1. Se a te mea ne fakatusa ne Tavita a Ieova ki ei, telā ne fakamau i te Salamo 18:46?

 E OLA tatou i se lalolagi telā e mafai o ‵sae fakavave aka fua a fakalavelave—io me ‵fuli katoatoa i ei—‵tou olaga. E loto fakafetai tatou me e mafai o ‵fuli atu tatou ki a Ieova te Atua mō se fesoasoani! I te mataupu mai mua, ne fakamasaua mai ki a tatou i a Ieova ko te Atua ola kae e toka faeloa a ia o fesoasoani mai. Kafai e maua ne tatou tena fesoasoani, ko fakamautinoa mai i ei ki a tatou i a “Ieova e ola!” (Faitau te Salamo 18:46.) Kae mai tua o te faimaiga ne ia o pati konā, ne taku ne Tavita te Atua ki “toku Kaupapa.” Kaia ka fakatusa ei ne ia a Ieova, te Atua ola, ki se mea mate—ki se kaupapa?

2. Ne a mea ka tauloto ne tatou mai pati a Tavita e uiga ki a Ieova e pelā me ko “toku Kaupapa”?

² I te mataupu tenei, ka sau‵tala tatou me kaia ne fakasino atu ki a Ieova e pelā me se kaupapa mo te akoakoga e tauloto ne tatou mai te pati fakauiga tenā e uiga ki a ia. Ka tauloto foki tatou ki te auala e mafai o ‵kilo atu tatou ki a ia e pelā me ko te ‵tou Kaupapa. Kae ko te ‵toe mea, ka sau‵tala tatou ki auala e mafai o fakaakoako tatou ki uiga o Ieova kolā e fai pelā me se kaupapa.

KAIA E TAKU EI A IEOVA KI TE KAUPAPA?

3. Ne fakaaoga sāle pefea i te Tusi Tapu a te pati “kaupapa”? (Onoono ki te ata.)

³ E fakatusa ne te Tusi Tapu a te Atua ki se “kaupapa” ke fesoasoani mai ke malama‵lama tatou i ana nisi uiga. I taimi e uke e tavae ei ne tavini a Ieova a te Atua ona ko ana uiga fakaofoofogia, e fakamatala ne latou a ia i te Tusi Tapu e pelā me se kaupapa. A te fakamatalaga muamua ki a Ieova e pelā me ko “te Kaupapa” ne maua i te Teutelonome 32:4. I tena ‵talo, ne fai atu a Hana me “seai se kaupapa e pelā mo te ‵tou Atua.” (1 Samu. 2:2) Ne taku  ne Sapakuka a Ieova ki “toku Kaupapa.” (Sapa. 1:12) Ne fakaigoa ne te tino ne tusi ne ia te Salamo 73 a te Atua ki “te kaupapa o toku loto.” (Sala. 73:26) Kae ne fakasino atu foki a Ieova ki a ia eiloa e pelā me ko te kaupapa. (Isa. 44:8) Ke na sau‵tala nei tatou ki uiga e tolu kolā e fai i ei a Ieova e pelā me ko te kaupapa kae ke tauloto ki te auala e mafai o fai ne tatou a ia e pelā me ko te “‵tou Kaupapa.”—Teu. 32:31.

4. I te auala fea e fai ei a Ieova pelā me ko te ‵tou ‵lafiga? (Salamo 94:22)

⁴ A Ieova ko te ‵lafiga. E pelā me se kaupapa lasi telā e mafai o faka‵lafi ki ei se tino mai se afā fakamataku, e puipui ne Ieova tatou māfai ko fe‵paki mo tulaga kolā e fakama‵taku ki ‵tou ola ‵lei. (Faitau te Salamo 94:22.) E tausi kae puipui faka‵lei ne ia tatou mai mea fakama‵taku kolā e fakalogo‵mae mai ki a tatou. Kae tauto mai me ka fai ne ia a mea e uke atu. Ka fakaseai fakamuli atu ne ia so se mea telā e fakamataku ki te ‵tou filemu mo te tokagamalie.—Eseki. 34:​25, 26.

5. I te auala fea e fai ei a Ieova e pelā me se kaupapa e ‵lafi ei tatou?

⁵ Tasi o auala e fai ei ne tatou a Ieova pelā me se kaupapa e ‵lafi ei tatou, ko te ‵talo atu ki a ia. Kafai e ‵talo tatou, ka tuku mai ne Ieova ki a tatou a “te filemu o te Atua” telā e puipui i ei a ‵tou loto mo mafaufau. (Fili. 4:​6, 7) Mafaufau ki te tala o Artem, se taina telā ne ‵pei ki te falepuipui ona ko tena fakatuanaki. Ne sukesuke fakafia a ia ne se pulisimani telā ne faimālō kae fakamā ne ia tou tagata. “Ne manavase au i so se taimi ne sukesuke au ne te pulisimani. . . . Ne ‵talo faeloa au ki a Ieova. Ne fakamolemole au ke fesoasoani mai ke maua ne au se loto filemu mo te poto,” ne fai mai a Artem. “Ne seki manuia a togafiti a te pulisimani ki a au. . . . Mai te fesoasoani o Ieova, e pelā eiloa me ne tu atu au mai tua o se ‵pui fatu.”

6. Kaia e mafai faeloa o fakalago‵lago tatou ki a Ieova? (Isaia 26:​3, 4)

⁶ A Ieova e fakamaoni. E pelā me se kaupapa telā e se mafai o fakagasue, e fakatasi mai faeloa a Ieova ki a tatou. E mafai o tali‵tonu tatou ki a ia me i a ia ko “te Kaupapa ki te se-gata-mai.” (Faitau te Isaia 26:​3, 4.) Ka ola faeloa a ia o tausi ana tautoga, fakalogologo ki ‵tou ‵talo, kae fesoasoani mai. E mafai foki o fakalago‵lago tatou ki a Ieova, me i a ia e fakamaoni ki a latou kolā e tavini atu ki a ia. (2 Samu. 22:26) Ka se puli i a ia a ‵tou mea e fai, kae ka fakamanuia faeloa ne ia tatou.—Epe. 6:10; 11:6.

7. Se a te mea ka maua ne tatou māfai e fakalago‵lago ki a Ieova? (Onoono foki ki te ata.)

⁷ E fai ne tatou a Ieova e pelā me ko ‵tou Kaupapa māfai e fakalago‵lago katoatoa tatou ki a ia. E tali‵tonu tatou me mai te faka‵logo ki a ia ke oko foki loa ki taimi faiga‵ta, ka maua ne tatou a mea aoga. (Isa. 48:​17, 18) Kafai e lavea ne tatou a tena fesoasoani, ka gasolo aka o lasi te ‵tou loto tali‵tonu ki a ia. Kae ka toka ‵lei tatou o fakafesagai atu ki fakalavelave, me ko Ieova fua ka fesoasoani mai ke mafai o kufaki tatou i ei. I tulaga kolā ko seai se tino e mafai o ‵sala atu ki ei mō se fesoasoani, e lavea faeloa ne tatou i ei a te fesoasoani o Ieova. “I te taimi ne nofo ei au i te falepuipui, ne ‵pili ‵ki toku fesokotakiga mo te Atua,” ne fai a Vladimir. “Ne gasolo o talitonu malosi au ki a Ieova, me i au ne nofo tokotasi  kae ko ia fua ne fesoasoani mai ke mafai ne au o kufaki.”

8. (a) Kaia e fai atu ei tatou i a Ieova e se mafuli? (e) E maua pefea ne tatou a mea aoga mai te fai o te Atua e pelā me ko te ‵tou Kaupapa? (Salamo 62:​6, 7)

⁸ A Ieova e se mafuli. E pelā me se kaupapa lasi, a Ieova e ‵mautakitaki kae e se mafuli. E se mafai o ‵fuli ana uiga mo tena fuafuaga. (Mala. 3:6) I te taimi ne ‵teke atu a Atamu mo Eva ki a ia, ne seki ‵fuli eiloa tena fuafuaga mō te lalolagi. E pelā mo te mea ne tusi mai ne te apositolo ko Paulo, i a Ieova “e se mafai o fakafiti ne ia a ia eiloa.” (2 Timo. 2:13) E fakauiga i ei me faitalia me ne a mea e ‵tupu io me fai ne nisi tino, ka se ‵fuli eiloa a uiga o Ieova, tena fuafuaga mo ana tulaga. Ona ko Ieova e se mafuli, e iloa ne tatou me ka fesoasoani mai a ia ki a tatou i taimi faiga‵ta kae tausi ana tautoga mō aso mai mua.—Faitau te Salamo 62:​6, 7.

9. Se a te mea e tauloto ne koe mai te tala o Tatyana?

⁹ Kafai e mafaufau ‵loto tatou ki uiga o Ieova mo tena fuafuaga mō te lalolagi mo tino, e mafai o fesoasoani mai te mea tenā ke tali‵tonu tatou ki a ia, kae fai a ia pelā me ko ‵tou Kaupapa. A te faiga penā e fesoasoani mai ke ‵mautakitaki tatou i mea tau lagonaga i te taimi e kufaki ei tatou i fakalavelave. (Sala. 16:8) Tenā eiloa te mea ne tupu ki te tuagane e igoa ki a Tatyana telā ne ‵loka i te fale ona ko tena fakatuanaki. “Ne nofo tokotasi au,” ne fai mai a ia. “Ne faigata i te taimi muamua. Ne loto vāivāi faeloa au.” Kae i te iloaga ne ia me isi se sokoga o tena fakalavelave ki a Ieova mo tena fuafuaga, ne mafai ei ne ia o fa‵ki kae toe maua te malosi i mea tau lagonaga. Ana muna: “A te malamalama i te pogai ne tupu ei te mea tenei ki a au, ne fakamasaua mai me ne oko au ki te tulaga tenei ona ko Ieova. Ne fesoasoani mai te mea tenā ke se toe mafaufau au ki a au eiloa.”

10. E fai pefea ne tatou a Ieova e pelā me ko ‵tou Kaupapa i te taimi nei?

¹⁰ I aso mai mua, ka fakafesagai tatou mo fakalavelave kolā ko manakogina i ei ke fakalago‵lago malosi ki a Ieova i lō aso mua. Tenei te taimi ke fakamalosi aka ‵tou loto tali‵tonu me ka tuku mai ne ia so se mea e ma‵nako tatou ki ei ke kufaki mo te fakamaoni. E mafai pefea ne tatou o fai penā? Faitau ki tala i te Tusi Tapu mo tala o Molimau a Ieova i aso nei. Tauloto ki te auala ne fakaasi atu ne te Atua ana uiga e pelā me se kaupapa ke ‵lago atu ki ana tavini. Mafaufau ‵loto ki tala konā. Mai te fai penā, e mafai o fesoasoani atu ke fai ne koe a Ieova e pelā me ko tou Kaupapa.

FAKAAKOAKO KI UIGA O IEOVA KOLĀ E FAI PELĀ ME SE KAUPAPA

11. Kaia e ma‵nako ei tatou o fakaakoako ki uiga o Ieova kolā e fai pelā me se kaupapa? (Onoono foki ki te pokisi “ Se Fakamoemoega mō Taina Talavou.”)

¹¹ Ne tauloto tatou ki te auala e fai ei a Ieova e pelā me se kaupapa. Nei la, ka onoono tatou ki te auala e mafai o fakaakoako tatou ki ana uiga kolā e fai pelā me se kaupapa. Kafai e taumafai tatou o fai ‵toe mea ke fakaakoako ki uiga o Ieova, ka toka ‵lei tatou o fakamalosi aka te fakapotopotoga. E pelā me se fakaakoakoga, ne fakaigoa ne Iesu a Simona ki a Kefa (telā e ‵fuli ki a “Petelu”),  e fakauiga ki “te Kaupapa.” (Ioa. 1:42) E fakauiga te mea tenei me ka fai a Petelu e pelā me se fakamafanafanaga ki nisi tino i te fakapotopotoga kae fakamalosi olotou fakatuanaki. A toeaina i te fakapotopotoga e taku e pelā me “se malūga o se kaupapa lasi.” E fakauiga eiloa me ka puipui ne latou a tino i te fakapotopotoga. (Isa. 32:2) E tonu, e maua ne te fakapotopotoga a mea aoga māfai a tino katoa—taina mo tuagane—e fakaakoako ki uiga o Ieova kolā e fai pelā me se kaupapa.—Efe. 5:1.

12. Fakamatala mai a auala e mafai o fai tatou e pelā me ne koga faka‵lafi ki nisi tino.

¹² Ke fai pelā me se koga faka‵lafi. I nisi taimi, kāti e faka‵lafi ne tatou a ‵tou taina mai fakalavelave o te natula mo taua. Ona ko te gasolo aka o ma‵sei a fakalavelave i “aso fakaoti” konei, e mautinoa eiloa me ka manakogina malosi ke fakatau fesoasoani tatou. (2 Timo. 3:1) E mafai foki o tuku atu ne tatou ki ‵tou taina mo tuagane a fakamafanafanaga kae fakaasi atu te alofa. Tasi o auala ke fai penā ko te fai‵pati ki a latou māfai e au‵mai ki fakatasiga, kae fakamafanafana atu latou. E ma‵nako tatou ke fai te fakapotopotoga e pelā me se koga fakamalosi loto kae alofagina. E ola tatou i se lalolagi telā e tokouke a tino e fai fakamasei ne latou a nisi tino. Tela la, kafai e ‵kau mai ‵tou taina mo tuagane ki fakatasiga, e ma‵nako tatou o fai a mea katoa e mafai ne tatou o fai ke fakamalosi kae fakaasi atu te alofa.

13. E mafai pefea o fai a toeaina e pelā me se koga faka‵lafi ki nisi tino? (Onoono foki ki te ata.)

¹³ E mafai o fai a toeaina e pelā me se koga faka‵lafi ki tino i te fakapotopotoga kolā e fe‵paki mo fakalavelave kese‵kese. I taimi o matagi mo fakalavelave ‵tupu fakafuasei, e ga‵sue muamua a toeaina o fesoasoani atu ki taina mo tuagane. E fesoasoani atu foki latou i te feitu faka-te-agaga. Ka ma‵nako a taina mo tuagane o olo atu ki se toeaina māfai a ia e atafai, uiga faigofie, kae toka o fakalogologo. E fesoasoani atu a uiga konā ke maua ne nisi tino a lagonaga  me alofagina latou; tela la, ka faigofie ke fakagalue ne latou a te takitakiga e tuku atu ne se toeaina telā e fakavae ki te Tusi Tapu.—1 Tesa. 2:​7, 8, 11.

14. E fakaasi atu pefea me e fakamaoni tatou?

¹⁴ Ke fakamaoni. E ma‵nako tatou ke tali‵tonu a nisi tino ki a tatou, maise loa i taimi faiga‵ta. (Faata. 17:17) Ne a ‵tou mea e mafai o fai ke tali‵tonu mai a tino? Ke taumafai faeloa tatou o fakaasi atu a uiga o te Atua, pelā mo te tausi ki ‵tou tautoga kae fai ‵toe mea e mafai ke fakamaoni ki te taimi. (Mata. 5:37) E mafai foki o fesoasoani atu tatou māfai e manakogina. E se gata i ei, ke fakamautinoa aka me fai ‵tou tōfiga i te fakapotopotoga e ‵tusa mo fakatonuga kolā e maua ne tatou.

15. E maua pefea ne te fakapotopotoga a mea aoga māfai a toeaina e fakamaoni?

¹⁵ A toeaina fakamaoni e aoga ki te fakapotopotoga. Pefea la? Kafai e iloa ne taina mo tuagane me e mafai o fesokotaki atu latou ki toeaina mō se fesoasoani, ka fai ei ke sē manava‵se malosi latou. E alofagina foki a tino talai māfai e iloa ne latou me e toka a toeaina o fesoasoani ki a latou. Kae kafai e fakavae ne toeaina a olotou pati fakatonutonu ki te Tusi Tapu mo tusi mai te  tavini fakamaoni i lō olotou manatu totino, ka tali‵tonu a te kautaina ki a latou. E tali‵tonu foki a taina mo tuagane ki toeaina kolā e se fakaasi atu ne latou ki nisi tino a mea ‵funa kae tausi ki olotou tautoga.

16. E aoga pefea ki a tatou mo nisi tino a te faiga faeloa o te mea tonu?

¹⁶ Ke fai faeloa te mea tonu. E mafai o fai tatou e pelā me se fakamalosiga ‵lei ki nisi tino māfai e ‵mautakitaki tatou i te fai faeloa o te mea tonu kae fakavae ‵tou fakaikuga ki fakatakitakiga i te Tusi Tapu. I te taimi e gasolo aka ei o malosi ‵tou fakatuanaki mo te iloaga tonu, ka ‵mautakitaki eiloa tatou i te munatonu. Ka lavea ne tatou a akoakoga mo manatu ‵se kolā e se fakavae ki mafaufauga o Ieova, kae ka sē fakamalosi aka tatou ne mafaufauga konei. (Efe. 4:14; Iako. 1:​6-8) Ka fai ne te ‵tou fakatuanaki ki a Ieova mo ana tautoga ke filemu tatou māfai ko maua ne tatou a tala sē ‵lei. (Sala. 112:​7, 8) Ka mafai foki o fesoasoani atu tatou ki a latou kolā e fe‵paki mo mea faiga‵ta.—1 Tesa. 3:​2, 3.

17. Ne a mea e fesoasoani atu ki toeaina ke fai latou pelā me se fakamalosiga i te faiga o te mea tonu?

¹⁷ E ‵tau mo toeaina o agamalu i olotou faifaiga, maua te mafaufau ‵lei, kae uiga faigofie. E fai a tāgata konei e pelā me se fakamalosiga i te faiga o te mea tonu ki nisi tino kae fakamalosi ei te fakapotopotoga mai te “puke ‵mau ki te muna fakamaoni.” (Tito 1:9; 1 Timo. 3:​1-3) Mai olotou fakaakoakoga mo olotou asiga pelā me ne tausi mamoe, e fesoasoani atu a toeaina ki tino talai ke ‵kau atu faeloa ki fakatasiga, te galuega talai, kae fai olotou sukesukega totino. Kafai e isi ne fakalavelave o taina mo tuagane kolā e fai ei ke manava‵se latou, e fakamasaua atu ne toeaina ki a latou ke fakalago‵lago ki a Ieova kae ‵saga tonu atu ki ana tautoga.

18. Kaia e ma‵nako tatou o ‵viki atu ki a Ieova kae fakapili‵pili malosi atu ki a ia? (Onoono foki ki te pokisi “ Te Auala ke Fakapilipili Malosi Atu ki a Ieova.”)

¹⁸ Mai tua o te mafaufau ‵loto ki uiga fakaofoofogia o Ieova, e mafai o fai atu ne tatou a pati a te tupu ko Tavita: “Ke ‵viki atu ki a Ieova toku Kaupapa.” (Sala. 144:1) E mafai faeloa o fakalago‵lago tatou ki a Ieova te Atua. Faitalia me ko ma‵tua tatou, e tali‵tonu tatou me ka tumau a ia i te fesoasoani mai ke fakapili‵pili malosi tatou ki a ia. Ko mafai ei o fai atu tatou penei, “A ia ko toku Kaupapa.”—Sala. 92:​14, 15.