1-2. Mɩnla ɔnwʋmɔ ɔhʋanɩ yɛ Gyehova fa ma yɩ azʋ̃mɩvʋlɔ nɔhʋanlɛmaa a?

 KƐ OBU Gyehova se a? Ebiye a ɛkɛhã kɛɛ, ‘Gyehova dɩ mɩ zɩ, mɩ Nyamɩnlɩ nɩɩ mʋ ɔhɔnwʋ.’ Ebiye a, ɔwɔ abodini anzɛnyɩɩ ndwokɔ mvʋlɔ mɔɔ ɔkɔhʋla kɛva kehile kezimɔ obu Gyehova nɩ. Naasʋ̃, asʋ̃ obu yi sʋ̃ kɛɛ abiye mɔɔ ɩdʋ salɛ ɩvʋlɔ wʋ kɛɛ ɛɣɩlá yɩ awudo a?

² Bulombunli Devidi valɩ ɔhɔnwʋvalɛ mɔɔ ɩwɔ Gyehova nɩɩ yɩ azʋ̃mɩvʋlɔ nɔhʋanlɛmaa bɛ avinli nɩ dindianlɩ ɔhɔnwʋvalɛ mɔɔ ɩwɔ abiye mɔɔ ɩtʋ salɛ ɩfʋlɔ yɩ ɔhɔnwʋmmɔ kɛɛ bɛɣɩla yɩ awudo nɩ nwʋ. Iɣizialɩ kɛɛ: “O Gyehova, Aninyia yɛ ɩkɛɣa wʋ ɛdamɛ aliyia nu a? Aninyia yɛ ɩkɔwʋwa wu file nwanzanwanza yɩ zʋ a?” (Ndw. 15:1) Odwokɔ eyi ma yɛnwʋ kɛɛ, sa yɛkʋla yɛba Gyehova yɩ ɛdamɛ aliyia yɩ nu, kile kɛɛ, sa yɛkʋla yɛba yɛyɛ yɩ ɔhɔnwʋmmɔ. Eyi dɩ ɔnwʋmɔ ɔhʋanɩ kezile paa.

GYEHOVA PƐ KƐƐ YƐBA YƖ AWUDO

3. Aninyia yɛ Gyehova lili bɔmʋnlɩ manlɩ ɩɣalɩ yɩ awudo a, na nɩ kɛ bɛ avinli dɩ ise a?

³ Ansaana Gyehova kɔwɔ nninyeni nɩ, nɩ yɩzayɩ nkʋ̃ yɛ ɩwɔ kɛ a. Naasʋ̃ aɣinzi yi, ɩwɔlɩ yɩ Ɣa mɔɔ ili bɔmʋnlɩ nɩ. Gyehova anyɩ leli paa kɛɛ ɩɣa ɩyɛlɩ kɛɛ abiye mɔɔ ɩdʋ salɛ ɩvʋlɔ yɩ ɛyɛvʋlɔ mɔɔ ili bɔmʋnlɩ ma ɩɣa ɩwʋwa yɩ ɛdamɛ aliyia yɩ nu. Bayɩbʋlʋ ma yɛnwʋ yɩ kɛɛ, nɩ Gyehova “ɩpɛ yɩ Ɣa yɩ yi odwokɔ baaba.” Na Gyisɛsɩ mɔɔ ɩdɩ yɩ ɛyɛvʋlɔ mɔɔ ili bɔmʋnlɩ nɩ, nɩ ‘yɩ anyɩ de wɔ Gyehova yɩ anyunu daabaa.’—Ɛɣɛ. 8:30.

4. Aninyiammɔ dɔkʋ̃ sʋ̃ yɛ bɛɣalɩ Gyehova yɩ awudo a?

 ⁴ Mɛyɩ mɛda nɩ, Gyehova wɔlɩ awɔvʋlɔ na ɩmanlɩ bɔnlʋmmɔ sʋ̃ bɛɣalɩ yɩ awudo. Bayɩbʋlʋ yɩ fʋlɔ awɔvʋlɔ yɩ kɛɛ “Nyamɩnlɩ mmalɛ,” na ɩma yɛnwʋ kɛɛ bɛ anyɩ de wɔ Gyehova yɩ awudo. (Dwb. 38:7; Da. 7:10) Alʋbɔ sʋ̃maa dualɩ numɔ mɔɔ nɩ bɛzabɛ mɔɔ bɔwɔ sʋlɔ yɩ la yɛ bɔwɔ Gyehova yɩ awudo kɛɛ yɩ ɔhɔnwʋmmɔ a. Aɣinzi yi, ɩwɔlɩ mmenii na bɔnlʋmmɔ sʋ̃ bɛɣalɩ yɩ awudo. Nɩ bo nu be yɛ lɛ Yinɔkɩ, Nowa, Abilehamɩ, nɩɩ Dwoobu. Bayɩbʋlʋ yɩ ma yɛnwʋ kɛɛ nɩ bɛdɩ Gyehova yɩ ɔhɔnwʋmmɔ, iluwakɛɛ bediyeli yi odwokɔ.—Gyn. 5:24; 6:9; Dwb. 29:4; Ayɩ. 41:8.

5. Mɩnla yɛ yɛkɔhʋla yekozuma wɔ nkɔmɩhyɛ mɔɔ ɩwɔ Izikɩyɛlɩ 37:​26, 27 yɩ nu a?

⁵ Alʋbɔ sʋ̃maa yɛ dɩ yɛ Gyehova hɔ zʋlɔ dʋ salɛ ɩvʋlɔ mmenii kɛɛ bɛɣɩla yɩ awudo a. (Kɩnga Izikɩyɛlɩ 37:​26, 27.) Kɛ ndianwʋ nɩ, wɔ Izikɩyɛlɩ yɩ nkɔmɩhyɛ yɩ nu nɩ, yesuma kɛɛ Gyehova pɛ paa kɛɛ yɩ azʋ̃mɩvʋlɔ nɔhʋanlɛmaa bɛ nɩɩ yɩ kenyia ɔhɔnwʋvalɛ mɔɔ numɔ yɛ sɩ. Ɩbɔ anʋhʋba kɛɛ ‘ɩ nɩɩ bɛ kɛyɛ azʋ̃nudwolɩyɛ apamɩ.’ Ɔzɔ nkɔmɩhyɛ yɩ ma yɛnwʋ kɛɛ, mmɩlɩ be kɛɣa mɔɔ bɛzabɛ mɔɔ bɔwɔ anyɩnlɩlazʋ kɛɛ bɔkɔhɔ sʋlɔ nɩɩ bɛzabɛ mɔɔ bɔwɔ anyɩnlɩlazʋ kɛɛ bɔkɔwʋwa azɩlɛ yɩ zʋ nɩ kɔwɔ numɔ kɛɛ “owuanɩ okuwu ɔkʋ̃” wɔ yɩ sɛnkyɩlɛdɩ ɔhʋanɩ zʋ ɛdamɛ aliyia yɩ nu. (Dwɔ. 10:16) Ɔzɔ mmɩlɩ yɩ yɛ lɛ nnɛ!

DƖKA BELA MƆƆ YƐWƆ NƖ, NYAMƖNLƖ DWƖNƖ YƐ NWƲ

6. (a) Mɩnla ɔhʋanɩ zʋ yɛ abiye ba Gyehova yɩ ɛdamɛ aliyia yɩ nu a? (b) Ɛhɩnla dɩka yɛ Gyehova yɩ ɛdamɛ aliyia yɩ wɔ a?

⁶ Wɔ Bayɩbʋlʋ mmɩlɩ nu nɩ, nɩ ɛdamɛ aliyia dɩ dɩka mɔɔ abiye kʋla kɔ de yɩ mʋnlɩ na inyia banɩwɔlɛ sʋ̃. Sɛ abiye kɔ abiye yɩ ɛdamɛ aliyia nu a, ikila ɔhʋanɩ kɛɛ enii kʋ̃ nɩ kehila yɩ bʋwɔ. Sɛ yeyila yɛ nwʋ zʋ yɛma Gyehova a, nɩ yɛɣa yɩ sɛnkyɩlɛdɩ ɔhʋanɩ zʋ ɛdamɛ aliyia yɩ nu. (Ndw. 61:4) Eyi ma yenyia sunzuma ɔfʋã nu alɩyɛ sʋ̃maa nɩɩ ɔhɔnwʋmmɔ mɔɔ bɔnlʋmmɔ sʋ̃ bɛɣa Gyehova yɩ awudo. Gyehova yɩ sɛnkyɩlɛdɩ ɔhʋanɩ zʋ ɛdamɛ aliyia yɩ íni dɩka pɔkyɩɩ be, mfomi ɩwɔ dɩka bela. Ebiye a, odu ɔhʋanɩ hɔ ayiyialɩyɛ aditili yi be wɔ manlɩ fʋlɔ zʋ, na ɔhɔ yiyia mmenii mvʋlɔ mɔɔ bɛ anyɩ de kɛɛ bɔwɔ Nyamɩnlɩ yɩ awudo nɩ. Meti Gyehova yɩ ɛdamɛ aliyia yɩ wɔ dɩka bela mɔɔ yɩ azʋ̃mɩvʋlɔ nɔhʋanlɛmaa wɔ nɩ.—Yik. 21:3.

7. Mɩnla ti mɔɔ yɛkɔhʋla yɛkɛhã kɛɛ, Nyamɩnlɩ yɩ azʋ̃mɩvʋlɔ mɔɔ bowu nɩ, bɛlanwʋ la bɔwɔ Gyehova yɩ ɛdamɛ aliyia yɩ nu a? (Kila mfonyini yi sʋ̃.)

⁷ Na Gyehova yɩ azʋ̃mvʋlɔ nɔhʋanlɛmaa mɔɔ bowuwu nɩ sʋ̃ ɛ? Asʋ̃ ntɩyasɩ wɔ numɔ  kɛɛ yɛkɛhã kɛɛ bɛlanwʋ la bɔwɔ Gyehova yɩ ɛdamɛ aliyia yɩ nu a? Nyɛ! Mɩnla ti mɔɔ yɛkʋla yɛkã zɔ a? Iluwakɛɛ, Gyehova lanwʋ la kakɛ bɛ. Gyisɛsɩ hilehileli eyi nu, ɩhanlɩ kɛɛ: “Na Mosisi sʋ̃ ikile nu petee kɛɛ, botunwo awuvʋlɔ bɛba nnwʋanlɩ nu. Wɔ Nyamɩnlɩ yɩ odwokɔ nɩ mɔɔ ɩfalɩ ndibe tuko ɛgyɩkɩ̃ɩ̃ nɩ mɔɔ ɩsɔɔ nɩ nwʋ nɩ. Mosisi hanlɩ kɛɛ, ‘Niibenyia ɩdɩ Abilehamɩ Nyamɩnlɩ, Ayɩzɩkɩ Nyamɩnlɩ nɩɩ Gyekɔpʋ Nyamɩnlɩ nɩ.’ Ɔzɔ ti Nyamɩnlɩ ɩdɩ mmenii mɔɔ bowu naasʋ̃ bɛda azɩ, nɩɩ mmenii mɔɔ bɛda azɩ sikalɛpɛyɩ mɔɔ bɔsʋ̃mɩ yɩ nɩ, bɛ Nyamɩnlɩ.”—Lk. 20:​37, 38.

NYILALƐ NƖƖ ASƐDƖ MƆƆ ƖWƆ GYEHOVA YƖ AWUDO

8. Mɩnla nyilalɛ yɛ bɛzabɛ mɔɔ bɛba Gyehova yɩ ɛdamɛ aliyia yɩ nu nɩ nyia a?

⁸ Kɛmɔ ɛdamɛ aliyia ma abiye nyia mmʋnlɩlelɛ nɩɩ banɩwɔlɛ nɩ, ɔzɔ la yɛ Gyehova yɩ ɛdamɛ aliyia yɩ bɔ yɩ ɔhɔnwʋmmɔ nwʋ banɩ wɔ nninyeni mɔɔ ɩkɔhʋla kɛzɩkɛ bɛ nɩɩ yɩ avinli abusunwawɔlɛ yɩ nwʋ, na ɩma benyia eɣile be nwʋ anyɩnlɩlazʋ sʋ̃. Sɛ yɛkɔ zʋ yebike Gyehova a, Setanɩ lɔ́kʋla kɛyɛ dɩyɛ bela mɔɔ ɩkɛva ɔhawʋ ɩkɛɣa yɛ zʋ daabaa. (Ndw. 31:23; 1 Dwɔ. 3:8) Wɔ oyuwadɩ fʋlɔ yɩ nu nɩ, Gyehova kɔhɔ zʋ kɔwɔ yɩ ɔhɔnwʋmmɔ nɔhʋanlɛmaa nwʋ banɩ wɔ nninyeni mɔɔ ɩkɔhʋla kɛzɩkɛ bɛ nɩɩ yɩ avinli abusunwawɔlɛ nɩɩ owulo nwʋ.—Yik. 21:4.

9. Mɩnla yɛ Gyehova kila ɔhʋanɩ kɛ bɛzabɛ mɔɔ bɛɣa yɩ ɛdamɛ aliyia yɩ nu nɩ kɛyɛ a?

⁹ Ɩdɩ ɔnwʋmɔ ɔhʋanɩ kezile kɛɛ yɛwɔ Gyehova yɩ ɛdamɛ aliyia yɩ nu. Sa yɛkʋla yɛ nɩɩ yɩ nyia ɔhɔnwʋvalɛ mɔɔ ɩkɔwʋwa kɛnɩ daabaa. Sɛ yɛpɛ kɛɛ yɛkɔ zʋlɔ yɛbʋwa yɩ ɛdamɛ aliyia yɩ nu a, mɩnla yɛ ɩsɛ kɛɛ yɛyɛ a? Sɛ abiye tʋ salɛ fʋlɔ wʋ kɛɛ ɛɣɩla yɩ awudo a, ɛkɛbɛ yɩ kɛɛ ɔkɔnwʋ kezimɔ ɩpɛ kɛɛ ɛyɛ wʋ dɩyɛ wɔ kɛnɩ. Ebiye a, ɩkɛhã kɛɛ ɛyɩ́ wʋ mbabʋwa yɩ ansaana wʋahɔ aliyia yɩ nu, na ɛkɛyɛ zɔ. Ɔzɔ la sʋ̃ yɛ yɛpɛ kɛɛ yɛnwʋ mɔɔ Gyehova pɩbɛ wɔ bɛzabɛ mɔɔ bɛpɛ kɛɛ bɔkɔ zʋlɔ bɔbʋwa yɩ ɛdamɛ aliyia yɩ nu bɛ kɛnɩ a. Ɔlɔlɛ mɔɔ yɛwɔ yɛma Gyehova nɩ kã yɛ ma yɛyɛ mɔɔ yɛkɔhʋla bela ‘yɛsɔ yɩ anyɩ.’ (Kol. 1:10) Ɩwɔ numɔ kɛɛ Gyehova dɩ yɛ Ɔhɔnwʋ dɩyɛ, naasʋ̃ ɩdɩ yɛ Nyamɩnlɩ nɩɩ yɛ Zɩ sʋ̃. Meti ɩsɛ kɛɛ yɛfa annidi yɛma yɩ. (Ndw. 25:14) Eyi ti, ɩsɛ kɛɛ mmɩlɩ munwala ye kunlu tuli yɩ nwʋ, na íni kɛɛ yɛma yɛ ɛɣɛɛlɛ fi enii kʋ̃ mɔɔ ɩdɩ nɩ kyɩ̃. Ɔzɔ annidi kezile mɔɔ yekenyia yɛkɛma yɩ nɩ kɔwʋwa yɛ ma yɛkɔhwɩ̃ yɛ nwʋ wɔ nyɛlɩyɛ bela mɔɔ ɩábɛ yɩ nɩ nwʋ, na yɛ nɩɩ yɛ Nyamɩnlɩ ‘yɛaluwa wɔ kãnwʋazɩ nu’ eɣile bela.—Mik. 6:8.

GYEHOVA Ɩ NƖƖ YIZILAYAMAA MUNWATĨĨ LILI YI BƲWƆ

10-11. Mɩnla ɔhʋanɩ zʋ yɛ kezimɔ Gyehova nɩɩ Yizilayamaa yɩ lili wɔ Sɩnayɩ ɛsɛlɛ zʋ nɩ da yɩ ali kɛɛ iáhila mmenii anyunu a?

¹⁰ Gyehova ɩ nɩɩ mmenii mɔɔ bɔwɔ yɩ awudo munwala di yi pɛpɛɛpɛ. (Wul. 2:11) Yɛnwʋ eyi wɔ kezimɔ ɩ nɩɩ Yizilayamaa yɩ lili wɔ Sɩnayɩ ɛsɛlɛ yɩ zʋ nɩ nu.

¹¹ Mmɩlɩ mɔ Gyehova leli Yizilayamaa yɩ wɔ alɔngɔzʋ̃mɩnlɛ nu wɔ Igyibiti mɛda nɩ, ɩyɩlɩ azɔfʋ kɛɛ bɔzʋ̃mɩ́ wɔ yɩ ayiyialɩyɛ ɛdamɛ aliyia yɩ nu. Ɩmanlɩ Levimaa yɩ be sʋ̃ yɛlɩ egyima wɔ ɛdamɛ aliyia nwanzanwanza yɩ nu. Asʋ̃ Gyehova hilalɩ bɛzabɛ mɔɔ nɩ bɔsʋ̃mɩ yɩ wɔ ɛdamɛ aliyia nwanzanwanza yɩ nu anzɛnyɩɩ bɛzabɛ mɔɔ nɩ bebike kɛnɩ nɩ bʋwɔ dɛlalɩ nɣalɩyɛmaa yɩ a? Anhã! Gyehova mɛyɩ, iáhila mmenii anyunu.

12. Mmɩlɩ mɔ nɩ Yizilayamaa yɩ wɔ ɛsɛlɛ yɩ zʋ nɩ, mɩnla yɛ Gyehova yɛlɩ va hileli kɛɛ iáhila mmenii anyunu a? (Ɛkɩsadɔsʋ 40:38) (Kila mfonyini yi sʋ̃.)

¹² Kɛ nɩ Yizilayanii be sʋ̃mɩ wɔ ɛdamɛ aliyia yɩ nu anzɛnyɩɩ ɩázʋmɩ wɔ kɛnɩ, kɛ ɩda ibike nwʋmɔ anzɛnyɩɩ ɩ́da bike nwʋmɔ nɩ, nɩ bo  munwala bɔkʋla bɛ nɩɩ Gyehova nyia abusunwawɔlɛ. Kɛ ndianwʋ nɩ, Gyehova hilalɩ kɛɛ Yizilayamaa munwala kɔnwʋ mununkumi fadumi nɩɩ sɩnɩ fadumi mɔɔ ɩba ikyina ayiyialɩyɛ ɛdamɛ aliyia yɩ zʋ nɩ. (Kɩnga Ɛkɩsadɔsʋ 40:38.) Sɛ nɩ mununkumi yi bɔ yɩ tʋ fa yɩ anyɩ kile dɩka fʋlɔ a, nɩ bɛzabɛ mɔɔ bɛda aɣinzi aɣinzi mɔɔ bɛáɣike ɛdamɛ aliyia yɩ po bɔnwʋ yɩ, na bɔbɔ yɩ tʋ bokunwahunwa be nninyeni munwa na botudu bɛ ɛdamɛ nniyia yɩ, na bɛ nɩɩ Yizilaya manlɩ munwala bɔ agyiakɛ kɔ. (Nɔ. 9:​15-23) Nɩ mmenii yi munwala bɛtɩ dwɛtɛ abentiyia anwɩ̃ yɩ dede yi mɔɔ ikile kɛɛ ɩsɛ kɛɛ abiyela bɔ yɩ tʋ kɛɛ ɩkɔɔ nɩ. (Nɔ. 10:2) Amba, nɩ sɛ abiye sʋ̃mɩ wɔ ɛdamɛ aliyia yɩ nu anzɛnyɩɩ ɩda ibike kɛnɩ a, mɛyɩ iáhile kɛɛ ɩ nɩɩ Gyehova wɔ abusunwawɔlɛ sʋnʋnkʋ̃ be. Mfomi, nɩ Yizilayamaa munwala wɔ ɔnwʋmɔ ɔhʋanɩ kɛɛ bɛ nɩɩ Gyehova kenyia abusunwawɔlɛ, na sa bɔkʋla benyia anwʋlazʋ sʋ̃ kɛɛ ikehile bɛ ɔhʋanɩ na ɩawɔ bɔ nwʋ banɩ. Ɔzɔ la yɛ nnɛ sʋ̃, ɩávalɩ nwʋmɔ dɩka bela mɔɔ yɛwɔ nɩ Gyehova dɔ yɛ, ikila yɛ, na ɩbɔ yɛ nwʋ banɩ a.

GYEHOVA Ɩ NƖƖ YI MMENII DI YI PƐPƐƐPƐ WƆ NNƐ

13. Mɩnla ti mɔɔ yɛkɔhʋla yɛkɛhã kɛɛ, Gyehova ɩ nɩɩ abiyela di yi pɛpɛɛpɛ wɔ nnɛ a?

¹³ Nnɛ sʋ̃, Nyamɩnlɩ yi mmenii be da bike Gyehova Dasɩvʋlɔmaa be egyimayɛlɛdɩka ti anzɛnyɩɩ Bɛtɩlɩ azʋlɔtʋ. Abiyemmɔ sʋ̃ yɛ egyima wɔ kɛnɩ ankasa. Iluwa eyi ti, bo nu be nyia ɔnwʋmɔ ɔhʋanɩ bɛ nɩɩ bɛzabɛ mɔɔ bedi nninyeni anyunu nɩ bɔ numɔ yɛ egyima wɔ ɔzɔ nnɩka yɩ. Bo nu be sʋ̃mɩ kɛɛ mansini zʋ ehilalɛmaa, na mvʋlɔ sʋ̃ sʋ̃mɩ wɔ mmɩlɩ munwala ɔzʋ̃mɩnlɛ egyima titili mvʋlɔ nu. Sɛ ɛkɩnla mmenii sʋ̃maa mɔɔ béni ɔzɔ ɔnwʋmɔ ɔhʋanɩ yɩ kakɩ yɩ nwʋ a, nyia anwʋlazʋ kɛɛ ɛlanwʋ la ɛdɩ Gyehova yɩ ɔhɔnwʋ, na ɩdɔ wʋ. Izi ye nu bela bʋwɔ na ɩfa yɛ ahyinyiadɩ ɩma yɛ. (1 Pit. 5:7) Gyehova ma yɩ sʋ̃mɩvʋlɔ bela sunzuma ɔfʋã nu alɩyɛ, ikile ɔhʋanɩ yɩ, na ɩbɔ yɩ nwʋ banɩ.

14. Mɩnla dɩyɛ fʋlɔ yɛ Gyehova yɛ fa kile kɛɛ ɩába mmenii nu a?

 ¹⁴ Ɔhʋanɩ fʋlɔ mɔɔ Gyehova duwa zʋlɔ kile kɛɛ ɩába mmenii nu yɛ lɛ kɛɛ, ɩma mmenii mɔɔ bɔwɔ oyuwadɩ dɩka bela nyia Bayɩbʋlʋ yɩ be kɩnga. Belili bɔmʋnlɩ bɛhɛlɛlɩ Bayɩbʋlʋ yɩ wɔ Hibulu, Alamɩkɩ nɩɩ Giliki ndɛnɩ nu. Asʋ̃ eyi kile kɛɛ bɛzabɛ mɔɔ bɔkʋla bɛkɩnga Bayɩbʋlʋ yɩ wɔ ndɛnɩ mɔɔ belili bɔmʋnlɩ bɛva bɛhɛlɛlɩ yɩ nu nɩ, bɛ nɩɩ Gyehova wɔ abusunwawɔlɛ sʋnʋnkʋ̃ be bɛtɛla abiyemmɔ a? Anhã, ɩdɩ zɔ kʋlaa.—Mt. 11:25.

15. Mɩnla dasɩlɛ yɛ ɩma yɛnwʋ kɛɛ Gyehova ɩáyɩyɩ mmenii nu a? (Kila mfonyini yi sʋ̃.)

¹⁵ Sɛ Gyehova kele yɛ kediã numɔ kɛɛ yɩ ɔhɔnwʋmmɔ a, iáhila kɛɛ yɛwɔ nnimidi sʋnʋnkʋ̃ be anzɛnyɩɩ yɛkʋla yɛkɩnga ndɛnɩ mɔɔ bɛva bɛhɛlɛlɩ Bayɩbʋlʋ yɩ nɩ. Mfomi, Gyehova ma mmenii mɔɔ bɔwɔ oyuwadɩ munwala nyia yi Odwokɔ yɩ zʋ mfasʋ, na kɛ bɛzabɛ mɔɔ bezi ɔnwʋma nkʋ̃ a. Behile yi Odwokɔ Bayɩbʋlʋ yɩ tʋ bɔhɔ ɛdɩndɛlɛ abʋmɩ abʋmɩ sʋ̃maa nu; eyi ti mmenii mɔɔ bɔwɔ oyuwadɩ yɩ munwala kʋla nyia yi ehilehilelɛ zʋ mfasʋ, na bosuma kezimɔ bɛkɛɣa kɛyɛ yɩ ɔhɔnwʋmmɔ.—2 Tim. 3:​16, 17.

KƆ ZƲLƆ BƲWA GYEHOVA YƖ AWUDO

16. Kɛmɔ Egyima 10:​34, 35 kile nɩ, kɛ ɩkɛyɛ na yɛahɔ zʋ yɛawʋwa Gyehova yɩ awudo a?

¹⁶ Ɩdɩ ɔnwʋmɔ ɔhʋanɩ kezile paa kɛɛ Gyehova le yɛ wɔ yɩ sɛnkyɩlɛdɩ ɔhʋanɩ zʋ ɛdamɛ aliyia yɩ nu. Ɩdɩ ɔhɔnwʋ mɔɔ yi kunlu dɩyɛnɛ na ɩwɔ ɔlɔlɛ ɩtɛla abiyela. Akʋ̃ sʋ̃, ide abiyela ɩba yɩ awudo, ɩávalɩ nwʋmɔ dɩka mɔɔ ɛda, kezimɔ bɛdɩdɩlɩ wʋ, wu nnimidi, wʋ nnwʋnlamɩ kɔla, abusunwa mɔɔ ɔzʋ̃ numɔ, wʋ ɔlʋbɔ, anzɛnyɩɩ kɛɛ ɛdɩ benyia anzɛnyɩɩ baalɛ. Naasʋ̃ bɛzabɛ mɔɔ bɛyɛ sutiye bɛma yɩ nkʋ̃ la yɛ ide bɛ ɩba yɩ awudo a.—Kɩnga Egyima 10:​34, 35.

17. Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

¹⁷ Kɛmɔ Ndwomi 15:1 kã nɩ, Devidi ɣizialɩ ndwokɔ be kɛɛ: “O Gyehova, aninyia yɛ ɩkɔwʋwa wʋ ɛdamɛ aliyia nu a? Aninyia yɛ ɩkɔwʋwa wu file nwanzanwanza yɩ zʋ a?” Gyehova yi sunzuma hanlɩ Devidi ma ɩyɩlɩ ndwokɔɣizialɛ eyimmɔ munwa. Wɔ dɩyɛzumanlɛ mɔɔ ili kɛnɩ yɩ nu nɩ, yekehila nninyeni pɔkyɩɩ be mɔɔ ɩsɛ kɛɛ yɛyɛ na ama yɛahɔ zʋ yɛayɛ Gyehova yɩ ɔhɔnwʋmmɔ anzɛnyɩɩ yɛawʋwa yɩ ɛdamɛ aliyia yɩ nu.