1. Muyile mukanda wa Misambo 18:​46, Davide baadi mupuandikishe Yehowa na kinyi?

 TUI bashaale mu ndumbuluilo mukuete kuitukuata nkalakashi mu kimpulunkamba, na yaya nkalakashi i kushintula nshalelo eetu ooso mushima. Tui na lutumbu lukata muanda tui kuteka bukuashi kui Efile Mukulu eetu Yehowa! Mu muisambo ushaale, mbetutentekieshe’shi Yehowa nyi Efile Mukulu e na muwa, na e kuanka efuku dioso bua kuitukuasha. Nsaa y’atupete bukuashi buaye, abitushinkamiisha’shi “Yehowa e na muwa!” (Badika Misambo 18:46.) Biabia, kunyima kua kuakula bino bioso, Davide bayitanyine Efile Mukulu’shi “Lubwebwe lwande.” Buakinyi Davide baadi mupuandikishe Yehowa Efile Mukulu e na muwa na kintu kishi na muwa, lubuebue?

2. Nkinyi ki’atukalongiela ku mayi a Davide abaadi muitanyine Yehowa bu ‘Lubuebue luande’?

² Mu uno muisambo, atukataluula buakinyi mbaleshe Yehowa bu lubuebue, na kiatudi balombene kulongiela ku kino kipuandikisho pabimutale. Na atukalongo dingi mushindo watudia kufika mu kumumona bu Lubuebue luetu. Ku nfudiilo, atukesambila mishindo yatudi balombene kuambula ngikashi ya Yehowa imuikashe bu lubuebue.

MMUSHINDO KINYI WIKALE YEHOWA BU LUBUEBUE?

3. Buakinyi misuusa yooso Bible afubishaa kishima “Lubwebwe”? (Tala kifuatulo ki ku kipusu.)

³ Bible apuandikisha Yehowa na “lubuebue” bua kuitukuasha bua’shi tupushe kalolo ingi ngikashi yaye. Misuusa i bungi, nsaa i bafubi ba Yehowa abatumbisha Efile mukulu bua ngikashi yaye ya kukaanya, abamuleshaa mu Bible bu lubuebue. Kifundue kia kumpala akilesha Yehowa bu “Lubwebwe,” mmukanda wa Miiya Ikituulwe 32:4. Aana pa baadi atekie bambile’shi: “Takwi lubwebwe lwi buu Efile Mukulu eetu.” (1 Sam. 2:2) Abakuke bayitanyine Yehowa’shi “Lubwebwe lwande.” (Ab. 1:12) Kayimba ka Misambo 73, kabayitanyine Efile Mukulu’shi “lubuebue lu’eshimba  diande.” (Mis. 73:26) Mpaa na Yehowa nabene baadi muileshe bu lubuebue. (Yesh. 44:8) Tubandeyi kuisambila ngikashi isatu ikashe Yehowa bu lubuebue, na tuukie mushindo watudi balombene kumuikasha bu “Lubwebwe lwetu.”—Miy. 32:31.

4. Yehowa mmuikale bu kifuamino mushindo kinyi? (Misambo 94:22)

⁴ Yehowa nyi nkifuamino kietu. Nsaa i kipapi ki masaku, muntu e kukaluilua muushi mua lubuebue, mu mushindo umune, Yehowa etukaluilaa mu kipungo kia nkalakashi mu nshalelo eetu. (Badika Misambo 94:22.) Etukuashaa pa kukaluila kipuano kietu naye, na kuitushinkamiisha’shi ta kui lukalakashi su ndumune luatudia kupeta binobino lua kuitukambila bua losoo nya. Na mmuitulee dingi’shi mu mafuku aafiki, akakatusha mianda yooso ayituinyongosha na kuitukiengiesha.—Es. 34:​25, 26.

5. Yehowa e kuikala bu lubuebue na Kifuamino kietu naminyi?

⁵ Mushindo umune watudi balombene kuikasha Yehowa bu lubuebue luetu lua Kufuamina mpa tumutekie. P’atutekie, Yehowa etupa “butaale bu’Efile Mukulu” abulama mashimba eetu na binangu bietu. (Fid. 4:​6, 7) Tubandeyi kutaluula muanda wabadi bamone kui mukuetu mulume Artem, baadi muedibue mu lukalo pa muanda wa lukumiino luaye. Pa baadi mu lukano ungi mpuupa bafikile amuela nkonko i bungi na kumukitshisha mianda pa bukopo na kumutshinyisha. Artem amba’shi: “Napushiishe kenyongoshi kakile nsaa ibaadi yawa mpuupa angiele nkonko. . . . Misuusa yooso naadi natekie Yehowa. Naadi namutekie bua’shi ampe butaale muishimba na mu binangu biande.” Artem bambile dingi’shi: “Sunga mbibaadi yawa mpuupa ambingabinga, naadi mushaale nka muumiine. . . . Ku bukuashi bua Yehowa, naadi nka bu’mi mueme ku lubuebue.”

6. Buakinyi tui balombene kukulupila misuusa yooso mui Yehowa? (Yeeshaya 26:​3, 4)

⁶ Yehowa e na lulamato na t’anetusumbushene. Nka bu bikale’shi lubuebue t’alusaanaa, ngi bi Yehowa namu misuusa yooso kuanka buetu. Tukulupileyi mui Yehowa muanda mmuikale “Lubwebwe lwa ikalaika.” (Badika Yeeshaya 26:​3, 4.) Akekala na muwa efuku dioso bua kulombasha milayilo yaye, kupusha nteko yetu, na kuitupa bukuashi buatudi nabo lukalo. Tui balombene kukulupila dingi Yehowa muanda e na lulamato kui booso abamufubila. (2 Sam. 22:26) T’analube kiakia ki’atumukitshina nya, na akekala etufutu misuusa yooso.—Eb. 6:10; 11:6.

7. Nkinyi ki’atukapete nsaa y’atukakulupila mui Yehowa? (Tala dingi kifuatulo.)

⁷ Atuikasha Yehowa bu Lubuebue luetu, nka nsaa y’atumukulupila n’eshimba dietu dioso. Atukulupila’shi p’atumukookiela sunga mmu bipungo bia nkalakashi, aketukuasha. (Yesh. 48:​17, 18) P’atumono bi bukuashi buaye, lukulupilo luetu muadi alunyiisha kutama. Atuikala bashinkamishe’shi nka penda Yehowa ngi e na ngobesha ya kuitukuasha sunga lukalakashi luekala lua mushindo kinyi. Ke bungi, kui mianda yatudi balombene kukutua muntu atudia kuteka bukuashi, paapa tui balombene kutundula’shi nka penda Yehowa ngi a kuitukuasha. Vladimir bambile’shi: “Mafuku anaadi mu lukano, abaadi mafuku e buwa bukile, muanda naadi mu kipuano ki buwa n’Efile Mukulu.” Bakuile dingi’shi:“Naadi mulongie bia kukulupila mui Yehowa ngofu, muanda naadi bupenka mu mianda yooso, nka penda aye ngi baadi  mulombene kunkuasha bua kunyingiila ino nkalakashi.”

8. (a) Buakinyi tui kuamba’shi Yehowa t’ashintulukaa? (b) Abitukuasha naminyi p’atue kuikala n’Efile Mukulu e bu Lubuebue luetu? (Misambo 62:​6, 7)

⁸ Yehowa t’ashintulukaa. Mu mushindo umune, nka bu abikalaa mbuebue i bungi i pamune na t’ayisaanaa, ngi bi Yehowa namu t’ashintulukaa sunga kusanyishua. Bumuntu buaye, na mpango yaye, t’abishintulukaa nya. (Mal. 3:6) Pa baadi Adama na Eva bamutombokiele muifuba dia Edene, Yehowa ta baadi mushintule mpango yaye bua bantu nya. Nka bu bibafundile Mpoolo mutumibua, Yehowa ta mulombene “kuituna aye nabene.” (2 Ti. 2:13) Bino abipushika’shi sunga kuakitshika muanda kinyi, sunga bangi bakita mianda kinyi, Yehowa ta mmulombene kushintula ngikashi yaye, mpango yaye, na mayi aaye a kulonda. Muanda Yehowa t’anashintulukie, atuuku’shi aketukuasha mu bipungo bi bukopo, na’shi akalombasha milayilo yaye mu mafuku aafiki.—Badika Misambo 62:​6, 7.

9. Muanda wabadi bamone kui Tatyana ubakulongiesha kinyi?

⁹ Su tubanangushena ku ngikashi ya Yehowa, na mpango yaye bua nsenga na bantu, abitukuasha buatudia kumuikasha bu Lubuebue luetu. Kukita bino akuketukuasha buatudia kushaala bawumiine na lulamato kui Yehowa nsaa yatupete nkalakashi. (Mis. 16:8) Bino ngi bibaadi bikitshikile mukuetu mukashi Tatyana abaabadi beele mu lukano lua muushi mua nshibo bua lukumiino luaye. Amba’shi: “Naadi mbalo inaadi nk’ami nabene.” Amba dingi’shi: “Ku mbangilo bibaadi lukalakashi lui bukopo. Na naadi natshoboloka misuusa yooso.” Biabia, babangile kunangushena pabitale Yehowa na mpango yaye bua bantu, ngi afika mu kumona buakinyi abintungu anyingiile lualua lukalakashi, na bino bibaadi bimukuashe buadia kupusha butaale bua mu binangu na bi’amupa bukome bua kushaala na lulamato. Bambile’shi: “Kupusha kalolo buakinyi bino bibankitshikila, mbinkuashe buandia kutentekiesha’shi mbua Yehowa buandi mu luno lukano bupenka. Bino mbinkuashe buandia kuleka kunangushena nka pa bintale ami nabene.”

10. Yehowa e kuikala bu Lubuebue luetu binobino naminyi?

¹⁰ Mu mafuku aafiki, atukapete nkalakashi i bukopo ayiketutungu’shi tukulupile mui Yehowa kukila bi’abikalanga kumpala. Kino ngi kipungo ki’atudia kunyiisha kunyingisha lukulupilo luetu’shi Yehowa aketupa kiakia ki’atukekala nakio lukalo bua kunyingiila na lulamato looso. Tui kuibikita mushindo kinyi? P’atubadika mianda ya mu Bible, na mianda yabadi bamone kui Tumonyi tua Yehowa tua ano mafuku eetu. Tala mushindo ubaadi Efile Mukulu mukuatshishene bafubi baye. Nangushena ngofu pabitale yaya mianda yooso. Kukita bino nkulombene nkukuasha bodia kuikasha Yehowa bu Lubuebue loobe.

AMBULA NGIKASHI YA YEHOWA IMUIKASHE BU LUBUEBUE

11. Buakinyi atukumiina kuambula ngikashi ya Yehowa imuikashe bu lubuebue? (Tala kashibo akamba’shi “ Kepatshila ka bakuetu balume bansongua.”)

¹¹ Tubakatuka mu kumona ngikashi ya Yehowa imuikashe bu lubuebue luetu. Binobino tutaluuleyi biatudi balombene kuambula ngikashi yaye imuikashe bu lubuebue. Su tu’ekitshisha na muetu mooso bua kuambula ngikashi ya Yehowa, tui  kunyingisha bakuetu balume na bakashi mu kakongie. Bu kileshesho, Yesu bapeele Simone eshina dia bu Kefase (eshina adipatuula’shi “Mpiele”), adilesha “Kipese kia Ebue.” (Yo. 1:42) Bino abilesha’shi Yesu baadi akula’shi Mpiele ngi mulombene kukankamika bangi mu kakongie na kunyingisha lukumiino luabo. Bakulu mu tukongie mbebaleshe bu “mutaala wa lubwebwe lukata.” Bino abilesha mushindo wa bakuete kukaluila bantu be mu kakongie. (Yesh. 32:2) Ngi buakinyi, kakongie kooso kashima akakuashibua nsaa i bakuetu balume na bakashi abambula ngikashi ya Yehowa imuikashe bu lubuebue.—Ef. 5:1.

12. Leesha mishindo yatudi balombene kuleesha’shi atupasukila bangi.

¹² Pasukila bakuenu balume na bakashi mu bipungo bia nkalakashi. Nsaa i bakuetu balume na bakashi abashimisha bintu biabo sunga mashibo aabo muanda wa masaku aatukila ku bintu bipangibue sunga pa muanda wa ngoshi, tui kuibetanyina bua kushaala nabo ku mashibo kuetu. Bu bikuete kunyiisha kuluila mianda mu ano “mafuku a ku nfudiilo,” abitungu tunyiishe kuikala na kiubishi kia kupa bakuetu balume na bakashi bintu biabadi nabio lukalo. (2 Ti. 3:1) Tui kupa dingi bakuetu balume na bakashi bukuashi bua mu binangu na bua mu kikudi. Mushindo umune watudi balombene kukita bino, mpa kuibakuasha bua’shi b’epushe’shi babakukilua kalolo ku Nshibo ya Bufumu, na kuibekasha na muloo awikalaa mu kakongie. Bantu be bungi lelo uno bakuete kukitshiina bangi mianda i bubi. Apatuele bakuetu balume na bakashi mu bisangilo, atukumiina’shi bapushe’shi mbafudibue, mbanyingishibue, na be mu bulami.

13. Bakulu be kukuasha bangi nsaa yabadi mu bipungo bi bukopo naminyi? (Tala dingi kifuatulo.)

¹³ Bakulu mbalombene kuikala bu kifuamino kui bena kakongie abanyingiila nkalakashi i bukopo i bu kipapi kia mu kifuanyi. Nsaa ayituuku masaku aatuukila ku bintu bipangibue sunga maladi aatungu kubukibua lubilolubilo, bakulu mbalombene kuata mpango ya kukuasha bakuetu  balume na bakashi be mu yaya nkalakashi. Be kuibapa dingi bukuashi bua mu kikudi. Bakuetu balume na bakashi be kuikala na muloo wa kuteka bakulu bukuashi, nsaa y’abauwuku’shi bakulu abakula nabo na kalolo kooso, abebateemesha, na kuikitshisha bua kuuka bi’abapusha. Ino ngikashi ayikuasha bangi buabadia kupusha’shi mbafudibue, na abikala bibabofuile buabadia kutumikila buludiki booso bua mu Bible abuibapa bakulu.—1 Te. 2:​7, 8, 11.

14. Tui kuleesha’shi tui bantu ba kukulupilua naminyi?

¹⁴ Ikala muntu abadia kukulupila. Atukumiina’shi bangi betukulupile’shi tui balombene kuibakuasha mu kipungo kia nkalakashi. (Nki. 17:17) Abitungu kukita kinyi bua’shi bangi betukulupile? Abitungu tuikitshishe bua kuambula Yehowa efuku dioso, bu kileshesho pa kulombasha milayilo yetu, na pa kukita mianda pa nsaa ilombane. (Mat. 5:37) Su tuawuka’shi muntu kampanda e na lukalo na bukuashi, tui balombene kumukuasha. Kukatusha biabia, abitungu tushinkamishe’shi tukuete kulombasha mudimo wetu kalolo mu kakongie, muyile buludiki buabadi betupe.

15. Su bakulu bekala bantu ba kukulupila, kakongie akapete bukuashi kinyi?

¹⁵ Bakulu babakulupila, mmuabi ukata kui bena kakongie. Mu mushindo kinyi? Nsaa ayiuku bakuetu balume na bakashi’shi be kuitanyina bakulu nsaa yabadi nabo lukalo, abibakuasha buabadia kupeelesha tuinyongoshi tuabo. Bakuetu balume na bakashi bekupusha’shi mbafudibue, nsaa y’abauku’shi bakulu abakumiina kuibakuasha. Na bu bikale’shi malango a bakulu atukilaa mu Bible na  mu mikanda ayitushaa mpika a lulamato na mudimukie, kushi mu binangu biabo banabene, balanguidi nabo abebakulupilaa. Bakuetu balume na bakashi abakulupilaa bakulu bash’abalungulaa bangi mianda yabo, na abalombashaa milayilo yabo.

16. Nsaa yooso y’atukitshi kiakia ki’abamono kui Yehowa’shi nkilulame, abitukuasha naminyi atue banabene?

¹⁶ Ikala nsaa yooso okitshi kiakia ki’abamono kui Yehowa’shi nkilulame. Tui kuikala na bukitshishi bui buwa kui bangi su tui bashimate peepo mu kukita mianda i lulame, na su atuata bitshibilo bi buwa bimeene mu mayi a kulonda a mu Bible. Nsaa y’atuilongiela eyi di’Efile Mukulu na kunyingisha lumiino luetu, atushaala na lulamato kuadi na mu mayi aaye a kulonda. Atukatundula malongiesha a madimi na mianda ishii ipusheene na binangu bia Yehowa, na dingi yaaya mianda yabo t’ayikala na bukitshishi kuatudi. (Ef. 4:14; Yak. 1:​6-8) Lukumiino luetu mui Yehowa na mu milayilo yaye, aluitukuasha buatudia kushaala baumiine nsaa yatupete mukandu wi bubi. (Mis. 112:​7, 8) Atuikala dingi na mushindo wa kukuasha baaba booso abapete nkalakashi.—1 Te. 3:​2, 3.

17. Nkinyi akikuasha bakulu buabadia kuikala na bukitshishi bui buwa kui kakongie?

¹⁷ Abitungu bakulu bekale na nkatshinkatshi mu bikitshino biabo, be na binangu bi buwa , abakitshi mianda mu mulongo. Baaba bana balume be kuanka bua kukuasha bangi buabadia kushaala baumiine na be na lukumiino lui bukopo mui Yehowa, na kakongie pa kushaala “balamate pepoo ku eyi dia lulamato.” (Tit 1:9; 1 Ti. 3:​1-3) Kukiila ku kileshesho kiabo, na mudimo wabo wa bu balami ba mikooko, bakulu mbalombene kukuasha balungudi buabadia kuikala abatuele mu bisangilo ku lubingo looso, kuenda mu bulungudi efuku dioso na kuilongiela pa bupenka. Nsaa ayipete bakuetu balume na bakashi mianda ayibenyongosha, bakulu mbalombene kuikitshisha ngofu bua kuibanyingisha buabadia kutuula binangu biabo nka kui Yehowa na ku mpango yaaye.

18. Buakinyi atukumiina kutumbisha Yehowa na kuifubuila kuadi? (Tala dingi kashibo akamba’shi:“ Mushindo wa kuifubuila peepi na Yehowa.”)

¹⁸ Kunyima kua kutaluula ngikashi ya kukaanya ya Yehowa, we kuakula nka bibakuile Nfumu Davide’shi: “Yehowa atumbishibwe, ê lubwebwe lwande.” (Mis. 144:​1, EEM) Abitungu tuikale atukulupila nka mui Yehowa efuku dioso. Sunga tuekala bapue kununupa, atukulupila’shi akatungunuka nka na kuitukuasha buatudia kushaala nka peepi naaye. Na tui balombene kuamba’shi: “Yehowa ndubwebwe lwande.”—Mis. 92:​14, 15.