1. Mu mbi Davidi kadedikisidi Yehova banga phila buididi mu Minkunga 18:46?

 TULEMBO zingila mu nza yoyi mambu maphasi malenda thumu totukila mu kinzimbukila​—ayi bebisa luzingu lueto—​voti malenda thumu balula luzingu lueto loso. Tuidi na phutudulu matondo bo tuidi na diluaku di lomba lusadusu kuidi Yehova Nzambi! Mu disolo dio diviokidi, tubambukidi moyo ti Yehova widi Nzambi yi moyo ayi widi wukubama mu kutusadisa. Mu thangu tueta baka lusadusu luandi, buawu tueta luta bela sikididi ti ‘Yehova wulembo zingi!’ (Tanga Minkunga 18:46.) Diawu bo kamana tuba mambu momo, Davidi wutedila Nzambi “Ditadi diama.” Bila mbi Davidi kadedikisila Yehova Nzambi yimoyo mu kima kioki ka kinikukanga ko​—kioki batedidi ditadi?

2. Bila mbi Davidi katedidi Yehova “Ditadi diama”?

² Mu disolo diadi, matu mona bila kioki Yehova katedolo ditadi ayi phila beni yoyi yithedolo dilongi mbi yikutulonga mu diambu di niandi. Matu longuka phe phila yoyi beto phe tulenda kuntadila Ditadi dieto. Kutsuka, matu mona phila yoyi tulenda sokudila bikadulu bi ditadi bi Yehova.

BILA MBI YEHOVA KATEDOLO DITADI?

3. Bue Bibila kieta luta sadila kuma “ditadi”? (Tala va baba.)

³ Bibila kisadidi kuma “ditadi” banga phova yimbonosono muingi yitusadisa tusudika mfunu wu bikadulu bio Yehova kadi. Bieta luta monikina mu bikapu bio bieta kun’zitisa banga Nzambi yo yisi ko yidedakana ayi zinzambi zinkaka. Ziphova zitheti zi Bibila ziozi zitedidi Yehova “Ditadi” zidi mu Wantanu wa Mose 32:4. Mu lusambulu, Ana wutuba ti ‘kuisi ko kadi ditadi didedikini banga Nzambi’eto.’  (1 Sa. 2:2) Habakuki wutedila Yehova “Ditadi diama.” (Hab. 1:12) Nsoniki wu Minkunga 73 wutedila Nzambi “ditadi di ntim’ama.” (Nku. 73:26) Ayi niandi veka Yehova wukitadila banga ditadi. (Yes. 44:8) Tutadila bikadulu bitatu bi ditadi bio Yehova keta monisa ayi tulonguka phila yo tulenda kuntudila kaba “Ditadi dieto.”​—5 Mo. 32:31.

4. Mu phila mbi Yehova kadidi suamunu? (Minkunga 94:22)

⁴ Yehova widi suamunu. Banga kuandi phila ditadi dinneni dilenda bela suamunu ki mutu nioni wulembo tini vuka kitsisi, Yehova weta tutanina mu thangu tudengini mambu maphasi momo malenda tula luzingu lueto mu vonza. (Tanga Minkunga 94:22.) Weta kututanina ayi weta kutukakidila mu mambu momo malenda kutumonisa phasi mvimba mvimba. Ayi buesidi kutuvana tsila ti: Tsuka tsuka wela botula mambu moso mo malembo tubotula ndembama ayi lutanunu lueto.​—Yeh. 34:25, 26.

5. Bue Yehova kalenda bela suamunu kieto banga ditadi?

⁵ Yimosi yi ziphila tueta tudila Yehova kaba Suamunu kieto ki ditadi yidi bo tueta kunsambila. Mu thangu tueta sambila, Yehova weta kutuvana “ndembama yi Nzambi” yoyi yeta tanina mintima mieto ayi phev’eto. (Flp. 4:6, 7) Tutadila kifuani ki Artem, khomba mosi nio wukota nloko mu bila ki minu kiandi. Wuyuvulu biuvu kuidi mutu mosi wu leta wu kikhesa nio wuntula mu keti keti ayi wumfuisa tsoni va meso ma batu bawombo. Wutuba ti: “Dieba kuthatikisanga kadika khumbu yoyi beba kuthedilanga kuidi muisi leta beni muingi kandiuvula biuvu. . . . Yehova kaka ndieba sambilanga. Ndieba lombanga ndembama yi ntima ayi nduenga. Madiela mambimbi ma muisi leta nio weba kundiuvulanga biuvu masi simba ko kuidi minu. . . . Mu lusadusu lu Yehova ndiba banga minu nditelama kumanima ma baka ki ditadi.”

6. Bila mbi thangu zioso tulenda tudilanga Yehova ntima? (Yesaya 26:3, 4)

⁶ Yehova fueni tudulu ntima. Banga ditadi kadi nikukanga ko, Yehova wukala kaka thangu zioso mu diambu di beto. Tulenda kuntudila ntima bila widi “Ditadi di mvu ka mvu.” (Tanga Yesaya 26:3, 4.) Wela tatamana ba mu luzingu mu diambu di lungisa zitsila ziandi, wa minsambu mieto ayi kutusadisa mu lusadusu lolo tuidi phuila. Tulenda tula diana dieto phe kuidi Yehova bila wukala wukuikama kuidi bobo beta kunsadila. (2 Sa. 22:26) Kadi khumbu kela zimbakana mambu momo tueta kumvangila ayi thangu zioso wela kutuvana nsendo.​—Ebe. 6:10; 11:6.

7. Ntindu mbi wu luzingu tuela ba ti tutudidi diana dieto kuidi Yehova? (Tala phe foto.)

⁷ Tueta tula Yehova kaba ditadi dieto mu thangu tueta kuntudila ntim’eto woso. Tuidi na vuvu ti mu thangu tulembo ntumukina buba mu thangu ziphasi, tuela baka mamboti. (Yes. 48:17, 18) Bobuawu tulembo luti muena lusadusu lu Yehova, buawu tueta luta kuntudila ntima. Matu ba bakubama bumboti mboti mu nuanisa zinzomono ziozi Yehova kaka lenda kutusadisa mu kuzinunga. Mu thangu tueta kuiza dengana mambu mo meta monika ti kadi mutu lenda kutusadisa, buawu tueta kuiza sudikila bumboti mboti mfunu wutudila Yehova ntima. Vladimir tubidi ti: “Thangu yoyi ndiviokisa mu buloko, yiba thangu yoyi ndiluta bela nguizani yimboti ayi Nzambi. Ndilonguka luta tudila Yehova ntima bila ndiba minu veka ayi kadi mutu lenda kutsadisa.”

8. a) Bila mbi tulenda tubila ti Yehova wukala wusikama? b) Mamboti mbi tueta baka mu ba na Nzambi nio widi banga Ditadi dieto? (Minkunga 62:6, 7)

 ⁸ Yehova widi wusiama. Banga kuandi phila bukadila ditadi dinneni, Yehova ngolo kakala ayi wukala wusiama. Kabalukanga ko mu bumutu buandi ayi kanikukanga ko mu lukanu luandi. (Mal. 3:6) Mu thangu bantombukila ku tsola yi Edeni, Yehova kasi lebakana ko. Bobuawu phe thumu Polo wusonika ti, Yehova “kalendi kukitunuka ko.” (2 Tim. 2:13) Yawu yinsundula ti buba dioso kuandi diambu dinsalama voti dioso kuandi diambu divengi batu bankaka, Yehova kalendi ko balula bikadulu biandi, lukanu luandi, ayi zitsikudukusu ziandi. Beto ba sikididi kuidi Nzambi’eto yisiama, tulenda tula thalu’eto kuidi niandi muingi tubaka phulusu ayi lusadusu lo lukutusadisa tununga zithangu zi ziphasi.​—Tanga Minkunga 62:6, 7.

9. Dilongi mbi beki mu kifuani ki Tatyana?

⁹ Matu tula Yehova kaba ditadi dieto beto luta tula mayindu meto mu phila yi bumutu bo kadi ayi beto tatamana tula lukanu luandi mu mayindu meto. Beto kubutudila, yawu yilenda kutusadisa tuba basiama mu mayindu mu thangu tulembo dengana zinzomono. (Nku. 16:8) Buawu phe bubela kuidi khomb’eto mosi wunketo widi mu dizina di Tatyana nioni babe sunga kuidi ba masodi ku nzo’andi mu diambu di minu kiandi (Résidence surveillée). Wutuba ti: “Ndikimona banga minu veka. Va thonono diba diambu diphasi. Khumbu ziwombo ndieba lebikininanga nitu.” Vayi mu thangu kayiza mona nguizani yo yidi mu nzomono’andi na Yehova ayi lukanu luandi, wuyiza vutukila zingolo ziandi ayi ba mayindu mamboti. Wutuba diaka ti: “Zaba bila kioki mambu beni meba salimina, kutsadisa ndibambuka moyo ti mu diambu di Yehova ndididi mu mambu maphila yayi. Yawu yitsadisa ndibika bue tula mayindu mu minu veka.”

10. Mu thangu yayi bue Yehova kalenda bela Ditadi dieto?

¹⁰ Mu bilumbu binkuiza tuela dengana zinzomono ziozi ziela tutula ti tutudila Yehova ntima mu phila yoyi ka tutekidi kubutudila ko. Yawu yayi thangu yiluta kindisila sikididi kieto ti niandi wela tuvana bima biobi tuidi phuila muingi tuvibidila mu bukuikama boso. Bue tulenda kubutudila? Tanganga Bibila ayi masolo ma Bambangi zi Yehova ba bilumbu biabi. Sudika phila yoyi Nzambi kamonisina bikadulu biobi bidedikini ayi bi ditadi mu diambu di sadisa bisadi biandi. Yindudilanga mu buphinda masolo beni momo. Ngeyo kubutudila, yawu mayi sadisa wutula ti Yehova kaba Ditadi diaku.

SOKUDILA BIKADULU BI DITADI BI YEHOVA

11. Bila mbi tuidi phuila yisokudila bikadulu bi ditadi bi Yehova? (Tala ankadre “ ALukanu mu diambu di mintueni mi bakhomba ba babakala.”)

¹¹ Tume mona ti Yehova widi banga ditadi. Buabu tutadila phila yoyi tulenda sokudila bikadulu biandi bi ditadi. Beto kubutudila bumboti, buawu matu luta bela bafuana mu kindisa kimvuka. Mu kifuani, Yesu wuvana Simoni dizina Sefasi (diodi dim’bangula “Piela”), ayi dinsundula “Tini ki Ditadi.” (Yow. 1:42) Yawu yimonisa ti wela ba tho yi lukindusu ayi yi nsikimisa kimvuka. Bakulutu ba kimvuka badi banga “tombi ki ditadi dinneni.” Yawu yimmonisa phila yoyi beta tanina bakhomba  ba kimvuka. (Yes. 32:2) Bukiedika, kimvuka kieta baka mamboti mu phila yoyi​—bakhomba boso ba babakala ayi ba baketo—​beta sokudila bikadulu bi ditadi bi Yehova.​—Efe. 5:1.

12. Sudikisa bue tulenda bela suamunu ki batu bankaka.

¹² Ba suamunu. Thangu zinkaka tulenda ba bafuana mu vana lutanunu lumboti kuidi bakhomba zieto mu bivonza bio bieta totuka biawu veka, mu mvualangani wu bana ba buala, voti mu mvita. Bobuawu luzingu lulembo luti bivila mu “bilumbu bitsuka,” mu kondo finda phaka tuela baka maluaku ma salisinina wumosi mosi mu beto. (2 Tim. 3:1) Tulenda vana phe lutanunu lu mayindu ayi lu kipheve kuidi bakhomba zieto. Yimosi mu ziphila ziozi tulenda kubutudila yidi mu kubasadisa bakimona ti tubayembi bumboti mu nzo yi Kipfumu, yoyi yeta tula ti nguizani yiba yimboti mu khati kimvuka. Tulembo zingila mu nza yi kikhesi, yikondolo luzolo ayi yiwedi mambu momo malembo tutatisa. Diawu, mu thangu bakhomba zieto ba babakala ayi ba baketo balembo kutakana mu zikhutukunu, tufueti tula mo tulenda tula muingi bakimona ti tulembo bazodi, badi mu ndembama ayi mu lutanunu.

13. Bue bakulutu mu bawu veka balenda bela suamunu ki batu bankaka? (Tala phe foto.)

¹³ Bakulutu balenda ba suamunu ki bakhomba ba kimvuka bo balembo monisa mvibudulu mu zithatukusu zi phila mu phila. Mu thangu bivonza bieta totuka ayi bimbevo bi kinzimbukila, bakulutu beta baka zikhubukulu zi kubika lusadusu lo lufueni. Beta vana phe lusadusu lu kipheve. Bakhomba ba babakala ayi ba baketo baba yangalala solula ayi nkulutu enati nkulutu beni zabikini ti wukala wulembama, weta kitula va buangu ki batu bankaka, ayi wukala wukubama mu wa batu bankaka. Bikadulu bi phila yoyi bieta sadisa batu bankaka bakimona ti balembo kipu bumboti; yawu yeta kuiza tula bafika sadila zindongi zio balembo kubavani mu nzila yi Bibila kuidi nkulutu.​—1 Tes. 2:7, 8, 11.

14. Bue tulenda monisina ti balenda kututudila ntima?

¹⁴ Ba mutu nioni balenda tudila ntima. Tufueti  tula ti batu batutudila ntima nduka nduka mu thangu ziphasi. (Zin. 17:17) Bue tulenda yonzudila bumutu bu tudulu ntima? Thangu zioso tutulanga ngolo mu monisa bikadulu bi bunzambi, mu kifuani, dukisanga zitsila ayi tula ngolo mu zitisanga thangu. (Mat. 5:37) Tulenda phe vana lusadusu lufueni enati bulendakana. Mu buela, tufueti tulanga ngolo mu dukisa biyeko biobi beta kutuvana mu landakana zithumunu ziozi tueta baka.

15. Mamboti mbi bimvuka bieta baka enati bakulutu balembo tudulu ntima?

¹⁵ Bakulutu bobo beta tudulu ntima, beta nata mamboti mu kimvuka. Mu phila mbi? Minsamuni mieta mona ti milembo sadusu, mu thangu balembo dengana ayi bakulutu mu kondo mona phasi, mu kifuani dengana ayi nkengi yi grupi’awu yi kisalu ki tsamununu. Minsamuni mieta kimona phe ti balembo bakipi bumboti mu thangu bazebi ti bakulutu badi bakubama mu kubasadisa. Ayi zindongi zio bakulutu bamvana, ziawu bimina mu Bibila ayi mu minkanda mi nnanga wukuikama vayi bika mu mayindu mawu veka, bakhomba mu kimvuka beta luta kubatudila ntima. Bakhomba ba babakala ayi ba baketo beta luta tudila ntima bakulutu bobo beta sueka zisekele zi mambu  momo ma batadidi ayi bobo beta vanga mambu momo bantuba.

16. Mamboti mbi beto veka tulenda baka ayi batu bankaka beto ba basiama?

¹⁶ Ba wusiama. Tulenda ba batu bobo balenda sokudila mu phila yimboti enati tuidi basiama mu vanga mambu mamboti, ayi enati tum’baka zinzengolo zisiama zio zisimbimini mu zitsikudukusu zi Bibila. Bobuawu tunyonzukila mu minu ayi mu nzayilu yikiedika, buawu tueta kuiza bela basiama mu kiedika. Tuisi ko batu bam’balulanga mambu phamba phamba bobo basi ko basiama mu momo beta tuba voti bobo beta fika vukumuka mu malongi ma luvunu ayi mu mayindu ma nza yayi. (Efe. 4:14; Zaki 1:6-8) Minu kieto kuidi Yehova ayi mu zitsila ziandi, kieta tusadisa tuba bukhati khati mu thangu tulembo wa zitsangu zimbimbi. (Nku. 112:7, 8) Tuidi phe na diluaku di sadisa batu bobo balenda dengana zinzomono.​—1 Tes. 3:2, 3.

17. Mbi bieta sadisa bakulutu baba batu bobo beta siamisa?

¹⁷ Bakulutu bafueti ba bukhati khati mu bikadulu, ba mayindu mamboti, kadi ba mvualangani, ayi kadi ba mambu ma ngolo ngolo. Babakala beni beta siamisa bankaka mu kimvuka ayi beta kindisa kimvuka mu ba “bakangama mu mambu makuikama.” (Tito 1:9; 1 Tim. 3:1-3) Mu kifuani kiawu ayi mu ndiatulu’awu, bakulutu beta sadisa minsamuni bakutakananga thangu ka thangu mu zikhutukunu, mu kisalu ki tsamununu, ayi batulanga zindongokolo zi bawu veka. Mu thangu bakhomba ba babakala ayi ba baketo balembo dengana mambu maphasi, bakulutu balenda vanga mambu mawombo muingi ba bakindisa baluta tula mayindu mawu kuidi Yehova ayi mu zikhanu ziandi.

18. Bila mbi tutididi zitisa Yehova ayi luta ba pfika pfika kuidi niandi? (Tala phe ankadre “ Phila yibela pfika pfika kuidi Yehova.”)

¹⁸ Beto mana tadila bikadulu bimboti bi Yehova, tulenda tuba banga butubila Ntinu Davidi ti: “Bika n’zitusu wuba kuidi Yehova, Ditadi diama.” (Nku. 144:1) Yehova wela tatamana ba Nzambi yoyi tulenda tudila ntima. Mu luzingu lueto loso buba mu bununu, tuidi na bibila bi tuba ti: “Niandi wi Ditadi diama,” mu ba sikididi ti wela kue tusadisanga thangu ka thangu muingi tuluta kuenda kuntuala mu kipheve.​—Nku. 92:14, 15.