SEMANA 26
PIREKUA 8 Jeobarini kuájchakuni jarhasïndi
Eska Tata Diosï Jeoba jindeuaka chaari kʼerenda
“Tʼuri ísïiska komueska kʼerenda ma juchaari Tata Diosï” (1 SAM. 2:2).
AMBE ENGACHI JORHENGUARHIAKA
Náki kualidadiichaksï úsïni eska Tata Diosï Jeoba ísïiuaka eska kʼerenda ma ka nénachi uaa májkueni úni.
1. Eska na arhijka Salmo 18:46, ¿Ambe jingoni terukutantaspi Dabidi, Tata Diosï Jeobani?
PARHAKPINIRHUCHI ma jimbo irekaxaka enga kánikua no sési jánhaskuarhini jaka, enga na uéjki jatini uaaka úkuarhini ambe ma ka mójtakuni juchaari tsípikuani. ¡No ísïiski eskachi kánikua sési pʼikuarherasïnga míteni eskachi uaaka Tata Diosï Jeobani kurhakuni eskajtsïni jarhuataaka! Máteru jorhenguarhikua jimbo, exeskachi eska Tata Diosï Jeoba jindeeska ima Tata Diosï enga tsípiti jaka ka eska ima méntkisï jima jarhasïnga parajtsïni jarhuataani. Méni engajtsïni jarhuatajka sánderuchi seguru jarhasïnga eska “Tata Diosï Jeoba tsípiti” jarhaska, ísï eska na uandapka Dabidi Salmo 18:46 jimbo (arhinta je). Joperu enga na uandapkia imani uandakuechani, Dabidi ísï arhispti Tata Diosï Jeobani “juchiiti Kʼerenda”. ¿Andisï Dabidi terukutantapi Tata Diosïni enga tsípiti jaka kʼerenda ma jingoni enga no jatsika tsípikua?
2. ¿Ambechi exea ini jorhenguarhikua jimbo?
2 Ini jorhenguarhikua jimbo, exenchi jauaka andisï Biblia uandajki eska Tata Diosï Jeoba ísïiska eska kʼerenda ma ka ambejtsïni jorhendasïni enga Biblia ísï terukutantajka. Ístuchi exeni jauaka ambechi uaa úni, paraka Tata Diosï Jeoba juchaari Kʼerendeuaka. Ka últimu, exeakachi nénachi uaa májkueni járhati kualidadichani jatsiani eska ima.
ANDISÏ TATA DIOSÏ JEOBA ÍSÏI ESKA KʼERENDA MA
3. ¿Néna úrasïni Biblia uandakuani, kʼerenda? (Exe je imajenini).
3 Biblia terukutantasïndi Tata Diosï Jeobani Kʼerenda ma jingoni parajtsïni jarhuataani sánderu sési kurhanguani máru imeeri kualidadiichani. Uánikua karakateecharhu arhisïndi eskaksï Tata Diosï Jeobaeri marhuariicha, engaksï kʼéri ambe arhienga imeeri sési járhati kualidadicha jimbo, arhisïreendiksï eska ima ísïispka komueska kʼerenda ma. Primeru xanharu enga Biblia uandajka eska ‘Tata Diosï Kʼerenda máeska’, jindeesti Deuteronomio 32:4 jimbo. Ka ma xanhari Ana ísï uandaspti kómarhikua ma jimbo, “tʼuri ísïiska komueska kʼerenda ma juchaari Tata Diosï” (1 Sam. 2:2). Abakuki ísï arhispti Tata Diosï Jeobani “juchiiti Kʼerenda” (Hab. 1:12). Ima enga karapka Salmo 73, ísï uandaspti: “Tata Diosï jindeesti kʼerenda juchiiti mintsiteeri” (Sal. 73:26). Ka Tata Diosï mismu uandaspti eska ima jindeeska “Kʼerenda” (Is. 44:8). Ju je exeani tanimu kualidadichani engaksï újka eska Tata Diosï Jeoba ísïiuaka eska Kʼerenda ma ka ístuchi exeaka ambechi uaa paraka Tata Diosï Jeoba juchaari Kʼerendeuaka (Deut. 32:31).
Tata Diosïiri marhuariichaksï ísïksï exesïndi Tata Diosï Jeobani komueska kʼerenda ma nani engaksï uaaka kuájchakukuarhini ka nóksï chéni. (Exe je párrafu 3).
4. ¿Andichisï újki uandani eska Tata Diosï Jeoba ísïiska eska kuájchakukua ma? (Salmo 94:22).
4 Tata Diosï Jeobajtsïni kuájchakusïndi. Ísï eska kʼuiripu ma na kuebarhu ma o Kʼerendarhu ma kuájchakukuarhijka jiáni enga K’eri ma janini jarhajka, Tata Diosï Jeobajtsïni májkueni kuájchakusïndi jiáni engachi no sési ambe nitamakuarhini jauaka (arhinta je Salmo 94:22). Imajtsïni jarhuatasïndi ka no jurajkusïndi eskachi no sési úkuarhinchaaka para méntkisï. Ka no inde ambejkuesti, imajtsïni aiachistiia eska sánderu orhepani nóteru jauakia ima ambe engajtsïni no sési pʼikuastajka ka enga újka eskachi no tsípikua jingoni irekaaka (Ezeq. 34:25, 26).
5. ¿Ambechi uaa úni parachi kuájchakukuarhini Tata Diosï Jeoba jingoni?
5 ¿Nénachi kuájchakukuarhisïni Tata Diosï Jeoba jingoni? Ma ambe jindeesti kómarhini. Engachi ísï uaaka Tata Diosï Jeobajtsïni “pínandikua íntskuati” enga kuájchakujka juchaari mintsitani ka juchaari eratsekuani (Filip. 4:6, 7). Ju je exeni ambe enga úkuarhinchapka juchaari erachi Artiom enga ónhanhapka imeeri jakajkukuecha jimbo. I erachi kánikua no sési nitamakuarhisti, jimboka inbestigadori ma afuersa uékasïreenga eska iámu ambe aiangupiringa ka ístu no sési pʼikuastasïreendi. Uandantaspti: “Méni engajtsïni kurhamarhienga ambe ma, kánikua chésïreenga. […] Jimbosïni méntkisï Tata Diosïni kómarhienga parakarini íntskupiringa pínandikua ka jánhaskakua. Nájkirukarini inbestigadori kánikua no sési kámani japka […]. Méntkisï mintsikaspka eskarini Tata Diosï Jeoba jarhuatapiringa ka no méni uandantaspka ambe ma […]. Para ji, Tata Diosï Jeoba ísïispti eska barda ma engareni kuájchakuni japka”.
6. ¿Andichisï uaa méntkisï mintsikani Tata Diosï Jeobani? (Isaías 26:3, 4).
6 Tata Diosï Jeoba mintsinharhikuesti. Májkueni eska kʼerenda o juáta ma na no méni manakuarhijka, Tata Diosï Jeoba méntkisï jima jarhasïndi parajtsïni jarhuataani. Uaakachi mintsikani imani jimboka Tata Diosï Jeoba jindeeska “Kʼerenda enga para méntkisï jauaka” (arhinta je Isaías 26:3, 4). Ima méntkisï jauati parajtsïni jarhuataani, kurhauani juchaari kómarhikuechani ka parajtsïni íntskuni uinhapikua engachi uétarhinchani jauaka. Ístuchi mintsikasïnga Tata Diosï Jeobani jimboka ima no méni jurajkusïnga imani enga marhuakujka (2 Sam. 22:26). No méni mirikurhiati ambe engachi újka imani jimbo ka méntkisïjtsïni maiamuntaati (Ebr. 6:10; 11:6).
7. ¿Nénajtsïni marhuachesïni mintsikani Tata Diosï Jeobani? (Ístu exe je imajenini).
7 Máteru ambe engachi uaaka úni paraka Tata Diosï Jeoba jindeuaka juchaari Kʼerenda, jindeesti méntkisï mintsikani imani. Nájkirukachi no sési nitamakuarhini jauaka joperuchi kurhajchani jarhani imani, sésijtsïni nicheati (Is. 48:17, 18). Ka méni engachi exejka na engajtsïni jarhuatajka, sánderuchi kánikua mintsikasïnga. Ísïchi sánderu sési preparadu jauaka parachi orhepani uérakuani imani tsʼéjkukuechani engachi no úpiringa juchajkumindu ísï úni. Ménisï xánchi no sési nitamakuarhi jarhasïnga engajtsïni jamberi no nema újka jarhuatani, joperuchi exesïnga eska Tata Diosï Jeoba méntkisï jima jarhasïnga parajtsïni jarhuatani. Erachi ma enga Vladimir arhinhajka, uandaspti: “Engani ónhakuarhetini japka, jiáni pʼikuarheraska eskani sánderuni andarhieraspka Tata Diosïni. Jima jorhenguarhispka sánderu mintsikani Tata Diosïni jimbokani jandiajku jarhaspka, ka no ma ambe úpiringa úni parani mójtakuni indeni ambe”.
Úsïngachi eska Tata Diosï Jeoba juchaari Kʼerendeuaka engachi kánikua mintsikajka imani. (Exe je párrafu 7).
8. a) ¿Andichisï uaa uandani eska Tata Diosï Jeoba no méni mójtakurhisïnga? b) ¿Nénajtsïni jarhuatasïni míteni eska Tata Diosï Jeoba jindeeska juchaari Kʼerenda? (Salmo 62:6, 7).
8 Tata Diosï Jeoba no mójtakurhisïndi. Májkueni eska kʼerenda o juáta ma, Tata Diosï Jeoba uinhapiti jarhasti ka no mójtakurhisïndi. Ima no méni mójtakusïndi ambe enga eratsetini jaka úni ka nijtu na enga jásïika (Mal. 3:6). Enga Adáni ka Eba nóteruksï uékapkia kurhajchani, Tata Diosï Jeoba no mójtakuspti ambe enga eratsetini jaka úni kʼuiripuecha jingoni. Apostoli Pablu uandaspti eska Tata Diosï Jeoba “no jámasïnga ma ambe uandani ka tátsekua máteru ambe úni” (2 Tim. 2:13). I ambe arhikuekasïndi eska ambe uéjki enga úkuarhiaka o ambe engaksï máteruecha uaaka, ima no méni mójtakuauati imeeri juramukuechani, ambe enga eratsetini jaka úni ka ni na enga jásïika. Míteni ini ambe, jarhuataatijtsïni mintsikani eskajtsïni jarhuataaka jiáni engachi no sési nitamakuarhini jauaka ka eska uaaka imani ambe engajtsïni aiachini jaka (arhinta je Salmo 62:6, 7).
9. ¿Ambejtsïni jorhendasïni Tatianeri eksperiensia?
9 Máteru ambe engajtsï jarhuataaka ísï exeni Tata Diosï Jeobani eska Kʼerenda ma ka mintsikani, jindeesti méntkisï miáni jarhani imeeri kualidadichani ka ambe enga eratsetini jaka úni Echerini jingoni ka ístu kʼuiripuecha jingoni. I ambejtsïni uaati jarhuataati no jukari uandanhiani ni xáni no sési pʼikuarherani jiáni engachi no sési nitamakuarhini jauaka (Sal. 16:8). I ambesï nitamakuarhipti pirenchi ma enga Tatiana arhinhajka, ka enga ónhakata japka imeeri kʼumanchikuarhu imeeri jakajkukuecha jimbo. Ima uandantasïndi: “Afuersaksï úspti eskani jandiajkuni pakarapiringa kʼumanchikuarhu. [...] Ueenani jámani kánikua úkua jukaspti ka kánikua no sési pʼikuarherasïreenga”. Ambe enga jarhuatapka ini pirenchini orhepani uérani ka para nóteru xáni uandanhiania, jindeespti miáni eska Tata Diosï Jeobani jimbosï ísï nitamakuarhini japka ka imani ambe jimbo enga ima uéjka úni. Tatiana uandantasïndi: “Inde amberini miátantaspti, eskani indeni ambe nitamakuarhixapka jimbokani xénchasïnga Tata Diosï Jeobani ka ístu jimbokani uéksïnga imani ambe úni enga ima jaiapanhintajka. Inde amberini jarhuatasti parani no jukari uandanhiani”.
10. ¿Ambejtsïni jarhuata desde iásï, paraka Tata Diosï Jeoba jindeuaka chaari Kʼerenda?
10 No ióni jimbo, kánikua no sési jánhaskuarhiati ka uétarhiati eskachi kánikua mintsinharhiaka Tata Diosï Jeobani. Ísï jimbo, jatsiskachi para desde iásï ueenani seguru jarhani eskajtsïni Tata Diosï Jeobani méntkisï íntskuaka ambe engachi uétarhinchaaka parachi úni tekaantani ka no méni jurajkuni. ¿Nénajtsï uaa ísï úni? Uaakajtsï arhiantani Bibliarhu anapu ejempluechani ka iásï anapu erachiicheeri eksperiensiechani. Eratsenta je ambe engajtsï arhintaaka ka exe je na enga Tata Diosï Jeoba niáraka kʼerenda máeni para imeeri marhuariicha. I ambeksïni jarhuataati paraka Tata Diosï Jeoba niáraaka jindeeni chaari Kʼerenda.
JU JE MÁJKUENI JÁRHATI KUALIDADICHANI JATSIANI ESKA TATA DIOSÏ JEOBA
11. ¿Andisï sési jaki parachi Tata Diosï Jeobaeri kualidadichani xarhataani? (Ístu exe je rekuadruni “ Meta ma para tumbiicha”).
11 Exeaskachia máru kualidadichani engaksï újka eska Tata Diosï Jeoba ísïiuaka eska kʼerenda ma. Iásï ju je exeni nénachi uaa májkueni járhati kualidadichani jatsiani. Engachi sánderu jánguarhintaska ísïini eska Tata Diosï Jeoba, sánderuchi uaaka jarhuataani kúnguarhikuarhu anapu erachiichani. Pori ejemplu, Jesúsi arhispti Simónini eska iásï Sefasi arhinhapiringia (enga griegu jimbo jindeeka Pedru ka enga arhikuekajka “tsakapu”) (Juanu 1:42). Ini ambe jingoni arhikuekaxapti eska Pedru, imeeni jasï kʼuiripu máepiringa enga sési pʼikuastpentapirhinga ka enga kánikua jarhuatapiringa kúnguarhikuani. Ístu Biblia uandasïndi eskaksï orhejtsïkutiicha ísïiska eska kʼerendaeri kʼumanda ma engaksï kuájchakuajka kúnguarhikuarhu anapu erachiichani (Is. 32:2). Jo iáminduechachi uaaka Tata Diosï Jeobaeri kualidadichani xarhataani ka ísïini eska Kʼerenda ma para jarhuataani kúnguarhikuarhu anapuechani eskaksï sési jauaka (Éfes. 5:1).
12. ¿Nénachi uaa kuájchakua máeni para máteruecha?
12 Kuájchakua je máteruechani. Engaksï juchaari erachiicha no sési nitamakuarhini jauaka desastre naturali jimbo, guerra jimbo oksï no sési ambe úkuarhinchani jarhani, jamberichi uaaka arhiani eskaksï juchaari kʼumanchikuarhu pakaraaka ka ísïchi kuájchakuani jauaka imeechani. Ini “últimu jurhiatikuechani jimbo” sánderu ka sánderu no sési jánhaskuarhipani jauati, ísï jimbo uaakachi sánderu jarhuajperani máteru ka máteruni jingoni (2 Tim. 3:1). Máteru ambe engachi uaaka úni para kuájchakuani máteruechani, jindeesti sési pʼikuastantani ka jarhuataani paraksï sánderu sési marhuakuni Tata Diosïni. Pori ejemplu, uaakachi sési eroani juchaari erachiichani Kʼumanchikua Reinuerirhu ka ísïchi uaaka eskaksï sési pʼikuarheraaka ka exenksï eskachi xénchperasïnga kúnguarhikuarhu. Irekaxakachi parhakpini ma jimbo engaksï kʼuiripuecha nóteru xénchperajkia. Jimbochisï uéjka eskaksï erachiicha ka pirenchiicha engaksï tánguarhikuarhu niuaka, seguruksï pʼikuarheraaka ka eskaksï exeaka eskachi xénchaasïnga.
13. ¿Nénaksï uaa orhejtsïkutiicha kuájchakukua máeni? (Ístu exe je imajenini).
13 Orhejtsïkutiichaksï uaati kuájchakukua máeni para ima erachiicha engaksï no sési ambe nitamakuarhini jauaka. Pori ejemplu, enga desastri ambe úkuarhiaka o uétarhini eskaksï sóntku paaka nemani doktorini jingoni, jirejiresïksï úsïndi ambe ma paraksï jarhuataani. Ístuksï orhejtsïkutiicha jarhuajpesïndi ka uinhaperpentani Biblia jingoni. Engaksï erachiicha mítejka eska orhejtsïkuti ma sési kámpisïnga, pʼamojpitiiska ka eska kurhangutspisïnga, sánderu fásiliisïndi paraksï kurhakuni jarhuajperata. xárhati kualidadichani xarhataani, úsïndi eskaksï erachiicha pʼikuarheraaka eskaksï xénchanhasïnga ka indeni ambe jimbo sánderu fásiliisïndi eskaksï uaaka imani ambe engaksï orhejtsïkutiicha arhiauaka Biblia jingoni (1 Tes. 2:7, 8, 11).
Orhejtsïkutiichaksï niárasïndi kuájchakuani erachiichani engaksï no sési nitamakuarhini jarhajka. (Exe je párrafu 13). a
14. ¿Nénachi uaa xarhatani eskachi mintsinharhikueska?
14 Mintsinharhikue je. Iáminduechachi uékasïnga eskajtsïni máteruecha mintsikaaka ka sánderia jiáni engaksï no sési nitamakuarhini jauaka (Prov. 17:17). ¿Ambechi uaa úni parajtsïni máteruecha mintsinharhini? Uaakachi jánguarhintani pauani pauani májkueni járhati kualidadiichani xarhataani eska Tata Diosï Jeoba, pori ejemplu, úni ambe engachi aiatspeaka ka niárani ima jandora engachi uandaaka (Mat. 5:37). Ístuchi uaaka aiakukuarheni parachi jarhuatani imani enga uétarhinchani jauaka. Ka engachi intsïnhaaka ánchikuarhita ma, ju je jánguarhintani ísï úni eskachi na arhinhaaka.
15. ¿Néna marhuakuasïni kúnguarhikuarhu anapu erachiichani engaksï orhejtsïkutiicha mintsinharhikuejka?
15 Uánikua ambe jimbo marhuakuasïndi kúnguarhikuarhu anapu erachiichani engaksï orhejtsïkutiicha mintsinharhikuejka. Pori ejemplu, enga orhejtsïkuti ma újka eskaksï imeeri grupurhu anapuecha méntkisï mintsikaaka, úsïndi eskaksï imeecha kánikua sési pʼikuarheraaka. Engaksï orhejtsïkutiicha méntkisï jánguarhintaaka jarhuatani erachiichani, imeechaksï pʼikuarherasïndi eskaksï xénchanhasïnga. Engaksï orhejtsïkutiicha Bibliani úrajka ka publikasioniichani paraksï konseju ma íntspini ka no eskaksï imeecha na eratsejka, úsïndi eskaksï erachiicha mintsinharhiauaka. Ka ístuksï sánderu mintsinharhiasïndi engaksï no uandantajka ambe enga nema aiangukuarhiauaka ka engaksï újka eskaksï na uandaaka.
16. ¿Nénajtsïni marhuachesïni ka nénachi jarhuataasïni máteruechani engachi méntkisï újka ambe Tata Diosï Jeoba uandajka?
16 Méntkisï ísï ú eska Tata Diosï Jeoba na uandajka. Engachi kurhajchajka Tata Diosï Jeobani ka engachi imani ambe erakujka úni ambe engaksï Bibliarhu anapu prinsipiuecha uandajka, ambakiti ejempluchi máeuaka para máteruecha. Engachi jorhenguarhiska Bibliani ka sánderuchi mintsikani Tata Diosï Jeobani, nóchi méni uékaaka jurajkuni jurhimbikuani. Nóchi uandaaka ambe ma ka máteru ambechi úni, nijtuchi jurajkua eskajtsïni i parhakpini anapu kʼuiripuecha pájtamaaka parachi imani ambe úni engaksï imeecha újka ka eratseni (Éfes. 4:14; Sant. 1:6-8). Ka ístu engachi mintsikajka Tata Diosï Jeobani ka ambe engajtsïni ima aiachijka nóchi xáni uandanhiauaka jiáni engachi niáraaka no sési ambe kurhaani (Sal. 112:7, 8). Ka ístuchi uaaka jarhuataani imeechani engaksï no sési ambe nitamakuarhini jauaka (1 Tes. 3:2, 3).
17. ¿Ambe jarhuataua orhejtsïkutiichani parakaksï kúnguarhikuarhu anapu erachiicha no jurajkuaka Tata Diosï Jeobani?
17 Orhejtsïkutiichaksï jatsisti paraksï iámindu ambe jimbo pʼíngukuarhini, sési eratsentani ambe ma, kurhangutspini ka iámindu ambe sési úni. Engaksï orhejtsïkutiicha ‘Tata Diosïiri uandakua jimbo jupindaskuarhijka enga mintsinharhikueka’, jarhuatasïndiksï kúnguarhikuani paraksï sánderu mintsikani Tata Diosïni ka pínandikuaksï jatsini (Titu 1:9; 1 Tim. 3:1-3). Engaksï orhejtsïkutiicha kuidariuajka erachiichani ka sési jásï ejempluksï ma íntsaani, jarhuataasïndiksï paraksï no kueratani tánguarhikuecharhu, nirani aianhpini ka jandiajkuksï jorhenguarhini Bibliani. Ka engaksï no sési pʼikuarherani jarhajka uandanhiata ambe jimbo, orhejtsïkutiichaksï jarhuataasïndi no mirikurhini Tata Diosï Jeobani ka ambe enga ima uaaka.
18. ¿Andichisï uéjki méntkisï kʼéri ambe arhini Tata Diosï Jeobani ka sánderuchi andarhierani jarhani imani? (Ístu exe je rekuadruni “ Ma ambe engajtsïni jarhuataaka andarhierani Tata Diosï Jeobani”).
18 Iásï engachi exeakia xáni ambakiti Tata Diosï Jeobaeri kualidadichani, uaakachi májkueni uandani eska Dabidi, ima uandaspi: “Kʼéri ambe arhinhee Tata Diosï Jeoba, juchiiti Kʼerenda” (Sal. 144:1). Tata Diosï Jeoba jindeesti ka méntkisï jindeuati Tata Diosï ma engachi uaaka mintsikani. Engachi jamberi jámani jauaka ka asta jiáni jamberi engachi tʼarhepiaka, méntkisïjtsïni jarhuataati parachi imani jingoni jarhani. Ísï jimbo, uaakachi kánikua mintsikaparini uandani: “Ima jindeesti juchiiti Kʼerenda” (Sal. 92:14, 15).
PIREKUA 150 ¡Jeobakini úati kuájchakuni!
a AMBE ENGA XARHATAJKA IMAJENI: Kʼumanchikua Reinuerirhu ma jimbo, pirenchi ma no sáni chéparini andarhierasïndi máru orhejtsïkutiichani para uandontskuarheni imeechani jingoni.
