1. Juʼuts nɨmpa Salmo 18:​46, ¿kun tyi ikukiʼps David a Jehová?

 SƗƗ juchixkej itypa kukaki y dyaʼ tanjoodon̈ juchix wɨap ikukak tañityi. ¡Tsaam tamaymaytyam iga Jehová wɨap tayooxpaʼttaʼm! Jeʼm kuyuuji naswɨʼɨp tan̈kɨʼpin̈taʼm iga Jehová jeʼam jeʼm Dios vivo y juchixkej tayooxpaʼttaʼmpa. Jeʼyukmɨ, majnam tan̈wɨkupɨktaʼmpa iga «Jehová ity», juʼuts nɨm David en Salmo 18:46 (maayɨʼ). a Pero maaj okmɨ David iñɨʼmay Jehová «manTsaʼ». ¿Tyiʼiga nɨm iga Jehová jeʼm Dios vivopɨk, jeex juʼuts tuum Tsaʼ iga dyaʼ tsɨʼgoʼyba?

2. ¿Tyi tan̈kɨʼpin̈taʼmpa yɨʼp kuyujijom?

² Yɨʼp kuyujijom tan̈kɨʼpin̈taʼmpa tyiʼiga jeʼm Biblia nɨmpa iga Jehová jeex juʼuts tuum tsaʼ y tanaʼmpa tyi tan̈kejaytyaʼmpa. Tanaʼmtaʼmpatyim tyi tan̈wattaʼmiñ iga Jehová tsɨʼyiñ juʼuts tanTsaʼ. Tan̈kɨʼpin̈batyim juutypɨk wɨap tan̈watkiʼpsaytyaʼm jeʼm icualidades.

TYIʼIGA JEʼM BIBLIA NƗMPA IGA JEHOVÁ JEEX JUʼUTS TUUM TSAʼ

3. ¿Juutypɨk ipɨkpa jeʼm Biblia jeʼm an̈maatyi tsaʼ? (Aʼmɨ jeʼm imagen itywɨʼɨp yɨʼp totjaayi iwiñjom).

³ Jeʼm Biblia ikukiʼpspa Jehová kun tuum tsaʼ iga tayooxpaʼttaʼmpa tan̈kuyɨʼɨyɨytyaʼm weeñi cualidades iniitywɨʼɨp. Jaʼyan̈ textos nɨmpa iga jesɨk jeʼm iyooxakɨʼɨwiñyaj ikujiʼpyaj por jeʼm iwɨtampɨk cualidades, nɨmyaj iga jeex juʼuts tuum tsaʼ. Deuteronomio 32:4 jeʼam jeʼm wiñtyipɨk texto ijɨykimpaʼap iga Jehová «jeʼam jeʼm Tsaʼ». Jesɨgam Ana in̈wejpaʼt Jehová nɨm iga «dyaʼ i tuum tsaʼ juʼuts tanDios» (1 Sam. 2:2). Habacuc iñɨʼmay Jehová «manTsaʼ» (Hab. 1:12). Jempɨk ijay jeʼm Salmo 73 ipɨk jeʼm an̈maatyi «jeʼam jeʼm tsaʼ ananmajom» (Sal. 73:26). Y  Jehová nɨmtyim iga jeʼam jeʼm «Tsaʼ» (Is. 44:8). Tan̈kɨʼpin̈taʼmpa tukuteen cualidades iga ikwiñkejpa tyiʼiga Jehová jeex juʼuts tuum tsaʼ y tyi wɨap tan̈wattaʼm iga tsɨʼyiñ juʼuts «tanTsaʼ» (Deut. 32:31).

4. ¿Tyiʼiga tannɨmpa iga wɨap tanyamkaʼ Jehová? (Salmo 94:22).

⁴ Wɨap tanyamkaʼ Jehová. Jesɨk miñba tuum wɨdyay kutujkɨʼ algun i wɨap iyam tuum josom o tuum mɨjpɨk tsaʼkukɨʼɨm. Jeempɨktyim naspa siiga tanan̈an̈kamokpa yaʼachaajiyaj, wɨap tamyamkataʼm Jehová (maayɨʼ Salmo 94:22). b Jeʼ takupujpa y dyaʼ iaʼmchiʼiba iga juchixkej tayaʼachataʼmiñ. Ijɨykamnetyim iga tannɨgɨyoʼoyijom iktogoyba ityumpɨy jempɨk tayaʼachwattaʼmpa (Ezeq. 34:​25, 26).

5. ¿Tyi wɨap tan̈wattaʼm iga wɨaiñ tanyamkaʼ Jehová?

⁵ Wɨap tanyamkaʼ Jehová jesɨk tanan̈wejpaʼttaʼmpa. Siiga tan̈watpa yɨʼɨmpɨk tampɨktson̈taʼmpa «jém wɨbɨc jɨ̱xi», iga ikupujpa jeʼm tanjɨɨxi y tananmaj (Filip. 4:​6, 7). Tanaʼmtaʼmiñ jempɨk iñaskaʼ Artiom, tuum tɨɨwɨ iga pajneta idyɨk. Watykɨy iyaʼachɨy jesɨk tuum investigador ityeguedɨʼyba idyɨk iga ikutson̈iñ jempɨk akwaʼktaap idyɨk. Jeʼ nɨmpa: «Jesɨk mojpa idyɨk akwaʼkta, tsaam pɨɨmi an̈yaʼkpa. [...] Juchixkej anan̈wejpaʼt Jehová iga achiʼiñ paz y joodon̈oʼoyi. An̈kupɨk Jehová mex iga ayaʼachwatta [...]. Jehová keʼnam idyɨk tuum muralla iga akupuj».

6. ¿Tyiʼiga juchixkej wɨap tanaidyaytyaʼm confianza Jehová? (Isaías 26:​3, 4).

⁶ Wɨap tanaidyay confianza Jehová. Juʼutstyim tuum mɨjpɨk tsaʼ o tuum kootsɨk iga dyaʼ tsɨgoʼyba, tanjoodon̈tam iga Jehová juchixkej tayooxpaʼttaʼmpa. Wɨap tanaidyaytyaʼm confianza iga «jeʼam jeʼm Tsaʼ itypaʼap juchixkej» (maayɨʼ Isaías 26:​3, 4). c Juchixkej itypa iga ikkupakpa jempɨk ijɨykamneʼ, ikumaton̈ba jeʼm tanan̈wejpadoʼoyi y tayooxpaʼttaʼmpa. Tan̈wɨkupɨkneʼ iga Jehová dyaʼ ijagan̈tsakpa jeʼm iyooxakɨʼɨwiñyaj (2 Sam. 22:26). Dyaʼ ikujaʼamaʼyba jempɨk tan̈watnetaʼm y takumaykettaʼmpa (Heb. 6:10; 11:6).

7. ¿Juutypɨk tawɨwadaʼyba tanaidyay confianza Jehová? (Aʼmɨtyim jeʼm imagen).

⁷ Jehová tsɨʼybatyim juʼuts tanTsaʼ jesɨk tanaidyaʼyba confianza. Tsaam tawɨwadaʼyba jesɨk tan̈kupɨkpa mex iga tayaʼachataʼmpa (Is. 48:​17, 18). Y jesɨk tanaʼmpa juutypɨk tayooxpaʼtpa majtyim tanaidyaʼyba confianza. Numaaj Jehová tayooxpaʼttaʼmpa tanan̈an̈kamoktaʼm juʼptyin̈kej kutɨʼɨchiyaj y juchixkej iwatpa. Tuum tɨɨwɨ iñɨɨyipɨk Vladímir  nɨm: «Jesɨk apajta anjaam iga majtyim an̈kunuʼk Jehová. Dyaʼ wɨap idyɨk an̈kukagay jempɨk sɨʼ annaskaʼ y majtyim moj anaidyay confianza Jehová iga aity idyɨk an̈kutyum».

8. a) ¿Tyiʼiga tanɨmpa iga Jehová dyaʼ kukakpa? b) ¿Juutypɨk tayooxpaʼtpa tanaʼm iga Jehová jeex juʼuts tanTsaʼ? (Salmo 62:​6, 7).

⁸ Jehová dyaʼ kukakpa. Juʼutstyim tuum mɨjpɨk tsaʼ y tuum mɨjpɨk kootsɨk, Jehová dyaʼ kukakpa. Y jempɨk ijɨɨsneʼ iga iwatpa dyatyim kukak (Mal. 3:6). Jesɨk Adán y Eva dyaʼ kupɨgoyyaj Jehová dyaʼ ikukak jempɨk ijɨɨsneʼ iga iwatpa. Jeʼm apóstol Pablo nɨm iga Jehová «d́a wɨa̱p tamɨgóyáy» (2 Tim. 2:13). Yɨʼp nɨmtoʼoba iga dyaʼ tyi ijoo tyi naspa, jeʼ dyaʼ kukakpa, dyatyim ikukakpa jempɨk ijɨɨsneʼ, ni jeʼm ian̈kiʼmayoʼoyiyaj. Jeʼyukmɨ, tan̈wɨkupɨknetaʼm iga jesɨk tayaʼchataʼmpa jeʼ tayooxpaʼttaʼmpa y ikkupakpa ityumpɨy jempɨk ijɨykamneʼ tannɨgɨyoʼoyijom (maayɨʼ Salmo 62:​6, 7). d

9. ¿Tyi min̈kejaʼyba jempɨk iñaskaʼ Tatiana?

⁹ Tayooxpaʼtpatyim tanaʼm Jehová juʼuts tuum tsaʼ, jesɨk tanjɨɨskupakneʼeba juʼutspɨk icualidades iniity y jempɨk ijɨɨsneʼ iga iwatpa. Yɨʼp tayooxpaʼttaʼmpa iga tanaidyiñ tuum wɨbɨk jɨɨxi y odoy tanjagan̈tsaktaʼmiñ jesɨk tayaʼachataʼmpa (Sal. 16:8). Jeʼam iñaskaʼ Tatiana, tuum yoomtɨwɨ iga jeʼm an̈jagoʼoyiyaj ipajyaj ityɨkkɨʼɨm. Jeʼ nɨm: «Ateguedɨyyaj iga atsɨʼyiñ an̈kutyum». [...] «Tsaam tan̈kaʼ idyɨk y a veces an̈yaʼkpa». Jesɨk ijɨɨs iga jempɨk sɨʼ iñaskaʼ tɨgɨykuʼmpa idyɨk kun Jehová y jempɨk ijɨɨsneʼ iga iwatpa, iyooxpaʼt iga iyaʼachɨʼyiñ. Jeʼ nɨm: «Jesɨk anjɨɨs iga sɨʼ idyɨk anyaʼacha iga antoyba Jehová y an̈wattoʼoba jempɨk jeʼ ikusuʼnɨʼyba. Ayooxpaʼt iga odoy anjɨɨsjɨɨsneiñ jempɨk sɨʼ idyɨk annaskaʼ».

10. ¿Tyi wɨap in̈wat iga dende sɨɨ iñaʼmiñ Jehová juʼuts iñchaʼ?

¹⁰ Dyaʼ jaʼyñeʼ majtyim tan̈kaʼap tañityityam, jeʼyukmɨ nasuntaap iga majnam tanaidyaʼyiñ confianza Jehová. Dende sɨɨ tan̈wɨkupɨkneiñ iga jeʼ tayooxpaʼtpa tanyaʼachɨytyaʼm y tan̈kupɨgoytyaʼm. ¿Tyi wɨap in̈wat? Maayɨʼ nasɨyoʼoyiyaj itywɨʼɨp Bibliajom y yɨʼp jaamapɨk. Kujɨɨsɨ juutypɨk Jehová ikwiñkejneʼ iga jeex juʼuts tuum tsaʼ. Yɨʼbam miyooxpaʼtpa iñaʼm Jehová juʼuts iñchaʼ.

TAN̈WATKIʼPSAYTYAʼMIÑ JEʼM JEHOVÁ ICUALIDADES

11. ¿Tyiʼiga wɨɨ iga tan̈watkiʼpsaytyaʼmiñ jeʼm Jehová icualidades? (Aʼmɨtyim jeʼm recuadro « Tuum meta iga wɨap ikkupakyaj jempɨk mañiyaj»).

¹¹ Tanaʼmnetaʼmum weeñi cualidades iniitywɨʼɨp Jehová juuty ikwiñkejpa iga  jeʼ jeex juʼuts tuum tsaʼ. Sɨɨ tanaʼmtaʼmpa juutypɨk wɨap tan̈watkiʼpstaʼm. Siiga tan̈watkiʼpsaytyaʼmpa juʼtspɨy tawɨap, wɨap tanyooxpaʼtyaj jeʼm tɨwɨtam ityyajwɨʼɨp tan̈kumunjom. Tan̈kujɨɨstaʼmiñ jesɨgam Jesús iknɨʼɨya Simón juʼuts Cefas (nɨmtoʼoba Pedro y yɨʼp nɨmtoʼoba «tuum jaakaʼ tsaʼ») (Juan 1:42). Sɨʼ idyɨk iñɨm iga Pedro ianmajan̈chiʼiba y iyooxpaʼtpa jeʼm kumun. Jeʼm Biblia nɨmpatyim iga jeʼm ancianojyaj jeex juʼuts «tuum wɨdyay tsaʼ ikumun̈kɨʼ» iga ikuixpa jeʼm tɨwɨtam ityyajwɨʼɨp jeʼm kumunjom (Is. 32:2). Tantumpɨytyam wɨap tan̈watkiʼpsaytyaʼmpa jeʼm Jehová icualidades y tantsɨytyaʼm juʼuts tuum tsaʼ jesɨk tanyooxpaʼttaʼmpa jeʼm tantɨwɨtam (Efes. 5:1).

12. ¿Juutypɨk wɨap tantsɨʼytyaʼm juʼuts tuum yamkuy?

¹² Wɨap iñchɨʼy juʼuts tuum yamkuy. Jesɨk jeʼm tɨwɨtam yaʼachayajpa ikuyukmɨ tuum desastre natural, an̈aajiyaj o tuum guerra, wɨap tanakyamyajpa tantɨkkɨʼɨm. Yɨʼp «íŋaŋpɨgam ja̱ma» majnam tayaʼachataʼmpa, jeʼyukmɨ wɨɨ iga tanayooxpaʼttamtaiñ (2 Tim. 3:1). Wɨaptyim tantsɨʼy juʼuts tuum yamkuy jesɨk tanyooxpaʼttaʼmpa emocional y espiritualmente jeʼm tantɨwɨtam. Siiga tan̈wɨpɨktson̈yajpa jeʼm An̈tuʼumayoʼytyɨkjom, jesɨk itypa maymayaaji y toyoʼoyi. Yɨʼp naxyukmɨ jaʼyan̈yaj najooyixyajtaap y dyaʼ natoyyajtaap. Jeʼyukmɨ tansuntaʼmpa iga jeʼm tɨwɨtam ijaamyajiñ iga tan̈kuixyajpa y tantoyyajpa jesɨk miñyajpa jeʼm an̈tuʼumaajijom.

13. ¿Juutypɨk tsɨʼyyajpa jeʼm ancianojyaj juʼuts tuum yamkuy? (Aʼmɨtyim jeʼm imagen).

¹³ Jeʼm ancianojyaj tsɨʼyyajpa juʼuts tuum yamkuy jesɨk jeʼm tɨwɨtam  in̈an̈kamokyajpa tan̈kapɨk nasɨyoʼoyiyaj. Jesɨk naspa tuum desastre o tuum emergencia médica, jobitytyi yooxpadoyyajpa. Chioyyajpatyim yooxpadoʼoyi espiritual. Siiga tuum anciano toyoʼyba, yaʼachan̈jamoʼyba y wɨkumaton̈oʼyba, wɨapsɨ iga jeʼm tɨwɨtam jobitytyi iwaʼgaʼyyajpa yooxpadoʼoyi. Yɨʼɨmpɨgam ijaamyajpa iga toyyajtaap y maaj dyaʼ tan̈kaʼap ikupɨkyaj jesɨk tuum anciano in̈kiʼmyajpa kun jeʼm Biblia (1 Tes. 2:​7, 8, 11).

14. ¿Tyi tan̈wadyiñ iga tanaidyaytyaiñ confianza?

¹⁴ Tanaidyaytyaiñ confianza. Tansuntaʼmpa iga tun̈gakyaj iaʼmyajiñ iga wɨap tanyooxpaʼtyaj (Prov. 17:17). ¿Tyi tan̈wadyiñ iga tanaidyaytyaiñ confianza? Tan̈watkiʼpstaʼmiñ Jehová, tanakkupaguiñ y tan̈wadyiñ jempɨk tanɨmneʼ (Mat. 5:37). Wɨaptyim tanyooxpaʼtyaj tun̈gakyaj, y jesɨk tachiʼityamtaap tuum yooxakuy tan̈wattaʼmiñ juutypɨgam tanɨʼmaytyaap.

15. ¿Juutypɨk iwɨwadaʼyba jeʼm kumun jesɨk jeʼm ancianojyaj ikwiñkejyajpa iga wɨap iniidyayajta confianza?

¹⁵ Jesɨk jeʼm ancianojyaj naidyayyajtaap confianza iwɨwadaʼyba jeʼm kumun. Siiga tuum anciano ichiʼiba confianza jeʼm tɨwɨtam putyajpaʼap jeʼm  an̈matkuyjom iga jɨyñɨgaytyaiñ jesɨk ixunyajpa yooxpadoʼoyi, ijaamyajpa iga wɨkuixyajtaap. Jesɨk jeʼm ancianojyaj juchixkej iyooxpaʼtyajpa jeʼm tɨwɨtam ijaamyajpa iga toyyajtaap. Siiga tuum anciano ipɨkpa jeʼm Biblia y jeʼm totjaayiyaj jesɨk chioʼyba tuum an̈kiʼmayoʼoyi, jeʼm tɨwɨtam majnam iniidyayyajpa confianza. Jeempɨktyim naspa siiga dyaʼ in̈matyajpa jempɨk an̈madayyajtaap y ikkupakyajpa in̈maatyi.

16. ¿Juutypɨk tayooxpaʼtpa siiga juchixkej takupɨgoytyaʼmpa, y juutypɨk iwɨwadaʼyba tun̈gakyaj?

¹⁶ Juchixkej kupɨɨkɨ Jehová. Jesɨk tan̈kupɨktaʼmpa Jehová y tantsaktaʼmpa iga jeʼm Biblia tajɨɨxian̈chiʼiñ, tan̈wɨpɨktaʼmpa tanjɨɨxi. Siiga juchixkej tan̈kuyujkataʼmpa jeʼm Biblia y tapɨɨmchiʼityaʼmpa jeʼm tanfe, majnam tan̈kupɨkpa y tamɨjaap espiritualmente. Yɨʼp tayooxpaʼtpa iga odoy tan̈kupɨkyajiñ jempɨk tamɨgoyayyajtoʼoba (Efes. 4:14; Sant. 1:​6-8). Jeʼm confianza tanaidyaywɨʼɨp Jehová y jeʼm ijɨykamoʼoyiyaj wɨap tayooxpaʼt jesɨk tanɨʼmaytyaap algun tyi iga wɨap tayaʼachwat (Sal. 112:​7, 8). Wɨaptyim tanyooxpaʼttaʼm jempɨk sɨʼ iyaʼachayaj (1 Tes. 3:​2, 3).

17. ¿Tyi iyooxpaʼtyajpa jeʼm ancianojyaj iga ipɨɨmchiyajiñ y iyooxpaʼtyajiñ jeʼm kumun?

¹⁷ Jeʼm ancianojyaj kupɨgoyyajiñ, iniityyajiñ tuum wɨbɨk jɨɨxi y ikutɨʼɨyɨyyajiñ tun̈gakyaj. Jesɨk ikupɨkyajpa jeʼm Dios Inmaatyi, ipɨɨmchiyajpa y iyooxpaʼtyajpa jempɨk ityyaj jeʼm kumunjom (Tito 1:9; 1 Tim. 3:​1-3). Siiga iwatyajpa yɨʼɨmpɨk y iwɨkuixyajpa jeʼm an̈matkɨʼɨwiñyaj, iyooxpaʼtyajpa iga juchixkej nɨkyajiñ jeʼm an̈tuʼumaajiyaj, putyajiñ jeʼm an̈matkuy y wɨkuyujyajiñ iyaʼak. Y jesɨk jeʼm tɨwɨtam in̈an̈kamokyajpa tan̈kapɨk kutɨʼɨchiyaj, jeʼeyaj ianmajan̈chiʼiyajpa iga ikupɨkyajiñ Jehová y ijɨɨsyajiñ jempɨk ijɨykamneʼ.

18. ¿Tyiʼiga tan̈kujiʼptamtoʼoba y majnam tan̈kunuʼktamtoʼoba Jehová? (Aʼmɨtyim jeʼm recuadro « Tuum manera iga wɨap tan̈kunuʼk Jehová»).

¹⁸ Sɨɨ iga tan̈kɨʼpin̈netaʼmum juʼutspɨk cualidades iniity Jehová, tanɨmpatyim juʼuts David, jesɨk nɨm: «Kujiʼptaiñ Jehová, jeʼm Antsaʼ» (Sal. 144:1). Juchixkej wɨap tanaidyay confianza. Dyaʼ tyi ijoo siiga tatsaamiaap, juchixkej tayooxpaʼtpa iga odoy tanjagan̈tsaguiñ. Jeʼyukmɨ wɨap tannɨm: «Jeʼam Antsaʼ» (Sal. 92:​14, 15).