1. ¿Kenijki David okitokayoti Jehová ipan Salmo 18:46 itech Traducción del Nuevo Mundo?

 IPAN yejuin tonaltin, tikixnamikij miyek tlen ouijtika niman noijki tikinpiyaj tlaueltin tlen kemantika kipatla tonemilis. San ika, ¡melak tiyolpakij pampa ueli tikijliaj Jehová matechpaleui! Ipan tlamachtijli tlen youajpanok, otikitakej ika Jehová yejua se toTajtsin akin melauak nemi niman nochipa touan nemi para techpaleuis. Niman ijkuak tikitaj kenijki techpaleuiya, más tikneltokaj ika “Jehová melauak nemi”, ijkon ken okijto David ipan Salmo 18:46 itech Traducción del Nuevo Mundo (xpoua). a San ika, sakin David ijkin okitokayoti Jehová: “NoTepetlauj”. ¿Tleka David okijli toTajtsin akin melauak nemi “noTepetlauj”, tla se tepetlatl xkipiya nemilistli?

2. ¿Tlenon tikitaskej ipan yejuin tlamachtijli?

² Ipan yejuin tlamachtijli, tikitaskej tleka Biblia kijtoua ika Jehová yeskia ken se tepetlatl niman tikitaskej tlenon techmachtia yejuin. Noijki tomachtiskej kenijki uelis tikitaskej Jehová ken toTepetlauj. Niman tikitaskej kenijki uelis tikchiuaskej ijkon ken Jehová.

TLEKA KITOKAYOTIAJ JEHOVÁ TEPETLATL

3. ¿Kemanon noteneua Jehová ken tepetlatl ipan Biblia? (Xkita tlaixkopinajli).

³ Biblia miyekpa kitokayotia Jehová tepetlatl para techititis seki ikualneskayouan. Ipan seki textos, itekipanojkauan Jehová okitokayotijkej tepetlatl niman ijkon kiueyiteneuaskej ikualneskayouan Jehová. Ipan Deuteronomio 32:4 itech Traducción del Nuevo Mundo, kijtoua ika Jehová se “Tepetlatl”, niman ompa kampa kachtopa tikitaj ipan Biblia ika ijkon kitokayotiaj Jehová. Ipan se teoyotl, Ana okijto ika “xonka okse tepetlatl ijkon ken toTajtsin” (1 Sam. 2:​2, TNM). Habacuc ijkin okijto itech Jehová: “NoTepetlauj” (Hab. 1:​12, TNM). Niman akin  okijkuilo Salmo 73 ijkin okijto: “ToTajtsin yejua se tepetlatl tlen kipaleuiya noyojlo” (Sal. 73:​26, TNM). Niman Jehová san no yejua onotokayoti “Tepetlatl” (Is. 44:​8, TNM). Matikimitakan yeyi kualneskayomej tlen kichiua ika Jehová makitokayotikan tepetlatl niman tlenon uelis tikchiuaskej niman ijkon tikitaskej Jehová ken “toTepetlauj” (Deut. 32:​31, TNM).

4. ¿Tleka tikijtouaj ika Jehová se tepetlatl? (Salmo 94:22).

⁴ Jehová techtlajpiya ijkuak itlaj tikixnamikij. Ijkuak chikauak ajakakiyaui, yakaj uelis nopaleuis ijtik se teostotl noso itsintlan se tepetlatl. Ika yejon, Jehová kitokayotiaj tepetlatl pampa ueli itech topaleuiyaj ijkuak itlaj tikixnamikij (xpoua Salmo 94:22). Yejua techtlajpiya niman xkitekauilia itlaj topan manochiua tlen xok uelis noyektlalis. Noijki yotechijli ika kipopolos nochi tlen techtlajyouiltia niman tlen techajmankamiktia (Ezeq. 34:​25, 26).

5. ¿Kenijki uelis topaleuiskej itech Jehová?

⁵ Ijkuak tikchiuaj teoyotl, topaleuiyaj itech Jehová. Ijkuak tiknotsaj, yejua techmaka “yolseuilistli” tlen kitlajpiya toyojlo niman totlamachilis (Filip. 4:​6, 7). Matitlajtokan itech tokniuj Artiom. Yejua okitsajkej ipampa tlen kineltoka niman ononek kixikos ijkuak se tlakatl melak kitlajtlatoltiaya niman kichiualtiaya matlajto niman melak kipijpinaujtiaya. Yejua kijtoua: “Ijkuak nechtlajtlatoltiayaj, melak najmankamikiya. […] Nochipa niknotsaya Jehová para manechmaka yolseuilistli niman tlamachilistli. Nochipa onimelajkanen maski akin nechtlajtlatoltiaya san tlemach nexchiuiliaya […]. Nejua nikitaya Jehová ken se tepantli kampa ninopaleuiaya”.

6. ¿Tleka nochipa uelis titlaneltokaskej itech Jehová? (Isaías 26:​3, 4).

⁶ Jehová xkeman techkauas. Se tepetlatl noso se tepetl xkeman nejkuania. Noijki ijkon, Jehová kentla xkeman nejkuaniskia pampa nochipa touan nemis para techpaleuis. Uelis itech titlaneltokaskej pampa Jehová se Tepetlatl tlen nochipa onias (xpoua Isaías 26:​3, 4). Yejua nochipa nemis para kichiuas tlen yotechijli, para techkakis ijkuak tiknotsaskej niman para techpaleuis ijkuak nonekis. Noijki uelis itech titlaneltokaskej pampa yejua xkeman kinkaua itekipanojkauan (2 Sam. 22:26). Yejua xkeman kilkauas tlen tikchiuaj niman nochipa techteochiuas (Heb. 6:10; 11:6).

7. ¿Kenijki techpaleuiya ijkuak titlaneltokaj itech Jehová? (Noijki xkita tlaixkopinajli).

⁷ Tla titlaneltokaj itech Jehová, tikitaskej ken toTepetlauj. Tejuamej tikmatstokej ika melak techpaleuiya ijkuak tiktlakamatij Jehová maski kemantika ouijtika tipanouaj (Is. 48:​17, 18). Niman ijkuak tikitaj kenijki techpaleuiya Jehová, peua más itech titlaneltokaj, niman yejon kichiuas matitlaxikokan ijkuak topan panos tlen más ouijtika. Kemantika itlaj topan panoua niman xakaj ueli techpaleuiya, san ika, tikitaj ika Jehová touan nemi niman ika san yejua uelis techpaleuis. Se tokniuj akin itoka Vladímir, okijto: “Nejua más oninonisiui itech toTajtsin ijkuak onechtsajkej. Opeuj más nitlaneltoka itech Jehová pampa san noselti ninemiya niman onikitak ika san yejua ueliskia nechpaleuiskia para manitlaxiko”.

8. a) ¿Tleka tikijtouaj ika Jehová xnopatla? b) ¿Kenijki techpaleuis tla tikitaj Jehová ken toTepetlauj? (Salmo 62:​6, 7).

 ⁸ Jehová xnopatla. Se tepetlatl noso se tepetl nochipa ijkon nesi pampa maski mapano miyek tiempo, xnopatla. Noijki ijkon, Jehová xnopatla niman xkeman kipatlas tlen kineki kichiuas (Mal. 3:6). Ijkuak Adán niman Eva xokitlakamatkej Jehová, yejua xokipatlak tlen kinekiya kichiuas. Apóstol Pablo okijto ika Jehová xnotlajtolkuepa (2 Tim. 2:13). Yejuin kijtosneki ika maski san tlenon mapano noso maski san tlenon makichiuakan oksekimej, Jehová xkeman nopatlas, xkeman kipatlas tlen yejua kichiuas niman xkeman kinpatlas itlanauatiluan. Nochi yejuin techpaleuiya más matikneltokakan ika Jehová nochipa techpaleuis ijkuak titlajyouiskej niman ika melauak kichiuas tlen yotechijli (xpoua Salmo 62:​6, 7).

9. ¿Tlenon tiuelij itech Tatiana?

⁹ Noijki uelis tikitaskej Jehová ken toTepetlauj tla nochipa tikilnamikij ikualneskayouan niman tlen kineki kichiuas ipan tlaltikpaktli niman tlen kineki kichiuas inpampa tlaltikpakchanejkej. Yejuin techpaleuis matiyolseujtokan niman maka melak matajmanakan ijkuak tikixnamikiskej tlen melak xkuajli (Sal. 16:8). Matikitakan tlen ipan opanok tokniuj Tatiana. Tekiuajkej xok okikauilijkej makisa ichan ipampa tlen kineltoka. Yejua kijtoua: “San noselti ninemiya. [ . . . ] Ijkuak kemach onechtsajkej, melak ouijtika onikitak niman melak ninajmanaya”. San ika, tokniuj Tatiana opeuj tlanemilia itech Jehová niman itech tlen yejua kineki kichiuas inpampa tlaltikpakchanejkej niman okitak ika melak nonekiya matlaxiko, yejon okipaleui kuajli manomachili niman okipix chikaualistli para uelis melajkanemis. Yejua kijtoua: “Pampa ijkon opeuj nitlanemilia, onikilnamik ika ijkon nopan panotoya pampa niktlasojtlaya Jehová niman pampa niknekiya nikyolpaktis. Yejon yonechpaleui maka sa maniknemilijto tlen xkuajli nopan panotika”.

10. ¿Kenijki uelis tikitas Jehová desde aman ken moTepetlauj?

¹⁰ San achijtsin poliui ijkuak panos tlen melak xkuajli niman ijkuakon melak nonekis matitlaneltokakan itech Jehová. Kuakon, melak noneki tla desde aman tikneltokaj ika yejua techpaleuis matitlaxikokan niman matimelajkanemikan. San ika ¿kenijki uelis más titlaneltokas itech Jehová? Tla tikamapoua ipan Biblia itech itekipanojkauan niman tla tikimita toamatlajkuiloluan kampa tlajtouaj intech tokniuan ipan yejuin tonaltin. Niman xkita kenijki itekipanojkauan Jehová yokitakej ken se tepetlatl pampa nochipa okinpaleui. Tla ijkin tikchiua, uelis tikitas Jehová ken moTepetlauj.

MATIKCHIUAKAN IJKON KEN JEHOVÁ

11. ¿Tleka melak kuajli tla tikchiuaj ijkon ken Jehová? (Xkita recuadro “ Tlen uelis kichiuaskej telpokamej”).

¹¹ Yotikimitakej ikualneskayouan Jehová tlen kichiua matikitakan ken se tepetlatl. Aman tikitaskej kenijki uelis tikchiuaskej ijkon ken Jehová niman ijkon uelis tikinpaleuiskej tokniuan ipan tlanechikojli. Matitlajtokan  itech Simón. Jesús okijli Simón ika kitokayotis Cefas (tlen noijki notlajtolkuepa ken Pedro niman kijtosneki “tlajkotsin tetl”) (Juan 1:42). Jesús ijkon okijli Pedro pampa kimatstoya ika yejua kinyolseuiskia tokniuan niman kinchikauiliskia intlaneltok. Biblia noijki kijtoua ika tokniuan tlayekankej yeskiaj ken se “itlaseuajlo sen ueyitetl” pampa tokniuan intech nopaleuiyaj (Is. 32:2). Tinochimej uelis tikchiuaskej ijkon ken Jehová tla tikinyolchikauaj tokniuan (Efes. 5:1).

12. ¿Kenijki uelis titepaleuiskej?

¹² Xtepaleui. Tejuamej uelis tikinpaleuiskej niman tikinseliskej tochan tokniuan akin kalxojxotonij noso kikauaj inchan pampa kampa chantiyaj tlaixpoliui noso onka guerra. Ipan yejuin itlamiyan tonaltin, más tlaijtlakaujtiuj. Kuakon, melak noneki matopaleuikan imiuan tokniuan (2 Tim. 3:1). Noijki uelis tikinpaleuiskej tokniuan kuajli manomachilikan niman uelis tikinchikauiliskej intlaneltok. Aman tlaltikpakchanejkej xok tetlasojtlaj niman melak tetlajyouiltiaj, ika yejon, melak noneki kuajli matikinselikan tokniuan ijkuak yaskej ipan totlanechikoluan para mayolpakikan niman makitakan ika tikintlasojtlaj.

13. ¿Kenijki uelis tepaleuiskej tlayekankej? (Noijki xkita tlaixkopinajli).

¹³ Tokniuan tlayekankej uelis kinpaleuiskej tokniuan ijkuak itlaj kixnamikiskej. Yejuamej nimantsin kitaj kenijki kinpaleuiskej tokniuan ijkuak tlaixpoliui kampa chantij noso ijkuak kualoj. Noijki, kinyolchikauaj ika Biblia. Ijkuak tokniuan kitaj ika tlayekankej kuajli tenotsaj, kuajli tekakij noso teasikamatij, tokniuan kimachiliaj ika tlayekankej kintlasojtlaj niman kinektokej kimijliskej makinpaleuikan. Niman ijkuak tlayekankej noneki kimijliskej tokniuan tlen kijtoua Biblia, yejuamej ika nochi inyojlo kinektokej kichiuaskej tlen kimijliaj (1 Tes. 2:​7, 8, 11).

14. ¿Kenijki uelis tikteititiskej ika uelis totech tlaneltokaskej?

 ¹⁴ Motech matlaneltokakan. Tiknekij makitakan tokniuan ika tiknekij tikinpaleuiskej, niman más ijkuak itlaj inpan panos (Prov. 17:17). ¿Tlenon uelis tikchiuaskej niman ijkon tokniuan totech matlaneltokakan? Mojmostla uelis tikchiuaskej ijkon ken Jehová. ¿Kenijki? San seki matikteneuakan: Matikchiuakan tlen tikijtouaj niman ijkuak tikijtouaj (Mat. 5:37). Matikinpaleuikan tokniuan ijkuak tikitaskej ika noneki makinpaleuikan. Niman tla techmakaj se tekitl, matokojtilikan matikchiuakan ijkon ken techijliaj.

15. ¿Kenijki tepaleuiyaj tlayekankej ipan tlanechikojli ijkuak tokniuan intech tlaneltokaj?

¹⁵ ¿Kenijki tepaleuiyaj tlayekankej ipan tlanechikojli ijkuak tokniuan intech tlaneltokaj? Tokniuan kinektokej kominnotsaskej ijkuak itlaj kixnamikij, niman yejon kinpaleuiya maka melak maajmankamikikan. Noijki, tokniuan kimachiliaj ika kintlasojtlaj ijkuak tlayekankej nochipa kinektokej kinpaleuiskej. Niman más intech tlaneltokaj ijkuak kitaj ika tlayekankej  xkimijliaj tlen yejuamej kinemiliaj, yej kimijliaj tlen nesi ipan Biblia niman ipan toamatlajkuiloluan tlen techmaka “tekitketl” yolmelauak. Noijki intech tlaneltokaj ijkuak tlayekankej xkiteijlijtinemij tlen kimijliaj niman ijkuak kichiuaj tlen kijtouaj.

16. ¿Kenijki techpaleuiya ijkuak tikchiuaj tlen kuajli, niman kenijki kinpaleuiya oksekimej ijkuak ijkon tikchiuaj?

¹⁶ Nochipa xchiua tlen kuajli. Tla tejuamej nochipa tiktlakamatij Jehová niman tikitaj tlen kijtoua Biblia ijkuak itlaj tiktlapejpeniaj, tokniuan kitaskej ika tikchiuaj tlen kuajli niman noijki kinekiskej ijkon kichiuaskej. Niman ijkuak tomachtiaj Biblia niman tikchikauaj totlaneltok, ueli timelajkanemij itech Jehová niman tiktlakamatij. Noijki nimantsin tikitaj ijkuak sekimej temachtiaj tlen xmelauak niman xtokauiliaj matechkajkayauakan (Efes. 4:14; Sant. 1:​6-8). Niman ijkuak titlaneltokaj itech Jehová niman itech tlen kichiuas, xsajnoye tajmanaj ijkuak techijliaj ika yopanok itlaj tlen xkuajli (Sal. 112:​7, 8). Niman ueli tikinpaleuiyaj akin itlaj xkuajli kixnamiktokej (1 Tes. 3:​2, 3).

17. ¿Tlenon noneki kichiuaskej tlayekankej para kinpaleuiskej tokniuan?

¹⁷ Tlayekankej noneki notlajpiyaskej maka sanoyej kichiuaskej tlen yejuamej kuelitaj hasta ken xok kinamiki, noneki kuajli tlanemiliskej, teasikamatiskej niman kuajli kichiuaskej intekiyo. Ijkuak yejuamej kejyeuaj “on melajki temachtilistli”, kinpaleuiyaj tokniuan kuajli manomachilikan niman machikaujto intlaneltok (Tito 1:9; 1 Tim. 3:​1-3). Tokniuan kinektokej yaskej tlanechikoltin, ontenojnotsaskej niman san inselti nomachtiskej ijkuak kitaj ika tlayekankej kuajli kichiuaj intekiyo niman kuajli kintlajpiyaj. Niman ijkuak tokniuan kixnamikij tlen melak kinajmankamiktia, tokniuan tlayekankej kimijliaj matlanemilikan itech Jehová niman itech tlen yejua kichiuas.

18. ¿Tleka tiknekij tikueyiteneuaskej Jehová niman más itech tonisiuiskej? (Noijki xkita recuadro “ Ken uelis tiknisiuis Jehová”).

¹⁸ Aman ika yotikitakej seki ikualneskayouan Jehová, tomachiliaj ijkon ken David akin okijto: “Makiueyiteneuakan Jehová akin noTepetlauj” (Sal. 144:​1, TNM). Jehová se toTajtsin akin nochipa uelis itech titlaneltokaskej. Noijki, yejua nochipa techpaleuis iuan matinemikan. Kuakon, uelis tikijtoskej ika nochi toyojlo: “Yejua noTepetlauj” (Sal. 92:​14, 15, TNM).