NKHANI YOPFUNZIRA 26
NYIMBO NA. 8 Yehova Ndiye Pothawirapo Pathu
Bvumani Yahova kukhala malo yanu yothawirapo
‘Palibe dwale ninge Mulungu wathu.’—1 SAM. 2:2.
CHOLINGA
Kupfunzira kuti ndawa chani Yahova alinganiziwa na dwale na momwe tingatewedzerere makhalidwe yake.
1. Mobverana na lemba ya Salimo 18:46, ko Davide adalinganiza Yahova na chani?
ISEPANO tinkukhala mudziko yomwe mabvuto na vinthu voipa vingachinje moyo wathu. Koma ndise otembeja maninge ndawa tinathandizo ya Yahova. Mu nkhani yapita ire tidakumbusiwa kuti Yahova ni Mulungu wamoyo ndipo nthawe zose ni wokonzeka kutithandiza. Iye akambachita vimwevi tibvesa kuti ‘Yahova ni wamoyo.’ (Werengani Salimo 18:46.) Koma Mpfumu Davide patsogolo pakuti wanemba vimwevi adanena kuti Yahova ni ‘Dwale yangu.’ Ndawa chani iye adalinganiza Yahova Mulungu wamoyo na chinthu chomwe chiribe moyo chomwe ni dwale?
2. Ko tipfunzire chani mu nkhani mweyi?
2 Mu pfunziro mweyi tione kuti ndawa chani Yahova anenewa kuti ni dwale na vomwe tingapfunzire pa chitsanzo mwechi. Tione pomwe kuti ndawa chani tichadekana kuthemba Yahova na kunena kuti iye ni Dwale yathu. Pakumalizira tione njira zinango zomwe tingatewedzerere makhalidwe ya Yahova.
NDAWA CHANI YAHOVA ALINGANIZIWA NA DWALE?
3. Ndawa chani Baibolo iphatisa basa mawu yakuti ‘dwale’? (Onani foto .)
3 Baibolo iringaniza Yahova na ‘dwale’ pakufuna kutithandiza kudziwa bwinobwino makhalidwe yake. Nthawe zizinji atumiki wake amulemekeza ndawa ya makhalidwe yake yodabwisa ndipo anena kuti Yahova ‘ni Dwale.’ M’Baibolo ulendo woyamba pomwe Yahova anenewa kuti ni Dwale ni palemba ya Deuteronomo 32:4. Mupemphero yake Hana adanena kuti ‘palibe dwale yolingana na Mulungu wathu.’ (1 Sam. 2:2) Habakuku adanena kuti Yahova ni ‘Dwale yangu.’ (Hab. 1:12) Wonemba Salimo 73 adanena kuti Yahova ‘ni Dwale yapantima pangu.’ (Sal. 73:26) Olo pomwe Yahova ambadzinena yekha, ambadzilinganiza pomwe na dwale. (Yes. 44:8) Manje naboni tione makhalidwe yatatu ya Yahova yomwe yaonesa kuti iye ali ninge dwale, tipfunzire pomwe momwe tingaonere Yahova ninge ‘Dwale yathu.’—Deut. 32:31.
Yahova ali ninge dwale kwa atumiki wake (Onani ndime 3)
4. Ko Yahova ni malo yothawirapo mwanjira iponi? (Salimo 94:22)
4 Yahova ni malo yothawirapo. Pa nthawe ya chimphepo isepano tingaone kuti mphako ni malo yabwino yothawira. Nchibodzibodzimbo tikambagumana na mabvuto pa moyo wathu, Yahova angatiteteze. (Werengani Salimo 94:22.) Yahova adzatithandize kuteteza ushamwali wathu na iye ndipo atitsimikizira kuti palibe bvuto iriyose yomwe tingagumane nayo manjeuno yomwe ingatidzongeretu. Koma iye ankupolomisa kuti adzachite vizinji kuposha pamwapa ndipo kutsogolo adzachose chinthu chirichose chomwe chitichitisa kuti timbabonere.—Ezek. 34:25, 26.
5. Ko Yahova angakhale tani malo yathu yothawirapo ninge dwale?
5 Njira ibodzi yomwe tigumanira thandizo kwa Yahova ni pemphero. Tikambapemphera Yahova atipasa “ntendere wa Mulungu” ndipo uteteza ntima wathu na maganizo yathu. (Afil. 4:6, 7) Onani vomwe vidachitikira Artem, m’bale munango yemwe adaikhiwa mudjeri ndawa ya chikhulupiriro chake. Ofufudza nkhani adamubvunza mobwerezabwereza na kumuchitira vinthu va nkhanza ndipo adamugopsa. Iye adanena kuti: “Nthawe zose pomwe ofufudza mwawa ambanichemera nimbakhala na nkhawa. . . . Nthawe zose nimbapemphera kwa Yahova kukumbira ntendere wamuntima na nzeru. Njira zose zomwe adaphatisa basa ziribe kuphata basa kwa inepano. . . . Na thandizo ya Yahova venze ninge ninkutetezeka na m’panda.”
6. Ndawa chani nthawe zose tichadekana kuthemba Yahova? (Yesaya 26:3, 4)
6 Yahova ni wothembeka. Ninge phiri panango kuti chidwale chomwe chingachosewelini pa malo yake, Yahova adzachinjelini ndipo ni wokonzeka nthawe zose kutithandiza. Isepano tingamuthembe ndawa iye ‘ni Dwale mpakana kalekale.’ (Werengani Yesaya 26:3, 4.) Yahova adzakhale na moyo mpakana kalekale ndipo ni wokonzeka kukwanirisa mapolomisi yake, kubvesera mapemphero yathu na kutithandiza tikadekana thandizo. Tingamuthembe pomwe Yahova ndawa iye ni wokhulupirika kwa omwe amutumikira. (2 Sam. 22:26) Iye adzayebwelini pa vomwe tidachita pakumutumikira ndipo adzatidalise ndawa ya vimwevi.—Aheb. 6:10; 11:6.
7. Ko chingachitike ni chani tikambathemba Yahova? (Onani pomwe foto.)
7 Tingambaone Yahova ninge Dwale tikambamuthemba nthawe zose. Tinachitsimikizo chokwana chakuti vidzakhale vabwino kwa isepano tikambamubvera podiya tichigumana na mabvuto. (Yes. 48:17, 18) Nthawe zose pomwe tinkuona momwe Yahova ankutithandizira, chikhulupiriro chathu kwa iye chiyingizirika ndipo tikhala na chitsimikizo chakuti ni Yahova yekha yemwe angatithandize kuti tipirire chiyeso chirichose viribe basa kukula kwake. Nthawe zizinji tikambapirira mabvuto yomwe yaoneka kuti tingayakwaniselini, tibvesa momwe tingathembere Yahova. Nteneretu momwe adabvera m’bale Vladimir. Iye adanena kuti: “Nthawe yomwe nenze mudjeri ndipo pomwe ushamwali wangu na Yahova udakhala wolimba maninge. Nidapfunzira kuthemba Yahova ndawa nenze nekha palibe chomwe nidakachita pampale.”
Tingayikhe Yahova kukhala dwale yathu tikambamuthemba maninge (Onani ndime 7)
8. (a) Ndawa chani tinganene kuti Yahova achinjalini? (b) Ko ndawa chani ni vabwino kuona Yahova kuti ni malo yathu yothawirapo? (Salimo 62:6, 7)
8 Yahova achinjalini. Ninge dwale ikulu, makhalidwe na cholinga cha Yahova vichinjalini. (Mal. 3:6) Pomwe Adamu na Hava adaleka kubvera Yahova, iye alibe kuchinja cholinga chake kwa wanthu. Ntumi Paulo adanena kuti Yahova “angadzilambelini.” (2 Tim. 2:13) Vimwevi vinkutanthauza kuti viribe basa vomwe vingachitike panango vomwe anango angachite, Yahova adzachinjelini momwe achachitira vinthu, volinga vake panango malamulo yake. Isepano tingathembe Mulungu wathu yemwe achinjalini kuti adzatithandize pa nthawe zoshupa ndipo adzakwanirise mapolomisi yake yose yakutsogolo.—Werengani Salimo 62:6, 7.
9. Ko tapfunzira chani pa vomwe vidachitikira Tatyana?
9 Tikambaganizira va makhalidwe ya Yahova na cholinga chake kwa wanthu na dziko yapasi, vidzatithandize kukhala odekha na kukhala okhulupirika kwa iye pa nthawe ya mabvuto. (Sal. 16:8) Ni vimwevi vomwe vidachitika na mulongo munango dzina yake Tatyana yemwe adaikhiwa mudjeri ya pamuyi ndawa ya chikhulupiriro chake. Iye adati: “Nidakhaliratu nekhanekha, vimwevi venze voshupa pakuyamba ndipo nidakhala wokhumudwa maninge.” Koma iye adayamba kuganizira va Yahova na cholinga chake kwa wanthu ndipo adabvesa kudekana kolimbana na bvuto yomwe ambagumana nayo. Vimwevi vidamuthandiza kuti akhale wodekha nakuti akwanise kupirira. Iye adanena pomwe kuti: “Kubvesa ndawa yake vinvire vimbanichitikira vidanithandiza kudziwa kuti ninkugumana na vimwevi ndawa ya Yahova. Vimwevi vidanithandiza kuti nileke kumbadziganizira nekha.”
10. Ko tingaikhe tani Yahova kukhala Dwale yathu?
10 Manjemanjepa isepano tipite mu nthawe yoshupa maninge, ndipo tidzadekane kuthemba maninge Yahova kuposha kale. Ndipomwapa kundoyambira manjeuno ni vabwino kulimbisa chikhulupiriro chathu kuti iye adzatipase thandizo iriyose yomwe tidzadekane kuti tipitirize kukhala okhulupirika kwa iye. Ko tingachite tani vimwevi? Tingachite vimwevi mwa kuwerenga nkhani za m’Baibolo za atumiki wa Yahova wakalekale na nkhani za abale na alongo wa manjeuno omwe adathandiziwa kupitiriza kukhala okhulupirika kwa Yahova. Pa kuwerenga nkhani mwezi, ganizirani momwe Yahova adathandizira wanthu wake ndipo patulani nthawe yoganizira vitsanzo vimwevi. Imwepo mukachita vimwevi mudzaone kuti Yahova ni Dwale yanu.
TEWEDZERANI MAKHALIDWE YA YAHOVA
11. Ko ndawa chani tichadekana kutewedzera makhalidwe ya Yahova? (Onani pomwe bokosi yakuti: “ Volinga vomwe abale wachilumbwana angakhale navo.”)
11 Mpaka pano taona makhalidwe yabwino ya Yahova yomwe yamuchitisa kuti iye ambalinganiziwe na dwale. Manje naboni tione momwe tingatewedzerere makhalidwe mwaya. Tikachita vomwe tingakwanise kuti titewedzere Yahova, tidzakwanise kulimbisa abale wathu. Mwakulinganiza, Yesu adapasa Simoni dzina yakuti Kefa (yomwe pakutsumbudzuliriwa ni ‘Petulo’), dzina mweyi itanthauza ‘pitsi ya dwale.’ (Yoh. 1:42) Mwanjira mweyi, Yesu adachitisa kuti tibvese kuti Petulo adzalimbikise abale wa mumpingu na kulimbisa chikhulupiriro chawo. Akulu mumpingu anenewa kuti ‘ni nthunzi wachidwale.’ Vimwevi vinkutanthauza kuti akulu ateteza abale mumpingu. (Yes. 32:2) Ni vobveka kuti tose tingatewedzere makhalidwe ya Yahova pakulimbikisa abale na alongo mumpingu.—Aef. 5:1.
12. Ko tingakhale tani malo yothawirako abale wathu?
12 Khalani malo yothawirapo. Abale na alongo akambagumana na matsoka yanchilengedwe panango kubonera na nkhondo pangadekane kuwapasa thandizo yakuthupi. Vochitika va “ntsiku zomalizira zino” vipitirize kuipiraipira, mosakaika vidzatipase mwayi wakuti tipitirize kuthandiza abale wathu. (2 Tim. 3:1) Kuingizira pa kuwapasa vinthu vakuthupi, tingalimbikise pomwe abale wathu pakuwaonesa chikondi chomwe ankudekana. Njira ibodzi yomwe tingachitire vimwevi ni kucheza nawo pa misonkhano ya mpingu nkuwalimbikisa. Tinkufuna kuti mpingu ukhale na makhalidwe yomwe yangalimbikise abale na alongo. Tinkukhala mudziko yoshupa, iribe chikondi komasoti yodesa nkhawa. Ndipomwapa abale na alongo wathu akambayenda kumisonkhano tinkufuna kuti ambadzibve kuti akondewa, alimbikisiwa komasoti ni otetezeka.
13. Ko akulu angakhale tani malo yathawirapo? (Onani pomwe foto.)
13 Akulu angakhale malo yothawirapo ya abale omwe ankugumana na viyeso vizinji. Pa nthawe ya tsoka ya chilengedwe na pomwe tadwala mwadzidzi, akulu mwakankulumize akonza vakuti atithandize. Abale akhala omasuka kukumbira thandizo kwa nkulu yemwe achayesesa kuti ambabvese momwe abale ankubvera. Nkulu yemwe aonesa makhalidwe mwaya adzachitise kuti abale ambadzibve kuti akondewa. Ndipo vidzakhale vosashupa kuti abale atewedzere malangizo ya m’Baibolo yomwe akulu ayapereka.—1 Ates. 2:7, 8, 11.
Akulu ni malo yothawirako ya abale pa nthawe zoshupa (Onani ndime 13) a
14. Ko tingaonese tani kuti ndise othembeka?
14 Khalani wothembeka. Isepano tinkufuna kuti wanthu anango ambadzibve kuti tingawathandize akagumana na mabvuto. (Miy. 17:17) Ko nchani chomwe tingachite kuti abale adziwe kuti ndise wothembeka? Tingachite vomwe tingakwanise kuti titewedzere Yahova pa vomwe tichachita ntsiku na ntsiku. Mwakulinganiza, kukwanirisa vomwe tapolomisa na kusunga nthawe. (Mat. 5:37) Ndipo tingachite pomwe vomwe tingakwanise kuti tithandize munthu yemwe ankudekana thandizo. Kuingizira mwapa tinkufuna kukwanirisa udindo wathu mumpingu mobverana na malangizo yomwe tichatambira.
15. Ko akulu omwe ni othembeka alimbikisa tani mpingu?
15 Akulu omwe ni othembeka ni mphaso mumpingu. Mwanjira iponi? Abale akadziwa kuti nthawe zose angachemere nkulu pomwe ankudekana thandizo, iwo akhala odekha. Abale adzibva pomwe kuti akondewa akadziwa kuti akulu ni okonzeka kuwapasa thandizo yomwe ankudekana. Abale angathembe pomwe maninge akulu akambaphatisa basa Baibolo komasoti vofalisa vathu pakupereka malangizo osati nzeru zawo. Kuingizira mwapa, abale na alongo athemba maninge akulu omwe auzalini wanthu anango nkhani zawo zachintsintsi ndipo akwanirisa vomwe apolomisa.
16. Ko ndawa chani ni vabwino nthawe zose kutewedzera malangizo ya Yahova?
16 Pitirizani kutewedza malangizo ya Yahova. Peno tibvera Yahova pa vinthu vose na kusalula vochita mobverana na mpfundo za m’Baibolo, tingakhale chitsanzo chabwino kuti anango atewedzere. Tikambapfunzira Baibolo na kulimbisa chikhulupiriro chathu kwa Yahova, tidzakhale okhulupirika kwa iye na kuthemba malamulo yake. Tidzasokonezewelini na vipfunziso vabodza ne kaganizidwe komwe ni kosiyana na komwe Yahova achatipfunzisa m’Baibolo. (Aef. 4:14; Yak. 1:6-8) Tikatambira ntontholo woipa tikhala odekha ndawa tikhulupirira mapolomisi ya Yahova. (Sal. 112:7, 8) Ndipo tingathandize pomwe wale omwe ankugumana na mabvuto.—1 Ates. 3:2, 3.
17. Ko akulu angathandize tani abale kukhala na chikhulupiriro cholimba?
17 Akulu achadekana kukhala wanthu osachita vinthu mopitirira malire, oganiza bwino, ochita vinthu mwadongosolo na otambira bwino alendo. Akulu athandiza pomwe wanthu anango kukhala odekha na kukhala na chikhulupiriro cholimba kwa Yahova. Iwo alimbikisa pomwe mpingu “pakuphata mwamphanvu mawu yokhulupirika.” (Tito 1:9; 1 Tim. 3:1-3) Na chitsanzo chawo komasoti ulendo waubusa athandiza abale kuti nthawe zose ambagumanike pa misonkhano, mu umboni na kumbachita pfunziro ya paokha. Abale akagumana na bvuto nkukhala okhumudwa, akulu awakumbusa ubwino wokhulupirira Yahova na kuikha maganizo yawo pa mapolomisi yake.
18. Ndawa chani tichadekana kulemekeza Yahova na kupitiriza kumufenderera? (Onani bokosi yakuti: “ Momwe tingamufenderere Yahova.”)
18 Manje pomwe tapfunzira makhalidwe yanango ya Yahova, isepano tinganenembo ninge Mpfumu Davide kuti: ‘Alemekezeke Yahova, Dwale yangu.’ (Sal. 144:1) Isepano nthawe zose tingathembe Yahova kwa moyo wathu wose. Olo tichikalamba tithemba kuti Yahova adzapitirize kutithandiza kuti tipitirize kumufenderera ndipo tinganene kuti ‘Yahova ni Dwale yangu.’—Sal. 92:14, 15.
NYIMBO NA. 150 Bwerani kwa Mulungu Kuti Mupulumuke
a MAWU YOFOTOKOZERA MAFOTO : Mu Nyumba ya Ufumu, mulongo ankudzibva kukhala womasuka kucheza na akulu awiri.
