1. KuHubo 18:46 uDavida wafanisa uJehova lani?

 EMHLABENI lo esiphila kuwo, loba nini singehlelwa luhlupho olungaphambanisa kumbe lutshintshe impilo yethu. Kodwa kuyasiduduza ukuthi singenelisa ukucela ukuthi kuJehova asincedise. Esihlokweni esidlulileyo sifunde ukuthi uJehova unguNkulunkulu ophilayo njalo uhlezi ekulungele ukusincedisa. Lathi njengoDavida siyaqiniseka ukuthi “uJehova uyaphila” nxa sibona indlela asincedisa ngazo. (Bala iHubo 18:46.) Ngemva kokukhuluma amazwi la uDavida wabiza uNkulunkulu ngokuthi ‘uliDwala lakhe.’ Kungani wafanisa uJehova uNkulunkulu ophilayo ledwala into engaphiliyo?

2. Sizaxoxa ngani esihlokweni lesi?

² Esihlokweni lesi sizaxoxa ngokuthi kungani iBhayibhili lisithi uJehova ulidwala lokuthi isifaniso lesi sisifundisani ngaye. Sizaxoxa langokuthi singenzani ukuze abe liDwala lethu. Ekucineni sizaxoxa ngezindlela esingamlingisela ngazo uJehova.

KUNGANI KUTHIWA UJEHOVA ULIDWALA?

3. Izikhathi ezinengi iBhayibhili lilisebenzisa njani ibala elithi ‘idwala’? (Khangela umfanekiso.)

³ IBhayibhili lifanisa uJehova ‘ledwala’ ukuze lisincede sizwisise ubuntu bakhe. Ibala elithi ‘idwala’ lijayele ukutholakala emavesini alamazwi ezinceku zakhe eziyabe zimdumisa ngobuntu bakhe obumangalisayo. Ivesi yokuqala lapho uJehova afaniswa khona ‘leDwala’ nguDutheronomi 32:4. UHana laye wathi ethandaza wathi: “Akuladwala elinjengoNkulunkulu wethu.” (1 Sam. 2:2) UHabakhukhi yena wathi uJehova ‘uliDwala lakhe.’ (Hab. 1:12) Umlobi weHubo 73 wathi uNkulunkulu ‘ulidwala lakhe, uvikela inhliziyo yakhe.’ (Hubo. 73:26) Kanti njalo ngezinye izikhathi  uJehova laye wayezibiza ngokuthi ulidwala. (Isaya. 44:8) Asixoxeni ngezinto ezintathu ezenza uJehova abe lidwala kanye lokuthi singenzani ukuze abe ‘liDwala lethu.’—Dute. 32:31.

4. UJehova uyindawo yethu yokucatsha ngayiphi indlela? (IHubo 94:22)

⁴ UJehova uyindawo yokucatsha. Njengoba nje idwala lingaba yindawo umuntu angacatsha kuyo nxa kungaba lesiphepho esilolaka, loJehova uyasivikela ngezikhathi ezinzima. (Bala iHubo 94:22.) Uyasilinda futhi usiqinisekisa ukuthi lanxa singahlupheka emhlabeni lo omubi kuyabe kungokwesikhatshana nje. Kanti njalo uthembisa ukuthi esikhathini esizayo uzasusa loba yini eyenza ukuthi singabi lokuthula lokuvikeleka.—Hez. 34:​25, 26.

5. Singenzani ukuze uJehova abe yindawo yethu yokucatsha?

⁵ Eyinye indlela esingenza ngayo uJehova abe lidwala esicatsha kulo yikuthandaza kuye. Nxa singathandaza kuJehova uyasinika ‘ukuthula kwakhe’ okuzalinda izinhliziyo zethu lengqondo zethu. (Flp. 4:​6, 7) Asixoxeni ngokwenzakala ku-Artem, umzalwane owayebotshelwe ukholo lwakhe. Indoda eyayihlola icala lakhe yayilolunya. Yayimbiza kanengi imbuza imibuzo futhi imethusela. Uthi: ‘Sonke isikhathi nxa wayengibiza ngangikhathazeka kakhulu. Kodwa ngangihlala ngithandaza kuJehova ngicela ukuthi angincede ngihlaliseke lokuthi angiphe ukuhlakanipha. Ngakho wonke amacebo endoda le kawazange asebenze kimi, ngaqhubeka ngihlalisekile. UJehova wangincedisa sibili, kwakungathi ngicatshe ngemva komduli wamatshe.’

6. Kungani singahlala simthemba uJehova? (U-Isaya 26:​3, 4)

⁶ UJehova ngeke asilahlise. UJehova uhlala ekulungele ukusincedisa njengedwala elingeke linyikinywe. Singamthemba ngoba “uliDwala laphakade.” (Bala u-Isaya 26:​3, 4.) Uzahlala ephila futhi ekulungele ukugcina izithembiso zakhe, lokulalela imithandazo yethu kanye lokusisekela ngezikhathi zobunzima. Okunye okwenza simthembe uJehova yikuthi uqotho kulabo abamkhonzayo. (2 Sam. 22:26) Kasoze akukhohlwe esimenzela khona futhi kasoze ayekele ukusinika umvuzo.—Heb. 6:10; 11:6.

7. Ukuthembela kuJehova kuzasinceda njani? (Khangela lomfanekiso.)

⁷ Senza uJehova abe liDwala lethu nxa simthemba zikhathi zonke. Asithandabuzi ukuthi ukumlalela langezikhathi ezinzima kuzasinceda. (Isaya. 48:​17, 18) Nxa singabona indlela asisekela ngayo sizamthemba kakhulu. Sizaqiniseka ukuthi uzasincedisa ukuthi siqinisele kuloba yibuphi ubunzima esingahlangana labo. Izikhathi ezinengi nxa siphakathi kobunzima futhi kungelamuntu ongasincedisa yikho esinanzelela khona ukuthi uJehova ngeke asitshiye. UVladimir uthi: “Ngesikhathi ngivalelwe enkambeni ngasondela kakhulu kuNkulunkulu. Ngafunda ukumthemba kakhulu uJehova ngoba ngangingedwa futhi kungelalutho engangingalwenza.”

8. (a) Kungani sisithi uJehova katshintshi? (b) Sizancedakala njani singenza uNkulunkulu abe liDwala lethu? (IHubo 62:​6, 7)

⁸ UJehova katshintshi. UJehova unjengedwala elikhulu elingatshintshiyo. Ubuntu bakhe  lenhloso yakhe akutshintshi. (Mal. 3:6) Ngesikhathi u-Adamu lo-Eva behlamuka e-Edeni, uJehova kazange atshintshe lokho ayekuhlosile ngabantu. Umphostoli uPhawuli wathi uJehova “ngeke aziphikise.” (2 Thim. 2:13) Lokhu kutsho ukuthi kungelani lokuthi kwenzakalani kumbe ukuthi abanye benzani, uJehova katshintshi ubuntu bakhe, lenhloso yakhe lezimiso zakhe. Ngakho singamthemba uNkulunkulu wethu ongatshintshiyo sikwazi ukuthi uzasisindisa lokuthi uzasincedisa ngezikhathi ezinzima.—Bala iHubo 62:​6, 7.

9. Ufundani kulokho okwenzakala kuTatyana?

⁹ Nxa singacabangisisa ngobuntu bukaJehova kanye lalokho akuhlosileyo ngabantu langomhlaba, sizamthemba kakhulu simenze abe liDwala lethu. Lokhu kuzasinceda ukuthi sihlaliseke futhi sibe qotho lanxa siphakathi kobunzima. (Hubo. 16:8) Omunye udadewethu okuthiwa nguTatyana wabotshelwa ukholo lwakhe futhi wayengavunyelwa ukuphuma endlini. Uthi: “Ngazithola sengingedwa. Ekuqaliseni kwakunzima sibili, ngangihlala ngidanile.” Kodwa wathi ecabangisisa ngoJehova langenhloso yakhe futhi enanzelela lokuthi kungani kwakuqakatheke kakhulu ukuthi aqinisele, wenelisa ukulwisana lesilingo lesi njalo wathola amandla okuqhubeka ethembekile. Wathi: “Ukuzwisisa ukuthi kungani lokho kwakusenzakala kimi kwangenza ngakhumbula ukuthi ubunzima lobu babunginika ithuba lokuthi ngisekele uJehova. Lokho kungincede ukuthi ngingazizweli kakhulu.”

10. Singenzani ukuze uJehova abe liDwala lethu khathesi?

¹⁰ Esikhathini esizayo sizahlangana lobunzima obuzadinga ukuthi simthembe kakhulu uJehova. Khathesi yisikhathi sokuthi siqinise ukholo lwethu, sithembe ukuthi uJehova uzasinika konke esikudingayo ukuze senelise ukuqinisela futhi siqhubeke sithembekile. Singakwenza njani lokhu? Bala indaba eziseBhayibhilini kanye lendaba ezimayelana lalokho okwenzakala ebantwini bakaJehova lamuhla. Nanzelela ukuthi uJehova utshengise njani ukuthi ulidwala ngesikhathi esekela izinceku zakhe. Cabangisisa ngendaba lezo. Lokhu kuzakunceda ukuthi wenze uJehova abe liDwala lakho.

LINGISELA UJEHOVA

11. Kungani sifuna ukulingisela uJehova? (Khangela lebhokisi elithi “ Abafowethu Abasakhulayo Bangamlingisela Njani UJehova?”)

¹¹ Sesibonile ukuthi uJehova utshengisa njani ukuthi ulidwala. Khathesi asixoxeni ngokuthi singamlingisela njani. Nxa singenza konke okusemandleni ethu ukuthi simlingisele sizenelisa ukuqinisa abafowethu labodadewethu. Ngokwesibonelo, uJesu wanika uSimoni ibizo elithi Khefasi (okutsho ukuthi “Phetro” ngesiGrikhi). Ibizo leli litsho “Isiqephu Sedwala.” (Joh. 1:42) Lokhu kwakutshengisa ukuthi uPhetro wayezaduduza abanye ebandleni futhi aqinise ukholo lwabo. Abadala bebandla labo bafaniswa ‘lomthunzi wedwala elikhulu.’ Lokho kutshengisa indlela abavikela ngayo ibandla. (Isaya. 32:2) Sonke ebandleni singenelisa ukukhuthazana  nxa singalingisela uJehova iDwala lethu.—Efe. 5:1.

12. Chasisa indlela esingaba ngayo yindawo yokucatsha kubafowethu labodadewethu.

¹² Woba yindawo yokucatsha. Kwezinye izikhathi kungadingeka ukuthi sinike abazalwane indawo yokucatsha nxa bangehlelwa zingozi zemvelo, kumbe kube leziphithiphithi emphakathini loba impi. Njengoba izinto zilokhu zisiba zimbi ‘ezinsukwini lezi zokucina,’ akuthandabuzwa ukuthi sonke sizawathola amathuba okuncedisa abanye. (2 Thim. 3:1) Kanti njalo singabaduduza abafowethu labodadewethu nxa kulezinto ezibakhathazayo, sitshengise lokuthi siyabathanda. Eyinye indlela esingakwenza ngayo lokhu yikukhuluma labo nxa siseWolu yoMbuso futhi sibaduduze. Singenza njalo, ibandla lizakuba yindawo yokucatsha lapho abazakhuthazwa khona babone lokuthi bayathandwa. Lamuhla abantu abanengi balesihluku futhi lokhu kungenza abafowethu labodadewethu bazizwe bengathandwa futhi bakhathazeke. Yikho nxa abafowethu labodadewethu besiza emihlanganweni, sifuna ukubenza bazizwe bethandwa, bevikelekile futhi bavuseleleke.

13. Abadala bangabancedisa njani abazalwane ngezikhathi ezinzima? (Khangela lomfanekiso.)

¹³ Abadala bangaba yindawo yokucatsha bancedise abafowethu labodadewethu nxa bephakathi kobunzima. Nxa kungaba lezingozi kumbe umkhuhlane, abadala bayasukumela phezulu ukuze bahlele indlela abafowethu labodadewethu abangancediswa ngazo. Kanti njalo bayabakhuthaza besebenzisa imibhalo. Kuba lula ukuthi abafowethu labodadewethu bakhulume lomdala webandla nxa bekwazi ukuthi ulomusa, uyabalalela futhi uyazama ukuzwisisa indlela abazizwa ngayo. Nxa abadala bangenza njalo, abazalwane bayabona ukuthi bayathandwa njalo kuba lula ngabo ukuthi basebenzise amacebo aseBhayibhilini abayabe bewaphiwa ngabadala.—1 Thes. 2:​7, 8, 11.

14. Singenzani ukuze abanye basithembe?

 ¹⁴ Woba ngumuntu othenjwayo. Sifuna abanye bangathandabuzi ukuthi singabancedisa, ikakhulu ezikhathini ezinzima. (Zaga. 17:17) Manje singenzani ukuze basithembe? Singenza konke okusemandleni ethu ukuthi silingisele uJehova nsuku zonke, ngokwesibonelo ngokugcina izithembiso zethu langokubamba isikhathi. (Mat. 5:37) Kanti njalo singancedisa abanye ngokubanika izinto abazidingayo. Okunye esingakwenza yikuthi nxa siphiwe imisebenzi sibe leqiniso lokuthi siyenza silandela indlela okumele yenziwe ngayo.

15. Abadala abathenjwayo balinceda njani ibandla?

¹⁵ Abadala abathenjwayo bayalinceda kakhulu ibandla. Balinceda njani? Nxa abamemezeli bekwazi ukuthi bangathintana labadala loba nini, ngokwesibonelo umbonisi weqembu lenkonzo yasensimini, kuyabanceda ukuthi bangakhathazeki kakhulu nxa bangaba lohlupho. Nxa bangabakwazi ukuthi abadala bazimisele ukubancedisa, abasoze bathandabuze ukuthi bayabathanda. Abazalwane bazabathemba abadala nxa bebanika iseluleko esivela eBhayibhilini lasemabhukwini enceku ethembekileyo, hatshi esivela emibonweni yabo. Abafowethu  labodadewethu bayamthemba umdala ogcina imfihlo futhi oyenza lokho ayabe ethembise ukukwenza.

16. Ukwenza okulungileyo zikhathi zonke kuzasinceda njani thina kanye labanye?

¹⁶ Yenza okulungileyo zikhathi zonke. Nxa silalela uJehova kukho konke futhi sisenza izinqumo ezisekelwe eBhayibhilini, sizaba yisibonelo esihle kwabanye. Nxa singaqhubeka sitaditsha iLizwi likaNkulunkulu futhi siqinisa ukholo lwethu, sizakuba qotho kuye futhi sibambelele kokulungileyo. Asisoze sibe ngqondombili futhi asisoze sithatheke ngemfundiso zamanga lemicabango yomhlaba lo. (Efe. 4:14; Jak. 1:​6-8) Nxa sikholwa kuJehova futhi singathandabuzi ukuthi uzakwenza lokho asithembisa khona, sizaqhubeka sihlalisekile lanxa sisizwa indaba ezimbi. (Hubo. 112:​7, 8) Kanti njalo sizenelisa ukuncedisa abanye abaphakathi kobunzima.—1 Thes. 3:​2, 3.

17. Abadala bangenzani ukuze baqinise abanye?

¹⁷ Abadala kumele bazibambe kukho konke abakwenzayo, basebenzise kuhle ingqondo zabo, babe ngabahlelekileyo labazwisisayo. Amadoda la ancedisa abanye ukuthi bahlaliseke lokuthi babe lokholo oluqinileyo kuJehova futhi aqinisa ibandla ‘ngokunamathela elizwini elithembekileyo.’ (Tit. 1:9; 1 Thim. 3:​1-3) Abadala bayisibonelo esihle kubamemezeli futhi bayabelusa. Lokhu kuyabanceda ukuthi bangene imihlangano zikhathi zonke, batshumayele lokuthi bataditshe. Nxa abafowethu labodadewethu bangehlelwa zinhlupho ezibenza bakhathazeke, abadala bangenza konke okusemandleni abo bebakhuthaza ukuthi bacabange ngoJehova langezithembiso zakhe.

18. Kungani sifuna ukudumisa uJehova lokuqhubeka sisondela kuye? (Khangela lebhokisi elithi  “Ungasondela Njani KuJehova?”)

¹⁸ Njengoba sesifunde ngobuntu bukaJehova obuhle, sesingakhuluma amazwi kaDavida athi: “Kwangathi uJehova oliDwala lami angadunyiswa.” (Hubo. 144:1) UJehova kasoze asilahlise loba sekutheni. Lanxa singaze siguge asithandabuzi ukuthi uzaqhubeka esincedisa ukuthi sisondele kuye. Kwangathi ngamunye wethu angatsho aphinde ukuthi uJehova “uliDwala lami.”—Hubo. 92:​14, 15.