1. Omu mutyipopila Oviimbo 18:​46, Ndaviti waeleka Siovaa natyi?

 MOUYE muno tukahi, tutumbukilwa novitateka ovinyingi, ya vimwe vipondola umwe okututyopola, atwahakala-le vali ngeetyi twali. Mahi onthwe tupandula unene Siovaa Huku utukwatesako. Monthele yokwalamba, twelilongesa okuti Siovaa o Huku una omwenyo, ya utukwatesako. Tyina Siovaa etukwatesako, noonthwe tulimonena-ko umwe okuti, “Siovaa [o Huku] una omwenyo!” (Tanga Oviimbo 18:46.) Etyi Ndaviti apopia okuti, “Siovaa una omwenyo,” pahe apopi vali okuti Huku “Onkhanda yange.” Oityi aelekela Siovaa Huku una omwenyo, nonkhanda yehena omwenyo?

2. Oityi matulilongesa monthele ei?

² Monthele ei matutale oityi Siovaa atilwa onkhanda, ya oityi otyo tyitulongesa tyayemba kwe. Tupu matutale etyi tuna okulinga opo Siovaa alinge Onkhanda yetu, neetyi onthwe tuna okulinga tuhetekele Siovaa, atulingi onkhanda ya vakwetu.

OITYI SIOVAA ATILWA ONKHANDA

3. Oponohika patyi Ombimbiliya yapopia ondaka “onkhanda”? (Tala olutalatu lwo kondye.)

³ Ombimbiliya yapopia okuti Siovaa “onkhanda” opo itukwateseko okunoñgonoka nawa etyi ekahi. Popanyingi Siovaa atiwa onkhanda, oponovelesikulu mbumuhilivika, mbumupopia okuti utupu ou elifwe nae. Apa Ombimbiliya yatetekela umwe okupopia okuti Siovaa “Onkhanda,” omomukanda Epalukununo 32:4. Melikwambelo Ana alingile, watile: “Kutupu onkhanda yelifwa na Huku yetu.” (1 Sam. 2:2) Hambakuke watile Siovaa ‘Onkhanda yange.’ (Hamb. 1:12) Omuhoneki w’Oviimbo 73, watile “Huku onkhanda yomutima wange.” (Ovii. 73:26) Na Siovaa yatyo mwene welitile onkhanda. (Isa. 44:8) Pahe matupopi ovipuka  vitatu vilekesa oityi Siovaa atilwa onkhanda, neetyi onthwe tuna okulinga Siovaa alinge “Onkhanda yetu.” — Epal. 32:31.

4. Oityi tutila Siovaa ondyakulilo? (Oviimbo 94:22)

⁴ Siovaa otyiholamo tyetu utuyakulila. Ngeetyi onkhanda iyakulila ou waholama-mo otyipepe otyinene, na Siovaa utuyakulila tyina twatumbukilwa novipuka viahanda okutunyona. (Tanga Oviimbo 94:22.) Siovaa utuyakulila kweevi vipondola okunyona oupanga wetu nae, ketuyekela natyike tyipondola okutunyona nomwenyo wahapu atwehekeumona vali. Ngwe wati, komutwe wandyila makapola-ko ovipuka viatyo aviho vitupola ombembwa, vituhukaisa, vitulingisa otyiho. — Isek. 34:​25, 26.

5. Oityi tuna okulinga Siovaa alinge Onkhanda yetu Tuholama?

⁵ Tyimwe tuna okulinga opo Siovaa alinge onkhanda yetu omu Tuholama, okulikwambela kwe. Tyina tulikwambela, Siovaa utwavela ombembwa yatiwa “ombembwa ya Huku,” aiyungu omitima vietu, nomalusoko etu. (Fili. 4:​6, 7) Tala etyi tyalingile omukulu umwe Ombangi utiwa o Artem, wapakelwe mokaleya mokonda yokufenda Huku. Etyi eli mokaleya, opulisa yokutehelela etyi tyaenda, ankho ikalela vala okumupula, otyo imulinga vala onya na atile owoma. Wapopia wati: “Otyipuka tyandingile opulisa ina ankho tyinthokotesa omutwe . . . Apeho ankho ndyilikwambela ku Siovaa. Ankho ndyimwiita anthulise omutima, ankhwateseko ndyityivile okulinga ovipuka nonondunge. Namphila epulisa lina ankho lindinga onya, ame pahe ankho hisuku-ale vali . . . Siovaa wankhwatesileko, andyikala ngatyina uti nayakulilwa notyimato tyomamanya.”

6. Oityi apeho tuyumbila onthumbi mu Siovaa? (Isaiya 26:​3, 4)

⁶ Siovaa uyumbwa onthumbi. Ngeetyi onkhanda apa ili haipo vala, na Siovaa apeho makala vala ponthele yetu etukwateseko. Tumuyumba onthumbi mokonda watiwa “Onkhanda itwalako apeho.” (Tanga Isaiya 26:​3, 4.) Siovaa apeho ulinga etyi apopia, utehelela omalikwambelo etu, utwavela evi twesukisa. Onthwe tuyumba vala onthumbi mwe, mokonda kayeke-po ava vemufenda. (2 Sam. 22:26) Nii kamalimbwa etyi tumulingila, ya apeho metuyambe. — Hemb. 6:10; 11:6.

7. Ouwa patyi utuka kokuyumba onthumbi mu Siovaa? (Tala olutalatu.)

⁷ Siovaa malingi Onkhanda yetu, tyina tumuyumba onthumbi, atupamena umwe vala mwe. Okumutavela na tyina umwe ovipuka vialema, tyitweetela ouwa. (Isa. 48:​17, 18) Tyina tumona okuti Siovaa wetukwatesako, tumuyumba vali onthumbi. Ya opo pahe, matutyivili okututumba novitateka ovikwavo vitumonekela, vivilwa vala na Siovaa. Haunene tutyimona vala otyityi tyitiwa okupamena mu Siovaa, tyina twatumbukilwa novitateka tutala ñgaa petupu-ale vali kwou tupondola okuhatekela. Umwe utiwa o Vladimir wati: “Pweetyi ndyili mokaleya, opo umwe natala ñgaa oupanga wetu na Huku wapama vali. Mokaleya nelilongesila-mo okuyumba vali onthumbi mu Siovaa, mokonda ankho ndyike-mo vala, ya ankho ndyitupu-ale vali etyi ndyipondola okulinga ndyiyovoke-mo.”

8. (a) Oityi tutila Siovaa kapilauluka? (b) Oviwa patyi vituka kokupamena mu Huku, Onkhanda yetu? (Oviimbo 62:​6, 7)

 ⁸ Siovaa kapilauluka. Siovaa wafwa onkhanda onene, apa eli opo vala, waika, kapilauluka. Etyi ekahi otyo vala, onomphango ena-mbo ombo vala, kambupilauluka. (Mal. 3:6) Poumphuki walingilwe mo Endene, Siovaa kapilululile etyi ahandela ovanthu. Omutumwa Paulu wahoneka okuti Siovaa “kapondola okuliaanya.” (2 Tim. 2:13) Otyo tyilekesa okuti Siovaa ketei kovipuka vakwavo valinga, neevi vimoneka mouye. Mwene etyi ekahi otyo vala, onomphango mbae ombo vala, novitumino viae ovio vala. Ine tuyumba onthumbi mu Huku wahapilauluka, kumbi tutumbukilwa novitateka matupamena vala mwe, mokonda oe metukwatesako, etuyovola. — Tanga Oviimbo 62:​6, 7.

9. Oityi ulilongesila ku Tatyana?

⁹ Siovaa malingi Onkhanda yetu, tyina tusoka apeho kweetyi ngwe ekahi, no komphango yae. Okulinga ngootyo, tyitupameka omutima tyina tuna ovitateka. (Ovii. 16:8) Otyo tyapele ononkhono umwe utiwa o Tatyana etyi akwatwa mokonda Ombangi, atiwa una vala okukala peumbo ahaenda-enda. Wati: “Meumbo ankho ndyike-mo vala. Potete tyandemenene unene, atyinthyoyesa.” Etyi ahimbika okusoka vali nawa ku Siovaa, no komphango Siovaa ena-yo, amono ononkhono etyivili okukoleleya, omutima auya pomphangu. Wapopia wati: “Etyi nasoka umwe nawa omokonda yatyi ndyimonesilwa ononkhumbi, andyihinangela okuti ndyimoneswa tupu ononkhumbi okulingila Siovaa. Otyo atyinkhwatesako umwe, andyityiyeke-po tyokusoka vala ovinyingi.”

10. Oityi tuna okulinga Siovaa akale Onkhanda yetu pehepano?

¹⁰ Komutwe oku matukesukisa okuyumba vali unene onthumbi mu Siovaa, mokonda matukakondya novitateka vimwe ovinene. Naina, opehepano twesukisa okupameka onthumbi yetu mwe yokuti metutekula movipuka aviho vitutumbukila opo tumone ononkhono, twehemuyeke-po. Oityi tuna okulinga tupameke onthumbi yetu? Tuna okutanga Ombimbiliya, nomikanda vietu, tutale oñgeni Siovaa akwatesileko ovanthu vae vo kohale, oñgeni eli nokukwatesako Onombangi mbae hono. Pokutanga, tala oñgeni Huku Onkhanda yetu akwatesako ovanthu vae. Uti umwe otange, osoko-po nawa. Otyo matyikukwatesako, otyimono okuti Siovaa Onkhanda yove.

LINGA ONKHANDA YA VAKWENYI NGA SIOVAA

11. Oityi twesukisila okuhetekela Siovaa atukala onkhanda ya vakwetu? (Tala okakasa kati: “ Ovipuka Ovakwendye Vapondola Okulinga.”)

¹¹ Twetyimona etyi Siovaa alinga tyimoneke okuti onkhanda yetu. Pahe matutale oñgeni matumuhetekela, noonthwe atulingi-vo onkhanda ya vakwetu. Okutyilinga, matyitukwatesako atutyivili okutunga ewaneno, nokupameka vakwetu. Tala vala etyi Sesusi alingile. Walukile Simau okuti o Sefa, (otyo okuti, Petulu) tyihangununa okuti, “Otyimphemu tyonkhanda.” (Swau 1:42) Otyo tyilekesa okuti Petulu ankho malingi omunthu upameka vakwavo, utunga ewaneno. M’Ombimbiliya, ovakulu vewaneno  vatiwa vekahi ‘ngokafi konkhanda imwe onene.’ Otyo tyilekesa okuti vayakulila ewaneno. (Isa. 32:2) Tyotyili, ewaneno lipama vali tyina ovanthu aveho mewaneno vahetekela Siovaa, munthu na munthu alingi onkhanda ya vakwavo. — Efe. 5:1.

12. Oñgeni matukala otyiholamo tya vakwetu?

¹² Linga otyiholamo tya vakwenyi. Pamwe tyina vakwetu vatumbukilwa novihuna, na tyina kotyilongo tyavo kuna ovilwa, vamwe vapondola umwe okuya okuholama mwoonthwe. Mononthiki mbuno “mbahulilila” ovivi vikahi vala nokuvila-po, matumono onomphitilo ononyingi mbokulikwatesako na vakwetu. (2 Tim. 3:1) Tupondola okuvepameka omutima, nokuvekwatesako vapameke oupanga wavo na Siovaa. Otyo matutyilingi vala tyina tuveyakula nawa Mondywo Yomaliongiyo, no mokulinga evi vieeta omphepo ongwa mewaneno. Mouye muno tuli mwalema, muna ovipuka ovinyingi vitokotesa vala omutwe. Naina, nga twelivasa na vakwetu komaliongiyo, tulingei vakwetu evi mavilekesa okuti tuvehole, mavivekalesa nawa, avivepameka.

13. Oityi ovakulu vewaneno vena okulinga valinge otyiholamo tya vakwavo? (Tala olutalatu.)

¹³ Ovakulu vewaneno vapondola okukala otyiholamo tya vakwavo mewaneno, putyina ovaivisi mewaneno vamatumbukilwa novitateka vilinga ngatyina uti otyipepe otyinene. Tyina potyilongo pamatumbuka ovihuna, na tyina mewaneno muna umwe wavela, ovakulu vewaneno vatala liwa-liwa etyi vena okulinga vakwateseko vakwavo. Tupu vapameka vakwavo opo oupanga wavo na Huku wahatende. Ine omukulu wewaneno ulinga omunthu wokankhenda, usuka na vakwavo, utehelela nawa vakwavo, ovaivisi mewaneno mavetyimono okuti uvehole, avetyivili okutomphola nae. Ya tyina evepakaila-mo valandule etyi Ombimbiliya ipopia, navo tyivepepukila okumutavela. — 1 Tes. 2:​7, 8, 11.

14. Oityi tuna okulinga tulinge ovanthu vayumbwa onthumbi?

 ¹⁴ Linga omunthu uyumbwa onthumbi. Onthwe twahanda vakwetu vetuyumbe onthumbi, haunene umwe tyina vatumbukilwa novitateka. (Omih. 17:17) Oityi tuna okulinga tutiwe tuvanthu vokuyumbwa onthumbi? Apeho tuna okulikwatesila tuhetekele Huku, tyina twamapopi otyipuka atutyilingi umwe, nokuti tyina twapanga otyipuka, moola twelilaa atwahaponyo-mo. (Mat. 5:37) Ine pena ou una etyi akamba wesukisa okukwatesiwako, atumukwatesako umwe. Otyikwavo tuna okulinga, okulinga nawa ovilinga tupewa, atuvieendekela umwe omu vina okweendekelwa.

15. Ouwa patyi utuka-ko tyina ovakulu vewaneno valinga ovanthu vayumbwa onthumbi?

¹⁵ Tyina ovanthu mewaneno vayumba onthumbi movakulu vewaneno, ouwa patyi tyietela ewaneno? Tyina ovaivisi mewaneno vetyii okuti atyiho vesukisa vapondola okupopia novakulu vewaneno, ngeetyi omukulu wotyikundyi tyavo, kavalingi otyiho. Tyina ovakulu vewaneno apeho vakwatesako ovaivisi, ovaivisi vakala nawa, vetyimona okuti ovakulu vevehole. Tupu tyina ovakulu vewaneno etyi vapopia vetyipola  m’Ombimbiliya, avahapopi vala etyi mwene vasoka, ovaivisi veveyumba vali onthumbi. Ovaivisi vayumba vali onthumbi movakulu vewaneno vati tyina vamavakelwapo otyipuka tyimwe, kavetyihahanesa movanthu, na vana vati tyina vamati mandyilingi tyongandi, vetyilinga umwe.

16. Ouwa patyi utuka kokukala omunthu waika mo tyokwaviuka?

¹⁶ Linga omunthu waika mo tyokwaviuka wahapilauluka. Ine apeho twiika umwe mo tyokwaviuka, tyina tuna etyi twahanda okulinga atulandula onondunge mbuli m’Ombimbiliya, vakwetu mavatalela kwoonthwe. Putyina tulilonga okuyumba vali onthumbi mu Huku, na tyina tuyawisa kenoñgonoko lietu, matukala ovanthu vapama motyili. Kamatulingi ovanthu vomitima vivali, ovanthu vokutenga-tenga, vayondywa nondongeso yomatutu, nomalusoko ouye ou. (Efe. 4:14; Tia. 1:​6-8) Okwiiva otyipuka tyitumphulula omutima, onthumbi yetu mu Siovaa, no monomphango mbae, kamaitenga-tenga. (Ovii. 112:​7, 8) Tupu matutyivili okukwatesako vana vatumbukilwa novitateka. — 1 Tes. 3:​2, 3.

17. Oityi tyikwatesako ovakulu vewaneno okupameka ewaneno, na vakwavo avatalela-ko?

¹⁷ Ovakulu vewaneno vena okulinga ovanthu veliteta kovipuka, ovana-ndunge, vaonganeka nawa ovipuka, vapepuka omutima. Ovakulu ovo, tyina vakakatela “mondaka iyumbwa onthumbi,” vatunga ewaneno, vapameka vakwavo. (Titu 1:9; 1 Tim. 3:​1-3) Tyina valinga evi viaviuka vakwavo vatalele-ko, na tyina vanthita ewaneno, tyikwatesako ovaivisi aveho okwenda apeho komaliongiyo, no movilinga viokwivisa, nokulilongesa Ombimbiliya. Tyina ovaivisi mewaneno vamatumbukilwa novitateka, ovakulu vewaneno vevepa ondundo vapamene mu Siovaa, avasoko vala konomphango mbae.

18. Oityi twahandela okuhivilika Siovaa, nokukala noupanga omuwa nae? (Tala okakasa kati: “ Ondyila Yokufwena ku Siovaa.”)

¹⁸ Mokonda pahe twanoñgonoka umwe nawa oityi tutila Siovaa Onkhanda yetu, tupondola okupopia ngeetyi tyapopile Ohamba Ndaviti yatile: “Siovaa Onkhanda yange, ahivilikwe.” (Ovii. 144:1) Apeho tuyumbei onthumbi mu Siovaa, mokonda oe o Huku uyumbwa onthumbi. Ononthiki ambuho, na tyina umwe twakulupa, munthu na munthu mati: Siovaa “Onkhanda yange,” mokonda twayumba-ko onthumbi okuti apeho metukwatesako tukale noupanga omuwa nae. — Ovii. 92:​14, 15.