1. Tuir Salmo 18:​46, David kompara Jeová hanesan saida?

 DALA ruma ita hasoru problema neʼebé akontese derrepente deʼit no neʼe bele lori susar oioin. Ita agradese tebes tanba ita bele sadere ba Jeová atu hetan ninia ajuda! Iha lisaun antes neʼe, ita aprende ona katak Jeová mak Maromak neʼebé moris no nia prontu atu ajuda ita. Bainhira ita simu ninia ajuda, neʼe hametin ita-nia fiar katak “Jeová mak Maromak neʼebé moris”! (Lee Salmo 18:46.) Maibé, bainhira David temi tiha liafuan iha salmo neʼe, tuirmai nia bolu Maromak nuʼudar “haʼu-nia Fatuk Boot”. Tanbasá nia kompara Jeová, Maromak neʼebé moris hanesan fatuk boot?

2. Saida mak ita sei aprende husi David nia liafuan kona-ba Jeová nuʼudar “haʼu-nia Fatuk Boot”?

² Iha lisaun neʼe, ita sei aprende tanbasá Bíblia temi Jeová nuʼudar fatuk boot, no komparasaun neʼe hanorin saida mai ita kona-ba nia. Ita mós sei aprende oinsá mak ita bele sadere ba nia nuʼudar ita-nia Fatuk Boot. Ikusliu, ita sei koʼalia hamutuk dalan neʼebé ita bele banati-tuir Jeová nia hahalok sira.

TANBASÁ BÍBLIA TEMI JEOVÁ NUʼUDAR FATUK BOOT?

3. Dala barak Bíblia uza liafuan “fatuk boot” iha dalan oinsá? (Haree dezeñu.)

³ Bíblia kompara Jeová hanesan “fatuk boot” atu ajuda ita komprende kona-ba ninia hahalok balu. Bainhira Jeová nia atan sira hahiʼi nia kona-ba ninia hahalok furak sira, dala barak sira temi nia iha Bíblia nuʼudar fatuk boot. Dala primeiru neʼebé Bíblia temi Jeová nuʼudar “Fatuk Boot” mak hakerek iha Deuteronómio 32:4. Iha Ana nia orasaun, nia hatete: “La iha fatuk seluk hanesan ami-nia Maromak.” (1 Sam 2:2) Habakuk bolu Jeová nuʼudar “haʼu-nia Fatuk Boot”. (Hab 1:12) Hakerek-naʼin ba Salmo 73 bolu  Maromak “haʼu-nia fatuk boot”. (Sal 73:26) No Jeová mós refere ba ninia an nuʼudar fatuk boot. (Isa 44:8) Mai ita haree Jeová nia hahalok tolu neʼebé atu hanesan ho fatuk boot, no aprende oinsá ita bele halo Jeová sai nuʼudar “ita-nia Fatuk Boot”.—Deut 32:31.

4. Oinsá Jeová sai nuʼudar fatin protesaun? (Salmo 94:22)

⁴ Jeová mak fatin protesaun. Hanesan fatuk boot bele fó protesaun ba ema husi anin boot, Jeová mós bele proteje ita bainhira ita hasoru susar iha ita-nia moris. (Lee Salmo 94:22.) Nia halo ita sente seguru no proteje ita husi buat neʼebé bele estraga ita-nia relasaun ho nia. No nia mós promete katak iha futuru, nia sei halakon susar hotu neʼebé halo ita laran-susar no sente la hakmatek.—Eze 34:​25, 26.

5. Oinsá mak Jeová bele sai nuʼudar ita-nia fatin protesaun

⁵ Dalan ida atu Jeová bele sai nuʼudar ita-nia fatin protesaun mak hodi halo orasaun ba nia. Bainhira ita halo orasaun, Jeová sei fó ita ‘Ninia dame’ neʼebé bele proteje ita-nia neon no laran. (Flp 4:​6, 7) Hanoin toʼok irmaun ida naran Artem neʼebé tama komarka tanba ninia fiar. Durante iha komarka, iha ema ida neʼebé halo beibeik interrogasaun neʼebé makaʼas no hamoe nia. Artem hatete: “Haʼu estrese tebetebes bainhira ema neʼe bolu haʼu atu halo interrogasaun. . . . Haʼu sempre halo orasaun ba Jeová. Haʼu husu nia atu iha dame iha laran no matenek. Maski ema neʼe fó-terus haʼu, haʼu nafatin kalma. . . . Ho Jeová nia ajuda, haʼu sente hanesan haʼu hetan protesaun husi moru boot ida.”

6. Tanbasá mak ita bele sadere ba Jeová iha tempu hotu? (Isaias 26:​3, 4)

⁶ Jeová laran-metin no sei nunka husik ita. Hanesan fatuk boot neʼebé labele muda bá-mai, Jeová sempre iha ba ita. Ita bele tau fiar ba nia tanba nia mak “Fatuk Boot rohan-laek nian”. (Lee Isaias 26:​3, 4.) Tanba nia mak Maromak neʼebé sempre iha, nia sei kumpre ninia promesa hotu, rona ita-nia orasaun, no fó ajuda kuandu ita presiza. Ita mós bele sadere ba Jeová tanba nia hatudu laran-metin ba sira neʼebé serbí nia. (2 Sam 22:26) Nia sei nunka haluha buat neʼebé ita halo ona, no nia sei fó kolen mai ita.—Ebr 6:10; 11:6.

7. Saida mak ita sei sente bainhira ita tau fiar ba Jeová? (Haree mós foto.)

⁷ Ita halo Jeová sai nuʼudar ita-nia Fatuk Boot, kuandu ita tau fiar tomak ba nia. Ita fiar katak hodi halo tuir nia maski iha tempu susar, ita sei hetan benefísiu. (Isa 48:​17, 18) Bainhira ita sente Jeová nia ajuda iha ita-nia moris, ita-nia fiar ba nia sei metin liután. No ho Jeová nia ajuda ita sei sai prontu atu hasoru susar naran deʼit. Dala ruma kuandu ita hasoru problema no la iha ema neʼebé bele ajuda ita, ita foin rekoñese katak Jeová prontu atu ajuda ita. Irmaun Vladimir hatete: “Bainhira haʼu iha komarka, neʼe  mak tempu neʼebé haʼu sente besik liu ba Jeová. Haʼu aprende atu sadere liután ba Jeová tanba haʼu mesak deʼit no haʼu labele kontrola buat neʼebé akontese.”

8. (a) Tanbasá ita bele dehan katak Jeová la troka? (b) Ita hetan benefísiu saida tanba Maromak sai nuʼudar ita-nia Fatuk Boot? (Salmo 62:​6, 7)

⁸ Jeová la troka. Hanesan ho fatuk neʼebé boot, Jeová nunka troka. Ninia hahalok no hakarak nunka troka. (Mal 3:6) Bainhira Adão no Eva kontra Jeová iha jardín Eden, Jeová nia hakarak ba ema la troka. Hanesan buat neʼebé apóstolu Paulo hakerek, Jeová “labele nega ninia an rasik”. (2 Tim 2:13) Neʼe katak maski buat naran deʼit akontese ka buat neʼebé ema seluk halo, Jeová nia hahalok, hakarak, no matadalan sira nunka troka. Tanba Jeová nunka troka, ita hatene katak nia sei ajuda ita iha tempu neʼebé susar, no nia sei kumpre ninia promesa kona-ba futuru.—Lee Salmo 62:​6, 7.

9. Saida mak ita aprende husi irmán Tatyana nia esperiénsia?

⁹ Ita halo Jeová sai nuʼudar ita-nia Fatuk Boot hodi fokus kona-ba ninia hahalok sira no mós ninia hakarak ba rai no ema. Hodi halo nuneʼe bele ajuda ita atu kalma nafatin no laran-metin ba nia durante tempu susar. (Sal 16:8) Neʼe mak buat neʼebé akontese ba irmán Tatyana neʼebé sai dadur iha uma tanba ninia fiar. Nia hatete: “Haʼu mesak deʼit iha uma. Foufoun neʼe susar tebes mai haʼu. Dala barak haʼu sente laran-kraik.” Maibé, bainhira Tatyana haree oinsá ninia susar liga ho Jeová no Ninia hakarak, neʼe ajuda nia atu tahan no kalma nafatin. Nia hatete: “Hodi komprende tanbasá buat sira-neʼe akontese, fó-hanoin haʼu katak haʼu hasoru susar sira-neʼe tanba haʼu hakarak halo Jeová kontente. Neʼe ajuda haʼu atu la hanoin an deʼit.”

10. Oinsá mak Jeová bele sai nuʼudar ita-nia Fatuk Boot agora?

¹⁰ Lakleur tan ita sei hasoru susar boot, no ita presiza sadere ba Jeová liután. Agora mak tempu atu hametin ita-nia fiar katak Jeová sei ajuda ita atu laran-metin nafatin iha situasaun naran deʼit. Oinsá ita bele halo nuneʼe? Ita bele lee istória sira husi Bíblia no esperiénsia husi irmaun-irmán sira iha tempu modernu. Haree oinsá Maromak apoia ninia atan sira, no medita kona-ba esperiénsia sira-neʼe. Hodi halo nuneʼe sei ajuda ita atu halo Jeová sai nuʼudar Ita-nia Fatuk Boot.

BANATI-TUIR JEOVÁ NIA HAHALOK SIRA

11. Tanbasá ita hakarak banati-tuir Jeová nia hahalok sira? (Haree mós kaixa “ Planu ba irmaun joven sira”.)

¹¹ Ita aprende ona kona-ba Jeová nia hahalok neʼebé hanesan fatuk ida. Agora, mai ita haree oinsá mak ita bele banati-tuir ninia hahalok sira. Se ita hakaʼas an atu halo nuneʼe, ita bele hametin irmaun-irmán  sira. Porezemplu, Jesus hanaran Simão nuʼudar Cefas (tradús nuʼudar “Pedro”), neʼebé signifika “fatuk”. (João 1:42) Neʼe fó ideia katak Pedro sei fó kmaan ba ema seluk iha kongregasaun no hametin sira-nia fiar. Bíblia esplika katak katuas kongregasaun sira mak hanesan “mahon husi fatuk boot”. Neʼe mak ai-knanoik kona-ba oinsá sira proteje irmaun-irmán sira. (Isa 32:2) Klaru katak ita hotu bele hametin malu se ita banati-tuir Jeová nia hahalok sira.—Éf 5:1.

12. Oinsá mak ita bele sai fatin protesaun ba ema seluk?

¹² Sai fatin protesaun. Dala ruma, karik ita bele fó fatin ba irmaun-irmán sira neʼebé hasoru dezastre naturais, krize, ka funu. Nuʼudar situasaun iha “loron ikus sira” sai aat ba beibeik, karik sei iha oportunidade barak liután atu ajuda malu. (2 Tim 3:1) Ita mós bele ajuda irmaun-irmán sira iha dalan emosaun no espirituál. Dalan ida atu halo nuneʼe mak hodi fó benvindu ba sira ho domin bainhira sira tuir reuniaun no fó kmaan ba sira. Ita hakarak ema hotu iha kongregasaun atu sente domin no unidade. Ohin loron ema barak trata malu iha dalan neʼebé la diʼak no neʼe halo irmaun-irmán sira laran-taridu ka la sente domin. Tan neʼe, bainhira irmaun-irmán sira tuir reuniaun, ita hakarak hakaʼas an atu sira bele sente domin, kmaan, no seguru.

13. Oinsá katuas sira bele sai nuʼudar fatin protesaun ba irmaun-irmán sira? (Haree mós foto.)

¹³ Katuas kongregasaun sira bele sai nuʼudar fatin protesaun ba irmaun-irmán sira neʼebé hasoru susar oioin. Durante tempu dezastre no situasaun emerjénsia, katuas sira lalais atu organiza hodi fó ajuda ba irmaun-irmán sira. Sira mós fó  ajuda iha dalan espirituál. Loloos, fasil ba irmaun-irmán sira atu hakbesik ba katuas ida se katuas neʼe hatudu laran-diʼak, rona ba sira, no koko atu komprende sira-nia sentimentu. Hahalok hanesan neʼe bele ajuda irmaun-irmán sira atu sente domin, no halo fasil ba sira atu halo tuir matadalan neʼebé katuas sira fó.—1 Tes 2:​7, 8, 11.

14. Oinsá mak ita hatudu katak ema bele tau fiar ba ita?

¹⁴ Hatudu katak ema bele tau fiar ba ita. Ita hakarak ema atu tau fiar katak ita sei ajuda sira kuandu sira presiza. (Prov 17:17) Ita bele halo saida atu ema bele tau fiar ba ita? Hakaʼas an atu banati-tuir Jeová nia hahalok loroloron. Porezemplu, hakaʼas an atu kumpre ita-nia promesa sira no halo buat hotu tuir tempu. (Mt 5:37) Se ita hatene ema ruma neʼebé presiza ajuda, ita bele ajuda sira. Liután neʼe, hakaʼas an atu kumpre ita-nia knaar iha kongregasaun hodi tuir matadalan neʼebé ita simu.

15. Oinsá mak kongregasaun hetan benefísiu tanba tau fiar ba katuas sira?

¹⁵ Oinsá mak kongregasaun hetan benefísiu tanba tau fiar ba katuas sira? Bainhira irmaun-irmán sira hatene katak sira bele bolu katuas sira iha tempu naran deʼit neʼebé sira presiza, neʼe sei ajuda sira atu hamenus sira-nia estrese. Irmaun-irmán sira mós bele sente domin bainhira sira hatene katak katuas sira prontu atu ajuda sira. Bainhira katuas sira uza Bíblia no publikasaun sira atu fó konsellu duké sadere ba sira-nia hanoin rasik, irmaun-irmán  sira sei tau fiar liután ba sira. Irmaun-irmán sira mós bele tau fiar liután ba katuas sira se sira la fó sai ema nia problema pesoál, no mós se sira kumpre sira-nia promesa.

16. Ita hetan benefísiu saida bainhira ita kaer metin ba Jeová nia liafuan?

¹⁶ Kaer metin ba Jeová nia liafuan. Ita bele sai nuʼudar ezemplu diʼak ba ema seluk se ita kaer metin ba buat neʼebé loos no halo desizaun bazeia ba Bíblia. Bainhira ita-nia fiar no koñesimentu sai boot liután, ita sei kaer metin ba lia-loos. Ita sei rekoñese hanorin falsu sira no ideia sira neʼebé la tuir Jeová nia hanoin, no ita sei la husik buat sira-neʼe atu fó influénsia ba ita. (Éf 4:14; Tgo 1:​6-8) Ita-nia fiar ba Jeová no ninia promesa sira sei halo ita kalma bainhira ita simu notísias neʼebé la diʼak. (Sal 112:​7, 8) Ita mós bele ajuda ema neʼebé karik hasoru daudaun susar.—1 Tes 3:​2, 3.

17. Oinsá mak katuas sira bele hametin kongregasaun?

¹⁷ Katuas sira presiza kontrola sira-nia hahalok, iha hanoin neʼebé loos, moris iha dalan neʼebé loos, no la ulun-toos. Sira bele ajuda ema seluk atu sente kalma, no hametin kongregasaun atu “kaer metin ba Maromak nia liafuan”. (Tito 1:9; 1 Tim 3:​1-3) Liuhusi sira-nia ezemplu no dalan neʼebé sira tau matan ba kongregasaun sira bele ajuda irmaun-irmán sira atu tuir reuniaun, haklaken, no estuda mesak. Bainhira irmaun-irmán sira hasoru susar neʼebé halo sira laran-kraik, katuas sira anima sira atu sadere ba Jeová no fokus ba ninia promesa sira.

18. Tanbasá ita hakarak hahiʼi Jeová no hakbesik liután ba nia? (Haree mós kaixa “ Dalan ida atu hakbesik liután ba Jeová”.)

¹⁸ Depois aprende tiha kona-ba Jeová nia hahalok furak sira, hanesan Liurai David, ita bele hatete: “Fó hahiʼi ba Jeová, haʼu-nia Fatuk Boot.” (Sal 144:1) Ita bele sadere nafatin ba Jeová. Durante ita-nia moris tomak, maski ita idade ona, ita bele fiar katak nia sei kontinua ajuda ita atu nafatin hakbesik ba nia. No ita bele hatete: “Nia mak haʼu-nia Fatuk Boot.”—Sal 92:​14, 15.