1. Sova o David uporedinđa e Jehova ko Psalam 18:46?

 AMEN živinaja ko sveto kaj sebepi disave neočekivana buća, šaj te ovel amenđe but pharo ko životi ja čak šaj amaro životi potpuno te menini pe. Ama, zahvalna hijam so šaj tegani te roda pomoć ando Jehova. Ko okova članko dikhljam so o Jehova tano đivdo Devel hem soj tano uvek spremno te pomožini amen. Ked osetinaja olesi pomoć, odova uverini amen soj tano o Jehova đivdo. (Čitin Psalam 18:46.) Ama, palo odova so phenđa akala lafija, o David uporedinđa e Jehova disovaja so nane đivdo. Ov phenđa so o Jehova tano olesi „Stena“. So odova značini?

2. Sostar ka vaćera ko akava članko?

² Ko akava članko ka dikha sose šaj te phena so o Jehova tano stena hem so odova sikavi amen olestar. Isto ađahar, ka dikha sar šaj te oslonina amen upro leste sar upri amari Stena. Ko krajo, ka dikha sar šaj te oponašina e Jehovase osobine.

SOSE TANO O JEHOVA SAR STENA?

3. Sar ki Biblija često koristini pe o lafi „stena“? (Dikh i slika .)

³ I Biblija uporedini e Jehova jekha „stenaja“ te šaj te pomožini amen te haljova disave olese osobine. Ki Biblija arakhaja but thana sar e Jehovase sluge hvalinena e Devle aso olese šukar osobine hem phenena soj tano sar stena. Prvo puti aso Jehova phenđa pe soj tano sar „Stena“ ko Ponovljeni zakoni 32:4. Ki molitva, i Ana phenđa „nane stena sar soj tano amaro Devel“ (1. Sam. 2:2). O Avakum phenđa e Jehovase soj tano olesi „Stena“ (Avak. 1:12). O pisco ando 73. psalam phenđa soj tano o Devel stena ko oleso vilo  (Ps. 73:26). Čak o Jehova kokri pese phenđa soj tano stena (Is. 44:8). Akana ka dikha sebepi kola trin osobine o Jehova tano sar stena hem sar šaj te ovel „amari Stena“ (Pon. zak. 32:31).

4. Sar tano o Jehova amaro utočište? (Psalam 94:22)

⁴ O Jehova tano amaro utočište. Sar so i pećina ki jekh bari stena šaj te ovel utočište aso jekh manuš ki bari oluja, ađahar o Jehova zaštitini amen ked isi amen disavi bari oluja ko životi. (Čitin Psalam 94:22.) O Jehova šaj te zaštitini amaro amalipe oleja hem uverini amen so odova so akana doživinaja na ka cidel amen olestar. Isto ađahar, ov obećini so ka cidel sa o buća sebepi kola patinaja hem kola lena amaro mir (Jezek. 34:25, 26).

5. Sar šaj o Jehova te ovel amaro utočište?

⁵ Jekh način sar šaj o Jehova te ovel amaro utočište tano ađahar so ka molina amen olese ked isi amen problemija. Ked molinaja amen, dobinaja „e Devleso mir“ kova arakhi amaro vilo hem amari godi (Fil. 4:6, 7). Razmislin ando Artem, jekh phral kova hine ko zatvor sebepi pi vera. O manuš kova ispitinđa le but maltretirinđa le hem pokušinđa te daravi le. Ov phenela: „Hine maje pharo svako puti ked ispitinđa man [. . .] Uvek molinđum man e Jehovase. Rodinđum lestar te del man mir ko vilo hem mudrost. Odova manuš na uspinđa te daravi man [. . .] O Jehova hine maje bari zaštita, sar jekh baro zido, odolese osetinđum man sigurno.“

6. Sose šaj uvek te oslonina amen upro Jehova? (Isaija 26:3, 4)

⁶ O Jehova tano pouzdano. Sar so jekh stena tani uvek ko po than, ađahar o Jehova tano uvek othe amenđe. Amen šaj te ovel amen poverenje upro leste odolese soj tano ov „večno Stena“. (Čitin Isaija 26:3, 4.) Ov uvek ka ispunini pe obećanja, ka šunel amare molitve hem ka del amen sa so valjani amenđe. Isto ađahar, šaj te ovel amen poverenje upro leste odolese soj tano verno okolenđe kola služinena lese (2. Sam. 22:26). Ov niked na ka bistrel odova so ćeraja hem uvek ka nagradini amen (Jevr. 6:10; 11:6).

7. So ovela ked osloninaja amen upro Jehova? (Dikh i slika.)

⁷ O Jehova šaj te ovel amari Stena ako potpuno uzdajinaja amen upro leste. Amen đanaja so ako šunaja le ko pharipe odova ka ovel aso amaro šukaripe (Is. 48:17, 18). Svako puti ked dikhaja sar o Jehova pomožini amen, amaro poverenje upro leste barjola. Tegani, uverinaja amen so samo o Jehova šaj te pomožini amen te istrajina ko bilo savo problemi. Često ked isi amen disave pharipa hem nane niko ko šaj te pomožini amen, haljovaja so jedino upro Jehova šaj te oslonina amen. O Vladimir phenela: „Najpaše e Jehovaja osetinđum man đi hijum le phanlo. Mo poverenje upro leste hine tegani but baro sose hijum le kokri hem jedino ov šaj hine te pomožini man.“

8. (a) Sose šaj te phena so o Jehova tano stabilno hem so na menini pe? (b) Sar pomožini amen odova so o Devel tano amari Stena? (Psalam 62:6, 7)

 ⁸ O Jehova tano stabilno hem na menini pe. Sar so jekh bari stena aćhola isto, ađahar hem o Jehova niked na menini pi ličnost hem pi namera (Mal. 3:6). Ked hine i pobuna ko Eden, o Jehova na meninđa pi namera. Sar so o apostol Pavle pisinđa, o Jehova „našti te odreknini pe kokri pestar“ (2. Tim. 2:13). Odova značini so bizo obzir so ka desini pe ili so avera ka ćeren, o Jehova niked na ka menini pi ličnost, pi namera hem pe merilija. Odolese, uverime hijam so o Jehova uvek ka pomožini amen ko pharipa hem ka ispunini pe obećanja asi budućnost. (Čitin Psalam 62:6, 7.)

9. So sikljoveja andi Tatjana?

⁹ O Jehova šaj te ovel amari Stena ako razmislinaja ando olese osobine hem andi olesi namera e manušencar. Odova ka pomožini amen te ova stabilna hem te aćhova lese verna ked isi amen pharipa (Ps. 16:8). Ađahar hine hem amare phenjaja e Tatjanaja koja hine ko kućno pritvor sebepi pi vera. Oj phenela: „Hijum le potpuno kokri. Ki početka hine maje but pharo. Često hijum le obeshrabrimi.“ Ama, ked razmislinđa andi Jehovasi namera hem haljilji kobor tano važno te istrajini ko odova pharipe, odova dinđa la snaga te aćhol verno. Oj pana phenela: „Razmislinđum odolestar sose sa akava desini pe maje hem sebepi odova uljum svesno so ki akija situacija hijum sose mangava te ugodinav e Jehovase. Odova pomožinđa man te na razmislinav mandar.“

10. Sar šaj akana o Jehova te ovel amari Stena?

¹⁰ Pana hari, sebepi o događaija kola ka oven ka valjani te uzdajina amen upro Jehova pobuter nego iked angleder. Akana tano vreme te zorjaćera amaro poverenje ko odova so o Jehova ka del amen sa so valjani amenđe te šaj te aćhova lese verna. Sar šaj te ćera odova? Ađahar so ka čitina sar e Jehovase sluge ko purano vreme hem ko amaro vreme aćhilje lese verna. Dikh kola osobine o Jehova mothovđa ko odola situacije hem hor razmislin odolestar. Ako odova ćeraja, onda o Jehova ka ovel amari Stena.

NEK OVEN TUT SAR E JEHOVASE OSOBINE

11. Sose mangaja te oponašina e Jehovase osobine? (Dikh o okvir „ Jekh cilj e terne phralenđe“.)

¹¹ Đi akana razmotrinđam e Jehovase osobine sebepi kola tano sar stena. Akana ka dikha sar šaj te oponašina le. So pobuter oponašinaja olese osobine, pana pobuter ka zorjaćera e phralen ki skupština. Na primer, o Isus e Simonese dinđa anav Kifa (prevodimo sar „Petar“), so značini „stena“ (Jov. 1:42). O Isus manglja te phenel so o Petar ka utešini e phralen hem so ka zorjaćeri olengi vera. O starešine tane opisujime  sar „senka andi bari stena“. Odova mothovi so on zaštitinena i skupština (Is. 32:2). Naravno, sare amen šaj te ohrabrina jekh jekhe ako isi amen sar e Jehovase osobine (Ef. 5:1).

12. Sar šaj te ova utočište amare phralenđe?

¹² Ov utočište. Podijekh puti, šaj ka valjani e phralenđe te nudina doslovno utočište. Na primer, ked isi prirodna katastrofe, građanska nemirija ja mariba šaj te primina len ko amaro ćher. Ko akala „poslednja dive“ i situacija tani sa pološno hem sigurno ka ovel amen but prilike te pomožina jekh jekhese (2. Tim. 3:1). Isto ađahar, šaj te utešina amare phralen hem te mothova lenđe so mangaja len. Jekh način sar šaj te ćera odova tano ađahar so ka vaćera olencar ked avena ko sastanak sose mangaja šukar te osetinen pe. Živinaja ko sveto kuri o manuša but lošno postupinena jekh premalo jekheste. Sebepi odova, amare phralja šaj te osetinen pe nesigurna hem so niko na mangela len. Odolese, ked avena ki dvorana, mangaja te da sa amendar te utešina len hem te mothova lenđe so mangaja len.

13. Sar šaj o starešine te oven utočište e phralenđe? (Dikh i slika.)

¹³ O starešine šaj te oven utočište ki skupština okolenđe kola doživinena doslovna ja simbolična oluje ko po životi. Ked ovela disavi prirodno katastrofa ja valjani disavi hitno medicinsko intervencija, o starešine sigate organizujinena pomoć. Isto ađahar, dena sa pestar te ohrabrinen len prekali Biblija. O phralja hem o phenja ka osetinen pe slobodna te pućen jekhe starešina asi pomoć ako tano ov penđarutno sar neko ko ljubazno vaćeri averencar, pažljivo šunela len hem dela sa pestar te haljol len. Tegani ka osetinen pe soj tane  mangle hem polokho ka ovel lenđe te prihvatinen o smernice kola o starešine šaj ka den len (1. Sol. 2:7, 8, 11).

14. Sar šaj te mothova so hijam pouzdana?

¹⁴ Ov pouzdano. Amen mangaja avera te đanen so hijam spremna te pomožina lenđe ked isi len pharipa (Posl. 17:17). Sar šaj te ova penđarutne sar pouzdana manuša? Ađahar so svako dive ka da sa amendar te oponašina e Jehova. Na primer, ka trudina amen te ispunina amare obećanja hem te ova tačna (Mat. 5:37). Isto ađahar, ked đanaja so nekase valjani pomoć, amen šaj te pomožina lenđe. Ked dobinaja disavo zadatko ki skupština, mangaja te ćera le premalo uputstvija kola dobinaja.

15. Sose tane o pouzdana starešine baro blagoslov e skupštinaće?

¹⁵ O pouzdana starešine tane baro blagoslov asi skupština. Sar? Ked o objaviteljija đanena so šaj te vićinen len ked god valjani lenđe pomoć, odova pomožini len te na brininen pe preterano. Isto ađahar, on osetinena so o starešine brininena pe olendar ked tane spremna te pomožinen lenđe. Ked dena len savet andi Biblija hem  ando amare publikacije, a na phenena lenđe po mišljenje, on isi len pana pobaro poverenje upro lende. Isto ađahar, o phralja hem o phenja isi len poverenje upro starešine kola na vaćerena averenđe olenge privatna buća hem kola ispuninena pe obećanja.

16. Sar pomožini amenđe hem averenđe ked hijam stabilna?

¹⁶ Ov stabilno. Amen šaj te ova šukar primer averenđe ako ko sa hijam poslušna e Jehovase hem anaja odluke premalo načelija andi Biblija. Ked proučinaja e Devleso Lafi hem zorjaćeraja amari vera ko Jehova, amen ka ova lese verna hem uvek ka ićera amen ko olese merilija. Tegani lokho ka haljova kola tane o hovavne sikljoviba hem na ka dozvolina te utičinen upro amende (Ef. 4:14; Jak. 1:6-8). Amari vera ko Jehova hem ko olese obećanja pomožini amenđe te ova stabilna ked šunaja disave lošna vestija (Ps. 112:7, 8). Ako hijam stabilna, tegani šaj te pomožina okolenđe kola isi len disavo pharipe (1. Sol. 3:2, 3).

17. Sar šaj o starešine te pomožinen e phralenđe te oven stabilna hem te ovel len zorali vera?

¹⁷ O starešine valjani te ovel len granica ko sa, te oven razborita, organizovana hem razumna. On šukar utičinena upro avera hem zorjaćerena i skupština ađahar so ićerena pe ko Devleso Lafi (Titu 1:9; 1. Tim. 3:1-3). Odolese so brininena pe e phralendar hem dena len šukar primer, on pomožinena len te oven redovna ko sastankija, ki služba hem te ovel len lično proučavanje. Ked o phralja hem o phenja isi len disave pharipa sebepi kola tane uznemirime, o starešine pomožinena len te osloninen pe upro Jehova hem te razmislinen ando olese obećanja.

18. Sose mangaja te hvalina e Jehova hem te ova paše oleja? (Dikh o okvir „ Jekh način sar šaj te ove popaše e Jehovaja“.)

¹⁸ Palo odova so razmotrinđam e Jehovase but šuže osobine, amen šaj sar o kralj David te phena: „Nek ovel hvalimo o Jehova, mi Stena“ (Ps. 144:1). Upro Jehova uvek šaj te uzdajina amen. Ko celo amaro životi, pa čak hem ko phuripe isi amen razlog te phena: „Ov tano mi Stena“. Uverime hijam so uvek ka pomožini amen te aćhova paše uzo leste (Ps. 92:14, 15).