1. Eaa ta Davida kapiki anga ia Iehova i roto ia Salamo 18:46?

 TE NOO nei tatou i roto i teia ao e maata te au manamanata e ka taui takiri i to tatou oraanga. Inara pumaana tikai tatou e ka rauka te irinaki i te tauturu a Iehova! I te atikara i mua atu ana, kua akamaara tatou e e Atua ora a Iehova e kua papa ua aia i te tauturu ia tatou. Me kite tatou i tana tauturu, te akapapu maira te reira e “te ora rā Iehova!” (E tatau ia Salamo 18:46.) I muri ake i te reira, kua kapiki a Davida i te Atua e ko toku “Mato.” Eaa aia i akaaite ei ia Iehova, te Atua ora, ki te mato?

2. Eaa ta tatou ka apii mai mei te au tuatua a Davida e ko Iehova ‘toku Mato’?

² I teia atikara, ka uriuri tatou eaa a Iehova i kapikiia ai ei mato e eaa ta te reira ka apii mai no runga iaia. Ka apii katoa tatou akapeea me irinaki e koia to tatou Mato. E te mea openga, ka uriuri tatou i te au ravenga akapeea me aru i to Iehova au tu.

TE TUMU I KAPIKIIA AI A IEHOVA EI MATO

3. Akapeea te Pipiria me taangaanga putuputu i te tuatua “mato”? (Akara i te tutu.)

³ Kua akaaite te Pipiria ia Iehova ei “mato” kia tauturu ia tatou i te mārama i tona au tu. E maata te au taime kua akapaapaa te au tavini o Iehova iaia no tona au tu umere e kua akataka ratou iaia e ko “te Mato.” Te irava mua tei kapiki ia Iehova ei “mato” tei roto ia Deuteronomi 32:4. Te pure anga a Hana karanga aia, “Kare tetai mato e arite ki to tatou Atua.” (1 Samu. 2:2) Kua kapiki a Habakuka ia Iehova e ko toku “Mato.” (Haba. 1:12) Akakite te tangata tata ia Salamo 73 i te Atua e ko “te tauturu rai [me kore te mato] o toku ngakau.” (Sala. 73:26) E kua kapiki katoa a Iehova iaia uaorai ko te mato. (Isa. 44:8) Ka uriuri tatou  e toru au tu o Iehova mei te mato, e akapeea tatou me akariro iaia ei ‘Mato no tatou.’—Deu. 32:31.

4. Akapeea a Iehova i riro mai ei ei punanga? (Salamo 94:22)

⁴ Ko Iehova to tatou punanga. Me tupu tetai uriia, ka rauka te akaruruanga i roto i tetai ana. Mei tera katoa a Iehova ka paruru aia ia tatou i te au tuatau ngatā i roto i to tatou oraanga. (E tatau ia Salamo 94:22.) Ka akono e ka paruru aia ia tatou kia kore e takinoia to tatou pirianga kiaia. E kua taputou katoa aia: A te tuatau ki mua, ka takore takiriia te au mamae e te taitaia.—Eze. 34:25, 26.

5. Akapeea a Iehova e riro mai ei ei Punanga no tatou?

⁵ Ko tetai ravenga ka rauka te paruruanga mei ko ia Iehova koia oki, na te pure anga kiaia. Me pure tatou, ka oronga mai a Iehova i “te au” te ka paruru i to tatou ngakau e to tatou manako. (Phili. 4:6, 7) Akamanako i te akaraanga o Artem, tetai taeake tei tiriaia ki roto i te are auri no tona akarongo. Kua takinokinoia e kua taakamaia aia e te tangata tiaki mouauri. Karanga a Artem: “Ru tikai au me akakino mai te tiaki mouauri iaku. . . . Ka pure au kia Iehova. Ka pati au no te ’au e te pakari. Noatu te takinokino anga a te tiaki mouauri, kua noo maru ua au. . . . Kua tauturu a Iehova iaku, mei te mea atura e kua paruruia au e tetai punanga ketaketa.”

6. Eaa tatou ka irinaki ua rai ia Iehova? (Isaia 26:3, 4)

⁶ E tinamou a Iehova e kare aia e akaruke ia tatou. Mei tetai maunga kare e rauka i te akanekeia, ka tauturu ua rai a Iehova ia tatou. Ka irinaki tatou iaia no te mea e “Mato mutu kore” Aia. (E tatau ia Isaia 26:3, 4.) E Atua ora aia tei akatupu i tana au taputou, tei akarongo i ta tatou au pure e te oronga mai i te tauturu tei anoanoia. Ka irinaki katoa tatou ia Iehova no te mea e Atua tiratiratu aia ki te aronga e tavini ra iaia. (2 Samu. 22:26) Kare e ngaropoina iaia ta tatou e rave ra e ka tutaki mai aia ia tatou.—Ebe. 6:10; 11:6.

7. Eaa ta tatou ka kite mai me irinaki tatou kia Iehova? (Akara katoa i te tutu.)

⁷ Ka akariro tatou ia Iehova ei Mato me irinaki tikai tatou iaia. Me kauraro tatou kiaia noatu te au turanga ngatā, ka puapingaia tatou. (Isa. 48:17, 18) Me kite tatou i ta Iehova tauturu anga ia tatou, ka irinaki ua atu rai tatou iaia. Mea papu e ko Iehova anake te ka tauturu ia tatou kia akakoromaki i te au timataanga noatu te ngatā i te reira. I tetai au turanga me manako tatou e kare e rauka te tauturu, ka kite tatou e ko Iehova anake ta tatou ka irinaki. Karanga a Vladimir: “Kua rauka tetai pirianga vaitata kia Iehova iaku i roto i te are auri. Kua irinaki tikai au kia Iehova e koia anake te ka tauturu mai iaku kia akakoromaki.”

8. (a) Eaa tatou i karanga ai e kare a Iehova e taui? (e) Akapeea tatou e puapinga ai me ko Iehova to tatou Mato? (Sala. 62:6, 7)

 ⁸ Kare a Iehova e taui. Kua aite a Iehova ki tetai maunga te ka kore rava e ngaueue. Kare tona tu e tona akakoroanga e taui. (Mala. 3:6) Te meameaau anga a Adamu e Eva i te kainga i Edene, kare ta Iehova akakoroanga no te tangata i taui. Mei ta te apotetoro ko Paulo i tata, kare “e tika [ia Iehova] kia uuna i tana uaorai.” (2 Timo. 2:13) Tera te aiteanga, noatu eaa te ka tupu e eaa ta tetai ke ka rave, kare a Iehova e taui i tona tu, tona akakoroanga e tona au turanga. No te mea kare a Iehova e taui, kua kite tatou e ka tauturu ua rai Aia ia tatou i te tuatau ngatā e ka akono aia i tana taputou no te tuatau ki mua.—E tatau ia Salamo 62:6, 7.

9. Eaa taau i apii mai mei te akaraanga o Tatyana?

⁹ Me akamanako tatou i te au tu o Iehova e tona akakoroanga no te enua e te tangata, ka tauturu te reira ia tatou kia akariro iaia ei mato no tatou. Ka tauturu teia ia tatou kia maru e kia tiratiratu kiaia i te tuatau manamanata. (Sala. 16:8) Kua tupu teia ki te tuaine ko Tatyana, tei tapekaia i roto i te are auri no tona akarongo. Karanga aia, “Ko au anake ua i reira. E ngatā i te akamata anga e kua akaparuparu te reira iaku.” E oti, kua akamanako aia ia Iehova e tana akakoroanga no te tangata e kua kite aia i te puapinga kia akakoromaki i te au turanga ngatā. Kua tauturu teia iaia kia akaari i te tu maru e kia vai tiratiratu. Karanga aia: “Te mārama anga au i te tumu i tupu ei teia, kua maara iaku e ko Iehova anake te ka tauturu iaku e kare au e akamanako iaku uaorai.”

10. Akapeea a Iehova e riro mai ei ei Mato no tatou i teianei?

¹⁰ Kare e roa atu ana, ka na roto tatou i te au turanga ngatā e ka anoanoia tatou kia irinaki pu kia Iehova. Ko te taime tau teia no te akaketaketa i to tatou irinaki anga e ka oronga mai aia i te au mea tei anoanoia kia akakoromaki ma te tu tiratiratu. Akapeea ra? E tatau i te au tua Pipiria e te au tupuanga o te Au Kite o Iehova i teia tuatau kia kite akapeea te Atua te turuturu anga i tona au tavini. Aru mai e akamanako oonu atu i te reira. Ka tauturu teia ia koe kia akariro ia Iehova ei Mato noou.

ARU I TE AU TU O IEHOVA

11. Eaa tatou ka inangaro ei i te aru i te au tu o Iehova? (Akara katoa i te pia “ Akakoroanga no te Au Mapu.”)

¹¹ Kua uriuri tatou i te au tu o Iehova tei akariro iaia ei Mato no tatou. I teianei, akamanako ana akapeea tatou me aru i tona au tu. Me tauta tatou i te aru i to Iehova tu, ka akamaroiroi te reira i to tatou au taeake e te au tuaine i roto i te putuputuanga.  Ei akaraanga, kua tapa a Iesu i te ingoa o Simona e ko Kepha (koia oki ko “Petero”), tona aiteanga ko “te Mato.” (Ioa. 1:42) Akakite a Iesu e ka akapumaana a Petero i te putuputuanga e te akamaroiroi i to ratou akarongo. Kua akaaiteia te aronga pakari i roto i te putuputuanga mei “te marumaru o tetai mato maata.” Tera te aiteanga, ka paruru ratou i te au taeake i roto i te putuputuanga. (Isa. 32:2) Ka puapingaia te au taeake e te au tuaine pouroa me aru ratou i te au tu o Iehova.—Ephe. 5:1.

12. Akamārama mai i tetai au ravenga ka riro tatou ei punanga no tetai ke.

¹² Kia riro mai ei punanga no tetai ke. I tetai au atianga, penei ka rauka ia tatou i te oronga i te tauturu ki to tatou au taeake tei rokoia e te tumatetenga natura e te tamaki. No te kino i teia tuatau openga, ka rauka ia tatou i te tauturu i tetai e tetai. (2 Timo. 3:1) Ka rauka katoa ia tatou i te akapumaana i te au taeake i te pae ngakau e te pae vaerua. Ko tetai ravenga, koia oki te turou anga ia ratou ki te Are Uipaanga Patireia e te akaari i te aroa kia ratou. Te noo nei tatou i roto i teia ao kino, taitaia e te aroa kore. No reira, me aere mai to tatou au taeake e te au tuaine ki te au uipaanga, ka akapumaana e ka akamaroiroi tatou ia ratou.

13. Akapeea te aronga pakari me akapumaana i te au taeake? (Akara katoa i te tutu.)

¹³ Ka akapumaana te aronga pakari i te au taeake e te au tuaine i te au tuatau ngatā. Me tupu ake te au tumatetenga natura e ka anoanoia te rapakau anga viviki, ka tauturu te aronga pakari i te au taeake e te au tuaine. Ka oronga katoa ratou i te au tauturu pae vaerua. Ka māmā ua i te au taeake e te tuaine i te pati i te tauturu  a te aronga pakari me akaari ratou i te tu maru, tangi aroa e me akarongo ratou ki te au taeake. Ka kite ratou i te tu aroa o te aronga pakari e ka māmā ua ia ratou i te taangaanga i te au akoanga Pipiria te ka orongaia mai.—1 Tesa. 2:7, 8, 11.

14. Eaa ta tatou ka rave kia irinakiia mai tatou?

¹⁴ Kia irinakiia tatou. Ka inangaro tatou i tetai ke kia irinaki ia tatou i te tuatau ngatā tikai. (Mase. 17:17) Eaa ta tatou ka rave? Ka tauta tatou i te aru ia Iehova i te au rā, ei akaraanga na te rave anga i ta tatou au taputou e kia tae vave ki te ngai tei anoanoia. (Mata. 5:37) Ka oronga katoa tatou i te tauturu me anoanoia te reira. Pera katoa, ka akapapu tatou kia aruia te au ikuikuanga tei orongaia mai me rave tatou i te au angaanga i roto i te putuputuanga.

15. Akapeea te putuputuanga e puapinga ai me irinaki ratou i te aronga pakari?

¹⁵ Ka puapingaia te putuputuanga me irinakiia te aronga pakari. Akapeea ra? Me kite te au taeake e te au tuaine e ka rauka ia ratou i te pati tauturu ki te aronga pakari, ka tamaru te reira ia ratou. Me kite te au papuritia e ka tauturu te aronga pakari ia ratou, ka akapumaanaia ratou. Me taangaanga te aronga pakari i te Pipiria e te au puka ei oronga i te au akoanga e kare i to ratou manako, ka irinaki te au taeake e te au tuaine ia  ratou. Ka irinaki katoa te au taeake e te au tuaine i te aronga pakari me kare ratou e akakite i ta ratou au tuatua muna e me rave i ta ratou i taputou.

16. Akapeea tatou e tetai ke e puapingaia ai me rave tatou i te mea tika?

¹⁶ Kia tinamou. Me kauraro tatou kia Iehova i te au mea ravarai e te rave i te au ikianga mei te Pipiria, ka riro tatou ei akaraanga meitaki ki tetai ke. Me apii tatou i te Tuatua a te Atua e te irinaki ia Iehova, ka tiratiratu tatou kiaia e ka akono i tana au kaveinga. Kare katoa tatou e akavareia e te au apiianga pikikaa e te au manako kare i tau ki to Iehova. (Ephe. 4:14; Iako. 1:6-8) Me irinaki tatou kia Iehova e tana au taputou, ka maru ua tatou me akakiteia mai tetai nuti kino. (Sala. 112:7, 8) Ka tauturu katoa tatou i te au taeake e na roto nei i te au turanga ngatā.—1 Tesa. 3:2, 3.

17. Akapeea te aronga pakari me akamaroiroi i tetai ke?

¹⁷ Ka akaari te aronga pakari i te tu akono meitaki, te noo marie e te tu maru. Ka tauturu ratou i tetai ke kia maru e kia irinaki kia Iehova na te “tāpu piri tikai i te tuatua mou.” (Tito 1:9; 1 Timo. 3:1-3) Na roto i to ratou akaraanga e ta ratou akamaroiroianga, ka tauturu te aronga pakari i te au papuritia kia aere putuputu ki te au uipaanga, te piri ki te angaanga tutu aere e te rave i ta ratou uaorai apii. Me tupu te au tumatetenga ki te au taeake e te au tuaine, ka akamaroiroi te aronga pakari ia ratou kia irinaki kia Iehova e te akamou ki runga i tana au akakoroanga.

18. Eaa tatou ka akameitaki ei ia Iehova e te piri vaitata kiaia? (Akara katoa i te pia “ Tetai Ravenga no te Akavaitata Atu Kia Iehova.”)

¹⁸ Me akamanako tatou i te au tu manea o Iehova, ka rauka ia tatou i te tuatua mei te Ariki ko Davida: “Kia akameitakiiā Iehova, toku akapuanga.” (Sala. 144:1) Ka irinaki ua rai tatou kia Iehova no te tauturu. Noatu me pakarikari tatou, kia irinaki e ka tauturu ua rai a Iehova ia tatou kia piri vaitata kiaia e te karanga, e koia toku “mato.”—Sala. 92:14, 15.