1. Maererano na Pisarema 18:46, Dhavhidhi wakaezanisa Djehovha nei?

 ISUSU tiri kurarama mu nyika yekuti matambudziko uye zvitsinzwa zvingacinja upenyu wedu pa nguwa yatisikakariri. Asi isusu tinotenda maningi nge kugara no rubetso ra Djehovha! Mu fundo yadarika, isusu takaedzurirhwa kuti Djehovha ndi Mwari mupenyu uye kuti iyena nguwa dzese akagadzirira kutibetsera. Djehovha paanoita izvona, isusu tinokwanisa kuona kuti “Djehovha mupenyu!” (Erengai Pisarema 18:46.) Asi mumasure me kutara izvi, Dhavhidhi wakadainza Djehovha kuti “Buwe rangu.” Ngei Dhavhidhi mumasure me kubhuya kuti Djehovha mupenyu wakazomuezanisira no ciro cisina upenyu?

2. Ticaonei mu fundo ino?

² Mu fundo ino, ticaona kuti ngei Djehovha uri kudainzwa kuti buwe uye kuti kuezanisira uku kunotifundisei nge zvake. Uyewo ticaona kuti ngei tingagonda Djehovha uye tomudainza kuti ndi Buwe redu. Pakupedzesera, ticaona mishobo minganani yatingateedzera nayo mawara a Djehovha.

NGEI DJEHOVHA ARI KUEZANISWA NO BUWE

3. Ngei kakawanda kakhona Bhaibheri rinoseenzesa soko rokuti “buwe” parinonga recibhuya ngezva Djehovha? (Onai foto ye pa kapa.)

³ Bhaibheri rinoezanisa Djehovha no “buwe” kuti ritibetsere kuziya zvakanaka mawara ake. Kakawanda kakhona, aseenzi a Djehovha anopasa rukudzo kaari nge mawara ake anoshamisa, awona anopanganidza Djehovha hingana buwe. Mu Bhaibheri, Djehovha anodainzwa kekutanga kuti “Buwe” pana Dheuteronomiyo 32:4. Pamunamato wake, Ana wakati: “Apana buwe rinoezaniswa na Mwari wedu” Djehovha. (1 Sam. 2:2) Abhakuki wakadainza Djehovha kuti “Buwe rangu.” (Abha. 1:12) Mutari we Pisarema 73 wakadainza Djehovha kuti “buwe re mwoyo wangu.” (Pis. 73:26) Kunyazi Djehovha paaibhuya ngezvake kamare, wakadziezanisa no buwe. (Isa. 44:8) Ngationei zvino mawara matatu  a Djehovha anopangidza kuti iyena ndi buwe uye ticafundira kuti tingaona kudini Djehovha hingana “Buwe redu.”—Dhe. 32:31.

4. Djehovha i mbuto yedu yekutizira nge gwanza ripi? (Pisarema 94:22)

⁴ Djehovha ndiyo mbuto yedu yekutizira. Pa nguwa inonga yeciitika dutu rakakura, isusu tingagumira mbuto yekuti tifindare mu bako, nge mushobo umwewo, patinonga tecibatana no matambudziko kana kuti zvitsinzwa mu upenyu Djehovha angatidziirira. (Erengai Pisarema 94:22.) Djehovha acatibetsera kuti ticengetedze ushamwari wedu naye. Iyena anotigondesa kuti apana matambudziko atiri kubatana nawo acagara nokusikaperi. Asi Djehovha anotigondesa kuti acaita zvakapinda ipona, mune ramangwana Iyena acapedza ciro cipi haco cinotiitisa kuti tidzirhye mwoyo.—Ezek. 34:25, 26.

5. Djehovha angagara kudini mbuto yedu ye Kutizira?

⁵ Mushobo umweni wekuti tigumire rucengeteko kuna Djehovha, ngewe kuita munamato. Patinoita munamato, Djehovha anotipasa ‘runyararo ra Rake’ rinocengetedza mwoyo wedu uye ndangariro dzedu. (Afi. 4:6, 7) Onai zvakaitika na Artem, hama yakasungwa nge ndaa ye kutenda kawo. Mukwarakwatisi umweni wakamuita mibvunzo kakawanda, wakamushupha uye wakamuthyisidzira. Artem wakati: “Pese paaindidainza, mukwarakwatisi waiita kuti ndinyangadzwe. . . . Nguwa dzese ndaiita munamato kuna Djehovha ndecikumbira runyararo re mu mwoyo uye ungwaru, mazano e mukwarakwatisi aazi kuseenza kandiri. . . . No rubetso ra Djehovha, zvaiita hingana ndakacengethwa mukati me muru.”

6. Ngei tinodikana kugonda Djehovha nguwa dzese? (Isaya 26:3, 4)

⁶ Djehovha akagondeka. Kuita hingana dunhu kana kuti buwe rakakura risikabudi pa mbuto yaro, Djehovha aacinji, iyena aripo nguwa dzese kuti atibetsere. Isusu tingamugonda, ngekuti iyena ndi “Buwe rinogara nokusikaperi.” (Erengai Isaya 26:3, 4.) Djehovha acarumbwa ari mupenyu uye akagadzirira kuita zvaakapikira, kupurutana minamato yedu uye kutibetsera paya patinoda rubetso. Isusu tingagondawo Djehovha ngekuti iyena akagondeka kune aya anomuseenzera. (2 Sam. 22:26) Iyena aazokanganwi zviya zvatinomuitira, nge ndaa yazvo, nguwa dzese acatikomborera.—Aheb. 6:10; 11:6.

7. Cinyi cicaitika kana tikagonda Djehovha? (Onaiwo foto.)

⁷ Isusu tinoita kuti Djehovha agare Buwe redu patinomugonda no mwoyo wese. Isusu tino rugondo rokuti kana tikamuzwira kunyazi panguwa inoshupha zvakatinakira. (Isa. 48:17, 18) Pese patinoona mushobo wakatibetsera Djehovha, rugondo redu kaari rinotunhudzirika uye tinonyasa kugara no cokwadi cokuti Djehovha basi ndiye angakwanisa kutibetsera kushingirira muedzo upi hawo, azvinei kuti muedzo iwona wakakura kudini. Kakawanda patinobatana no mugariro unoshupha tinozwisisa kuti ngei tecidikana kugonda Djehovha. Ndizvo zvakazwa hama imweni inozwi Vladimir, iyona yakati: “Pa nguwa yandakagara ndakasungwa ndipo pakanyasa kubamba ushamwari wangu na Djehovha, inini ndakafundira kugonda Djehovha ngokuti ndainga ndiri ndega apana umweni waiona mugariro wangu.”

8. (a) Ngei tingabhuya kuti Djehovha aacinji? (b) Ngei zvakanaka maningi kugara na Djehovha hinga Buwe redu? (Pisarema 62:6, 7)

 ⁸ Djehovha aacinji. Kuita hingana buwe rakakura, unhu uye zvinangwa zva Djehovha azvicinji. (Mara. 3:6) Adhamu na Evha paakashaishira Djehovha, iyena aazi kucinja cinangwa cake ku anhu. Muphostori Pauro wakabhuya kuti Mwari “aangadzirambi.” (2 Ti. 2:13) Izvi zvinoda kureya kuti azvinei no zvingaitika kana zvingaizwa no amweni, Djehovha aazocinji mushobo wake wekuita zviro, zvinangwa zvake uye nhungamiriro dzake. Isusu tingagonda Mwari wedu asikacinji uye togara no rugondo rokuti iyena acatibetsera pa nguwa dzinoshupha uye acadzadzisa zvinangwa zvake zve ramangwana.—Erengai Pisarema 62:6, 7.

9. Mafundei no zvakaitika na Tatyana?

⁹ Patinonyasa kurangarira mawara a Djehovha uye zvinangwa zvake pa nyika uye ku anhu, izvona zvicatibetsera kurumbwa takaterama uye kurumbwa takagondeka kaari patinobatana no miedzo. (Pis. 16:8) Ndizvo zvakaitika no hanzvadzi imweni inozwi Tatyana yakafungirhwa mukadheya yo pa nyumba ngo ndaa yo kutenda kayo, iyona yakati: “Inini ndakagara ndiri ndega, izvona zvakanetsa pa kutanga, ndakatsukwara maningi.” Mumasure mwazvo iyona yakatanga kurangarira ngezva Djehovha uye ngezve cinangwa cake ku anhu uye yakazwisisa kuti ngei yaidikana kushingirira miedzo yaaibatana nayo. Izvona zvakaibetsera kuti irumbwe yakaterama uye zvakaipasa simba kuti ishingirire, iyona yakatizve: “Kuzwisisa kuti ngei inini ndainga ndiri pa mugariro iwona, zvakaita kuti ndigume pa kuziya kuti ndainga ndiri pa mugariro iwona nge ndaa ye kuda Djehovha. Izvona zvakadibetsera kuti ndisiye kurangarira nge zvangu basi.”

10. Djehovha angagara kudini Buwe redu kubvira zvino?

¹⁰ Mbai-mbai pano isusu ticabatana no mugariro unoshupha maningi uye ticadikana kunyasa kugonda Djehovha kupinda nguwa ipi hayo. Ndiyo ndaa, zvecikosha kubvira zvino kuti tibambise rugondo redu kaari uye kutenda kuti Djehovha acatipasa rubetso rese ratinoda kuti tirumbwe takagondeka kaari. Tingazviita kudini? Nge kuerenga mu Bhaibheri ngano dze aseenzi a Djehovha e kare uye maesperiensiya e hama no hanzvadzi dze mazuwa ano dzakabetserhwa na Djehovha kuti dzishingirire. Pamunoerenga ngano idzi, onai kuti Djehovha akabetsera kudini anhu ake. Torai nguwa kuti munyase kurangarira. Kana imwimwi mukaita izvona mucanyasa kuzwisisa kuti Djehovha i Buwe renyu.

TEEDZERAI MAWARA A DJEHOVHA

11. Ngei tinoda kuteedzera mawara a Djehovha? (Onai bhokisi rakazwi: “ Zvinangwa Zvingagara no Hama dze Cidjaha.”)

¹¹ Dakara zvino, taona mawara amweni a Djehovha anotibetsera kuona kuti ngei iyena eciezaniswa no buwe. Hino parizvino ngaticionei kuti tingateedzera kudini mawara awona. Kana isusu tikaita zvese zvatinokwanisa kuti titeedzere mawara a Djehovha, isusu tingabambisa hama dzedu. Ngo muezaniso, Djesu akapasa Simoni zina rokuti Kefasi (rinoda kureya “Pedru”), zina iri rinoda kureya “Dimbu re Buwe.” (Juau 1:42) Nge mushobo iwona, Djesu akapangidza  kuti Pedru waizonyaradza hama dze mu ungano uye waizobambisa kutenda kawo. Akuru e mu ungano anoezaniswa no “bvute re buwe rakakura maningi.” Izvi zvinoda kureya kuti akuru anodziirira ungano. (Isa. 32:2) Izvirokwazvo kuti tese isusu haiwa basi akuru, tingateedzerawo mawara a Djehovha uye tobambisawo amweni mu ungano.—Aef. 5:1.

12. Tingagara kudini mbuto ye kutizira ku hama dzedu?

¹² Garai mbuto yokutizira ku hama. Hama dzedu padzinobatana no tsawana dzinoitika dzega kana hondo, pamweni zvinonga zveitodikana kuti tiapase mbuto yokutizira kamare. Mugariro we zviro we “mazuwa ano e kupedzesera” paucarumbwa wecibambirira kushata, apana mubvunzo kuti isusu ticadikana kuabetsera. (2 Ti. 3:1) Pane kuapasa basi zviro zve kunyama, tinodikanawo kuanyaradza uye kuapangidzira rudo raanoda. Mushobo umweni we kuita izvona ngewe kucedza nawo patinonga tiri pa misangano pa Nyumba ye Umambo uye kuapasa nyaradzo yaanoda. Isusu tinoda kuti ungano igare mbuto ye runyararo yokuti hama dzinobambiswa uye dzinopangidzirhwa rudo. Isusu tinorarama mu nyika yekuti inoshupha, isina rudo uye inoita kuti misoro yedu ipise. Ndiyo ndaa, hama dzedu padzinoenda ku misangano, isusu tinodikana kuita zviri zvese kuti idzona dzizwe kuzorodzwa, kuti dzinodiwa uye kuti dzakacengeteka.

13. Akuru angagara kudini mbuto ye kutizira ku anhu amweni? (Onaiwo foto.)

¹³ Akuru angagara mbuto yekutizira ku hama no hanzvadzi dzinobatana no migariro inoshupha. Panoitika tsawana dzinoitika dzoga uye panodikana kuraphwa no kukasika, akuru no kukasika anotoita urongwa wekupasa rubetso ku hama no hanzvadzi. Awona anoseenzesawo Bhaibheri kuti apase nhungamiriro no kubambisa. Hama dzicazwa dzakasudzunuka kukumbira rubetso ku mukuru anoziikanwa no kupangidzira rudo, kuzwisisa uye anopeta masimba kuti azwisise mazwiro e hama. Mukuru unopeta masimba pakupangidza mawara awona, unoita kuti  hama dzizwe dzecidiwa; ngekudaro, zvicaita nyore kuti hama dzitondowedze nhungamiriro dzakawakirhwa mu Bhaibheri dzinopaswa no akuru.—1 Ate. 2:7, 8, 11.

14. Tingapangidza kudini kuti tiri anhu akathembeka?

¹⁴ Garai munhu wakathembeka. Isusu tinoda kuti amweni azwe kuti angapsvaka rubetso redu paya paanobatana no zvitsinzwa. (Zvie. 17:17) Hino isusu tingaitei kuti hama dziziye kuti isusu tinothembeka? Isusu tingapeta masimba kuti titeedzere Djehovha zuwa no zuwa. Ngo muezaniso, kuita zviya zvatinonga tagondesa uye kugara munhu unobata nguwa. (Mat. 5:37) Uye tingaitawo zvese zvatinokwanisa kuti tibetsere uya unoda rubetso. Kusiya izvona, isusu tinodikana kuita mabasa aya atinopaswa mu ungano maererano no nhungamiriro dzatinopaswa.

15. Akuru anothembeka anobetsera kudini ungano?

¹⁵ Akuru anothembeka i cipo mu ungano. Nge mushobo upi? Kana hama dzikaziya kuti dzingadainza mukuru pese paya padzinonga dzecida rubetso, idzona dzinozwa dzakaterama. Hama dzinozwawo dzecidiwa kana dzikaziya kuti akuru akagadzirira kubetsera pese paya paanonga ecida rubetso uye hama dzicanyasawo kuthemba zvakanaka akuru kana dzikaziya kuti akuru  anoseenzesa Bhaibheri uye mabhuku e sangano kuti apase nhungamiriro, haiwa marangariro awo. Kusiya izvona, hama dzinothemba akuru aya asikabvunzi anhu amweni zviro zvawo zvakaigika uye anoita zviya zvaanonga agondesa.

16. Ngei zvecikosha kuti nguwa dzese titeerere nhungamiriro dza Djehovha?

¹⁶ Teererai nhungamiriro dza Djehovha nguwa dzese. Kana tikazwira Djehovha pa zviro zvese zvatinoita uye patinoita zvisananguro zvinobva mu Bhaibheri, ticagara muezaniso wakanaka ku amweni. Kana tikafunda Bhaibheri uye tobambisa kutenda kedu kuna Djehovha, isusu ticarumbwa takatendeka kaari uye ku nhungamiriro dzake. Isusu atizopfuridzirhwi no fundiso dze kunyepa, uye no marangariro akasiyana no aya anofundiswa na Djehovha mu Bhaibheri. (Aef. 4:14; Tig. 1:6-8) Patinotambira manotisiya anotsukwarisa, isusu tinorumbwa takaterama ngokuti tino kutenda uye tinogonda no zvipikirhwa zva Djehovha. (Pis. 112:7, 8) Uye tingabetserawo aya arikubatana no zvitsinzwa uye miedzo.—1 Ate. 3:2, 3.

17. Akuru angabetsera kudini hama kuti dzirumbwe dzakabamba pa kutenda?

¹⁷ Akuru anodikana kugara anhu anodzibata, ano marangariro akanaka, akarongeka uye anozwisisa. Akuru anobetserawo amweni kuti arumbwe akaterama uye agare no kutenda kakabamba muna Djehovha. Uye awona anobambisawo ungano ngo “kubatisisa masoko akatendeka.” (Tito 1:9; 1 Ti. 3:1-3) Ngo ndaa ye muezaniso wawo uye basa ro kuusha, akuru anobetsera aparidzi e mu ungano kuti arumbwe ecipinda misangano, kuparidzira uye kuita fundo ye munhu ega. Hama padzinobatana no matambudziko anoita kuti adzirhye mwoyo, akuru anodziedzurira kuti dzinodikana kugonda Djehovha uye kukanda ndangariro dzawo pa zvipikirhwa zvake.

18. Ngei tinodikana kukudza Djehovha uye kurumbwa tiri padhuze naye? (Onai bhokisi rakazwi: “ Mushobo Watingarumbwa Tiri Dhuze na Djehovha.”)

¹⁸ Mumasure me kufunda ngezve mawara manganani a Djehovha, isusu tingareketa hinga zvakatarhwa na Mambo Dhavhidhi, iyena wakati: “Ngaakudzwe Djehovha, Buwe rangu.” (Pis. 144:1) Isusu tingagonda Djehovha nguwa dzese uye ke upenyu wedu wese. Kunyazi tecidzirhya mwoyo, isusu tinogonda Djehovha kuti acarumbwa ecitibetsera kuti tirumbwe tiri dhuze naye uye isusu tingabhuyawo kuti Djehovha: “I Buwe rangu.”—Pis. 92:14, 15.