1. Kweelana a Intembauzyo 18:​46, ino Davida wakakozyanisya Jehova kunzi?

 TUPONA munyika motukonzya kucitikilwa zintu nzyotutayeeyeli naa zikonzya kubucincila limwi buumi bwesu. Eelo kaka tulalumba kapati kuti muziindi zili boobu tulakonzya kulomba lugwasyo lwa Jehova Leza! Mucibalo cainda, twakayeezyegwa kuti Jehova ngu Leza muumi alimwi akuti ulilibambilide kutugwasya. Ciindi natugwasya, citupa kusinizya kuti masimpe “Jehova muumi!” (Amubale Intembauzyo 18:46.) Nokuba boobo, naakamana kwaamba majwi aaya, Davida wakaamba Leza kuti “Ndomba yangu.” Nkaambo nzi ncaakakozyanisya Jehova Leza muumi kucintu citaponi, nkokuti ndomba?

2. Ino tulaiya nzi mucibalo eeci?

² Mucibalo eeci, tulabona kaambo Jehova ncaambwa kuti ndomba alimwi abupanduluzi oobu ncobutuyiisya kujatikizya nguwe. Alimwi tulaiya mbotukonzya kumubona kuba Ndomba yesu. Mpoonya, tulabandika mbotukonzya kwiiya bube bwa Jehova buli mbuli ndomba.

KAAMBO JEHOVA NCAITWA KUTI NDOMBA

3. Ino bbala lyakuti “ndomba” livwula kubelesyegwa buti mu Bbaibbele? (Amubone cili acivwumbyo.)

³ Bbaibbele likozyanisya Jehova ‘kundomba’ ikutugwasya kumvwisya bube bwakwe bumwi. Kanji-kanji, mu Bbaibbele ciindi babelesi ba Jehova nobamutembaula akaambo kabube bwakwe bugambya, inga bamwaamba kuti ndomba. Ciindi cakusaanguna Jehova naambidwe kuti “Nindomba” cijanika kulugwalo lwa Deuteronomo 32:4. Awalo Hana mumupailo wakwe wakaamba kuti “kunyina mwala uuli mbuli Leza wesu.” (1Sam. 2:2) Habakuku wakaamba Jehova kuti “ndomba yangu.” (Hab. 1:12) Mulembi wa Intembauzyo 73 wakaamba Leza kuti “nindomba yamoyo wangu.” (Int. 73:26) Naba Jehova lwakwe wakalyaamba  kuti nindomba. (Is. 44:8) Lino atubandike bube botatwe ibuli mbuli ndomba Jehova mbwatondezya alimwi ambotukonzya kumupanga kuba ”‏Ndomba yesu.”‏—Deut. 32:31.

4. Mbuti Jehova mbwali mayubilo? (Intembauzyo 94:22)

⁴ Jehova mayubilo. Mbubwenya muntu mbwakonzya kuyubila mubbwe pati ciindi nokuli guwo, Jehova ulatukwabilila ciindi notwalijana mubukkale bukatazya. (Amubale Intembauzyo 94:22.) Ulatugwasya kukwabilila cilongwe ncotujisi anguwe akutusyomezya kuti zintu izitupenzya lino tazikazumanani pe. Alimwi usyomezya kuti kumbele uyoozigusya zintu zyoonse zitupa kulibilika naa kupenga.—Ezk. 34:​25, 26.

5. Mbuti Jehova mbwakonzya kuba mayubilo eesu?

⁵ Nzila imwi Jehova mbwakonzya kuba Mayubilo eesu nkwiinda mukupaila kulinguwe. Ciindi notupaila, Jehova ulatupa “luumuno lwa Leza” lwalo ilukwabilila myoyo alimwi amizeezo yesu. (Flp. 4:​6, 7) Amubone cikozyanyo camukwesu Artem, walo iwakaangwa akaambo kalusyomo lwakwe. Kali muntolongo, wakali kubuzyigwa-buzyigwa ziindi zinji amwaalumi iwakali kumweendelezya calunya. Mukwesu Artem wakaamba kuti: “Ndakali kulimvwa bubi kapati kufwumbwa ciindi mwaalumi ooyu atalika kundibuzya-buzya. . . . Ndakali kupaila kuli Jehova ciindi coonse. Ndakali kumulomba kundigwasya kubatama alimwi akuba abusongo. Aboobo nokuba kuti wakali kundipenzya boobu, mebo ndakazumanana kubatama. . . . Kwiinda mukugwasyigwa a Jehova, cakali mbuli kuti ndakayubide munsi aabbwe.”

6. Nkaambo nzi lyoonse ncotweelede kusyoma muli Jehova? (Isaya 26:​3, 4)

⁶ Jehova ulasyomeka alimwi takatulekelezyi pe. Mbubwenya mbuli ndomba mboitazungaani, Jehova lyoonse ulaandiswe. Tulakonzya kumusyoma nkaambo ”‏ni Ndomba iiliko lyoonse alyoonse.”‏ (Amubale Isaya 26:​3, 4.) Lyoonse unooliko kutegwa azuzikizye zisyomezyo zyakwe, kuswiilila mipailo yesu alimwi akutupa lugwasyo ndotuyandika. Alimwi tulakonzya kumusyoma Jehova nkaambo ulasyomeka kuli baabo ibamubelekela. (2Sam. 22:26) Kunyina nayooziluba zintu nzyotucita alimwi unootupa bulumbu lyoonse.—Heb. 6:10; 11:6.

7. Ino tuyoogwasyigwa buti ciindi notusyoma Jehova? (Amubone acifwanikiso.)

⁷ Jehova uba Ndomba yesu ciindi notumusyoma cakumaninina. Tulijisi lusyomo lwakuti cilagwasya kapati kumumvwida nomuba muziindi zikatazya. (Is. 48:​17, 18) Ciindi coonse notubona mbwatugwasya Jehova, tulamusyoma kapati. Tulaba alusyomo lwakuti Jehova alikke nguukonzya kutugwasya kuliyumya kumasunko aali woonse naakatazya buti. Ciindi notulijana mubukkale motutajisi sikutugwasya, inga tulangila kuli Jehova nkaambo ulilibambilide kutugwasya kufwumbwa ciindi. Ba Vladimir bakaamba kuti: “Ndakalimvwa kuba acilongwe ciyumu kapati a Jehova ciindi nondakaangidwe. Ndakaiya kumusyoma kapati Jehova nkaambo ndakali buyo ndelikke, aboobo ngonguwe alikke wakali kukonzya kundigwasya kuliyumya.”

8. (a) Nkaambo nzi ncotukonzya kwaamba kuti Jehova tacinci? (b) Ino tugwasyigwa buti ciindi Leza notumupanga kuba Ndomba yesu? (Intembauzyo 62:​6, 7)

 ⁸ Jehova tacinci. Jehova uli mbuli ndomba naa mulundu uuzumanana kukkala mpoonya mpoubede. Bube bwakwe alimwi amakanze aakwe tazicinci pe. (Malk. 3:6) Ciindi ba Adamu a Eva nobakamuzangila, Jehova tanaakacinca makanze aakwe kujatikizya bantu. Kweelana ambwaakalemba mwaapostolo Paulo, Jehova “takonzyi kulikaka mwini pe.” (2Tim. 2:13) Eeci caamba kuti tacikwe makani acikonzya kucitika naa nzyobakonzya kucita bamwi, Jehova takacinci bube bwakwe, makanze naa zyeelelo zyakwe. Mbwaanga Jehova tacinci, tulizyi kuti uyootugwasya muziindi zikatazya alimwi uyoozizuzikizya zisyomezyo zyakwe zyakumbele.—Amubale Intembauzyo 62:​6, 7.

9. Ncinzi ncomwiiya kucakuluula camucizyi Tatyana?

⁹ Ikuti katuzinzibala kuyeeya bube bwa Jehova alimwi amakanze aakwe kujatikizya nyika, ciyootugwasya kumusyoma, kumupanga kuba Ndomba yesu. Tuyoozumanana kubatama alimwi akusyomeka kulinguwe ciindi notwalijana mubukkale bukatazya. (Int. 16:8) Eeci ncecakacitikila mucizyi Tatyana, walo iwakaangidwe muŋanda akaambo kalusyomo lwakwe. Wakaamba kuti: “Ndakali buyo ndelikke, aboobo kumatalikilo cakali kukatazya. Bunji bwaziindi ndakali kulimvwa kutyompwa.” Mpoonya wakatalika kuzinzibala kuyeeya kujatikizya Jehova amakanze ngajisi kubantu, akubona mbocakali kuyandika kapati kulinguwe kuliyumya kusunko eeli. Kucita boobu kwakamugwasya kubatama akuba anguzu zyakuzumanana kuliyumya. Wakaamba kuti: “Ndakamvwisya kuti, ndakali mubukkale buli boobu akaambo kakuyanda kukkomanisya Jehova. Aboobo ndakaleka kuyeeya makani aajatikizya buyo ndime.”

10. Mbuti Jehova mbwakonzya kuba Ndomba yesu lino?

¹⁰ Ino-ino, tuyooojana masunko manji motuyooyandika kusyoma Jehova kwiinda kaindi. Aboobo ecino nceciindi ncotweelede kuyumya lusyomo lwesu muli Jehova, akusinizya kuti uyootugwasya kuzumanana kusyomeka kulinguwe mubukkale buli boonse. Pele mbuti mbotukonzya kucita oobo? Nkwiinda mukubala zibalo zyamu Bbaibbele alimwi azyakuluula zya Bakamboni bamazuba aano. Amubone Leza mbwabagwasya babelesi bakwe. Amuzinzibale kuziyeeya zibalo zili boobu. Kucita boobu kuyoomugwasya kupanga Jehova kuba Ndomba yanu.

AMWIIYE BUBE BWA JEHOVA IBULI MBULI NDOMBA

11. Nkaambo nzi ncotweelede kubwiiya bube bwa Jehova ibuli mbuli ndomba? (Amubone akabbokesi akakuti “ Mbaakani Njobeelede Kulibikkila Bakwesu Bakubusi.”)

¹¹ Twabona Jehova mbwali mbuli ndomba. Lino atubandike mbotukonzya kwiiya bube bwakwe ibuli mbuli ndomba. Ikuti twasolekesya kusikila mpotugolela kwiiya bube bwa Jehova, tulakonzya kubayumya bakwesu abacizyi mumbungano. Mucikozyanyo, Jesu wakaulika  Simoni izina lyakuti Kefasi (lisandululwa kuti “Petro”), ilyaamba kuti “Mwala.” (Joh. 1:42) Awa Jesu wakali kupandulula kuti Petro wakali kuyoobaumbulizya bamwi mumbungano akuyumya lusyomo lwabo. Baalu bamumbungano baambwa kuti ‘ncimvwule camwala mupati kapati.’ Icaamba kuti balabakwabilila aabo bali mumbungano. (Is. 32:2) Pele toonse tulakonzya kukulwaizyanya ikuti twaiya bube bwa Jehova ibuli mbuli ndomba.—Ef. 5:1.

12. Amupandulule mbotukonzya kuba mayubilo aabamwi.

¹² Amube mayubilo. Zimwi ziindi, tulakonzya kuba mayubilo aabakwesu abacizyi ciindi nokwacitika ntenda zilicitikila, mazwanga naa nkondo. Mbwaanga zintu ziyaabwiindila buya kubija “kumazuba aamamanino” aano, tulijisi zyoolwe zinji zyakugwasya bakwesu abacizyi. (2Tim. 3:1) Kuyungizya waawo, tulakonzya kubaumbulizya alimwi akubatondezya luyando. Nzila imwi mbotucita oobo nkwiinda mukubandika ambabo ciindi nobaboola ku Ŋanda ya Bwami. Tuyanda kuti katutondezyanya luyando alimwi akukulwaizyanya mumbungano. Bantu banji mazuba aano tabeendelezyani kabotu. Eeci cilakonzya kubatyompya bakwesu abacizyi akulimvwa kutayandwa. Aboobo ciindi bakwesu abacizyi nobajanika kumiswaangano, tuyanda kucita kufwumbwa ncotukonzya kubapa kulimvwa kuyandwa, kukatalukwa alimwi akukwabililwa.

13. Mbuti baalu kubagama mbobakonzya kuba mayubilo kuli bamwi? (Amubone acifwanikiso.)

¹³ Baalu balabaumbulizya bakwesu abacizyi ciindi nobalwana mapenzi aayindene-indene. Mucikozyanyo, ciindi nokwacitika ntenda zilicitikila naa kuciswa, baalu balafwambaana kubona mbobakonzya kubagwasya bakwesu abacizyi. Alimwi balapa alugwasyo lwakumuuya. Bakwesu abacizyi bayoolimvwa kwaanguluka kulomba lugwasyo kumwaalu kuti kali  muntu uusikilika, uswiilila alimwi uusolekesya kumvwisya mbobalimvwa. Eeci cipa kuti bamwi balimvwe kubikkilwa maano, alimwi cilabaubila kububelesya busolozi bwamu Bbaibbele mbwakonzya kupa mwaalu ooyo.—1Tes. 2:​7, 8, 11.

14. Mbuti mbotukonzya kutondezya kuti tulasyomeka?

¹⁴ Amusyomeke. Tuyanda kuti bamwi kabatubona kuti tulakonzya kubagwasya, kwaambisya muziindi zyamapenzi. (Tus. 17:17) Ncinzi ncotweelede kucita kutegwa bamwi kabatusyoma? Tweelede kusolekesya kwiiya Jehova abuzuba, mbuli kuzuzikizya zisyomezyo zyesu alimwi akubamba ciindi. (Mt. 5:37) Naa kuli umwi ngotuzyi uuyandika lugwasyo, tulakonzya kumugwasya. Kuyungizya waawo, tulabikkila maano kumanizya milimo yambungano njotupegwa kweelana amalailile.

15. Ino mbungano igwasyigwa buti ikuti baalu kabasyomeka?

¹⁵ Ino bakwesu abacizyi mumbungano bagwasyigwa buti ciindi baalu nobasyomeka? Ciindi bakwesu abacizyi nobazyiba kuti balakonzya kulomba lugwasyo kubaalu kufwumbwa  ciindi, inga kulibilika kwabo kulaceya. Basikumwaya balalimvwa kubikkilwa maano ciindi nobazyiba kuti baalu balilibambilide kubagwasya. Alimwi ciindi baalu nobabelesya Bbaibbele amabbuku eesu kupa lulayo, ikutali kwaamba buyo nzyobayeeya, cipa kuti bakwesu abacizyi babasyome kapati. Alimwi bakwesu abacizyi balabasyoma baalu ibabamba maseseke alimwi akuzuzikizya zisyomezyo zyabo.

16. Mbuti mbotugwasyigwa swebo abamwi ciindi notucita zintu Jehova nzyaamba kuti zililuzi?

¹⁶ Lyoonse amucite zintu Jehova nzyaamba kuti zililuzi. Kuti katumumvwida Jehova muzintu zyoonse alimwi akubelesya Bbaibbele ciindi notupanga zyakusala, tunooli cikozyanyo cibotu kuli bamwi. Ciindi notubala Jwi lya Leza alimwi akuyumya lusyomo lwesu muli Jehova, tunoosyomeka kulinguwe akuzyeelelo zyakwe. Tuyoozizyiba njiisyo zyakubeja alimwi amizeezo iteendelani akuyeeya kwa Jehova. (Ef. 4:14; Jak. 1:​6-8) Kusyoma Jehova alimwi azisyomezyo zyakwe kulatugwasya kuzilanga munzila yeelede zintu ciindi notwamvwa makani mabi. (Int. 112:​7, 8) Alimwi tulakonzya kubagwasya bamwi ibali mumapenzi.—1Tes. 3:​2, 3.

17. Ncinzi cigwasya baalu kupa bamwi kubatama akuba alusyomo luyumu muli Jehova?

¹⁷ Baalu beelede kuba bantu bataciindizyi muzilengwa, balibatamika, balondo alimwi ibanyoneka. Baalumi aaba balabagwasya bamwi kubatama alimwi akuba alusyomo muli Jehova kwiinda ‘mukukakatila kumajwi aasyomeka.’ (Tit. 1:9; 1Tim. 3:​1-3) Kwiinda mucikozyanyo cabo alimwi anyendo zyabweembezi nzyobacita, baalu balabagwasya basikumwaya kujanika lyoonse kumiswaangano, kutola lubazu mumulimo wamumuunda alimwi akucita ciiyo cabo beni. Ciindi bakwesu abacizyi nobajana mapenzi aabapa kulibilika, baalu balabayeezya kusyoma Jehova akubikkila maano kuzisyomezyo zyakwe.

18. Nkaambo nzi ncotuyanda kutembaula Jehova alimwi akuyumya cilongwe cesu anguwe? (Amubone akabbokesi kakuti “ Mbotukonzya Kuyumya Cilongwe Cesu a Jehova.”)

¹⁸ Twamana kulanga-langa bube bwa Jehova bugambya, tulakonzya kwaamba mbwaakaamba Mwami Davida kuti: “Aatembaulwe Jehova Indomba yangu.” (Int. 144:1) Lyoonse tulakonzya kumusyoma Jehova. Mubuumi bwesu boonse, nociba ciindi notwacembaala, tulijisi kaambo kakwaambila kuti: “Ni Ndomba yangu,” katujisi lusyomo lwakuti lyoonse uyootugwasya kuzumanana kuyuma kumuuya.—Int. 92:​14, 15.