NSOLO WA PFUNDZIRO 26
NYIMBO 8 Yahova Ndi Pakuthawira Pathu
Nyindirani Yahova Wakuti Ndi Mwala Wanu
“Nkhabepo mwala wakulandana na Mulungu wathu.”—1 SAM. 2:2.
PINAFUNA IFE KUPFUNDZA
Tinapfundza kuti Yahova asalandaniswa tani na mwala, pontho tinatowezera tani makhaliro ace.
1. Mwakubverana na Masalmo 18:46, Dhavidhi alandanisa Yahova nanji?
IFE tiri kukhala mu dziko yakuti nyatwa zinakwanisa kucinja umaso wathu mwakukhonda dikhira. Mbwenye tisapereka takhuta thangwi Yahova asatiphedza. Mu nsolo udamala, ife tapfundza kuti Yahova ndi Mulungu wa m’maso, pontho ndzidzi onsene ali dzololo toera kutiphedza. Iye angacita pyenepi, ife tisadzindikira kuti “Yahova ali m’maso.” (Lerini Masalmo 18:46.) Mbwenye, mambo Dhavidhi pidamala iye kulemba pyenepi, alonga kuti Mulungu ndi “Mwala wanga.” Mphapo thangwi yanji pakumala kulonga kuti Yahova ali m’maso, iye amulandanisa na mwala, cinthu cakusowa umaso?
2. Tinaonanji mu nsolo uno?
2 Mu nsolo uno, tinaona kuti thangwi yanji Yahova asacemerwa mwala, pontho pyenepi pisatipfundzisanji thangwi ya iye. Tinaonambo kuti thangwi yanji tisafunika kunyindira Yahova na kuncemera Mwala wathu. Pakumalisa, tinaona njira zingasi zakuti zinatiphedza toera kutowezera makhaliro ace.
THANGWI YANJI YAHOVA NDI MWALA?
3. Ndi munjira zipi zakuti Bhibhlya isaphatisira fala yakuti “mwala”? (Onani pa tsamba yakutoma.)
3 Bhibhlya isalandanisa Yahova na “mwala” toera kutiphedza kuti tidziwe mwadidi makhaliro ace. Kazinji kene atumiki a Yahova angansimba thangwi ya makhaliro ace adidi, iwo asalonga kuti Mulungu ndi mwala. M’Bhibhlya, ulendo wakutoma unacemerwa Yahova kuti ndi “Mwala” ndi pa Dheuteronomyo 32:4. M’phembero, Yana alonga kuti “nkhabepo mwala wakulandana na Mulungu wathu.” (1 Sam. 2:2) Abhakuki alonga kuti Yahova ndi “Mwala wanga.” (Abh. 1:12) Nyakulemba Masalmo 73 acemera Mulungu “mwala wa ntima wanga.” (Mas. 73:26) Ngakhale Yahova ene asalandanisika na mwala. (Iza. 44:8) Cincino tendeni tione makhaliro matatu a Yahova anapangiza kuti iye ndi ninga mwala, pontho tinadinga kuti tinaona tani Yahova ninga “Mwala wathu.”—Dheu. 32:31.
Atumiki a Mulungu asaona Yahova ninga Mwala wacitsidzikizo (Onani ndima 3)
4. Ndi munjira ipi Yahova ndi pakuthawira? (Masalmo 94:22)
4 Yahova ndi pakuthawira pathu. Mu ndzidzi wa condzi cikulu, ife tinakwanisa kuthawira m’mphako. Munjira ibodzi ene, tingatamba nyatwa tinakwanisa kuthawira kuna Yahova. Iye anakwanisa kutiphedza toera tikwanise kutsidzikiza uxamwali wathu na iye. Yahova asatipasa cinyindiro cakuti nkhabepo nyatwa zinatamba ife cincino zakuti zinatithabusa kwenda na kwenda. (Lerini Masalmo 94:22.) Iye asapikira kuti ntsogolo anadzacita pinthu pizinji kakamwe. Iye anadzamalisa pinthu pyonsene pinatitsukwalisa na kutithabusa.—Ezek. 34:25, 26.
5. Yahova anakhala tani pakuthawira pathu?
5 Njira ibodzi yakuthawira kuna Yahova, ndi kucita phembero. Tingacita phembero, Yahova asatipasa “ntendere wa Mulungu” wakuti usatsidzikiza ntima wathu na manyerezero athu. (Afil. 4:6, 7) Onani pidacitikira Artem, m’bale m’bodzi adaikhwa nkaidi thangwi ya cikhulupiro cace. Nyakufufudza m’bodzi ancita mibvundzo mwakubwereza-bwereza, antsalakana mwakuipa, pontho an’thusa. Artem alonga: “Ndzidzi onsene ukhandicemera iye, pikhali pyakunentsa kakamwe. Ine ndikhacita phembero kuna Yahova toera andipase ntendere wa m’manyerezero na udziwisi. Pinthu pyonsene pikhacita nyakufufudza kuna ine, nee pikhaphata basa. Na ciphedzo ca Yahova, pikhali ninga ndikhatsidzikizwa na mpanda.”
6. Thangwi yanji tinakwanisa kunyindira Yahova ndzidzi onsene? (Izaiya 26:3, 4)
6 Yahova ndi wakunyindirika. Ninga mwala ukulu wakuti nee usabuluka pa mbuto pawo, Yahova nee asacinja, pontho ndzidzi onsene ali dzololo toera kutiphedza. Mbwenye ife tinakwanisa kun’nyindira thangwi iye “ndi Mwala wa kwenda na kwenda.” (Lerini Izaiya 26:3, 4.) Yahova anapitiriza kukhala m’maso, pontho anakwanirisa mapikiro ace a kubvesera maphembero athu na kutiphedza tingafuna ciphedzo. Ife tinakwanisambo kunyindira Yahova thangwi iye ndi wakukhulupirika kuna ale anantumikira. (2 Sam. 22:26) Iye cipo anaduwala pinthu pinancitira ife, pontho anatipasa nkhombo thangwi ya pyenepi.—Aheb. 6:10; 11:6.
7. Ninji pinafuna kucitika tinganyindira Yahova? (Onanimbo foto.)
7 Yahova asakhala Mwala wathu tingan’nyindira kakamwe. Ife tiri na cinyindiro cakuti tingam’bvera, mwakukhonda tsalakana nyatwa zinatamba ife, pisatiphedza. (Iza. 48:17, 18) Tingaona kuti Yahova ali kutiphedza, cinyindiro cathu kuna iye cisathimizirika, pontho tisakhala na cinyindiro cakuti ndiye basi anatiphedza kupirira mayesero mwakukhonda tsalakana khala ndi makulu peno nkhabe. Kazinji kene tingatamba nyatwa zakunentsa kakamwe, tisadzindikira kuti tisafunika kunyindira kakamwe Yahova. Ndi pyenepi pidadzindikira m’bale Vladimir. Iye alonga: “Mu ndzidzi udakhala ine nkaidi, uxamwali wanga na Yahova wakhala wakuwanga kakamwe. Ine ndadzindikira kuti ndikhafunika kunyindira kakamwe Yahova thangwi ndikhali ndekhene, pontho nee ndikhadziwa cakucita.”
Ife tisacitisa Yahova kukhala Mwala wathu tingan’nyindira na ntima onsene (Onani ndima 7)
8. (a) Thangwi yanji tinakwanisa kulonga kuti Yahova nkhabe cinja? (b) Thangwi yanji mphyakufunika kuti Yahova akhale Mwala wathu? (Masalmo 62:6, 7)
8 Yahova nkhabe cinja. Ninga mwala ukulu, makhaliro a Yahova na cifuniro cace nkhabe cinja. (Mal. 3:6) Adhamu na Eva pidakhonda iwo kubvera Yahova, iye nee acinja cifuniro cace kuna anthu. Mpostolo Paulu alonga kuti Yahova “anacimwana kukhondeka ekhene.” (2 Tim. 2:13) Pyenepi pisabveka kuti mwakukhonda tsalakana pinthu pinafuna kucitika peno pinthu pinacita anango, Yahova cipo anacinja njira yace yakucita pinthu, cifuniro cace na mitemo yace. Tisafunika kunyindira kuti Mulungu nkhabe cinja, pontho tisafunika kunyindira kuti anatiphedza m’midzidzi ya nyatwa na kukwanirisa mapikiro ace onsene thangwi ya ntsogolo.—Lerini Masalmo 62:6, 7.
9. Mwapfundzanji na pidacitikira Tatyana?
9 Tinganyerezera pya makhaliro a Yahova na cifuniro cace thangwi ya dziko na anthu, pinatiphedza toera kukhala akukhurudzika na kukhala akukhulupirika kuna iye tingayeserwa. (Mas. 16:8) Ndi pyenepi pidacitikira mulongo m’bodzi anacemerwa Tatyana wakuti aikhwa nkaidi thangwi ya cikhulupiro cace. Iye alonga: “Ine ndikhali ndekhene, pakutoma pikhali pyakunentsa kakamwe. Ndatsukwala kakamwe.” Mbwenye buluka penepo, iye atoma kunyerezera pya Yahova na cifuniro cace kuna anthu, pontho adzindikira kuti thangwi yanji akhafunika kupirira mayesero onsene akhatamba iye. Pyenepi pyampasa mphambvu toera kupirira. Iye alonga: “Kubvesesa kuti thangwi yanji pyenepi pikhandicitikira, pyandikumbusa kuti pyenepi pikhacitika thangwi ya Yahova. Pyenepi pyandiphedza toera ndisiye kunyerezera pya ine basi.”
10. Tisafunika kucitanji toera Yahova akhale Mwala wathu cincino?
10 Mwakukhonda dembuka, ife tinathimbana na pinthu pyakunentsa kakamwe, pontho tinafunika kunyindira kakamwe Yahova kupiringana kale. Ndi thangwi yace, ndi pyakufunika kakamwe kuwangisa cinyindiro cathu kuna Yahova cincino na kukhulupira kuti iye anadzatiphedza toera tipitirize kukhala akukhulupirika kuna iye. Mphapo tinacita tani pyenepi? Tisafunika kuleri pitsandzo pya atumiki a Yahova akale na pitsandzo pya abale na alongo a mu ntsiku zathu akuti aphedzwa na Yahova toera kupirira. Mu ndzidzi unaleri imwe pyenepi, nyerezerani kuti Yahova aphedza tani atumiki ace. Mungacita pyenepi, munaona kuti mwandimomwene Yahova ndi Mwala wanu.
TOWEZERANI MAKHALIRO A YAHOVA
11. Thangwi yanji tisafunika kutowezera makhaliro a Yahova? (Onanimbo bokosi “ Pifuno Pyakuti Aphale Anakwanisa Kukhala Napyo.”)
11 Mpaka pano, ife taona makhaliro mangasi a Yahova akuti asatiphedza kubvesesa kuti iye akhala tani ninga mwala. Cincino tendeni tione kuti tinatowezera tani makhaliro anewa a Yahova. Ife tingawangisira toera kutowezera Yahova, tinawangisa abale na alongo athu mu mpingo. Mwacitsandzo, Yezu apasa Simau dzina yakuti Kefa (yakuti isathumburuzwa “Pedhru”), dzina ineyi isabveka “Phindi ya Mwala.” (Juw. 1:42) Munjira ineyi, Yezu akhabvekesa kuti Pedhru mbadabalangaza abale na alongo mu mpingo na kuwangisa cikhulupiro cawo. Akulu a mpingo asalandaniswa na “nʼthundzi wa mwala ukulu.” Pyenepi pisabveka kuti akulu a mpingo asatsidzikiza abale na alongo mu mpingo. (Iza. 32:2) Mwandimomwene, nee ndi akulu a mpingo basi anafunika kucita pyenepi. Tonsene tinakwanisa kutowezera makhaliro a Yahova mbatiwangisa anango mu mpingo.—Aef. 5:1.
12. Tinakwanisa tani kukhala pakuthawira kuna abale athu?
12 Khalani pakuthawira kuna abale. Abale athu angathabuka thangwi ya pidengwa pyacibaliro peno thangwi ya nkhondo, panango tinafunika kuatambira m’manyumba mwathu. Mwakukhonda penula, makhaliro a ntsiku zino “zakumalisa” anapitiriza kutekera kakamwe, pontho tinadzafunika kuphedzana unango na ndzace. (2 Tim. 3:1) Mbwenye kusiyapo pinthu pyakumanungo pidasowa iwo, ife tinakwanisambo kubalangaza abale athu na kupangiza kuti tisaafuna. Njira ibodzi yakucita pyenepi ndi kucedza nawo pa misonkhano ya mpingo na kuabalangaza. Mpingo usafunika kukhala mbuto yantendere. Iwo usafunika kukhala mbuto yakuti abale anakwanisa kuwangiswa mbaona kuti asafuniwa. Ife tiri kukhala n’dziko yakunentsa, yakusowa ufuni, pontho yakuti isatitsukwalisa. Na thangwi ineyi, abale athu angabwera pa misonkhano, tisafunika kucita pyonsene pinakwanisa ife toera aone kuti asafuniwa, ali kubalangazwa, pontho ali akutsidzikizika.
13. Akulu a mpingo anakhala tani pakuthawira kuna anango? (Onanimbo foto.)
13 Akulu a mpingo anakwanisa kukhala pakuthawira kuna abale anathimbana na mayesero akusiyana-siyana. Pangaoneka cidengwa cacibaliro peno khala alipo anaduwala, mwakucimbiza akulu a mpingo asakhunganyika toera kuphedza abale anewa. Iwo asaphatisira Bhibhlya toera kuapasa pitsogolero na kuawangisa. Nkulu wa mpingo angakhala wakukoma ntima, angabvesesa abale angalonga peno angawangisira toera kubvesesa mabvero a abale na alongo, iwo anakhala akusudzuka toera kuphemba ciphedzo. Nkulu wa mpingo anapangiza makhaliro anewa asaphedza abale toera kuona kuti asafuniwa. Natenepa pisakhala pyakukhonda nentsa kuna abale toera kubvera pitsogolero pya m’Bhibhlya pinapereka akulu a mpingo.—1 Ates. 2:7, 8, 11.
Akulu a mpingo ndi mbuto yakuthawira kuna abale na alongo m’midzidzi ya nyatwa (Onani ndima 13) a
14. Tinapangiza tani kuti ndife akunyindirika?
14 Khalani akunyindirika. Ife tisafuna kuti anango akhale akusudzuka toera kutiphemba ciphedzo angatamba nyatwa. (Mis. 17:17) Mphapo tisafunika kucitanji toera abale aone kuti ndife akunyindirika? Tisafunika kuwangisira toera kutowezera Yahova mu umaso wathu wa ntsiku na ntsiku. Ife tinacita pyenepi tingakwanirisa pidapikira ife na kucita pinthu pa ndzidzi wakuthema, pontho tingacita pyonsene pinakwanisa ife toera kuphedza ale anafuna ciphedzo. (Mat. 5:37) Kusiyapo pyenepi, tisafunika kucita makhundu anapaswa ife mu mpingo mwakubverana na pitsogolero pidatambira ife.
15. Akulu a mpingo akunyindirika asaphedza tani mpingo?
15 Akulu a mpingo akunyindirika ndi muoni kuna mpingo. Munjira ipi? Abale angadziwa kuti anakwanisa kucemera akulu a mpingo ndzidzi onsene unafuna iwo ciphedzo, iwo asakhala akukhurudzika. Pontho abale asaona kuti asafuniwa angadziwa kuti akulu a mpingo ali dzololo toera kuaphedza angafuna ciphedzo. Abale na alongo ananyindirambo kakamwe akulu a mpingo angadziwa kuti iwo asaphatisira Bhibhlya na mabukhu athu toera kupereka uphungu, tayu maonero awo. Kusiyapo pyenepi, abale na alongo asanyindira akulu a mpingo akuti nee asalonga nyatwa zawo kuna anthu anango, pontho asanyindira akulu a mpingo anacita pinapikira iwo.
16. Thangwi yanji mphyakufunika ndzidzi onsene kubvera pitsogolero pya Yahova?
16 Ndzidzi onsene towezerani pitsogolero pya Yahova. Khala tisabvera Yahova mu pinthu pyonsene na kucita pisankhulo mwakubverana na pinalonga Bhibhlya, tinakhala citsandzo cadidi kuna anango. Tingapfundza Bhibhlya mbatiwangisa cikhulupiro cathu kuna Yahova, tinakhala akukhulupirika kuna iye mbatibvera mitemo yace. Ife nee tinapeuswa na pipfundziso pyauthambi peno na manyerezero akuti nee asabverana na pinatipfundzisa Yahova. (Aef. 4:14; Tiya. 1:6-8) Tingabva mphangwa zakuipa, ife tisakhala akukhurudzika thangwi yakudziwa kuti tiri na cidikhiro, pontho tisakhulupira kuti pidapikira Yahova pinadzacitika. (Mas. 112:7, 8) Kusiyapo pyenepi, tinakwanisa kuphedza ale akuti ali kuthabuka na nyatwa zakusiyana-siyana peno ali kuyeserwa.—1 Ates. 3:2, 3.
17. Akulu a mpingo anaphedza tani abale na alongo toera akhale akuwanga mu cikhulupiro?
17 Akulu a mpingo asafunika kukhala akulinganira mu pinthu pinacita iwo, andzeru zadidi na akutsalakana mwadidi pinthu. Iwo asawangisa mpingo ‘angatowezera mwadidi mafala akukhulupirika.’ (Tito 1:9; 1 Tim. 3:1-3) Kubulukira mu citsandzo cawo na kucedzera abale, akulu a mpingo asaphedza amwazi mphangwa mu mpingo toera agumanike pa misonkhano mwakukhonda phonya, kumwaza mphangwa na kucita pfundziro ya munthu paekha. Abale na alongo angadzudzumika thangwi ya nyatwa zawo, akulu a mpingo asaakumbusa kuti asafunika kunyindira Yahova na mapikiro ace.
18. Thangwi yanji tisafuna kusimba Yahova mbatipitiriza kukhala cifupi na iye? (Onanimbo bokosi “ Njira Ibodzi Yakufendedzera Cifupi Kakamwe Yahova.”)
18 Pakumala kupfundza makhaliro mangasi a Yahova, ife tinakwanisa kulonga ninga pidalonga Dhavidhi kuti: “Mbasimbwe Yahova, Mwala wanga.” (Mas. 144:1) Ife tinakwanisa kunyindira Yahova mu umaso wathu onsene. Maseze tikalambe, ife tisanyindira kuti Yahova anapitiriza kutiphedza, pontho tinapitiriza kukhala cifupi na iye, mbatilonga kuti: ‘Yahova ndi Mwala wanga.’—Mas. 92:14, 15.
NYIMBO 150 Sakani Mulungu Toera Mupulumuswe
a MAFALA ANAFOKOTOZA FOTO: Mulongo ali kucedza na akulu a mpingo awiri mwakusudzuka mu Nyumba ya Umambo.
