SIJÉ POU LÉTID 23
CHANSON 28 Dyé Jéhova, Ki Moun Ki Kay Jan’w?
Jéhova Ka Ba Moun On Bèl Envitasyon Pou Antwé An Kay Li
‘Tant mwen kay épi yo, èk mwen kay vini Dyé yo.’—IZIKÈL 37:27 NWT.
SA NOU KAY APWANN AN ATIK SALA
Atik sala kay édé nou pou ni pli apwésiyasyon pou bèl envitasyon-an Jéhova ban nou pou antwé an kay li, èk pou mannyè-a Jéhova ka otjipé nou.
1-2. Ki envitasyon Jéhova ka ba sé sèvant li-a?
SI AN moun mandé’w: ‘Ki mannyè ou ka gadé Jéhova?’ Kisa ou té kay di’y? Pitèt ou té kay di’y: ‘Jéhova sé Papa mwen, i sé Dyé mwen, èk i sé Jan mwen.’ Osi ou pé katjilé asou lòt tit ében lòt mannyè pou dékwi Jéhova. Kanmenm, ès ou janmen katjilé konsèné Jéhova kon an ‘Mèt Kay’, an moun ki ka envité’w an kay li?
2 Pou moutwé bon wilasyon-an Jéhova ni épi sé sèvant li-a, Wa David té konpawé Jéhova kon an mèt kay, èk sé sèvant li-a kon moun i envité an kay li. David té mandé Jéhova: “Bondyé Senyè, ki moun ki sa wèsté an Kay ou? Ki moun ki sa viv asou mòn-an ki sa ou yonn-an?” (Sam 15:1) Konsa an sé vèwsé sala nou ka apwann nou sé moun Jéhova envité an kay li, sa vlé di, nou sé jan Bondyé. Ès sa pa on bèl pwivilaj?
JÉHOVA VLÉ NOU WÈSTÉ AN KAY LI
3. (a) Ki moun Jéhova envité pwèmyé an kay li? (b) Ki mannyè yo té ka fè yonn a lòt santi?
3 Avan Jéhova koumansé fè tout bagay, i té pa kò’y. Mé apwé an lè, Jéhova fè pwèmyé Gason’y. Èk lè’y fè sa, i té menm kon an mèt kay ki té envité pwèmyé Gason’y an kay li. Wi, sa té bay Jéhova an chay tjè kontan, èk osi, Gason’y ‘té ka toujou kontan [lè’y] té épi’y’.—Pwov. 8:30.
4. Ki lòt moun Jéhova envité an kay li?
4 Apwé Jéhova fè pwèmyé Gason’y, i fè sé nanj-lan, èk i envité yo an kay li tou. Bib-la ka kwiyé sé nanj-lan ‘gason Bondyé’ èk yo kontan yo la épi Jéhova. (Jòb 38:7; Dann. 7:10) Èk pou plizyè, plizyè lanné, jan Bondyé sété sèlman sé lèspwi-a, sé nanj-lan ki té ka viv an syèl épi’y. Mé pli ta, Jéhova fè lézòm, èk yo osi té twapé envitasyon-an pou antwé an kay li. Adan sé moun sala sété Inòk, Nowa, Abrahanm, èvèk Jòb. Èk Bib-la di, yo té jan Jéhova paski yo té obéyi’y.—Jen. 5:24; 6:9; Jòb 29:4; Izay. 41:8.
5. Kisa nou ka apwann an pwofèsi-a an Izikèl 37:26, 27?
5 Pou plizyè syèk, Jéhova ka kontiné envité moun pou vini an kay li. (Li Izikèl 37:26, 27.) Pou ègzanp, an pwofèsi Izikèl nou ka apwann ki, Bondyé vwéman vlé sé sèvant li-a ki fidèl pou ni an bon wilasyon épi’y. Èk i pwonmèt pou fè ‘yon agwéman lapé épi yo.’ Bon. Pwofèsi sala ka palé konsèné tan-an lè sèvant Bondyé ki ni èspwa-a pou alé an syèl, èk sé sa ki ni èspwa-a pou viv asou latè-a kay an lilyon an kay Jéhova kon “yon sèl twipo”. (Jan 10:16) Èk pwofèsi sala ka fèt vwé apwézan!
NÉPÒT KOTÉ NOU YÉ BONDYÉ KA OTJIPÉ NOU
6. (a) Kisa an moun ni pou fè pou antwé an kay Jéhova? (b) Ki koté kay Jéhova yé?
6 An tan Bib-la, an tant ében an kay sété an plas koté an moun té sa pozé èk twapé pwotèksyon hòd mové tan. Èk lè on mèt kay wisivwè on moun an kay li diwan mové tan, moun-lan té sa ni asiwans-lan ki, mèt kay-la té kay otjipé’y byen. Bon. Lè nou dèdiké lavi nou pou Jéhova, sé konmsi nou ka antwé an kay li. (Sam 61:4) Konsa, nou ni tout sa nou bizwen pou tjenn bon wilasyon-an nou ni épi Jéhova fò, èk pou enjwi konpany lòt moun Jéhova envité an kay li. Èk osi, kay Jéhova pa adan yon sèl péyi. Pou ègzanp, pitèt ou ja alé an lòt péyi pou atandé an konvansyon, èk ou jwenn épi lòt fwè èk sè ki kontan yo an kay Bondyé tou. Alò, népòt koté nou yé, si nou ka sèvi Jéhova fidèlman nou an kay li.—Wév. 21:3.
7. Lè sèvant Jéhova mò, ès yo an kay li toujou? (Gadé pòtwé-a osi.)
7 An chay sèvant Jéhova ki fidèl ja mò. Ès yo an kay Jéhova toujou? Absoliman! Mé pouki nou sa di sa? Ében, sa sé paski Jéhova ka tjenn yo an menmwa’y. An Louk 20:37, 38 Jézi di: “Èk konsèné kwèsyon-an si moun kay wésisité hòd lanmò, jik sa Moziz ékwi-a ka moutwé’w a klè ki sa ka fèt pou vwé. Lè i ékwi listwa-a konsèné wazyé bwilé-a, i di kon sa Bondyé sé Bondyé-a Abrahanm, Ayzak èk Jakòb ka adowé-a. Zòt ka kwè ki sé moun sala té ja mò, mé Bondyé sav ki yo ka viv toujou.”
Jis sèvant fidèl Jéhova ki mò ka wèsté an kay Bondyé. (Gadé pawagwaf 7)
SÉ BENNÉFIS-LA NOU KA TWAPÉ ÈK SÉ WÈSKONSABILITÉ-A NOU NI AN KAY JÉHOVA
8. Ki bennéfis nou ka twapé paski nou an kay Jéhova?
8 Sé moun-lan Jéhova envité an kay li ka twapé an chay bennéfis. Pou ègzanp, yo ka twapé pwotèksyon hòd népòt bagay ki sa donmajé bèl wilasyon yo épi Jéhova. Èk yo ni on bèl èspwa pou tan ki ka vini. Anfen, lè nou wèsté pwé Jéhova, la pa ni anyen Satan sa fè nou Jéhova pa kay wanjé an tan pou vini. (Sam 31:23; 1 Jan 3:8) Èvèk an latè nèf-la, Jéhova kay kontiné pwotéjé sé sèvant li-a hòd népòt bagay ki sa donmajé wilasyon yo ni épi’y, èk i kay pwotéjé yo jis hòd lanmò.—Wév. 21:4.
9. Kisa nou sipozé fè si nou vlé wèsté an kay Jéhova?
9 I vwéman sé an gwo lonnè pou nou an kay Jéhova. Wi, nou sa ni an bon wilasyon épi Jéhova pou tou tan. Mé kisa nou sipozé fè si nou vlé wèsté an kay Jéhova? Ében, si an moun envité’w lakay li, ès ou té kay vlé konnèt sa ou ni pou fè pou’w plè mèt kay-la? Mé wi. Pou ègzanp, moun-lan pé mandé’w pou tiwé soulyé’w avan ou antwé an kay li, èk ou kay fè sa. An menm mannyè-a, nou vlé konnèt sa Jéhova vlé nou fè pou nou kontiné wèsté an kay li. Anfen, paski nou enmen Jéhova, sa ka pousé nou pou fè tout sa nou pé pou “toujou plè Bondyé”. (Kòl. 1:10) Sé vwé, Jéhova sé Jan nou, mé nou vlé toujou chonjé i osi sé Bondyé nou èk Papa nou. Alò nou vlé toujou moutwé’y lonnè, èk wèspé. (Sam 25:14) Sa kay édé nou pou pa fè anyen ki kay ofwansé’y, èk sa kay osi édé nou pou toujou abésé kò nou kon nou ka maché épi’y.—Mayk. 6:8.
JÉHOVA PA TÉ MOUTWÉ PWÉFÉWANS AN MANNYÈ-A I TÉ TWÉTÉ NASYON IZWAYÈL AN SAVANN SÈK-LA
10-11. Ki mannyè Jéhova moutwé i pa té ni pwéféwans an mannyè-a i té twété jan Izwayèl an savann sèk-la?
10 Jéhova pa ka moutwé pyèsonn i envité an kay li pwéféwans. (Ronm 2:11) Èk nou ka wè sa a klè, an mannyè-a i té twété jan Izwayèl paditan yo té an savann sèk-la, an Saynay.
11 Pou ègzanp, apwé Jéhova sové pèp li hòd èslavaj an péyi Éjip, i apwenté pwèt pou wann sèvis an tabènak-la, èk osi i bay sé Livayt-la lòt twavay pou fè an tabènak-la. Alò, ès Jéhova té otjipé sé moun-lan ki té ka wann sèvis an tabènak-la, ében sa ki té ka wèsté pli pwé tabènak-la pli mèyè pasé sé moun-lan ki té ka wété lwen tabènak-la? Non! Jéhova pa té fè sa, paski i pa ka moutwé pwéféwans.
12. An ki lòt mannyè Jéhova té moutwé i pa té ni pwéféwans an mannyè-a i té twété jan Izwayèl? (Ègzodòs 40:38) (Gadé pòtwé-a osi.)
12 Chak moun an nasyon Izwayèl té sa vini bon jan épi Jéhova, menm si i té ka wann sèvis an tabènak-la opa, ében i té ka wèsté pwé tabènak-la ében lwen’y. Pou ègzanp, Jéhova té fè asiwé tout nasyon Izwayèl té sa wè nwaj-la èk difé-a ki té anlè tabènak-la. (Li Ègzodòs 40:38) Alò népòt lè nwaj-la koumansé alé, jis moun ki té ka wèsté byen lwen tabènak-la té sa wè’y. Konsa, yo té sa asanblé sé bagay yo-a, démouté sé tant yo-a, èk alé ansanm épi sé lézòt pèp-la. (Lim. 9:15-23) Èk tout moun té sa tann son sé dé (2) twonpèt-la ki té fèt an dajan, ki té ka fè yo sav sé lè-a pou yo alé. (Lim. 10:2) Alò, i a klè, sé moun-lan ki té ka wèsté pwé kay Bondyé, pa té ni on pli mèyè wilasyon épi Bondyé pasé sa ki té ka wèsté lwen kay li. Anfen, chak jan Izwayèl té sa vini bon jan épi Jéhova, èk té sa ni asiwans-lan ki, Jéhova té kay djidé’y èk pwotéjé’y. Èk an menm mannyè-a jòdi, népòt koté nou ka wèsté asou latè sala, Jéhova kay moutwé nou i enmen nou, i mélé épi nou, èk i kay pwotéjé nou.
Awanjman-an Bondyé té mété an plas pou tabènak-la ka moutwé a klè i pa ni pwéféwans. (Gadé pawagwaf 12)
ÈGZANP AN TAN NOU KI KA MOUTWÉ JÉHOVA PA NI PWÉFÉWANS
13. Poutji nou sa di Jéhova pa ka moutwé pwéféwans an tan nou?
13 Jòdi jou, adan pèp Bondyé ka wèsté pwé pwensipal òfis Tèmwen Jéhova ében pwé yon òfis bwanch. Adan fwè èk sè ka twavay an sé plas sala, èk a kòz di sa, yo sa patajé an sé aktivité-a ki ka fèt an sé plas sala. Osi, yo ka asosiyé épi sé fwè-a ki ka pwan douvan an ògannizasyon-an. An plis di sa, la ni fwè ki ka voyajé pou enkouwajé sé kongwigasyon-an, ében yo ka wann sèvis an plen adan an lòt mannyè. Mé menm si ou pa ka enjwi sé pwivilaj sala, ou sa ni asiwans-lan ki Jéhova ja envité’w an kay li èk i enmen’w. Èk osi, chonjé, Jéhova pa ka moutwé pwéféwans, i konnèt ou byen èk i ka potjiwé sa’w bizwen. (1 Pita 5:7) Anfen, Jéhova ka potjiwé manjé spiwitwèl ba tout sé sèvant li-a, èk i ka djidé yo èk pwotéjé yo.
14. Ki lòt bagay Jéhova fè ki ka moutwé i pa ni pwéféwans?
14 Bib-la té ékwi an twa (3) langaj: Hibrou, Araméyik, èk Gwik. Alò, ès sa vlé di moun ki sa li sé langaj sala pli pwé Jéhova pasé lòt moun? Mé non! (Maf.11:25) Anfen, an lòt wézon nou sav Jéhova pa ni pwéféwans, sé paski i fè asiwé moun owon latè-a sa li Bib-la.—Maf. 11:25.
15. Ki lòt bagay konsèné Bib-la ki ka moutwé Jéhova pa ni pwéféwans? (Gadé pòtwé-a osi.)
15 Jéhova pa ka envité sèlman moun ki ni gwo endikasyon, ében moun ki sa li sé langaj-la Bib-la té ékwi adan pou vini jan’y. Lavéwité-a sé sa, Jéhova ka fè asiwé lasajès li avélab pou tout moun owon latè-a, pa sèlman pou moun ki ni gwo endikasyon. Wi, paski Jéhova fè asiwé moun twadwi Bib-la an plizyè mil langaj, sa ka moutwé a klè, i pa ni pwéféwans. Konsa, i posib pou moun owon latè-a twapé bennéfis an sa Bib-la ka enstwi, èk osi, yo sa apwann mannyè yo sa vini jan Bondyé.—2 Tim. 3:16, 17.
Jòdi, Bib-la avélab an plizyè mil langaj. Konsa, ki mannyè sa ka moutwé Jéhova pa ni pwéféwans? (Gadé pawagwaf 15)
WÈSTÉ AN KAY JÉHOVA
16. Silon Twavay 10:34, 35, kisa nou ni pou fè pou nou sa wèsté an kay Jéhova?
16 I sé vwéman an lonnè pou Jéhova envité nou an kay li. I janti, i plen lanmityé, èk i ka otjipé nou byen. Anfen, Jéhova sé pli mèyè Mèt Kay-la nou sa janmen ni. Osi, i pa ni pwéféwans. Jéhova ka byenvini nou tout, i pa mélé ki koté nou ka wèsté, kilti nou, was nou, lafanmi nou, laj nou, endikasyon nou, ében si nou sé an fanm ében an nonm. Mé kanmenm, Jéhova ka byenvini sèlman moun ki ka obéyi’y, èk ki ka fè sa ki dwèt.—Li Twavay 10:34, 35.
17. Kisa nou kay diskité an lòt atik-la?
17 An Sam 15:1, David té mandé Jéhova: “Bondyé Senyè, ki moun ki sa wèsté an Kay ou? Ki moun ki sa viv asou mòn-an ki sa ou yonn-an?” Èk Jéhova té sèvi David menm pou wéponn sé kwèsyon sala. Alò an lòt atik-la, nou kay diskité adan sé bagay-la nou sipozé fè pou plè Jéhova èk wèsté jan’y.
CHANSON 32 Défann Jéhova!
