LALENGOEN LALAKAW 23
RADIW 28 Mala Widang ni Yihofa
Mitahidangay ci Yihofa Kitaanan Tayra Cingranan Malo Lafang
‘O pakopangan Ako itiniay i lalomaˈ nangra, mamalo Kawas nangra Kako.’ —ICIKIL 37:27.
KALIMLAAN NO LALAKAW
Cipinang itini pakopangan ni Yihofa malo lafang o manan ko tatodong, ato malo Tawki ci Yihofa sasamaan midimokos kitaanan.
1-2. Mihadakay ci Yihofa i madimadiay sikawdan Ningra to maanan satahidang?
SASAMAAN kiso somowal to kalalaˈed iso aci Yihofaan hani? Saan ko sowal iso alatek: “O Wama ako ci Yihofa, o Kawas ako, o Widang ako.” Tatano o romaho a ngangan ko sapangangan iso somowal to kalalaˈed iso Cingranan alatek. Kawra na maharatengay iso, o lafang kiso, Cingra o mitahidangay tisowanan malo lafang a Tawki hokira?
2 Palinian no Hongti ci Tafiti ko kalalaˈed ni Yihofa ato madimadiay a sikawdan to tawki ato lafang. Sanay cingra: ‘Yihofaaw, o cima ko mamisalafang i pakopangan Iso? O cima ko ngangaˈay mikilomaˈ i fangcalay lotok Iso?’ (ˈOlic 15:1) Mikitini toniya sinael mahapinangay ita, wa ngaˈay malo widang ni Yihofa kita, tayra Cingranan malo lafang. Ngaˈay matahidang ni Yihofa, tada kalikoanto konini!
HALAMHAMAY CI YIHOFA KITAANAN MALO LAFANG NINGRA
3. Cima ko saka cecay a lafang ni Yihofa hani? Samaanay ko kalalaˈed ningra aci Yihofaan hani?
3 Itini ˈayaw no misangaˈ to maamaan i, cecayay ci Yihofa materek. Tahini i cecay laliyadan, misangaˈay Cingra to saka cecay a Wawa, hanaca itini sapatinako a tatodong mitahidang tonini a Wawa micomod i pakopangan Ningra, malo saka cecay a lafang Ningra. Malo Tawki, tada lipahakay ci Yihofa, tada maolahay Cingra tonini a Wawa, ano Wawato Ningra i, ‘marariday a lipahak i kaˈayaw Ningra.’—Taneng 8:30.
4. Mitahidangayho ci Yihofa to cimaanan malo lafang i pakopangan Ningra hani?
4 Ikorto, misangaˈay ci Yihofa to romaroma coyoh, micada cangranan malo lafang Ningra. Panganganan no Fangcalay Cudad koniya coyoh to ‘ˈalomanay wawa no Kawas,’ hanaca somowal to lipahakay cangra malacafay to Kawas. (Yopu 38:7; Taniil 7:10) Itini halafinay a tatokian, o widang no Kawas i, edengan oya kalacafayay Cingranan a ˈalomanay coyoh i kakarayan. Ikorto, misangaˈay ci Yihofa to tamdaw itini fafekang no cikiw, mitahidangay to tamdaw malo lafang Ningra. O lafang Ningra, mahawpay ci Inok, Nowa, Apraham aci Yopu, madimadiay cangra a midoko to Kawas, ‘kalacafayay to Kawas,’ malo widang no Kawas.—Satapangan 5:24; 6:9; Yopu 29:4; Isaya 41:8.
5. Mikitini Icikil 37:26, 27 a sapairasol mahapinang ita ko maanan hani?
5 Pinaay caˈol mihecaan, padadotocay ci Yihofa mitahidang to widang tayra i Cingranan a misalafang. (ˈOsien ko Icikil 37:26, 27.) Mikitini sapairasol ni Icikil ngaˈay mahapinang ita, soˈlinay a halamham ci Yihofa to madimadiay sikawdan Ningra, ira ko tangongolay a noka lawidang Cingranan, mikiˈokay Cingra ‘wa patireng to dipayalay rihadayay a sakiˈok cangranan.’ O tatodong noniya sapairasol, ano maraod ko toki, o polong madimadiay midoko ci Yihofaan a tamdaw, ano tatayrato i kakarayan, anca itini fafekang no sera tahadaˈoc maˈorip i, o ‘mamalo cecayto a ˈopo,’ lipahakay a misalafang itini pakopangan ni Yihofa. (Yohani 10:16) Mitoroˈan nonini a sapairasol i, o aniniay a lintad!
ANO ICOWAAYTO KO KITIRAAN, MAMILIFOK TO SADIPOT NO KAWAS
6. (1) O tamdaw sasamaan malo lafang ni Yihofa hani? (2) Icowaay ko pakopangan ni Yihofa hani?
6 Itini nolitengan, o pahanhanan no tamdaw ko pakopangan, ngaˈayayho miˈading to fali ato ˈorad, itiniay pakopangan misalafang a tamdaw, oha mamicada to ngaˈayay a pidimokos no tawki. Patafangto kita to tireng ci Yihofaan ikor, itiniayto kita i no sapatinako a pakopangan Ningra a malo lafang. (ˈOlic 61:4) Itini pakopangan ni Yihofa, iraay ko kadofahay sapahaled to pakasoˈlinay falocoˈ a ‘kakaenen,’ iraayho ko roma lafang malacafay kitaanan. O pakopangan ni Yihofa cowa ka saˈosi ko kitiraan. O madimadiay midoko ci Yihofaan a tamdaw ano icowaayto ko kitiraan, iraay itira ko pakopangan ni Yihofa. (Paˈarawan 21:3) Tinakoen, ano mirienang kiso to mikiriwiˈay kasapala taykay i roma kitakit, maedeng malitemohay ko romaroma lipahakay a lafang i pakopangan ni Yihofa.
7. Oya mapatayayto a madimadiay sikawdan no Kawas kamayan o lafang no pakopangan no Kawas, hano saan ko sowal hani? (Nengnengen ko coka.)
7 Oya mapatayayto a madimadiay sikawdan no Kawas sasamaan hani? Kamayan o lafang no pakopangan no Kawas cangra han? Hayi. Hano saan ko sowal hani? Samanen maˈoripay cangra i harateng no Kawas. Sowal ni Yis: ‘O patikolay maˈorip a demak, itini cekacekaan a maˈoningay ni Mosi na masowalayto. Panganganan ni Mosi ci Yihofa to “Kawas ni Apraham, Kawas ni Isak, Kawas ni Yakop.” Cowa ko Kawas no mapatayay tamdaw Cingra, ao Kawas no maˈoripay tamdaw, samanen itini pinengneng Ningra, sahtoay o maˈoripay cangra.’—Luka 20:37, 38.
O mapatayayto a madimadiay sikawdan itini pinengneng no Kawas kamayan o lafang i pakopangan Ningra (Nengnengen ko saka 7 fatac)
IRAAY KO SAPALEMED, IRAAY KO ˈINORONG
8. Itiniay i pakopangan ni Yihofa a lafang mamilifok to maanan sapalemed hani?
8 O soˈlinay a pakopangan ngaˈayay miˈading to fali ato ˈorad, parihaday to tamdaw a pahanhan. Malecaday, o pakopangan ni Yihofa pairaay to sadipot i lafang Ningra, ho eca ka madokaˈ ko kalawidang nangra ato Cingranan, ngaˈayho padama cangranan ira ko hatokel noikor. Edeng materek kita i tatihi ni Yihofa, materek i pakopangan Ningra i, caayto ka ngaˈay ci Satan paira to midaˈocay a pidokaˈ kitaanan. (ˈOlic 31:23; 1 Yohani 3:8) Noikor itini i faelohay a hekal, wa adihayho ko sapafeli ni Yihofa a sadipot i madimadiay Cingranan a tamdaw, mangalef oha mamisongilaˈ padama cangranan mihepol to saroero no patay.—Paˈarawan 21:4.
9. Halamhamay ci Yihofa to lafang Ningra sasamaan ko pidemak hani?
9 Itini kita i pakopangan ni Yihofa misalafang, ngaˈay ira ko tanektekay halafinay kalawidang Cingranan, tada kalikoan koni. Ano ciharatengay kita sapadadotocaw malo lafang ni Yihofa i, papairaen ko masamaanay a waywayan hani? Tinakoen, tayra kiso i lomaˈ no tao misalafang i, maedeng sakafanaˈaw to iraay ko maanan saˈosi no cilomaˈay. Ano misaali ko tawki tisowanan micomod i lomaˈ i, helongen ko cokap sa i, wa makahi kiso a midofdof. Malecaday, sakafanaˈaw kita halamhamay ci Yihofa samaan ko pidemak no lafang Ningra, hanaca makalim a midofdof. Tona maolahay ci Yihofaan, mansa makalimay kita itini i ‘kihcod a demakan pakahemek Cingranan.’ (Kolosay 1:10) Soˈliˈlin o Widang ita ci Yihofa, nikawrira o Kawas ato Wama ita Cingra, citatodongay to hakakangodoen no mita. (ˈOlic 25:14) O haharatengen ita konini, tocerid pairaen ko mikangodoay a falocoˈ Cingranan. Mihaen, cowato ko mamidemak kita to maanan a pakararaw to Kawas, ngangaˈay kita padadotoc ‘misamiming ko falocoˈ a malacafay to Kawas.’—Mika 6:8.
MIKITINI NOLITENGAN A TINAKOAN MIHAPINANG COWA PISAKAKINIH CI YIHOFA
10-11. O manan ko paihkalay to caay ka pisakakinih ci Yihofa hani?
10 Malecalecaday ko picada ni Yihofa to polong a lafang Ningra. (Loma 2:11) Pakayni toninian, nengnengen ita itini kohkohan no Sinay, samaanay ko picada ni Yihofa to Israil tamdaw.
11 Lidongen ni Yihofa ko Israil tamdaw miliyas to kala koli i Icip ikor, minilnilay to saysi matayal itini fangcalay pakopangan, miocorayho to Lifi a tamdaw misimaw to milingatay to fangcalay pakopangan a tayal. Kawra, oya matayalay itini fangcalay pakopangan a tamdaw, anca mingataay to fangcalay pakopangan ko pikilomaˈan a tamdaw, cowa ka pilifok to mikiriwiˈay a pidimokos ni Yihofa, samanen cowa ka pisakakinih ci Yihofa.
12. Ihkalen a mitadtad, itini kohkohan ci Yihofa samaanay tano caay ka pisakakinih a pakayraan micada to Israil tamdaw. (Kasadakan 40:38) (Nengnengen ko coka.)
12 Kahacecay itiniay i taloˈan ko kitiraan a Israil tamdaw, ano matayal itiniay i fangcalay pakopangan anca mingataay to fangcalay pakopangan, ngangaˈay palahad to tangongolay kalawidang ci Yihofaan, micada to sadimokos Ningra. Tinakoen, paˈarawan ni Yihofa ko polong a Israil tamdaw to fafekangay no fangcalay pakopangan a toˈem to romiˈad, to dadaya ira ko likat no namal. (ˈOsien ko Kasadakan 40:38.) Ano malinah ko toˈem i, oya maraayay ko taloˈan a Israil tamdaw pakaˈaraway cangra, ngaˈay cangra milosimet to taloˈan ato dafong, dotoc malacafay to ˈalomanay a malingad. (Saˈosi 9:15-23) Ano masoni ko tosa linkim a laepa, patalipaˈelal to ˈalomanay mamalingadto i, ihkalay a matengil no polong a tamdaw. (Saˈosi 10:2) Ihkalay mahapinang, ano mangataay ko kitiraan no cecay tamdaw to fangcalay pakopangan, cowa ka mitaypiyaway to ikakaay ko kangaˈay no kalalaˈed ci Yihofaan, miraayay ko kitiraan a tamdaw cowa ka pitaypiyaw to tatiihay ko kalalaˈed ningra ci Yihofaan, soˈlinay haw i, o kahacecay Israil tamdaw ngaˈayay malo lafang ni Yihofa, hanaca micada to sakayat ato sadipot Ningra. Malecaday anini, ano icowaayto ko kitiraan ita, ngangaˈay micada to olah ato sadipot ni Yihofa.
Milingatay to fangcalay pakopangan a limasmas paihkalay to caay ko misakakinihay ko Kawas (Nengnengen ko saka 12 fatac)
MIKITINI ANINIAY LINTAD A TINAKOAN MIHAPINANG COWA PISAKAKINIH CI YIHOFA
13. Anini samaanay ci Yihofa paihkal to caay ko misakakinihay a Kawas Cingra hani?
13 Anini, i lalomaˈ no finawlan no Kawas, o romaroma tamdaw matayalay i Congpo anca i fenpo, o roma tamdaw itiniay i ngata ko kitiraan, hato ngaˈayay cangra midama to tayal itira, ngaˈayho macacawmaˈ to mikeriday a faˈinayan salikaka. Roma i, o roma salikaka mirienangay to milisoˈay to kasakilac a tayal, anca roma mieminay to toki a tayal no likakawa. Kawra ano malecaday kiso to ˈalomanay salikaka, awaayho ko toki ato tatodong mihaen to demak, ngangaˈay pakasoˈlin kiso kamayan o lafang ni Yihofa kiso, tada maolahay ci Yihofa tisowanan. Ciharatengay Cingra to kahacecay itiniay pakopangan Ningra misalafang a tamdaw. (1 Pitiro 5:7) O kahacecay midokoay ci Yihofaan a tamdaw ngangaˈay mikitira Cingranan milifok to sapahaled to pakasoˈlin no falocoˈ a kakaenen, ngaˈayho micada to sakayat ato sadipot Ningra.
14. O roma paihkalay to cowa pisakakinih ci Yihofa a tinakoan o manan hani?
14 O roma cowa pisakakinih ci Yihofa a tinakoan i, o kahacecay tamdaw i paro no kakarayan, ngangaˈay cipinang miˈosi to Fangcalay Cudad. Soˈliˈlin o Fangcalay Cudad tano Hipray, Arami ato Krisiya a sowal tiliden, nikawrira cowa ka paihkal konini, oya mafanaˈay miasip tono telangay sowal no Fangcalay Cudad a tamdaw, ikakaay ko kangaˈay no kalalaˈed nangra ci Yihofaan.—Matay 11:25.
15. Milingatay to Fangcalay Cudad a soˈlinay demak samaanay mitadtad to caay ka pisakakinih ci Yihofa micada to tamdaw hani? (Nengnengen ko coka.)
15 Mihaydaay ci Yihofa kitaanan hokira, cowa ko hakowaay ko pitakcian ita anca inaneng a somowal ko palinian. Cowa koya ˈakawangay aca ko picudadan a tamdaw ko ngangaˈay minanam to taneng no Fangcalay Cudad, soˈlinay haw i, mihayiay ci Yihofa to paro no kakarayan a tamdaw, ano samaanayto ko picudadan, ngangaˈay cipinang a miasip to taneng no Fangcalay Cudad. O Fangcalay Cudad mihongyakan to pinaayto caˈol ko kasasiroma no sowal, mihaenay ano icowato ko kitiraan no tamdaw, ngangaˈay mikitini i Fangcalay Cudad milifok to epoc, ngaˈayho minanam to sasamaan malo widang no Kawas.—2 Timoti 3:16, 17.
Mihongyakan ko Fangcalay Cudad to pina caˈol a sasowalen, samaanay konini paihkal to caay pisakakinih ci Yihofa hani? (Nengnengen ko saka 15 fatac)
PADADOTOC ITINI PAKOPANGAN NI YIHOFA MISALAFANG
16. Mikitini Dmak 10:34, 35, sasamaan ko pidemak ita ngaˈ cadaen ni Yihofa kita hani?
16 Ngaˈay itini pakopangan ni Yihofa misalafang, tada o kalikoanto konini! O sasidaˈitay, o saciolahay, o hinalafangay a tawki Cingra. Hanaca, caay ka pisakakinih Cingra. Ano kaemangho, malitengayto, faˈinayan, fafahiyan, o maanan a finacadan, ano icowato ko kitiraan, icowaay ko kalomahadan, anca hakowaay ko picudadan, halamhamay Cingra kitaanan malo lafang Ningra. Kawra, edengan oya midofdofay Cingranan a tamdaw ngaˈ makahi Cingra a micada.—ˈOsien ko Dmak 10:34, 35.
17. Sapadadotocaw misalafang i pakopangan ni Yihofa, ngaˈay kita misongilaˈ a mikingkiw to maanan hani?
17 Itini ˈOlic 15:1 milicayay ci Tafiti to tosa salicay: ‘Yihofaaw, o cima ko mamisalafang i pakopangan Iso? O cima ko ngangaˈay mikilomaˈ i fangcalay lotok Iso?’ Itini dotoc a sinael, mikayatan ni Yihofa ci Tafiti mihadak to caˈof no salicay. Dotoc a lalakaw wa ihkal a mitadtad, sapipadotocaw a misalafang itini pakopangan ni Yihofa, o manan ko tatooren ita a saali.
RADIW 32 Dopoen ci Yihofa
