1. Mwawiiwanana ni Salmu 18:46 mwene Tavite amulikanyinhe Yehova ni eheeni?

 NNAKHALA mu elapo yeeyo makacamiho anaweryaaya otoroka okumi ahu moohiwehereryeya. Nto hiyaano ninnathamalela vancipale wanthowa na okhalano nikhaviheryo na Yehova! Mu yoohuserya evirale, nohuupuxeryiwa wi Yehova, Muluku mukumi nave wi owo ilukuluku soothene ori ooreheryeya onikhaviherya. Vaava owo oneereiyeno yeela, ninniiwexexa wi “Yehova mukumi.” (Mwaalakhanye Salmu 18:46.) Nyenya mwene Tavite amanle orepa yeela, owo aahimwiichana Yehova wi “mwala aka.” Vano ntakhara heeni amanle oloca wi Yehova mukumi, aamulikanyiha ni—mwala, echu yeeyo ehirino okumi?

2. Tiheeni nnahaalaahu ohuserya mmwaha yoola?

² Mmwaha yoola, nnahaala woona ntakhara heeni Yehova oniichaniweiye Mwala ni yeeyo olikanyiha yoola onanihusihaaya vooloca sa yoowo. Nnahaala tho woona ntakhara heeni nnanwerya omuroromela Yehova ni omwiichana Mwala ahu. Wookuchulani nnahaala woona ti mwawiihai nneeraahu ntakiherye mikhalelo sa Yehova.

NTAKHARA HEENI YEHOVA ONNALIKANYIHIWA NI MWALA?

3. Mmukhalelo taani ikwaha sincipale Piipiliya onaphariheleiye masu awi “mwala”? (Moone ekaapa.)

³ Piipiliya onnamulikanyiha Yehova ni mwala wi anikhaviherye osuwela phaama mikhalelo sawe. Ikwaha sincipale vaavaa alapeli a Yehova yaamvahaaya ncicimiho wa nthowa na mikhalelo sawe sootikhiniha, awo yaanamuthariha Yehova ntoko mwala. Ekwaha yoopacerya Yehova oniichaniweiye “Mwala” enaphwanyeya mu Malamulo 32:4. Mu nivekelo, Ana aahiloca wi “Hiwaavo mwaako mukina woochawelavo si Muluku ahu.” (1 Sam. 2:2) Hapakuki aamwiichana Yehova ‘Mwala awe.’ (Hap. 1:12, TNM) Mulipa oomurepa Salmu aahimwiichana Yehova “mwala wa murima aka.” (Sal. 73:26) Nave ophiyerya tho wi Yehova onniiloca mwaneene wi mwala. (Isa. 44:8) Vano nnahaala woona mikhalelo miraru sa Yehova seiho inooniherya wi owo ori ntoko  mwala nave nnahaala ohuserya ti mwawiihai nneeraahu nimooneke Yehova ntoko Mwala ahu.—Malam. 32:31.

4. Ti mwawiihai Yehova oryeiye nipuro noochawelavo? (Salmu 94:22)

⁴ Yehova nipuro nahu noochawelavo. Variyari va echeku yoowali, hiiyaano naanwerya ophwanya nipuro nawiipithavo mu nikhuku. Mmukhalelo mmohamoha, vaavaa nnahoolelaahu makacamiho ni sawuukhula mookumini, Yehova onanwerya onikhapelela. (Mwaalakhanye Salmu 94:22.) Yehova onahaala onikhaviherya okhapelela onthamwene ahu ni yoowo. Owo onnaniroromeliha wi hinaavo nikacamiho vyakala nnahoolelaahu hiihaano, nnahaala onihooxa okhala wookhala. Nave Yehova onnaroromeliha wi onahaala weera sincipale opwaha vaavaa. Omwaahiyu, owo onahaala omaliha echu vyakala yeeyo enantannyerya wuukhuwa ni ohooxeya.—Ese. 34:25, 26.

5. Ti mwawiihai Yehova oneereiye akhale nipuro noochawelavo nahu?

⁵ Mukhalelo mmoha wa ophwanya Nchawelo wa Yehova ori moorweela wa ovekela. Vaavaa nnavekelaahu, Yehova onnanivaha “murecele wa Muluku” yoowo onakhapelela murima ahu ni muupuwelo ahu. (Afi. 4:6, 7) Moone yeeyo yeeren’ye ni Artem, munna yoowo aawaleliwe wanthowa na nroromelo nawe. Mulipa ootholathola miyaha mmoha aampakela makoho mwawuuluulela, aamukhaliha moonanara nave aamoopopiha. Artem ooloca: “Ilukuluku soothene vaavaa mulipa ootholathola miyaha aakiichaneiye, eyo yaanatepa okinyeenyeiha. . . . Ilukuluku soothene miyaano kaanavekela wa Yehova kivekaka murecele wa mmurimani ni miruku. Moohipwacha wiikariwa yoola, miyaano kaatitela okhala oomaala. . . . Nnikhaviheryo na Yehova, waakhala ntoko wi kaakhapeleliwe ni ixiri.”

6. Ntakhara heeni ilukuluku soothene nnaphwanela omuroromela Yehova? (Yesaya 26:3, 4)

⁶ Yehova toororomeleya. Hiiha ntoko mwaako naari mwala mutokweene ohinaweryaaya ovinyavo vanipuroni vaya, Yehova harwa atorokeya nave ilukuluku soothene ari ooreheryeya onikhaviherya. Nyenya nnaphwanela omuroromelaka yoowo nthowa nawi owo “Mwala wawiikhalelaru.” (Mwaalakhanye Yesaya 26:3, 4.) Owo ilukuluku soothene mukumi nave ori ooreheryeya waakhwaniha soororomeliha sawe, owiriyana mavekelo ahu ni onikhaviherya wa yeeyo nnachunaahu. Hiyaano tho nnanwerya omuroromela Yehova nthowa nawi owo toororomeleya wa yaale anamurumeela. (2 Sam. 22:26) Owo harwa acuwala wa yeeyo nimpakenlaahu nave owo onahaala onichuwela.—Ahe. 6:10; 11:6.

7. Tiheeni enahaala weereya wakhala wi ninnamuroromela Yehova? (Moone tho eruku.)

⁷ Hiyaano ninnampaka Yehova ntoko Mwala ahu vaavaa nnamuroromelaahu owo mmoomalela. Ninnalekecheya moomalela wi vaavaa nnamwiiwelelaahu owo, naamwi vaavaa nnahoolelaahu makacamiho, eyo ennakhala yaphaama wa hiyaano. (Yes. 48:17, 18) Wiiliwiili vaavaa hiyaano nnoonaahu mukhalelo Yehova onikhavihenryeiye, ororomela wahu wa yoowo onnaaceereryeya. Nave ninnakhala oolekecheyaxa wi Yehova ti yooworu pahi onahaala onikhaviherya ovilela yaweeha vyakala, moohipwacha wunnuwa waya. Ikwaha sincipale, vaavaa nnahoolelaahu mikhalelo inooneya ntoko wi hinikhumelela phaama, hiyaano ninniiwexexa ophiyerya mweero taani nnaphwanelaahu omuroromela Yehova. Ti yeeyo munna Vladimir oonneiye, owo  ooloca: “Elukuluku yeeyo kimalinhaaka kiri mu nipuro na oophariwa waari vaavaa onthamwene aka waaryaaya woolipaxa. Miyaano kaahihuserya omuroromelaxa Yehova nthowa nawi kaari mukhataaka, nave nkaawaarino echu ya weera.”

8. (1) Ntakhara heeni nnanwerya oloca wi Yehova hanatorokeya? (2) Ntakhara heeni ti waphaama ompaka Yehova ntoko Mwala ahu? (Salmu 62:6, 7)

⁸ Yehova hanatorokeya. Hiiha ntoko mwala mutoweene, omuchu ni yookhwela ya Yehova hasirwa sitorokeya. Owo harwa atoroka omuchu awe ni yookhwela awe. (Mal. 3:6) Vaavaa Atamu ni Eva yammwarenlaaya Yehova, owo haatoronke yookhwela awe ntakhara achu. Murummwa Paulo olonce wi Yehova “hawerya wiikhooca mwaneene.” (2 Tim. 2:13) Eyo enataphulela wi moohipwacha yeeyo eni yeereye naari yeeyo akina anapakaaya, Yehova harwa atoroka mukhalelo awe waweerano ichu, soolakelela sawe, naari malamulo awe aweela. Woona wi Yehova harwa atorokeya, noosuwela wi owo onahaala onikhaviherya mu ilukuluku soovila nave onamwaakhwaniherya soororomeliha sawe sa muhoolo.—Mwaalakhanye Salmu 62:6, 7.

9. Tiheeni muhusenryaanyu ni yaweereya ya Tatyana?

⁹ Vaavaa nnuupuwelelaahu mikhalelo sa Yehova ni yookhwela awe ntakhara achu ni elapo ya vathi. Eyo enanwerya onikhaviherya otitelela okhala oomaaleleya ni otitelela okhapelela ororomeleya wahu wa owo variyari va saweeha. (Sal. 16:8) Ti yeeyo yeeren’ye ni murokora awiichaniwa Tatyana, yoowo aaphariwe awaleliwa nthowa na nroromelo nawe. Owo ooloca: “Kaari pahiru mukhataaka. Woopaceryani nlo naari nikacamiho. Kaahikhala ooceecheyaxa.” Nyenya voocharela owo aahipacerya wuupuwelela vooloca sa Yehova ni yookhwela awe ntakhara achu, nave aahiiwexexa ntakhara heeni waaryaaya woochuneya wi owo avilele yaweeha yeele owo aahooleleiye, eyo yaahimukhaviherya okhala oomaaleleya nave eyo tho yaahivaha ikuru wi avilele. Owo ooloca: “Wiiwexexa mukhalelo yoole weereya ni miyaano waahikikhaviherya wuupuwela wi waari ntakhara na Yehova kaaryaaka mmukhalelo yoole. Eyo yaahikikhaviherya omaala wuupuwela sa miyo mukhataaka.”

10. Opacerya hiihaano nni nimpake hai Yehova ntoko Mwala ahu?

¹⁰ Moohilekela, hiyaano nnahaala ohoolela elukuluku yoovilaxa nave nnamuchuna omuroromela Yehova vancipale opwaha khalai. Ti nthowa nene oryaaya woochuneya opacerya hiihano olipiha ororomela wahu ni nroromelo nahu wa Yehova wi owo onahaala onivaha nikhaviheryo noothene nnachunaahu wi ntitelele okhala oororomeleya. Nni neereno hai yeela? Moorweela wa waalakhanya saweereya sa Mpiipiliyani sa alapeli a Yehova akhalai nave tho saweereya sahiihaanoru sa anna ni arokora yaawo yaakhaviheryiwe ovilela moorweela ni Yehova. Vaavaa munaalakhanyaanyu saweereya seiya, muupuwele mukhalelo Yehova aakhavihenryeiye alapeli awe. Mwiivahe elukuluku wi muupuwelele saweereya seiya. Wakhala wi nyuwaano moheerano yeeyo, munahaala woona mookwakwaleya wi Yehova Mwala anyu.

MUTAKIHERYE MIKHALELO SA YEHOVA

11. Ntakhara heeni nnachunaahu otakiherya mikhalelo sa Yehova? (Moone tho ekaaxa “ Soolakelela sa Anna Ari Amiravo.”)

¹¹ Ophiyerya vaavaa, hiyaano nohoona mikhalelo mikina sa Yehova seiyo inanikhaviherya woona ntakhara heeni Yehova onnalikanyihiwa ni mwala.  Vano nnahaala woona ti mwawiihai nnahaalaahu otakiherya mikhalelo seiya. Wakhala wi ninnapaka owetha wahu wi nimutakiherye Yehova, hiyaano nnanwerya waalipiha annihu. Ntoko yootakiherya, Yesu aahimvaha Simoni nsina nawi Kefa (nsina nenlo nnataphulela “Petru”), nsina nenla tho nnataphulela Nipalamasu na Mwala. (Yoh. 1:42) Mmukhalelo yoola, Yesu aahiiwexexa wi Petru aahaala ovaha nihakararyo wa anna mmulokoni nave aahaala olipiha nroromelo naya. Atokweene a mmulokoni annatharihiwa ntoko “muuruxi wa nluku ntokweene mutakhwani.” Eyo enataphulela wi atokweene annaakhapelela anna a mmulokoni. (Yes. 32:2) Ti yawooneya wi oothene ahu,—ohiya pahiru atokweene—nnanwerya otakiherya mikhalelo sa Yehova ni waalipiha akina mmulokoni.—Aef. 5:1.

12. Ti mwawiihai nnahaalaahu okhala woochawelavo wa annihu?

¹² Mukhale voochawelavo wa anna. Vaavaa annihu anahoolelaaya epahu ya maphacuwelo, akhweya onamuchuneya wi naavahe nipuro wi awo echawelevo, mmukhalelo wawooneya. Mikhalelo sa “mmahiku ookuchula” inahaala otepaka onanara, nave moohikhwa minikwa, hiyaano nnaphwanela waakhaviherya. (2 Tim. 3:1) Nyenya ohiya waavaha nikhaviheryo noomwiilini, nnaphwanela waahava annihu nihakararyo ni osivela yoowo awo anachunaaya. Mukhalelo mmoha wa weerano yeeyo ori moorweela wa ochekula ni yaawo mmithukumano mu Empa ya Omwene ni waavaha ohakararya yoowo anachunaaya. Hiyaano nnachuna wi muloko okhale nipuro na murecele, mummo annihu anaphwanyaayamo nlipiho ni osivela. Hiyaano nnakhala mu elapo yoovila okhala ni yoonyenyeiha. Wa nthowa na yeeyo, vaavaa annihu anayaaya mmithukumano, nnaphwanela opaka soothene nnaweryaahu wi awo yiisooneke okhala oosiveliwa, awiichuuwihiwa ni ookhapeleleya.

13. Ti mwawiihai atokweene anahaalaaya okhala nipuro noochawelavo wa akina? (Moone tho eruku.)

¹³ Atokweene ananwerya okhala nchawelo wa annihu yaawo anahoolela makacamiho oohiyanahiyana. Variyari va epahu ya maphacuwelo naari saweereya sootutuxa sa mookumini, atokweene  mwawaakuveya annarehererya nikhaviheryo ntakhara anna aya. Awo tho annampharihela Piipiliya wi evahe ohoolela ni nlipiho. Anna anamukhala ootaphuwaxa oveka nikhaviheryo wa atokweene yaawo asuweliwe wi tooreera murima, awiiwexexa ni yaawo aniilipixerya wi ewiriyane mukhalelo anna aniisoonaaya. Mutokweene onooniherya mikhalelo seiya onahaala weeriha wi anna yiisooneke wi annasiveliwa. Mmukhalelo yoola, onamukhala wookhweya wa anna ochariha ohoolela onathipeleya Mpiipiliyani yoowo atokweene anavahaaya.—1 Ate. 2:7, 8, 11.

14. Ti mwawiihai nnahaalaahu wooniherya wi na achu oororomeleya?

¹⁴ Mukhale oororomeleya. Hiyaano nnachuna wi akina eweryeke woona wi ananwerya okhala ootaphuwa oniveka nikhaviheryo vaavaa anahoolelaaya nikacamiho. (Mas. 17:17) Nyenya tiheeni nnaphwanelaahu opaka wi anna esuwele wi naachu oororomeleya? Hiyaano nnaphwanela opaka owetha wahu woothene wi nimutakiherye Yehova nihiku ti nihiku. Ntoko yootakiherya, moorweela wa waakhwaniherya yeeyo niroromelinhaahu ni moorweela wa okhala awaakuveya. (Mat. 5:37) Nave tho nnaphwanela opaka owetha wahu wi nimukhaviherye muchu yoowo onachuna nikhaviheryo. Ohiya yeeyoru, nnachuna waakhwaniha mirici sahu mmulokoni mwawiiwanana ni ohoolela yoowo nnaakhelaahu.

15. Ti mwawiihai atokweene yaawo eri oororomeleya anaphurihaaya muloko?

¹⁵ Atokweene yaawo eri oororomeleya yamahala ntakhara muloko. Mmukhalelo taani? Vaavaa anna anasuwelaaya wi ananwerya owiichana atokweene vaavaa anahaalaaya ochuna nikhaviheryo, awo annakhala oomaaleleyaxa. Anna tho anniisoona  okhala oosiveliwa vaavaa anasuwelaaya wi atokweene ari ooreheryeya ovaha nikhaviheryo nenlo anachunaaya. Nave anna anahaala otepaka waaroromela atokweene vaavaa awo anoonaaya wi atokweene anampharihela Piipiliya ni soolaleeryiwa sahu ohiya muupuwelo aya, wi evahe ekano. Ohiya yeeyoru tho, anna ni arokora annaaroromela atokweene yaawo ahinaaleela akina miyaha soovitheya sa muchu nave yaawo anaakhwaniherya yeele anaroromelihaaya.

16. Ntakhara heeni oryaaya woochuneya ilukuluku soothene ochariha ohoolela wa Yehova?

¹⁶ Ilukuluku soothene muchariheke ohoolela wa Yehova. Wakhala wi hiyaano ninnamwiiwelela Yehova mu ichu soothene nave nnapaka soolakelela inathipeleya Mpiipiliyani, nnahaala okhala yootakiherya yaphaama wi akina tho echariheke. Vaavaa nnamuhuseryaahu Piipiliya ni olipiha nroromelo nahu wa Yehova, ninnakhala oororomeleya wa yoowo ni wa malamulo awe aweela. Hiyaano hanivoloweliwa ni mahusiheryo awootha naari ni mukhalelo wa wuupuwela yoowo ori woohiyana ni yeeyo Yehova onahusiheiye Mpiipiliyani. (Aef. 4:14; Tiy 1:6-8) Vaavaa nnaakhelaahu muchaka woonanara, hiyaano ninnakhala oomaaleleya nthowa nawi nookhalano nroromelo ni ororomela soororomeliha sa Yehova. (Sal. 112:7, 8) Nave tho nnanwerya waakhaviherya yaale anahoolela saweeha.—1 Ate. 3:2, 3.

17. Ti mwawiihai atokweene anahaalaya waakhaviherya anna otitelela okhala oohicikinyeya munroromelo?

¹⁷ Atokweene anaphwanela okhala oophimelela mu sookhovelela, amiruku, ooreheryeya ni ooleva. Atokweene tho annaakhaviherya akina okhala oomaaleleya ni okhalano nroromelo noolipa wa Yehova, nave awo tho annalipiha muloko moorweela wa okhala “awaakeelela masu oororomeleya.” (Titu 1:9; 1 Tim. 3:1-3) Moorweela wa yootakiherya aya ni moorweela wa okukhula, atokweene annaakhaviherya alaleeryi a mmulokoni ophwanyeyaka mmithukumano, mmuteko woolaleerya ni opaka yoohuserya ya muchu mukhateiye. Vaavaa anna anahoolelaaya makacamiho ni anakhalaaya awuukhuwa, atokweene annawuupuxerya awo ochuneya waya omuroromela Yehova ni otitelela otikitherya muupuwelo mu soororomeliha sawe.

18. Ntakhara heeni hiyaano nnachunaahu omucicimiha Yehova ni wi ilukuluku soothene ntitelele omwaacamelaka yoowo? (Moone tho ekaaxa “ Mukhalelo Mmoha wa Omwaacamela Yehova.”)

¹⁸ Nimanlaahu ohuserya mikhalelo mikina sa Yehova, nnanwerya oloca hiiha ntoko Mwene Tavite orempeiye: “Acicimihiwe Yehova, Mwala aka.” (Sal. 144:1) Hiyaano nnanwerya omuroromela Yehova mu okumi ahu woothene. Naamwi nuuluvanleene, hiyaano ninnaroromela wi Yehova onahaala otitelela onikhaviheryaka wi ntitelele omwaacamelaka yoowo, nave hiyaano nnanwerya oloca wi Yehova: “Mwala aka”.—Sal. 92:14, 15.