1. Vwo nene obo re si phiyọ Une rẹ Ejiro 18:​46, die yen Devid reyọ Jihova vwo dje?

 AVWANRE yerẹn vwẹ akpọ rẹ ebẹnbẹn re rhẹro rọyeen de se gbowọphiyọ akpeyeren rẹ avwanre yẹrẹ wene karekare. Mavọ yen ọ vwerhoma te ra vwọ riẹn nẹ e se bru Jihova ra vwọ kẹ ukẹcha! Vwẹ uyono rọ wanre na, a karophiyọ avwanre nẹ Jihova ọyen Ọghẹnẹ rọ herọ yerẹn nẹ o muegbe rọ vwọ cha avwanre uko ọkieje. Siẹrẹ a da mrẹ obo rọ vwẹ ukẹcha kẹ avwanre wan, ọnana kẹ avwanre imuẹro nẹ “Ọrovwohwo herọ!” (Se Une rẹ Ejiro 18:46.) Ẹkẹvuọvo, Devid vwọ ta ota rọhẹ obenu na nu, o de se Ọghẹnẹ “Oragha mẹ.” Diesorọ ọ vwọ vwẹ Jihova Ọghẹnẹ rọ herọ na vwo dje oragha rọ dia orọnvwọn ro vwo arhọọ?

2. Die yen avwanre se yono mie Devid rọ vwọ tanẹ Jihova yen “Oragha mẹ”?

² Vwẹ uyono nana, e che yono kpahen oboresorọ ra vwọ vwẹ Jihova vwo dje oragha kugbe oborẹ idjedje yena yono avwanre kpahọn. E ji che yono kpahen oborẹ avwanre sa vwọ reyọ vwo ru Oragha rẹ avwanre. Ukuotọ rọyen, ka cha ta ota kpahen idjerhe sansan ra sa vwọ vwẹrokere iruemu ri Jihova re pha kerẹ oragha na.

OBORESORỌ JIHOVA VWỌ DIA ORAGHA

3. Idjerhe sansan vọ yen Baibol na vwọ reyọ “oragha” vwo ruiruo? (Ni uhoho rọhẹ ọbe na.)

³ Vwẹ Baibol na, a reyọ Jihova vwo dje “oragha” rere avwanre se vwo vwo ẹruọ rẹ iruemu rọyen. Ọkieje yen idibo rọyen vwo djisẹ rọyen kerẹ Oragha siẹrẹ ayen de jiro fikirẹ iruemu iyoyovwin rọyen. Vwẹ Urhi Rivẹ 32:4 yen e de ke se Jihova  “Oragha na.” Hanah tare vwẹ ẹrhovwo nẹ “o vwo oragha ọfa kerẹ Ọghẹnẹ rẹ avwanre na-a.” (1Sa 2:2) Habakọk se Jihova “Oragha mẹ.” (Hab 1:12) Ohwo rọ so Une rẹ Ejiro 73 de rhe se Ọghẹnẹ “[oragha] rẹ udu mẹ.” (Un 73:26) Jihova komobọ je reyọ oma rọyen vwo dje oragha. (Aiz 44:8) E jẹ a ta ota kpahen iruemu erha re nẹrhẹ a vwẹ Jihova vwo dje oragha kugbe oborẹ a sa vwọ reyọ vwo ru “Oragha avwanre.”​​—Urh 32:31.

4. Idjerhe vọ yen Jihova vwo dia odjahọn? (Une rẹ Ejiro 94:22)

⁴ Jihova ọyen odjahọn mẹ. Kirobo rẹ oragha rode sa sẹro rẹ ohwo vrabọ rẹ ogiribo ye, ọtiọyen Jihova je cha avwanre uko siẹrẹ e de hirharokuẹ ẹdia egangan vwẹ akpeyeren. (Se Une rẹ Ejiro 94:22.) Ọ vwẹ ukẹcha kẹ avwanre ji sẹro rẹ oyerinkugbe rẹ a vẹ ọyen vwori rere emu vuọvo vwo je gbowọphiyọ. O ji ve nẹ o che si kemu kemu ro se gbowọphiyọ ufuoma vẹ ofuvwegbe avwanre no.​​—Izi 34:​25, 26.

5. Idjerhe vọ yen Jihova sa vwọ dia Odjahọn kẹ avwanre kerẹ oragha?

⁵ Idjerhe ọvo a vwọ vwẹ Jihova vwo ruẹ Odjahọn avwanre kerẹ oragha yen a vwọ nẹrhovwo rhe. Ọke avwanre da nẹrhovwo, kọ kẹ avwanre “ufuoma rẹ Ọghẹnẹ” rọ sẹro rẹ ubiudu vẹ ẹwẹn avwanre. (Fil 4:​6, 7) Roro kpahen obo re phia kẹ oniọvo ọshare ọvo re se Artem, re mu phiyọ uwodi fikirẹ esegbuyota rọyen. Abọ buebun yen ohwo rọ guọnọ otọ rẹ obo re phiare na nọ rọ enọ, o gboja kẹ je djuguegue muo. Artem da ta: “Kọke kọke yen udu vwo bru uvwe siẹrẹ a da cha nọ vwẹ enọ. . . . Ọkieje kọyen me vwọ nẹrhovwo rhe Jihova. Me rẹ Jihova nẹ ọ kẹ vwẹ aghwanre kugbe ẹwẹn re dọe. Ona rẹ ohwo rọ guọnọ otọ rẹ obo re phiare na hwori wian kẹ vwẹẹ. . . . Womarẹ ukẹcha ri Jihova kọ ghwa họhọ nẹ mi mudia obuko rẹ oragha ọvo.”

6. Diesorọ a sa vwọ vwẹroso Jihova ọkieje? (Aizaya 26:​3, 4)

⁶ Jihova ohwo ra sa vwẹrosua. Kerẹ oragha re se ghwiee, Jihova choma ọkieje rọ vwọ cha avwanre uko. Avwanre sa vwẹrosuọ kidie ọyen “Oragha ri bẹdẹ na.” (Se Aizaya 26:​3, 4.) Ọkieje yen ọ cha vwọ dia ro vwo ru ive rọyen gba, nyo ẹrhovwo avwanre, je kẹ avwanre ukẹcha rẹ avwanre guọnọre. Avwanre je sa vwẹroso Jihova kidie ọ fuevun kẹ ihwo re vwẹ ẹga kẹ. (2Sa 22:26) Obo rẹ avwanre ru kẹ cha sa chọrọ ẹroo, ọkieje yẹn ọ cha vwọ hwosa kẹ avwanre.​​—Hib 6:10; 11:6.

7. Erere vọ yen te avwanre obọ siẹrẹ a da vwẹroso Jihova? (Ni uhoho na.)

⁷ Avwanre vwẹ Jihova vwo ruẹ Odjahọn rẹ avwanre siẹrẹ a da vwẹrosuọ karekare. O mu avwanre ẹro nẹ e de nyẹme rọyen vwẹ ọke rẹ ebẹnbẹn dede, o che fi erere kẹ avwanre. (Aiz 48:​17, 18) Avwanre da mrẹ obo rọ cha avwanre uko wan, ẹroẹvwọsuọ avwanre kpahọn kọ cha ganphiyọ. Ọtiọyena ke se hirharoku edavwini vẹ imuẹro nẹ Jihova cha cha avwanre uko. Ọke buebun a dahẹ ẹdia re niri nẹ o vwo ohwo ra sa djẹ bru raa, ọnana nẹrhẹ a riẹn nẹ Jihova ọvo ọyen ohwo ra sa  vwẹroso. Vladimir da ta: “Ọke re me vwọ hẹ uwodi yen oyerinkugbe mẹ vẹ Ọghẹnẹ ma vwọ kpẹkpẹ, me da rhe vwẹroso Jihova vrẹ obo ri jovwo kidie mẹvwẹ ọvo yen herọ mi che se ru emu vuọvo kpahen ẹdia naa.”

8. (a) Diesorọ avwanre sa vwọ tanẹ Jihova wenee? (b) Erere vọ yen che te avwanre obọ kidie nẹ Ọghẹnẹ yen Oragha avwanre? (Une rẹ Ejiro 62:​6, 7)

⁸ Jihova wenee. Kerẹ oragha rọ pha rhuaro, Jihova wenee o ji yeghee. Uruemu kugbe ọhọre rọyen wenee. (Mal 3:6) Re vwo gbevwọsuọ vwẹ Idẹn nu, ọhọre ri Jihova vwọ kẹ ihworakpọ wenerii. Ọyinkọn Pọl siri nẹ, Jihova “cha sa sen oma rọye-en.” (2Ti 2:13) Ọnana mudiaphiyọ nẹ o toro obo re phiare yẹrẹ oborẹ ihwo efa ruruu, Jihova che wene iruemu, ọhọre yẹrẹ iwan rọyeen. Vẹ imuẹro nẹ Ọghẹnẹ rẹ avwanre wenee, ka sa vwẹrosuọ nẹ ọ cha cha avwanre uko vwẹ ọke rẹ ebẹnbẹn ji ru ive rọyen kpahen obaro na gba.​​—Se Une rẹ Ejiro 62:​6, 7.

9. Die yen wo yono vwo nẹ obo re phia kẹ Tatyana?

⁹ Avwanre vwẹ Jihova vwo ruẹ Oragha avwanre siẹrẹ e de roro kokodo kpahen oka rẹ ohwo rọ hepha kugbe ọhọre rọyen vwọ kẹ ihworakpọ. E de ru ọtiọyen, ẹwẹn rẹ avwanre ko che totọ ka je sa fuevun kẹ siẹrẹ a dahẹ edavwini. (Un 16:8) Ọnana yen obo re phia kẹ oniọvo aye re se Tatyana rọhẹ uwodi vwẹ uwevwin rẹ obọ rọyen fikirẹ esegbuyota rọyen. Ọ da ta: “Kọ ghwa họhọ nẹ mẹvwẹ ọvo yen herọ, ọ lọhọ kẹ vwẹ ẹsosuọọ. Ọkieje yen ofu vwo dje vwe.” Ẹkẹvuọvo, ọke ro rhi vwo roro kpahen oborẹ ọdavwini rọyen na vwo churobọ si ọhọre ri Jihova, ọnana da nẹrhẹ o se chirakon rẹ ebẹnbẹn rọyen ji vwo ẹwẹn ri dọe. Ọ tare nẹ: “Mi rhi vwo vwo ẹruọ rẹ oboresorọ erọnvwọn nana vwọ phia, ke me rhe karophiyọ nẹ fikirẹ Jihova yen me vwọ mrẹ oma mẹ vwẹ ẹdia nana. Ọnana cha vwẹ uko vwọ dobọ rẹ ẹnwan mẹ ji.”

10. Mavọ yen Jihova sa vwọ dia Oragha avwanre enẹna?

¹⁰ Vwẹ ọke re cha vwẹ obaro na, avwanre che hirharoku edavwini rọ cha nẹrhẹ a vwẹroso Jihova vrẹ obo ri jovwo. Ọnana yen ọke ro fori re vwo ru ẹroẹvwọsuọ avwanre kpahen Jihova ganphiyọ nẹ Jihova cha kẹ avwanre kemu kemu ra guọnọre a sa vwọ fuevun chirakon. Idjerhe vọ yen e se vwo ru ọtiọyen? Se kpahen ikuegbe ri Baibol sansan kugbe obo re phia kẹ iniọvo avwanre rẹ ọke nana. Vwo oniso rẹ oborẹ Ọghẹnẹ vwo dje iruemu rọyen re pha kerẹ oragha na phia vwo bicha idibo rọyen. Roro kokodo kpahen ikuegbe yena. Wo de ru ọtiọyen, ọ cha nẹrhẹ wọ vwẹ Jihova vwo ru Oragha wẹn.

VWẸROKERE IRUEMU RI JIHOVA RE PHA KERẸ ORAGHA NA

11. Diesorọ avwanre vwọ vwẹrokere iruemu ri Jihova? (Ni ekpeti na “ Oborẹ Ighene re Dia Eshare sa Vwọ Tua.”)

¹¹ A ta ota kpahen iruemu ri Jihova re nẹrhẹ ọ pha kerẹ oragha re. Enẹna e gbe jẹ a ta ota kpahen obo ra sa vwọ vwẹrokere iruemu rọyen. E de ru ọtiọyen, ka sa bọn ukoko na gan. Kerẹ udje, Jesu yen mu odẹ na Sifas vwọ  kẹ Saimọn (ra fan phiyọ “Pita”), ro mudiaphiyọ “Ubro rẹ Oragha.” (Jọ 1:42) Ọnana djerephia nẹ ọ cha dia uvi rẹ uchebro vẹ ọbọngan vwọ kẹ ukoko na. A reyọ ekpako rẹ ukoko vwo dje “uhoho rẹ oragha rode.” Ọnana ghwe dje oborẹ ayen vwẹrote iniọvo rẹ ukoko na. (Aiz 32:2) Vworẹ uyota a da vwẹrokere iruemu ri Jihova, ihwo eje yen mrẹ erere.​​—Ẹf 5:1.

12. Mavọ yen avwanre sa vwọ dia odjahọn vwọ kẹ ihwo efa ọke rẹ ebẹnbẹn?

¹² Dia odjahọn. Ọkievo, avwanre sa vwẹ ukẹcha vwọ kẹ iniọvo avwanre siẹrẹ oghwọrọ ri kpregede, ozighi yẹrẹ ofovwin da vwomaphia. Akpeyeren vwọ ganphiyọ vwẹ “ẹdẹ re koba na,” aphro herọọ nẹ avwanre cha vwẹ ukẹcha kẹ ohwohwo vrẹ obori jovwo. (2Ti 3:1) Avwanre ji se bicha iniọvo avwanre ji djephia nẹ e vwo ẹguọnọ rayen. Idjerhe avwanre se vwo ru ọtiọyen yen a vwo nabọ dede ayen sasasa siẹrẹ ayen da rhe Ọguan Ruvie, e de ru ọtiọyen o che toroba ufuoma rọhẹ ukoko na. Avwanre yerẹn vwẹ akpọ rẹ ihwo de sianro, ọnana kọ nẹrhẹ ofu dje ihwo ji no nẹ e vwo ẹguọnọ rayeen. Ọtiọyena, ọke rẹ iniọvo avwanre da rhe uyono, ofori nẹ avwanre ru oborẹ avwanre se ru eje rere ẹwẹn rayen se vwo totọ, sasa ayen oma ji djephia nẹ e vwo ẹguọnọ rayen.

13. Mavọ yen ekpako sa vwọ vwẹ ukẹcha kẹ ihwo efa siẹrẹ ayen dahẹ ẹdia rẹ ebẹnbẹn? (Ni uhoho na.)

¹³ Ekpako je sa vwẹ ukẹcha phia kẹ iniọvo rẹ ukoko na ri chirakon rẹ ebẹnbẹn re vwo dje ogiribo. Ekpako jowọ rẹ ayen vwọ vwẹ ukẹcha phia siẹrẹ oghwọrọ ri kpregede yẹrẹ omaesivwon okpakpa da vwomaphia. Ayen je vwẹ uchebro vẹ ọbọngan ro nẹ Baibol rhe vwọphia. Iniọvo de noso nẹ ọkpako ọyen ohwo rọ ta ota bọrọbọrọ, dje erorokẹ phia, je kerhọ rayen, ọ rha bẹn ayen vwo bro raa. Iruemu nana nẹrhẹ ihwo efa no nẹ e vwo ẹguọnọ rayen; ọtiọyena, ọ rha bẹn ayen vwọ  reyọ odjekẹ ro nẹ Baibol rhe rẹ ọkpako vwọ kẹ ayen vwo ruiruoo.​​—1Tẹ 2:​7, 8, 11.

14. Mavọ yen avwanre se vwo djephia nẹ avwanre ihwo ra sa vwẹrosua?

¹⁴ Dia ohwo ra sa vwẹrosua. Avwanre guọnọ dia ihwo rẹ ihwo efa sa vwẹroso, ma rho ọke rẹ ayen dahẹ ebẹnbẹn. (Isẹ 17:17) Die yen e se ru a sa vwọ vwẹroso avwanre? Avwanre sa davwẹngba vwo dje iruemu rẹ Onenikristi phia ọkieje, womarẹ e vwo ruẹ nene obo re veri je yanmuo. (Mt 5:37) Avwanre je sa vwẹ ukẹcha phia siẹrẹ a da guọnọ ukẹcha rẹ avwanre. Vwọba, ofori nẹ a davwẹngba vwo ruiruo ra vwọ kẹ avwanre re, vwo nene odjekẹ ra vwọ kẹ avwanre.

15. Erere vọ yen ukoko na mrẹ siẹrẹ ekpako na da dia ihwo ra sa vwẹrosua?

¹⁵ Ekpako ra sa vwẹrosua ayen ebruphiyọ vwọ kẹ ukoko na. Vwẹ idjerhe vọ? Iniọvo na da riẹn nẹ ayen se se ekpako na siẹrẹ ayen da guọnọ ukẹcha, kerẹ oniruo rọ vwẹrote ẹko rẹ iruo rẹ aghwoghwo rayen, ayen rha ro ẹnwaan. Iniọvo na je mrẹvughe nẹ e vwo ẹguọnọ rayen siẹrẹ ayen da riẹn nẹ ekpako na  vwo owenvwe rẹ ayen vwọ vwẹ ukẹcha kẹ ayen. Ekpako na da vwẹ uchebro ro nẹ Baibol rhe kugbe ẹbe rẹ ukoko na vwọphia ukperẹ iroro romobọ rayen, iniọvo na ke sa vwẹroso ayen. Iniọvo na je vwẹrosua ọkpako rẹ ayen riẹnre nẹ o se rhurhu eta rẹ odjahọn ro ji ruẹ nene obo ro veri.

16. Siẹrẹ avwanre rha dia ihwo ri wenee, erere vọ yen avwanre vẹ ihwo efa sa mrẹ?

¹⁶ Wo wenee. Siẹrẹ avwanre de mu erhiẹn rẹ avwanre kpahen odjekẹ ri Baibol na ji ru obo ri fori, avwanre sa dia omamọ rẹ udje vwọ kẹ ihwo efa. Erianriẹn ọgbagba rẹ avwanre vwori vẹ esegbuyota rẹ avwanre vwọ ganphiyọ ye, owọ rẹ avwanre kọ cha rhe ghwotọphiyọ vwẹ uyota na. Kidie nẹ avwanre dia ihwo ri vwo ẹwẹn ivivẹ yẹrẹ ihwo ri phieghee, kọ lọhọ kẹ avwanre ra sa vwọ mrẹ iyono efian vẹ iroro rẹ akpọ na vughe, i rhe muẹ avwanre rọọ. (Ẹf 4:14; Jem 1:​6-8) Esegbuyota rẹ avwanre kpahen Jihova kugbe ive rọyen nẹrhẹ e vwo ẹwẹn ri dọe ọke re de nyo erharhe iyẹnrẹn. (Un 112:​7, 8) Ọnana kọ nẹrhẹ avwanre vwẹ ukẹcha kẹ ihwo efa ri ji hirharokuẹ edavwini.​​—1Tẹ 3:​2, 3.   

17. Die yen sa nẹrhẹ ekpako dia omamọ rẹ udje?

¹⁷ Ofori nẹ ekpako dia ihwo ri ruẹ emu vrẹkaa, ri vwo iroro ro fiotọ, ihwo re nuẹ, ri ji nene ọrhuẹrẹphiyotọ. Eshare nana, eyen uvi rẹ udje vwọ kẹ ihwo efa re je vwẹ ọbọngan vwọ kẹ ukoko na kidie ayen “nabọ yọnrọn ota rẹ uyota na.” (Tai 1:9; 1Ti 3:​1-3) Womarẹ iniọvo na rẹ ayen kọn brẹ ra kugbe udje rayen, ekpako na ke sa vwẹ ukẹcha kẹ iniọvo na vwo kpo uyono ọkieje, kpo aghwoghwo, ji ruẹ uyono romobọ. Siẹrẹ iniọvo na de vwo ebẹnbẹn rọ nẹrhẹ ayen ro ẹnwan, ekpako na se ru asan rẹ ẹgba rayen muru vwọ vwẹ uchebro kẹ iniọvo na nẹ ayen vwẹroso Jihova je tẹnrovi ive rọyen.

18. Diesorọ avwanre vwọ guọnọ jiri Jihova ji sikẹrẹ phiyọ? (Ni ekpeti na “ Idjerhe Ọvo re se Vwo Sikẹrẹ Jihova Phiyọ.”)

¹⁸ Ra vwọ ta ota kpahen iruemu iyoyovwin ri Jihova re na, ka sa vwẹrokere Ovie Devid rọ tare nẹ: “Ebruphihọ kẹ Ọrovwohwo, Oragha mẹ.” (Un 144:1) O vwo ọke vuọvo ri Jihova che vwo jẹ Ọghẹnẹ avwanre sa vwẹroso ẹdiaa. Vwẹ akpeyeren avwanre eje tobọ te ọke rẹ ọghwo dede, o vwo oboresorọ a vwọ tanẹ: “Ọye Oragha mẹ” vẹ imuẹro nẹ ọkieje yen ọ cha vwọ vwẹ ukẹcha kẹ avwanre.​​—Un 92:​14, 15.