1. David okwa li a yelekanitha Jehova nashike, ngaashi tashi popiwa mEpisalomi 18:46?

 OTU li muuyuni mono omaupyakadhi haga holoka ombaadhilila, nohaga lundulula onkalamwenyo yetu, nenge ge yi dhigupaleke. Ihe otashi hekeleke sho tu shi kutya otatu vulu okukonga ekwatho kuJehova. Moshitopolwa sha tetekele, otwa li twa dhimbulukithwa kutya Jehova oKalunga omunamwenyo nokwa ilongekidha aluhe oku tu kwathela. Ekwatho ndyoka Jehova he tu pe oli li eshilipaleko kutya “oku na omwenyo!” (Lesha Episalomi 18:46.) Ihe konima sho David a popi oohapu ndhoka, okwa ti kutya Kalunga “omupopili gwandje [“emanya lyandje,” NW].” Mbela omolwashike David a faathanitha Jehova, Kalunga omunamwenyo, noshinima kaashi na omwenyo?

2. Oshike tatu ilongo koohapu dhaDavid sho a ti kutya Jehova “Emanya lyandje”?

² Moshitopolwa shika, otatu ka kundathana kutya omolwashike Jehova ta faathanithwa nemanya nosho wo kutya omupopyothano ngoka otagu tu longo shike kombinga ye. Otatu ka ilonga wo nkene tatu vulu okuulika kutya otwe mu tala ko e li Emanya lyetu. Hugunina, otatu ka kundathana omikalo moka tatu vulu okuholela omaukwatya ge ga fa emanya.

OMOLWASHIKE TAKU TI JEHOVA EMANYA?

3. Olundji Ombiimbeli ohayi longitha oshitya “emanya” okuulika kushike? (Tala ethano lyokombanda.)

³ Ombiimbeli oya faathanitha Jehova ‘nemanya,’ opo yi tu kwathele tu ilonge kombinga yomaukwatya ge. Olundji, mOmbiimbeli, uuna aapiya yaKalunga taye mu tanga omolwomaukwatya ge omakumithi, oye mu popi e li emanya. Jehova okwa popiwa oshikando shotango e li “emanya” muDeuteronomium 32:4. Sho Hanna a li ta galikana okwa ti: ‘Kaku na emanya lya fa Kalunga ketu.’ (1 Sam. 2:2, yelekanitha OB-1954.) Habakuk okwa popi Jehova e li “emanya.” (Hab. 1:12, OB-1954) Omunyoli gwEpisalomi 73 okwa ithana Kalunga e li “emanya lyomwenyo” gwe. (Eps. 73:26, OB-1954) Nokuli naJehova  ye mwene okwa li i ifaathanitha nemanya. (Jes. 44:8, yelekanitha OB-1954.) Natu ka kundathaneni omaukwatya gatatu, ngoka ga ningitha Jehova a kale a fa emanya, nokwiilonga nkene tatu vulu oku mu ninga “emanya lyetu.” — Deut. 32:31.

4. Ongiini Jehova e li omugameni? (Episalomi 94:22)

⁴ Jehova oye egameno lyetu. Ngaashi ekololo lyemanya enene tali vulu okugamena omuntu uuna ku na oshikungulu oshinene, Jehova naye ohe tu gamene uuna tu li moonkalo oondhigu. (Lesha Episalomi 94:22.) Ohe tu kwathele tu kaleke po ekwatathano lyetu naye, noku tu shilipaleka kutya kapu na sha tashi vulu oku tu etela uupyakadhi tawu kalelele. Okwa uvaneka nokuli kutya monakwiiwa ota ka kutha po iinima ayihe, mbyoka hayi yono po ombili yetu nohayi tu etele oshiponga. — Hes. 34:25, 26.

5. Oshike tatu vulu okuninga, opo Jehova a kale Omugameni gwetu, a fa emanya?

⁵ Omukalo gumwe moka tatu vulu okuninga Jehova emanya lyetu lyegameno omokugalikana kuye. Uuna twa galikana, Jehova ohe tu pe ‘ombili ye,’ ndjoka hayi gamene omitima nomadhiladhilo getu. (Fil. 4:6, 7) Natu ka taleni koshimoniwa shomumwatate Artem, ngoka a li a tulwa mondholongo omolweitaalo lye. Okwa li a pulwapulwa lwiikando komukonakoni gwiimbuluma omukwanyanya, ngoka a li a ungaunga naye nayi noku mu sitha ohoni. Artem okwa ti: “Osha uvitha ndje nayi noonkondo sho omukonakoni gwiimbuluma a ungaunga nayi nangame. . . . Onda li aluhe handi galikana kuJehova. Onda li handi mu pula a pe ndje ombili yokomutima nosho wo uunongo. Nonando omukonakoni gwiimbuluma okwa li ta hepeke ndje, onda tsikile okukala nda ngungumana. . . . Kekwatho lyaJehova, onda fa nda li nda thikama konima yekuma.”

6. Omolwashike tatu vulu okukala aluhe twi inekela muJehova? (Jesaja 26:3, 4)

⁶ Jehova oku shi okwiinekelwa. Ngaashi owala emanya, ndyoka ihali inyenge, Jehova naye okwiilongekidha aluhe oku tu kwathela. Otatu vulu okukala twe mu inekela, molwaashoka “ote ke tu gamena aluhe.” (Lesha Jesaja 26:3, 4.) Jehova ota kala aluhe e na omwenyo a gwanithe po omauvaneko ge, a pulakene komagalikano getu noku tu pa eyambidhidho ndyoka twa pumbwa. Otatu vulu wo okukala twa inekela muye, molwaashoka omudhiginini kwaamboka haye mu longele. (2 Sam. 22:26) Jehova ke na siku a dhimbwe iilonga yetu, note ke tu pa aluhe ondjambi. — Heb. 6:10; 11:6.

7. Uuwanawa wuni hatu mono, uuna twa inekela muJehova? (Tala wo ethano.)

⁷ Ohatu ningi Jehova emanya lyetu, uuna twa inekela muye thiluthilu. Otu na einekelo lela kutya ngele otwa kala hatu vulika kuye, nokuli nomomathimbo omadhigu, otashi ke tu etela uuwanawa. (Jes. 48:17, 18) Uuna tu wete nkene Jehova te tu kwathele, einekelo lyetu muye nalyo otali ka kola. Otatu ka kala natango twi ilongekidhila okupita momashongo, ngoka Jehova oye owala ta vulu oku tu pititha mo mugo. Olundji ngele otwi iyadha monkalo moka kaapu na ngoka tatu vulu okuya kuye e tu kwathele, ohatu shi imonene tse yene kutya Jehova oku shi okwiinekelwa. Omumwatate Vladimir okwa ti: “Onda kala ndi na ekwatathano ewanawa lela naKalunga, pethimbo ndyoka nda kala mondholongo, omolwokwaakutha ombinga mopolotika. Onda ilongo okukala nda inekela noonkondo muJehova, molwaashoka onda li ongame awike nokanda li tandi vulu okuninga po sha nonkalo moka nda iyadha.

8. (a) Omolwashike tatu vulu okutya Jehova iha tengauka? (b) Uuwanawa wuni hatu mono mokukala twa tala ko Kalunga e li Emanya lyetu? (Episalomi 62:6, 7)

 ⁸ Jehova iha tengauka. Okwa fa emanya enenenene ndyoka ihali tenguka nolya kolelela. Uukwatya we nelalakano lye kayi na siku yi lunduluke. (Mal. 3:6) Jehova ina lundulula elalakano lye, sho a tukulilwa oshipotha muEden. Ngaashi omuyapostoli Paulus a nyola, Jehova “ita vulu okwiifundjaleka.” (2 Tim. 2:13) Onkee ano Jehova ke na siku a ka lundulule omaukwatya ge, elalakano lye nenge omithikampango dhe kutya nduno oshike shi ningwe nenge molwaashoka yalwe ya ninga sha. Otu na okukala twa tala kuye e ke tu hupithe noku tu kwathela tu idhidhimikile omathimbo omadhigu, oshoka otwa inekela kutya ye emanya, ndyoka lya kolelela. — Lesha Episalomi 62:6, 7.

9. Oshike wa ilonga moshimoniwa shaTatyana?

⁹ Otatu vulu okuninga Jehova Emanya lyetu mokugandja eitulomo komaukwatya ge nokelalakano lye li na ko nasha nevi nosho wo naantu. Okuninga ngawo, otashi ke tu kwathela tu kale twa ngungumana sho tatu idhidhimikile omamakelo. (Eps. 16:8) Shoka osho sha li sha ningilwa omumwameme Tatyana sho a li a tulwa mondholongo yomegumbo omolweitaalo lye. Tatyana okwa ti: “Onda li ndi uvite ndi li ongame awike. Petameko, onkalo oya li ondhigu noonkondo. Olundji onda li handi kala nda gwililwa po.” Ihe sho a tedhatedha kombinga yaJehova nosho wo elalakano lye, oshe mu kwathele a mone kutya osha simana shi thike peni okwiidhidhimikila emakelo ndyoka. Oshe mu kwathele wo a kale a ngungumana noku kale omudhiginini. Okwa ti: “Okukala ndi uvite ko kutya omolwashike oshinima shoka sha ningilwa ndje okwa kwathele ndje ndi dhimbulukwe kutya omolweitaalo lyandje muJehova sho ndi iyadha moonkalo ndhoka. Shoka osha kwathela ndje ndi ethe po okukala tandi gandja eitulomo kungaye mwene.”

10. Jehova ota vulu ngiini okukala Emanya lyetu ngashingeyi?

¹⁰ Masiku, otatu ka iyadha moonkalo oondhigu, ndhoka tadhi pula tu kale twa inekela muJehova shi vulithe nale. Ngashingeyi olyo ethimbo lyokukoleka einekelo lyetu muJehova kutya ote ke tu kwathela tu kale aadhiginini kuye kutya nduno otwa iyadha monkalo ya tya ngiini. Shono otatu vulu oku shi ninga ngiini? Omokukala hatu lesha omahokololo gOmbiimbeli niimoniwa yOonzapo dhaJehova dhopethimbo lyetu. Sho to lesha, ndhindhilika nkene Jehova a ulika omaukwatya ga fa emanya, sho ta yambidhidha aapiya ye. Dhiladhila wo muule kombinga yomahokololo ngoka. Okuninga ngawo otaku vulu oku tu kwathela tu ninge Jehova Emanya lyetu.

HOLELA OMAUKWATYA GAJEHOVA GA FA EMANYA

11. Omolwashike twa hala okuholela omaukwatya gaJehova ngoka ga fa emanya? (Tala wo oshimpungu “ Elalakano ndyoka aamwatate aagundjuka taya vulu okwiitulila po.”)

¹¹ Otwa mona nkene Jehova a ulike omaukwatya ngoka ge mu ningitha a kale a fa emanya lyetu. Ngashingeyi natu ka taleni nkene tatu vulu okuholela omaukwatya ge. Ngele otwa ningi ngaashi tatu vulu tu holele omaukwatya gaJehova, otatu ka vula okutsa omukumo egongalo. Pashiholelwa, Jesus okwa li a luku Simon edhina Kefas (sha hala kutya “Petrus”), ndyoka tali ti, “Oshipambu shEmanya.” (Joh. 1:42) Shoka otashi ulike kutya okwa  li ta kala onzo yehekeleko kegongalo noku li koleka. Aakuluntugongalo okwa tiwa kutya oya “fa omuzile gwetayimanya enenenene.” Shoka otashi thaneke nkene haya gamene iilyo yegongalo moka ye li. (Jes. 32:2) Ihe uushili owo kutya egongalo ohali mono uuwanawa, uuna aamwatate naamwameme ayehe taya holele omaukwatya gaJehova ga fa emanya. — Ef. 5:1.

12. Yelitha kutya ongiini tatu vulu okukala egameno kuyalwe.

¹² Kala omugameni. Omathimbo gamwe, otashi vulika tu gamene aamwatate kiiponga yopaunshitwe, nenge tu ya gamene uuna pu na omakuyunguto gopapolotika nenge iita. Sho oonkalo ‘dhomomasiku gahugunina’ tadhi ende tadhi nayipala, otatu ka kala tu na oompito odhindji dhokukwathelathana. (2 Tim. 3:1, OB-1954) Otatu ka hekeleka wo aamwatate naamwameme noku ya ulukila kutya otu ya hole. Omukalo gumwe moka tatu vulu oku shi ninga omoku ya ningitha ya kale ye uvite kutya oya taambiwa ko uuna ye ya pOshinyanga shUukwaniilwa, shoka tashi ka ningitha kehe gumwe megongalo a kale e uvite uugumbo. Aantu oyendji kunena ohaya ungaunga nayalwe nonyanya. Onkee ano uuna aamwatate naamwameme ye ya kokugongala, otwa hala okuninga ngaashi tatu vulu tu ya kwathele ya kale ye uvite ye holike, ya pepelelwa noya gamenwa.

13. Ongiini aakuluntugongalo taya vulu okukala egameno kuyalwe? (Tala wo ethano.)

¹³ Aakuluntugongalo otaya vulu okukala egameno kwaamboka tayi idhidhimikile oonkalo oondhigu nosho wo iikungulu yopathaneko megongalo. Aakuluntugongalo ohaya ningi omalongekidho nziya ya gandje omakwatho taga longo, uuna pwa holoka iiponga nosho wo uuna pwa holoka ompumbwe yomakwatho gopaunamiti gomeendelelo. Ohaya gandja wo ekwatho lyopambepo. Ohashi kala oshipu kaamwatate naamwameme okupopya nomukuluntugongalo, ngoka omunahenda, omunalukeno noku na ehalo lyokupulakena kuyo. Omaukwatya ga tya ngawo ohaga ningitha yamwe ya kale ye uvite ye niwe ko nasha nayo, naashono ohashi shi ningitha oshipu ya tule miilonga  omayele gOmbiimbeli ngoka tashi vulika ya pewe komukuluntugongalo. — 1 Tes. 2:7, 8, 11.

14. Ongiini tatu vulu okuulika kutya tse aainekelwa?

¹⁴ Kala omwiinekelwa. Otwa hala yamwe ya kale ye tu inekela, unene tuu pomathimbo omadhigu. (Omayel. 17:17) Oshike to vulu okuninga, opo yalwe ya kale ye ku inekela? Otatu vulu oku shi ninga omukalondjigilile okukala hatu ulike omaukwatya gopakalunga, ngaashi okugwanitha po omauvaneko getu nokukala hatu ningi iinima pethimbo. (Mat. 5:37) Uuna gumwe a pumbwa ekwatho otatu vulu wo oku mu kwathela. Shimwe ishewe, ohatu shilipaleke kutya ohatu gwanitha po aluhe iinakugwanithwa yetu megongalo shi ikolelela komalombwelo ngoka hatu pewa.

15. Uuwanawa wuni egongalo hali mono uuna aakuluntugongalo ye shi okwiinekelwa?

¹⁵ Uuna megongalo mu na aakuluntugongalo ye shi okwiinekelwa, ohashi etele egongalo uuwanawa. Ngiini mbela? Uuna aamwatate naamwameme ye shi kutya otaya vulu okupula ekwatho kaakuluntugongalo uuna ye li pumbwa, ngaashi pashiholelwa komutonateli gwongundu yawo yiilonga yomomapya, ohashi ya kwathele kaaya kale niimpwiyu oyindji. Aauvithi ohaya kala wo ye uvite ye holike, uuna ye shi kutya aakuluntugongalo oya  halelela oku ya kwathela. Aamwatate naamwameme otaya ka kala wo ya inekela aakuluntugongalo, uuna haye ya pe omayele ga ikolelela kOmbiimbeli nosho wo kiileshomwa, mbyoka ya nyanyangidhwa komupiya omudhiginini, pehala lyoku ya lombwela omadhiladhilo gawo yene. Shimwe ishewe, ohaya kala wo yi inekela aakuluntugongalo, uuna ye shi kutya itaya ka lombwela yalwe iiholekwa yawo nonokutya ohaya gwanitha po omauvaneko gawo.

16. Uuwanawa wuni hatu mono nosho wo yalwe, uuna tu shi okwiinekelwa?

¹⁶ Dhiginina shoka shi li mondjila. Otatu vulu okutulila po yalwe oshiholelwa oshiwanawa, ngele otwa kala twa dhiginina okulonga shoka shi li mondjila nokuninga omatokolo ngoka ga kankamena komakotampango gOmbiimbeli. Ngele otwa koleke eitaalo lyetu nokwiindjipaleka ontseyo yetu otashi ke tu kwathela tu kale aadhiginini moshili. Itatu ka kala hatu li oompanda mbali, aatengauki nenge hatu tengatengithwa komalongo giifundja nokomadhiladhilo guuyuni. (Ef. 4:14; Jak. 1:6-8) Eitaalo lyetu muJehova nomomauvaneko ge ohali tu kwathele tu kale twa ngungumana, uuna twa uvu oonkundana oombwinayi. (Eps. 112:7, 8) Otatu ka vula wo okukwathela mboka ye li momashongo. — 1 Tes. 3:2, 3.

17. Oshike hashi kwathele aakuluntugongalo ya kale enwethomo ewanawa kuyalwe?

¹⁷ Aakuluntugongalo oye na okukala nomikalo omiwanawa, haya dhiladhila pandunge, ye na elandulathano nosho wo ondjele. Oye na okukala ye li enwethomo ewanawa kuyalwe nokutsa omukumo egongalo ‘mokukala melongo lyashili.’ (Tit. 1:9; 1 Tim. 3:1-3) Okupitila molwoshiholelwa shawo nosho wo momatalelopo guusita, aakuluntugongalo ohaya kwathele aauvithi ya kale haya kala aluhe pokugongala, miilonga yokuuvitha nokukala haya ningi ekonakono lyopaumwene. Uuna aamwatate naamwameme ya gwililwa po komaupyakadhi, aakuluntugongalo ohaye ya dhimbulukitha ya kale ya inekele muJehova nokugandja eitulomo komauvaneko ge.

18. Omolwashike twa hala okutanga Jehova nokuhedha popepyeelela naye? (Tala wo oshimpungu “ Nkene tu na okuhedha popepyeelela naJehova.”)

¹⁸ Konima sho twa konakona omaukwatya gaJehova omahokithi, otatu vulu okupopya ngaashi omukwaniilwa David, ngoka a ti: “Omuwa, emanya lyandje, na hambelelwe.” (Eps. 144:1, OB-1954) Jehova oku li Kalunga, ngoka e shi okwiinekelwa aluhe. Mokukalamwenyo kwetu akuhe, nokuli nuuna twa kulupa, otu na etompelo lyokupopya tatu ti: ‘Ye emanya lyandje,’ tu na einekelo kutya ote ke tu kwathela tu kale aluhe popepi naye. — Eps. 92:14, 15.