1. Mazamure 18:46n Daawiti Yihoowa woygidee?

 ISSI issitoo nuuni waayettanaadan woy nu deˈoy muleera laamettanaadan oottiya metoy qoppennan nuna gakkana danddayees. Yihooway nuna maaddiyo gishshawu nuuni A keehi galatoos! Yihooway deˈo Xoossaa gidiyogaanne I nuna maaddanawu ubbatoo giigi uttidoogaa kasetiya huuphe yohuwan beˈida. I nuna maadiyogaa nu deˈuwan beˈiyogee ‘Yihooway deˈiyogaa’ nu ammanettanaadan oottees. (Mazamure 18:46 nabbaba.) Shin Daawiti he qofaa yooti simmidi sohuwara Xoossaa, ‘Ta wogga Zaalla’ yaagiis. Daawiti deˈo Xoossaa Yihoowa, deˈoy baynna zaallan leemisidoy aybissee?

2. Nuuni ha huuphe yohuwan ay beˈanee?

² Yihooway zaalla mala gididoy aybissakko, qassi hegee abaa nuna ay tamaarissiyakko ha huuphe yohuwan beˈana. Qassi nu Zaalla gidida Yihoowan waani ammanettana danddayiyakko beˈana. Wurssettan, Yihoowagaa mala eeshshaa bessanawu nuuni waatana danddayiyakko beˈana.

YIHOOWAY ZAALLA GEETETTIDOY AYBISSEE?

3. Geeshsha Maxaafay darotoo “zaallaa” giya qaalaa goˈettiyoy ay qonccissanaassee? (Misiliya xeella.)

³ Geeshsha Maxaafay Yihoowa eeshshatuppe amaridaageeta nuuni akeekanaadan maaddanawu Yihoowa ‘zaallan’ leemisees. Darotoo Yihoowa ashkkarati maalaalissiya A eeshshata sabbido wode zaallan A leemisidoogaa Geeshsha Maxaafay yootees. Zaarettido Wogaa 32:4y Yihooway ‘Zaalla’ geetettido koyro soho. Haanna woossido woosan, “Nu Xoossaappe attin, hara attiyo wogga Zaalli baawa” yaagaasu. (1 Sam. 2:2) Imbbaqoomi Yihooway ta “Zaalla” yaagiis. (Imb. 1:12) Ubba qassi Yihooway bana zaallan leemisiis.  (Isi. 44:8) Yihooway zaalla mala gidido heezzu eeshshatanne I ‘nu Zaallaa’ gidanaadan nuuni oottana danddayiyobata ane beˈoos.—Maz. 95:1.

4. Yihooway baqati attiyosa gidiyoy ayba ogiyanee? (Mazamure 94:22)

⁴ Yihooway baqati attiyosa. Wolqqaama uushuwa wode issi uri gonggoluwan gelidi attana danddayees. Hegaadankka, waayissiyabay nuna gakkiyo wode Yihooway nuna naagees. (Mazamure 94:22.) Nuuni aara dabbotido dabbotay moorettennaadan maaddeesinne merinawu nuna qohana danddayiyabaappe naagees. Qassi nuna unˈˈissiyabaa woy waayissiyabaa sinttappe muleera xayssanawu I qaalaa geliis.—Hiz. 34:25, 26.

5. Yihooway nuussi baqati attiyo zaalla mala gidanaadan waatana danddayiyoo?

⁵ Nuuni nu metuwappe Yihoowakko baqatana danddayiyo issi ogee woossiyogaa. Nuuni woossiyo wode Yihooway ‘Xoossaa sarotettaa’ nuussi immiyogan nu wozanaanne nu qofaa naagees. (Pili. 4:6, 7) Ba ammanuwa gaasuwan qashettida, Arttema giyo ishaa hanotaa ane beˈa. I qashuwan deˈiyo wode qoridi oychchiya polisee A darotoo qoriis, qohiisinne yashissiis. Arttemi hagaadan giis: “Qoridi oychchiya polisee tana qorido wode ubban taani keehi unˈˈettaas. . . . Taani ubbatoo Yihoowa woossaas. Taani woppu gaanaadaaninne akeekanchcha gidanaadan A woossaas. Hegaadan naaqqishinkka taani woppu gaas. . . . Yihooway maaddin hegee taani zaallan geemettidoogaa mala.”

6. Nuuni ubbatoo Yihoowan ammanettana danddayiyoy aybissee? (Isiyaasa 26:3, 4)

⁶ Yihooway ammanettiyagaa. Qaaxxenna zaallaadan, Yihooway ubbatoo nu miyyiyan deˈees. I “merinaa Zaallaa” gidiyo gishshawu nuuni an ammanettoos. (Isiyaasa 26:3, 4 nabbaba.) I gelido qaalaa ubbatoo naagees, nu woosaa siyees, qassi koshshiyo wode nuna maaddees. Nuuni Yihoowan ammanettana danddayoos, ayssi giikko I bawu haggaaziyageetussi ammanettees. (2 Sam. 22:26) I nuuni oottidobaa mule dogenna, qassi ubbatoo nuna woytana.—Ibr. 6:10; 11:6.

7. Nuuni Yihoowan ammanettiyo wode nu deˈuwan ay akeekiyoo? (Misiliyakka xeella.)

⁷ Nuuni Yihoowan loytti ammanettiyo wode I nu Zaallaa gidees. Metiya wodiyankka awu azazettiyogan an ammanettikko, nuuni goˈettoos. (Isi. 48:17, 18) Yihooway nuna maaddiyogaa nuuni nu deˈuwan beˈiyo wode kaseegaappe aaruwan an ammanettoos. Nuna gakkiya ay metuwakka genccanaadan nuna maaddana danddayiyay Yihoowa xalaala gidiyogaa ammanettoos. Darotoo ooninne nuna maaddana danddayenna hanotan nuuni deˈiyo wode, ubbatoo Yihoowan ammanettana danddayiyogaa akeekoos. Viladmiri hagaadan giis: “Taani qashuwan deˈiyo wode kaseegaappe aaruwan Yihoowakko shiiqidabadan tawu siyettees. Taani tarkka deˈiyo gishshawunne genccanaadan tana maaddana danddayiyay Yihoowa xalaala gidiyo gishshawu, taani an loytta ammanettaas.”

8. (a) Nuuni Yihooway laamettenna giyoy aybissee? (b) Xoossay nu Zaalla gidiyogan waani goˈettiyoo? (Mazamure 62:6, 7)

 ⁸ Yihooway laamettenna. Wogga zaallaadan woy deriyadan Yihooway ba sohuwappe qaaxxenna. A eeshshaynne halchchoy mule laamettenna. (Mil. 3:6) Addaamenne Hewana Yihoowa bolli makkalido wode I asawu halchchidobaa laammibeenna. Kiitettida Phawuloosi yootidoogaadan Yihooway “bana ba huuphen erikke gaanau danddayenna.” (2 Xim. 2:13) Hegaa giyogee aybi hanikkokka, woy harati ay oottikkokka, Yihooway ba eeshshaa, ba halchchuwa woy ba kessido maaraa mule laammenna giyogaa. Yihooway laamettenna gishshawu meto wodiyan nuna maaddanaagaanne sinttappe ehaanawu gelido qaalaa polanaagaa nuuni eroos.—Mazamure 62:6, 7 nabbaba.

9. Tatiyanippe ay tamaaray?

⁹ Yihoowa eeshshatanne I saˈawunne asawu halchchidobata nuuni wotti dentti qoppiyogee nu Zaalla gidida Yihoowan ammanettanaadan maaddana danddayees. Yaatiyogee nuuni waayissiya wodiyan woppu gaanaadaaninne ammanettanaadan maaddees. (Maz. 16:8) Ba ammanuwa gaasuwan issi keettan qashettida Tatiyano giyo michchee hanotay hegaa bessees. A hagaadan gaasu: “Taani tarkka attaas. Hegee koyro heeran keehi deexxiyaba. Taani darotoo unˈˈettaas.” A he wode Yihoowabaanne I asawu halchchidobaa wotta dentta qoppiyogaa doommaasu; qassi he paacciya gencciyogee keehi koshshiyoy aybissakko A akeekaasu. Hegee A woppu gaanaadaaninne ammanettada deˈanawu wolqqaa demmanaadan maaddiis. A hagaadan gaasu: “Hegee hanidoy aybissakko akeekidoogee taani qashettidoy Yihoowa siiqiyo gishshawu gidiyogaa akeekanaadan maaddiis. Hegee taani tabaa qoppiyogaa agganaadan maaddiis.”

10. Ha wodiyan Yihooway nu Zaalla gidanaadan waatana danddayiyoo?

¹⁰ Matan keehi waayissiyabay nuna gakkana, qassi nuuni awudeegaappenne aaruwan Yihoowan ammanettana koshshees. Hegaa gishshawu, nuuni haˈˈi Yihoowan mintti ammanettiyogeenne ay hanotatunkka ammanettidi deˈanaadan I nuna maaddanaagaa akeekiyogee keehi koshshiyaba. Hegaadan waati oottana danddayiyoo? Geeshsha Maxaafaa taariketanne ha wodiyan Yihoowa Markkatu deˈuwan hanidabata nabbaba. Xoossay ba ashkkarata waati maaddidaakko akeeka. He taariketa loytta qoppa. Yaatiyogan, ne Zaalla gidida Yihoowan loytta ammanettana danddayaasa.

YIHOOWAGAA MALA EESHSHATA BESSA

11. Nuuni Yihoowagaa mala eeshshata bessana koyiyoy aybissee? (“ Yelaga Ishanttussi Haniya Halchchuwa” giya saaxiniyakka xeella.)

¹¹ Yihooway nuussi zaalla mala gidanaadan oottiya A eeshshata beˈida. Nuuni he eeshshata bessanawu waatana danddayiyakko haˈˈi beˈana. Nuuni Yihoowagaa mala eeshshata bessanawu nuussi danddayettida ubbabaa oottikko, nu ishanttanne michchontta minttettana  danddayoos. Leemisuwawu, Yesuusi Simoona Keefa (“Pheexiroosa” giyoogaa) giidi sunttiis; hegaa giyogee “Guutta Zaalla” giyogaa. (Yoh. 1:42) Pheexroosi galchchan deˈiya harata minttettanaagaanne eta ammanuwa minttanaagaa Yesuusi yootiis. Galchchaa cimati “gita zaallaa kuwaa mala” geetettidosona. Hegee eti galchchan deˈiyageeta naagiyogaa bessees. (Isi. 32:2) Shin nuuni ubbay Yihoowagaa mala eeshshata bessikko, issoy issuwa minttettana danddayoos.—Efi. 5:1.

12. Waayissiya wodiyan nuuni harata waati maaddana danddayiyoo?

¹² Meto wodiyan ne ishantta maadda. Meretay gattiyo daafaban woy olaa gaasuwan, nu ishanttinne michchontti bantta keettaa xayiyo woy bantta keettaappe baqatiyo wode eti nu son takkanaadan oottana danddayoos. ‘Wurssetta gallassatun’ ha alamiya hanotay iiti iiti biyo wode, nuuni nu ishanttanne michchontta koshshiyaban maaddana danddayiyogee qoncce. (2 Xim. 3:1) Qassi nu ishanttanne michchontta minttettananne etawu siiquwa bessana danddayoos. Nuuni yaatana danddayiyo issi ogee eti shiiquwa yiyo wode eta minttettiyabaa haasayiyogaa. Qassi galchchay issoy issuwara siiqettiyonne issoy issuwa minttettiyo soho gidanaadan koyoos. Nuuni iita, siiqennanne unˈˈissiya alamiyan deˈoos. Yaatiyo gishshawu, nuuni shiiquwan nu ishanttanne michchontta minttettanawunne etawu siiquwa bessanawu koyoos.

13. Cimati meto wodiyan harata waati minttettana danddayiyonaa? (Misiliyakka xeella.)

¹³ Cimati bantta ishanttinne michchontti waayettiyo wode eta minttettoosona. Meretay gattiyo daafabay woy akkamuwara gayttidabay deˈikko, cimati bantta ishanttanne michchontta maaddanawu sohuwara issi issibaa giigissoosona. Eti ayyaanaabankka maaddoosona. Ishanttinne michchontti issi cimay eta  kehatettan haasayissiyogaa, eti yootiyobaa siyiyogaanne etawu siyettiyabaa akeekanawu baaxetiyogaa erikko eti A maaduwa oychchanawu yayyokkona. He eeshshati ishanttinne michchontti cimay banttana siiqiyogaa akeekanaadan maaddees; yaatiyo gishshawu, eti cimay Geeshsha Maxaafaappe yootiyo ay kaaletuwakka azazettanawu metootokkona.—1 Tas. 2:7, 8, 11.

14. Nuuni ammanettiyageeta gidiyogaa waati bessana danddayiyoo?

¹⁴ Ammanettiyagaa gida. Nuuni haratussi maadoy koshshiyo wode, ubba qassi meto wodiyan nuuni eta maaddanaagaa eti eranaadan koyoos. (Lee. 17:17) Harati nenan ammanettanaadan waatana danddayay? Leemisuwawu, nu gelido qaalaa naagiyogaaninne pooˈissennan agganawu nuussi danddayettida ubbabaa oottiyogan ubba wode Yihoowagaa mala eeshshata bessanawu baaxetana danddayoos. (Mat. 5:37) Qassi issi urawu maadoy koshshikko, A maaddana danddayoos. Hegaa bollikka, nuussi imettida kaaletuwadan galchchan nuussi deˈiya aawatettaa polana danddayoos.

15. Cimati ammanettiyageeta gidiyogan ishanttinne michchontti waani goˈettiyonaa?

¹⁵ Ammanettiya cimati galchchaa maaddoosona. Waatidi? Ishanttinne michchontti banttawu maadoy koshshiyo wode ubban cimatuyyo dawalana danddayiyogaa eriyogee eti darin unˈˈettennaadan maaddees. Aassiyageeti cimati eta maaddanawu koyiyogaa eriyo wode eti banttana cimati siiqiyogaa akeekoosona.  Cimati bantta qofaappe gidennan, Geeshsha Maxaafaappenne nu xuufetuppe zoriyo wode ishanttinne michchontti etan loytti ammanettoosona. Qassi ishanttinne michchontti bantta xuuraa haratussi yootennanne gelido qaalaa naagiya cimatun ammanettoosona.

16. Yihooway suure giidobaa oottiyogee nunanne harata waati goˈˈii?

¹⁶ Yihooway suure giidobaa ubbatoo ootta. Nuuni ubbaban Yihoowawu azazettiyogan Geeshsha Maxaafay yootiyo maaraadan issibaa kuuyikko, haratussi loˈˈo leemiso gidoos. Nuuni Xoossaa Qaalaa xannaˈiyonne Yihoowan mintti ammaniyo wode, Yihoowawunne I kessido maaratussi ammanettiyageeta gidoos. Worddo timirttetanne Yihoowa qofaara maayettennabata akeekidi hegeetuppe naagettoos. (Efi. 4:14; Yaaq. 1:6-8) Nuuni Yihoowaninne I gelido qaalan ammanettiyogee iita odota siyiyo wode woppu gaanaadan nuna maaddees. (Maz. 112:7, 8) Nuuni metoy gakkiyogeeta maaddanakka danddayoos.—1 Tas. 3:2, 3.

17. Cimati harati woppu gaanaadaaninne Yihoowan mintti ammananaadan waati maaddana danddayiyonaa?

¹⁷ Cimati kiphatanchcha, suurebaa qoppiyageeta, banttawu bessiyabaa oottiyageetanne ashkke. Eti harati woppu gaanaadaaninne Yihoowa mintti ammananaadan maaddoosona; qassi galchchay ‘ammanettiya qaalaa mintti kaallanaadan’ oottoosona. (Tii. 1:9; 1 Xim. 3:1-3) Cimati leemiso gidiyogaaninne soo biidi minttettiyogan aassiyageeti ubbatoo shiiqota shiiqanaadan, haggaazanaadaaninne buzo xinaatiya xannaˈanaadan maaddoosona. Ishanttanne michchontta unˈˈissiyabay gakkiyo wode, cimati eti Yihoowan ammanettanaadaaninne I gelido qaalaa ubbatoo qoppanaadan eta hassayissoosona.

18. Nuuni Yihoowa sabbanawunne kaseegaappe aaruwan akko shiiqanawu koyiyoy aybissee? (“ Yihoowakko Loytti Shiiqiyo Ogiya” giya saaxiniyakka xeella.)

¹⁸ Maalaalissiya Yihoowa eeshshata xannaˈi simmidi, Kawuwa Daawitaagaadan gaana danddayoos: “GODAI, ta wogga zaallai galatetto!” (Maz. 144:1) Nuuni ubbatoo Yihoowan ammanettana danddayoos. Nuuni cimikkokka aara dabbotidi deˈanaadan I nuna ubbatoo maaddanaagaa ammanettoos. Qassi nuuni, “I taayyo wogga zaallaa” gaana danddayoos.—Maz. 92:14, 15.