña̱ va̱ʼaníka ku̱yatii̱n nu̱ú Jehová. Iinlá mií xi̱ndikaa̱ kán, ña̱kán sa̱kúaʼi̱ ña̱ kundaa-inii̱ Jehová ña̱ miíra chindeétáʼan xíʼi̱n”.

8. a) ¿Nda̱chun káʼa̱nyó ña̱ kǒo nása̱ma Jehová? b) Ta, ¿ndáaña va̱ʼa ndákiʼinyó xa̱ʼa̱ ña̱yóʼo? (Salmo 62:​6, 7).

⁸ Kǒo nása̱ma Jehová. Nda̱a̱ táki̱ʼva íyo iin yu̱u̱ káʼnu á iin xi̱kí káʼnu va̱ása kándaña lugar nu̱ú íyoña, ki̱ʼva saá íyo Jehová saáchi íyora ndiʼi tiempo ta saátu kǒo nása̱mavíra ta ndiʼi ña̱ káʼa̱nra keʼéra chí nu̱únínu sáxi̱nuraña (Mal. 3:6). Tá i̱xaso̱ʼo ta̱ Adán xíʼin ñá Eva, Jehová kǒo nínasamara ña̱ xi̱kuni̱ra keʼéra. Ta̱ apóstol Pablo ni̱ka̱ʼa̱nra ña̱ nda̱kúníva-ini Jehová “saáchi xa̱a̱ saá kúú ki̱ʼva ña̱ íyovara” (2 Tim. 2:13). Ña̱yóʼo kúni̱ kachiña ña̱ ni nda̱a̱ ndáaka ña̱ ná kuu sáxi̱nuva Jehová ña̱ káʼa̱nra, kǒo násamara ki̱ʼva ña̱ íyora. Ta saátu ley ña̱ táxira kǒo nása̱maña. Xa̱ʼa̱ ña̱yóʼo kándíxakayó ña̱ káʼa̱n Jehová chi kúnda̱a̱-iniyó ña̱ chindeétáʼanvara xíʼinyó tá ná ya̱ʼayó nu̱ú tu̱ndóʼo ta saátu ña̱ sáxi̱nura ña̱ káʼa̱nra keʼéra chí nu̱únínu (kaʼvi Salmo 62:​6, 7). d

9. ¿Ndáaña sákuaʼún xíʼin ña̱ ndo̱ʼo ñá Tatiana?

⁹ Inka ña̱ chindeétáʼanní xíʼinyó ña̱ kundaaní-iniyó Jehová kúú ña̱ ndakaʼányó xa̱ʼa̱ ndiʼi ña̱ va̱ʼa ña̱ kúúmiíra ta saátu xa̱ʼa̱ ña̱ káʼa̱nra keʼéra chí nu̱únínu. Ña̱yóʼo sándi̱koña-iniyó ta kǒo ndíʼi̱níka-iniyó tá yáʼayó nu̱ú iin tu̱ndóʼo ña̱ yo̱ʼvi̱ní (Sal. 16:8). Ña̱yóʼo kúú ña̱ ndo̱ʼo iin ñá hermana ñá naní Tatiana. Na̱ chíñu nda̱kasinañá veʼeñá ta kǒo nítaxikana ña̱ kitañá. Ñáyóʼo káchiñá: “Nda̱kasina yi̱ʼi̱ veʼi̱ ta ni̱xi̱yo mitúʼi̱n. Tá xa̱ʼa̱ i̱xayo̱ʼvi̱níña xíʼi̱n ta nda̱kavaní-inii̱”. Soo iin ña̱ chi̱ndeétáʼan xíʼinñá ña̱ ndakú koo iniñá xi̱kuu ña̱ xi̱ndakaʼánñá ña̱ íxandi̱va̱ʼana xíʼinñá xa̱ʼa̱ ña̱ ndásakáʼnuñá Jehová. Ñáyóʼo káchiñá: “Ña̱ chi̱ndeétáʼanní xíʼi̱n ña̱ kǒo ndakava-inii̱ kúú ña̱ nda̱kaʼíi̱n ña̱ xa̱ʼa̱ ña̱ kúʼvi̱ní-inii̱ xínii̱ Jehová ta kúnii̱ keʼíi̱ ña̱ kútóora kúú ña̱ xi̱xoʼvii̱. Ña̱yóʼo chi̱ndeétáʼanña xíʼi̱n ña̱ kǒo kundi̱ʼi̱ní-inii̱ xa̱ʼa̱ ña̱ ndóʼi̱”.

10. ¿Ndáaña xíniñúʼu keʼún ña̱ va̱ʼa kundaa-iniún Jehová?

¹⁰ Si̱lóʼoní tiempo kúma̱ní ta ya̱ʼayó nu̱ú ña̱ gran tribulación, xa̱ʼa̱ ña̱kán xíniñúʼu kandíxayó ña̱ chindeétáʼan Jehová xíʼinyó. Ña̱kán nda̱a̱ tiempo vitin xíniñúʼu kundaa-iniyó Jehová ña̱ miíra chindeétáʼan xíʼinyó ña̱ kundeé-iniyó xíʼin ña̱ nda̱kú koo iniyó xíʼinra. Iin ña̱ kivi chindeétáʼan xíʼinyó ña̱ nda̱kú koo iniyó xíʼinra kúú ña̱ kaʼviyó nu̱ú Biblia xa̱ʼa̱ na̱ nda̱sakáʼnu miíra tiempo xi̱naʼá ta saátu kivi kaʼviyó experiencia ña̱ káʼa̱n xa̱ʼa̱ na̱ hermano na̱ íyo tiempo vitin. Ndakanixi̱ní xa̱ʼa̱ ña̱ káʼviún ta koto ndáa ki̱ʼva chi̱ndeétáʼan Jehová xíʼinna, ña̱yóʼo chindeétáʼan xíʼún ña̱ kundaaka-iniún Jehová.

NÁ KEʼÉYÓ NDA̱A̱ TÁKI̱ʼVA KÉʼÉ JEHOVÁ

11. ¿Nda̱chun xíniñúʼu keʼéyó nda̱a̱ táki̱ʼva kéʼé Jehová? (Koto recuadro ña̱ naní “ Ña̱ kivi keʼé na̱ kúa̱an”).

¹¹ Xa̱a̱ ni̱ka̱ʼa̱nyó xa̱ʼa̱ sava ña̱ va̱ʼa ña̱ kúúmií Jehová ta ña̱yóʼo kúú ña̱ chíndeétáʼan xíʼinyó  kunda̱a̱-iniyó nda̱chun kúú ña̱ chítáʼanra miíra xíʼin iin yu̱u̱ káʼnu. Vitin sakúaʼayó ndáa ki̱ʼva kundiku̱nyó yichi̱ra. Tá chíka̱a̱yó ndee̱ ña̱ keʼéyó táki̱ʼva kéʼé Jehová saá kúúña va̱ʼaníka chindeétáʼanyó xíʼin na̱ hermano. Tá kúú ta̱ Jesús ni̱ka̱ʼa̱nra xíʼin ta̱ Simón ña̱ kunaníra Cefas (ta saátu naníra Pedro ta ña̱yóʼo kúni̱ kachiña iin táʼví loʼo yu̱u̱) (Juan 1:42). Xíʼin ña̱yóʼo ni̱ka̱ʼa̱nra ña̱ va̱ʼaní sándi̱ko ta̱ Pedro ini na̱ hermano ta va̱ʼaní kundaarana. Biblia káʼa̱nña xa̱ʼa̱ na̱ anciano ña̱ xíniñúʼu koona nda̱a̱ táki̱ʼva íyo ku̱nda̱ti á kundaʼvi̱, chi ndáana na̱ hermano ña̱ ñúʼu congregación (Is. 32:2). Ndiʼiyó kivi keʼéyó nda̱a̱ táki̱ʼva kéʼé Jehová tasaá va̱ʼaní kundaayó na̱ hermano na̱ ñúʼu congregación (Efes. 5:1).

12. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ hermano?

¹² Kundaa na̱ hermano tá yáʼana nu̱ú tu̱ndóʼo. Tá ñuu nu̱ú ndóo na̱ hermano kininí ku̱un sa̱vi̱, ni̱ta̱an, íyo guerra á ndo̱ʼona inkaka tu̱ndóʼo, kivi taxiyó veʼeyó ña̱ kundoona. Kininíka ku̱a̱ʼa̱n ndúu ñuyǐví ña̱ ndóoyó tiempo vitin, ña̱kán ku̱a̱ʼání na̱ hermanoyó xóʼvi̱na ta kivi chindeétáʼanyó xíʼinna (2 Tim. 3:1). Inka ña̱ kivi keʼéyó kúú ña̱ sándi̱koyó-ini na̱ hermanoyó xíʼin tu̱ʼun Ndióxi̱. Tá xáa̱ na̱ hermano reunión viíní ná ka̱ʼa̱nyó xíʼinna tasaá ndiʼiyó kusi̱í-ini. Tiempo vitin kǒoka ña̱ to̱ʼó nu̱ú na̱ yiví ta ndi̱va̱ʼaní-inina, ña̱kán ná kuʼvi̱ní-iniyó kuniyó na̱ ñaniyó xíʼin ku̱ʼvayó.

13. ¿Ndáaña kivi keʼé na̱ anciano ña̱ va̱ʼa chindeétáʼanna xíʼin na̱ hermano? (Koto na̱ʼná).

¹³ Kivi chindeétáʼan na̱ anciano xíʼin na̱ hermano na̱ yáʼa nu̱ú tu̱ndóʼo ña̱ yo̱ʼvi̱ní. Ta kivi keʼéna ña̱yóʼo tá ñuu nu̱ú ndóo na̱ hermano kúu iin tu̱ndóʼo á tá kúúmiína iin kue̱ʼe̱. Tá kúu ña̱yóʼo ndi̱ku̱n kama chíndeétáʼan na̱ anciano xíʼin na̱ hermano ta xíniñúʼuna tu̱ʼun Ndióxi̱ ña̱ va̱ʼa sandíkona-inina. Tá na̱ hermano xítona ña̱ iin ta̱ anciano va̱ʼaní-inira, kúnda̱a̱-inira xíʼin ña̱ ndóʼona, xíniso̱ʼorana kǒo ixayo̱ʼvi̱ña xíʼinna ka̱ʼa̱nna xíʼinra tá xa̱a̱ yáʼana nu̱ú tu̱ndóʼo.  Ña̱kán tá iin ta̱ anciano kúʼvi̱-inira xínirana kǒo ixayo̱ʼvi̱ña xíʼinna kuniso̱ʼona consejo ña̱ táxira ndaʼa̱na (1 Tes. 2:​7, 8, 11).

14. ¿Ndáaña kivi keʼéyó ña̱ va̱ʼa kundaa-inina miíyó?

¹⁴ Ná kundaa-inina yóʼó. Kúni̱yó ña̱ ka̱ʼa̱n na̱ hermano xíʼinyó ña̱ chindeétáʼanyó xíʼinna tá yáʼana nu̱ú tu̱ndóʼo (Prov. 17:17). Soo, ¿ndáaña keʼéyó ña̱ va̱ʼa kuyatinna nu̱úyó ta natúʼunna xíʼinyó xa̱ʼa̱ ña̱ ndóʼona? Kivi chikaa̱yó ndee̱ ña̱ ndiʼi ki̱vi̱ keʼéyó nda̱a̱ táki̱ʼva kéʼé Jehová. Tá kúú, tá ki̱ndooyó keʼéyó iin ña̱ʼa ná saxínuyóña, ta saátu tá ni̱ka̱ʼa̱nyó ña̱ ku̱ʼu̱nyó iin lugar ya̱chi̱ ná xa̱a̱yó (Mat. 5:37). Tá xítoyó ña̱ yáʼa na̱ hermano nu̱ú tu̱ndóʼo ná ka̱ʼa̱nyó xíʼinna ña̱ chindeétáʼanyó xíʼinna. Saátu tá káʼa̱nna xíʼinyó ña̱ keʼéyó iin chiñu ná keʼéyóña nda̱a̱ táki̱ʼva ni̱ka̱ʼa̱nna xíʼinyó.

15. ¿Ndáaña kúu tá va̱ʼaní kéʼé na̱ anciano chiñuna?

¹⁵ Na̱ anciano na̱ va̱ʼaní kéʼé chiñu va̱ʼaní ndáa-ini na̱ hermanona. Tá kúú, iin ta̱ anciano ta̱ kíʼin kuenta xíʼin grupo ña̱ predicación tá kama ndákuiinra yuʼú na̱ hermano tá ndáka̱tu̱ʼunnara saá kúú ña̱ va̱ʼaní kúnina. Tá ndiʼi tiempo chíndeétáʼan na̱ anciano xíʼin na̱ hermano, na̱yóʼo  kíʼinna kuenta ña̱ kúʼvi̱ní-ini na̱ anciano xíninana. Tá xíniñúʼuna Biblia xíʼin tutu ña̱ tává na̱ ñuu Ndióxi̱ ña̱ taxina consejo ndaʼa̱ na̱ hermano, saá kúú ña̱ va̱ʼaníka kándíxana ña̱ káʼa̱nna. Saátu, va̱ʼaní ndáa-ini na̱ hermanona tá kǒo nátúʼunna xíʼin inkana xa̱ʼa̱ iin ña̱ ku̱u ta saátu tá sáxi̱nuna ña̱ ki̱ndoona keʼéna.

16. ¿Ndáaña va̱ʼa ndákiʼinyó xa̱ʼa̱ ña̱ xíniso̱ʼoyó ña̱ káʼa̱n Jehová, ta ndáaña va̱ʼa ndákiʼin inkana?

¹⁶ Ndiʼi tiempo keʼéndó ña̱ káʼa̱n Jehová xíʼinndó. Tá ndiʼi tiempo xíniso̱ʼoyó ña̱ káʼa̱n Jehová ta vií íyo ña̱ ndáka̱xinyó keʼéyó saá kúú ña̱ chinúuyó iin yichi̱ va̱ʼaní nu̱ú na̱ hermano. Tá káʼviyó Biblia ndiʼi ki̱vi̱ saá kúú ña̱ va̱ʼaníka kandíxayó Jehová ta va̱ʼaní kitáʼanyó xíʼinra. Ña̱yóʼo chindeétáʼan xíʼinyó ña̱ kǒo kaka-iniyó ta kǒo taxiyó saká na̱ yiví xi̱níyó (Efes. 4:14; Sant. 1:​6-8). Ña̱ kándíxayó ña̱ káʼa̱n Jehová keʼéra chí nu̱únínu, ña̱yóʼo kúú ña̱ chindeétáʼan xíʼinyó ña̱ ndakú koo iniyó tá xa̱a̱ káʼa̱nna iin noticia ña̱ va̱ása va̱ʼa xíʼinyó (Sal. 112:​7, 8). Ta saátu kivi chindeétáʼanyó xíʼin na̱ yáʼa nu̱ú tu̱ndóʼo (1 Tes. 3:​2, 3).

17. ¿Ndáa ki̱ʼva chíndeétáʼan na̱ anciano xíʼin na̱ hermano?

¹⁷ Ná kiʼinní na̱ anciano kuenta xíʼin ña̱ kéʼéna, chi xíniñúʼu viíní ndakanixi̱nína, nda̱kúní ná koo ña̱ keʼéna ta ná kǒo ndakanixi̱nína ña̱ nina ña̱ káʼa̱n miína xíniñúʼu keʼé na̱ hermano. Xíniñúʼu viíní kuniñúʼuna tu̱ʼun Ndióxi̱ ña̱ sanáʼa̱na na̱ hermano, tasaá va̱ʼaní chindeétáʼanna xíʼin na̱ congregación ña̱ kandíxana Ndióxi̱ (Tito 1:9; 1 Tim. 3:​1-3). Tá va̱ʼaní ejemplo chínúuna nu̱ú na̱ hermano ta kéʼéna visita ña̱ pastoreo xíʼin na̱ publicador saá kúú ña̱ va̱ʼaní chíndeétáʼanna xíʼinna ña̱ ku̱ʼu̱nna reunión, ña̱ keena predicación xíʼin ña̱ ndiʼi ki̱vi̱ kaʼvina tu̱ʼun Ndióxi̱. Tá yáʼa na̱ hermano nu̱ú tu̱ndóʼo ña̱ sándi̱ʼi̱ní-inina, na̱ anciano chíndeétáʼanna xíʼinna ña̱ ndakaʼánna xa̱ʼa̱ ña̱ káʼa̱n Jehová keʼéra chí nu̱únínu.

18. ¿Nda̱chun kúni̱yó ndasakáʼnuyó Jehová ta viíní kutáʼanyó xíʼinra? (Koto recuadro ña̱ naní “ Ña̱ kivi keʼéyó ña̱ va̱ʼa kuyatinyó nu̱ú Jehová”).

¹⁸ Xa̱a̱ sa̱kúaʼayó xa̱ʼa̱ sava ña̱ va̱ʼa ña̱ kúúmií Jehová, ña̱kán kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ David: “Ná ndukáʼnu Jehová, ta̱ íyo nda̱a̱ táki̱ʼva íyo yu̱u̱ káʼnu” (Sal. 144:1). Kivi kandíxayó ña̱ saxínuva Jehová ña̱ káʼa̱nra keʼéra. Ndiʼi tiempo va̱ʼaní chindeétáʼanra xíʼinyó ña̱ kutáʼanyó xíʼinra ni tá xa̱a̱ ku̱chéeyó. Ña̱kán kivi ka̱ʼa̱nyó: “Jehová, nda̱a̱ táki̱ʼva íyo iin yu̱u̱ káʼnu saá íyoún chi va̱ʼaní ndáún yi̱ʼi̱” (Sal. 92:​14, 15).