1. Fa David ben kari Yehovah, soleki fa a skrifi na Psalm 18:46?

 WI E libi na ini wan grontapu pe problema kan miti wi wantronso. Den problema disi kan meki a libi muilek gi wi noso den kan kenki wi heri libi. Dati meki wi breiti srefsrefi taki wi kan suku yepi na Yehovah Gado. Na artikel na fesi ben memre wi taki Yehovah na a libilibi Gado èn taki ala ten a de klarklari fu yepi wi. Te Yehovah e yepi wi, dan dati e gi wi a fertrow taki a de „wan libilibi Gado!” (Leisi Psalm 18:46.) Ma baka di David taki dati Yehovah na wan libilibi Gado, dan a teki Gado gersi nanga wan sani di no de na libi. A kari Yehovah „a Stonbergi fu mi”. San dati wani taki?

2. San wi o luku na ini na artikel disi?

² Na ini na artikel disi wi o luku fu san ede David ben kari Yehovah wan stonbergi èn san disi e leri wi fu Yehovah. Wi o luku tu fa Yehovah kan tron wi Stonbergi. Leki lasti, wi o luku fa wi kan sori den fasi fu Yehovah.

FU SAN EDE BIJBEL E KARI YEHOVAH WAN STONBERGI?

3. Te Bijbel e kari Yehovah wan „stonbergi”, dan san dati e yepi wi fu ferstan? (Luku a prenki na tapu .)

³ Bijbel e kari Yehovah wan „stonbergi” fu yepi wi fu ferstan sonwan fu den fasi fu en. Te den futuboi fu Yehovah e prèise en na ini Bijbel gi den moi fasi fu en, dan nofo tron den e kari en wan stonbergi. A fosi leisi te Bijbel e kari Yehovah „wan Stonbergi”, de fu feni na ini Deuteronomium 32:4. Na ini begi Hana ben taki dati „a Gado fu wi na wan stonbergi èn nowan sma de leki en” (1 Sam. 2:2). Habakuk ben kari Yehovah „mi Stonbergi” (Hab. 1:12). A skrifiman fu Psalm 73 taki: „Mi o fertrow tapu Gado nanga mi heri ati. En na mi stonbergi” (Ps. 73:26). Èn Yehovah srefi ben kari ensrefi wan stonbergi (Yes. 44:8). Meki wi luku dri fasi fu  Yehovah di e sori taki a de leki wan stonbergi. Wi o leri tu fa Yehovah kan tron „a Stonbergi fu wi”.​—Deut. 32:31.

4. Fu san ede Bijbel e kari Yehovah wan kibripresi? (Psalm 94:22)

⁴ Yehovah na wan kibripresi. Neleki fa wan sma kan feni kibri na ini wan bergi-olo te wan bigi winti e wai, na so Yehovah e kibri wi te wi de na ini muilek situwâsi. (Leisi Psalm 94:22.) A e yepi wi fu no meki noti pori a matifasi di wi abi nanga en èn a e pramisi wi taki awinsi wan sani psa nanga wi now, tòg a no sa de fu ala ten. A e pramisi wi tu taki na ini a ten di e kon, a o puru iniwan sani di e meki wi frede noso di e meki wi pina.​—Esek. 34:25, 26.

5. Fa Yehovah kan tron wan Kibripresi gi wi?

⁵ Wan fasi fa Yehovah kan tron wan kibripresi gi wi, na te wi e begi en. Te wi e begi, dan Yehovah e gi wi „a freide fu Gado” di e kibri wi ati nanga wi ferstan (Fil. 4:6, 7). Luku na ondrofenitori fu Artem, wan brada di ben musu koti strafu fu di a de wan Yehovah Kotoigi. Di a ben de na straf’oso, dan wan skowtu ben e poti aksi gi en ibri tron baka, a du ogri nanga en èn a ben wani tapu skreki gi en. Artem e taki: „Ibri leisi te a skowtu disi ben e poti aksi gi mi, dan mi ben e broko mi ede srefsrefi. . . . Ala ten mi ben e begi Yehovah fu yepi mi. Mi ben e aksi en fu yepi mi fu no bruya èn fu gi mi koni. Aladi a skowtu ben e pruberi fu tapu skreki gi mi, tòg mi no bruya. . . . Fu di Yehovah ben e horbaka gi mi, meki a ben de neleki mi ben e tnapu baka wan bigi ston skotu.”

6. Fu san ede wi kan fertrow tapu Yehovah ala ten? (Yesaya 26:3, 4)

⁶ Yehovah e tai hori na wi. Neleki fa wan stonbergi e tan na a srefi presi ala ten, na so wi sabi taki Yehovah de klarklari ala ten fu yepi wi. Wi kan fertrow na en tapu fu di a de „a Stonbergi di e tan fu ala ten”. (Leisi Yesaya 26:3, 4.) Ala ten a o du san a pramisi, a o arki den begi fu wi, èn a o yepi wi te dati de fanowdu. Wan tra reide fu san ede wi kan fertrow tapu Yehovah, na fu di a e tai hori na den wan di e dini en (2 Sam. 22:26). Noiti a o fergiti san wi du gi en èn a o blesi wi ala ten.​—Hebr. 6:10; 11:6.

7. Fa sani o waka gi wi te wi e fertrow tapu Yehovah? (Luku a prenki.)

⁷ Te wi e poti ala wi fertrow tapu Yehovah, dan Yehovah e tron wi Stonbergi. Wi abi a fertrow taki te wi e gi yesi na en srefi na ini muilek ten, dan dati o tyari wini kon gi wi (Yes. 48:17, 18). Ibri leisi te wi e si taki Yehovah yepi wi, wi e fertrow moro na en tapu. Wi o abi na overtoigi taki na Yehovah w’wan o man yepi wi fu hordoro awinsi sortu tesi miti wi. Nofo tron te wi de na ini situwâsi pe nowan sma man yepi wi, dan wi e kon si taki wi kan fertrow tapu Yehovah ala ten. Vladimir e taki: „Noiti a matifasi fu mi nanga Yehovah ben tranga so, leki di mi ben de na straf’oso. Mi leri fu fertrow moro tapu Yehovah fu di mi ben de mi w’wan èn mi no ben man du noti fu kenki a situwâsi fu mi.”

8. (a) Fu san ede wi kan taki dati Yehovah no e kenki? (b) Sortu wini wi e kisi fu di Gado na wi Stonbergi? (Psalm 62:6, 7)

 ⁸ Yehovah no e kenki. Yehovah de leki wan bigi stonbergi di e tan a srefi. Den fasi fu en no e kenki èn den prakseri fu en e tan a srefi tu (Mal. 3:6). Di Adam nanga Eva ben opo densrefi teige Yehovah na ini Eden, dan a no kenki den sani di a ben abi na prakseri gi libisma. Dati meki na apostel Paulus ben skrifi taki Yehovah „no man tyari ensrefi tra fasi leki fa a de trutru” (2 Tim. 2:13). Disi wani taki dati awinsi san e psa, noso awinsi san trawan e du, noiti Yehovah o kenki a fasi fa a de, den sani di a abi na prakseri fu du, noso den wet fu en. Fu di Yehovah noiti no e kenki, meki wi sabi taki a o yepi wi na ini muilek ten èn taki a o du san a pramisi gi a ten di e kon.​—Leisi Psalm 62:6, 7.

9. San yu e leri fu na ondrofenitori fu Tatyana?

⁹ Te wi e denki dipi fu den fasi fu Yehovah èn fu den sani di a abi na prakseri fu du gi grontapu nanga libisma, dan dati kan yepi wi fu fertrow na en tapu. Na so Yehovah e tron wi Stonbergi. Disi o yepi wi fu no bruya èn fu tan gi yesi na en te tesi e miti wi (Ps. 16:8). Na so a ben de nanga wan sisa di nen Tatyana. Fu di a sisa disi ben e anbegi Yehovah, meki krutubangi besroiti taki a no ben mag go na strati. A ben musu tan na oso. Tatyana e taki: „Mi ben de mi w’wan. Na a bigin a ben muilek. Mi ben e firi brokosaka doronomo.” Ne a bigin denki dipi fu Yehovah èn fu den sani di a o du gi libisma. Tatyana kon si fu san ede a ben prenspari fu hordoro na ini a situwâsi fu en. A sani disi yepi en fu no bruya èn a kisi krakti fu tan gi yesi na Yehovah.

10. Fa Yehovah kan de wi Stonbergi nownow kba?

¹⁰ Heri esi a libi o kon muilek srefsrefi èn wi o abi fu fertrow tapu Yehovah moro leki oiti bifo. Dati meki a prenspari taki nownow kba wi e tranga wi bribi. Wi musu de seiker tu taki a o yepi wi fu tan gi yesi na en, awinsi sortu situwâsi e miti wi. Fa wi kan du dati? Leisi Bijbel tori nanga ondrofenitori fu Kotoigi na ini a ten disi. Kon sabi fa Yehovah horbaka gi den anbegiman fu en. Denki dipi fu den tori disi. Na so Yehovah o tron yu Stonbergi.

SORI DEN FASI FU YEHOVAH

11. Fu san ede wi wani sori den fasi fu Yehovah? (Luku a faki „ Wan marki di yongu brada kan pruberi fu doro”.)

¹¹ Baka di wi luku fu san ede Yehovah de leki wan Stonbergi gi wi, wi o luku now fa wi kan sori den fasi fu en. O moro wi e sori den fasi fu en, o moro wi o man tranga wi brada nanga sisa. Fu eksempre, Yesus ben gi Simon a nen Seifas (noso „Petrus”), san wani taki „Wan ston” (Yoh. 1:42). Yesus ben wani sori taki Petrus ben o trowstu trawan na ini a gemeente èn taki a ben o tranga a bribi fu den. Bijbel e agersi  gemeente owruman nanga „a kowrupe fu wan bigi ston”. Disi e sori taki den e kibri den brada nanga sisa na ini a gemeente (Yes. 32:2). Ma wi alamala kan gi makandra dek’ati te wi e sori den fasi fu Yehovah.​—Ef. 5:1.

12. Fa wi kan de wan kibripresi gi trawan na ini muilek ten?

¹² De wan kibripresi gi trawan. Son leisi wi brada nanga sisa lasi den oso noso den musu lowe gwe libi den oso fu di wan rampu psa noso fu di feti de na ini a kondre. Na ini den sortu situwâsi disi wi kan de wan kibripresi gi den fu di wi e meki den kon tan na ini wi oso. Te a situwâsi e kon moro ogri na ini „den lasti dei”, dan a no de fu taki dati wi o abi moro okasi fu yepi den brada nanga sisa fu wi (2 Tim. 3:1). Wan fasi fa wi kan du dati, na te wi e taki nanga den èn te wi e trowstu den te den e kon na den konmakandra. Wi wani meki den firi taki wi lobi den. Na ini a ten disi furu sma e libi takru nanga makandra. A sani disi e gi wi brada nanga sisa brok’ede èn kande den o firi leki sma no lobi den. Dati meki te wi brada nanga sisa e kon na den konmakandra, dan wi wani gi den dek’ati èn wi wani sori den taki wi lobi den.

13. Fa owruman kan tron wan kibripresi gi trawan? (Luku a prenki.)

¹³ Owruman kan tron wan kibripresi gi den brada nanga sisa na ini a gemeente te den de na ini muilek situwâsi. Te rampu psa noso te sma abi datrayepi fanowdu, dan owruman no e draidrai fu sorgu taki den brada nanga sisa fu den e kisi yepi. Den owruman e gebroiki Bijbel tu fu trowstu den èn fu gi den rai. Brada nanga sisa o feni en moro makelek fu go taki nanga wan owruman efu a e taki switi nanga den, efu a e arki den, èn efu a e pruberi fu ferstan fa den e firi. Den fasi disi e yepi sma fu firi  taki den prenspari gi a gemeente èn disi e meki en moro makelek gi den fu fiti den Bijbel rai di wan owruman e gi den.​—1 Tes. 2:7, 8, 11.

14. Fa wi kan sori taki wi de fu fertrow?

¹⁴ Den wan sma di de fu fertrow. Wi wani taki tra sma sabi taki den kan fertrow wi, spesrutu na ini muilek ten (Odo 17:17). Fa wi kan tron sma di de fu fertrow? Na te wi e meki muiti fu sori den fasi fu Gado ibri dei. Fu eksempre, wi musu hori den pramisi fu wi èn wi musu du muiti fu de biten (Mat. 5:37). Wi kan yepi sma tu te wi sabi taki den abi yepi fanowdu. Boiti dati, te wi e hori den toewijzing di wi kisi na ini a gemeente, dan wi e sorgu taki wi e hori wisrefi na den rai di wi kisi.

15. Fa a gemeente e kisi wini te den owruman de fu fertrow?

¹⁵ Owruman di de fu fertrow e tyari wini kon gi a gemeente. Fa so? Te den brada nanga sisa sabi taki den kan go na den owruman te den abi yepi fanowdu, dan dati e yepi den fu no broko den ede tumsi. Den brada nanga sisa e firi tu taki den owruman lobi den, te den de klarklari fu yepi den. Èn te den owruman e gebroiki Bijbel nanga den buku fu a srafu di de fu fertrow fu gi sma rai, na presi fu taigi den brada nanga sisa fa den srefi e denki fu sani, dan  den brada nanga sisa o fertrow den moro. Boiti dati, te wan owruman no e ferteri trawan den inibere tori fu den brada nanga sisa èn te den e du san den pramisi, dan dati e yepi a gemeente fu fertrow den.

16. Fa wi nanga trawan e kisi wini te wi e tan du san Yehovah feni bun?

¹⁶ Ala ten du san Yehovah feni bun. Wi kan de wan bun eksempre gi trawan te wi e tan gi yesi na Yehovah na ini ala sani èn te den besroiti fu wi e kruderi nanga Bijbel. Te wi e studeri Gado Wortu èn te wi e tranga a bribi di wi abi na ini Yehovah, dan wi o man tai hori na en èn na den wet fu en. Wi o man si krin san na den falsi leri nanga denki di no e kruderi nanga san Yehovah e leri wi, èn den sani disi no o abi krakti na wi tapu (Ef. 4:14; Yak. 1:6-8). A bribi di wi abi na ini Yehovah èn na ini den pramisi fu en e yepi wi fu no bruya te wi e yere takru nyunsu (Ps. 112:7, 8). Boiti dati, wi man yepi den wan tu di e kisi tesi.​—1 Tes. 3:2, 3.

17. San e yepi den owruman fu de wan bun eksempre gi a gemeente?

¹⁷ Owruman no musu du sani psa marki, den musu de nanga krin ferstan, den libi musu orga bun, èn den musu fiti ensrefi makelek na trawan. Den man disi e yepi trawan fu no bruya èn fu abi wan tranga bribi na ini Yehovah. Den e tranga a gemeente fu di den „e hori finifini na a wortu di tru” (Tit. 1:9; 1 Tim. 3:1-3). A bun fasi fa den owruman e tyari densrefi èn fa den e sorgu gi den skapu fu Yehovah, e gi den preikiman dek’ati fu kon na den gemeente konmakandra ibri wiki, fu teki prati na a preikiwroko, èn fu studeri so taki den kan tranga a bribi fu den. Te den brada nanga sisa e kisi problema di kan gi den broko-ede, dan den owruman e gi den dek’ati fu tan fertrow na tapu Yehovah èn fu tan hori den pramisi fu en na prakseri.

18. Fu san ede wi wani prèise Yehovah èn kon moro krosbei na en? (Luku a faki „ Wan fasi fa wi kan kon moro krosbei na Yehovah”.)

¹⁸ Now di wi poti prakseri na den moi fasi fu Yehovah, dan neleki Kownu David wi kan taki: „Prèise Yehovah, mi Stonbergi” (Ps. 144:1). Wi kan fertrow tapu Yehovah ala ten. Srefi te wi kon owru, wi kan abi a fertrow taki a o tan yepi wi fu tan krosbei fu en. Èn wi o man taki: „En na mi Stonbergi.”​—Ps. 92:14, 15.