1. Davide wamfananisa nani Jehova njengobe kubhalwe kuTihlabelelo 18:46?

 SIPHILA eveni lakwenteka khona tintfo lesingakatilindzeli letingaphatamisa kuphila kwetfu nobe tize tikushintje ngalokuphelele. Sijabula kakhulu ngekutsi singetsembela kuJehova Nkulunkulu kuze asisite! Esihlokweni lesendlulile sikhunjutwe kutsi Jehova unguNkulunkulu lophilako nekutsi uhlale akulungele kusisita. Nakasisita, loko kuyasicinisekisa kutsi “Jehova uyaphila!” (Fundza Tihlabelelo 18:46.) Nobe kunjalo, ngemuva kwekutsi Davide asho lamavi, wabese utsi Jehova ‘uLidvwala lakhe.’ Yini leyamenta wafananisa Jehova, longuNkulunkulu lophilako nelidvwala, intfo lengaphili?

2. Yini lesitayifundza emavini aDavide latsi Jehova ‘uLidvwala lami?’

² Kulesihloko, sitawucoca ngekutsi yini leyenta Jehova abitwe ngekutsi lidvwala nekutsi lenchazelo isifundzisani ngaye. Sitawuphindze sifundze ngekutsi yini lengasisita sitsatse Jehova njengeLidvwala letfu. Ekugcineni sitawucoca ngekutsi singabulingisa njani buntfu baJehova lobufana nelidvwala.

YINI LEYENTA JEHOVA ABITWE NGEKUTSI LIDVWALA?

3. LiBhayibheli livame kulisebentisa njani ligama lelitsi “lidvwala”? (Buka lesisekhasini lekucala.)

³ LiBhayibheli livame kusebentisa ligama lelitsi “lidvwala” kuze lisente sibe nesitfombe engcondvweni salobunye buntfu baJehova. Leligama livame kuvela lapho advunyiswa khona ngekutsi unguNkulunkulu longacatsaniswa nalutfo. NguDutheronomi 32:4 lokhuluma kwekucala ngaJehova kutsi “uLidvwala.” Ngesikhatsi Hana athantaza, watsi “kute lidvwala lelifanana naNkulunkulu wetfu.” (1 Sam. 2:2) Habakhuki wabita Jehova ngekutsi “Lidvwala lakhe.” (Hab. 1:12) Ngisho naJehova watibita ngekutsi ulidvwala. (Isa. 44:8) Ase sicoce ngebuntfu lobakhonjiswa nguJehova lobumenta afanane nelidvwala  futsi sifundze ngekutsi yini lesingayenta kuze abe ‘Lidvwala letfu.’​—Dut. 32:31.

4. Sisho ngani kutsi Jehova uyindzawo yekukhosela? (Tihlabelelo 94:22)

⁴ Jehova uyindzawo yekukhosela. Njengobe umuntfu avikeleka ngephansi kwelidvwala lelikhulu nangabe kunesiphepho lesiyingoti, Jehova uyasivikela nasibhekene netikhatsi letimatima. (Fundza Tihlabelelo 94:22.) Usisita kutsi sivikele buhlobo betfu naye futsi asicinisekise kutsi kute lokungasilimata kuze kube phakadze. Wetsembisa nalokungetulu kwaloko: Utawususa nobe yini lesenta sitive site kuthula futsi singakavikeleki.​—Hez. 34:25, 26.

5. Yini lesingayenta kuze Jehova abe yindzawo yetfu yekukhosela?

⁵ Lokunye lesingakwenta kuze Jehova abe yindzawo yetfu yekukhosela kutsi sithantaze kuye. Nasithantaza, usinika “kuthula kwaNkulunkulu” lokulondvolota tinhlitiyo tetfu netingcondvo tetfu. (Fil. 4:6, 7) Cabanga ngalokwenteka kulomunye umzalwane lokutsiwa ngu-Artem, lowaboshelwa kukholwa kwakhe. Ngesikhatsi aboshiwe, lomunye umseshi wamphenya emahlandla amcindzetela futsi amenta ative ahlazekile. Artem watsi: “Bengicindzeteleka kakhulu nakangibita lomseshi. . . . Bengihlale ngithantaza kuJehova. Bengimcela kutsi angiphe kuthula enhlitiyweni futsi angiphe nekuhlakanipha. Lamachinga alomseshi awazange asebente kimi. . . . Ngekusitwa nguJehova, kwaba ngatsi ngime ngemuva kwelubondza lolwakhiwe ngematje.”

6. Yini leyenta sihlale setsembela kuJehova? (Isaya 26:3, 4)

⁶ Jehova wetsembekile. Njengobe lidvwala lingasuki, Jehova uhlale akhona kuze asisite. Singametsemba ngobe “uLidvwala laphakadze.” (Fundza Isaya 26:3, 4.) Utawuhlale akhona kuze agcine tetsembiso takhe, alalele imithantazo yetfu futsi asisite nasidzinga lusito. Singaphindze simetsembe Jehova ngobe wetsembekile kulabo labamkhontako. (2 Sam. 22:26) Akayuze akukhohlwe loko lesikwentako, futsi utawuhlale asibusisa.​—Heb. 6:10; 11:6.

7. Kutawentekani nasetsembela kuJehova? (Buka nesitfombe.)

⁷ Senta Jehova Lidvwala letfu nasetsembela kuye ngalokuphelele. Siyetsemba kutsi sitawusitakala nasimlalela ngisho nasetikhatsini letimatima. (Isa. 48:17, 18) Nasibona indlela lasisita ngayo, indlela lesimetsemba ngayo itawukhula. Sitawuciniseka kutsi nguJehova kuphela lotasisita kutsi sibeketelele nobe nguyiphi inkinga ngisho nobe imatima kangakanani. Ngalokuvamile, nasibhekene nesimo lapho khona kute lesingaya kuye kuze asisite, sibese siyabona kutsi Jehova uhlale akhona. Vladimir utsi: “Ngesikhatsi ngivalelwe ejele, ngasondzelana kakhulu naJehova. Ngafundza kumetsemba kakhulu Jehova ngobe bengingedvwa futsi bengingakhoni kusilawula lesimo.”

8. (a) Yini leyenta sitsi Jehova akashintji? (b) Kusisita ngani kutsi Nkulunkulu uLidvwala letfu? (Tihlabelelo 62:6, 7)

⁸ Jehova akashintji. Njengelidvwala lelikhulu,  Jehova akanyakatiswa futsi akashintji. Buntfu bakhe kanye nenjongo yakhe akushintji. (Mal. 3:6) Ngesikhatsi bo-Adamu na-Eva bavukela e-Edeni, Jehova akazange anyakatiswe. Kwaba njengobe umphostoli Pawula abhala nakatsi Jehova “angeke atiphike.” (2 Thim. 2:13) Loku kusho kutsi ngisho kungentekani, nobe bantfu bangentani, Jehova akayuze ashintje bunguye bakhe, injongo yakhe nobe timiso takhe. Ngenca yekutsi Jehova akashintji, siyati kutsi angasisita ngetikhatsi letimatima futsi utawutifeza netetsembiso takhe tesikhatsi lesitako.​—Fundza Tihlabelelo 62:6, 7.

9. Yini loyifundza kulokwenteka kuTatyana?

⁹ Senta Jehova Lidvwala letfu ngekutsi sinake kutsi unguMuntfu lonjani nangekutsi sihlale sicabanga ngenjongo yakhe. Kwenta njalo kutasisita kutsi sihlale sehlise umoya futsi setsembekile kuye nasinetinkinga. (Hla. 16:8) Nguloko lokwenteka kulomunye dzadze lokutsiwa nguTatyana lowanikwa sigwebo sekuhlala endlini ngenca yekukholwa kwakhe. Utsi: “Ngatitfola ngingedvwa. Ekucaleni bekumatima. Etikhatsini letinyenti bengidvumateka.” Nobe kunjalo, ngesikhatsi abona kutsi lenkinga yakhe beyihlobana njani naJehova nenjongo yakhe, wakhona kuyibeketelela futsi waba nemandla. Utsi: “Kucondza kutsi tentekelani letintfo kimi, kwangisita ngakhumbula kutsi kungenca yaJehova. Loko kwangisita kutsi ngiyekele kucabanga ngesimo lebengikuso.”

10. Yini lesingayenta kuze sente Jehova abe Lidvwala letfu lamuhla?

¹⁰ Emalangeni letako, sitawubhekana netinkinga letitawenta kutsi kudzingeke setsembele kakhulu kuJehova kunangaphambili. Ngako kubalulekile kutsi nyalo sicinise kukholwa kwetfu kuJehova futsi siciniseke ngalokuphelele kutsi utasisita sihlale setsembekile kuye ngisho singabhekana nasiphi simo. Singakwenta njani loko? Fundza tindzaba letiseBhayibhelini kanye naloko lokwenteke kuBoFakazi BaJehova lamuhla. Naka indlela Nkulunkulu lakhombise ngayo kutsi ulidvwala nakasekela bantfu bakhe. Cabangisisa ngaletindzaba. Kwenta njalo kutakusita kutsi wente Jehova abe Lidvwala lakho.

LINGISA BUNTFU BAJEHOVA LOBUNJENGELIDVWALA

11. Yini leyenta sifune kulingisa buntfu baJehova lobunjengelidvwala? (Buka nelibhokisi lelitsi “ Umgomo Labangatibekela Wona Bazalwane Labasebasha.”)

¹¹ Sesibonile kutsi Jehova ukhombisa njani kutsi unjengelidvwala. Nyalo asesicoce ngekutsi singabulingisa njani lobuntfu bakhe lobunjengelidvwala. Nangabe senta konkhe lesingakwenta kuze silingise lobuntfu bakhe, singalicinisa libandla. Sibonelo nje, Jesu wetsa Simoni ngekutsi nguKhefase (lokuhunyushwe ngekutsi “Phetro”), lokusho “Lidvwala.” (Joh. 1:42) Loku bekukhombisa kutsi bekatawuba yindvudvuto ebandleni futsi alisimise. Labadzala belibandla kutsiwa ‘banjengemtfunti welidvwala lelikhulukati.’ Loko kukhombisa  indlela lababavikela ngayo labasebandleni. (Isa. 32:2) Lonkhe libandla liyasitakala nangabe bonkhe bazalwane nabodzadze balingisa lobuntfu baJehova lobunjengelidvwala.​—Ef. 5:1.

12. Chaza kutsi singabasita njani labanye ngetikhatsi letimatima.

¹² Bani yindzawo yekukhosela. Ngaletinye tikhatsi singakhona kukhoselisa bazalwane betfu nabodzadze nangabe kunetehlakalo temvelo, budlwangudlwangu nobe imphi. Njengobe timo tiya ngekuba timbi kakhulu ‘kulamalanga ekugcina,’ siyaciniseka kutsi sitawuba nematfuba lamanyenti ekusitana. (2 Thim. 3:1) Singaphindze sibadvudvute bazalwane betfu nabodzadze futsi sibanike lutsandvo labaludzingako. Lenye indlela lesingakwenta ngayo loko kubenta bative bemukelekile nabaseHholweni leMbuso ngekutsi sifake sandla kuze libandla libe yindzawo lokumnandzi kuba kuyo. Siphila eveni lelinelunya, lelite lutsandvo nalelicindzetelako. Ngako nangabe bazalwane betfu nabodzadze basemihlanganweni, sifuna kwenta konkhe lesingakwenta kuze bative batsandvwa, bacabulekile futsi bavikelekile.

13. Labadzala belibandla bangafana njani nendzawo yekukhosela kulabanye? (Buka nesitfombe.)

¹³ Labadzala belibandla bangafana nendzawo yekukhosela kubazalwane babo nabodzadze lababhekene netimo letimatima. Nakuvele sehlakalo nobe nakunesimo lesiphutfumako semphilo, labadzala belibandla basukumela etulu kuze basite bazalwane babo nabodzadze. Baphindze babakhutsate basebentisa imibhalo. Kutawuba melula kutsi bazalwane nabodzadze baye kulomdzala welibandla lowatiwa ngekutsi unemusa, neluvelo futsi uhlale akulungele kulalela. Loko kungenta labanye bative batsandvwa, futsi kungenta kube melula kutsi balalele sicondziso  lesishiwo ngulomdzala welibandla lesisekelwe eBhayibhelini.​—1 Thes. 2:7, 8, 11.

14. Singakhombisa njani kutsi labanye bangasetsemba?

¹⁴ Yenta labanye bakwetsembe. Sifuna labanye bati kutsi bangetsembela kitsi ikakhulukati nababhekene netikhatsi letimatima. (Taga 17:17) Yini lesingayenta kuze bantfu bati kutsi bangetsembela kitsi? Singenta konkhe lesingakwenta kuze sihlale silingisa Jehova, njengekutsi sigcine tetsembiso tetfu futsi sente konkhe lesingakwenta kuze sigcine sikhatsi. (Mat. 5:37) Singaphindze sicele kusita nangabe kunesidzingo. Ngetulu kwaloko, sifuna kuciniseka kutsi silandzela ticondziso lesititfolako nasenta tabelo tetfu.

15. Libandla lisitakala njani nangabe labadzala belibandla babantfu longabetsemba?

¹⁵ Labadzala belibandla labetsenjwako bayalisita libandla. Kanjani? Bamemeteli abakhatsateki kakhulu nabati kutsi bangabatsintsa labadzala belibandla nobe kunini, ikakhulukati umbonisi welicembu labakulo. Ngetulu kwaloko, bamemeteli bativa batsandvwa nabati kutsi labadzala belibandla bayafuna kubasita. Njengobe labadzala basekela seluleko sabo eBhayibhelini naseticondzisweni letivela esisebentini  lesetsembekile kunekutsi basisekele kuloko labakucabangako, bazalwane nabodzadze babese bayabetsemba. Baphindze bametsembe kakhulu lomdzala logcina imfihlo futsi lokwentako loko latsite utawukwenta.

16. Kusisita njani tsine kanye nalabanye kungashintji?

¹⁶ Ungashintji. Singabasita labanye nangabe sibambelela kulokulungile futsi senta tincumo letisekelwe ngalokuphelele etimisweni teliBhayibheli. Njengobe sikhula ekukholweni futsi siba nelwati lolunyenti lolungulonalona, siyakhona kuma sicine ecinisweni. Sima sicine, singanyakatiswa futsi singakhukhulwa timfundziso letingemanga kanye nendlela lelive lelicabanga ngayo. (Ef. 4:14; Jak. 1:6-8) Kukholwa kwetfu kuJehova kanye nekutetsemba tetsembiso takhe kusenta sehlise umoya nasiva tindzaba letimbi. (Hla. 112:7, 8) Siyakhona nekusita labo lababhekene netinkinga.​—1 Thes. 3:2, 3.

17. Yini lesita labadzala belibandla kutsi bacinise labanye?

¹⁷ Labadzala belibandla kufanele balinganisele nabenta tintfo, babhadle engcondvweni futsi bacabangele. Lamadvodza asita labanye kutsi behlise umoya, babe nekukholwa lokucinile kuJehova futsi bacinise libandla kutsi ‘libambisise livi leletsembekile.’ (Thit. 1:9; 1 Thim. 3:1-3) Ngesibonelo sabo lesihle kanye nekuvakashela bazalwane babo nabodzadze kuze babakhutsate, basita bamemeteli kutsi bahlale bakhona emihlanganweni yelibandla, emsebentini wekushumayela futsi bahlale batidadishela liBhayibheli. Nangabe bazalwane nabodzadze banetinkinga letibenta bakhatsateke, labadzala belibandla babakhumbuta kutsi betsembele kuJehova futsi banake tetsembiso takhe.

18. Yini leyenta sifune kudvumisa Jehova futsi sisondzelane kakhulu naye? (Buka nelibhokisi lelitsi “ Longakwenta Kuze Usondzelane Kakhulu NaJehova.”)

¹⁸ Ngemuva kwekucoca ngalobuntfu baJehova lobuhle kangaka, singasho emavi lafanako nalashiwo yiNkhosi Davide nayitsi: “Akadvunyiswe Jehova loLidvwala lami.” (Hla. 144:1) Jehova akayuze ayekele kuba nguNkulunkulu lesingetsembela kuye. Kuko konkhe kuphila kwetfu, ngisho nalapho sesibadzala, singachubeka sitsi: “Yena uLidvwala lami,” sibe siciniseka kutsi utawuhlale asisita kuze sichubeke sisondzelene naye.​—Hla. 92:14, 15.