1. Kej kiijtoua Salmo 18:46, ¿ika tlake tlamantli David kiixnextik Jehová?

 IPAN ni tonali nima mopatla kej tiitstokej, uelis techpanos tlen ueli tlamantli uan kipatlas tonemilis. Tlauel techyolchikaua tijmatisej uelis tikiljuisej Jehová ma techpaleui. Ipan tlamachtili 25, tikitakej Jehová eli nopa Dios katli nelia itstok uan nochipa kineki techpaleuis. Kema techpaleuia, kichiua más ma timotemachikaj “¡Jehová itstok!” kej kiijtok David ipan Salmo 18:46 (xijpoua). a Teipa David kiijtok Jehová eli se “Ueyi Tetl”. ¿Kenke David kiijtok Jehová katli nelia itstok eli kej se ueyi tetl tlen amo yoltok?

2. ¿Tlake tikitasej ipan ni tlamachtili?

² Ipan ni tlamachtili tikitasej kenke Biblia kiijtoua Jehová eli kej se ueyi tetl uan tlake techmachtia kema kiampa kiixnextia. Nojkia tikitasej tlake uelis tijchiuasej uan kiampa tikitasej Jehová kej se ueyi tetl. Uan kenijkatsa tojuantij uelis tijnextisej nopa kuajkuali tlamantli tlen ya kinextia.

¿KENKE TIKIJTOUAJ JEHOVÁ ELI KEJ SE UEYI TETL?

3. ¿Kenijkatsa ipan Biblia motekiuia nopa tlajtoli “Ueyi Tetl”? (Xikita tlaixkopinkayotl).

³ Biblia kiijtoua Jehová eli kej se ueyi tetl, pampa kineki ma tijkuamachilikaj se keski kuajkuali tlamantli tlen ya kinextia. Ipan Biblia kema Jehová itekipanojkauaj kiueyichiuayayaj pampa kinextiyaya kuajkuali tlamantli, kiixnextiyayaj kej se ueyi tetl. Nopa achtoui texto kampa kiijtoua Jehová eli kej se ueyi tetl, eli Deuteronomio 32:4. Habacuc kiijtok Jehová eli kej se ueyi tetl (Hab. 1:12). Katli kiijkuilok Salmo 73, nojkia kiijtok Jehová eli kej se tetl tlen kifuerzajmakayaya iyolo (Sal.  73:26). Uan Jehová nojkia kiijtok ya eli kej se ueyi tetl (Is. 44:8). Tikitasej eyi kuajkuali tlamantli tlen ya kinextia, tlen kichiua ma eli kej se ueyi tetl uan tlake uelis tijchiuasej para kiampa tikitasej (Deut. 32:31).

4. ¿Kenke tikijtouaj Jehová techmanauia? (Sal. 94:22).

⁴ Uelis timomanauisej ipan Jehová. Kema chikauak tlaajaka uan tlaauetsi, se akajya uelis momanauis tlaj kalakis ipan se tekakauako o itsintla tlen se ueyi tetl. Kema tikixnamikij se tlaouijkayotl tlen tlauel ouij, tojuantij nojkia uelis timomanauisej ipan Jehová (xijpoua Salmo 94:22). Ya techmokuitlauia uan techpaleuia amo nochipa ma titlaijiyouijtokaj. Nojkia kiijtojtok teipa kintsontlamiltis nochi tlen techtlaijiyouiltia o tlen kichiua amo ma tijpiakaj tlaseuilistli (Ezeq. 34:25, 26).

5. ¿Tlake uelis tijchiuasej tlaj tijnekij timomanauisej ipan Jehová?

⁵ Kema timomaijtouaj, timomanauiaj ipan Jehová. Kema kiampa tijchiuaj tijseliaj “nopa tlaseuilistli tlen Dios temaka” tlen kimanauia toyolo uan totlalnamikilis (Filip. 4:6, 7). Ma tikitakaj tlen kipanok Artem, se toikni katli kitsajkej pampa kitekipanoua Jehová. Uan monejki kiijiyouis kema se tekichijketl kitetsopki uan kipinajtik. Ya kiijtok: “Kema nechtlatsintokiyaya se keski tlamantli, tlauel nimotetsopayaya. [...] Nochipa nimomaijtouayaya uan nijtlajtlaniyaya Jehová ma nechmaka tlaseuilistli uan tlalnamikilistli. Amo nijtlauelkajki Jehová maske nopa tekichijketl kichijki se keski tlamantli pampa kinekiyaya ma nijnankili [...]. Nikitak Jehová kej se ueyi tepamitl tlen nechmanauiyaya”.

6. ¿Kenke nochipa uelis timotemachisej ipan Jehová? (Isaías 26:3, 4).

⁶ Uelis timotemachisej ipan Jehová. Sanse kej se ueyi tetl o se ueyi tepetl amo moolinia, Jehová nojkia kiampa eli pampa nochipa techpaleuia. Uelis timotemachisej ya nochipa kiampa kichiuas (xijpoua Isaías 26:3, 4). Ya nochipa itstos para kichiuas tlen kitenkajtok, techtlakakilis kema timomaijtouaj uan techpaleuis ika tlen monekis. Nojkia timotemachiaj ya amo kintlauelkaua katli kitekipanouaj (2 Sam. 22:26). Amo kema kiilkauas nochi tlen tijchiuaj uan nochipa techteochiuas (Heb. 6:10; 11:6).

7. ¿Kenijkatsa techpaleuia tlaj timotemachiaj ipan Jehová? (Nojkia xikita tlaixkopinkayotl).

⁷ Uelis tikitasej Jehová kej se ueyi tetl, tlaj timotemachiaj ipan ya. Tlauel techpaleuia tlaj tijneltokaj Jehová kema tikixnamikij tlaouijkayotl (Is. 48:17, 18). Uan kema tikitasej kenijkatsa techpaleuia, más timotemachisej ipan ya. Kiampa uelis tikixnamikisej sekinok tlaouijkayotl. Maske kemantika amo aka uelis techpaleuis kema tijpiaj tlaouijkayotl, tijmatij nochipa uelis timotemachisej ipan Jehová. Se toikni katli itoka Vladímir kiijtok: “Kema nechtsajkej, más nimouampojchijki iuaya Jehová. Nopaya más nimotemachik ipan ya, pampa noselti niitstoya uan san ya ueliskia nechpaleuis”.

8. 1) ¿Kenke uelis tikijtosej Jehová amo kema kipatlas tlen kiijtojtok? 2) ¿Kenijkatsa techpaleuia tlaj tikitaj Jehová kej se ueyi tetl? (Salmo 62:6, 7).

 ⁸ Jehová amo kema kipatla tlen kiijtoua. Sanse kej se ueyi tetl o se tepetl, Jehová amo kema kipatla tlen kiijtoua. Amo kema kipatla kej eli uan tlen mosentlalijtok kichiuas (Mal. 3:6). Kema Adán uan Eva tlaijixnamijkej, Jehová amo kipatlak tlen mosentlalijtoya kichiuas ipan Tlaltipaktli. Apóstol Pablo kiijtok Jehová “axueli kiijtos axmoixmati ika iselti” (2 Tim. 2:13). Nopa kiijtosneki maske uelis panos miak tlamantli, Jehová amo kema kipatlas kej eli, tlen mosentlalijtok kichiuas yon itlanauatiljuaj. Tijmatisej ni tlamantli, techpaleuia ma timotemachikaj ya nochipa techpaleuis kema tikixnamikisej tlaouijkayotl uan kichiuas nochi tlen kiijtojtok (xijpoua Salmo 62:6, 7).

9. ¿Tlake techmachtia tlen kipanok Tatiana?

⁹ Tlaj tikitaj nopa kuajkuali tlamantli tlen Jehová kinextia uan tlen mosentlalijtok kichiuas, tikitasej kej se ueyi tetl uan timotemachisej ipan ya. Nopa nojkia uelis techpaleuis kuali ma tijyolmatikaj uan amo tlauel ma timotekipachokaj kema tikixnamikij tlaouijkayotl (Sal. 16:8). Kiampa kipanok Tatiana, se tosiuaikni katli tekichiuanij amo kikauayayaj ma kisa tlen ichaj, pampa kitekipanoua Jehová. Ya kiijtok: “Nechchiualtijkej ma nimokaua noselti. Kema kiampa nechpanok, nijmatiyaya tlauel ouij uan amo kuali nijyolmatiyaya”. Nopa tosiuaikni moyoliljuik ipan tlen Jehová mosentlalijtok kichiuas, nopa kipaleuik ma kiijiyoui nochi tlen kipanotoya. Ya kiijtok: “Kema nijkuamachilik kenke nechpanoyaya nopa tlamantli, nechpaleuik ma nikita eliyaya pampa nijtekipanoua Jehová uan nijneki nijchiuas tlen ya kipaktia. Nopa nechpaleuijtok amo san nimoiljuijtos ipan tlen nechpano”.

10. ¿Tlake mitspaleuis xikita Jehová kej se ueyi tetl?

¹⁰ Nechka panos miak tlamantli tlen tlauel ouij uan moneki más timotemachisej ipan Jehová. Yeka, nama moneki timotemachisej ya nochipa techpaleuis ma tikijiyouikaj tlen ueli tlaouijkayotl uan amo ma tijtlauelkauakaj. ¿Kenijkatsa uelis tijchiuas? Xijpoua tlapoualistli tlen uala ipan Biblia uan tlen kinpanotok toikniuaj ipan ni tonali. Ximoyoliljui uan xikita kenijkatsa Jehová kinpaleuijtok itekipanojkauaj. Nopa mitspaleuis xikita Jehová kej se ueyi tetl.

MA TIJNEXTIKAJ NOPA KUAJKUALI TLAMANTLI TLEN JEHOVÁ KINEXTIA

11. ¿Kenke moneki tijnextisej kuajkuali tlamantli sanse kej Jehová? (Xikita recuadro “ Tlen telpokamej uelis mosentlalisej kichiuasej”).

¹¹ Tikitstokej se keski tlamantli tlen kinextia Jehová eli kej se ueyi tetl. Nama tikitasej kenijkatsa uelis tijchiuasej kej ya. Tlaj tijchiuaj kampeka tijnextisej nopa kuajkuali tlamantli tlen Jehová kinextia, tlauel tikinpaleuisej toikniuaj tlen tlanechikoli. Se neskayotl, Jesús  kitokaxtik Simón, Cefas, tlen motlajtolkuepa Pedro uan kiijtosneki “tetl” (Juan 1:42). Kiampa kinextik Pedro kinyolchikauaskia uan kinpaleuiskia toikniuaj ipan tlanechikoli. Biblia nojkia kiijtoua ueuejtlakamej elij “keja iekauilo se ueyi tetl” katli kinmokuitlauiaj toikniuaj (Is. 32:2). Nochi uelis tijnextisej nopa kuajkuali tlamantli tlen Jehová kinextia uan tikinpaleuisej toikniuaj kuali ma itstokaj, kej tieliskiaj se ueyi tetl (Efes. 5:1).

12. ¿Tlake uelis tijchiuasej para tikinpaleuisej toikniuaj?

¹² Xikinpaleui toikniuaj. Tlaj toikniuaj tlaijiyouiaj pampa kintlasojsoljuilik se tlenijki, itstokej kampa maseualmej tlauel mosisiniaj o kampa mochiua tlauilankayotl, uelis tikiniljuisej ma mokauakaj tochaj. Tiitstokej ipan “itlamia tonali” uan nojua panotias miak tlamantli tlen tlauel amo kuali. Yeka, moneki tikitasej kenijkatsa timopaleuisej (2 Tim. 3:1). Nojkia, uelis tikinpaleuisej toikniuaj, tlaj tikinyolchikauaj uan tikinpaleuiaj kuali ma tlaneltokakaj. Kema kuali tikinseliaj toikniuaj ipan tlanechikoli, inijuantij kuali kiyolmatij uan kiitaj tikinikneliaj. Ipan ni tonali, miakej maseualmej tlauel kinkualankaitaj uan kinkokoliaj sekinok. Yeka kema toikniuaj yauij tlanechikoli, tijnekij kuali ma kiyolmatikaj.

13. ¿Kenijkatsa ueuejtlakamej uelis kinpaleuisej toikniuaj? (Nojkia xikita tlaixkopinkayotl).

¹³ Ueuejtlakamej uelis kinpaleuisej toikniuaj katli kiixnamiktokej tlaouijkayotl. Kema se tlenijki tetlasojsoljuilia o se akajya mokokoua, inijuantij nima kiitaj kenijkatsa tlapaleuisej. Nojkia kinpaleuiaj kuali ma tlaneltokakaj. Tlaj toikniuaj kiitaj se ueuejtlakatl kuali tenojnotsa, kikuamachilia tlen kiyolmatij uan kuali kintlakakilia, inijuantij kinekisej kitlajtlanisej ma kinpaleui. Kema ueuejtlakamej kinextiaj nopa kuajkuali tlamantli, kichiuaj toikniuaj kuali ma kiyolmatikaj uan ma kinekikaj  kichiuasej tlen kintlajtolmakaj ika Biblia (1 Tes. 2:7, 8, 11).

14. ¿Tlake uelis tijchiuasej tlaj tijnekij sekinok ma motemachikaj ipan tojuantij?

¹⁴ Xieli temachtli. Nochi tijnekij sekinok ma kimatikaj tijnekij tikinpaleuisej kema kiixnamikij tlaouijkayotl (Prov. 17:17). ¿Tlake uelis tijchiuasej tlaj tijnekij ma motemachikaj ipan tojuantij? Moneki tijchiuasej kampeka nochipa tijnextisej nopa kuajkuali tlamantli tlen Jehová kinextia, kej kema tijchiuaj tlen tikijtouaj uan kema tiasij ipan nopa hora tlen tikijtojkej (Mat. 5:37). Uelis tikiniljuisej toikniuaj tijnekij tikinpaleuisej. Nojkia, kema techiljuisej ma tijchiuakaj se tekitl, ma tijchiuakaj kampeka tijchiuasej kej techiljuiaj.

15. ¿Kenijkatsa kinpaleuia toikniuaj ipan tlanechikoli kema ueuejtlakamej elij temachmej?

¹⁵ Ueuejtlakamej katli elij temachmej, kinpaleuiaj nochi toikniuaj ipan tlanechikoli. Kema se ueuejtlakatl kichiua kampeka toikniuaj ma kinojnotsakaj kema moneki se tlamantli, nopa kichiuas toikniuaj kuali  ma kiyolmatikaj. Kema ueuejtlakamej nochipa kinekij tepaleuisej, toikniuaj kiitaj inijuantij nelia kinikneliaj. Toikniuaj más motemachiaj ipan ueuejtlakamej, kema kintlajtolmakaj ika Biblia, amatlajkuiloli tlen techmaka Jehová itlanechikol uan amo kiijtoua san tlen inijuantij moiljuiaj. Nojkia kiampa pano kema amo kiijtojtinemij tlen toikniuaj kinpouiliaj uan kema kichiuaj tlen kiijtouaj.

16. ¿Kenijkatsa techpaleuia kema nochipa tijchiuaj tlen Jehová kiijtoua, uan kenijkatsa kinpaleuia sekinok?

¹⁶ Nochipa xijchiua tlen Jehová techiljuia. Uelis tikinpaleuisej toikniuaj tlaj nochipa tijchiuaj tlen kuali uan timoyakanaj ika Biblia kema tijtlapejpeniaj tlen tijchiuasej. Tlaj timomachtiaj Biblia uan tijchiuaj tlen techpaleuis más kuali ma titlaneltokakaj, techpaleuis amo ma tijtlauelkauakaj Jehová. Amo tleno kipatlas tlen timoiljuiaj yon tijneltokasej tlen moiljuiaj uan kiijtouaj maseualmej (Efes. 4:14; Sant. 1:6-8). Nojkia kema kuali titlaneltokaj uan timotemachiaj ipan tlen Jehová kitenkajtok, techpaleuia ma tikitakaj kej kinamiki kema pano tlen amo kuali (Sal. 112:7, 8). Uan nojkia uelis tikinpaleuisej katli kiixnamiktokej tlaouijkayotl (1 Tes. 3:2, 3).

17. ¿Kenijkatsa ueuejtlakamej uelis kinpaleuisej toikniuaj amo tlauel ma motekipachokaj uan kuali ma tlaneltokakaj?

¹⁷ Ueuejtlakamej moneki kuali monauatisej, kipiasej tlalnamikilistli, moiljuisej kej kinamiki uan kuali kichiuasej ininteki. Tlaj kineltokaj tlen Biblia kiijtoua ika nochi ininyolo, kinpaleuiaj toikniuaj amo tlauel ma motekipachokaj uan kuali ma tlaneltokakaj (1 Tim. 3:1-3; Tito 1:9). Kema kuali monejnemiltiaj uan kinyolchikauaj toikniuaj, kinpaleuiaj nochipa ma yakaj tlanechikoli, ma tlajtolmoyauakaj uan ma momachtikaj ininselti. Uan kema toikniuaj kiixnamikij tlaouijkayotl tlen kichiua tlauel ma mokuesokaj, ueuejtlakamej kinpaleuiaj ma motemachikaj ipan Jehová uan ipan tlen kitenkajtok kichiuas.

18. ¿Kenke tijnekij tijueyichiuasej Jehová uan más kuali timouampojchiuasej iuaya? (Xikita nopa recuadro “ Uelis tijnechkauisej Jehová”).

¹⁸ Tikitakej nopa kuajkuali tlamantli tlen Jehová kinextia uan tijyolmatij kej David, katli kiijtok: “Ma tijuejkapantlalikaj Jehová, katli eli kej se Ueyi Tetl” (Sal. 144:1, TNM). Nochipa uelis timotemachisej ipan Jehová. Ipan nochi tonemilis uan kema tiueuejtiasej, ya nochipa techpaleuis ma timouampojchijtokaj iuaya. Yeka uelis tikijtosej: Jehová “nechmokuitlauia” (Sal. 92:14, 15).