1. Ha gutadila Ngimbo 18:46, Davidi wafuanesele Yehowa nu itshi?

 MATANGUA ako malamba ajiya gutubuila mu gisagumuisa, malamba ene ajiya gutusagesa nga gusombegesa diago monyo wetu. Tudi diago nu gusuanguluga ha gujiya egi tuajiya gutoga ukuateshi gudi Yehowa! Mu longo diabalega, tuamonele egi Yehowa udi Nzambi wa monyo nu wana khala hehi ha gutukuatesa. Tangua wana gutukuatesa, tuana tshigina diago egi: ‘Yehowa udi nu monyo!’ (Tanga Ngimbo 18:46.) Uvi gungima dia guzuela egi Yehowa udi nu monyo, Davidi wamutamegele egi ‘Seso diami.’ Mukunda natshi Davidi wafuanesele Yehowa Nzambi wa monyo nu seso?

2. Itshi tuza muzuelela mu longo edi?

² Mu longo edi, tuza mumona mukunda natshi Davidi wafuanesele Yehowa nu seso nu ndaga mbimbi jiene jia gufuanesa jidi gutulongesa mukunda nu Yehowa. Tuza nji mumona luholo tuajiya gumutadila gifua Seso dietu. Gugisugishilo, tuza mumona luholo tuajiya gulandula makalegelo enji.

MU LUHOLO LUTSHI YEHOWA UDI GIFUA SESO?

3. Mbala jiavula mu luholo lutshi Biblia yana kalegela mbimbi “seso”? (Tala gifuanesa gizula.)

³ Biblia yana fuanesa Yehowa nu “seso” ha gutukuatesa ha gukotelesa makalegelo enji ako. Mbala jiavula, jina diene diana khala mu verse jinyi jiana tumbuisa Yehowa gifua Nzambi munu gajiyilego gufuanesewa nu nzambi muko. Verse ya thomo yana tamega Yehowa egi “Seso,” idi mu mukanda wa Mikhuala 32:4. Mu gisambu giakalegele Ana, wazuelele egi: “Gushigo nga seso idi yakola gifua Nzambi wetu.” (1 Sam. 2:2) Habakuka watamegele Yehowa egi  ‘Seso.’ (Hab. 1:12) Muthu wasonegele Ngimbo mukhapho 73 watamegele nji Nzambi egi ‘seso dia mutshima wami.’ (Ngi. 73:26) Yehowa muene hakhenji wana gudifuanesa nu seso. (Yesh. 44:8) Tutadilenu makalegelo thathu ana buisa Yehowa gifua seso, tukambenu gujiya luholo tuajiya nji gumubuisa ‘seso dietu.’​—Mikh. 32:31.

4. Mu luholo lutshi Yehowa udi fundo dietu dia gulengela? (Ngimbo 94:22)

⁴ Yehowa udi fundo diami dia gulengela. Gifua luholo seso dia koma diajiya gukhala fundo muthu wajiya gudisuega gu funji yakola, Yehowa nji wana gutubamba tangua tuana tagana nu malamba. (Tanga Ngimbo 94:22.) Wana gutukuatesa ha gubamba ufuta wetu n’enji nu wana gutulaya egi gushigo nga gima gimoshi giajiya gubolesa ufuta wene mayilago. Udi gutulaya luko egi: Mu masugu adi muza mbawukatula ndaga jiagasue jiana gutuhana gikenene nga gutusagesa.​—Ezek. 34:25, 26.

5. Mu luholo lutshi Yehowa wajiya gukhala fundo dietu dia gulengela?

⁵ Ndaga iko tuajiya gutshita hagula Yehowa atubambe idi gutshita gisambu. Tangua tuana tshita gisambu, tuana heta “guhuima” gua Nzambi, guhuima guene guana bamba mitshima yetu nu matangi’etu. (Fili. 4:6, 7) Tutadilenu gifezegeselo gia phangi Artem wambiwe mu bologo mukunda nu gutshigina guenji. Tangua diakhalele muene mu bologo, muenya khuta mumoshi wamuhudile mihu yavula, wamusagesele nu wakhalele gumuhana woma. Phangi Artem wazuelele egi: “Ngavuile diago gikenene luholo muthu muene wakhalele gunguhula mihu. . . . Ngakhalele mutshita gisambu muavula gudi Yehowa. Ngamutogele ha gunguhana guhuima nu ndunge. Ikhale muthu muene wakhalele gungusagesa, uvi ngamonesele khadilo dia guhuiminyina. . . . Mu ukuateshi wa Yehowa, yakhalele gifua ngudi yagumagana gungima dia gibayi gia seso.”

6. Mukunda natshi tudi naye gulandula gushila Yehowa mutshima? (Yeshaya 26:3, 4)

⁶ Yehowa wana khala yagujinginyina gudi esue nu mbagashigo gutubemba. Gifua seso diakoma dinyi dianago gudinyigisa, Yehowa nji wana khala tangua diagasue hehi ha gutukuatesa. Tuajiya gumushila mutshima handaga udi ‘Seso dia ivo nu ivo.’ (Tanga Yeshaya 26:3, 4.) Mbawulandula gukhala nu monyo ha gutagenesa ndaga jiatulayele muene nu ha gutegelela isambu yetu nu gutukuatesa. Tuajiya nji gushila Yehowa mutshima handaga wana khala yagujinginyina gudi athu ana gumukombelela. (2 Sam. 22:26) Mbagashigo mujimbila nga hazonda mudimo tuana gumukalegela nu bawutushimbiga mukunda nu mudimo wene.​—Heb. 6:10; 11:6.

7. Gubonga gutshi mbatuheta gula tudi mushila Yehowa mutshima? (Tala nji gifuanesa.)

⁷ Tuana gubuisa Yehowa gifua Seso dietu tangua tuana gumushila diago mutshima. Tuana jiya egi gula tudi gumutumagela ikhale mu tangua dia lamba, mbatuheta gubonga. (Yesh. 48:17, 18) Tangua tuana mona luholo Yehowa wana gutukuatesa, gutshigina guetu gudi muene guana kola. Ndaga yene yana gututshiginyisa egi phamba Yehowa wajiya gutukuatesa ha gukolesela mu malamba agasue ajiya gutubuila. Mbala jiavula gula gushigo nga nu muthu wagutukuatesa tangua tudi mutagana nu malamba, tuana kotelesa egi phamba Yehowa wajiya gutukuatesa. Phangi Vladimir wazuelele egi: “Ivo ngabalegesele mu bologo, yangukuatesele ha gukolesa  ufuta wami nu Yehowa. Ngasendesele gumushila mutshima muavula handaga ngakhalele hakhami. Luko ngajiyile egi phamba muene wajiya gungukuatesa ha gukolesela.”

8. a) Mukunda natshi tuajiya guzuela egi Yehowa ganago gusombegesa? b) Gubonga gutshi tuajiya guheta luholo Yehowa udi gifua Seso dietu? (Ngimbo 62:6, 7)

⁸ Yehowa ganago gusombegesa. Yehowa udi gifua seso diakoma nga mulundu handaga ganago gudinyigisa. Udi watagana ha gumushila mutshima handaga ganago gusombegesa. (Mal. 3:6) Tangua Adama nu Eva amulumbugidile, Yehowa gasombegeselego felela dienji mukunda nu athu. Mupostolo Phaula wasonegele nji egi Yehowa “gajiyilego gudituna.” (2 Tim. 2:13) Ndaga jiene jidi mukotelesa egi, gushigo nga ndaga imoshi yajiya gubua nga inyi athu ajiya gutshita yajiya gutuma Yehowa ha gusombegesa makalegelo enji, ndaga jialayele muene nga mikhuala yenji. Luholo Yehowa gajiyilego gusombegesa nga hazonda, tudi musha mutshima egi mbawutukuatesa mu tangua dia lamba nu mbawutagenesa ndaga jiatulayele muene mu masugu adi muza.​—Tanga Ngimbo 62:6, 7.

9. Longo ditshi wazula mu gifezegeselo gia phangi Tatyana?

⁹ Gula tudi mutangigiza makagelo a Yehowa nu ndaga jiatulayele muene, tuana gumubuisa gifua Seso dietu. Gutshita ngenyi, guajiya gutukuatesa ha gukhala mu guhuima nu gusala yagujinginyina tangua tudi mutagana nu malamba. (Ngi. 16:8) Yene ndaga yatagenele nayo phangi Tatyana wambiwe mubologo mukunda nu gutshigina guenji. Wazuelele egi: “Ngakhalele hakhami. Gugisendeselo ndaga yene yakhalele gungusagesa. Ngakhalele muleba muila muavula.” Wasendesele gutangigiza Yehowa nu mafelela enji mukunda nu athu, gungima wakotelesele egi idi nu ndando ha gukolesela mu lamba diene. Ndaga yene yamukuatesele ha gukhala mu guhuima nu ha gusala yagujinginyina gudi Yehowa. Wazuelele egi: “Tangua ngakotelesele gishina ngakhalele mumona malamba ene, yangukuatesele ha guwunguluga egi malamba ene angubuidile handaga ngudi Temue wa Yehowa. Ndaga yene yangukuatesele ha gutuna gudisagesa muavula.”

10. Luholo lutshi tuajiya gubuisa Yehowa gifua Seso dietu sendese mangino?

¹⁰ Mu masugu adi muza mbatutagana nu malamba akola, mu tangua diene mbayitoga egi tushile Yehowa mutshima muavula gubalega mangino. Edi tangua dia gukolesa gutshigina guetu gudi Yehowa egi mbawutukuatesa ha gusala yagujinginyina gudi muene. Luholo lutshi tuajiya guyikalagala? Khala mutanga mene jia akombeledi a Yehowa jidi mu Biblia nu jia mu masugu etu. Kamba gujiya luholo Yehowa wakuatesele akombeledi enji. Khala mutangigiza mene jiene. Gutshita ngenyi mbagugukuatesa ha gubuisa Yehowa gifua Seso diaye.

LANDULA MAKALEGELO A YEHOWA

11. Mukunda natshi tudi naye gulandula makalegelo a Yehowa ana gumubuisa gifua seso? (Tala nji galuanda “ Mafelela Mavuala a Mala Ajiya Gudihagela.”)

¹¹ Tuamonyi makalegelo a Yehowa ana gumubuisa gifua seso. Uvi henyaha tutadilenu ndaga yajiya gutukuatesa ha gumonesa makalegelo ene. Gula tuatshita ngolo ha gulandula makalegelo a Yehowa, tuajiya gukolesa aphangi’etu a mala nu a akhetu mu hungu. Ha gufezegesa, Yesu wahanele  Simona jina egi Sefase (yakotelesa egi “Phetelo”), jina diene didi mumonesa “Gibala gia Seso.” (Yone 1:42) Ndaga yene yakhalele mumonesa egi Phetelo mbawuhana aphangi gikhesa mu hungu nu mbawukolesa gutshigina guawo. Akulu mu mahungu adi gifua ‘vule dia seso diakoma.’ Ndaga yene idi mumonesa luholo ana bamba imeme mu hungu. (Yesh. 32:2) Yadiago gula mukut’etu agasue tudi mulandula makalegelo a Yehowa, mbatuheta gubonga.​—Ef. 5:1.

12. Luholo lutshi tuajiya gumonesa egi tudi fundo dia gulengela mukunda nu aphangi?

¹² Khala fundo dia gulengela mukunda nu aphangi. Gula aphangi’etu atotesa ima yawo nga alengi membo awo mukunda nu ndaga imoshi yalamba nga ita, tuajiya guatamega ha guza mukhala gumbo dietu. Luholo tudi mujinga mu “masugu a gisugishilo,” ndaga jia ha mavu awa jidi mulandula gudibolesa; hene idi nu ndando ha guhana aphangi’etu ima adi nayo funu. (2 Tim. 3:1) Tuajiya nji guahana gikhesa nu guamonesa egi tuana guazumba. Hene tudi naye guayamba tangua adi muza mu gudibungisa, nu gutshita yagasue hagula aphangi ene adivue muabonga. Athu avula mangino ana kalegela athu ako ndaga nu khuta. Ndaga yene yajiya guhana aphangi gikenene nga gudivua gifua anago guazumba. Hene tangua aphangi adi muza mu gudibungisa, tudi naye gutshita yagasue ha guahana gikhesa nu guamonesa egi tuana guazumba.

13. Luholo lutshi akulu ajiya gukuatesa aphangi mu tangua dia lamba? (Tala nji gifuanesa.)

¹³ Akulu ajiya gubua fundo dia gulengela mukunda nu aphangi adi mutagana nu malamba akola. Gula ndaga imoshi ya lamba yabuila aphangi nga ndo phangi mumoshi wakata misongo yakola idi mutoga ukuateshi, akulu ana gukuatesa aphangi ene muphushi. Ana guakuatesa nji mu nyuma. Yana khalago lamba gudi aphangi ha gutoga ukuateshi gudi mukulu wajiyiwa egi wana khala nu gisemo, wana zumba aphangi nu wana khala hehi ha gutegelela athu ako. Gukhala nu makalegelo awa, guana kuatesa athu ako ha gudivua mu wubambi, ngenyi yana khalago lamba gudi ene ha  gutshigina malongo mukulu muene wajiya guahana.​—1 Tes. 2:7, 8, 11.

14. Luholo lutshi tuajiya gumonesa egi tudi athu anyi athu ako ajiya gushila mutshima?

¹⁴ Khala muthu athu ako ajiya gushila mutshima. Tuana tshigina egi athu ako atushile mutshima mu tangua dia lamba. (Ish. 17:17) Itshi tuajiya gutshita hagula athu ako atushile mutshima? Tudi naye gutshita yagasue ha gulandula gifezegeselo gia Yehowa, gifua gutagenesa ndaga tualayele mu tangua diatagana. (Mat. 5:37) Nga ndo gula tuavua egi phangi mumoshi udi nu funu ya ukuatshi, tuajiya gumukuatesa. Luko, tudi naye gutagenesa inemo yetu mu hungu gifua luholo malongo atuhanewa adi guyimonesa.

15. Gubonga gutshi aphangi ajiya guheta mu hungu gula adi mushila akulu mutshima?

¹⁵ Gubonga gutshi aphangi ajiya guheta mu hungu gula adi mushila akulu mutshima? Gula aphangi adi mujiya egi ajiya gutamega akulu tangua diagasue adi nu funu ya ukuateshi, yana guakuatesa ha gutuna guvua gikenene giavula. Aphangi ana suanguluga nji gula adi mujiya egi akulu adi hehi ha guakuatesa. Gula akulu adi mukalegela Biblia nu mikanda ya muhiga ha guhana aphangi malongo uvi matangi awo hakhawo ndo, aphangi  ana guashila mutshima. Aphangi ene ana sha nji mutshima gudi mukulu munu ganago guwambela athu ako ndaga jiaatadila nu wana tagenesa ndaga jiana zuela muene.

16. Gubonga gutshi esue nu athu ako tuajiya guheta gula tudi mukalagala ndaga jiana suanguluisa Yehowa?

¹⁶ Tshita ndaga jiana suanguluisa Yehowa. Gula tudi mutumagela Yehowa mu ndaga jiagasue nu tudi muzula badesizio adi gudivua nu malongo a Biblia, mbatuhana gifezegeselo giabonga gudi athu ako. Gula tudi mulonguga Biblia nu tudi mukolesa gutshigina guetu gudi Yehowa, mbatusala yagujinginyina gudi muene. Mbatujiya nji malongo a mambo nu ndaga jishigo gudivua nu Matangi a Yehowa nu mbatushigo mubemba egi ndaga jiene jituhuige. (Ef. 4:14; Yak. 1:6-8) Gutshigina guetu gudi Yehowa nu mu ndaga jialayele muene, guana gutukuatesa ha gutuna gudisagesa muavula gula tuavua mene jidi muhana gikenene. (Ngi. 112:7, 8) Tuana khala nji hehi ha gukuatesa athu adi mutagana nu malamba.​—1 Tes. 3:2, 3.

17. Itshi yana kuatesa akulu ha gukhala gifezegeselo giabonga?

¹⁷ Akulu adi naye gukhala nu makalegelo abonga, adi naye nji gukhala athu ana tangiza muabonga, ashigo naye gukhala enya lumuamua, nga enya ndaga jiakola. Ana kuatesa athu ako ha gukhala mu guhuima nu gukhala nu gutshigina guakola gudi Yehowa nu ana kolesa nji aphangi mu hungu ha gusala “yagujinginyina gu mbimbi ya giamatshidia.” (Tito 1:9; 1 Tim. 3:1-3) Luholo akulu ana hana gifezegeselo giabonga, ana kuatesa aphangi ha gutshita ndaga jia mu nyuma muavula, gifua gulongesa, guya mu gudibungisa nu gutshita gulonguga guawo hakhawo. Gula aphangi adi mutagana nu ndaga jidi guahana gikenene, akulu ana guawunguluisa ha gushila Yehowa mutshima nu gutangigiza muavula mu ndaga jialayele muene.

18. Mukunda natshi tudi naye gutumbuisa Yehowa nu gukolesa ufuta wetu n’enji? (Tala nji galuanda “ Luholo Tuajiya Gukolesa Ufuta Wetu nu Yehowa.”)

¹⁸ Gungima dia gulonguga makalagelo abonga a Yehowa, tuajiya guzuela gifua muazuelele Fumu Davidi egi: ‘Yehowa mubambi wami, atumbuishiwe.’ (Ngi. 144:1) Tuajiya gulandula gushila Yehowa mutshima. Ikhale tuabua athu agukola, tuana sha mutshima egi Yehowa mbawulandula gutukuatesa ha gusala yagujinginyina gudi muene. Tuajiya nji guzuela egi Yehowa udi ‘Seso diami.’​—Ngi. 92:14, 15.