EMHUOGHAẠPH ITUUGHẠ PHỌ 23
AḌUỌR PHỌ 28 Oḍigh Arighirị r’aZihova
Aḍimhạgh Phọ AZihova Oru K’odị
“Amarugh phọ amhị katọl r’abidị, mị kaḍighi Enhaạn abidị.”—EZEK. 37:27.
EGBON
Idị yira kokuamhị osereghiạn ḍimhạgh phọ aZihova oru k’odị ḅilhẹ r’ipẹ odị ruphogh ghan bọ iyira idiphọ awe dị odị amhạgh oru k’odị.
1-2. Eeghe eghuan kụ edị aZihova angọ rebenhẹ phọ odị oḅạr bọ nyodị?
Eḍighi maạr dị oye apuru nyinhạ mọ, eeghe asiya kụ edị nạ amhoọgh r’aZihova? Nạ kapagharanhaạn ika? Eeni nạ kaḅẹm mọ ‘aZihova kụ Odẹ amhị, Enhaạn amhị r’oyaghirị amhị.’ Eeni nạ kaatughiạn kẹn ni inhọn itaanheẹn asiḍien dị egananami odọ oye phọ aZihova aru bọ esi anạ. Toroboiperolbọ, nạ amiịn ni aZihova idiphọ oye dị nạ odi k’odị ḍughụm?
2 Uw-emhạ phọ Devid amaanhiọm aZihova uwotu dị amhạgh we oru k’odị, kụ amaaniọm rebenhẹ phọ odị oḅạr bọ nyodị buphẹ uwotu phọ amhạgh bọ oru k’odị. Odị apuru mọ: “Sey Zihova, anhiạn kụ edị nạ kamạgh oru aani isiphẹ amarugh phọ anạ? Anhiạn kụ katọl siphẹ eeḅarạph iigbia phọ anạ?” (Ps. 15:1) Ikpo-onhụ phọ iphẹn phọ itughemhị iyira mọ yira kotue ni oḍighi we dị aZihova kamạgh oḍigh aani isiphẹ amarugh phọ odị. Iphẹn phọ remạ ghan mọ yira kotue ni oḍighi righirị odị. P’eeghe eboom eghuan dị aZihova ungọ iyira.
AZIHOVA RAWẠ MỌ OḌIGH SIPHẸ AMARUGH PHỌ ODỊ
3. Anhiạn kụ oḅẹl oye dị aZihova amhạgh oru oḍigh isiphẹ amarugh phọ odị, kụ aZihova r’opọ odị amhạgh bọ ulhoghoma ika ilọ asiya phọ abidị?
3 Oginha aZihova bịn kụ arọl ghan mem mọ odị k”omhiigh bọ olhẹm araraạr. Kuolọ esighẹ rekị bịn Odị alhẹm okpanhạ Oọny phọ odị. Olhoghi aZihova aḅaạl li omhạgh Oọny phọ odị olhọgh siphẹ amarugh phọ odị. ABaibul phọ aḅẹm mọ aZihova amhoọgh ni “ḍiḅeraạn” dị ebụgh iboom aghị esi Oọny phọ odị. AZizọs kụ oḅẹl oye dị odị amhạgh oru oḍigh isiphẹ amarugh phọ odị, kụ aZizọs amhoọgh ni kẹn “ibo aghị esi [aZihova] ḍio ḍio ḍio.”—Prov. 8:30.
4. Abuọ anhiạn kụ edị aZihova aḅilhẹ amhạgh oru oḍigh aani isiphẹ amarugh phọ odị?
4 AZihova aḅilhẹ ni alhẹm bunhọn aruukpaạny, kụ amhạgh aani ni bidị oru oḍigh isiphẹ amarugh phọ odị. ABaibul phọ akol ruukpaạny phọ abuẹn phọ mọ “amnụny Enaạn.” ABaibul phọ aḍeenhaan kẹn mọ bidị phọ umhoọgh ni oḅaạl olhoghi orọl r’aZihova. (Job 38:7; Dan. 7:10) Kụ esi ibadị asiạ, olhẹm aruwaloor phọ abuẹn phọ bịn kuḍighi budị aZihova amhạgh oru oḍigh isiphẹ amarugh phọ odị. Esighẹ rekị, aZihova alhẹm kẹn ni we. Kụ bidị phọ kẹn ni kotue ni oḍigh aani siphẹ amarugh phọ odị. Abuniin abudị odị amhạgh aani pọ Enoch, Noa, Ebraham, r’aJob. ABaibul phọ aḍeenhaan mọ bidị uḍighi righirị aZihova loor esi dị bidị ‘urelhean egey Enhaạn phọ.’—Gen. 5:24; 6:9; Job 29:4; Isa. 41:8.
5. Yira otuughạ eeghe siphẹ imiịn phọ edi bọ Ezekiel 37:26, 27?
5 Orụgh atum orụgh aZihova akiọm ni ghisigh ramạgh ghan righirị phọ odị oḍigh aani isiphẹ amarugh phọ odị. (Bạl Ezekiel 37:26, 27.) Esi omaạm, yira umhiịn siphẹ imiịn phọ Ezekiel mọ aZihova akạr rawạ mọ arebenhẹ phọ odị oḅạr bọ nyodị omhoọgh siya dị ekpulhạn r’odị. Odị aguanhaan oghiran “iyọ eephọ r’abidị.” Imiịn phọ ipẹ phọ rekaạph ghan ilọ amem dị abuẹn omhoọgh bọ oḍuom olhoghi ogheel k’akẹ r’abuẹn kotọl bọ siẹn ade phọ koḅophoghạn otọl siphẹ amarugh phọ odị, kụ iyạl phọ egu phọ oḍighi “ḍinhiin aḍita.” (Jọn 10:16) Kụ ipẹ kụ remite bọ nyiidiphọ!
ENHAẠN RUPHOGH GHAN NI IYIRA ETIGHERI EKPISI PHỌ YIRA ODI BỌ
6. Ika kụ idị oye katue aḍigh siphẹ amarugh phọ aZihova, kụ amarugh phọ odị odi eniin esi bịn ḍughụm?
6 Mem mọ rogẹ bọ Baibul phọ, amarugh oye iḍighi ghan esi dị oye phọ katue apooghian aḅilhẹ amoọgh oghoph esi omụ, olọph obobọ oghim. Oye dị omhạgh oḍigh aani isiphẹ amarugh phọ kakuphom ni owol mọ komaạr ri opogh nyodị. Mem dị yira oḅọgh loor ayira ongọ aZihova, pọ yira moḍigh siphẹ amarugh phọ odị. (Ps. 61:4) Yira rokelhọm ni oomo araraạr phọ odị mamiteom bọ oḍighi idị asiya phọ ayira r’odị kekpạr, kụ yira oḅilhẹ kẹn ni rokelhọm oḍigh arighirị r’abuerị phọ abuẹn odị mamhạgh aani bọ oḍigh aani isiphẹ amarugh phọ. Aweye oomo areelhe kotue ni oḍigh aani siphẹ amarugh phọ aZihova. Eeni nạ maghị ghan ni ookpomhoghan eephugh enhọn eelhe, kụ olhoghi anạ aḅaạl omhiịn abunhọn awe dị odi aani siphẹ amarugh phọ Enhaạn. Amarugh phọ aZihova odi ni torobọ esi dị arebenhẹ phọ odị ronaghanhạn bọ nyodị odi.—Ogan. 21:3.
7. Uḍighi ika kụ yira koḅẹm bọ mọ buphẹ oḅạr bọ aZihova kụ omhuughu bọ oḅilhẹ ni odi siphẹ amarugh phọ odị? (Miịn kẹn afoto phọ.)
7 Kụ kokaạph ika ilọ arebenhẹ phọ aZihova oḅạr bọ nyodị kụ momhugh bọ? Yira kokạr ri omeeraam mọ bidị odi ni pạ amarugh phọ odị ḍughụm? Ii! Uḍighi ika kụ yira koḅẹm bọ iduọn phọ? Loor esi dị bidị odi ni siphẹ iitughiạn phọ aZihova. AZizọs aḅẹm mọ: “AMozis aghaạph ni agananami mọ oḅerion abuphẹ momuughu bọ odi ghan ni. Siikpịgh phọ ipẹ eghaạph bọ ilọ ekpu eḍum onuzạ phọ, odị aghaạph ni aghol aZihova mọ ‘Emụgh Ebraham r’Aizik r’aJekọb.’ Oomo phọ abidị odi ni ropooghu esi Enaạn. Odị Enaạn abuphẹ odị bọ, k/elọ abuphẹ momuughu bọ.”—Luk 20:37, 38.
Ghalhamọ arebenhẹ aZihova dị oḅạr nyodị dị momhuughu bịn odi ni siphẹ amarugh phọ odị (Miịn ekpịgh phọ 7)
ASUỌ DỊ YIRA ROMOỌGH GHAN R’ARARAẠR DỊ EWẠ MỌ OḌIGHI
8. Eeghe asuọ kụ edị yira romoọgh ghan oḍigh isiphẹ amarugh phọ aZihova?
8 Idiphọ amarugh aḍighi bọ esi ophooghian ḅilhẹ r’oghoph esi olophiạ r’ogogo, ḅilhẹ r’oghim, idiphọ kẹn kụ edị esi amarugh phọ aZihova rekoph ghan buẹn koḍigh bọ esi atorobọ iyaạr dị kekạ siya phọ abidị r’odị, keḅilhẹ engọ bidị ogey oḍuom olhoghi ilọ aghisiph phọ. Eḍighi maạr dị yira oḅạr aZihova, iyaạr i/lo dị aSetan kuḍighi iyira dị kikpophonhom iyira k’agee-pọ. (Ps. 31:23; 1 Jọn 3:8) Siphẹ omhoom aḅirinhi phọ, aZihova kakiọm ni ghisigh akoph rebenhẹ phọ odị oḅạr bọ nyodị esi atorobọ iyaạr dị kekạ siya phọ abidị r’odị ḅilhẹ r’esi aḍuugh.—Ogan. 21:4.
9. Eeghe kụ idị aZihova rawạ ḍighaạgh abuẹn odị amhạgh bọ mọ oḍigh aani siphẹ amarugh phọ odị?
9 Ekạr ri eḍighi eboom eghuan oḍigh isiphẹ amarugh phọ aZihova, loor esi dị yira kotue ni okiọm ghisigh omoọgh siya dị ekpạr r’odị k’agee-pọ. Eeghe kụ idị yira kotue oḍighi oghiọm aghisigh orọl isiphẹ amarugh phọ odị k’agee-pọ? Eḍighi maạr dị oye amhạgh nyinhạ oghị k’odị, nạ kagona ni loor pidị nạ ka/ḍighi iyaạr dị kepin esi odị. Esi omaạm, eeni odị kawạ mọ kporonhaạn rokoro anạ kụ agbi oḍigh otu, kụ nạ katuụgh ni idiphọ phọ bịn aḍighi. Iginha phọ kẹn kụ edị ewạ mọ olhegheri raraạr phọ ipẹ aZihova rawạ bọ ḍighaạgh ayira, orue oghiọm aghisigh orọl ipạ amarugh phọ odị. Ephomhoghiạn phọ yira omhoọgh bọ oghị esi aZihova rinyu ghan iyira oḍighi oomo ilọ yira kotue oḍighi “ipẹ eḅeraạn bọ nyodị.” (Kọl. 1:10) Ghalhamọ r’iduọn aZihova aḍighi bọ ni oyaghirị ayira, odị aḍighi kẹn ni Enhaạn r’Odẹ ayira dị akpẹ olhọgh eegu. (Ps. 25:14) Ekpẹ ni oghiọm aghisigh ootughiạn ghan iphẹn phọ kụ omhiịn mọ yira olọgh ni nyodị eegu oomo amem. Yira olhọgh ghan nyodị eegu oomo amem, kilhoghonhaạn iyira ḍighaạgh oghel oḍighi araraạr dị kepin esi odị. Yira okạr rowạ “orelhean ghan Enhaạn r’olhegheri okụ.”—Mic. 6:8.
AZIHOVA AZOỌM NI OOMO ABUỌ IZRẠL PHỌ ORỌL BỌ EPẸ EDALẠ PHỌ ENIIN PHỌ ETEN PHỌ
10-11. Ika kụ idị eten phọ epẹ aZihova azoọm bọ we phọ odị epẹ edalạ phọ eḍeenhaan mọ odị razoọm ghan oomo awe phọ odị eniin phọ eten phọ?
10 AZihova razoọm ghan eniin phọ eten phọ oomo abudị odị amhạgh oḍigh aani isiphẹ amarugh phọ odị. (Rom 2:11) Yira ulhegheri iphẹn phọ loor esi eten phọ epẹ odị azoọm bọ we phọ Izrạl orọl bọ epẹ edalạ phọ aSinai.
11 Mem mọ aZihova atagharạn bọ we phọ odị esi adọl arebenhẹ epẹ Ijipt, odị amạ ni bupinyọn rikiạ dị kokumu ghan siphẹ ogbogo iiḅereghị phọ. Odị amạ ni nmụny phọ aLivai oḍighi inhọn iiḍighi siphẹ ogbogo iiḅereghị phọ. AZihova aḍighi ni idị abuẹn rokumuan bọ siphẹ ogbogo iiḅereghị phọ, obobọ abuẹn orugh bọ otuman, kokelhọm raraạr dị epu ilọ abuerị phọ awe phọ Izrạl ḍughụm? Eeye! AZihova azoọm ni oomo abuọ Izrạl phọ eniin phọ eten phọ.
12. Ika kụ idị aZihova aḍighi aḍeenhaan mọ odị razoọm ni oomo awe phọ Izrạl eniin phọ eten phọ? (Exodus 40:38) (Miịn kẹn afoto phọ.)
12 Torobọ onyọ Izrạl amhoọgh ni eepoogh oḍighi oyaghirị aZihova etigheri odọ oḍighi phọ odị aphạm bọ obobọ etigheri ekpisi phọ odị arugh bọ, mughumọ etuman ogbogo iiḅereghị phọ obobọ i/tuman. Esi omaạm, aZihova aḍighi idị oomo eelhe phọ omhiịn ghan ootụ phọ r’eekpoogh aniạn phọ erọl bọ anyụ ogbogo iiḅereghị phọ. (Bạl Exodus 40:38.) Mem dị ootụ phọ raḍuạ, ghalhamọ r’abuọ Izrạl dị orugh rikpisi dị ekelhạn ogbogo iiḅereghị phọ umhiịn ghan ni kụ omiigh ookoroghian araraạr abidị, r’oḅilhẹ okpooghi arogbogo phọ abidị pidị otue odaphạn aani eelhe phọ oḍuạ. (Num. 9:15-23) Oomo phọ awe phọ unhaghạn ghan ni mem lọ ophulha okuodụ phọ olhemọm bọ silva phọ oḅenhiọm awe phọ mọ omhiigh erelhe. (Num. 10:2) Esi iduọn phọ, orugh otuman ogbogo iiḅereghị phọ i/mạ ghan mọ oye phọ atuman aZihova apu bulọ orugh rikpisi dị ekẹl. Torobọ onyọ Izrạl atue ni atọl siphẹ amarugh phọ aZihova ḅilhe aḍuom olhoghi mọ aZihova kaaḅakị ni aḅilhẹ akoph nyodị. Iniin phọ kụ idị edi aani rodon, etigheri ekpisi lọ yira orugh, yira kotue ni omooghọm suọ iiḅakiọm mọ aZihova, oghoph ḅilhẹ r’ephomhoghiạn phọ odị.
Ogbogo iiḅereghị phọ arọl bọ siphẹ ogbo amarugh phọ Izrạl aḍeenhaan mọ aZihova razoọm ghan oomo phọ awe phọ eniin phọ eten phọ (Miịn ekpịgh phọ 12)
ARARAẠR DỊ EMITE ḌIO AYIRA DỊ EḌEENHAAN MỌ AZIHOVA RAZOỌM GHAN NI REBENHẸ PHỌ ODỊ ENIIN PHỌ ETEN PHỌ
13. AZihova aḍighi eeghe oḍeenhaan mọ odị razoọm ni oomo phọ ayira eniin phọ eten phọ?
13 Abunhiin arebenhẹ Enhaạn rodon otugh ni otuman ekpisi dị emhụ agadạ phọ obobọ olạ agadạ phọ odi. Abuniin okạr rokumuan ghan riisi phọ iphẹn phọ. Esi iduọn phọ, awe phọ abuẹn phọ kotue ni oḍighi aani ibadị araraạr phọ roḍighi bọ riisi phọ iphẹn phọ kụ ooḅukuan r’abuphẹ roḍiemhiom bọ kẹn. Abuniin oḍighi buphoghom eghir obobọ odi inhọn arukumuan oomo amem mọ egbatanhaạn bọ. Eḍighi maạr dị nạ u/moọgh aani eniin eepoogh phọ ephẹn phọ, kuphom ni owol mọ nạ odi aani ni siphẹ amarugh phọ odị ḅilhẹ mọ odị apomhoghiạn ni nyinhạ kụ aḅilhẹ alhegheri nyinhạ agey. Kụ odị aḅilhẹ kẹn raphogh ghan nyinhạ. (1 Pit. 5:7) AZihova ramiteom ghan ni raraạr dị kekparamhị siya arebenhẹ phọ odị r’odị, kaaḅakị aḅilhẹ aghoph bidị.
14. Eghẹn kụ enhọn eten dị aZihova maḍeenhaan mọ odị razoọm ghan ni oomo phọ awe phọ eniin phọ eten phọ?
14 Enhọn iyaạr dị eḍeenhaan mọ aZihova razoọm ghan ni oomo phọ awe phọ eniin phọ eten phọ pọ omhiịn mọ awe kirokirọ oteẹny ni Baibul phọ. Ugẹ Baibul phọ onhụ aHibru, Aramaic, ḅilhẹ r’aGrik. Kuolọ iphẹn phọ remạ ghan mọ buphẹ kotue bọ obạl Baibul phọ runhụ phọ iphẹn phọ kụ utuman aZihova opu buphẹ ko/tue bọ ḍughụm? Eeye.—Mat. 11:25.
15. Eeghe araraạr kụ iḍeenhaan mọ aZihova razoọm ni oomo phọ awe phọ eniin phọ eten phọ? (Miịn kẹn afoto phọ.)
15 AZihova iyira u/mhạgh oḍighi arighirị odị loor esi dị yira okị askul obobọ onaghạn iḅẹl arunhụ phọ ipẹ ogeọm bọ Baibul phọ. Odị aḍighi idị awe kirokirọ siẹn oomo aḅirinhi phọ kotue oteẹny Baibul phọ aphamhanhạm bọ osụ-olhoghi phọ odị, mughumọ okị askul obobọ u/kị. Mogbạ ni Ekpo-onhụ phọ odị, Baibul phọ otenheghi runhụ dị mepel li oniin oonịr; pidị awe oomo aḅirinhi phọ otue omooghọm suọ itughemhị phọ edi bọ pạ phọ, oḅilhẹ otuughạ olegheri ilọ oḍigh arighirị r’odị.—2 Tim. 3:16, 17.
Uḍighi ika kụ iduọn mogbạ bọ Baibul phọ otenhe ibadị arunhụ eḍeeenhaan bọ mọ aZihova razoọm ghan oomo phọ ayira eniin phọ eten phọ? (Miịn ekpịgh phọ 15)
TỌL SIPHẸ AMARUGH PHỌ AZIHOVA
16. Odaphạn Iiḍighi 10:34, 35, yira koḍighi eeghe orue orọl siphẹ amarugh phọ aZihova?
16 Eḍighi ni eboom eepoogh orọl isiphẹ amarugh phọ aZihova. Onhọn oye o/lho dị katue ughuraam iyira, apomhoghiạn kụ aḅilhẹ unmo iyira inmo idiphọ aZihova. Oḅarạm isiẹn, odị razoọm ghan oomo phọ awe phọ eniin phọ eten phọ, etigheri ekpisi phọ yira odi bọ, dọl phọ ayira, eelhe phọ ayira, onhụ phọ yira roḅạ bọ r’asiạ ayira. Ghalhamọ r’iduọn phọ ni, oginha abuphẹ ronaghanhạn ghan bọ nyodị kụ edị odị rasighẹ ghan idiphọ arighirị.—Bạl Iiḍighi 10:34, 35.
17. Yira kooḅeghiọn eeghe emhuoghaạph phọ etum bọ siẹn?
17 Siphẹ Psalm 15:1, aDevid apuru sipuru phọ iphẹn: “Sey Zihova, anhiạn kụ edị nạ kamạgh oru oḍigh aani isiphẹ amarugh phọ anạ? Anhiạn kụ katọl siphẹ eeḅarạph iigbia phọ anạ?” Dị eego esi uwaloor iigbia phọ, aZihova angọ ni Devid ophanyanhaạn asipuru phọ iphẹn phọ. Emhuoghaạph phọ etum bọ siẹn yira kooḅeghiọn iniin araraạr dị yira kotue oḍighi kụ otọl siphẹ amarugh phọ aZihova.
AḌUỌR PHỌ 32 Take Sides With Jehovah!
