NGANI JAKULIJIGANYA 26
NYIMBO NA. 8 Yehofa Ali Pakutilila Petu
Tumdalileje Yehofa Jwali Pakutilila Petu
“Pangali lwala lulilose lwakulandana ni Mlungu jwetu.”—1 SAM. 2:2.
CHAKULINGA CHA NGANIJI
Chitulijiganye ndamo syakwete Yehofa syasikusamtendekasya kuŵa mpela lwala soni yampaka tutende kuti tujigalile ndamo syakwesyo.
1. Mwakamulana ni Salimo 18:46, ana Daudi ŵamlandenye Yehofa ni chichi?
TUKUTAMA m’chilambo chele ndaŵi jilijose mpaka tusimane ni yakusawusya yampaka yichenje umi wetu. Kusala yisyene, tukusayamichila mnope kuti tukwete Yehofa jwampaka atukamuchisye patusimene ni yakusawusya. Mungani jipite jila, twalijiganyisye kuti Yehofa ali Mlungu jwachijumi nambosoni kuti ali jwakoseka kutukamuchisya patusimene ni yakusawusya. Mwamti Yehofa patukamuchisye yikusatusimichisya kuti jwalakwe ali Mlungu “jwachijumi.” (Aŵalanje Salimo 18:46.) Nambo panyuma pakusala kuti Mlungu ali jwachijumi, Daudi jwam’wanichisyesoni Mlungu ni chindu changali umi. Jwalakwe jwamkolasile Yehofa kuti “lwala lwangu.” Ana Daudi jwagopolelaga chichi?
2. Ana yajwasasile Daudi yakuti Yehofa ali “Lwala lwangu” mpaka yitujiganye chichi?
2 Mungani ajino, chitulole ligongo lyakwe Yehofa akumlandanya ni lwala soni yatukulijiganya pamaloŵe gelega. Chitulijiganyesoni yampaka tutende kuti tumwoneje jwalakwejo kuŵa lwala lwetu. Pambesi pakwe chitukambilane yampaka tutende kuti tusyasyeje ndamo syakwete Yehofa syakulandana ni lwala.
LIGONGO LYAKWE YEHOFA AKUSAKOLANJIDWA KUTI LWALA
3. Ligongo chichi Baibulo jikusakamulichisya masengo maloŵe gakuti “lwala” mwakuwilisyawilisya? (Alole chiwulili cha pachikuto.)
3 Baibulo jikusakamulichisya masengo maloŵe gakuti lwala mpela maloŵe gakuwanichisya, pakusaka kutukamuchisya kupikanichisya ndamo syakwete Yehofa. Ndaŵi syejinji m’Baibulo ŵakutumichila ŵa Yehofa pakusaka kumchimbichisya jwalakwe ligongo lya ndamo syambone syakwete ŵamkolangaga jwalakwe kuti “lwala.” M’Baibulo pa malo gandanda gakusamkolanga Yehofa kuti “Lwala” pali pa Detulonomo 32:4. Mu lipopelo lyaŵapeleche Hana, jwalakwe jwasasile kuti, “Pangali lwala lulilose lwakulandana ni Mlungu jwetu.” (1 Sam. 2:2) Nombe Habakuku ŵamkolasile Yehofa kuti “Lwala lwangu.” (Hab. 1:12) Nambosoni juŵalembile Salimo 73 jwamkolasile Yehofa kuti ali “lwala lwa pamtima pangu.” (Sal. 73:26) Konjechesya pelepa, Yehofa msyenejo jwalikolasile kuti ali lwala. (Yes. 44:8) Sambano, kwende tukambilane ndamo sitatu syakwete Yehofa syasili mpela lwala soni yampaka tutende kuti tumwoneje jwalakwe kuŵa mpela lwala lwetu.—Det. 32:31.
Ŵakutumichila ŵa Yehofa akusamwona jwalakwe mpela lwala lwampaka atilileko (Alole ndime 3)
4. Ana Yehofa ali malo gakutilila chamti uli? (Salimo 94:22)
4 Yehofa ali malo gakutilila. Mpela mwayikusaŵela kuti pajikugwa ula jamachili mundu mpaka atilile kumbanga, nombe Yehofa mpaka atuchenjele patukusimana ni yakusawusya. (Aŵalanje Salimo 94:22.) Jwalakwe akusatukamuchisya kuti tuŵe najo paunasi wambone, soni akusatusimichisya kuti pangali chindu chilichose champaka chitutendechele soni konanga sogolo jetu mpaka kalakala. Konjechesya pelepa Yehofa akusatusalila kuti chachimasya yindu yiliyose yayikusatujogoya soni yayikusasokonasya mtendele wetu.—Esekiele 34:25, 26.
5. Ana Yehofa mpaka aŵe chamti uli malo getu gakutilila?
5 Chindu chimo champaka tutende kuti Yehofa aŵe malo getu gakutilila chili kupopela kwa jwalakwe. Patukupopela, Yehofa akusatupa “mtendele wa Mlungu” wawukusachenjela mitima soni nganisyo syetu. (Afil. 4:6, 7) Aganichisye yayamtendechele M’bale Artem juŵaŵichidwe mundende ligongo lya chikulupi chakwe. Pajwaliji kundende, ndaŵi syejinji mundu juŵamwusyaga yiwusyo ŵamtendelaga yindu yangasa soni ŵamlagasyaga. M’baleju jwasasile kuti, “Natendaga woga mundujo paŵambusyaga yiwusyo. . . . Mwamti ndaŵi syosope napopelaga kwa Yehofa kumŵenda kuti ambe mtendele wa mumtima soni lunda. Mwamti matala galigose gaŵakamulichisye masengo mundu jula nganigakamuchisya. Ligongo lyakuti Yehofa ŵangamuchisyaga, yaliji mpela njimi chiŵandika lipupa lya liganga lyelewu.”
6. Ligongo chichi ndaŵi syosope tukusosekwa kumdalilaga Yehofa? (Yesaya 26:3, 4)
6 Yehofa ali jwakulupichika. Mpela mwayikusaŵela ni lwala kuti nganiluŵa lutenganyiche, tukusamanyilila kuti ndaŵi syosope Yehofa akusaŵa jwakoseka kuti atukamuchisye. Tukusosekwa kumdalilaga Yehofa ligongo lyakuti jwalakwe ali “Lwala lwangali mbesi.” (Aŵalanje Yesaya 26:3, 4.) Ndaŵi syosope Yehofa akusatenda yasasile, akusapikana mapopelo getu, soni akusatukamuchisya patukusosechela chikamuchisyo. Mpaka tumdalilesoni Yehofa ligongo lyakuti jwalakwe akusatenda yindu mwakulupichika kwa ŵakutumichila ŵakwe. (2 Sam. 22:26) Mwamti jwalakwe nganaŵa aliŵalile yindu yatukusatendaga soni chachitupa upile.—Aheb. 6:10; 11:6.
7. Ana patukumdalila Yehofa chichitutendechela chichi? (Alole chiwulili.)
7 Tukusamtenda Yehofa kuŵa lwala lwetu patukumdalila ni mtima wetu wosope. Tukusakulupilila kuti patukumdalila Yehofa atamose pandaŵi jakusawusya, yindu yichitujendela chenene. (Yes. 48:17, 18) Patukuyiwona kuti Yehofa akutukamuchisya tukusatanda kumkulupilila mnope. Mwamti pelepo ni patukusatanda kuyiwona kuti Yehofape ni jwampaka atukamuchisye kupilila atamose tuli tusimene ni yakusawusya yamti uli. Myoyo, patusimene ni yakusawusya yatukuyiwona kuti pangali jwampaka atukamuchisye, tukusayiwona kuti Yehofape ni jwampaka tumdalile. M’bale Vladimir jwasasile kuti, “Panaliji mundende jakulagasichila, nayiwonaga kuti jaliji ndaŵi jambone jakulimbisya unasi wangu ni Mlungu. Nalijiganyisye kuti ngusosekwa kumkulupilila mnope Yehofa, ligongo pandaŵiji naliji jika soni jwalakwe jikape ni juŵangamuchisyaga kuti ngombole kupilila yakusawusya yangu.”
Yehofa akusaŵa malo getu gakutililako patukumdalila mnope jwalakwejo (Alole ndime 7)
8. (a) Ligongo chichi mpaka tusale kuti Yehofa ali jwangatenganyika? (b) Ana tukusapata maumbone gapi patukumwona Yehofa kuŵa mpela lwala lwetu? (Salimo 62:6, 7)
8 Yehofa jwangatenganyika. Mpela mwayikusaŵela kuti liganga lyekulungwa lyangatenganyika, nombe Yehofa jwangatenganyika ata panandi. Mwamti umundu wakwe kapena yakulinga yakwe yangachengasoni. (Mala. 3:6) Adamu ni Hawa paŵamjimuchile Yehofa, jwalakwe nganachenga chakulinga chaŵakwete pa ŵandu. Mwamti ndumetume Paulo jwalembile kuti Yehofa “nganaŵa alikanile jika.” (2 Tim. 2:13) Myoyo, mwangasamala kandu ni yindu yampaka yitutendechele, kapena yampaka atutendele ŵane, Yehofa ngasachenga ndamo syakwete, chakulinga chakwe, kapena mfundo syakwe. Ligongo lyakuti Yehofa jwangachengaga, tukusamanyilila kuti chachitukamuchisya patusimene ni yakusawusya, soni kuti chachikwanilisya yindu yajwasasile kuti chachitutendela msogolo.—Aŵalanje Salimo 62:6, 7.
9. Ana alijiganyisye chichi pa yindu yaŵasimene nayo Mlongo Tatyana?
9 Tukusamtenda Yehofa kuŵa lwala lwetu patukuganichisya mwaŵelele jwalakwe soni chakulinga chakwete pa ŵandu soni chilambochi. Kutenda yeleyi, kuchitukamuchisya kuti tukatenganyikaga atamose patukusimana ni yakusawusya. (Sal. 16:8) Yeleyi ni yayamtendechele Mlongo Tatyana juŵaŵichidwe mundende ja panyumba ligongo lya chikulupi chakwe. Jwalakwe jwatite, “Naliwonaga kuti pangali jwakungamuchisya. Mwamti pandanda yaliji yakusawusya mnope, ligongo nalagasikaga mnope nganisyo.” Nambo mlongoju pajwatandite kuyiwona kuti yakusawusya yakwe yakamuchisyaga kuswejesya lina lya Yehofa, jwatandite kupata machili gagamkamuchisye kulimbisya chikulupi chakwe. Mlongoju jwatite, “Kumanyilila ligongo lyakwe nasimanaga ni yakusawusyayi, kwangamuchisye kukumbuchila kuti ngusimana ni yakusawusyayo ligongo lyakumtumichila Yehofa. Yeleyi yangamuchisye kuti ndeche kwambaga kuliganichisya jika.”
10. Ana Yehofa mpaka aŵe chamti uli Lwala lwetu?
10 Msogolomu, tuchisimana ni yakusawusya yatuchisosekwa kuti chitumdalile mnope Yehofa kupundana ni kalakose. Myoyo, ajino jili ndaŵi jambone jatukusosekwa kulijiganya kumdalila mnope Yehofa soni kulupilila kuti jwalakwe chachitukamuchisya kuŵape ŵakulupichika atamose tuli tusimene ni yakusawusya yamti uli. Mpaka tutende yeleyi, mwakuŵalanga ngani sya m’Baibulo soni ngani syakusala ya ŵandu ŵa m’masiku getu gano. Pakuŵalanga ngani syelesi, aganichisyeje mnope, soni aloleje yaŵele ali mkutenda Yehofa pakwakamuchisya ŵakutumichila ŵakwe. Kutenda yeleyi, kuchakamuchisya kuti amtende Yehofa kuŵa malo gawo gakutilila.
ASYASYEJE NDAMO SYA YEHOFA
11. Ligongo chichi tukusosekwa kusyasya ndamo syambone syakwete Yehofa? (Alole libokosi lyakuti “ Chakulinga Champaka Akole Abale Ŵachinyamata.”)
11 Pakwika apano, tulijiganyisye ndamo syakwete Yehofa syasikusamtendekasya jwalakwe kuŵa mpela lwala. Sambano kwende tukambilane yampaka tutende kuti tusyasyeje ndamo syelesi. Patukulingalinga kutenda yeleyi, ni patuchikombolasoni kuwulimbikasya mpingo. Mwachisyasyo, Yesu ŵampele Simoni lina lyakuti Kefa (kugopolela kuti “Petulo”), lina lyalikusagopolela kuti “Lwala.” (Yoh. 1:42) Pelepatu, Yesu jwagopolelaga kuti Petulo chachalimbikasyaga ŵane mumpingo nambosoni kwakamuchisya kuti akole chikulupi chakulimba. Nombe achakulungwa ŵa mumpingo akusakolanjidwa kuti ali mpela “m’bwilili ku lwala lwekulungwa.” Yeleyitu yikusalosya kuti nombe achakulungwa ŵa mumpingo akusakamula masengo gakwachenjela Aklistu achimjawo. (Yes. 32:2) Atamose yili myoyo, mundu jwalijose pakusyasya ndamo syambone syakwete Yehofa, yindu yikusajendaga chenene mumpingo.—Aef. 5:1.
12. Ana ni matala gane gapi gampaka tuŵele malo gakutilila kwa ŵandu ŵane?
12 Aŵeje malo gampaka ŵane atilileko. Ndaŵi sine, abale ni alongo ŵetu mpaka atilile ku nyumba syetu pakutendekwe ngosi sya chilengedwe kapena ngondo. Yindu payikusakalila mnope ‘m’masiku gakumalisyaga,’ ngatukayichila kuti wosopewe tuchikola udindo wakwapa yakusosechela Aklistu achimjetu. (2 Tim. 3:1) Konjechesya pelepa, mpaka tusosekwesoni kwalimbikasya soni kwalosya chinonyelo jemanjaji. Mwamti litala limo lyampaka tutendele yeleyi, lili kwapochela chenene abale ni alongo ŵetu payiche ku misongano ja mpingo, soni kwatendekasya kuti aŵeje ŵagopoka. Tukutama mchilambo chele ŵandu ŵajinji akusiŵatendela achimjawo yindu yangasa soni yangali chilungamo. Mwamti yeleyi mpaka yatendekasye abale ni alongo ŵetu kulagasika nganisyo. Myoyo, jemanjaji payiche ku misongano ja mpingo tukusasosekwa kulingalinga kwatendekasya kuŵa ŵakusangalala.
13. Ana achakulungwa mpaka aŵe chamti uli malo gakutilila kwa ŵandu ŵane? (Alole chiwulili.)
13 Achakulungwa ŵa mumpingo mpaka aŵe malo gampaka atilileko abale ni alongo ŵakusimana ni yakusawusya. Pasitendekwe ngosi sya chilengedwe kapena ŵane palwasile, achakulungwa ŵa mumpingo akusatenda yakomboleka kuti akamuchisyepo. Jemanjaji akusiŵakamuchisyasoni Aklistu achimjawo kuti aŵe paunasi wambone ni Yehofa. Abale ni alongo akusaŵa ŵagopoka kumyichila jwamkulungwa jwa mumpingo jwakusaŵecheta mwachinonyelo, jwakusapikanila chenene, nambosoni jwakusapikanichisya mwakupikanila jemanjajo. Jwamkulungwa jwa mumpingo pakulosya ndamosi yikusiyatendekasya abale ni alongo kuŵa ŵakusangalala. Nambosoni yikusiyatendekasya kuyiwona kuŵa yangasawusya kukamulichisya masengo malangiso ga m’Baibulo gapeleche jwamkulungwa jwa mumpingojo.—1 Ates. 2:7, 8, 11.
Abale ni alongo pasimene ni yakusawusya, akusatililaga kwa achakulungwa ŵa mumpingo (Alole ndime 13) a
14. Ana mpaka tulosye chamtuli kuti tuli ŵandu ŵakudalilichika?
14 Aŵeje ŵakudalilichika. Tukusasaka kuti ŵane atudalileje soni ayiwoneje kuti mpaka twakamuchisye pasimene ni yakusawusya. (Mis. 17:17) Ana mpaka tutende uli kuti tuŵe mundu jwakudalilichika? Mpaka tutende yeleyi mwakusyasya ndamo syambone syakwete Mlungu, soni mwakulolechesya kuti ndaŵi syosope tukutenda yindu yatusasile. (Mat. 5:37) Nambosoni tukusasosekwa kwakamuchisyaga ŵandu ŵakulajilila yine yakwe. Konjechesya pelepa, tukusasosekwasoni kumalisya pandaŵi jakwe masengo gaŵatupele soni kugakamula mwakuya malangiso gakwe.
15. Ana abale ni alongo akusapata maumbone gamti uli naga achakulungwa ali ŵakudalilichika?
15 Achakulungwa ŵakudalilichika akusakamuchisya mnope mumpingo. Ligongo chichi tukuŵecheta yeleyi? Abale ni alongo pakuyiwona kuti mpaka aŵechetane ni jwamkulungwa jwa mumpingo ndaŵi jilijose jakusosekwa chikamuchisyo, yikusiyakamuchisya kuti akalagasikaga nganisyo. Konjechesya pelepa, abale ni alongo akusaŵa ŵakusangalala pakumanyilila kuti achakulungwa ŵa mumpingo ali ŵakusachilila kwakamuchisya ndaŵi jilijose. Achakulungwaŵa pakupeleka malangiso gakutyochela m’Baibulo kapena gakutyochela kwa kapolo jwakulupichika ni jwalunda, ni kuŵambalaga kukamulichisya masengo nganisyo syawo, yikusiyakamuchisya abale ni alongo kuti ŵakamuchisyeje mnope. Mwamti abale ni alongo akusiŵachimbichisya achakulungwa ŵa mumpingo ŵakusiŵasunjila chimsisi soni ŵakusatenda yaŵechete.
16. Ana m’weji soni ŵandu ŵane tukusapata maumbone gamti uli naga tuli ŵangatenganyika?
16 Aŵeje ŵangatenganyika. Patukumpikanila Yehofa mu yindu yosope, nambosoni kukamulichisya masengo malangiso ga m’Baibulo patukusagula yakutenda, yichiŵa yangasawusya kwa ŵane kujigalila chisyasyo chetu chambone. Patukulijiganya Baibulo soni kulimbisya chikulupi chetu mwa Yehofa, tuchiŵa ŵakulupichika kwa jwalakwe soni tuchikuyaga mfundo syakwe. Patukutenda yeleyi, tuchikombola kumanyilila yijiganyo yaunami nambosoni yindu yakutindana ni nganisyo sya Yehofa, mwamti ngasitujigalika ni yindu yeleyi. (Aef. 4:14; Yak. 1:6-8) Kumkulupilila Yehofa soni kuyikulupilila yindu yasasile jwalakwe kuti chachitutendela, kuchitukamuchisya kuti tukalagasikaga nganisyo patupikene ngani syakusakala. (Sal. 112:7, 8) Konjechesya pelepa, tuchikombola kwakamuchisya ŵandu ŵakusimana ni yakusawusya.—1 Ates. 3:2, 3.
17. Ana chichi champaka chakamuchisye achakulungwa ŵa mumpingo kuti akomboleje kwalimbikasya achimjawo?
17 Achakulungwa ŵa mumpingo akusasosekwa kola ndamo syambone, kuŵa ŵaganisya chenene, kuŵa ŵadongosolo, nambosoni kuŵa ŵakupikana ya ŵane. Achakulungwaŵa akusiŵalimbikasya ŵane soni kwakamuchisya kuti amtumichileje Yehofa, nambosoni kuwulimbikasya mpingo wosope ‘mwakamula mwamachili maloŵe gakulupichika.’ (Tit. 1:9; 1 Tim. 3:1-3) Achakulungwaŵa pakupeleka chisyasyo chambone soni kutenda maulendo gakuchinga, akusiŵakamuchisya abale ni alongo kuti asimanikweje pamisongano ndaŵi syosope. Nambosoni kuti alipelecheje pamasengo gakulalichila soni kuti atendeje lijiganyo lyapajika. Abale ni alongo pakusimana ni yakusawusya yampaka yatendekasye kulagasika nganisyo, achakulungwa ŵa mumpingo akusiŵakamuchisya jemanjaji kuti amkulupilileje mnope Yehofa soni kuti ayikulupilileje mnope yindu yaŵasasile jwalakwe kuti chachitutendela.
18. Ligongo chichi tukusasaka kumchimbichisya Yehofa soni kuŵa najo paunasi wambone? (Alole libokosi lyakuti “ Litala Lyakwakamuchisya Kuŵa Paunasi Wambone ni Yehofa.”)
18 Panyuma pakukambilana ndamo syakusimonjesya syakwete Yehofa, mpaka tuŵechete mpela mujwaŵechetele Mwenye Daudi jwaŵasasile kuti, “Achimbichikwe AMBUJE lwala lwangu.” (Sal. 144:1) Ndaŵi syosope tukusosekwa kumdalilaga mnope Yehofa. Atamose patuchekulwipe mnope, tuchipitilisya kukulupilila kuti Yehofa chachipitilisya kutukamuchisya kuti tuŵe najo paunasi wakulimba. Mwamti tukwete magongo gakupikanika gakututendekasya kuŵecheta kuti, Yehofa “ali lwala lwangu.”—Sal. 92:14, 15.
NYIMBO NA. 150 Amsoseje Mlungu Kuti Akulupuche
a KULONDESYA CHIWULILI CHA Pachikuto: Ŵakutumichila ŵa Yehofa akusamwona jwalakwe kuŵa malo gakutilila. : Mlongo akuŵechetana mwagopoka ni achakulungwa ŵa mumpingo ŵaŵili pali ku Nyumba ja Uchimwene.
