1. Cadea sar dichas ando Psalmo 18:46, sar phendea o David că si o Iehova?

 TRAISARAS ande iech lumea cai le pharimata neajucărde daștin te paruven cu sea amari viața. So bucurime sam că daisaras te acharas le Iehovas, amaro Del, te ajutil amen! Ando articolo de mai anglal, sichileam că o Iehova si „o Del jiuvindo” hai că vo silo gata te avel pașa amende oricana trebul. Cana dichas o vast le Iehovasco ande amari viața, zuriaras amaro pachiamos că „o Iehova si jiuvindo”. (Citisar Psalmo 18:46.) Tha, si zurales interesanto că chiar pala codoia, o David phendea anda o Iehova că si ‘leschi Stânca’. Sostar phendea anda iech Del jiuvindo că si sar iech buchi cai na-i jiuvindi?

2. So va avela te dichas ande cado articolo?

² Ande cado articolo, va avela te dichas sostar phenel-pe anda o Iehova că si sar iech stânca hai so sicavel amen cadaia anda leste. Sa cadea, va avela te sichioas sar daisaras te arăsas fiesavo mașcar amende te dichas le Iehovas sar amari Stânca. Pala codoia, va avela te hachiaras sar daisaras te las amen pala o Iehova.

SOSTAR SI O IEHOVA SAR IECH STÂNCA

3. Sar si folosime butivar andi Biblia i duma „stânca”? (Dich i imaginea.)

³ I Biblia phenel anda o Iehova că si sar iech stânca caște hachiaras mai mișto save si chichiva anda lesche calități. Cadai duma arachel-pe butivar andel thana cai o Iehova silo așardo că na-i niciech Del sar vo. O iechto than ande savo phenel-pe anda o Iehova că si i „Stânca” arachel-pe ando Deuteronomo 32:4. Ande iech manglimos, i Ana phendea că na-i niciech „stânca cadea sar amaro Del”. (1 Sam. 2:2) O Habacuc phendea anda o Iehova că si ‘leschi Stânca’. (Hab. 1:12) Codo cai scriisardea o Psalmo 73 phendea cadal dumes anda o Iehova: „O Del si i stânca mânre ileschi”. (Ps. 73:26) Hai vi o Iehova phendea anda peste că si sar iech stânca. (Is. 44:8) Mai dur, va avela te dichas trin calități  le Iehovasche hai sar daisaras te cheras-les te avel „amari Stânca”. (Deut. 32:31)

4. Sar si o Iehova amaro garaimos? (Psalmo 94:22)

⁴ O Iehova si iech garaimos. Cadea sar iech bari stânca daștil te avel anda iech manuș iech than garaimasco cana avel iech baro brâșând, sa cadea o Iehova si iech garaimos anda amende cana aven pharimata ande amari viața. (Citisar Psalmo 94:22.) Vo ajutil amen te las sama pe amaro amalimos lesa hai ci mechel ca niciech nasulimos cai duchavel amaro ilo acana te încărel anda sea o timpo. Mai but, vo promitil că va chosela ji la urmă orisavi buchi cai ciorel amari pacea sau duchavel amen. (Ezec. 34:25, 26)

5. Sar daisaras te cheras le Iehovas amaro Garaimos?

⁵ Daisaras te cheras le Iehovas amaro Garaimos cana mangas amen lesche. Cana mangas amen, o Iehova del amen leschi pacea, cai ‘feril amaro ilo hai amari goghi’. (Filip. 4:6, 7) Te dichas prin so nachlea o phral Artiom, cai sas-lo phandado anda pesco pachiamos. Cana sas-lo ando phandaimos, iech murș cai cherelas i ancheta îngărdea-les mai butivar te șiol lesche pușimata. Cado phiravelas-pe zurales nasul lesa hai rodelas te daravel-les. O Artiom phenel: „Orichichi-var acharelas man cado manuș, mânro ilo izdralas daratar. . . . De fiesavi data, manglem le Iehovas te del man pacea ando ilo hai goghiaverimos. . . . Oriso cherelas cado manuș, me așilemas liniștime. . . . Anda codoia că o Iehova ajutisardea man, simțosardem sar cana o vo vazdea iech baro zido baresco angla mande caște feril man”.

6. Sostar daisaras te mechas amen sea o timpo ando vast le Iehovasco? (Isaia 26:3, 4)

⁶ O Iehova si loialo hai ci va mechela amen niciechdata. Cadea sar iech bari stânca așel sea o timpo pe pesco than, o Iehova silo sea o timpo pașa amende. Daisaras te pachias amen ciaces ande leste anda codoia că vo si „i Stânca cai așel veșnico”. (Citisar Isaia 26:3, 4.) Anda codoia că vo așel jiuvindo anda sea o timpo, vo daștil te pherel pesche promisiuni, te așunel amare manglimata hai te avel pașa amende cana si amen nevoia. Daisaras te mechas amen cu sea ando vast le Iehovasco, anda codoia că vo si loialo codolența cai slujin lesche. (2 Sam. 22:26) Vo ci va bâstrăla niciechdata so cheras anda leste hai va pochinela amen parpale de fiesavi data. (Evr. 6:10; 11:6)

7. So miștimata va avena amen cana pachias amen ando Iehova? (Dich vi i imaginea.)

⁷ Cheras le Iehovas amari Stânca cana pachias amen cu sea ande leste. Pachias anda sea o ilo că, dacă așunas lestar vi andel mai phare ghiesa anda amari viața, va avena amen miștimata. (Is. 48:17, 18) De fiesavi data cana dichas lesco ajutorii, amaro pachiamos ande leste va bariola sea mai but. Cadea, va avela te avas pregătime anda le pharimata anda save numai o Iehova daștil te încalavel amen. Butivar, cana nachas prin iech situația ande savi na-i chonic castar te mangas ajutorii, das amari sama că daisaras te mechas amen numai ando vast le Iehovasco. Iech phral po anav Vladimir phenel: „Cana somas ando phandaimos, mânro amalimos le Iehovasa sas mai zuralo sar oricana. Sichilem te pachiav man mai but ando Iehova anda codoia că somas corcoro hai ci daisardem te cherav chanci caște paruvav mânri situația”.

8. a) Sostar daisaras te phenas că o Iehova ci paruvel-pe? b) So daisaras te pachias anda sea o ilo anda codoia că o Del si amari Stânca? (Psalmo 62:6, 7)

 ⁸ O Iehova ci paruvel-pe. Cadea sar iech bari stânca si zurali hai așel pe pesco than, sa cadea o Iehova ci paruvel-pe niciechdata hai lesco scopo așel sa codo. (Mal. 3:6) Cana o Adam hai i Eva risarde pengo dumo le Iehovasche, vo ci parudea pesco scopo le manușența. Cadea sar phendea vi o apostolo Pavel, o Iehova „ci daștil te jial contra peschi duma”. (2 Tim. 2:13) Cadaia însemnol că, oriso întâmplol-pe sau oriso cherenas aver, o Iehova ci paruvel-pe, vo ci paruvel pesco scopo hai nici pesche norme. Anda codoia, daisaras te pachias anda sea o ilo că amaro Del lașio silo sea o timpo pașa amende, vi andel mai phare ghiesa, hai că vo încărel de fiesavi data peschi duma. (Citisar Psalmo 62:6, 7.)

9. So sichioas catar i Tatiana?

⁹ Cheras le Iehovas amari Stânca vi cana gândisaras amen sar silo vo ciaces hai încăras andi goghi lesco scopo anda i phuv hai anda le manușa. Cadai buchi daștil te ajutil amen te așias zurale ando pachiamos hai amaro ilo te avel liniștime cana nachas prin pharimata. (Ps. 16:8) I Tatiana, iech phei cai sas-li phandadi late chăre anda laco pachiamos, dichlea că cadai buchi si ciaci. Voi phenel: „Așilem corcori. . . . Sas manghe zurales pharo mai anglal. Butivar, somas peradi”. Tha, cana astardea te gândil-pe ca o Iehova hai lesco scopo, voi dea peschi sama chichi de importanto sas te încărel zuralo pesco pachiamos ando timpo so nachelas prin cado pharimos. Voi phenel mai dur: „Cana hachiardem sostar nachav prin cadai buchi, ajutisardea man te anav ande mânri goghi că som ande cadai situația anda codoia că iubisarav le Iehovas hai camav te avav cuci ande lesche iacha. Cadea, daisardem te na mai gândiv man cadea de but mande”.

10. Sar daștil te avel o Iehova amari Stânca acana?

¹⁰ Andel ghiesa cai așen angla amende, ajucăras amen te nachas prin bare pharimata hai atunci va trebula te mechas amen ando vast le Iehovasco mai but sar oricana. Acana si o timpo te zuriaras amaro pachiamos ande leste că va ajutila amen te așias lesche loialo prin oriso avelas te nachas. Sar te cheras cadaia? Te citisaras i Biblia hai le relatări andai viața le phralenghi de aghies. Cana cheras cadaia, te das amari zor te dichas sar o Iehova ajutisardea pesche manușen hai sar sicadea că si lenghi Stânca. Cadea, daștis te arăsăs te diches vi tu le Iehovas sar chi Stânca.

TE LAS AMEN PALA O IEHOVA, AMARI STÂNCA

11. Sostar camas te las amen pala o Iehova? (Dich vi o chenarii „ So daștin te șion penghe andi goghi te cheren le phrala tărne”.)

¹¹ Ji acana, dichleam sostar o Iehova si sar iech stânca. Acana, va avela te dichas sar daisaras te las amen pala leste. Cana das sea amari zor te las amen pala o Iehova, daisaras te zuriaras amare phralen hai pheian. Sar exemplo, o Isus dea le Simonos o anav Chifa (traducime prin „Petru”), cai însemnol „iech cotor barr andai stânca”. (Ioan 1:42) Cadaia sicavel că vo avelas te anel mângâierea codolenghe andai congregația hai avelas te zuriarel lengo pachiamos. Anda le phure de congregație phenel-pe că sile sar „i  ucial iecha barea stâncachi”. Cadaia sicavel sar von ferin codolen andai congregația. (Is. 32:2) O ciacimos si că i congregația jial mișto cana savore – phrala hai pheia – las amen pala o Iehova. (Ef. 5:1)

12. Sar daisaras te avas iech garaimos anda amare phrala hai pheia?

¹² Av iech garaimos. Cana amare phrala hai pheia hasaren pengo chăr anda codoia că si iech dezastro naturalo sau marimata, daisaras te avas iech garaimos anda lende hai te acharas-len te beșen amende chăre. Ando timpo so le „palutne ghiesa” va avena sea mai phare, trebul te ajutisaras amen sea mai but iech averes. (2 Tim. 3:1) Daisaras te avas iech garaimos anda amare phrala hai pheia vi cana sicavas lenghe iubirea hai zuriaras-len. Sar? Cheras cadaia cana primisaras-len anda sea o ilo ca i sala le Regatoschi hai das duma lența angla hai pala i întrunirea. Camas te cheras andai congregația iech than șucar hai pherdo iubirea. Traisaras ande iech lumea jiungali cai le manușa phiraven-pe nasul hai ci sicaven iubirea iech caring aver. Cadea că, cana amare phrala hai pheia aven ca le întruniri, camas te cheras sea o daisaras caște simțon-pe iubime hai zuriarde.

13. Sar daștin le phure te aven iech garaimos anda le coaver? (Dich vi i imaginea.)

¹³ Le phure de congregație daștin te aven iech garaimos anda le phrala hai pheia cai nachen prin cale ghiesa. Cana nachen prin dezastrea naturalo sau nasfalimata, le phure cheren sigo vareso caște ajutin penghe phralen. Sa cadea, von den-len lașe sfaturi andai Biblia hai zuriaren-len. Le phrala hai le pheia va manghena mai sigo o ajutorii ieche phuresco cai silo prinjiando sar iech phral lașio, cai așunel-len hai del peschi zor te șiol-pe ande lengo than, caște hachiarel so si ande lengo ilo. Cana iech phral phiravel-pe cadea, le coaver va simțona-pe iubime hai ferime. Cadea, va avela lenghe mai ușoro te așunen catar le sfaturi bazome pi Biblia cai sas lenghe dine le phurendar. (1 Tes. 2:7, 8, 11)

14. Sar daisaras te sicavas că sam manușa ande save le coaver daștin te pachian-pe?

 ¹⁴ Sicav că le coaver daștin te pachian-pe ande tute. Camas ca le coaver te jianen că amen sam gata te ajutisaras-len, vi mai but cana nachen prin phare ghiesa. (Prov. 17:17) Sar daisaras te avas prinjiande sar manușa ande save le coaver daștin te pachian-pe? Dacă das amari zor te las amen sea o timpo pala o Iehova, sar avelas te încăras amari duma hai te arăsas co timpo andel thana cai trebul te jias. (Mat. 5:37) Daisaras te cheras vareso anda aver cana jianas că silen nevoia. Sa cadea, trebul te las sama te cheras amari buchi andi congregația pala le îndrumări cai sas amenghe dine.

15. So miștimata si la congregația cana le phrala daștin te pachian-pe andel phure?

¹⁵ So miștimata si la congregația cana le phrala daștin te pachian-pe andel phure? Le phrala daștin te den duma oricana le phurența de congregație, sar avelas le phralesa cai lel sama pe lenghi grupa anda i predicarea. Hai cadai buchi ajutil-len te jianen că nai-le corcore hai sea o timpo si varecon pașa lende. Le phrala simțon-pe iubime vi cana dichen că le phure sile gata te den-len vast caște ajutin-len. Sa cadea, le phrala daștin te pachian-pe andel phure cana von den-len sfaturi andai Biblia hai anda le lila catar o sclavo fidelo, ando than te den duma pendar. Iech aver buchi sostar le phrala daștin te  pachian-pe andel phure si că von ci va phenena averenghe so den duma lența hai jianen că încăren penghi duma.

16. So miștimata si amen hai vi averen cana cheras sea o timpo so phenel o Iehova că si mișto?

¹⁶ Cher sea o timpo so phenel o Iehova că si mișto. Cana așunas le Iehovastar ande sea le buchia hai cheras alosarimata pala sar phenel-pe andi Biblia, das iech lașio exemplo averenghe andai congregația. Cana sichioas anda o Lil le Devlesco hai zuriaras amaro pachiamos ando Iehova, va avela te așias loiali le Iehovasche hai ci va avela te uștiaras lesche norme. Mai but, va avela te dichas le sicaimata hohamne cai nai-le pala i goghi le Iehovaschi hai ci va avela te mechas amen parude lendar. (Ef. 4:14; Iac. 1:6-8) Sa cadea, o pachiamos ando Iehova hai ande so phendea vo că va cherela, ajutil amen te așias liniștime vi cana așunas vești nasul. (Ps. 112:7, 8) Cana cheras cadal buchia, daisaras te ajutisaras codolen cai nachen prin phare ghiesa. (1 Tes. 3:2, 3)

17. Sar ajutin le phure codolen andai congregația?

¹⁷ Le phure de congregație trebun te jianen te încăren-pe parpale ande sea, te avel-len iech goghi sastevesti, te len sama ca lenghe buchia te aven ca lengo than hai te aven gata te mechen pendar. Cadal phrala ajutin averen te așen liniștime hai te avel-len iech pachiamos zuralo ando Iehova cana ‘încăren zurales ca o cuvânto demno pachiamasco’. (Tit 1:9; 1 Tim. 3:1-3) Prin lengo phiraimos hai prin i buchi cai cheren-la caște len sama le phralendar, von ajutin codolen andai congregația te jian ca fiesavi întrunirea, te jian andi predicarea hai te sichion corcore andai Biblia. Cana le phrala hai le pheia nachen prin pharimata hai ci daștin te așen liniștime, le phure ajutin-len te mechen-pe cu sea ando vast le Iehovasco hai te gândin-pe mai but ca so phendea o Iehova că va cherela ando viitorii.

18. Sostar camas te așaras le Iehovas hai te pașioas sea mai but lestar? (Dich vi o chenarii „ Iech buchi cai anel tut vi mai pașă le Iehovastar”.)

¹⁸ Pala so dichleam mai mișto sar si o Iehova, daisaras te phenas vi amen sar o rege David: „Așardo te avel o Iehova, mânri Stânca”. (Ps. 144:1) Prin oriso pharimos avelas te nachas, daisaras te mechas amen cu sea ando vast le Iehovasco. Ande sea amari viața, chiar vi cana sam mai phure, daisaras te phenas ciaces: „Vo si mânri Stânca”. Pachias anda sea o ilo că o Iehova va ajutila amen sea o timpo te așias pașa leste! (Ps. 92:14, 15)