ЭСКЕРОН ПОННА 26-ТӤ СТАТЬЯ
8-ТӤ КЫРӞАН Иегова — утиськон интымы
Иегова тӥляд изгурезьды мед луоз
«Инмармы кадь юнматскон инты [«изгурезь», ВД] ӧвӧл» (1 ЭКС. 2:2).
МИ ТОДОМЫ
Малы Иегова изгурезен ӵошатӥське но малы со милемыз дышетэ.
1. Маин ӵошатӥз Давид Иеговаез? (2 Эксэйлыкъёслэн 22:47).
МИ УЛӤСЬКОМЫ туж секыт дыре. Малпамтэ шорысь кылдэм шуг-секытъёс улонмес чылкак воштыны быгато. Но ми огнамы ӧвӧл. Инмармы котьку милемын. Кызьы ми тодӥмы кылем статьяысь, Иегова — улэп Инмар, со котьку дась милемлы юрттыны. (Лыдӟе 2 Эксэйлыкъёслэсь 22:47.) Иеговаез улэп Инмарен нимамез бере ик Давид сое ӵошатӥз лултэм маин ке — изгурезен. Малы?
2. Мае ми эскеромы та статьяын?
2 Та статьяысь ми тодомы, малы Иегова ӵошатӥське изгурезен но мар вера та ӵошатон Иегова сярысь. Озьы ик ми тодомы, кызьы Инмар милям изгурезьмы луыны быгатэ. Со сяна, ми эскеромы, кызьы Иеговалэсь адӟем кареммы луэ.
МАЛЫ ИЕГОВА ИЗГУРЕЗЕН ӴОШАТӤСЬКЕ
3. Библиысь кыӵе кылбуръёсын Иегова изгурезен ӵошатӥське но малы? (Учке суредэз.)
3 Иеговаез данъякузы, тросэз ужась-тыршисьёсыз сое изгурезен, яке юнматскон интыен, ӵошатылӥзы. Малы? Со адӟыны юрттэ Инмарлэсь куд-ог паймымон сямъёссэ. Нырысетӥзэ Иегова «изгурезь» шуыса нимамын Кыкетӥ Законын 32:4. Мукет дыръя со выллем ӵошатонэз кутӥз Анна. Вӧсяськыкуз со вераз: «Инмармы кадь юнматскон инты ӧвӧл» (1 Экс. 2:2). Аввакум пророк Иеговалы вӧсяськиз таӵе кылъёсын: «Мынам изгурезе!» (Авв. 1:12). 72-тӥ псаломез гожъясь но Иегова сярысь вераз: «Сюлмылэн юнматскон интыез» (Пс. 72:26). Ачиз Иегова но ассэ «юнматскон интыен» нимаз (Ис. 44:8). Ойдолэ эскеромы Инмарлэсь куинь сямъёссэ, кудъёсыз валаны юртто, малы сое изгурезен ӵошатыны луэ. Озьы ик ми тодомы, мар милемлы кароно, Инмар милям юнматскон интымы мед луоз шуыса (Пс. 17:3).
Иегова аслаз ужась-тыршисьёсыз понна изгурезь выллем. (Учке 3-тӥ абзацез.)
4. Малы Иеговаез утиськон интыен ӵошатыны луэ? (Псалтирь 93:22).
4 Иегова — утиськон интымы. Изгурезь юрттыны быгатэ кужмо тӧллэсь ватӥськыны. Ӵапак озьы ик Иегова но уте милемыз шуг-секытъёс дыръя. (Лыдӟе Псалтирез 93:22.) Со милемлы юрттэ асэныз умой кусыпъёс возьыны но оскытэ, нокин но номыр милемлы тупатыны луонтэм изъян вайыны уз быгаты шуыса. Нош азьланяз Иегова быдтоз ваньзэ, мар милемлы курадӟонъёс вае (Иез. 34:25, 26).
5. Мар кароно, Иегова милям утиськон интымы мед луоз шуыса?
5 Мар кароно, Иегова милям утиськон интымы мед луоз шуыса? Со понна солы вӧсяськоно. Вӧсяськыкумы Иегова сётэ «Инмарлэсь каньыллыксэ», кудӥз сюлэммес но визьмес уте (Флп. 4:6, 7). Тани мар луиз Артём агаен, кудзэ Инмарлы оскемез понна арестовать каризы. Котькуд допрос азьын со туж сюлмаське вал, малы ке шуоно следователь ассэ соин лек возиз но кышкатыны турттӥз. Мар кариз Артём? Со тодаз вае: «Мон Иеговалы вӧсяськи, солэсь каньыллыксэ но визьлыксэ кури. Следовательлэн зӥбемез шоры учкытэк, мон быгатӥ каньыл сюлмын улыны. Иеговаен мыным номыр но кышкыт ӧй вал».
6. Малы ми быгатӥськомы котьку оскиськыны Иегова вылэ? (Исаия 26:3, 4).
6 Иегова — оскиськымон. Изгурезь котьку ас интыяз сылэ. Ӵапак озьы ик Иегова но котьку милемын артэ. Ми быгатӥськомы со вылэ оскиськыны, малы ке шуоно со «пумтэм-йылтэм дыръёслы юнматскон инты луэ». (Лыдӟе Исаиялэсь 26:3, 4.) Иегова котьку луоз. Озьыен, со котьку милесьтым вӧсяськонъёсмес кылзоз, милемлы юрттоз но сётэм кылъёссэ быдэстыны быгатоз. Эшшо одӥгез муг, малы Иегова вылэ оскиськыны луэ,— со оскымон аслаз ужась-тыршисьёсызлы (2 Экс. 22:26). Со ноку уз вунэты ӟеч ужъёсмес но милемыз бакель кароз (Евр. 6:10; 11:6).
7. Кыӵе пайда ваёз Иегова вылэ оскиськеммы? (Озьы ик учке суредэз.)
7 Иегова милям изгурезьмы мед луоз шуыса, со вылэ быдэсак оскиськоно. Ми тодӥськомы, Инмарлэн котькуд визь-кенешез милемлы пайда вае шуыса. Соин ик ми солэсь секыт дыръя но кылзӥськиськомы (Ис. 48:17, 18). Солэсь юрттэмзэ адӟыса, милям осконмы юнма. Нош та самой умой амал вуоно шуг-секытъёслы дасяськыны, кудъёссэ ми Иеговатэк ум чидалэ. Куке милемлы, Иегова сяна, нокин юрттыны уг быгаты, ми валаськомы, макем со оскиськымон. Тани мае тодаз вае Владимир агай дыр сярысь, куке со пытсэтын пукиз: «Со вакытэ Инмарен кусыпъёсы тужгес но юнэсь вал. Куке огнад кылиськод но номыре воштыны уд быгатӥськы, дышетскиськод эшшо но золгес Иегова вылэ оскиськыны».
Ми Иегова вылэ быдэсак оскиськимы ке, со милям изгурезьмы луоз. (Учке 7-тӥ абзацез.)
8. а) Малы эшшо Иеговаез изгурезен ӵошатыны луэ? б) Малы ми шумпотӥськомы, Инмар — милям утиськон но ватӥськон интымы шуыса? (Псалтирь 61:7, 8).
8 Иегова уг вошъяськы. Пуктэ син азяды бадӟым изгурезез. Дыр ортчемъя но, урод куазь дыръя но со уг вошъяськы. Ӵапак озьы ик Инмар но уг вошъяськы. Солэн сямъёсыз но кылдытэмъёсыз пумысен малпанэз уг воштӥськы (Мал. 3:6). Куке Едем садын Адам но Ева Иеговалы пумит султӥзы, Инмарлэн кылдытэмъёсыз пумысен малпанэз ӧз воштӥськы. Апостол Павел гожтӥз, Иегова «Аслаз сётэм сӥзёнэзлэсь... уг куштӥськы» шуыса (2 Тим. 2:13). Озьыен, мар гинэ медам луы, кызьы гинэ адямиос асьсэды медам возе, Иегова уг воштӥськы но аслаз малпанъёсызлэсь но эсэпъёсызлэсь уг куштӥськы. Та секыт дыръёсы ми быгатӥськомы быдэсак Иегова вылэ оскиськыса улыны. Со милям утиськон но ватӥськон интымы. (Лыдӟе Псалтирез 61:7, 8.)
9. Малы тӥледыз дышетэ Татьяналэн учырез?
9 Иегова милям изгурезьмы мед луоз шуыса, малпаськоно солэн сямъёсыз сярысь, озьы ик музъем но адямиос пумысен малпанэз сярысь. Та юрттоз милемлы каньыл сюлмын улыны но Инмарлы оскымон луыны (Пс. 15:8). Тае ас вылаз шӧдӥз Татьяна, кудӥзлы Инмарлы оскемез понна дорысьтыз потатэк улоно луиз. Со вера: «Мон воксё огнам кыли... Нырысь мыным секыт вал. Ӵем дыръя мон ӝожомыса улӥсько вал». Мар солы юрттӥз нош ик каньыл сюлмын улыны? Со малпаськыны кутскиз Иегова сярысь но адямиос пумысен малпанэз сярысь. Татьяна азьланьтэ: «Куке мон валай, малы сыӵе югдуре сюри, мыным капчигес вал тодам возьыны, мон Иегова понна курадӟисько шуыса. Та мыным юрттӥз асме жалямысь дугдыны».
10. Мар кароно али, Иегова милям изгурезьмы мед луоз шуыса?
10 Азьланяз милемыз туж секыт вакыт возьма. Милемлы эшшо но зол Инмар вылэ оскиськоно луоз. Али самой тупась дыр осконмес юнматыны, туж секыт дыръя но Иегова юрттоз шуыса солы оскымон кыльыны. Мар со понна кароно? Лыдӟе со сярысь, кызьы Инмар юрттӥз аслаз ужась-тыршисьёсызлы вашкала дыръя но кызьы со юрттэ туннэ. Малпаське, кызьы Инмар соос понна утиськон но ватӥськон инты луиз. Соку Иегова тӥляд но изгурезьды луоз.
ИЕГОВАЛЭСЬ АДӞЕМ КАРЕ
11. Мар пумысен ваньмылы Иеговалэсь адӟем кароно? (Озьы ик учке «Кыӵе ужпум пуктыны быгато егит агайёс» рамкаез.)
11 Ми тодӥмы, малы Иеговаез изгурезен ӵошатыны луэ. Нош али эскеромы, кызьы ми солэсь адӟем карыны быгатӥськомы. Солэсь адӟем карыса, ми быгатомы агайёсмес но сузэръёсмес юнматыны. Кылсярысь, Иисус Симонэз Кифа шуыса нимаз (грек кылын Пётр), кудӥз «из» шуэм луэ (Иоанн 1:42). Та возьматэ вал, Пётр агайёссэ но сузэръёссэ буйгатылоз но соослы юн осконэн улыны юрттоз шуыса. Библиын тӧроос «ӝужыт изгурезьлэн вужерез» шуыса нимасько, малы ке шуоно соос кенешез утё (Ис. 32:2). Веранэз ӧвӧл, тӧроослы гинэ ӧвӧл, ваньмылы тыршоно Иеговалэсь адӟем карыны но ог-огмылы юрттӥськыны (Еф. 5:1).
12. Мар милям кареммы луэ, агайёсмылы но сузэръёсмылы утиськон инты луон понна?
12 Утиськон инты луэ. Инкуазь шимучыръёс, бугыръяськонъёс яке ожмаськонъёс дыръя агайёслы но сузэръёслы улон интыоссэс кельтоно луэ. Соку ми быгатӥськомы соосты ас дорамы ӧтьыны — милям улон интымы соос понна ватӥськон инты луоз. Та берпум дыре югдур уродгес но уродгес луэ (2 Тим. 3:1). Соин ик ог-огмылы юрттӥськыны эшшо но ӵем кулэ луоз. Озьы ик ми быгатӥськомы агайёсмес но сузэръёсмес буйгатыны но соослы яратэммес возьматыны. Кызьы? Кылсярысь, тыршоно, пумиськонъёсамы лыктыса, агайёс но сузэръёс мед шӧдозы, татын соосты возьмало но соослы шумпото шуыса. Та дуннеын адямиос асьсэды ог-огенызы чурыт возё. Нош милям потэ, пумиськонъёсамы лыктыса, агайёс но сузэръёс юнматскыны но буйгатскыны мед быгатозы шуыса.
13. Кызьы тӧроос агайёслы но сузэръёслы утиськон инты луыны быгато? (Озьы ик учке суредэз.)
13 Тӧроос шуг-секытъёс дыръя агайёс но сузэръёс понна утиськон инты луыны быгато. Куке инкуазь шимучыръёс луо яке кинлы ке ӝог эмъюрттэт кулэ, тӧроос ӝегатскытэк юрттыны тыршо. Озьы ик соос, Библиез кутыса, буйгато но юнмато. Милемлы капчигес тӧролы вазиськыны, ми тодӥськомы ке, со милемыз сак кылзоз, валаны тыршоз но милемын лякытэн вераськоз шуыса. Куке ми шӧдӥськомы, тӧроос милемыз ярато шуыса, милемлы капчигес соослэсь кылзӥськыны (1 Фес. 2:7, 8, 11).
Шуг-секытъёс дыръя тӧроос агайёслы но сузэръёслы утиськон инты луыны быгато. (Учке 13-тӥ абзацез.) a
14. Мар кароно, оскиськымон адями луон понна?
14 Оскиськымонэсь улэ. Милям потэ, мукетъёсыз ми вылэ оскиськыны мед быгатозы шуыса, тужгес но секыт дыръя (Мад. 17:17). Мар со понна кароно? Котьку но христиан сямъёсты возьматоно. Кылсярысь, сётэм кылмес быдэстоно но ваньзэ дырыз дыръя лэсьтоно (Матф. 5:37). Озьы ик куке кинлы ке юрттэт кулэ, юрттӥськыны тыршоно. Нош милемлы кыӵе ке уж сётэмын ке, сое кивалтэтъя быдэстоно.
15. Мар понна кенеш дунъя оскиськымон тӧроосты?
15 Оскиськымон тӧроос — кенеш понна зэмос кузьым. Малы озьы вераны луэ? Куке ми тодӥськомы, кулэ дыръяз тӧролы вазиськыны быгатӥськомы шуыса, ми сокем ум сюлмаськиське ини. Озьы ик куке ми адӟиськомы, тӧро юрттыны тырше шуыса, ми шӧдӥськомы, милемыз ярато шуыса. Нош куке тӧроос, визь-кенеш сётыкузы, асьсэлэсь малпанъёссэс уг верало, нош Библия но публикациосмы вылэ пыкисько, милемлы капчигес соослы оскыны. Со сяна, ми дунъяськомы тӧроосмес, соос мукетъёсызлы вераны лэзьымтэ информациез нокинлы уг верало но сётэм кылзэс быдэсто шуыса.
16. Кыӵе пайда вае милемлы но мукетъёсызлы Иеговалы оскымон луэммы?
16 Иеговалы оскымонэсь луэ. Куке ми Иеговалэсь кылзӥськиськомы но ужпумъёс кутӥськомы, солэн Кылыз вылэ пыкиськыса, ми мукетъёсызлы умой адӟем карон возьматӥськомы. Библиез эскерыса но Иеговалы осконмес юнматыса, ми азьланяз но солэсь кылзӥськыса уломы. Ми валаломы, та дуннелэн кыӵе дышетонъёсыз Иеговалы пумит мыно, но соослы ум оске (Иак. 1:6—8; Еф. 4:14). Ми Иеговалы но солэн кылсётонъёсызлы оскиськомы ке, соку, урод иворъёсты кылыса, ум куалектэ (Пс. 111:7, 8). Озьы ик ми быгатомы юнматыны соосты, кинъёс шуг-секытъёсын пумиськизы (1 Фес. 3:2, 3).
17. Кызьы тӧроос кенешез юнмато?
17 Иегова возьма, тӧроос асьсэды кутыны мед быгатозы, визьмын мед улозы но валасесь мед луозы шуыса. Инмарлэн «шонер дышетонэз вылэ пыкиськыса», соос кенешез юнматыны но буйгатыны быгато (Тит. 1:9; 1 Тим. 3:1—3). Сюлмаськись тӧроос агайёслы но сузэръёслы тодазы вайыто, макем кулэ пумиськонъёсы ветлыны, тодытон уже пыриськыны но ас поннад Библиез эскерыны. Та пумысен соос асьсэос но адӟем карон возьмато. Нош куке агайёс но сузэръёс шуг-секытъёсын пумиськыло, тӧроос соослы юртто Иегова вылэ оскиськыса но солэн кылсётонъёсыз сярысь малпаськыса улыны.
18. Мар милесьтым мылкыдмес ӝутэ Иеговаез данъяны но соин кусыпъёсмес юнматыны? (Озьы ик учке «Иеговаен кусыпъёстэс юнматэ» рамкаез.)
18 Иеговалэсь паймымон сямъёссэ эскерыса, Давид сямен, ми но вераны быгатӥськомы: «Данлыко Кузё-Инмар, юнматскон интые» (Пс. 143:1). Ми котьку быгатомы Иегова вылэ оскиськыны. Вань улытозямы со милемын артэ луоз. Кӧня гинэ арес милемлы медам луы, ми вераны быгатомы: «Со — мынам юнматскон интые» (Пс. 91:15, 16).
150-ТӤ КЫРӞАН Утча Иеговаез, утиськон вылысь
a СУРЕДЫН. Эксэйлык юртын сузэр тӧроослы аслаз сюлмаськонъёсыз сярысь вера.
