1, 2. Иегованыҥ чындык ишчилерине кандый арга берилген?

 СЛЕР Иегованы кем деп айдараар? Оны байла: «Ол мениҥ Кудайым, мениҥ Адам, мениҥ Најым» — деп айдар болороор. База канай айдар эдеер? А слерди Иегова бойыныҥ айылына кычырган деп сананадаар ба?

² Давид Иегованы јаан байканныҥ ээзине тӱҥдештирген. А оныҥ чындык ишчилерин — оныҥ байканына айылдап келген улусла. Давид Иегованаҥ мынайып сураган: «О Иегова, сениҥ байканыҥда кем айылчы болор? Сениҥ агару тууҥда кем јадар?» (Сар. 15:1). Бу сӧстӧрдӧҥ мындый неме кӧрӱнип јат: кижи дезе Иегованыҥ айылына айылдап келер аргалу, ол эмезе оныҥ најызы болор аргалу. Кандый јаан кӱндӱ дезеер?! Кижиниҥ куйка-бажы јымыраар.

ИЕГОВА КӰНДӰЗЕК КУДАЙ

3. а) Иегованыҥ баштапкы айылчызы кем болгон? б) Иеговада ла оныҥ баштапкы айылчызында кандый сезимдер болгон?

³ Иегова озо баштап јаҥыскан болгон. Оноҥ ол Уулын јайаган. Анайып, оныҥ айылына баштапкы айылчы келгенине Иегова сӱреен тыҥ сӱӱнген. Иисуска да Адазыныҥ јанында болорго сӱреен јарап туратан (Укаа 8:30).

4. Иегова бойыныҥ байканына база кемдерди кычырган?

⁴ Кийнинде Иегова ангелдер јайап, олорды база бойыныҥ байканына кычырган. «Кудайдыҥ бу уулдары» Адазыныҥ јанында болгонына тыҥ сӱӱнген (Иов 38:7; Дан. 7:10). Айдарда, Иегова байканына озо баштап јӱк ле теҥеридеги јайаандарын кычырган.  Оныҥ кийнинде, јайаган улузын кычырган. Андый улустыҥ тоозында Енох, Ной, Авраам ла Иов болгон. Кудай олорды најыларым деп айткан. Нениҥ учун дезе бу улус Иегованыҥ табыла јӱрген (Баш. 5:24; 6:9; Иов 29:4; Иса. 41:8).

5. Иезекииль 37:26, 27-деги судурдаҥ нени билерис?

⁵ Иегова бойыныҥ байканына јаҥы айылчыларды туку качаннаҥ бери кычырып јат. (Иезекииль 37:26, 27 кычырыгар.) Иезекиильдиҥ судурыла болзо, Иегова бойыныҥ чындык ишчилериле јуук колбуларлу болорго турганы кӧрӱнет. Ол олорло «амырдыҥ јӧптӧжӱзин» тургузарым деп сӧзин берген. Айдарда, келер ӧйдӧ майлаткандар ла јерде ӱргӱлјиге јӱретен ижемјилӱ улус «јаҥыс ӱӱр» болор ло Кудайдыҥ байканында кожо јадар деп судурлалып калган (Иоанн 10:16). Бу ӧй башталып калган!

КУДАЙ АЙЫЛЧЫЛАРЫН КИЧЕЕП ЈАТ

6. Кижи качан Иегованыҥ байканында айылчы болуп калат ла бу байкан кайда турат?

⁶ Библиялык ӧйлӧрдӧ байкан — амырап алатан ла јутту ӧйдӧ коруланатан јер болгон. Байканныҥ ээзи келген кижини кӱндӱлеп туратан. Анайып ла ок бис Иеговага јӱрӱмисти учурлап, оныҥ байканына келген улус болуп каладыс (Сар. 61:4). Бу байканда бис јӱзӱн-јӱӱр кӧгӱс курсак јип јадыс ла башка-башка айылчыларла куучындажып јадыс. Иегованыҥ байканы кандый бир географический јерде турбай јат. Оныҥ учун ары кайда ла јадып турган улус кирер аргалу (Ачыл. 21:3). Слер ӧскӧ ороондӧӧн, темдектезе аҥылу курултайга барып јӱрген болзоор, Иеговага слер ле чилеп иштеп турган ака-эјелерге јолугадаар. Олор база Иегованыҥ айылчылары болуп јат.

7. Иегованыҥ чындык ишчилери божоп то калза, оныҥ байканында артат деп нениҥ учун айдарга јараар? (Јурукты база кӧрӱгер.)

⁷ Иегованыҥ божоп калган чындык ишчилери керегинде нени айдарга јараар? Олор эмдиге ле јетире Иегованыҥ байканында ба? Эйе. Нениҥ учун анайып айдарга јараар? Нениҥ учун дезе олор Иегованыҥ кӧзинде тирӱ. Мыны бис Иисустыҥ айткан сӧстӧринеҥ кӧрӧдис: «Кӱйӱп  јалбыраган јыраа керегинде куучынында Моисей Кайраканды „Авраамныҥ Кудайы, Исаактыҥ Кудайы ла Иаковтыҥ Кудайы“ деп адап, ӧлгӧн улус тирилер деп кӧргӱскен. Је Кудай — ол ӧлгӧндӧрдиҥ Кудайы эмес, ол эзен јӱргендердиҥ Кудайы. Кудайга олордыҥ ончозы тирӱ» (Лука 20:37, 38, ЈТ).

ИЕГОВА АЙЫЛЧЫЛАРЫН КАНАЙЫП КОРУЛАЙТ ЛА ОЛОРДОҤ НЕНИ САКЫЙТ?

8. Иегованыҥ байканындагы улус кандый кору алат?

⁸ Кижи байканда јут-јулакайдаҥ коруланып јат ла амырап алат. А Иегованыҥ байканындагы улус кӧгӱс јанынаҥ коруда болот ло келер ӧйгӧ ижемјилӱ јӱрет. Бис Иегованыҥ байканынаҥ чыкпазаас, Сатана биске каршу јетирип болбос (Сар. 31:23; 1 Иоанн 3:8). Карын, бисти келер ӧйдӧ Иегова кӧгӱс каршунаҥ корулаар, керек дезе ӧлӱмнеҥ де корулаар (Ачыл. 21:4).

9. Иегова бойыныҥ айылчыларынаҥ нени сакыйт?

⁹ Иегованыҥ байканына кирген кижи оныҥ јуук најызы болот. Мындый колбулар јажын-чакка улалар аргалу. Бу биске сӱреен јаан кӱндӱ болот. Мындый кӱндӱ учун быйанысты канайып кӧргӱзерис? Темдектезе, слерди кем-кем айылыдӧӧн кычырза, слер ондо бойоордыҥ ээжилереерди тургуспай јадаар не. Ол кижиниҥ айылында, кирип келген улус ӧдӱк уштыыр учурлу болзо, слер анайып ла эдедеер дезеер? Анайда ла ок Иегова бойыныҥ айылчыларына некелтелер тургузат. Бис Иегованы сӱӱп турганыстаҥ улам, «оныҥ кӱӱнин бӱдӱрерге» турганыстаҥ улам бу некелтелерди бӱдӱрип јадыс (Кол. 1:10, ЈТ). Чын ла, Иегова — бистиҥ Најы. Је ол анайда ок бистиҥ Адабыс ла Кудайыс болот (Сар. 25:14). Оныҥ учун оны тоор керек. Биске мыны бир де ундыбай, оноҥ айап јӱрер керек. Айап јӱрзеес, Иегованы керектерисле ачындырбазыс ла јаман немедеҥ тууралап турарыс. Нениҥ учун дезе бистиҥ амаду — Кудайысла кожо «јобош болуп јӱрери» (Мих. 6:8).

ИЕГОВА АЛДЫНДА ӦЙДӦ КЕМДИ ДЕ ЫЛГАБАГАН

10, 11. Иегова Синай деп чӧлдӧ бастыра израильтяндарга бир тӱҥей баштанган деп нениҥ учун айдарга јараар?

¹⁰ Иегова айылчыларына бир тӱҥей баштанат (Рим. 2:11). Мыны Иегова Синай деп чӧлдӧ бойыныҥ албатызына канайып баштанганынаҥ кӧрӧдис.

¹¹ Иегова израильтяндарды Египеттиҥ кулданыжынаҥ јайымдаган кийнинеҥ олорго агару байканды тутсын деп јакару берген ле абыстарды ла левиттерди ондо иштезин деп кӧстӧп салган. Иегова агару байканда иштеген ле оныҥ јанында јаткан улусты, ӧскӧ айылчыларына кӧрӧ, јакшы кичееген бе? Јок! Нениҥ учун дезе Кудай кемди де талдабай јат.

12. Иегова бойыныҥ албатызында кемизин де ылгабаган деп недеҥ кӧрӱнет? (Чыгыш 40:38). (Јурукты база кӧрӱгер.)

¹² Израильтян кижи лагерьдиҥ кажы да тужында јаткан болзын, кандый да молјулу болгон болзын, Иегованыҥ најызы болор аргалу  болгон. Темдектезе, ончо албаты агару байканныҥ ӱстинде турган булутты ла отту столмоны кӧрӱп туратан. (Чыгыш 40:38 кычырыгар.) Булуттыҥ кӧдӱрилгени лагерьдиҥ кырында да јаткан улуска кӧрӱнген. Бу олорго улустаҥ артпаска, јӧӧжӧзин тӱрген јууп ийерге болушкан (Тоол. 9:15—23). Анайда ок кажы ла кижиге эки мӧҥӱн амыргыныҥ ӱни угулып туратан (Тоол. 10:2). Оноҥ улам улус јолго атанар керек деп аайлап ийетен. Је кем де, агару байканга јуук јаткан кижиниҥ Иеговала колбулары, арткан улуска кӧрӧ, бек болгон деп сананып турган болор. Је бу јастыра санаа. Нениҥ учун дезе Иегова јаҥы тӧзӧлгӧн албатыда кемди де ылгабаган. Карын ол кажы ла кижини корулаган. Анайып ла бӱгӱнги кӱнде, бис кайда да јадып турган болзоос, Иегова бистиҥ кемибисти де артыргыспас деп ле башкартузын берер деп алаҥзыбас аргалу.

ИЕГОВА БӰГӰНГИ ДЕ КӰНДЕ КЕМДИ ДЕ ЫЛГАБАЙ ЈАТ

13. Иегованыҥ улусты бӱгӱнги де ӧйдӧ ылгабай турганы недеҥ кӧрӱнет?

¹³ Бӱгӱнги кӱнде Кудайдыҥ ишчилериниҥ кезиги тӧс башкаруныҥ јанында эмезе Керечилердиҥ Бет-Элдериниҥ бир бирӱзиниҥ јанында јадат. А та кем де анда иштеп јат. Оныҥ учун андый ака-эјелер Бет-Элдиҥ башка-башка отделдеринде болужат ла каруулу јаан иштер бӱдӱрип турган акаларла куучындажат. А та кем де јорыкчы кӧрӧӧчиниҥ ижин бӱдӱрет ол эмезе ӧйин толо берип иштеериниҥ кандый ла бӱдӱмдерине туружат. Андый иштерде турушпай турган болзоор, бир де санааркабагар. Слер — Иегованыҥ айылчылары. Ол слерди ончогорды сӱӱп јат. Иегова кажыбыска  ла ајару эдет. Кудайдыҥ албатызында кӧгӱс курсакты, башкартуны, коруны кажы ла кижи алат (1 Пётр 5:7).

14. Иегованыҥ кемди де ылгабай турганы база недеҥ кӧрӱнет?

¹⁴ Иегованыҥ кемди де ылгабай турганы база бир немедеҥ кӧрӱнет. Бӱгӱнги кӱнде Агару Бичикти бастыра јердиҥ улузы кычырар аргалу. Бу бичик еврей, арамей ле грек тилдерге бичилген. Је Агару Бичикти ӧскӧ тилдерге кычырып турган улустыҥ Иеговала колбулары бу ӱч тилди билер улустыҥ колбуларынаҥ уйан деп айдып болорыс па? Јок. Андый эмес! (Матф. 11:25).

15. Иегованыҥ кандый ла улусла најылажарга турганы недеҥ кӧрӱнет? (Јурукты база кӧрӱгер.)

¹⁵ Бис јебрен тилдерди де билбес болзоос, бийик ӱредӱлӱ де эмес болзоос, Иегованыҥ најызы болор аргалу. Агару Бичикти билерге, профессор до болоры керек јок. Иегова оны канча муҥ тилдерге кӧчӱртип салган. Оныҥ учун бастыра јердиҥ ӱстиндеги улус Кудайды јакшы билип алар аргалу ла оныҥ јӧптӧрин тузаланар аргалу (2 Тим. 3:16, 17).

ИЕГОВАНЫҤ БАЙКАНЫНАҤ ЧЫКПАГАР

16. Апостолдордыҥ ижи 10:34, 35-ле болзо, Иегова бойыныҥ айылчыларынаҥ нени сакыйт?

¹⁶ Иегова бисти бойыныҥ байканына кычырганына бис јаан быйанду болодыс. Ол эҥ ле јалакай, эҥ ле сӱӱштӱ ле эҥ ле кӱндӱзек. Анайда ок кемди де ылгабай турган Кудай. Ол бойыныҥ байканына кандый ла улусты кычырат: эр ле ӱй улусты, ӱредӱлӱ де, ӱредӱ јок то улусты, башка-башка укту-тӧстӱ улусты, јажы јаан да, кичинек те улусты, башка-башка јерде де јадып турган улусты. Је оныҥ айылчылары оны тоор деп, ол кӱӱнзеп турган. (Апостолдордыҥ ижи 10:34, 35 кычырыгар.)

17. Келер јӧрмӧлдӧ нени билип аларыс?

¹⁷ Сарын 15:1-де Давид мынайда сураган: «О Иегова, сениҥ байканыҥда кем айылчы болор? Сениҥ агару тууҥда кем јадар?» Анайда ок ол агару тынныҥ болужыла бу сурактардыҥ карууларын бичип салган. Келер јӧрмӧлдӧ бис 15-чи Сарынды тереҥжиде кӧрӱп, Иегова бойыныҥ айылчыларынаҥ нени сакып турганын кӧптӧдӧ билип аларыс.