1-2. Ma lubbe ki Jabuli 15:​1, lwongo mamwonya ango ma Jehovah miyo bot luticce ma lugen?

 KA NGAT mo openyi ni: ‘In ineno Jehovah calo obedo anga i kwoni?’ Iromo gamo ni, ‘Jehovah obedo Wora, Lubangana, ki Larema.’ Twero bedo ni itamo bene pi nyig lok mukene ma itwero tic kwede me tito nga ma Jehovah obedo. Ento tika dong nino mo itamo ni ibedo welo pa Jehovah?

² Kabaka Daudi oporo Jehovah ki lagwok wele dok oporo luticce ma lugen ki Welene. En openyo ni: “Ai Rwot [Jehovah], anga ma bibedo i kemani? Anga ma bibedo i wi got meri maleng?” (Jab. 15:1) Ki i tyeng man, wapwonyo ni watwero bedo wele i kema pa Jehovah—nyo lureme. Meno mono pe obedo lwongo me deyo tutwal ma oa ki bot Jehovah?

JEHOVAH MITO NI WABED WELENE

3. Anga ma obedo welo mukwongo pa Jehovah, dok Jehovah ki welone meno guwinyo nining?

³ Ma peya Jehovah ocako cweyo jami, en onongo tye kene. Ento i nge kare mo en ocweyo Wode me kayo. Jehovah obedo calo lagwok wele ma olwongo welone mukwongo i kemane, dok cwinye obedo yom adada me timo meno. Baibul tito ni Jehovah “cwinye obedo yom” i kom Wode. Dok Wode bene, obedo ki “yomcwiny madwong mada i nyime.”—Car. 8:30.

4. Jo mene ma lacen gudoko wele pa Jehovah?

 ⁴ Lacen, Jehovah ocweyo lumalaika. Gin bene kilwongogi me bedo wele. Baibul lwongo lumalaika ni “awobe pa Lubanga” dok nyuto ni cwinygi yom me bedo kacel ki Jehovah. (Yubu 38:7; Dan. 7:10) Pi mwaki mapol adada, wele pa Lubanga onongo gubedo jo ma gibedo kacel kwede i polo keken. Lacen, en ocweyo dano dok gin bene onongo gitwero doko welene. Jo mogo i kin welene onongo tye iye Enoka, Nua, Abraim, ki Yubu. Baibul nyuto ni gubedo lurem Jehovah pien guwinyo dog Lubanga.—Acak. 5:24; 6:9; Yubu 29:4; Ic. 41:8.

5. Gin ango ma watwero pwonyone ki i lok pa lanebi ma nonge i Ejekiel 37:​26, 27?

⁵ Pi cencwari mapol dong, Jehovah omedde ki lwongo lureme me bedo welene. (Kwan Ejekiel 37:​26, 27.) Me labolle, ki i lok pa lanebi Ejekiel, wapwonyo ni Lubanga mito ni luticce ma lugen gubed ki wat macok kwede. En ocikke ni ebimoko “gicikke me kuc” kacel kwedgi. Lok pa lanebi man tito pi kare mo ma jo ma gitye ki gen me kwo i polo ki jo ma gitye ki gen me kwo i lobo gibiribbe kacel i kema pa Jehovah macalo “lwak acel.” (Jon 10:16) Meno tye ka cobbe i kare-ni!

LUBANGA GWOKOWA KA MO KEKEN MA WATYE IYE

6. I yo ma nining ma ngat moni doko kwede welo i kema pa Jehovah, dok kema man nonge kwene?

⁶ I kare me Baibul, kema onongo obedo ka ma ngat mo twero yweyo iye dok nongo gwok ki i jami calo ceng nyo kot. Welo ma onongo tye i kema pa ngat mo onongo bedo ki gen ni rwod kema meno bigwokke. Ka wadyero kwowa bot Jehovah, wadoko wele i kemane. (Jab. 61:4) Watye ki cam me cwiny madwong ata kacel ki lurem mabeco ma gin bene gubedo wele pa Jehovah. Ento kema ma En olwongowa iye-ni pe kiguro i kabedo acel keken. Twero bedo ni dong iwoto wa i lobo ma woko ci ibedo i gure madit ma kwako lobe mapol, dok irwatte ki jo mukene ma cwinygi yom me bedo i kema pa Lubanga. Kema pa Jehovah tye nonge ka mo keken ma luticce ma lugen ginonge iye.—Yabo 21:3.

7. Pingo watwero waco ni jo ma lugen ma guto pud gitye wele i kema pa Jehovah? (Nen bene cal.)

⁷ Ento jo ma lugen ma dong guto  woko kono? Tika pud watwero waco ni gubedo wele i kema pa Jehovah? Ada! Pingo watwero wacone kit meno? Pien Jehovah wiye po i komgi maber adada ma ki tung bote nongo pud gitye kwo. Yecu otito ni: “Jo muto twero cer, Moses kikome bene onyuto, i dul ma gikwano iye lok i kom caka, ka ma en olwongo iye Jehovah ni, ‘Lubanga pa Abraim, Lubanga pa Icaka, ki Lubanga pa Yakobo.’ Dong En pe Lubanga pa jo muto, ento Lubanga pa jo makwo; pien gin ducu gitye kwo ki tung bote.”—Luka 20:​37, 38, NWT.

MOT MA WANONGO KACEL KI TIC MA TYE I WIWA

8. I yo ma nining ma wele pa Jehovah ginongo adwogi maber ki i bedo i kemane?

⁸ Kema pa Jehovah gwoko welene ki i kom gin mo keken ma twero balo watgi kwede dok miyo botgi gen ma kome pi anyim. Ka wamedde ki bedo cok ki Jehovah, ci Catan pe bitwero timo gin mo keken ma bibalo watwa ki Jehovah matwal. (Jab. 31:23; 1 Jon 3:8) I lobo manyen, Jehovah bimedde ki gwoko lureme pe ki i kom gin ma balo watgi kwede keken, ento bene ki i to.—Yabo 21:4.

9. Gin ango ma Jehovah mito ki bot welene?

⁹ Obedo deyo madit me bedo i kema pa Jehovah. Watwero bedo ki wat macok kwede ma rii pi naka. Gin ango ma omyero watim ka wamito medde ki bedo welene? Ka kilwongi i paco pa ngat moni, ibibedo ki miti me ngeyo gin ma won paco meno mito ni itim. Me labolle, en twero mito ni iluny warni woko ma peya idonyo i ot, dok ibiye timone. I yo acel-lu, wamito ni wange gin ma Jehovah mito ki bot jo ma gimito medde ki bedo wele i kemane. Marwa pi Jehovah tugo cwinywa me timo jami ducu ma watwero me “yomo cwinye maber.” (Kol. 1:10) Dok kadi bed waneno Jehovah calo Laremwa, ento waniang ni en bene obedo Lubangawa ki Wonwa, pi meno en opore me nongo worowa. (Jab. 25:14) Omyero wiwa pe owil i kom lok meno dok kare ducu wabed ki woro matut pire. Woro matut kit meno bikonyowa me gwokke ki i timo gin mo keken ma cwero cwiny Jehovah. Kare ducu wamito ‘wot kacel ki Lubangawa ki mwolo.’—Mika 6:8.

JEHOVAH PE ONYUTO APOKAPOKA I KARE PA LUICRAEL

10-11. Jehovah otero rok me Icrael nining i kare ma gitye i tim me Cinai, dok meno nyuto nining ni en pe poko kin dano?

¹⁰ Jehovah pe nyuto cwiny me apokapoka i kit ma en tero kwede ki welene. (Rom. 2:11) Watwero neno man ki i kit ma en otero kwede Luicrael i kare ma gitye i tim me Cinai.

¹¹ I nge laro jone ki i opii i Ejipt, Jehovah ocimo lulamdog me tic i kema me woro. En bene ocimo Lulevi me konyo tic mukene ma onongo kitimo i kema me woro. Tika jo ma onongo gitiyo i kema nyo ma gitongo gony cok ki kema, ginongo gwok maber makato jo mukene? Pe tye kit meno! Jehovah pe poko kin dano.

12. Kit ma Jehovah otero kwede Luicrael i dye tim nyuto nining ni en pe poko kin dano? (Nia 40:38) (Nen bene cal.)

¹² Laicrael mo keken onongo twero bedo larem Jehovah kadi bed en tiyo i kema me woro nyo pe, dok kadi bed en  otongo gony cok ki kema nyo pe. Me labolle, Jehovah oweko onongo twere pi rok me Icrael ducu me neno wir me pol ki wir me mac ma onongo cung i wi kema me woro. (Kwan Nia 40:38.) Ka pol owarre ki i wi kema dok ocako wot i kabedo manyen, kadi wa jo ma onongo gutongo gonygi ka mabor onongo gitwero nenone. Onongo gitwero coko jamigi, gidolo kemagi, dok gicako wot kacel ki Luicrael mukene-ni. (Wel 9:​15-23) Luicrael ducu onongo gitwero winyo ka kikuto tum aryo me ryal me nyuto ni lwak myero gucak wot. (Wel 10:2) Dong, bedo cok ki kema me rwatte onongo pe nyuto ni ngat moni tye ki wat macok ki Jehovah loyo ngat ma bedo ka mabor. Me ka meno, Laicrael mo keken onongo twero bedo welo pa Jehovah kun bedo ki gen ni Jehovah bitele dok bigwokke. Tye marom aroma i kare-ni bene. Labongo paro pi ka ma wabedo iye i wi lobo i kare-ni, Jehovah marowa, paro piwa dok gwokowa.

JEHOVAH PE POKO KIN DANO I KARE-NI

13. Pingo watwero waco ni Jehovah pe poko kin dano i kare-ni?

¹³ Jo pa Jehovah mukene i kare-ni gibedo cok ki gang kalwa madit nyo cok ki jang gang kal me lobo moni. Jo mukene gitiyo i kabedo magi. Macalo adwogine, jo magi gitwero nywako i tic mapol ma timme i kabedo magi dok giribbe ki jo ma gitye ka telo wiwa. Jo mogo gitiyo tic me limo adwol nyo tic pi kare malac mukene. Ka in itye i kin pol pa Lucaden ma pe gitye ki mot me tic magi, bed ki gen ni pud itye welo pa Jehovah dok en mari adada. En ngeyi maber dok miyo boti jami ducu ma mitte. (1 Pet. 5:7) Jehovah miyo cam me cwiny bot ngat acel acel i kin luticce, dok en tirogi, kun gwokogi bene.

14. Gin ango mukene ma Jehovah ominiwa ma nyuto ni en pe poko kin dano?

 ¹⁴ Labol mukene ma nyuto ni Jehovah pe poko kin dano aye ni en oweko twerre ki dano ducu ma i wi lobo-ni me kwano Baibul. Buk Maleng man kikwongo coyone i leb adek: leb Ibru, Aram, ki Grik. Tika jo ma gitwero kwano leb ma kikwongo coyo iye Baibul gitye ki wat macok ki Jehovah loyo jo ma pe gitwero kwanone? Pe tye kit meno.—Mat. 11:25.

15. Lok mukene ango madok i kom Baibul ma nyuto ni Jehovah pe poko kin dano? (Nen bene cal.)

¹⁵ Jehovah pe lwongowa me bedo lureme pien ni wabedo jo ma gukwano i rwom ma lamal nyo ni wangeyo leb ma kikwongo coyo iye Baibul. Jehovah oweko ryekone tye nonge bot jo ducu ma i wi lobo-ni, ento pe jo ma gukwano i rwom ma lamal keken. Lokke Baibul dong kigonyo i leb alip mapol; pi meno, dano ma i twok lobo-ni ducu gitwero nongo adwogi maber ki i gin ma Baibul pwonyo kun giniang kit me doko lurem Lubanga.—2 Tem. 3:​16, 17.

MEDDE KI BEDO WELO PA JEHOVAH

16. Ma lubbe ki Tic pa Lukwena 10:​34, 35, watwero medde ki bedo welo pa Jehovah nining?

¹⁶ Pud dong obedo deyo madit ya me bedo welo pa Jehovah i kemane! En aye lagwok wele ma pud dong lakica dok lamar loyo. Medo i kom meno, en pe poko kin dano. En jolo wan ducu labongo paro pi kabedo ma waa ki iye, rwom me kwanwa, rokwa, kakawa, mwakawa, nyo ka wabedo co nyo mon. Ento Jehovah jolo jo ma gitye luwiny bote keken macalo welene.—Kwan Tic pa Lukwena 10:​34, 35.

17. Watwero nongo ngec mukene madok i kom bedo welo pa Jehovah ki kwene?

¹⁷ Kit ma kicoyo kwede i Jabuli 15:​1, Daudi openyo lapeny magi: “Ai Rwot [Jehovah], anga ma bibedo i kemani? Anga ma bibedo i wi got meri maleng?” Ci Jehovah otiyo ki Daudi me gamo lapeny magi i tyeng ma lubo. Pwony ma lubo man binyamo jami mogo ma omyero watimgi me yomo cwiny Jehovah kun wamedde ki bedo Lureme.