TUMU PARAU HAAPIIRAA 26
HIMENE 8 O Iehova to tatou haapuraa
A turui i nia ia Iehova to oe Mato
“Aita ˈtu e mato mai to tatou Atua.”—SAM. 1, 2:2.
MANAˈO FAUFAA
E faataahia mai teihea mau huru maitatai e riro ai Iehova ei mato e e nafea tatou e faatupu ai i te reira.
1. Ua faaau Davida ia Iehova i te aha ia au i te Salamo 18:46?
I TE tahi taime, e tupu taue mai te tahi mau fifi aore ra e taui roa to tatou oraraa. E mauruuru roa tatou e nehenehe tatou e ani i te tauturu i te Atua ra o Iehova! Ua ite mai tatou i to na mua ˈtu tumu parau e Atua ora o Iehova tei ineine noa i te tauturu mai. Ia na reira mai o ˈna, papu roa ˈtu â ia tatou “e Atua ora o Iehova!” (A taio i te Salamo 18:46.) I muri iho râ, ua faaau Davida i te Atua i te tahi mea e ere i te mea ora. Ua pii oia ia Iehova “to ˈu Mato.” Eaha ta ˈna e hinaaro ra e parau?
2. Eaha ta teie tumu parau e faataa mai?
2 E faataa mai teie tumu parau no te aha Iehova i faaauhia ˈi i te hoê mato e te haapiiraa e huti mai. Oia atoa e nafea ia faariro ia Iehova ei Mato no tatou, e e nafea ia faatupu i to ˈna mau huru maitatai.
NO TE AHA E MATO IEHOVA?
3. E nafea te Bibilia e faaohipa ˈi i te taˈo “mato”? (A hiˈo i te hohoˈa.)
3 Te faaau ra te Bibilia ia Iehova i te hoê “mato” no te tauturu ia tatou ia taa vetahi o to ˈna mau huru maitatai. Pinepine ta ˈna mau tavini i te faataa ia ˈna mai tera ia arue anaˈe ratou ia ˈna no to ˈna mau huru maitatai. Te faahitiraa matamua, to roto ïa i te Deuteronomi 32:4. A pure ai Hana, ua parau oia “aita ˈtu e mato mai to tatou Atua.” (Sam. 1, 2:2) Ua pii Habakuka ia Iehova “to ˈu Mato.” (Hab. 1:12) “Te mato o to ˈu aau” ta tei papai i te Salamo 73 i parau. (Sal. 73:26) Ua faaau atoa Iehova ia ˈna i te hoê mato. (Isa. 44:8) E hiˈopoa mai tatou e toru huru maitatai e riro ai Iehova ei mato, e e nafea ia faariro ia ˈna ei mato no tatou.—Deut. 32:31.
E Mato Iehova no ta ˈna mau tavini (A hiˈo i te paratarafa 3)
4. No te aha e parauhia ˈi e haapuraa Iehova? (Salamo 94:22)
4 E haapuraa Iehova. Ia tupu anaˈe te hoê vero rahi, e nehenehe te hoê taata e imi i te haapuraa i roto i te hoê ana. Mai tera atoa Iehova ia paruru ia tatou i te mau taime fifi roa o to tatou oraraa. (A taio i te Salamo 94:22.) E tauturu o ˈna ia tatou ia paruru i to tatou auhoaraa e o ˈna. Te haapapu mai ra o ˈna eita tatou e haafifihia e a muri noa ˈtu. E te fafau mai ra oia i te faaore roa i te mau tumu atoa o te ahoaho e te mauiui a muri aˈe.—Ezk. 34:25, 26.
5. E nafea Iehova e riro ai ei Haapuraa no tatou?
5 Hoê ravea e riro ai Iehova ei Haapuraa no tatou, o te pureraa ïa ia ˈna. E horoa mai hoi oia i “te hau o te Atua” o te paruru i to tatou aau e feruriraa. (Phil. 4:6, 7) A hiˈo na ia taeae Artem tei tapeahia no to ˈna faaroo. Pinepine oia i te uiuihia, i te faahepohia e te faahaamahia e te mutoi titorotoro. Te na ô ra o ˈna: “Ua ahoaho roa vau i te mau taime atoa e uiuihia ˈi au. . . . Ua pure noa vau ia Iehova. Ua ani au ia ˈna ia tamǎrû i to ˈu aau e ia horoa mai i te paari. Aita te mau raveraa a te mutoi titorotoro i manuïa. . . . Maoti ta Iehova tauturu, mai te huru ra e ua paruruhia vau i muri mai i te hoê patu ofai.”
6. No te aha tatou e nehenehe ai e tiaturi noa ia Iehova? (Isaia 26:3, 4)
6 E nehenehe e turui noa i nia ia Iehova. Mai te hoê mato o te vai noa, tei ia tatou noa atoa Iehova. E nehenehe tatou e tiaturi ia ˈna no te mea o ˈna “te Mato mure ore.” (A taio i te Isaia 26:3, 4.) E faatupu iho â oia i ta ˈna i fafau, e faaroo i ta tatou mau pure e e hopoi mai oia i te tauturu hinaarohia. E nehenehe atoa tatou e tiaturi ia Iehova no te mea eita roa ˈtu oia e taiva i ta ˈna mau tavini. (Sam. 2, 22:26) Eita roa ˈtu e moˈe ia ˈna ta tatou ohipa i rave, a tamau ai i te haamaitai ia tatou.—Heb. 6:10; 11:6.
7. Eaha ta tatou e fanaˈo ia turui tatou i nia ia Iehova? (A hiˈo atoa i te hohoˈa.)
7 E riro Iehova ei Mato no tatou ia turui roa tatou i nia ia ˈna. Ua papu ia tatou e maitaihia tatou i te faarooraa ia ˈna i te mau taime fifi. (Isa. 48:17, 18) E rahi atu â to tatou tiaturi ia ˈna ia ite tatou i ta ˈna tauturu. Maoti noa o ˈna e noaa ˈi ia tatou ia faaoromai tamau i te fifi rau. E nehenehe iho â tatou e turui noa i nia ia ˈna. Ua parau Vladimir: “Ua piri roa ˈtu â vau ia Iehova i te fare tapearaa. Ua haapii au i te tiaturi atu â ia ˈna, no te mea o ˈna anaˈe te nehenehe e tauturu mai ia faaoromai tamau i tera mau taime o vau anaˈe.”
E riro Iehova ei Mato no tatou ia turui roa tatou i nia ia ˈna (A hiˈo i te paratarafa 7)
8. (1) No te aha tatou e parau ai eita Iehova e taui? (2) Eaha te maitai ia faariro i te Atua ei Mato no tatou? (Salamo 62:6, 7)
8 Eita Iehova e taui. Mai te hoê mato rahi, eita Iehova e taui. E ore roa to ˈna huru e ta ˈna opuaraa e taui. (Mal. 3:6) I to Adamu raua Eva orure-hau-raa i Edene, aita Iehova i aueue. “E haa noa hoi oia ia au i to ˈna huru mau,” mai ta Paulo i papai. (Tim. 2, 2:13) Te auraa, tera noa iho â to Iehova mau huru maitatai, ta ˈna opuaraa aore ra ture aveia noa ˈtu eaha te tupu mai aore ra eaha ta vetahi ê e rave. No te mea eita o ˈna e taui, ua papu ia tatou e tauturu mai oia i te mau taime fifi e e faatupu oia i ta ˈna i fafau no a muri aˈe.—A taio i te Salamo 62:6, 7.
9. Eaha te haapiiraa e huti mai i ta Tatyana i faaruru?
9 E riro Iehova ei Mato no tatou ia feruriruri tatou i to ˈna mau huru maitatai e ta ˈna opuaraa no te fenua e te huitaata. Eita ïa to tatou aau e horuhoru ia û tatou i te fifi. (Sal. 16:8) Ta tuahine Tatyana ïa i ite a tapeahia ˈi o ˈna no to ˈna faaroo. Ua parau oia: “Ua moˈemoˈe roa vau. Mea fifi i te omuaraa. Pinepine au i te hepohepo.” I to ˈna râ feruriruriraa ia Iehova e ta ˈna opuaraa no te huitaata, taa ihora ia ˈna e mea faufaa roa ia faaoromai tamau oia. Mǎrû maira to ˈna hepohepo e itoitohia ˈtura o ˈna. Ua parau oia: “Haamanaˈo ihora vau e no Iehova i faaruru ai au i teie tupuraa. Faaea ihora vau i te haapao noa ia ˈu.”
10. E nafea Iehova e riro ai ei Mato no tatou i teie nei?
10 I teie mau mahana i mua, e fifi rahi atu â ta tatou e faaruru. Mea faufaa ia turui atu â tatou i nia ia Iehova. I teie nei e haapuai ai i to tatou tiaturi e tauturu mai iho â o ˈna ia faaoromai tamau ma te taiva ore. E nafea? A taio i te mau faatiaraa Bibilia e te aamu o ta Iehova mau tavini i teie tau. A imi mea nafea to tatou Mato ra o Iehova i te faatupuraa i te mau huru maitatai no te turu i ta ˈna mau tavini. A feruriruri i tera mau faatiaraa. Mea na reira ïa Iehova e riro ai ei Mato no oe.
A FAATUPU I TO IEHOVA MAU HURU MAITATAI
11. No te aha e faatupu ai i to Iehova mau huru maitatai? (A hiˈo atoa i te tumu parau tarenihia “ Te tahi fa no te mau taeae apî.”)
11 No hiˈo mai nei tatou i to Iehova mau huru maitatai e riro ai oia ei Mato. E hiˈo mai ïa tatou i teie nei e nafea ia faatupu i taua mau huru maitatai ra. Ia tutava tatou i te na reira, e faaitoito ïa tatou i to tatou mau taeae e tuahine. Ua pii Iesu ia Simona i te iˈoa Kepha (oia hoi “Petero” ia hurihia), “e pǎpǎ” te auraa. (Ioa. 1:42) Te parau ra Iesu e riro Petero ei tamahanahanaraa no te mau mero o te amuiraa, a haapuai atu ai i to ratou faaroo. Ua faaauhia te mau matahiapo o te amuiraa i “te marumaru o te tahi mato rahi.” Te auraa, e paruru ratou i te amuiraa. (Isa. 32:2) E nehenehe tatou pauroa e faaitoito te tahi i te tahi ia faatupu tatou i to Iehova mau huru maitatai.—Eph. 5:1.
12. E nafea ia aupuru ia vetahi ê?
12 A aupuru i te mau taeae e tuahine. Ia ere anaˈe to tatou mau taeae e tuahine i to ratou fare no te ati natura aore ra no te tamaˈi, e nehenehe tatou e pûpû i to tatou nohoraa. A ino noa ˈtu ai te oraraa i “te mau mahana hopea,” mea rahi atu â ïa te ravea no te tauturu te tahi i te tahi. (Tim. 2, 3:1) E nehenehe atoa tatou e tamahanahana ia ratou e e faaite atu i te here. Hoê ravea, te farii-maitai-raa ïa ia ratou ia tae mai ratou i te Piha a te Basileia, a ite atu ai ratou i te here e te tamahanahanaraa. E ao ino, toˈetoˈe e te hepohepo ta tatou e ora nei. No reira, ia haere mai to tatou mau taeae e tuahine i te mau putuputuraa, e imi ïa tatou i te mau ravea atoa no te faaitoito ia ratou e no te faaite atu mea here na tatou ia ratou.
13. E nafea te mau matahiapo e aupuru ai ia vetahi ê? (A hiˈo atoa i te hohoˈa.)
13 E aupuru te mau matahiapo i te mau mero o te amuiraa o te faaruru nei i te fifi rahi e au i te vero. Ia tupu te ati natura aore ra ia titauhia te hoê rapaauraa ru, oioi te mau matahiapo i te hopoi atu i te tauturu i te pae tino, oia atoa i te pae varua. Eita te mau taeae e tuahine e taiâ i te tapiri atu i te hoê matahiapo, ua matauhia anaˈe o ˈna ei taeae mǎrû, aumauiui e tei ineine i te faaroo. Maoti teie mau huru maitatai e ite ai te mau taeae e tuahine e te tâuˈahia ra ratou. Mea ohie aˈe atoa ïa no ratou ia pee i te mau aratairaa Bibilia ta te hoê matahiapo e horoa ˈtu.—Tes. 1, 2:7, 8, 11.
E aupuru te mau matahiapo i te mau mero o te amuiraa o te faaruru nei i te fifi rahi e au i te vero (A hiˈo i te paratarafa 13) a
14. E nafea tatou e faaite ai e Kerisetiano tiaturihia tatou?
14 A faaite e Kerisetiano tiaturihia oe. E hinaaro tatou ia ite vetahi ê e nehenehe ratou e turui i nia ia tatou i te mau taime fifi. (Mas. 17:17) E nahea ïa tatou? E faaitoito anaˈe i te faatupu i te mau huru maitatai o Iehova i te mau mahana atoa, ma te tapea anei i ta tatou parau e ma te tae i te hora tei faataahia. (Mat. 5:37) Ma te horoa atoa i te tauturu hinaarohia. E ara atoa tatou i te rave faahope i ta tatou hopoia ia au i te mau aratairaa tei horoahia mai.
15. No te aha e haamaitairaa te mau matahiapo tiaturihia no te amuiraa?
15 E haamaitairaa te mau matahiapo tiaturihia no te amuiraa. Ia ite te mau taeae e tuahine e nehenehe ratou e niuniu i te mau matahiapo ia hinaaro anaˈe ratou i te tauturu, eita ïa ratou e taiâ. E ite ratou mea herehia ratou ua ineine anaˈe te mau matahiapo i te tauturu. E tiaturihia ˈtu â te mau matahiapo ia faaohipa ratou i te Bibilia e tei piahia e te tavini haapao maitai no te horoa i te aˈoraa. Oia atoa ia ore ratou e puhara i te oraraa o te mau taeae e tuahine e ia tapea ratou i ta ratou parau.
16. E nafea tatou e vetahi ê e faufaahia ˈi ia rave noa tatou i te mea tia?
16 A rave noa i te mea tia. E hiˈoraa maitai tatou no vetahi ê ia rave noa tatou i te mea tia e ia rave i te mau faaotiraa niuhia i nia i te mau faaueraa tumu Bibilia. Ia haapii tatou i te Parau a te Atua e ia haapuai i to tatou faaroo ia Iehova, e mau papu ïa tatou i roto i te parau mau. E ere tatou i te taata aau piti e te papu ore, o te pee hanoa i te mau haapiiraa hape e te huru feruriraa o teie nei ao. (Eph. 4:14; Iak. 1:6-8) Maoti to tatou faaroo ia Iehova e i ta ˈna i fafau e ore ai tatou e aueue i mua i te mau parau peapea. (Sal. 112:7, 8) E nehenehe atoa tatou e tauturu i to tatou mau taeae e tuahine i roto i te fifi.—Tes. 1, 3:2, 3.
17. E nafea te mau matahiapo e tauturu ai i te amuiraa ia rave noa i te mea tia?
17 Ei haerea au noa to te mau matahiapo, te manaˈo paari, te haerea afaro, e te feruriraa au noa. E tauturu ratou i te amuiraa ia rave noa i te mea tia e ia haapuai i to ratou faaroo ia Iehova, ma te ‘tapea maite i te parau mau.’ (Tito 1:9; Tim. 1, 3:1-3) Maoti to ratou hiˈoraa e tere faaitoitoraa e tauturu ai te mau matahiapo i te feia poro ia tamau i te haere i te mau putuputuraa, te pororaa e i te rave i ta ratou iho haapiiraa. Ia ahoaho te mau taeae e tuahine no to ratou mau fifi, e haamanaˈo te mau matahiapo ia ratou ia tiatonu ia Iehova e i ta ˈna i fafau.
18. No te aha tatou e arue ai ia Iehova, a piri roa ˈtu ai ia ˈna? (A hiˈo atoa i te tumu parau tarenihia “ Ia piri atu â ia Iehova.”)
18 I muri iho i te hiˈopoaraa i to Iehova mau huru maitatai, e nehenehe tatou e parau mai ia Davida: “Ia aruehia Iehova, to ˈu Mato.” (Sal. 144:1) E nehenehe noa tatou e turui i nia ia Iehova. I te roaraa o to tatou oraraa, i te ruhiruhiaraa atoa, ua papu ia tatou e tauturu noa mai iho â o ˈna ia piri noa tatou ia ˈna. E nehenehe mau â tatou e parau: “O ˈna to ˈu Mato.”—Sal. 92:14, 15.
HIMENE 150 A imi i te Atua ia ora oe
a FAATAARAA O TE HOHOˈA: I te Piha a te Basileia, aita te hoê tuahine e taiâ ra i te paraparau i na matahiapo.
