1. Mod ná Salmo 18:46, ¿né xí láani bitzak David a Jehová?

 NABANYNO ló toib Gudxlio ro guirá ór radzaʼ, né ro tisintiempsi labúu gac cós ni guitzaʼ mod nabanyno. ¡Balaati rialdó xcalnabanyno ni nanno que labúu guinabno Jehová gacné lóono! Ló artículo ni godudy bisuidyno que Jehová nac Dios ni nabany né que guirá ór noʼbu par gacnébu lóono. Guirá ór ni racnébu lóono, napno más confianz que «Jehová nabany», mod goniʼ David ló Salmo 18:46 (bíil láani). Per, después ni goniʼbu diitzcu, David goleʼbu laa Jehová «Guielaa xtuni». ¿Xigony bitzakbu Dios ni nabany né guielaa ni diti nabany?

2. ¿Xí guisuidyno ló artículo reʼ?

² Ló artículo reʼ guisuidyno xigony la Biblia ná que Jehová nac xomod toib guielaa, né xi rasuidyno de láani. Láaca sasuidyno ximod gonyno que Jehová gac Guielaa xtunyno. Por último sasuidyno tipnés mod ni labúu guisuʼno xidal cualidades ni napbu.

¿XIGONY GONIʼ DAVID QUE JEHOVÁ NAC XOMOD TOIB GUIELAA?

3. ¿Ximod raquiin la Biblia diitz guielaa? (Bibiʼ retrat).

³ La Biblia radzakni Jehová né toib guielaa par gacnéni lóono guientzaayno tipnés cualidades. Ló xidal textos, órni xpiin Jehová bunyxiroʼ láabu por cualidades ni napbu, goniʼyibu que nacbu xomod guielaa. Primer texto ni ná que Jehová nac toib «Guielaa» ngú Deuteronomio 32:4. Ló toib oración, Ana goniʼ «Diti noʼ toib guielaa xomod Dios xtunyno» (1 Sam. 2:2). Habacuc goleʼ laa Jehová «Guielaa xtuni» (Hab. 1:12). Ni bicaʼ Salmo 73 goniʼ mod nac Jehová né biquiimbu diitz «guielaa xtuny xcalnabani» (Sal. 73:26). Né Jehová goleʼbu laabu «Guielaa» (Is. 44:8). Guisuidyno tzón cualidades ni rony que gacbu toib guielaa,  né guibiʼno ximod labúu gonyno que gacbu «Guielaa xtunyno» (Deut. 32:31).

4. ¿Xigony labúu guinino que Jehová nac ro labúu guilaa buñ? (Salmo 94:22).

⁴ Jehová nac ro labúu guilaano. Órni rac toib guieedaʼ buñ labúu guilaa guieebu lainy toib bileʼ o xan toib guielaa. Modcuca órni racalóno toib galnagandaʼ labúu guilaano ronoʼ Jehová (bíil Salmo 94:22). Jehová rap lóono né raibybu lóono que ná tudyno ló galrrioʼob ló gudxliogox reʼ diti sácni por xiroʼ tiemp. Né diti ngúsi: ma bidudybu xtiitzbu que ló dzú ni sietra sabeʼbu guirá cós ni rasioʼob lóono né ni diti radudy lagary lóono tzoʼno goxt (Ezeq. 34:25, 26).

5. ¿Xí labúu gonyno par guilaano ronoʼ Jehová?

⁵ Toibtica mod ni labúu guilaano ronoʼ Jehová láani ngú gonyno oración. Órni ronyno láani racaʼno «paz xtuny Dios», ni rap xcalnabanyno né xpensaryno (Filip. 4:6, 7). Guibiʼno ni gosaclóo Artiom, toib hermano ni goyoʼ press por ni ronybu crer, né buny guantarybu toib buñ ni buny galrranabdiitz láabu né bitudy láabu ló galnatoy. Goniʼbu: «Guirá ór ni bunybu galrranabdiitz naʼ nigolú goyoʼya ló galrrasaʼ. […] Guirá ór gonaba Jehová nasaca sacró né gonaba sabiduría láabu. Dipa bisiana Jehová nac nitisi cós ni buny buñcu naʼ […]. Par naʼ, Jehová góc xomod toib lagary ro bilaaya».

6. ¿Xigony labúu gapno confianz lóo Jehová guirá ór? (Isaías 26:3, 4).

⁶ Labúu gapno confianz lóo Jehová. Xomodca toib guielaa o toib dainy diti rasis de xalagary, Jehová noʼbu guirá ór par gacnébu lóono. Labúu gapno confianz láabu portín láabu ngú «Guielaa por tipzó» (bíil Isaías 26:3, 4). Guirá ór nabanybu par gony cumplirbu né ni ma goniʼbu, guicadiagbu oración ni ronyno né gacnébu lóono órni caquiinni. Láaca napno confianz lóbu portín láabu diti rasiambu buñ ni rony xchiimbu (2 Sam. 22:26). Dipa sialadxbu guirá ni ronyno né guirá ór sadudybu xcalnasácbu lóono (Heb. 6:10; 11:6).

7. ¿Ximod racnéni lóono ni gapno confianz lóo Jehová? (Láaca bibiʼ retrat).

⁷ Stoib mod ni labúu gonyno que Jehová gac Guielaa xtunyno láani ngú gapno confianz lóbu. Nanno que racnéni lóono órni rasobno láabu dada órni radudyno ló galnagan (Is. 48:17, 18). Né guirá ór ni guibiʼno ximod racnébu lóono, confianz ni napno lóbu sac dxichni. Modcu sioʼno puext par labúu guicalóno prueby ni diti labúu ñony guantaryno pal diti ñacnébu lóono. Rioʼ ór noʼ galnagan ro diti noʼ chú labúu gacné lóono, per radudyno cuent que Jehová guirá ór noʼ né lóono né dipa sasiambu lóono. Toib herman ni laa Vladímir goniʼ: «Dzú ni gosaca que nigolú goyoʼya gaxtiguié Jehová, gocni órni goyoʼya lachquiip. Bisudi ñapa más confianz lóo Jehová portín goyoʼya tobi né diti labúu buni xitcal par natzaʼya mod cadudi».

8. a) ¿Xigony labúu guinino que Jehová dipa radzaʼ? b) ¿Ximod racnéni lóono guibiʼno Jehová xomod Guielaa xtunyno? (Salmo 62:6, 7).

 ⁸ Jehová diti radzaʼbu. Xomodca toib guielaa o toib dainy, Jehová rasagaʼdxichbu né dipa radzaʼbu. Mod nacbu né ni ma goniʼbu gonybu dipa radzaʼni (Mal. 3:6). Órni Adán né Eva góc nayaʼ, Jehová diti bitzaʼbu ni ma goniʼbu gonybu. Apóstol Pablo goniʼ que Jehová «diti ratzaʼbu ni ma goniʼbu» (2 Tim. 2:13). Ndeʼ radudy diitz que nac nitisi cós gony buñ o nac nitisi cós ni gac, Jehová diti satzaʼbu mod nacbu, ni nábu gonybu né ni rony mandarybu. Ni nanno guirá ndeʼ racnéni lóono par gapno confianz que órni tudyno ló galnagan guirá ór sacnébu lóono né sony cumplirbu guirá ni ma bidudybu xtiitzbu gonybu (bíil Salmo 62:6, 7).

9. ¿Xí rasuidylo ni gosaclóo Tatiana?

⁹ Stoib cós ni labúu gacné lóono par guibiʼno Jehová xomod toib guielaa ni labúu gapno confianz, láani ngú guisetnaladxno cualidades xtunybu né ni ma goniʼbu gonybu par Gudxlio né par buñgudxlio. Ndeʼ labúu gacné lóono par diti guireʼganno órni tudyno ló galnagandaʼ (Sal. 16:8). Ngú ni gosaclóo Tatiana, toib hermana ni goyoʼ press riolidxca por ni ronybu crer. Goniʼbu: «Buny lafuersyibu naʼ par ñaʼana tobi. [...] Primer buelt góc naganni, né xidal buelt bireʼgana». Per ni gocné láabu par ñony guantarybu galnagancu né nasacbu sacró stoib, láani ngú ni bunybu pensary que guirá ni gosaclobu racnéni Jehová né ni ma goniʼbu gonybu. Nábu: «Modcu bisetnaladxi que cadudi ló galnagancu portín nadxiʼya Jehová né nainy naʼ goni ni rioladxbu. Ngú ma gocné naʼ par diti tzoʼya galrrasaʼ por naʼsi».

10. ¿Ximod labúu gonylo de Jehová Guielaa xtunylo desde nigoreʼ?

¹⁰ Mápa mer guieed tiemp ni nigolú nagan né raquiin gapno confianz lóo Jehová. Por ngú, desde nigoreʼ gapno confianz que sadudybu ni caquiinno par gony guantaryno né diti guisianno láabu. ¿Ximod labúu gonylo láani? Bíil historias ni sieed ló la Biblia né experiencias xtuny xhermanno ni noʼ ló naareʼ. Buny pensary loni né bibiʼ ximod Jehová nacbu toib guielaa par xpiimbu. Ndeʼ sacné looy par gonylo que Jehová gac Guielaa xtunylo.

GUISUʼNO CUALIDADES XTUNY JEHOVÁ

11. ¿Xigony galán láani guisuʼno cualidades xtuny Jehová? (Láaca bibiʼ cuadriyen « Toib meta par herman mbioxhlas»).

¹¹ Ma bisuidyno tipnés cualidades ni rony que Jehová gac xomod toib guielaa. Nigoreʼ guisuidyno ximod labúu guisuʼno láani. Laʼga más ronyno rutirigaʼlni lóono par gacno xomod láabu, labúu sacnéno xhermanno lainy congregación. Por ejemplo, Jesús goleʼ laa Simón, Cefas (ni rac traducir xomod Pedro ni radudy diitz «tlaʼ guielaa») (Juan 1:42). Modcu bislooybu que Pedro nasialdó xcalnabany herman né diti nadzaʼbu. La Biblia láaca  ná que ancianos nac xomod «xpalaa guielaa» ni rap herman de congregación (Is. 32:2). Nigolú, guiráno labúu guisuʼno cualidades xtuny Jehová né gacno xomod guielaa ni racné herman ni noʼ lainy congregación (Efes. 5:1).

12. ¿Xí labúu gonyno par gacno toib lagary ro labúu guilaa xhermanno?

¹² Góc toib lagary ro labúu guilaa buñ. Pal herman radudy ló galrrioʼob xtol toib desgrasy, galrradíil o toib guerr, pentzi labúu guidudyno lidxno par guiaʼanyibu. Ló «dzú ni ma guidubylagaʼ», cós mal sacxiroʼni. Por ngú, sapno más oportunida par gacnéno saʼno (2 Tim. 3:1). Stoib mod ni labúu gacno toib lagary ro guilaa xhermanno láani ngú gacnéno layibu ló sentido emocional né espiritual. Por ejemplo, labúu guicacuento sacró herman ló reunión né modcu gacnéno par tzoʼ nakityibu né tzoʼ galrronladx lainy congregación. Nabanyno ló toib Gudxlio ro diti ragobioo buñ sacró saʼ. Por ngú, órni xhermanno rieed reunión, raniiny lóono guisacyibu que noʼyibu lainy toib lagary ro diti sioʼ xi sacyibu né ro buñ ragobioo layibu né galnadxiʼ.

13. ¿Ximod labúu gac ancianos toib lagary ro labúu guilaa herman? (Láaca bibiʼ retrat).

¹³ Ancianos labúu gacyibu toib lagary ro labúu guilaa herman ni cadudy ló galnagan. Por ejemplo, órni rioʼ desgrasy o galguitz, nimaca rayopyibu mod par gacnéyibu herman. Láaca racnéyibu herman ló sentido espiritual. Pal herman nan que toib anciano sacró ragobioo buñ, rioʼbu xalagary stipnés né rasaguelbu guicadiagbu, sanabyibu xcalrracné anciano reʼ. Cualidades cu ronyni que herman guisac que noʼ ni ronladx layibu né diti sasac naganyibu guisobyibu consej ni guidudy anciano layibu né la Biblia (1 Tes. 2:7, 8, 11).

14. ¿Ximod labúu guislooyno que labúu gap buñ confianz lóono?

 ¹⁴ Buny que stipnés gap confianz looy. Guiráno nainy lóono que stipnés gan que labúu gapyibu confianz lóono, né máspa órni cadudyibu ló galnagandaʼ (Prov. 17:17). ¿Ximod labúu gonyno par guimbu stipnés lóono xomod buñ ni labúu gapyibu confianz? Labúu gonyno rutirigaʼlni lóono par guisuʼno cualidades xtuny Jehová guirá dzú, por ejemplo, gony cumplirno né ni ma gonino né guidxinno ór ni ma gonino (Mat. 5:37). Láaca labúu gacnéno ni caquiin galrracné. Né láaca, órni tzoʼ ni guidudy toib dxiinien lóono, guisobno instrucciones ni bidudybu lóono par gonyno láani.

15. ¿Ximod racnéni congregación órni labúu rap herman confianz ló ancianos?

¹⁵ Ancianos ni labúu gap buñ confianz ló, racnéyibu congregación de xidal mod. Por ejemplo, órni toib anciano labúu rony que publicadores ni noʼ lainy grupo xtunybu gapyibu confianz par guininéyibu láabu órni caquiinyibu galrracné, ronybu que herman guisac que noʼ ni ran layibu.  Órni ancianos guirá ór noʼyibu puext par gacnéyibu xhermanyibu, ronyibu que herman guisac que noʼ ni ronladx layibu. Órni radudyibu consej ni sieed ló la Biblia né ló publicaciones ni rabeʼ Móz ni rony xinésni, né diti ló ni ronyibu pensary, ronyibu que herman gap confianz layibu. Né ngúca rac órni diti rasetyibu cós ni diti non gan herman né rony cumpliryibu xtiitzyibu.

16. ¿Ximod racnéni lóono diti guidzaʼno, né ximod racnéno stipnés?

¹⁶ Diti guitzaʼlo. Labúu gacno toib galán ejemplo de buñ ni diti radzaʼ pal rasobno ni ná Jehová ló guirá ni ronyno, né ragoʼno cuent ni ná la Biblia órni ragoʼno guicno gonyno toib cós. Pal rasuidyno la Biblia né rony nadipno fe xtunyno, guirá dzú sioʼno más dxich ló galnigolú. Diti sacno buñ ni diti nan xi gony né ni tiptisi ratzaʼ mod rony pensary, nili sadudyno lagary que ni rony pensary buñ né xcalrrasuidy gudxliogoxreʼ tzanéni lóono scareʼ scaruc (Efes. 4:14; Sant. 1:6-8). Né láaca, fe ni napno lóo Jehová né ló guirá ni ma goniʼbu gonybu, sacnéni lóono par diti guireʼganno órni guicaʼno notísy mal (Sal. 112:7, 8). Láaca labúu gacnéno ni cadudy ló galnagandaʼ (1 Tes. 3:2, 3).

17. ¿Ximod labúu gacné ancianos congregación par gapyibu toib fe dxich?

¹⁷ Ancianos non gacyibu buñ ni rony cós né midid, non coʼyibu xcalrrienyibu, tzoʼyibu ló diitz né diti cuenunysi gonyibu. Órni guirá ni rasuidyibu rabeʼyibu láani ló diitz ni nac fiel, racnéyibu par diti guidzaʼ congregación né rony nadipyibu láani (Tito 1:9; 1 Tim. 3:1-3). Órni nacyibu toib galán ejemplo né ranyibu herman, racnéyibu herman par diti gony faltyibu ló reunión, ló predicación né guisuidyibu xquiichyibu toibyibu. Né órni herman racaló galnagan ni ragoʼ layibu ló xiroʼ galrrasaʼ, rony animaryibu herman reʼ guisetnaladxyibu Jehová né ni nainy gonybu.

18. ¿Xigony nainy lóono gonyxiroʼno Jehová né guibigaxno más láabu? (Láaca bibiʼ cuadriyen « Toib mod ni labúu guibigaxno ronoʼ Jehová»).

¹⁸ Ni ma bisuidyno cualidades sacróyen xtuny Jehová, rasacno xomod David, ni goniʼ: «Gacxiroʼ Jehová, Guieela xtuni» (Sal. 144:1). Jehová nac né sac por tipzó toib Dios ni labúu gapno confianz. Ló guidopy xcalnabányno né dada órni guioʼxno, Jehová guirá ór sacnébu lóono par dipa galsitno de láabu. Modcu labúu guinino né confianz: «Láabu nacbu Guielaa xtuni» (Sal. 92:14, 15).