1. Japi riká aní Salmo 18:46, ¿piri anili David Jeobá jitra?

 ISINI kaachi ati ikibóaré namuti japi tamó risoa nílitima o japi isima japi ta sinúrika pirélipo. We be nalí, ati kanili machiyá japi ta a omeri anea Jeobá japi tamó iʼwírima. Echoná binelíwami 25, ati bineli japi Jeobá ko ju echi Onorúami japi a bité alí japi sinibí tamó iʼwírima. Japalí aminabi tamó iʼwiri, tamujé ko aminabi we bichiwi japi “Jeobá bité” japi riká anili David echoná Salmo 18:46 (leeri). Japalí ma sunili aniyá echi raʼíchali, David ko jéanili Jeobá jitra: “Nijé níwala waʼlú Rité”. ¿Chúsiá anili japi Onorúami japi a bité, ju japi riká bilé rité tákoré echi namuti ke jákami ju?

2. ¿Piri binepo jenaʼí binelíwami?

² Jenaʼí binelíwami ruyema chúsiá echi Biblia aní japi Jeobá ju japi riká bilé rité alí piri ta omero binea echi jitra. Ayénachó binepo chúriká ti nokisáré jiti Jeobá nima japi riká tamujé níwala Rité. Alí upá ko binepo chúriká ti omeri olayá echi cualidades japi riká Jeobá.

CHÚSIÁ JEOBÁ JU JAPI RIKÁ BILÉ RITÉ

3. ¿Chu kabú nee echi Biblia echi raʼíchali rité? (Ayénachó iné echi dibujo).

³ Echoná Biblia aní japi Jeobá ju japi riká bilé waʼlú rité, jiti aʼlá inámipo jaré cualidades japi echi olá. Alí wisabé niraa japalí echi Jeobá nijéwami raʼicha echi cualidades jitra japi Jeobá olá, echi ko aní japi echi ju japi riká bilé waʼlú rité. Deuteronomio 32:4 ju echi bacháwala texto japi ruyé japi Jeobá ju japi riká bilé waʼlú rité. Alí japalí Ana echi yúa raʼíchili, anili: “Ke nirú waʼlú rité japi riká tamujé Onorúamiwala” (1 Sam. 2:2). Habacuc aneli Jeobá “nijé níwala Rité” (Hab. 1:12). Ayénachó echi japi osali Salmo 73 aneli Jeobá “echi rité nijé níwala sulachí” (Sal. 73:26). Alí Jeobá binoy anili japi “Rité” ju (Is. 44:8). Ma inepo bikiá cualidades japi  jitra ti machiboa chúsiá Jeobá ju japi riká bilé waʼlú rité alí ayénachó inepo chúriká Jeobá nima “tamujé níwala Rité” (Deut. 32:31).

4. ¿Chúsiá Jeobá ju japi riká bilé risochí? (Salmo 94:22).

⁴ Jeobá ko ju bilé risochí. Japalí we jiwérami ukusaa, bilé pagótami omero bakiyá echoná bilé risochí o rilemi bilé waʼlú ritechi jiti ke sampama. Echi riká cho, Jeobá tamó tibú japalí ti ikí namuti we jilírami (leeri Salmo 94:22). Echi ko tamujé tibú alí ke riwema japi ta sinibí risoa nílipo. Alí ke echi namuti bi ju, ayénachó tamó ané japi pe aminana suwábima suwaba echi namuti japi tamó risoa níliti o japi ke tamó kilí níliti (Ezeq. 34:25, 26).

5. ¿Piri ta nokisáré jiti tibútami nipo Jeobá jitra?

⁵ Jiti ta tibútami nipo Jeobá jitra, ata raʼichásaré echi yúa. Japalí ti echi riká noká, Jeobá ko isima japi ta kilí nílipo tamujé sulala alí tamujé natáala (Filip. 4:6, 7, TNM). Ma inepo japi ikili bilé hermano Artiom riwéami, japi erta asali jiti bichíyami nili. Echi ko anáchili japalí echi policía wipisoka nárili wiká namuti alí chibi olali. Echi ko anili: “Japalí tamí wipisoka narie, ani we majaa nilie. [...] Ani sinibí raʼichie Jeobá yúa jiti tamí iʼwírima kilí nilia alí machiká isimia. Sinibí ni nijéwami nili tákoré echi policía chuwé namuti aniyé [...]. Tamí jitra, Jeobá ko nili japi riká bilé tejoli japi tamí tibú”.

6. ¿Chúsiá ti omeri sinibí bichiwia Jeobá? (Isaías 26:3, 4).

⁶ Ati omeri bichiwia Jeobá. Japi riká bilé waʼlú rité o bilé risochí ke siné noké japoná atí, echi riká cho Jeobá ko sinibí echoná asimea tamó iʼwírimia. Ati omeri bichiwia jepuná, jiti echi ko ju bilé “Rité sinibisi” (leeri Isaías 26:3, 4). Echi ko sinibí bitéami ju, jiti la a isima japi riká ma anili, tamó kipuma japalí ti yúa raʼicha alí tamó iʼwírima japalí ta newalé. Ayénachó ti we bichiwi Jeobá jiti echi ko ke siné riwé japi nijéwami ju (2 Sam. 22:26). Alí ke siné wikawama echi namuti japi ta noká echi jitra alí sinibí tamó iyama wiká namuti aʼláala (Heb. 6:10; 11:6).

7. ¿Chúriká tamó iʼwiri bichiwia Jeobá? (Ayénachó iné echi foto).

⁷ Bilecho namuti japi tamó iʼwírima inea Jeobá japi riká bilé risochí ko ju, we bichiwia echi. Ati machí japi nijewia echi, sinibí tamó iʼwiri, tákoré isini kaachi ata ikí namuti we jilírami (Is. 48:17, 18). Alí japalí ti inesa chúriká Jeobá tamó iʼwiri, tamujé ko aminabi we bichíwipo. Echi riká ti oméripo anachia echi namuti we jilírami japi tamujé aboi ke oméripolí anachia. Alí isini kaachi, ikí jaré namuti japi jarecho ke omeri tamó iʼwiria, nalí ata machí japi Jeobá ko sinibí tamó iʼwiri alí ke tamó riwé. Bilé hermano Vladímir riwéami, anili: “Japalí ni wabé mulipi níliki Jeobá yúa, echi ko ju japalí ni erta asali. Echoná ni bineki we bichiwia Jeobá jiti ni bineli asali alí ni machiyé japi ni ke omeri nakuliwia echi namuti japi ni ikí”.

8. a) ¿Chúsiá ti aní japi Jeobá ko ke noké? b) ¿Chúriká tamó iʼwiri inea Jeobá japi riká tamujé níwala Rité? (Salmo 62:6, 7).

 ⁸ Jeobá ko ke noké. Japi riká bilé waʼlú rité o bilé kawí, Jeobá ayénachó we jiwérami ju alí ke noké. Japi riká echi binoy ju alí japi echi isima ke siné nakuliwi (Mal. 3:6). Japalí Adán alí Eva ke nijéwili, Jeobá ko ke nakulíwili japi nátili isimia echi pagótami jitra. Echi apóstol Pablo anili japi Jeobá ko “ketasi omero Binói niráa ʼyékaka aniyá” (2 Tim. 2:13). Jepuná ko aniwáami ju japi Jeobá ko ke siné nakulíwima japi riká ju binoy, japi nulá alí japi isima, tákoré ikiyé chuwé namuti o japi nokayé jarecho. Machiyá jepuná, tamó iʼwiri we bichiwia japi echi ko sinibí tamó iʼwírima japalí ti ikisaa namuti we jilírami alí japi a isima japi ma anili (leeri Salmo 62:6, 7).

9. ¿Piri mi biné echi hermana Tatiana jitra?

⁹ Bilecho namuti japi tamó iʼwírima inea Jeobá japi riká tamujé níwala rité ko ju, sinibí natia echi níwala cualidades alí japi isima jenaʼí Wichimóbachi. Jepuná tamó iʼwírima kilí nilia alí we nijéwami niya japalí ti ikí namuti we jilírami (Sal. 16:8). Echi riká ikili bilé hermana Tatiana riwéami japi erta asali binoy bitélachi jiti bichíyami nili. Echi ko jéaní: “Ani bineli achari. [...] Ne kulí ko we jilí nili alí wisabé niraa ani siwea nilie”. Nalí echi hermana ko chotásili natia Jeobá jitra alí japi echi isima, alí echi riká isiá jiwérili iyali jiti aminabi nijéwami nima. Echi hermana ayénachó jéaní: “Ani natie japi ni echi riká ikí jiti ni we galé Jeobá alí jiti ni isínali japi echi galé. Echi riká natia tamí iʼwírili jiti ni ke me natama nijé binoy jitra”.

10. ¿Piri mi isísaré jipi jonsa jiti mi inema Jeobá japi riká mujé níwala Rité?

¹⁰ Ma mulipi ikimea namuti we jilírami japoná ti newalepo aminabi we bichiwia Jeobá. Jiti la, jipi jonsa ati aminabi we bichíwisaré japi echi tamó iʼwírima, japi tamó iyama japi ta newalé jiti ta anachabo alí jiti nijéwiami nipo. Nalí, ¿piri mi iʼwírima jiti mi anachama? Leeri echi pagótami jitra japi uchuwi echoná Biblia alí echi hermanos jitra japi jipi piréami ju. Natá japi chúriká Jeobá néwariwélitili japi bilé waʼlú rité ju echi nijéwami jitra. Jepuná mi iʼwírima jiti mi inema Jeobá japi riká mujé níwala Rité.

NIPO JAPI RIKÁ ISÍAMI JU JEOBÁ

11. ¿Chúsiá we aʼlá ju japi ta nipo japi riká isíami ju Jeobá? (Ayénachó iné echi recuadro “ Japi omeri nokayá echi hermanos japi remalí ju”).

¹¹ Ma ti bineli jaré cualidades japi isimí japi Jeobá nima japi riká bilé rité. Jipi ko binepo chúriká ti oméripo niya japi riká echi. Japalí ti aminabi iʼwérili noká niya japi riká Jeobá, aminabi ti oméripo iʼwiria echi hermanos echoná congregación. Japi riká, Jesús ko Simón rewali Cefas (japi traducíriwa Pedro alí aniwáami ju bilé rité) (Juan 1:42). Echi jitra Jesús ko ruyá anili japi Pedro ku kanílitima echi hermanos  echoná congregación alí japi iʼwírima jiti we bichíyami nima. Echi Biblia ayénachó aní japi echi ancianos ju japi riká “bilé waʼlú rité kábiwala” japi tibú echi hermanos echoná congregación (Is. 32:2). A bichíwali ju, sinéami ti omero niya japi riká isíami ju Jeobá alí niya japi riká bilé rité japi iʼwérili iyá echi hermanos echoná congregación (Efes. 5:1).

12. ¿Piri nokiboa jiti nipo japi riká bilé risochí?

¹² Nii japi riká bilé risochí. Japalí echi hermanos risoa ikisaa echi nakówami jitra, guerras, japalí waʼlú ukusaa o jarecho si namuti, ata oméripo niya japi riká bilé risochí japalí ta bayesa echi hermanos jiti mochima tamujé pirélachi. Jipi “wabé waminánomí rawé”, echi namuti aminabi we cha riwélima. Jiti la, jipi jonsa ati iʼwírisaré anakupi niraa (2 Tim. 3:1). Bilecho namuti japi ta omeri nokayá ko ju, ku kanílitia echi hermanos alí iʼwiria jiti ke riwema Jeobá amígowala niya. Japi riká, ata omeri we kanílika narepia echi hermanos echoná salón jiti echi riká iʼwíripo jiti sinéami we kanílima echoná congregación. Jipi ati piré japoná echi pagótami ke galéami ju anakupi niraa. Jiti la, japalí echi hermanos alí hermanas simía echoná napawíliwachi, ati nakí japi we kanílima alí nílima japi ta we galé echi.

13. ¿Piri omeri nokayá echi ancianos jiti nima japi riká bilé risochí? (Ayénachó iné echi foto).

¹³ Echi ancianos ayénachó omeri niya japi riká bilé risochí echi hermanos jitra japalí ikí namuti jilírami. Japi riká, japalí karúa ikisaa o bilé sapú torúami nisa echomí hospital, echi ko sapú iʼwiri. Ayénachó echi ko iʼwérili iyá echi hermanos néeka echi Biblia. Echi ancianos a we simá nokáami nísaká alí we aʼlá kipúsaká japi chu nili echi hermanos, a keʼré japi echi  hermanos ko iʼwírili tánima. Echi ancianos a olásaká echi cualidades, a keʼré japi echi hermanos nílima japi we galéliwa alí ke me jilí nirámiré nijewia echi busuréliami japi iyáliwa néeka echi Biblia (1 Tes. 2:7, 8, 11).

14. ¿Piri nokiboa jiti jarecho tamó bichíwima?

¹⁴ Isí japi jarecho mi bichíwima. Sinéami ti nakí japi jarecho machimea japi ta echi iʼwíripo japalí ikí namuti jilírami (Prov. 17:17). ¿Piri nokiboa jiti jarecho tamó bichíwima japi ta echi iʼwíripo? Jiwérili nokiboa sinibí rawé olayá cualidades japi riká Jeobá. Japi riká, ati omeri nokayá japi ta anili alí abepi nawayá japoná ti sisáré (Mat. 5:37). Ayénachó iʼwíripo echi japi newalé iʼwírili. Alí ata iyásiwaká bilé nóchali, ati iʼwérili nokisáré nokayá japi riká ti nuleeri.

15. Japalí echi ancianos noká japi jarecho echi bichíwima, ¿chúriká iʼwíritami ju echi congregación?

¹⁵ Japalí echi ancianos noká japi jarecho echi bichíwima, ¿chúriká iʼwíritami ju echi congregación? Echi hermanos japi muchuwi echoná grupo japoná nawesa, inílima japi echi anciano omeri echi iʼwiria japalí newalé iʼwírili, ayénachó inílima japi we aʼlá tibúliwa. Japalí echi ancianos iʼwérili  noká iʼwiria echi hermanos jepuná isimí japi echi ko inílima japi we galéliwa. Alí japalí iyá busuréliami néeka echi Biblia alí japi aní echoná publicaciones japi nijí echi pioni aʼlá nijéwami alí ke ko japi aboi nata, echi ancianos ko noká japi echi hermanos aminabi we bichíwima echi. Ayénachó japalí echi ancianos ke nawesa japi aneli echi hermanos, ayénachó iʼwiri jiti aminabi we bichíwima echi.

16. ¿Chúriká tamó iʼwiri sinibí nokayá japi aʼláala ju, alí chúriká ti iʼwiri jarecho?

¹⁶ Sinibí isí japi aʼláala ju. Ati sinibí we aʼlá nijéwisaká suwaba japi Jeobá nulá alí ti nokisáaká japi riká ti ma bineli echoná Biblia, ati we aʼlá ejemplo nipo jarecho hermanos jitra. Ata binésaká echi Biblia alí ti iʼwérili nokisáaká aminabi we bichiwia, ke ti siné riwepo Jeobá alí sinibí nijéwipo echi. Ayénachó ke bichíwipo echi namuti japi ke bichíwali ju alí ke cho natabo japi riká nata echi japi ke nijéwami ju (Efes. 4:14; Sant. 1:6-8). Ayénachó japalí ti we bichiwi Jeobá alí japi echi isima pe aminana, tamó iʼwiri ke siwea japalí ti kipú echi raʼíchali japi ke aʼláala ju (Sal. 112:7, 8). Alí ayénachó ti oméripo iʼwiria jarecho japi ikí namuti jilírami (1 Tes. 3:2, 3).

17. ¿Chúriká omeri echi ancianos iʼwiria echi hermanos jiti we bichíyami nima?

¹⁷ Echi ancianos aʼlá nátami nísaré, aʼlá nokáami alí simá nokáami. Japalí echi ancianos “ne galá bichíyami [ju] echi Galabé Riosi Raʼíchala”, iʼwiri echi congregación jiti we bichíyami nima alí ke riwema Jeobá (Tito 1:9; 1 Tim. 3:1-3). Japalí echi ancianos we aʼlá ejemplos ju, iʼwiri echi publicadores jiti sinibí simama echoná napawíliwachi, nawisasia alí bineli niraa binema echi Biblia. Alí japalí echi hermanos ikí namuti we jilírami japi we risoa níliti alí omonáriti, echi ancianos ko newalari echi hermanos japi we bichíwisaré Jeobá alí echi namuti japi isima.

18. ¿Chúsiá ti walubéala anénali Jeobá alí ti aminabi we mulíwinali? (Ayénachó iné echi recuadro “ Chúriká mi aminabi mulíwima Jeobá”).

¹⁸ Ma ti binesa japi chúriká ju Jeobá, ati inili japi riká David japi jéanili: “Walubéala anérami nísaré Jeobá, nijé níwala Rité” (Sal. 144:1). Jeobá ko ju alí sinibí nima bilé Onorúami japi tamujé ko a omeri bichiwia. Alí tákoré ti ma ochérami nisa, echi ko sinibí tamó iʼwírima jiti mulipi mochibo echi yúa. Jiti la tamujé ko omeri aniyá: “Echi ko ju nijé níwala Rité” (Sal. 92:14, 15).