1. Umo ga Ndzimo 18:46, Dhavhidhe a di rana Jehovha gu khuye ginani?

 ETHU ha gu vbanya ga dzitepo hi tshanganago ni sigaradzo si kuhago womi wathu mwendro si vbindrugedzago womi wathu khu gu vbeleya. Ganiolu, ethu hi ngu bonga ngudzu kholu hi na ni giphaso gya Nungungulu! Ga ndrima yi vbindridego, hi dundrugisidwe gu khethu Jehovha, Nungungulu a vbanyago nigu a dzi emisede tepo yatshavbo gu hi phasa. Tepo hi hakhago giphaso gya Jehovha isoso sa gu hi tiyisegisa gu khiso “Jehovha a ngu vbanya!” (Leri Ndzimo 18:46, NM.) Hwane nya gu ba a ganede malito yoyo, Dhavhidhe a di rana Jehovha gu khuye “giwindri gyangu.” Khu ginani Jehovha, Nungungulu a vbanyago a fananiswago ni gilo nya mba vbanya a gu giwindri?

2. Ginani hi na bhulago khigyo avba nya ndrima yeyi?

² Ga ndrima yeyi, hi na wona gu khethu khu ginani Jehovha a fananiswago ni giwindri nigu isoso sa gu hi hevbudza ginani maningano khuye. Hi na wona gambe gu khethu khu ginani hi yedego gu mu tumba kha nga giwindri gyathu. Khu gu hegisa, hi na bhula khu dzindziya hi nga dzi thumisago gasi gu pimedzeya makhalelo ya Jehovha.

KHU GINANI JEHOVHA A FANANISWAGO NI GIWINDRI?

3. Bhibhiliya ya gu thumisa dzitepo nya dzingi lito “giwindri” khu dzindziya muni? (Wona fotu nya .)

³ Bhibhiliya ya gu fananisa Jehovha ni “giwindri” gasi yi hi phasa gu pwisisa makhalelo nyo khaguri a gu nawo. Dzitepo nya dzingi, tepo sithumi sa Jehovha si hlamadziswago khu makhalelo yaye, iso sa gu mu tshamuseya omu Bhibhiliya kha nga giwindri. Omu nya Bhibhiliya, Jehovha a gu ranwa gu pwani “Giwindri” khu tepo nyo pheye omu ga Dhewuteronome 32:4. Omu nya nombelo waye, Ana a di khuye: “Gimwalo giwindri gi tiyidego nya gu fanane ni Nungungulu wathu.” (1 Sam. 2:2) Habhakuka a di rana Jehovha gu khuye ‘giwindri gyangu.’ (Habh. 1:12) Mulovi nya Ndzimo 73 a di rana Nungungulu gu khuye “likhokhola nya monyo  wangu.” (Ndzi. 73:26) Nigu, Jehovha a dzi fananiside ni giwindri. (Isa. 44:8) Hongoleni hi bhula khu makhalelo mararu ya Jehovha ni esi hi si hevbulago khu gu ba ari “giwindri gyathu.”— Dhet. 32:31.

4. Jehovha wuthavelo khu ndziya muni? (Ndzimo 94:22)

⁴ Jehovha wuthavelo. Gya gu ba gi veta gingulu, hi ngu mana gu vhikelega ha guya beya umo nya phago nya giwindri. Khu ndziya nyo fane, Jehovha a ngu hi vhikeya tepo hi tshanganago ni sigaradzo womini wathu. (Leri Ndzimo 94:22.) Uye a ngu hi phasa gu vhikeya wupari wathu naye ni gu hi tiyisegisa gu khuye gimwalo gigaradzo gi na hi tshanisago kala gupindruga. Nigu uye a ngu hi tumbisa gu khuye mindru wa tshigu, a na dusa ni gevbini gi hi girago hi garadzega mwendro gu tshaniseka. — Ezek. 34:25, 26.

5. Jehovha a nga khala wuthavelo wathu khu ndziya muni?

⁵ Mweyo nya dzindziya hi nga manago khiyo wuthavelo wa Jehovha khu gu gombeya gwaye. Tepo hi gombeyago, Jehovha a gu hi ninga “gurula ga Nungungulu” gu vhikeyago monyo ni mapimo yathu. (Filp. 4:6, 7) Wona giyeyedzo gya ndriyathu moyo nyo pwani khu Artem, a nga khotedwa khu kotani nya gukhodwe gwaye. Tepo a nga ba a khotedwe, investigador nyo khaguri a di mu gira siwudziso dzitepo nya dzingi, a mu phara khu ndziya nya mba yadi a bwe a mu thurugiseya. Artem a di khuye: “Tepo yatshavbo a nga ba a nyi gira siwudziso, si di gu nyi tadza hungo. . . . Eni tepo yatshavbo nyi di gu gombeya ga Jehovha gasi a nyi ninga gurula ni guti. Ambari olu a nga ba a nyi gira siwudziso nya singi, eni nyi si kodzide gu simama na nyi rude. . . . Khu gu phaswa khu Jehovha, si di gu gira gu khatshi nyi di gu vhikedwa khu likhokhola.”

6. Khu ginani tepo yatshavbo hi nga tumbago Jehovha? (Isaya 26:3, 4)

⁶ Jehovha tumbegide nigu gima kha na nga hi diga. Gu fana ni giwindri gi gu mba khuga gi hongola wumbe wulanga, ethu hi ngu dziti gi khethu Jehovha tepo yatshavbo a na ba a romo gasi gu hi phasa. Ethu hi nga mu tumba kholu uye “Giwindri . . . kala gupindruga.” (Leri Isaya 26:3, 4.) Uye tepo yatshavbo a na ba a dzi emisede gu tadzisa situmbiso saye, gu engiseya milombelo yathu ni gu hi ninga giphaso gi vbwetegago. Hi nga mu tumba gambe kholu Jehovha a ngu tumbega ga vale va mu thumeyago. (2 Sam. 22:26) Uye gima kha na nga divala esi hi girago nigu a na hi tshatshazeya. — Hebh. 6:10; 11:6.

7. Ginani gi na giregago ha gu tumba Jehovha? (Wona fotu.)

⁷ Ha gu wona Jehovha nga giwindri gyathu tepo hi mu tumbago. Ethu hi ngu tumba gu khethu, ha gu mu engisa ambari tepo hi tshanganago ni sigaradzo, hi na wuyedwa. (Isa. 48:17, 18) Tepo yatshavbo hi wonago edzi Jehovha a hi phasidego khidzo, hi na engedzeya gu mu tumba. Nigu, ha gu engedzeya gu tiyisega gu khethu Jehovha khuye basi a nga hi phasago gu timiseya ni gevbini gigaradzo ambari nari gikhongolo. Tepo yatshavbo hi tshanganago ni sigaradzo si girago gu khatshi kha hi na nga si kodza gu si pala, hi ngu wona lisima nya gu tumbe Jehovha. Vladimir wari, khuye: “Tepo nyi yi vbedzidego na nyi khotedwe pasoni, khiyo tepo nyi nga tiyisa wupari wangu ni Nungungulu. Nyi hevbulede gu tumba Jehovha kholu nyi diri nyonga,  nigu khuye basi a nga hadzi gu nyi phasa gu timiseya.”

8. a) Khu ginani hi nga ganeyago gu khethu Jehovha kha vbindrugedzi? b) Hi nga wuyedwa kharini khu gu ba Nungungulu ari giwindri gyathu? (Ndzimo 62:6, 7)

⁸ Jehovha kha vbindrugedzi. Gu fana ni giwindri nya gikhongolo, Jehovha tiyide nigu kha vbindrugedzi. Makhalelo ni makungo yaye gima kha ma vbindrugedzi. (Mal. 3:6) Tepo a nga wugedwa khu Adhamu ni Evha thembweni ga Edheni, Jehovha kha vbindrugedza makungo yaye. Mupostoli Pawulo a lovide gu khuye Jehovha “kha si kodzi gu dzi bomba abune.” (2 Tim. 2:13) Kha si khatadzisegi esi si giregago mwendro esi vambe va girago, Jehovha gima kha na nga vbindrugedza makhalelo yaye, makungo yaye mwendro sileletelo saye. Kha nga olu Jehovha a gu mba vbindrugedza, ethu hi ngu dziti gu khethu a na hi phasa ga dzitepo nyo garadze nigu a na simama gu tadzisa situmbiso saye mindru wa tshigu. — Leri Ndzimo 62:6, 7.

9. Ginani hi gi hevbulago khu matshango ya Tatyana?

⁹ Ha gu dundrugeya khu makhalelo ya Jehovha, khu makungo a gu nawo khu mafu ni vathu, isoso si na hi phasa gu mu tumba hi bwe hi mu wona kha nga giwindri gyathu. Isoso si na hi phasa gu simama na hi rude hi mu tumba tepo hi tshanganago ni sigaradzo. (Ndzi. 16:8) Khiso si giregidego ni ndriyathu moyo nya nyamayi nyo pwani khu Tatyana, a nga himbedzedwa gu duga khu gaya gwaye khu kotani nya gukhodwe gwaye. Uye wari, khuye: “Nyi di gu dzipwa nyonga, gupheyani si garadzide. Tepo yatshavbo nyi di gu dzipwa na nyi vbede tshivba.” Khavbovbo, a di pheya gu dundrugeya khu Jehovha ni makungo a gu nawo khu vathu a bwe a wona lisima nya gu timiseye sigaradzo saye. Isoso si mu phaside gu a dzipwa na rude si bwe si tiyisa gukhodwa gwaye. Uye wari, khuye: “Gu pwisisa gighelo gi nga nyi gira nyi manega ga giemo gile, si nyi phaside gu dundruga gu kheni kholu nyi nga ba nyi haladza Jehovha. Isoso si nyi phaside gu ema gu pimisa ngudzu kheni.”

10. Jehovha a nga khala giwindri gyago olu, khu ndziya muni?

¹⁰ Nya mba hweya, hi na tshangana ni giemo nyo garadze ngudzu nigu si na vbwetega gu hi tumba ngudzu Jehovha gu vbindra gale. Khu kharato, si na ni lisima gu hi tiyisa gutumba gwathu ga Jehovha olu nigu khodwa gu khethu uye a na hi ninga giphaso hi gi vbwetago gasi hi simama na hi tumbegide gwaye. Hi nga si gira kharini isoso? Khu gu hevbula matimo nya Bhibhiliya ni matimo nya sithumi sa Jehovha sa matshigoni yathu. Dundrugeya khedzi makhalelo ya Nungungulu nyo fane ni giwindri ma phasago khidzo sithumi saye. Dundrugeya gwadi khu matimo yoyo. Wa gu gira isoso, si na gu phasa gu wona Jehovha kha nga giwindri gyago.

PIMEDZEYA MAKHALELO YA JEHOVHA

11. Khu ginani hi vbwetago gu pimedzeya makhalelo ya Jehovha? (Wona kwadru yi gu khiyo: “ Misuwo vandriyathu nya vaphya va nga manegago nayo.”)

¹¹ Hi wonide makhalelo ya Jehovha ma mu girago a fana ni giwindri. Olu hongoleni hi wona edzi hi nga pimedzeyago khidzo makhalelo yaye. Ha gu gira satshavbo hi si kodzago gasi gu pimedzeya makhalelo ya Jehovha, hi nga tiyisa vandriyathu. Khu giyeyedzo, Jesu a di ninga lina  Simoni li gu khilo Khefasi, (la gu vbindrugedzedwa li thulago gu khilo “Pedro”), lina lolo la gu thula “Gipandre nya Giwindri.” (Joh. 1:42) Khu ndziya yeyi, Jesu a di gu ganeya gu khuye Pedro a di hadzi gu thaveleya vambe libandlani ni gu va tiyisa. Madhota libandlani ma gu tshamusedwa nga “mutsa nya giwindri.” Isoso sa gu thula gi khiso ayo ma gu vhikeya vandriyathu libandlani. (Isa. 32:2) Ganiolu, hatshavbo hi nga tiyisa vambe ha gu pimedzeya makhalelo ya Jehovha.— Efes. 5:1.

12. Hi nga phasa kharini vandriyathu dziteponi nya sigaradzo?

¹² Phasa vandriyago dzitepo nya sigaradzo. Tepo vandriyathu va luzago dzindranga dzawe khu kotani nya dzimhango nya tumbunugo mwendro dzinyimbi hi nga va rana va ta khala magaya gwathu. Giemo “matshigoni yaya nyo hegise” gya gu engedzeya guvivba, nigu nya mba kanakana si na vbweta gu hi phasa vandriyathu. (2 Thim. 3:1) Nigu gambe, hi nga va thaveleya hi bwe hi va yeyedza lihaladzo va li vbwetago. Mweyo nya dzindziya nya gu gire khiyo isoso, khu gu va thaveleya tepo va tago mitshanganoni hi bwe hi va tiyisa. Ha gu vbweta gu khethu libandlani gu khala wulanga gu yeyedzwago lihaladzo. Vathu nya vangi muhuno va ngu phara vambe khu ndziya nya mba yadi, isoso sa gu gira gu vandriyathu va garadzega va bwe va dzipwa na va si haladzwi. Khu kharato, tepo vandriyathu va tago mitshanganoni, ha gu vbweta gu va tiyisa hi bwe hi va gira va dzipwa na va gu haladzwa.

13. Madhota ma nga thaveleya kharini vandriyathu tepo va tshanganago ni sigaradzo? (Wona fotu.)

¹³ Madhota ma nga thaveleya vandriyawe tepo va tshanganago ni sigaradzo. Tepo dzi giregago dzimhango nya tumbunugo mwendro dziemergensia medhika, madhota ma gu dzegeya gu gira malulamiselo gasi gu phasa vandriyawe. Avo gambe va ngu ninga giphaso gya liphuvboni. Vandriyathu va na tshulega gu lomba giphaso lidhota nyo khaguri, va gu dziti gu khavo ilo li na ganeya nawo khu ndziya nya yadi, li va  engiseya gwadi ni gu zama gu pwisisa edzi va dzipwago khidzo. Khu ndziya yeyi, si na vbevbugeya vandriyathu gu landrisa sileletelo si seketedwago omu nya Bhibhiliya va ningwago khu madhota.— 1 Tes. 2:7, 8, 11.

14. Hi nga yeyedza kharini gu khethu hi ngu tumbega?

¹⁴ Tumbega. Ha gu vbweta gu khethu vambe va tumba gu khavo hi na va phasa, ngudzu-ngudzu tepo va tshanganago ni sigaradzo. (Mav. 17:17) Ginani hi nga girago gasi vambe va hi tumba? Hi nga gira isoso khu gu pimedzeya makhalelo ya Jehovha tshigu ni tshigu. Khu giyeyedzo, hi nga simama gu tadzisa situmbiso sathu nigu khu tepo yakone. (Mat. 5:37) Hi nga phasa vambe tepo va vbwetago giphaso. Nigu gambe, ha gu vbweta gu gira mithumo hi ningwago libandlani na hi gu landra satshavbo sileletelo hi ningidwego.

15. Libandla li nga wuyedwa kharini tepo madhota ma tumbegago?

¹⁵ Libandla, li nga wuyedwa kharini tepo madhota ma tumbegago? Tepo vandriyathu va dzitigo gu khavo va nga rana madhota tepo va vbwetago giphaso, isoso si na phasa vandriyathu gu mba garadzega ngudzu. Vandriyathu gambe, va ngu dzipwa na va gu haladzwa tepo va dzitigo gu khavo madhota ma dzi emisede gu va phasa.  Tepo madhota ma thumisago Bhibhiliya ni mabhuku yathu gasi gu ninga wusingalagadzi nasiri mawonelo yawe, vandriyathu va na engedzeya gu ma tumba. Vandriyathu gambe, va ngu tumba madhota ma gu mba ganeya misihalo ga vambe ni gu simama gu tadzisa situmbiso sawe.

16. Hi nga wuyedwa kharini gumogo ni vambe tepo hi girago esi Jehovha a ganeyago gu khuye khyadi?

¹⁶ Tepo yatshavbo gira esi Jehovha a gu khuye khyadi. Ha gu engisa Jehovha siloni satshavbo hi bwe hi hunga makungo ma seketedwago khu Bhibhiliya, hi na ba hi vega giyeyedzo nya gyadi ga vambe. Ha gu hevbula Lito la Nungungulu hi bwe hi tiyisa gukhodwa gwathu ga Jehovha, hi na tumbega gwaye hi bwe hi landrisa sileletelo saye. Hi na dzegeya gu tugula sihevbudzo nya malipha si gu mba gimbileyana ni mapimiselo ya Jehovha nigu kha hi na nga ndreyiswa khiso. (Efes. 4:14; Jak. 1:6-8) Gukhodwa gwathu khu Jehovha ni situmbiso saye gu na hi gira hi simama na hi rude ambari ha gu hakha mahungu nya mba yadi. (Ndzi. 112:7, 8) Nigu gambe, hi nga si kodza gu phasa vale va tshanganago ni sigaradzo.— 1 Tes. 3:2, 3.

17. Madhota ma nga phasa kharini vandriyathu gu simama gu tiyisa gukhodwa gwawe ga Jehovha?

¹⁷ Madhota ma yede gu manega ni mavbanyelo nya yadi, wugengeyi, gurula ni gu dzi vbevbugisa. Madhota gambe ma ngu phasa vambe gu manega ni gurula ni gu tiyisa gukhodwa gwawe ga Jehovha ni gu tiyisa libandla khu gu ‘phareleya gwadi avbo nya lito nyo tumbege.’ (Tito 1:9; 1 Thim. 3:1-3) Khu giyeyedzo gyawe ni tepo khiyo va girago liendro nya wuhavisi, madhota ma ngu phasa vandriyathu gu manega mitshanganoni, thumoni nyo tshumayele ni gu gira gihevbulo nya muthu enga tepo yatshavbo. Tepo vandriyathu va tshanganago ni sigaradzo si va girago va garadzega, madhota ma ngu va dundrugisa lisima nya gu tumbe Jehovha ni gu simama gu vega gupima avbo nya situmbiso saye.

18. Khu ginani hi vbwetago gu dhumisa Jehovha ni gu manega ni wupari nyo tiye naye? (Wona kwadru yi gu khiyo: “ Ndziya hi nga yi thumisago gasi gu engedzeya gu hidzimeya ga Jehovha.”)

¹⁸ Hwane nya gu ba hi hevbude makhalelo nyo hlamadzise ya Jehovha, hi nga ganeya esi Pfhumu Dhavhidhe a ganedego tepo a nga khuye “a na dhumiswe Jehovha giwindri gyangu.” (Ndzi. 144:1, NM) Ethu hi ga tumba Jehovha tepo yatshavbo. Ambari ha gu dandra khu tanga, hi na tiyisega gu khethu uye a na hi phasa gu simama ni wupari nyo tiye naye. Nigu, hi nga ganeya gu khethu: “Uye giwindri gyangu.” — Ndzi. 92:14, 15.