1. Davida wakakozyanisya Jehova aanzi mbuli mbukwaambidwe muli Intembauzyo 18:46?

 TULI KUPONA munyika muli mapenzi aakonzya kupa kuti buumi butuyumine naakuti kuchincha buumi bwesu chakumaninina. Tuli aachilongezyo chipati chakuti tulakonzya kusyoma Jehova Leza kuti ulatugwasya. Muchiiyo chakayinda, twakayeezegwa kuti Jehova nguLeza muumi akuti ulilibambilide kutugwasya chiindi choonse. Kubona Jehova mbatugwasya kupa kuti tube aachoonzyo chakuti “Jehova muumi!” (Bala Intembauzyo 18:46.) Nikuba oobo, chiindi Davida naakamba majwi aaya wakazoowamba kuti Jehova ‘niNdomba yangu’ naakuti ndiBbwe lyangu. Nkamboonzi naakazookozyanisya Jehova achintu chitakwe buumi?

2. Tulalanga-langaanzi muchiiyo eechi?

² Muchiiyo eechi, tulabona kuti nkamboonzi Jehova naambwa kuti ndiBbwe alubo tulabona kuti bupanduluzi oobu butuyiisyaanzi atala aJehova. Alubo tulabona mbutukonzya kumusyoma mbuli Bbwe lyesu. Kumamanino tulabona mbutukonzya kutobelezya buntu bwaJehova.

NKAMBOONZI JEHOVA NAAMBWA KUTI NDIBBWE?

3. Chiindi chiingi Bbayibbili libelesya bbala lyakuti “ndomba” nikwaba biyeni? (Langa chifanikisyo chili aachivumbyo.)

³ Bbayibbili libelesya bbala lyakuti “Bbwe” kuti litugwasye kumvwisisisya buntu Jehova mbwalaabo. Chiindi chiingi bakombi baLeza nibatembawula Leza akaambo kabuntu bwakwe bugambya, nga bali kupandulula mbuli mbulimwaamba Bbayibbili kuti ndiBbwe. Jehova usaanguna kwaambwa kuti “Nindomba” muli  Deuteronomo 32:4. Hana naakali kukomba, wakaamba kuti “kunyina mwala uuli mbuli Leza wesu.” (1 Sam. 2:2) Habbakkukku wakaamba Jehova kuti “Bbwe lyangu.” (Hab. 1:12) Mulembi wa Intembauzyo chaandaano 73 wakaamba kuti Leza “nindomba yamoyo wangu.” (Int. 73:26) Nikuba Jehova lwakwe wakalyaamba kuti ndiBbwe. (Is. 44:8) Atulange-lange buntu butatu bupa kuti Jehova abe mbuli Bbwe alubo atubone mbutukonzya kupa kuti abe Bbwe lyesu.—Dt. 32:31.

4. Munzilaanzi Jehova mwali mayubilo? (Intembauzyo 94:22)

⁴ Jehova mayubilo. Mbuli bbwe pati mbulikonzya kukwabilila muntu kuchivulamabwe, anguwe Jehova ulatukwabilila chiindi nituli mubuyumu-yumu. (Bala Intembauzyo 94:22.) Jehova ulatugwasya kuti tukwabilile bweenzuma mbutulaabo anguwe akupa kuti tube aachoonzyo chakuti taakwe chintu pe chikonzya kutuchisa chakumaninina. Alubo utusyomezya kuti muchiindi chilikunembo uzoogwisya zintu zyoonse zipa kuti tukataazikane.—Ezk. 34:​25, 26.

5. Munzilaanzi Jehova mwakonzya kuba mayubilo eesu?

⁵ Imwi nzila Jehova mwakonzya kuba Bbwe lyakuyubila nkwiinda mukukomba kulinguwe. Chiindi nitukomba, Jehova utupa “luumuno lwaLeza” lutukwabilila mumyoyo yesu amumizeezo. (Flp. 4:​6, 7) Atubone zyakachitikila umwi mukwesu uutegwa Artem. Artem wakasungwa akaambo kalusyomo lwakwe. Naakali mujele, sikumubuzya-buzya wakali kumubuzya mibuzyo myiingi, taakali kumujata kabotu pe alubo wakali kumuyoosezya. Artem wakaamba kuti, “Ndakali kukataazikana chiindi choonse sikundibuzya-buzya naakali kundiita kuti andibuzye-buzye. . . . Chiindi choonse ndakali kukomba kuli Jehova. Ndakali kukumbila kuti andigwasye kuti ndibe aaluumuno akuti ndibe aabusongo. Nikuba kuti ndakali kupenzegwa, ndakakkala kandibeteme. . . . Akaambo kakugwasigwa aaJehova, kwakali mbuli kuti ndakaliyubide kusule aabbwe.”

6. Nkamboonzi nitukonzya kusyoma Jehova chiindi choonse? (Isaya 26:​3, 4)

⁶ Jehova ulasyomeka alubo taatusiyi. Mbuli bbwe pati litasunzuki pe, anguwe Jehova unooliwo chiindi choonse kuti atugwasye. Tulakonzya kumusyoma nkaambo “ni Ndomba iiliko lyoonse alyoonse.” (Bala Isaya 26:​3, 4.) Jehova unooliwo lyoonse kuchitila kuti azuzikizye zisyomezyo zyakwe, aswiilile nkombyo zyesu akuti atugwasye chiindi nituyanda kugwasigwa aanguwe. Alubo tulakonzya kusyoma Jehova akaambo kakuti ulasyomeka kuli baabo bamukomba. (2 Sam. 22:26) Tazoozilubi pe nzitumuchitila alubo chiindi choonse unootulongezya.—Heb. 6:10; 11:6.

7. Tugwasigwa biyeni kuti twasyoma Jehova? (Langa chifanikisyo.)

⁷ Tupa kuti Jehova abe Bbwe lyesu chiindi nitumusyoma amoyo woonse. Kuti twamuswiilila nikuba muziindi ziyumu tulagwasikana. (Is. 48:​17, 18) Chiindi choonse nitubona Jehova mbalikutugwasya, tulayungizya kumusyoma. Eezi zipa kuti tube aachoonzyo chakuti Jehova nguwe alikke uukonzya kutugwasya kuti tulisimye kufumbwa masunko ngitukonzya kuswaana nikuba kuti mayumu biyeni. Chiindi nitwaba muzyiimo mutukonzya kubona kuti taakwe uumbi pe muntu uukonzya kutugwasya, tulakonzya kusyoma Jehova.  Mukwesu Vladimir wakaamba kuti, “Ndakabona kuti ndakali ndaswena aafwiifwi loko aJehova chiindi nindakali mujele. Ndakayiya mbundikonzya kuba aalusyomo lusimide muli Jehova, akaambo kakuti ndakali aandikke alubo Jehova nguwe alikke wakali kukonzya kundigwasya kuti ndilisimye.”

8. (a) Nkamboonzi nitukonzya kwaamba kuti Jehova tachinchi pe? (b) Tugwasigwa biyeni akaambo kakuti Leza uli mbuli Bbwe? (Intembauzyo 62:​6, 7)

⁸ Jehova tachinchi pe. Jehova uli mbuli bbwe pati naakuti chilundu, tachinchi pe. Buntu bwakwe amakanze aakwe tazichinchi pe. (Malk. 3:6) Chiindi Adamu a-Eva nibakamupapila, Jehova taakwe naakachincha pe makanze aakwe atala abantu. Mbuli mbaakalemba mwaapostoli Pawulu, Jehova “takonzyi pe kulikaka.” (2 Tim. 2:13) Eezi zyaamba kuti, nikuba kuti zyiimo zyaba biyeni, Jehova tachinchi pe buntu bwakwe, makanze aakwe amilawu yakwe. Akaambo kakuti Jehova tachinchi pe, tuli aachoonzyo chakuti unootugwasya muziindi zikataazya alubo uzoozuzikizya chisyomezyo chakwe muchiindi chilikunembo.—Bala Intembauzyo 62:​6, 7.

9. Twiyaanzi kuchikozyano chaTatyana?

⁹ Tupa kuti Jehova abe mbuli bbwe lyesu kuti twayeeyesesya atala abuntu bwakwe amakanze aakwe aali atala anyika abantu. Kuchita oobu kutugwasya kuti tukkale katubeteme akuti tukkale katusyomeka kuli nguwe chiindi nitwaswaana masunko. (Int. 16:8) Eezi nzizyo zyakachitika kumuchizi uutegwa Tatyana. Tatyana wakasungwa aakaambo kalusyomo lwakwe alubo taakali kuzumizigwa pe kuzwa aang’anda. Wakaamba kuti, “Ndakali aandikke. Kumasaangunino zyakali kundiyumina. Chiindi chiingi ndakali kukataazikana.” Tatyana wakasaanguna kuyeeyesesya atala aJehova, makanze aakwe ngalaawo atala anyika abantu. Alubo wakabona kuti nkamboonzi nikwakali kuyandikana kuti alisimye kubuyumu-yumu oobu. Eezi zyakamugwasya kuti abatame akuti abe aamanguzu kuchitila kuti akkale kasyomeka. Wakaamba kuti: “Kumvwisisisya kuti nkamboonzi nizyakali kuchitika kwakandigwasya kuti ndiyeeye kuti ndili kuswaana zintu eezi akaambo kaJehova. Eezi zyakandigwasya kuti nditayeeyi loko pe atala azintu nzindakali kuswaana.”

10. Niinzi nzitukonzya kuchita kuti tupe kuti Jehova abe Bbwe lyesu lino?

¹⁰ Mumazuba aali kunembo, tuzooswaana masunko aakonzya kuzoopa kuti tuzoomusyome loko Jehova kwiinda mbutwakali kumusyoma chiindi. Lino nchicho chiindi chilikabotu chakuti tusimye lusyomo lwesu lwakuti Jehova uzootupa kufumbwa nzituyanda kuti tukkale katusyomeka. Nga tulazichita biyeni eezi? Bala zintu zyakachitikila bakombi baLeza bachiindi abamazubaano. Bona Leza mbaakagwasya bakombi bakwe. Yeeyesesya atala azikozyano eezyo. Kuchita oobo kulakugwasya kuti upe kuti Jehova abe Bbwe lyako.

TOBELEZYA BUNTU BWAJEHOVA

11. Nkamboonzi nituyanda kutobelezya buntu bwaJehova? (Langa kabbokesi katii, “ Chipeekezyo Nchibakonza Kulibikkila Bakwesu Bachiniini.”)

¹¹ Twabona buntu mbwalaabo Jehova bupa kuti abe mbuli bbwe. Lino atubone mbutukonzya kubutobelezya buntu oobo. Kuchita oobo kutugwasya kuti tusimye mbungano. Muchikozyano, Jesu  wakawuzika Simoni kuti Kkefasi (nkukwaamba kuti “Petro” kuti lyasandululwa), zyaamba kuti “Bbwe.” (Joh. 1:42) Jesu wakali kwaamba kuti Petro wakali kuzoosungwaazya bamwi mumbungano akubasimya lusyomo. Baalu bamumbungano baambwa kuti “cimvwule camwala mupati kapati.” Eezi zyaamba kuti bakwabilila mbungano. (Is. 32:2) Kwaamba choonzyo, mbungano ilagwasigwa kuti bakwesu abachizi boonse batobelezya buntu bwaJehova.—Ef. 5:1.

12. Nga tulabagwasya biyeni bamwi muzyiindi ziyumu.

¹² Ba mayubilo. Kuti bakwesu abachizi bachija nkubakkala akaambo kamapenzi aalichitkila naakuti nkondo, tulakonzya kubapa aakukkala. Mbukunga “kumazuba aakumamanino,” zintu zilikwiinkilila kunembo kubija, tuzoojana chilongezyo chakugwasya bakwesu abachizi. (2 Tim. 3:1) Alubo tuzoowumbulizya bakwesu abachizi akubapa zintu nzibazooyanda aachiindi eecho. Imwi nzila mutukonzya kuzichita eezi nkwiinda mukusangalizya bakwesu abachizi kuNg’anda yaBwaami. Bantu biingi mazubaano tababajati kabotu pe bamwi, eezi zipa kuti bakwesu abachizi bakataazikane akuti balibone kabatayandikani pe. Chiindi bakwesu abachizi nibanjila miswaangano, tuyanda kuti balimvwe kabakatalusidwe akuyandwa.

13. Munzilaanzi baalu mubakonzya kuba mayubilo kuli bamwi? (Langa chifanikisyo.)

¹³ Baalu balakonzya kuumbulizya bakwesu abachizi chiindi nibaswaana mapenzi. Nikwachitika mapenzi aalichitikila abakwesu abachizi nibachiswa zyakuti ngabayanda busilisi chakufwambaana, baalu balafwambaana kuchita mabambe aakuti babagwasye. Alubo baalu balabagwasya munzintu zyabukombi. Kuti mwaalu kali muntu uuwangunukide kuti bakwesu abachizi baambuulaawe akubaswiilila, kulakonzya kubawubila kuti bakumbile lugwasyo. Buntu oobu bupa kuti bamwi balimvwe kabayandikana alubo kulabawubila kubelesya malayilile aamuBbayibbili ngibakonzya kupegwa aabaalu.—1 Tes. 2:​7, 8, 11.

14. Niinzi nzitukonzya kuchita kuti tupe kuti bamwi batusyome?

 ¹⁴ Chita zintu zipa kuti bamwi bakusyome. Tuyanda kuti bamwi batusyome, kapati nituli muziindi ziyumu. (Tus. 17:17) Niinzi nzitukonzya kuchita kuti tupe kuti bamwi batusyome? Tulakonzya kuchita zyoonse nzitukonzya kuti tutobelezye Jehova buzuba abuzuba. Muchikozyano, tulakonzya kuchita oobo kwiinda mukuzuzikizya zisyomezyo zyesu akujata chiindi. (Mt. 5:37) Alubo kuti umwi kayanda kugwasigwa, tulakonzya kumugwasya. Mukuyungizya, kulayandikana kuti tumaninsye milimu yesu njitupegwa mumbungano alubo katutobelezya malayilile ngitunga twapegwa.

15. Mbungano igwasigwa biyeni kuti baalu kabachita zintu zipa kuti bamwi babasyome?

¹⁵ Kuti baalu kabachita zintu zipa kuti bamwi babasyome, mbungano ilagwasigwa. Biyeni? Kuti bakwesu abachizi kabazi kuti balakonzya kwiita baalu kuti babagwasye, zilakonzya kubagwasya kuti batakataazikani loko pe. Bakwesu abachizi balimvwa kabayandwa kuti kabazi kuti baalu balilipedelede kubagwasya. Kuti baalu kabatabelesyi maboneno aabo, pesi kababelesya Bbayibbili  amabbuku eesu nibalikupa bamwi lulayo, bakwesu abachizi balayungizya kubasyoma. Alubo bakwesu abachizi balabasyoma baalu aabo babamba nsiswa alubo bazuzikizya zisyomezyo zyabo.

16. Tugwasigwa biyeni kuti twakkala katuchita zintu Jehova nzyaamba kuti zilikabotu alubo bamwi bagwasigwa biyeni?

¹⁶ Chiindi choonse chita zintu Jehova nzyaamba kuti zilikabotu. Tulaba chikozyano chilikabotu kuli bamwi kuti katuswiilila Jehova muzintu zyoonse akuti katusala kweendelana amalayilile aali muBbayibbili. Chiindi nitubala Jwi lyaLeza akuyanduulisisya anitusimya lusyomo lwesu muli Jehova, tulaba bantu basyomeka alubo tulayiswiilila milawu yakwe. Kuchita oobo kutugwasya kuti tutapambanisigwi aanjiisyo zyakubeja kuswaanizya amaboneno ngibalaawo bantu munyika. (Ef. 4:14; Jak. 1:​6-8) Kuba aalusyomo muli Jehova amuzisyomezyo zyakwe kutugwasya kuti tukkale katubeteme nitwamvwa makani mabi. (Int. 112:​7, 8) Alubo tulakonzya kugwasya bamwi banga baswaana masunko.—1 Tes. 3:​2, 3.

17. Niinzi chigwasya baalu kuti babe chikozyano chilikabotu kulibamwi?

¹⁷ Baalu beelede kuba aabuntu bulikabotu, mizeezo iilikabotu, kababambikene alubo kabamvwisisisya. Baalumi aaba bagwasya bamwi kuti babatame akuti babe aalusyomo lusimide muli Jehova alubo basimya mbungano kwiinda ‘mukujatilila kujwi lisyomeka.’ (Tit. 1:9; 1 Tim. 3:​1-3) Chiindi baalu nibeembela basikupupulula akubasiila chikozyano chibotu, ngabali kubagwasya kuti kabanjila miswaangano chiindi choonse, kabakambawuka alubo kababala Bbayibbili akuyanduulisisisya. Chiindi bakwesu abachizi nibaswaana mapenzi aapa kuti bakataazikane, baalu bachita zyoonse nzibakonzya kuti babagwasye kuti basyome Jehova akuti bayeeyesesye atala azisyomezyo zyakwe.

18. Nkamboonzi nituyanda kutembawula Jehova akuswena aafwiifwi anguwe? (Langa kabbokesi katii “ Nzila Iitugwasya Kuti Tuswene Aafwiifwi aJehova.”)

¹⁸ Mbukunga twalanga-langa buntu bubotu mbwalaabo Jehova, tulakonzya kwaamba majwi ngakaamba Mwaami Davida aakuti: “Aatembaulwe Jehova Indomba yangu.” (Int. 144:1) Ziyume zitete, tunoosyoma Jehova. Nikuba kuti twachembaala, tunooyinkilila kunembo kusyoma kuti Jehova unootugwasya kuti tukkale katuli aafwiifwi anguwe. Alubo tulakonzya kwaamba kuti “[Jehova] ni Ndomba yangu.”—Int. 92:​14, 15.